YESAYA33
Kayiikparama Ikarɛ Ibuai
1Ndzo mitã-ɔ, Raninase,fɔ wɔ maiwɔra!Ndzo mitã-ɔ fɔ wɔ fɔ nsɛ asɛ maturi karɔ̃,fɔ wɔ maisɛ karɔ̃ manya!Si ɔɔnyua ara inina ne,fɔ wũ maawɔra-ɔ;si ɔɔnyua maturi karɔ̃ isɛ ne,fɔ wũ maasɛ-ɔ karɔ̃.2O Bosate, nyɔ bo nnya;ato akpɛ̃ bo ɔkã.Ɖe bo ɔle kaya biara,gu iɖi i inyɛwe ɔwi.3Si fɔ silɔ ɔɖu lɛ kado ne, maturi sɛ mapia ise;si ata aya ne, nɖebi sɛ masame.4O nɖebi, mi ara wa mimɔɛ̃ i kakpã ame ne, kugbadzedzei abi aaɖe wãlɛ kugbadzedzei awe i maturi aabo wã iso.5Maakɔlɛ Bosate kato ala kato ɔsi;ɔ̃asu sibɔlɔlɔ gu atɔ̃meiɣɛ i ɔri iso ɔyira i Zion.6Ɔ̃aɖe ayaiso wa loibati anya ɔtã mi ɔwi biara,iɖi gu iwola gu inɔkpa wodoroa;Bosate kunigã nɖe ɔbɔi wɔ loabusi karana siare gagbe ɔtã mi.7Nyɔ, ma makpãrɛrɛĩ to mabiɛ teteree i sivurã iso;mma mapia isobuɛ katɔ̃me to mabiɛ boroboro.8Siri siare iso ɔɔlo,marisɛse siina i ɔri iso.Maɔtu kanya ga manyi,maiwarɛ mma loya kã i kanya,maisito mawarɛ kuwɛ̃.9Karɔ̃ to kabiɛ kaku kawɔ,kunuarɛ ɔɔmɔɛ̃ Lebanon ɔɣɔSaron se lɛ fafuĩ ame,fiɛ Basan gu Karmel adziri ɔɔkpa ayata.10Bosate sɔ, "Kiniɔ ne, loatakini maale me ne;kini maakɔlɛ me kato ne.11Miala simɔɣo kayiri,miɣe simɔbu;mi siwarã dzɛ mito miwarã nɖe ɔtɔ wɔ loatsuedza mi.12Maturi aatsue lɛ aɣɔ̃maapia ma ɔtɔ lɛ kuposɛ̃ gɔ matutu masɛ."13Mi ma lodzorogu me minɔ nnɛ lobara;mi ma lobore mibo me, miɖi wũ ɔle mite!14Ifɔ̃ ɔmɔɛ̃ makpibaradze ma i Zion;itipɛ̃ si imɔɛ̃ mma loisɛ manigã Ɣaa:"Bo nna loawo ɔtɔ wɔ nsɛ ɔtsuedza ara kɔrɛ ɔsɛ?Ɔtɔ wɔ loibanyi ɔnya ne, bo nna loawo ɔ̃ kɔrɛ ɔsɛ?"15Nwɔ nsɛ ɔsɛ i sibɔlɔlɔ amefiɛ ɔsɛ ɔɣɛ isɛɛ,nwɔ loisɛ ɔbie kusia nyanyariã,fiɛ ɔ̃ nrɔɔ̃ iisɛ mifɔ kawɛrɛra,nwɔ loisɛ ɔsu ɔ̃ atsue ɔnɔ ituriɖoetɔ̃mefiɛ ɔ̃isɛ ɔsu ɔ̃ anɔ ɔsusu ikpi -16nwɔgbe loasɛ i kato mmɔ,nwɔ katarikɔ̃ loaɖe abe wa lotsue ibere apia wũ,maabɔ wũ aɖera,fiɛ ndu iibanya wũ.17Mi anɔ aanya igara i ɔ̃ kulɛ amemianya karɔ̃ ga lobɛ kakpa dzoroo.18I fɔ adzuni ame ne, aabu ifɔ̃ra nɛ loba iso:"I ɖe ma kpãrɛrɛĩkpakpa?I ɖe nwɔ lola ɔ̃ɔfɔ toto?I ɖe ɔkpakpa wɔ nto ɔnyɔ idzuɛ̃ adzarara iso?"19Aisibanya mma nto maɖe sitatawele anya,mma nto maɣɛ siɖe kpɔkpɔtɔ,gu ma siɖe dzɛ i kuwɛ̃ iito ɔnɔ.20Nyɔ Zion, ɔmagɛ̃ wɔ ame bola boɔɖe bo ayiɖea;fɔ anɔ aanya Yerusalem,isobuɛ kasɛkɔ̃, ikpayo nɛ maibarui;maibarui ne akpa manya,ɣee matu ne siwɛ̃ manya.21Ɣɛɛ Bosate loaɖe bo Ɔsiare.Iaɖe lɛ ngbegɔ i siwore siare gu sikoso ɔbore sife.sikolo dzɛ masɛ mawa iibasia i me iso,kakpã nduisoabuɛ siare iibasia i siwore dzɛgbe iso.22Alasɔ Bosate nɖe bo atɔ̃meɣɛdze,Bosate nɖe bo mmaratãdze.Bosatenɖe bo igara;ɔ̃ ɔɖe loaɖi bo ne.23Fɔ siwɛ̃ ɔɔgbɔlɔiƆdziriɣedzaa iisiɣɛ teteree,maisiwarɛ sikati.Iyɔ mato maaɣɛ kakpãramɔɛãfiɛ maturi ma loɔfɛ̃ kɔraa aasore wã maruigu.24Kuwɛ̃ i Zion iisibaɣɛ sɔ, "Loisarɛ lo";fiɛ maasu mma nsi i mmɔ akpi matsɛ ma.The Seed Company