LUKA12
1Nako eeyo bantu bali zyuulu-zyuulu nibakabungana antoomwi cokusyanikizyanya, Jesu wakasaanguna kwaambila basikwiiya bakwe kuteeti, “Amucenjele okumamela emimena ya Bafalisi, ndaamba kuupa-upa amenso kwabo.2Kufumbwa cisisidwe ciyoosisununwa, ape maseseke oonse ayeetwa antangalala.3Mpoonyina kufumbwa comwakaamba mumudima ciyoomvwigwa antangalala, ape kufumbwa cimwakavuya kumbali mukaanda kajalidwe ciyoongololwa atalee ciluli cengʼanda.4“Nobeenzuma, ndimwaambila kuteeti, mutabayoowi aabo bajaya feela mubili, kono bamana taakwe cebakonzya kucita kwiindaawo.5Kono ndilamutondezya weelede kuyoowegwa. Amuyoowe Leza ukonzya kujaya amana ulijesi enguzu zyokusowela mumulilo uutamani. Nconzyo ngonguwe weelede kuyoowegwa!”6“Ede, tunteya tosanwe tulauzigwa otumali tobile feela? Kono taakwe naanga kanteya komwi Leza kanga waluba.7Naanga masusu aali mumutwe wenu alibalidwe. Mutanoyoowi kaambo muli bayandisi kwiinda tunteya tunji!”8“Ndamusyomezya kuteeti, boonse aabo baamba antaangalala kuteeti mbibangu, awe Mwanoo Muntu uyoobacitila mboonyina namu kumenso abangelo ba Leza.9Kono boonse aabo bandikaka antangalala, awe Mwanoo Muntu uyoobacitila mboonyina namu kumenso abangelo ba Leza.10Kufumbwa ooyo waamba zibi a Mwanoo Muntu inga wajatilwa, kono kufumbwa usampoola Muuya Uusalala tayoojatilwi.11“Baakumutola kuyoomuzekesya muzikombelo na kubeendelezi, mutakabilaili ambomutakaliiminine naanga mbomutakatabe.12Muuya Uusalala uyoomwiisya muciindi eeco zyomweelede kuyaamba.”13Umwi mwaalumi akati kembunga wakateeti kuli Jesu, “Omwiiyi, mwaambile muzyalwama kuteeti aabane andime lubono ndwaakatusiila tata naakafwa.”14Kono Jesu wakamutaba kuteeti, “Mweenzuma, ino ngwani wakandipa nguzu zyokwaatula naanga kumwaabanya lubono lwenu nobile?”15Mpoonyina wakazwidaanembo kubaambila boonse kuteeti, “Amumamele okulikwabilila kubusyacivule mwangu bwemisyobo-misyobo, kaambo buumi bwenu tabwiimvwi azintu zyomujesi, naanga muvube buti.”16Mpoonyina Jesu wakabaambila cikozyanyo eeci, “Imwi nako kwaluumwi mwaalumi muvubi wajesi muunda mubotu. Zyoonse zyaakabyalide zyakamupa bukutuzi bubotu.17Naakabona namu, wakatalika kuyeeya mumoyo wakwe kuteeti, ‘Tandijesi mokubikila zilyo zyangu zyoonseezi. Ino ndilacita buti?’18Mpoonyina wakateeti, ‘Ndilacita namu, ndilamwacoola matalaangu, okuyaka mapati munditakabike zilyo zyangu ezimwi zintu zyoonse.19Mpoonyina ndiyoolyaambila kuteeti, Yebo osicoolwe! Kwemyaaka minji, zyoonse zintu zyoyanda ulizibambide. Liibe, ulye, unywe okulibotezya.’20Kono Leza wakamwaambila kuteeti, ‘Yebo omufuba-fuba! Sunu masiku ngoonyaaya ulafwa. Mpoonyina ngwani uyoobweza eezi zintu zyoonse zyowakalilundaikila?’”21Mpoonyina Jesu wakamaninizya kateeti, “Oobu mbociyooba kulaabo balilundikila buvubi lwabo beni kono kabatavubide kumensaa Leza.”22Mpoonyina Jesu wakateeti kuli basikwiiya bakwe, “Kaambo keeci, ndamwaambila kuteeti mutabilaili ezyokulya zyomuyandika kuteeti mupone na zizwaato zyomweelede kuzwaata.23Ede, buumi mbupati loko kwiinda zyokulya, omubili cintu cipati loko kwiinda zizwaato.24Amubone bacikwangala! Tababyali mbuto naanga kukutula naanga kubaamatala ezilyo, kono Leza ulabalisya! Iino nywebo mulayandika kwiinda bayuni!25Ape ngwani ukonzya kuyungizizya nokuceya kubuumi bwakwe kwiinda mukubilaila?26Natamukonzyi kucita naanga eeci ciniini, ino niinzi nemubilaila eezi zimwi?27Amulange maluba-luba oomusaka mbwaakomena. Taabeleki naanga kulipangila zizwaato. Kono ndamwaambila kuteeti naanga Mwami Solomoni obuvubi bwakwe boonse taalijesi zizwaato zibotu mbuli lyomwi lyamaluba-luba aaya.28Ngu Leza uzwaatika bwizu bomusaka, bwizu bokuteeti sunu kobuli, junza bwatentwa mumulilo. Ino takonzyi kubikila maano kuteeti amuzwaatike na? Nduniini buti lusyomo lwenu!29“Iino nywebo mutabikili maano kuli zyemutilye okunywa. Ape mutanoobilaila ezintu zyomusyobo namu.30Ede benyika eeyi babikila maano azintu eezi zyoonse, kono Uso ulizi