احبار10
1ہارونؔ سٕنٛدیو دوٚیو نیٚچیو، ندبؔ تہٕ ابیہوؔ ہن تُجہ وُدٕدانہِ یِمن منٛز تِمو وُدٕ زول۔ تِمو بوٚر تِمن منٛز نار تہٕ وُدٕ تھووُکھ نارس پؠٹھٕ کنہِ یوس نہٕ یہُوواہسؔ قٲبلِ قبول اوس تکیازِ تمؠ اوس نہٕ یُتھ کانٛہہ حکم دِیتُمُت۔2لہٰذا یہُوواہسؔ نِشہ دراو اچانک نار تہٕ پانس برونٛہہ کنہِ زٲلِؠن۔3موسیٰؔ ہن ووٚن ہارونسؔ، "یہُوواہؔ چُھ أتھؠ متلق کتھٕ کران ییٚلہِ تمؠ ووٚن، یِم کاہن مےٚ نکھٕ یِن: بہٕ ہاوٕ تِمن زِ تِم کرن مےٚ احترام؛ سارنے لوٗکن برونٛہہ کنہِ، بہٕ چُھس سُہ یمِس تِم احترام کرن۔" پوٚز ہارونؔ روٗد ژھوٚپہٕ کٔرِتھ۔4پتہٕ أنؠ موسیٰؔ ہن ہارونؔ سنٛدِس پؠتر عزییلؔ سٕنٛدؠ نیٚچوؠ میسائیلؔ تہٕ الصفنؔ ناد دِتھ تہٕ ونُکھ، "پننؠن پؠترین باین ہنٛزٕ لاشہِ تُلیو مقدس خٟمس برونٛہہ کنہِ تہٕ کڈیو تِم ڈیرِ منٛزٕ نیٚبر کُن۔"5أتی أننہِ تِمو لاشہِ تُلتھ یِمن ونہِ تہِ خاص کُرتنہِ لٲگتھے آسہ تہٕ کرِکھ ڈیرِ نیٚبر دفن۔6پتہٕ ووٚن موسیٰؔ ہن ہارونسؔ تہٕ تسنٛدین دوٚن نیٚچوٮ۪ن الِیعزرؔس تہٕ اِتمرسؔ، "توٚہؠ چُھو ندابؔ تہٕ ابیہوؔ سٕنٛدِس مرنس پؠٹھ غمگین، مگر توٚہؠ پزِ یِتھے پٲٹھؠ ہمیشہ پنٕنؠ کٲم تھاوِن۔ تُہنٛد مس گژھِ نہٕ پریشان آسُن تہٕ پلو مَہ دیو چاک۔ ہرگاہ توٚہہِ تہِ کریو، یہُوواہؔ سپدِ سارنے لوٗکن پؠٹھ ناراض۔ پننؠن رشتہٕ دارن تہٕ پننؠن اسرائیل کٮ۪ن دوستن دیو تِمن پؠٹھ ماتَم کرنہٕ یِم یہُوواہنؔ نارِ سٟتؠ زٲلؠ۔7مگر توٚہہِ پزِ نہٕ مقدس خٟمہ منٛز نیٚبر نیریتھ تِمن ماتم کرن والین منٛز شٲمل سپدنُ، ہرگاہ توٚہہِ تہِ کریو، تیلہِ سپدیو توٚہؠ تہِ مارٕ۔ توٚہہِ مَہ مشرٲیو زِ یہُوواہنؔ چُھو توٚہؠ تمؠ سنٛز کٲم کرنہٕ باپتھ الگ کٔرؠ مِتؠ تہٕ سُہ چُھ نہٕ یژھان توٚہؠ سپدیو ناپاک اکِس لاشہِ اتھٕ لاگنہٕ سٟتؠ۔ "لہٰذا کٔر تِمو موسیٰؔ سٕنٛدِس ووٚنس پؠٹھ عمل؛ تِمو کٔر نہٕ تِمن باقی لوٗکن سٟتؠ شرکت یِم پننؠن پتِرین باین ہنٛدِس مرنس پؠٹھ ماتم ٲسؠ کران۔8پتہٕ ووٚن یہُوواہنؔ ہارونسؔ،9"ژٕ تہٕ چٲنؠ زٕ نیٚچوؠ چھِ ونہِ تہِ زندٕ تہٕ توٚہہِ پزِ نہٕ مقدس خٟمس منٛز دٲخل سپدنہٕ برونٛہہ شراب یا بیٚیہِ کانٛہہ خمیٖرِ دار چیز چُین۔ ہرگاہ توٚہؠ تہِ کریو، توٚہؠ سپدیو مارِ۔ یہِ چُھ سُہ حکم یتھ توٚہہِ تہِ تُہنٛزِ ذُرؠ یٲژ ہمیشہ تٲبِیدٲری کرنؠ چھِ۔10توٚہہِ پزِ ہیٚچھن زِ کٔم چیز چھِ پاک تہٕ کٔم چیز چھِ ناپاک؛ پییٚہِ پزِ توٚہہِ ہیٚچُھن کٔم چیز کرِ بہٕ منظور تہٕ کٔم چیز کرِ بہٕ نامنظور۔