John20
1Ôi măng nar tal muôi mŏng si men, mông hư̆n trôk hôm ngo, Ma-ri Ma-đơ-len trôh ta tu môč jêh iên de so bôk mau jêh nai lơng băh tu môč.2Hư̆n yơh, de tuôt jêh iên de sak tŏng tuôm Si-môn Pê-trôih wăt ta ju nau ƀing kna ya, jêng nêh Yang Yê-su khăp, jêh hư̆n de têh ta hên: “Jêh nai sŏk Khua Yang băh tu môč, jêh iên so hi gư̆t u tŭk nai ăn Khua Yang.”3Jêh hư̆n Pê-trôih ta ƀing kna hư̆n du ta ling jêh iên hên sak trôh ta tu môč.4Lĕ bar nau hên dhul ju băk, ƀê̆ dăh ƀing kna hư̆n dhul mhăč hĭn kăn Pê-trôih jêh iên trôh ta tu môč luôr.5Jai jêh ngư̆n bôk dlăng mŏng sô̆, kăn so lĕ mơt mnal nhơ ĕh gŭk ta iên, ƀê̆ dăh so kăn mư̆t mŏng nuông.6Jêh hư̆n, Si-môn Pê-trôih, gre ta kơi nêh hư̆n, ăt trôh ta iên ya, kăn sak mư̆t mŏng tu môč. Kăn so lĕ mơt mnal nhơ ĕh gŭk ta iên,7bơ mnal nai put tŏng bôk Khua Yang so ĕh gŭk ju băk mnal ta nhơ, ƀê̆ dăh nai klôn ĕh gŭk dêh ju tŭk.8Jêh iên, mông, kăn ƀing kna hư̆n, jêng nêh trôh ta tu môč luôr, kăn mư̆t ya, kăn so jêh iên đăo.9Bơ yơng ñăm hên wơng pơp ngơi Ră Ƀrăh yơng ta bruă Khua Yang jrăng lŏ dŏk brêh băh tŭk khư̆t.10Jêh hư̆n, bar nau ƀing kna lŏ wêh du ta tŭk hên tơm.11Bơ de Ma-ri de dŏk ñim ta ling tu môč. Jêh iên jai de ñim, jai de ngư̆n dlăng mŏng tu môč.12De so bar nau băl myang nai sŏh ao buôk ang dơr jai gŭk ta tŭk lăm bê̆ săk khư̆t Yang Yê-su, ju nau gŭk ta bôk, jêh iên ju nau gŭk ta jŏng sô̆.13Băl myang hư̆n lup de: “Wơ rôh, pơp mhŏ e ñim?” De têh ta hên: “Bơ yơng jêh nai jan Yang ăñ băh o, jêh iên so ăñ gư̆t u tŭk hên ăn Khua Yang.”14Jêh ngơi pơp hư̆n, de wiêng săk iêu kơi hư̆n de so Yang Yê-su dŏk ta iên, ƀê̆ dăh so de gư̆t ôh hư̆n jêng Yang Yê-su.15Yang Yê-su ngơi ta de: “Wơ rôh, pơp mhŏ e ñim? Nêh tơm e juôi?” Bơ yơng de tôn hư̆n jêng nêh mhŏ mir, hư̆n de ngơi: “Wơ kôñ, ndă me jêng nêh jan Khua Yang băh o, dăn sơm ta ăñ u tŭk me ăn Khua Yang, jêh hư̆n ăñ jrăng triêu Khua Yang du.”16Yang Yê-su kuôl de: “Ma-ri.” Jai wiêng ta kơi, de ngơi ta Khua Yang ta dơk Hi-ƀă-lai: “Ra-ƀu-ni” (lơ lang pơp ngơi hư̆n jêng: “Khua tơ ti”).17Yang Yê-su ngơi ta de: “Man bi ta săk ăñ, bơ yơng ăñ ñăm du ta Bap ƀă; ƀê̆ dăh ăn e sak tŏng tuôm ta găp mi ăñ jêh iên ngơi ta hên klăh iêu: ‘Ăñ jrăng du ta Bap ăñ ăt jêng Bap pu