Дан13
1[Вавилонышто Иоаким лӱман пӧръеҥ илен.2Тудо Хелкийын Сусанна лӱман ӱдыржым марлан налын. Тудыжо пеш мотор да Юмо деч лӱдшӧ лийын.3Тудын ача-аваже чын ыштыше лийыныт, нуно ӱдырыштым Моисейын законжылан туныктен шогеныт.4Иоаким пеш поян улмаш, пӧртшӧ воктене сад-пакчаже лийын. Иоаким деке иудей-влак погыненыт, вет тудо нунын коклаште эн пагалыме еҥ лийын.5Тудо ийын калык кокла гыч судьялан кок кугуракым шогалтеныт. Нунын нерген Господь тыге каласен: «Вавилонышто судитлыше кугурак-влак деч осал паша лектын, нуно калыкым вуйлатышаш улыт улмаш».6Нуно Иоакимын пӧртыштыжӧ чӱчкыдын лийыныт. Кӧн ӱчашымашым лукшо пашаже лийын, чыланат нунын дек толыныт.7Кечывал лишан калык каен пытымеке, Сусанна марийжын сад-пакчашкыже лектын коштын.8Кок кугурак тудын тушко лекмыжым да коштмыжым кажне кечын ончен, да нунын тудын дек кап кумыл сутланымаш шочын.9Ушым йомдарен, нуно кавашке ончен кумалмыштым чарненыт да чын суд нерген шонымышт деч кораҥыныт.10Когыньыштымат Сусанна дек кугу сутланымаш авалтен, но икте-весыштлан шке орлыкыштым почын огытыл.11Вет кап кумыл шупшмышт да тудын дене малаш шонымышт нерген нуно луктын каласаш вожылыныт.12Сусаннам ужаш манын, кажне кечын тудым шинчашт дене кӱтеныт.13Нуно икте-весыштлан ойленыт: «Кечывал кочкышым ышташ жап шуын, мӧҥгӧ каена» да, лекмекышт, икте-весышт деч торленыт,14но вара тиде верышке мӧҥгеш пӧртылыныт. Икте-весышт деч пӧртылмӧ амалым йодыштмеке, нуно кап кумыл шупшмышт нерген луктын каласеныт. Тунам нуно Сусаннам шкет лиймыж годым вашлияш кутырен келшеныт.15Нуно келшыше жапым вученыт. Тунам Сусанна ончычсо семынак сад-пакчаш лектын, пеленже лач кок тарзе ӱдыр лийын, да пеш шокшылан кӧра тудо йӱштылалташ шонен пыштен.16Шылын шичше да тудым шолып ончышо кок кугурак деч моло тушто нигӧ лийын огыл.17Шке тарзе ӱдыржӧ-влаклан тудо каласен: «Мылам ӱй ден шовыным кондыза да, йӱштылалташ манын, сад-пакча капкам петырен кайыза».18Нунышт каласыме семынак ыштеныт: сад-пакча капкам петыреныт да, мом кӱштымым кондаш манын, ӧрдыжтӧ улшо омса гыч лектыныт. А шылын шичше кугурак-влакым нуно ужын огытыл.19Кунам тарзе ӱдыр-шамыч каеныт, кугурак-влак кынелыныт да Сусанна деке куржын толыныт. Нуно каласеныт:20«Теве сад-пакчан капкаже петырыме, да мемнам нигӧ ок уж. Мемнан кап кумылна тый декет ылыжын, сандене тореш ит лий, мемнан дене мале.21От келше гын, ме тыйын ваштарешет таныклена – тый денет самырык рвезе лийын, сандене тый шке тарзе ӱдырет-влаклан каяш кӱштенат манына».22Тунам Сусанна чон йӧсыж дене кычкыралын: «Мылам пеш неле, вет тидым ыштем гын, мыйым колымаш вуча, а ом ыште гын, тендан кидда деч ом утло!23Господь ончылно сулыкым ыштымешке, мылам лучо тендан кидда йымаке логалаш».24Сусанна кугу йӱкын кычкыралын, кугурак-влакат тудын ӱмбак кычкыреныт,25вара иктыже куржын каен да сад-пакча капкам почын.26Кунам пӧртыштӧ улшо-влак сад-пакча кӧргыштӧ кычкырымым колыныт, Сусанна дене мо лиймым ужаш манын, ӧрдыжтӧ улшо омса гыч куржын пуреныт.27Кугурак-влакын мутыштым колмеке, Сусаннан тарзыже-влак пеш чот ӧрыныт, вет нуно озаватышт нерген тыгайым нигунам колын огытыл.28Вес кечынже, кунам калык Иоаким дек, Сусаннан марийже дек, погынен, тушко саде кок кугуракат толыныт. Сусаннам пуштыкташ манын, нуно осал шонымаш дене темыныт улмаш.29Кугурак-шамыч калык ончылно каласеныт: «Сусаннам, Хелкий ӱдырым, Иоаким ватым, кондаш еҥым колтыза». Тудын дек каеныт.30Сусанна толын, тудын дене пырля ача-аваже, йочаже-влак, чыла родо-тукымжо толыныт.31Сусанна пеш чатка, мотор чурийвылышан лийын.32Тудын моторлыкшым ракатланен ончаш манын, нине осал еҥ-влак чурийжым почаш кӱштеныт, вет тудыжо петырыме улмаш.33Родо-тукымжо, тудын ӱмбак ончышо-влак чыланат шортыныт.34А кок кугурак, калык покшеке шогалын, ӱдырамашын вуйышкыжо кидыштым пыштеныт. 