John19
1Kơt iên, mông hư̆n rŏk, kăn Pi-lat ăn nêh ñư̆p Yang Yê-su jêh iên pŭ Khua Yang.2Băl ka han tañ ju mlăm đuôn mtao ta luôk. Băl ĕh lăm ndau tŏng bôk Khua Yang, jêh iên lăm sŏh ta Khua Yang ju blăh ao djha bơ brông.3Băl ĕh sak ta măt Khua Yang jêh iên ngơi: “Lôm kôh băl Mtao Yo Thaĭ!” Jêh iên hên tap Khua Yang.4Wêh ju dŏ hư̆t, Pi-lat du ling jêh iên ngơi ta băl ĕh: “Dlăng ho, ăñ ndơp nêh ho ta pu me no di pu me gư̆t nư̆k so ăñ so nơn ju mta pơp tih mŏng kăn.”5Jêh hư̆n Yang Yê-su du ling, bôk ndau đuôn luôk jêh iên sŏh ao brông. Pi-lat ngơi ta hên: “Ăn dlăng nêh ho gơñ!”6Jêh hư̆n, mŏng mông băl khua mhŏ yang ram wăt băl ka han gak so Khua Yang, hên ôr tĕh klăh iêu: “Pŏng đĭn kăn ta jhi tăm kăng! Pŏng đĭn kăn ta jhi tăm kăng!” Pi-lat ngơi ta hên: “Ăn pu me ñư̆p dêh kăn jêh iên pŏng đĭn, bơ yơng so ăñ so ju mta pơp tih nơn mŏng kăn.”7Băl Yo Thaĭ ngơi ta kăn: “Hi mau pơp bhiên jêh iên mkă hui si pơp bhiên hư̆n, kăn ho năng khư̆t bơ yơng kăn čŏng ngơp kăn tơm jêng Kuôn Yang Trôk.”8Hư̆n yơh, jai Pi-lat tŏng pơp ho, ndôl kăn bhŭng hĭn,9kăn lŏ wêh mư̆t mŏng hih khua kwar tŏ jêh iên ngơi ta Yang Yê-su: “U băh tŭk me trôh?” Ƀê̆ dăh Yang Yê-su so têh sơm pơp hư̆n ta kăn.10Hư̆n yơh, Pi-lat ngơi ta Khua Yang: “So me têh ta ăñ lăh? So me gư̆t lăh ăñ mau pơp dơi phưi me, jêh iên mau pơp dơi pŏng đĭn me ta jhi tăm kăng lăh?”11Yang Yê-su wêh ngơi ta kăn: “Me so mau ju mta pơp dơi ta ăñ ôh, ndă pơp dơi hư̆n so nai ăn ta me băh trôk jua. Yơng hư̆n yơh, nêh jao ăñ ta me mau pơp tih jŏk hĭn.”12Yơng pơp ngơi hư̆n, Pi-lat juôi truông phưi Khua Yang, ƀê̆ dăh băl Yo Thaĭ ôr tĕh, klăh iêu: “Ndă khua phưi kăn ho hư̆n khua so geh jêng jôk kuăng kăn Sê-sa ôh. Nêh tơm čŏng ngơp kăn tơm jêng mtao hư̆n jêng tăm dăng ta Sê-sa.”13Hư̆n yơh, jai jêh tŏng lĕ mơt pơp ho, Pi-lat ăn nêh đŏh Yang Yê-su du ta ling jêh hư̆n kăn gŭk tŏng jhưng phat dôih ta tŭk nai năn jêng “Hih Bôk Mau”; ƀê̆ dăh mŏng pơp ngơi Hi-ƀă-lai jêng “Ga-ƀa-tha”.14(Mông hư̆n jêng nar nai prê ta Mar Găn Gao. Mông hư̆n năng ai mông tal pro.) Kăn ngơi ta băl Yo Thaĭ: “Ăn dlăng, mtao pu me ho!”15Ƀê̆ dăh hên ôr tĕh: “Yông kăn tŏng tê̆! Yông kăn tŏng tê̆! Pŏng đĭn kăn ta jhi tăm kăng!” Pi-lat