2 Pheexiroosixxa Erga3
Addachchiisa Uwwendeeka Goottiinka Dago
1Anke jaaluwwaa! Tinni ta'a ha'no'aa borreessaannexxi anxe langaxxe ergan; lamiinxa anxa erga ha'no'aa borreessenlchi qajeelto ha'noxxa qalbe dammassonnaaten.2Iittanni edo woyyitte wabeeko haaso'emeemmaka hiyyichcho iittanni ha'nooxxe ergameeyye darree'ni Gootta no'okenna anjirallo no'okika ajaja qalli hitinaashshaten.3Duuchchiinxe yaanne'aa edisineexxi udumike barro'n ifi fixxa fuggoxxa gaabbe hordofaati gacifatakiir gacifata'ni dagaaxxa tenne ege'ne.4Insa'nenna, «Daganno hiyye addachchiisa uwweemmak hedhee? Edik annuwwi reyemmaxxe dadatike ke'itonaa'n techchi qico'ni duuchchiinxi yaane hexxemmashanni hexxaan» hinaan.5Yaane kinni kunni manni iimuwwa olimina'ni Mageniinke hiyyichchinni dadendeexxi hexxammashanni, buttaa wodi'iinxe oddo'ninna wodi'ik hujendeemmaxxa egena'ninni waakantaan.6Eettenne yanna hexxeemmaxxi butta duuchcha wode'ik liqiinde baxxe.7Ookkone hiyyichchinninni ta'aa hexxeexxi iimuwwanna butta cubbaaleeyye baxxaaxxe murtetixxe barra qici'aa giiratee heqqende turtaan.8Ha'no kinni anke jaaluwwaa Goottake'ni mitte barra kuma woggashsha, kuma wogganna mitte barrashshate kaddeexxa tenne mitte yaane deetinoqqe'e.9Mitti mitti manna'ni tureechcho fakkaatolenna Gootti ifike addachchisatike hiyyichcho muuxo'a turabaan; yaane kinni isi ayyinna ba'abaashsha, duuchchiingi aadde aago'a ha'noxxee ossaan.10Goottiinxi barra kinni moodhalchiinsha daggaan; eettene barra iimuwwa lumooke luuljinni saxxaan; iimuwwatixxi daduwwanna lumoke giirake eebbinjinni baxxaan; buttatinna ise'ni hedheechchi duuchchi gubataan.11Yoona duuchchiinxi yaane iitta baxxa'neechchinni ha'no hitta hexxinaake manna kada hasissutaa? Ee, woyyummatinna Mageno fakkaatati hedha ha'noo hasissaan.12Iittanni ha'noo Mageniinxa barra heqqexxina'ni dago isika muddansa hasissaan; eettene barra iimuwwa giirati itendeexxi baxxaan; iimuwwatixxi daduwwanna jabake eebbinjinni baqqaan.13No'o kinni qullumma hexxaaba haaroxxa iimanna haaroxxa butta isike addachchisatik hiyyichchishshanni heqqedhate'ni he'nennen.14Tennexxee anke jaaluwwaa tenne yaanuwwa duuchcha heqqixxina'neechchinni mitte battumma belonna mitte ci'ma beloke kaddinee'naa nage'ik ha'noo afaashsha si'ikki hedhdhe.15No'oke Goottixxi ossa ha'nooxxe anjirensha'aate kaddeexxa hedde; iittanni dayyi no'ok Phawuloosi isi'a uwwemeek beekkumixxe qixxe'n ha'no'aa borreeseen.16Isi tennee yaanuwwaxxa ifixxe erguwwa duuchcha'ni borreessedheen; isixxe erguwwa giddo sholla qicinni qalbeefatatee dandeessisabaaxxi yaanuwwa hexxeen; ege'na xe'yiteekinna ti'ni hiyyabaak manni wele woyyichcha maxaafuwwa micciirammashsha tennee yaanuwwanna ifixxe ba'ne'a micciirraan.17Yoona jaaluwwaa tenne edisineenn egendinemaxxee ti'ni hitineexxi uurritineexxe boosonaa'n xaqqaratiyyetike dedhinni sobendineexxi ibbinabaashsha xexxe'atte.18Yaane kinni Gootta no'okenna anjirallo no'oke Yessuus Kiristoosike badhaadhinninna ege'na'nni nophphe. Isi'aa ta'anna duuchchi woddi'aanna ulfinni kadowwaal. Ameeni.The Word for the World International