1 Samueli18
Láfiñurun Dawidi umadaguaü luma Yónatan
1Lárigiñe lásurun layanuhan Dawidi luma Saulu, aba gamadagua lan Yónatan luma Dawidi buidu buidu, aba línsiñedun lun kei línsiñegua lungua.2Ábati lanügüni Saulu Dawidi weyu ligía lun leseriwidun lun, mígirun lumuti lun lagiribudun lúbiñoun lúguchi.3Aba láfiñurun Dawidi luma Yónatan umadaguaü magumuchaditi, ladüga hínsiñeti buga Dawidi lun Yónatan kei línsiñegua lungua.4Aba laragachunu Yónatan tidáü ladaüragun tuma gounu to luáguboun aba líchugunu lun Dawidi, úara tuma lefeinte, ligimaran luma lubelitin.5Gúnfuliti Dawidi buidu lau le lariñagun Saulu lun, lun ladügün, aba líchuguni Saulu lun ligíaba lan agumadiraña wügüriña ha wuriburuguna. Gúndaatiñati sun súdara hama ábutigu lau katei le.Ligimugan Saulu lun Dawidi
6Gama lumoun dan le hagiribudunbei súdara lárigi láfaruni Dawidi Goliadi, aba háfuridun sun würiña ha lílana uburugu eresibirei urúei Saulu eremuheina, abinaheina lau ugundani, lau lirahüñü garanwoun luma pülatíyu.7Añahati eremuha luma abinaha, ariñageina:«Milu eyeriñu láfarun Saulu, diisi-milu láfarun Dawidi».8Mabuidunti lábürühan katei le lun Saulu, aba lariñagun lau saragu igañi:
—Luagu Dawidi hariñaga luagu diisi-míluñanu lan láfarun, au áfara milu. Lúnrügaali híchuguni urúeime!9Lúmagiñe dan ligía aba laminsiñedun Dawidi lun Saulu.10Larugan, aba lárügüdüni sífiri wuribati le lóunahabei Wabungiute Saulu, aba lerederun kamá lǘlühali lau tidan lani palasiu. Ñéinñeinti Dawidi áfara árüpa, kei ligaburi, anihati larufunte Saulu lúhaburugu.11Sódini liñuruni Saulu larufunte lun yebe láhuduruni Dawidi lau tóubawagu muna, gama lumoun bián wéiyaasu lelemuchagun Dawidi luéi.12Hanufudeti Saulu luéi Dawidi, ladüga íderagua lumuti Wabureme Dawidi, ánheinti bugaha Saulu, míderagun laali.13Ligíati lébubei ladisedagüdüni luáriua, aba líchuguni gumadanme lun aban sétanu súdara, le áubeiha láfurida giribu ligíaha.14Keiti íderagua lani Wabureme Dawidi, buítiha lidin lun lidan sun le ladügübei.15Ligíati lanufudebei Saulu luéi lau larihin lawanserun.16Gama lumoun hínsiñetiti Dawidi houn sun mutu uburugu Ísüraeli luma Hudá, ladüga ligía lan abugurubaliña dan le háfuridun ageindagua.17Luagu aban weyu, lariñaga Saulu lun Dawidi:
—Níchuguboun Merabü to niráü bun lun búmarime, gama lumoun gasu beseriwidun nun kei aban wuriburuguna le ganigiti, ageindaguabeime luwuribun Wabureme.
Laritagun bugati Saulu lun mámaba lan ligía áfarei lungua, lun Filistéanaba lan áfarei.18Gama lumoun lariñaga Dawidi lun:
—Ni kata au, ni kata giñe niduheñu uburugu Ísüraeli lun libarimubadina lan urúei.19Gama lumoun dan lachülürünbei dan le lunbei hamuga líchugunu Saulu Merabü to liráü lun Dawidi lun lúmarime, lubaragiñe hamuga líchugunu lun, ábarüga líchugunu lun Adüriéli le Meolana.20Gama lumoun hínsiñetiti Dawidi tun Mikali to aban liráü Saulu. Danti le hariñagunbalin katei le lun Saulu, gúndaati lau lasubudiruni,21lugundun haritaguati líchugunu lun Dawidi lun lúmarime, lun tábürügüdüni háhaburugun Filistéana.
Ábati lariñagun lun Dawidi libiaman wéiyaasu:
—Anati guentó nibarimubadibu.22Lárigiñe aba lariñagun Saulu houn lubúeingu:
—Hadimureha luma Dawidi lábuguarügü, hariñagame lun luagu weiri lan línsiñe nun, au le urúei, ani hínsiñe lan giñe houn sun nubúeingu, ani lunti lan nibarimu lan.23Aba houdin lubúeingu urúei ariñagei sun katei le lun Dawidi, gama lumoun lariñaga Dawidi houn:
—Haritaguatün san luagu ménrengun lan lun aban wügüri gudemeti ani ni kátati kei au lun libarimubei lan urúei?24Aba houdin ubúeingu, aba habahüdaguni le lariñagubei Dawidi houn lun urúei.25Keiti busén lubéi Saulu lábürühan Dawidi háhaburugun Filistéana, aba lariñagun houn:
—Ariñaga humá lun Dawidi luagu leweñegua lan katei le gagaburiwabei líchuguni wügüri lubá tichugún lúmari lun, au le urúei, himei numuti lan lederegerun san tura hóustarun Filistéana nun, leweñegua le hadügübei náganiñu nun.26Aba hariñaguni lubúeingu Saulu katei le lun Dawidi, aba lariñagun Dawidi lúnguarügü luagu anihán lan lidaani lun libarimubei lan urúei. Lubaragiñebei lagunfulirun dan,27aba lanügüniña Dawidi luwügüriñanigu, aba lidin áfara bián-san Filistéana; lárigiñe aba lanügüni tura hóustarun lun urúei, aba lederegeruni lun, lun gayaraabei lan libarimubei lan. Ábati líchugunu Saulu Mikali to liráü lun, lun lúmarime.28Gama lumoun kei larihin Saulu luagu íderagua lani Wabureme Dawidi, ani hínsiñe lan tun Mikali,29ábatima lanufudedun luéi, aba liabin lun láganibei lan súnwandan.30Bóugudin luéi lira; sagü háfuridun hábutigu Filistéana ageindagua, súnwandan buídutima lan láfuridun Dawidi sügǘ hau híbiri lani Saulu úfisigu, aba lubeiti liabin Dawidi lun inebewabei lan saragu.
Bible Society of Honduras