lup hên: “Ăñ pŏng đĭn mtao pu me lăh?” Băl khua mhŏ yang ram ngơi: “Băh gu kăn Sê-sa, hi so mau mtao ôh.”16Hư̆n jêng, mŏng mông hư̆n, kăn jao Khua Yang ta hên no di tŭ nai pŏng đĭn ta jhi tăm kăng, jêh hư̆n hên ñư̆p Yang Yê-su jêh iên lăm ndơp.17Jăng jai tung jhi tăm kăng tơm, Khua Yang sak trôh ta tŭk nai năn jêng “Tŭk Ndŏh Bôk”, tŭk hư̆n mŏng pơp ngơi Hi-ƀă-lai nai năn jêng “Gôl-gô-tha.”18Nai pŏng Khua Yang ta iên, ju băk Khua Yang mau bar nau nêh dêh, ju đăh o jêh iên đăh tŏ, bơ Yang Yê-su mŏng mbar.19Mông hư̆n, kăn Pi-lat yua nêh čih ju mta pơp ngơi jêh hư̆n yông ta jhi tăm kăng. Pơp čih hư̆n klăh iêu: YÊ-SU NÊH NA-SA-RET, MTAO BĂL YO THAĬ.20Hư̆n yơh, ŏk băl Yo Thaĭ hên dlăng pơp čih ho bơ yơng tŭk nai pŏng Yang Yê-su jêng mơñ ta uôn ram. Pơp ngơi hư̆n nai čih ta dơk Hi-ƀă-lai, dơk La-tĭñ jêh iên dơk Grek.21Hư̆n yơh, băl khua mhŏ yang ram băl Yo Thaĭ ngơi ta Pi-lat: “Ei ru čih jêng ‘Mtao băl Yo Thaĭ’, ƀê̆ dăh dăn čih jêng ‘Nêh ho ngơi: “Ăñ jêng Mtao băl Yo Thaĭ.”’”22Pi-lat ngơi: “Pơp ăñ jêh čih hư̆n jêh ăñ čih ru.”23Jêh hư̆n, mŏng mông băl ka han pŏng đĭn Yang Yê-su ta jhi tăm kăng, hên sŏk blăh ao Khua Yang jêh iên tŏng phă puôn khăn — ju nau nêh ka han ju khăn — jêh iên ao djha. Ao djha hư̆n ĕh so mau truông rư̆m ôh, hư̆n jêng ju blăh mnal dŏng băh tê̆ iêu mŏng sô̆.24Hư̆n yơh, hên tŏng ngơi ndăng hên: “Man čriêk ao ho, ƀê̆ dăh ăn băn tŏng đă ta ao ho, dlăng nêh tơm jrăng dơi.” Pơp hư̆n no di pơp ngơi Ră Ƀrăh dơi ñjêng nư̆k klăh iêu:“Hên tŏng phă blăh ao ăñ,tŏng đă sŏk ao ăñ.”Jêh hư̆n băl ka han mhŏ klăh iên.25Mông hư̆n, lĕ mơt nêh jai dŏk ta kêng jhi tăm kăng Yang Yê-su mau mei Khua Yang jêh iên ŏh mi mei Khua Yang, hư̆n jêng de Ma-ri ur kăn Kơ-lê-ô-ƀa, wăt de Ma-ri Ma-đơ-len.26Mông hư̆n, jai Yang Yê-su so mei Yang di jêh iên ƀing kna Khua Yang khăp kăn gŭk ta kêng, hư̆n Khua Yang ngơi ta mei: “Wơ mei, dlăng hư̆n, hư̆n jêng kuôn tlau e di!”27Jêh hư̆n Khua Yang ngơi ta ƀing kna hư̆n: “Dlăng tŏ, hư̆n jêng mei me!” Dŏng băh mông hư̆n, ƀing kna hư̆n sŏk de du ta hih kăn tơm.28Jêh hư̆n, bơ yơng Yang Yê-su gư̆t ru djăp bruă jêh nư̆m lĕ mơt ru, no di pơp ngơi Ră Ƀrăh dơi ñjêng nư̆k, hư̆n Khua Yang ngơi: “Ăñ hêr dak.”29Mau