kuteeti mulaziyanda.31Kono amubikile maano kuli zyo Bwami bwakwe, mpoonyina uyoomupa zyoonse eezi zyasyaala.”32Kuzwaawo Jesu wakateeti, “Utayoowi, ookatanga kaniini, kaambo Uso uliboteledwe kumutambula mu Bwami bwakwe.33Amuuzye zyoonse zyomujesi, mali mupe bapenzi. Amulipangile zikwama zitamani, ndaamba buvubi bokujulu butaceyi, kaambo ko takusiki mubbi, ape takukwe lumoma lukonzya kubusinya.34Ndaamba namu kaambo myoyo yenu inoolooko kuli buvubi bwenu.”35Jesu wakazwida anembo kwaambila basikwiiya bakwe kuteeti, “Amuzwaate cokulibambila kubeleka amalampeenu kaayaka.36Mube mbuli babelesi balindilila simalelaabo wainkide kumukiti womucado, kuteegwa asika feela okukonkomona bamujulile mulyango mpoonya-mpoonya.37Balilelekedwe aabo babelesi simalelaabo mbayoojana kabalanga ape kabalibambilide azoopiluka! Nconzyo ndamwaambila kuteeti, uyootubula jansi lyakwe, okubakazikaansi okubayumbula.38Balilelekedwe aabo bayoojanika kabalibambilide, naanga akeze akati kamasiku na kubucedo!39Ape iino comweelede kuziba cokuteeti, kambe mwini ngʼanda naalizi nako mubbi neza, inga takonzya kumulekela kuteeti apwaye okunjila mungʼanda.40Mboonyina namu anywebo, mweelede kuba balibambilide kaambo Mwanoo Muntu uyooza aciindi pomutamuyeeyeli.”41Mpoonyina Pita wakaamba kuteeti, “O Mwami, ino eeci cikozyanyo waambila feela ndiswe na abantu boonse?”42Mpoonyina Mwami wakataba kuteeti, “Ino he ngwani sikweendelezya usyomeka ape musongo? Ede ngooyo simalelaakwe ngwatikabike kweendelezya babelesi bamwi okubona kuteeti bapegwa cokulya cabo muciindi ceelede.43Ulilelekedwe ooyo sikweendelezya simalelaakwe ngwatikajane kacita eezi aakupiluka.44Nconzyo, ndamwaambila kuteeti, simalelaakwe uyoomupa nguzu zyokulanga zintu zyakwe zyoonse.45Kono na sikweendelezya ooyo wayeeya kuteeti simalelaakwe utola nako ndamfu kupiluka mpoonyina watalika kuuma babelesi bamaalumi abanakazi, okutalika kulya, kunywa okukolwa,46mpoonyina simalelaakwe uyoopiluka bumwi buzuba mbwatayeeyeli ape aciindi catezi. Simalelaakwe uyoomutimboola muzipaanzi-paanzi okumusubula aabo batasyomeki.47“Mubelesi uuzi ciyanda simalelaakwe kono talibambili naanga kucicita, uyoonabbwa loko.48Kono mubelesi utazi ciyanda simalelaakwe, mpoonyina wacita cinga camupa kunabbwa uyoonabbwa aniini. Muntu uupegwa mubunji, kuyoolangilwa kuzwa kulinguwe mubunji. Ape kumuntu uupegwa mubunji loko, kuyooyandikana kuzwa kulinguwe mubunji loko.”49Kuzwaawo Jesu wakateeti, “Ndakazida kuzoobbusya mulilo anyika! Ndalikuyeeya kuteeti mane kambe walibbukide kale!50Kono ndilolubbabbatizyo lwamapenzi ndondeelede kwiinda mwateni, aano ndilipengede mumoyo kusikila zikainde eezi!51Ino muyeeya kuteeti ndakazida kweeta luumuno munyika na? Nee, ndamwaambila kuteeti ndakazida kweeta lwaandano.52Kuzwaino, mumukwasyi wabosanwe munoli lwaandano, botatwe bayoobukila bobile ape bobile bayoobukila botatwe.53Baisi bayoobukila mwana musyimani, awe mwana musyimani uyoobukila baisi. Banyina bayoobukila mwana musimbi, awe mwana musimbi uyoobukila banyina. Banyinazyala bayoobukila musangakazi, awe musangakazi uyoobukila banyinazyala.”54Mpoonyina Jesu wakaambila embunga yabantu kuteeti “Namwabona joba lisiya lizwa kumbo mpoonya-mpoonya mwaamba kuteeti, ‘Mvula ilawa,’ okuwa yawa .55Ape mwabona guwo lizwa kumusanza lyanounga mwaamba kuteeti, ‘Kwandoopya,’ okupya kwapya .”56Nywebo nomuupa-upa amenso! Mwalanga nyika ejulu mulaziba mbokutabe. Ino mukacilwa buti kuziba iino nako ceyaamba?57“Kaambo nzi nomutaatuli nobeni kuteegwa muzibe ciluleme?58Naa simulandunyoko wakutola kunkuta, amwaamboozyanye nimuciyoobweenda anguwe munzila kuteegwa mumvwane kamutana kusika kunkuta. Nakuteeti tocitide namu uyookusungilizya kwiinka kumuzekesyi, mpoonyina muzekesyi uyookubika mumaanza aabalindizi bentolongo, bayookubika muntolongo.59Nconzyo ndikwaambila kuteeti toyoozwi mwateni kusikila mane ukabbadele kali komuwaya-waya kamamanino.”
The Seed Company