35Сусанна, шинчавӱдым йоктарен, кавашке ончен, вет тудо уло шӱм-чонжо дене Господьлан инанен.36Кугурак-влак каласеныт: «Кунам ме сад-пакчаште коштынна, тиде ӱдырамаш кок тарзе ӱдыржӧ дене тольо да сад-пакчан капкажым петырыш, а тарзе ӱдыржӧ-влакым колтыш.37Вара тудын дек тушто шылын шичше самырык рвезе тольо да тудын дене возо.38Ме сад-пакча лукышто лийынна да, тыгай осал пашам ужмеке, нунын деке куржын толна39да нуным пырля кийышым ужна. Рвезым ме кучен ыжна керт, вет тудо мемнан деч виянрак ыле да капкам почын куржо.40Но тидыжым ме руалтен кучышна да йодна: кӧ тиде самырык рвезе? Но тудо мыланна вашмутым пуаш ыш келше. Тидлан ме танык улына».41Погынышо калык нине еҥ-влаклан ӱшанен, вет нунышт калыкын кугуракше да судьяже лийыныт. Сусаннам пушташ пунчалыныт.42Тунам Сусанна кугу йӱкын каласен: «Курымаш Юмо, мо шылтымым шинчыше да чылажымат ончылгоч палыше!43Тый палет: нуно ваштарешем шойышт таныкленыт, нимом ыштен омыл гынат, мылам колаш логалеш. Нине еҥ-влак, осалым шонен, чыла тидым шонен луктыныт».44Господь тудын йӱкшым колын.45Кунам Сусаннам пушташ наҥгаеныт, Даниил лӱман самырык рвезым Юмо святой шӱлышыж дене таратен,46да тудыжо кугу йӱкын кычкыралын: «Тудын вӱржылан мый титакан омыл!»47Тунам уло калык тудын деке савырнен да йодын: «Мом тый каласышыч?»48Тунам тудо калык покшеке шогалын да каласен: «Израиль эрге-влак, тынарак шонен моштыдымо улыда мо? Молан, шымлыде да чыным пален налде, Израиль ӱдырлан тыгай пунчалым луктында?49Судым ышташ пӧртылза, вет нине тудын ваштареш шойышт таныкленыт».50Уло калык тунамак мӧҥгеш пӧртылын, чыла кугурак-влак Данииллан каласеныт: «Юмо тыйымат кугураклан шогалтен, сандене шич да мыланна умылтаре».51Даниил каласен: «Нуным икте-весышт деч умбакырак кораҥдыза, мый нунын деч йодышт налам».52Кунам нуно икте-весышт деч ойырымо лийыныт, тудо иктыжым ӱжын да каласен: «Шоҥгеммеш осалым ыштен илыше, ондак ыштыме сулыкетлан ынде мутым кучаш тӱҥалат!53Титакдыме-влакым титаканыш, а титакан-шамычым чыныш луктын, тый чын огыл судым ыштенат. А Господь тыге ойла: ”титакдымым да чын ыштышым пушташ ит пу”.54Тыгеракын, тиде ӱдырамашым ужынат гын, каласе: могай пушеҥге йымалне тый нуным пырля ужынат?» Тудыжо вашештен: «Фисташке пушеҥге йымалне».55Даниил каласен: «Чынак, тый шке вуетлан муаш шойыштынат. Юмын Суксо, Юмо деч кӱштымашым налын, тыйым покшеч руалын шелеш».56Тудым колтымеке, Даниил весыжым кондаш кӱштен да каласен: «Тый Иудан огыл, а Ханаанын тукымжо улат! Моторлык тыйым алгаштарен, кап кумыл шупшмылан кӧра ушет каен.57Тыге те Израиль ӱдыр-влак дене ыштылында, нуно лӱдмышт дене тендан дене пырля лияш келшеныт, но Иуда ӱдыр закон пудыртымыдам чыташ тӱҥалын огыл.58Тыгеже каласе мыланем: могай пушеҥге йымалне тый нуным пырля ужынат?» Тудыжо вашештен: «Кугу тумо йымалне».59Даниил тудлан каласен: «Чынак, тый шке вуетлан муаш шойыштынат. Теве Юмын Суксо, тыйым покшеч руалын шелаш манын, керде дене вучен шога. Тудо тендам пытара».60Тунам погынышо калык кугу йӱкын кычкыралын да Тудлан инаныше-влакым утарыше Юмылан чапым пуэн.61Нуно кок кугурак ваштареш шогалыныт, вет Даниил нунын шойышт таныклымыштым шке шомакышт денак чараш луктын.62Могай осалым нуно вес еҥлан шоненыт, нунын дене тугак ыштеныт – Моисейын законжо почеш пуштыныт. Тыге тудо кечын титакдыме чон утарыме лийын.63Хелкий ден ватыже, уло родо-тукымышт Иоаким веҥышт дене пырля шке Сусанна ӱдырышт верч Юмым чапландареныт, вет тудыжын титакше лийын огыл.64Тидын деч вара калык Даниилым эшеат чот пагалаш тӱҥалын.
Institute for Bible Translation, Finland