1 Yohaannisixxa Erga1
Mageni Ifaken
1Hedhotike hiyyichchixxee sirendenaa'ni hedhemmaka, lanqenneka, illuwwa no'oxxenni anfenneka, uundenekanna anguwwa no'oxxi qaqqabeeka haasonaannen.2Tinni hedhonna iffe'en, no'onna isoo uunde'eennen; isexxee dhugaa kullannon; Aabi hedheemmaka no'o'anna ifeeka duuchchi woddixxa hedho ha'no'ni kullaannen.3Ha'nonna no'onni welti mittumma afinaashsha uundennexxanna lanqennexxa ha'no'ni kullannoni; mittoomi no'okinna Aabinni, Belti ifike Yessuusi Kiristoosinni weltiten.4Gammashsho no'oxxinna wo'mate kaddo'a tenne ha'no'a borreessinaannen.Ifake'n Marema
5Isonaa'ni lanqennexxa ha'no'aanna kulannexxi erga, «Mageni ifaken dukkanatinna iso'ni hara hexxebaan» hitaaxxen.6No'onna dukkana giddo mammaremma'ni isinni welti mittooma anfe'eennen hinaannole dharake haasonaannen; dhugaate'ninna gallabo'noni.7Yaane kinni isi ifake'ni hedhemmashshani no'onna ifake'ni maremmonole weli'anni weli mittooma anfe'eennen; Belti isikixxi Yessuusi Kiristoosixxi munde cubbo duuchchanaa'ni no'oo ca'a assitaan.8Cubbo anfebo'non hinaannole ifinni ifi dedhinsannon; dhugaatinna no'o giddo hexxebaan.9Cubbo no'oxxa faaci'winonnole cubbo no'oxxa gattowwaal hiyyaashsha, xaqaro no'oxxe duuchchanaa'ninna no'oo ca'a asso'a isi xuurameesakenna qullichchaken.10Cubbo hunjebo'noni hinaannole Mageno dharichchake assinannon; hiyyichchi isikinna no'o giddo hedhebaan.The Word for the World International