me ya, jêh iên Yang Trôk ăñ ăt jêng Yang Trôk pu me ya.’”18Ma-ri Ma-đơ-len sak, têh sơm ta băl ƀing kna klăh iêu: “Jêh ăñ so Khua Yang,” jêh iên lĕ mơt pơp Khua Yang jêh tơ tă ta de.19Jêh hư̆n, trôh mơ mho năng hư̆n, jêng nar tal muôi mŏng si men, jêh iên grăp ƀăng hih jêng tŭk băl ƀing kna gŭk hên čăng lĕ mơt bơ yơng hên bhŭng băl Yo Thaĭ, mông hư̆n Yang Yê-su trôh jêh iên dŏk mŏng mbar hên jêh iên Khua Yang ngơi ta hên: “Đăp nang ta pu me.”20Jêh ngơi pơp hư̆n, Khua Yang ăn hên dlăng bar đăh ti jêh iên pŭng dak Yang di. Mông hư̆n, băl ƀing kna mau pơp čhô̆ brơn jai hên so nư̆k Khua Yang.21Jêh hư̆n Khua Yang wêh ngơi ta hên: “Đăp nang ta pu me. Đô̆ nă Bap yua ăñ, hư̆n ăñ ăt yua pu me klăh iên ya.”22Jêh iên jai jêh ngơi pơp hư̆n, Khua Yang drôh nhăm tŏng hên jêh iên ngơi ta hên: “Ăn sŏk dơn Yang Ngăt Găl.23Đơ nêh tơm pu me ndrŏh tih un, hư̆n pơp tih hên dơi ndrŏh un; đơ nêh tơm pu me kŏng pơp tih, hư̆n pơp tih hên ăt hôm iên ya.”24Ƀê̆ dăh Thô-ma, ju nau mŏng măt bar nau ƀing kna, nêh nai krĕh kuôl jêng Đi-đim, so gŭk băk hên jai Yang Yê-su trôh.25Hư̆n yơh, băl ƀing kna dơ dêh ngơi ta kăn: “Jêh hi so ru Khua Yang.” Ƀê̆ dăh kăn ngơi ta hên: “Ndă so ăñ so têl đĭn ta ti Khua Yang, jêh iên ăn kuôn ti ăñ mŏng têl đĭn hư̆n, jêh hư̆n bi ti ăñ ta pŭng dak Khua Yang, hư̆n ăt so ăñ tip ya.”26Pham nar ta kơi băl ƀing kna Khua Yang wêh gŭk mŏng hih, jêh iên kăn Thô-ma gŭk băk hên. Mông hư̆n grăp ƀăng hên čăng lĕ mơt, Yang Yê-su trôh jêh iên gŭk mŏng mbar hên jêh iên Khua Yang ngơi: “Đăp nang ta pu me.”27Jêh hư̆n, Khua Yang ngơi ta Thô-ma: “Ăn me bi kuôn ti me ta o jêh iên dlăng plang ti ăñ. Jêh iên sŏk ti me bi ta pŭng dak ăñ. Ei ru mhŏ krăk nuih, ƀê̆ dăh ăn đăo.”28Thô-ma boh pơp jêh iên ngơi ta Khua Yang: “Wơ Yang ăñ jêh iên Yang Trôk ăñ ji.”29Yang Yê-su ngơi ta kăn: “Bơ yơng jêh me so ăñ, hư̆n me đăo. Găl jôn ta nêh tơm ñăm so ƀê̆ dăh đăo.”30Jêh hư̆n, Yang Yê-su wêh mhŏ ŏk pơp ndrơh myang dơ dêh ta măt băl ƀing kna Khua Yang, ƀê̆ dăh lĕ mơt bruă hư̆n so mau čih mŏng ră ho;31ƀê̆ dăh lĕ mơt pơp ho dơi čih no di pu me gư̆t nư̆k Yang Yê-su jêng Yang Tŏng Tlĕh, Kuôn Yang Trôk, jêh hư̆n ăn pu me dơi mau pơp brêh jai đăo ta năn Khua Yang.
FAR EAST BROADCASTING COMPANY