ju mlăm thŭng nai ăn bêng dak srat ta iên, hư̆n yơh, hên sŏk ju mlăm djôp kăt ta brăm tak ñŭk bêng dak srat, hên yăr ndơp ta dơk Khua Yang.30Kơt iên, jai Yang Yê-su ƀiñ dak srat hư̆n, Khua Yang ngơi: “Djăp bruă jêh nư̆m ru!” Jêh hư̆n ngư̆n bôk mŏng sô̆, Khua Yang tôč nhăm.31Jêh hư̆n, bơ yơng nar hư̆n jêng nar prăp prê, no di tlĕh ăn săk khư̆t hôm yông tŏng jhi tăm kăng mŏng nar Sa-ƀat (bơ yơng nar Sa-ƀat hư̆n jêng nar yuôm bhăn), hư̆n yơh băl Yo Thaĭ dăn ta Pi-lat no di lăm deh ting jŏng băl hư̆n jêh iên dơi sŏk săk khư̆t.32Hư̆n yơh, băl ka han sak mơñ jêh iên bang deh ting jŏng nêh tal muôi, jêh hư̆n nêh tal bar, hư̆n jêng nêh nai pŏng đĭn ju băk ta Khua Yang.33Ƀê̆ dăh jai trôh ta tŭk Yang Yê-su, băl ĕh so Khua Yang jêh khư̆t ru, hư̆n yơh so hên bang deh ting jŏng Khua Yang.34Ƀê̆ dăh, ju nau mŏng pôl ka han srăp tŏng pŭng dak Khua Yang ta kju, mhăč rŏk mham jêh iên dak ĕh huôr ta ling.35Nêh jêh so bruă hư̆n kăn wêh tơ têh hư̆t, jêh iên pơp têh sơm kăn di jêng ngĭn ngăn. Nêh hư̆n gư̆t klă kăn ngơi pơp ngĭn ngăn, no di ŏh mi ăt tip ya.36Bơ yơng lĕ mơt bruă hư̆n trôh no di lăm nư̆k pơp ngơi Ră Ƀrăh: “So mau ju mlăm ting Yang di jrăng deh.”37Mau tŭk dêh mŏng Ră Ƀrăh ngơi klăh iêu: “Hên jrăng dlăng iêu Mtao jêh hên srăp.”38Ta kơi bruă hư̆n, Yô-sep nêh uôn A-ri-ma-thê, jêng ju nau ƀing kna Yang Yê-su di, (ƀê̆ dăh ta pơp ndăp bơ yơng bhŭng băl Yo Thaĭ), kăn dăn Pi-lat no di sŏk săk khư̆t Yang Yê-su băh iên. Pi-lat tŭ ư. Kơt iên, kăn sak jêh iên triêu săk khư̆t Khua Yang băh iên.39Ni-kô-đem ăt trôh ta iên ya — kăn jêng nêh luôr ngăn sak tŏng tuôm Yang Yê-su mŏng tluông măng — kăn ñôt băk pơp nai lŭk dak ƀau kăh jêh iên ƀhŭk jhi lô hô̆i, năng ai ju hiêng kĭ băl Grek.40Kơt iên hên sŏk săk khư̆t Yang Yê-su băh iên jêh hư̆n put săk khư̆t ta mnal nhơ ju băk ta dak ƀau kăh, hư̆n jêng hui si pơp krĕh mưng băl Yo Thaĭ ta pơp črung khư̆t.41Gao băh iên, ta tŭk jêh Khua Yang tŭ nai pŏng đĭn mau ju lôk mir, jêh iên mŏng lôk mir hư̆n mau ƀơn tu môč mhei, ƀê̆ dăh mŏng iên ñăm mau nêh nai tăp bư̆l ôh.42Hư̆n yơh, bơ yơng nar prăp prê băl Yo Thaĭ di jêh iên yơng tu môč mơñ mơh, hư̆n hên tăp bư̆l Yang Yê-su ta iên.
FAR EAST BROADCASTING COMPANY