11بیٚیہِ چھی ژٕ اسرائیل کٮ۪ن لوٗکن تِم سٲری قانون ہیٚچھٕ ناوِن یِم مےٚ تِمن موسیٰؔ سٕنٛدؠ دسؠ ووٚنُمِت چھِ۔"12موسیٰؔ ہن ووٚن ہارونسؔ بیٚیہِ تسنٛدین دوٚن نیٚچوٮ۪ن، الِیعزرؔس تہٕ اِتمرسؔ یِم ونہِ تہِ زندٕ ٲسؠ، "ٲٹِس بناونہٕ آمتہِ تمہِ نذرانہٕ منٛز تُلیو اکھ حصہٕ یوس یہُوواہسؔ پیش کرنہٕ آمُت چُھ، تہٕ کھییٚو قربان گاہس نکھٕ۔ یہِ لگہ نہٕ بدل کُنہِ جایہِ کھؠن تکیازِ یہِ چُھ سؠٹھاہ پاک۔13یہِ کھییٚو اکِس پاک جایہِ۔ یہِ چُھ تمہِ مازِ منٛز تُہنٛد حصہٕ یُس ژےٚ نذرانہٕ زولمُت چُھتھ۔ یہُوواہنؔ چُھ مےٚ یہِ ژےٚ ونُک حکم دِیتُمُت۔14مگر چٲنؠن نیٚچوٮ۪ن تہٕ کورِین چُھ سینہٕ تہٕ رٲن کھینُک اجازت یِم یہُوواہسؔ برونٛہہ کنہِ آیہِ ہیٚور کُن تُلنہٕ۔ تِم کھییٚو کُنہِ پاک جایہِ۔ ییٚلہِ اسرائیلٕکؠ لوٗکھ یہُوواہؔ سنٛزِ سلامتی خٲطرٕ نذرانہٕ پیش کرن یِمن منٛز چُھ ژےٚ تہٕ چانہِ ذریٲژ حصہٕ یوان دِنہٕ۔15سہٕ ران تہٕ سُہ سینہٕ یُس یہُوواہسؔ برونٛہہ کنہِ ہیٚور کُن آیہِ تُلنہٕ تِم گژھن زالنہٕ خٲطرٕ چربی ہُنٛد حصہٕ ہٮ۪تھ یہُوواہسؔ برونٛہہ کنہِ ہیٚور کُن تُلتھ پیش یِن کرنہٕ۔ تِم روٗزن چٲنؠ تہٕ چانؠن اولادن ہُنٛد ہمیشہ خٲطرٕ حصہٕ یتھٕ پٲٹھؠ زن یہُوواہنؔ حکم دِیتُمُت چُھ۔16ییٚلہِ موسیٰؔ ہن تمس ژھاوٕجہِ متلق مولوم کوٚر یۅسہ کاہنو لوٗکن ہنٛدین گناہو خٲطرٕ قربان کٔرمٕژ ٲس، تمس سُپد مولوم زِ کاہنو ٲس سۅ سٲرے زٲجمژ۔ اتھ پؠٹھ سپد موسیٰؔ الِیعزرؔس تہٕ اِتمرسؔ ناراض تہٕ تِمن پرُوژھن،17"توٚہہِ کیازِ کھییٚوٕ نہٕ گناہن ہنٛزِ قربٲنی ہُنٛد ماز مقدس خٟمس نکھٕ؟ یہِ اوس یہُوواہؔ سٕنٛدِ خٲطرٕ سؠٹھاہ خاص؛ تمؠ دِیُت یہِ توٚہہِ یُتھ زن سُہ لوٗکن ہنٛدؠ گناہ کرِ معاف۔18ییٚلہِ زنہٕ تِمن ہُنٛد خوٗن اوس نہٕ مقدس خٟمس منٛز آمُت ژاننہٕ، توٚہہِ اوس سُہ ماز مقدس خمٟس نیٚبرٕ کنہِ کھیوٗن یتھٕ پٲٹھؠ یہُوواہنؔ حکم دِیتُمُت اوس۔"19ہاروننؔ دِیت موسیٰؔ ہس جواب، "از أنؠ لوٗکو یہُوواہسؔ پننیٚن گناہن ہنٛدؠ نیاز، تہٕ بیٚیہِ زٲلؠ اسہِ تِم نیاز پوٚرٕ پٲٹھؠ یہُوواہسؔ خوش کرنہٕ خٲطرٕ۔ مگر تتھ خطرناک حٲدِثث متلق سونچ یُس میانن دوٚن نیٚچوٮ۪ن پیش آو! ہرگاہ بہٕ از لوٗکن ہنٛدِ گناہن ہُنٛدِ نیازِ منٛز کینٛہہ کھیٚمہٕ ہا کیاہ تمہِ سٟتؠ سپدِہے یہُوواہؔ خوش؟"20موسیٰؔ ہن ییٚلہِ یہِ بوٚز، سُہ گوٚو مطمئن تہٕ مزید ووٚنُن نہٕ کینٛہہ۔
Bridge Connectivity Solutions Pvt. Ltd.