ন্যায়কর্তা15
1সাইয়ু নিইয়ুকো নোইতা গেহুং চ্যানুকো সময়তা শিমশোনহা আপনিকো মেহিং দোসপাকো তামসা ইপু এতাকো ধ্যাবে এচেং পুরামসা হ্যায়ে। আকুহা জুওয়াহিং জাংয়ে, “কা কুং মেকো য়ুংওয়া সিরিতা হোকো ইচ্ছা জোরোওয়া।” আদো আকো জুওয়াহা আকুহিংয়া সিরিতা হোকো মিচাতো।2আকুহা শিমশোনহিংয়া জাংয়ে, “কাহা নোয়ে কি আজিপ্পারাং নাতিহা আকুহিংয়া আচকাপা জোমকোগুং। আকো সোতা নাকো বারোহিংপা কাহা আকো বিয়ৌ জোপ্পিয়ে। আকো য়েমেহা ইরোমা জেজেংপা নিও। আকুহিংয়া নাতি পুরাচা।”3শিমশোনহা জাংয়ে, “কা পলিশ্তিবিহিংয়া হির্মাহা হাই জোপুদো, আকো সোতা কাহা জিম্মাবার মোতো!”4আত্রংহা আকুহা হ্যামসা তিনশো মাংশ্রিবি প্যইকায়ে। নিহপু-নিহপু জোমসা আকুহা আবিকো মেরোং তাইয়ে আসা তাইওয়া বুটুতা মেহকো মেচেং তাইপুয়ে।5আসা মেচেংতা মেহ লালাইপামসা আকুহা মাংশ্রিবিহিংয়া পলিশ্তিবিকো অন্নবালিতা ল্যাপুয়ে। এপা জোমসা আউতাহা চ্যামসা এওয়া অন্নবালিদাং মোকোপা লুংনিংতা নিওয়া তাংসা আঙ্গুরবিরিরে ওংপাপুয়ে আসা জেইতুনবিরীহিংনে দাংপাপুয়ে।6পলিশ্তিবিহা এপা দাংপাপুওয়াহা হাংসুমে তামসা মোস্যইয়ে। আকো তিম্নাতা য়ুংওয়া জুওয়াহা আকো মেহিংয়া ব্যারোহিংপা বিয়ৌ পিচাওয়াকোসোতা শিমশোনহা এপাজোমকোগুং তাওয়া পলিশ্তিবিহা সিদা চ্যইয়ে। আকো সোতা পলিশ্তিবিহা আকু মেমে আসা আকো আপাকো সাতা মেহ চুংমসা তাংসা ওংপাপুয়ে।7শিমশোনহা আবিহিংয়া জাংয়ে, “নাবিহা ওইপা জোয়ে। কাহা আকো বদলা মালাংপাহা মাল্যারোওয়া, কা ই নাপোইমসা জাংরোওয়া।”8আকুহা আবিকো তোইতা চুসুং মাইসুংক্যইপা আক্রমন জোয়ে আসা উইসে দিংঙাবিহিংয়া স্যাপুয়ে। আকুহা হ্যামসা এতামকো লুংটুইকো হোরোংবাতা য়ুংওয়ায়ে।9পলিশ্তিবিহা লেমসা য়হুদাতা তাম্বু বানাইয়ে আসা লহী তাওয়া শহরকো তোইতা আক্রমন জোয়ে।10য়হুদাতা য়ুংওয়াবিহা উইয়ে, “নাবিহা হাংপাসা কাবিকো তোইতা আক্রমন জোমগাসা?” আবিহা জাংয়ে, “কাবিহা শিমশোনহিং প্যইমসা আকু কাবিহিংপা হেপা জোমমে, কাবিরে আকুহিংপা এপারাং জোকো লেমি নিও।”11এপা জোমসা তিন হাজার য়হুদীবিহা এতামকো লুংটুইকো হোরোংবাতা হোমসা শিমশোনহিং জাংয়ে, “পলিশ্তিবিহা কাবিকো মাটা তামসা নাতিহা মেগেমগা? নাতিহা কাবিহিংপা ইহা হাং জোমগা?” আকুহা জাংয়ে, “আবি কাহিংপা হেপা জো কারে আবিহিংপা ওইপারাং জোয়ে।”12আবিহা আকুহিংয়া জাংয়ে, “নাতিহিং পলিশ্তিবিকো খুইতা তাইমসা পিচাকো তামসা কাবিহা ইতা ওয়াংমগা।” শিমশোনহা জাংয়ে, “এপা বেনাহা নাবিহা কাহিংয়া মাস্যারো তামসা জাং।”13আবিহা জাংয়ে, তুরোওয়া। কাবিহা নাতিহিং তাইমসা পলিশ্তিবিকো খুইতা পিচারোওয়া। কাবি আপনিবিরাং নাতিহিংয়া মাস্যারোওয়া।” আবিহা আকুহিংয়া নিহদি চুবে পার্দিসো তাইয়ে আসা য়ুংদু হোরোংবাসো নোপামসা পারায়ে।14হাত্রং আবি লহীতা চোইয়া, পলিশ্তিবিহা ঙামসা আবিকোতা ঠুইপামসা ওয়াংয়ে। তাত্রিংপা আকুহা সেংজাকো সেসো মেইপুয়ে আসা আপনিহিং তাইদিংওয়া খুই-কোকোইকো পার্দিহিংয়া ওংপুওয়া সিংদি ত্যাবাপা দ্যইপাপুয়ে।15আবেইতারাং আকুহা আম্যই নাগাই সিপুওয়া গাদাকো মাংকাই দোয়ে। আকুহা গুংমসা আকু গধাকো মাংকাই য়োয়ে আসা আকু গধাকো মাংকাইসোহা এক হাজার দিংঙাবিহিং পোমসা স্যাপুয়ে।16আত্রং শিমশোনহা এপা জোমসা লেহদী লেহে, “গধাকো মাংকাইসো কাহা এক হাজার দিংঙাহিং স্যাপুয়ে; গধাকো মাংকাইসোহা কাহা আবিকো উইসে সিপুওয়া জুপাবিহিংয়া লেপোইপুয়ে।”17আকো নোইতাহা আকুহা আকু গধাকো মাংকাইহিংয়া বাডোইপুয়ে। আকু ঘটনা জিংপুওয়া জায়গাকো মিংহা রামত-লহী এহে।18আত্রং শিমশোনহিংয়া তি সেকেংপুয়ে। আকুহা সেংজাহিং ঙামসা জাংয়ে, “নাতিহা কাহিংয়া টেবো বিজয় পিচায়ে। কাহা নেহা তি সেকেংমসা সিনেকোগা আসা ই খতনা মোজোওয়া পলিশ্তিকোবিকো খুইসো সিনেকোগা?”19আত্রংহা লহীতা মোংটো ওয়্যাপামসা সেংজাহা ইচো হোক্রা বানাইয়ে আসা আউসোহা তি নোয়ে। তি আংমসা শিমশোনহা সাডুংপা জিংপুয়ে। আকো সোতা তিকো মিংহা এন-হক্করে এহে। আকুহা নেচোইপা লহীতা নিও।20শিমশোনহা লো ইকাইনিং চোইপা ইস্রাইলকো ন্যায়কর্তা জোয়ে, আত্রংহা পলিশ্তিবিহা দেশতাহা শাসন জোদিংমি।
The Seed Company