Läs Koreeg nà moog‑e 42

Koreeg nà moog‑e42

¹É gara Yagob fiŋəssǐ jergan é Məsir‑i e bee jaalge inəgin: “Ɲiin ug ənú bara ug turdu teeda man?²A fiŋəssə jergan tu é Məsirə. Wəydə ũ mərrú biig ə̃gən gar ã bəddǎ ná ã tirdǎ‑e.”³Aneenda awleeg é Yusif nà əsəgdi‑i e wàj é Məsir ẽ marré jerga.⁴Gəl Yagobo cugsu Benyamin awl é Yusifə ná liiníigi maazn taman‑e èg golge wa, een feyǎn jeem ê ləwə̂ni.⁵Jaalgeen é Isrəil e wàj èg jag nà wajja ẽ marra jerga é Məsir‑i é kora kun nəəmə̌nǐ é Kanaan di‑ni.

⁶Yusifə gona og é Məsir een 'məərə jerga jagan kay é Məsir‑i. É gara awleeg lii'íigǐ‑i, e gùrum tad é Yusif muu e tall ë muugu kəli.⁷É yaag ane Yusif e tur ë awleegen gəl jis iiŋ ar jen ná ɲiliigə wa‑e nee, e tisiigə: “Og ŋənəədə ug liin da?” Eg pəd kor: “Ag leen é Kanaan. Ag lii ã marra namees.”⁸Ma Yusif e tursu awleeg inəgin‑i, war ega tursíigi wa.

⁹Yusif e tur caalg nà namsa een dum diiŋg‑i, e bee awleegan: “Og jag ná den wag feg‑iilg‑i! Ug lìi ũ turdu e been gaam əyən e paâná wa‑e.”¹⁰Eg bee: “Wa, seen əyə. Aga dhəmg unugu, ag lii ã marra namees.¹¹Aga jaalge é jaa taman. Aga dhəmg unugu ag berga, aga jag den wag feg‑iilg wa.”¹²E bii'ĩgən: “Wa wa, ug lii'ú ũ turdu alda əyən niin e paâná wa‑e.”¹³Gəl eg bee: “Aga dhəmg unugu kussánaga ag taa əsəgdi èg nà dhaag ag leen é baaw taman ag an é Kanaan. Äg awl ɲaan‑e ag bii'á teyag èg dä baawne, yaan dhussu.”¹⁴Yusif e bii'ĩgən: “Kora a korsé ũgun‑i taa tu. Ogo jag den wag feg‑iilg.¹⁵Â tur koren e taa é see. A bell aas tad é saag é Firuun, â bii'uugu ũ wəydə tui é wag niinə wa ləŋ ũ bəgdú ö awl ná ɲaan‑e ẽ addé te.¹⁶Cugdú jaam duuŋg taman ẽ bagdé ö awlo. Ogo ugû əndəs te gar a tursu kor uyun e taa é see. E taa é see wa‑e, â bell aas tad é saag é Firuun ogo jag nà den wag feg‑iilg‑i.”¹⁷Yusif e gəgiig é fol naag ozo.

¹⁸É naanda ná ədə golgo ozo‑e, Yusif e bii'ĩgən: “Jiddə kora a kursũgun‑i ũ dedda wag, de aan a feên Tela.¹⁹O tàa jag berg é see‑e, biidə ö awl man tad taman é fol te, ogo ũ wəidə û təə ũ gəwdú namasa jag uyugun de dàwsê kun.²⁰Gəl u bəgdú ə̃nə ö awl ná ɲaan‑e gar ã tursu kor uyun é na ad é see ná ũ tirdú‑i.” Eg guɲ kor.

²¹E kurəs ege: “É see mirsə́nə aga é kora a jissá äg awl jam‑e. A tursá een é gara ɲussǐ məɲə̂ní aga ã biddin ã tirdi wa‑e, gəl a fiŋəssá kor iini wa. Enna jis nii wəldǐ dəəlg‑i.”²²Rawbin e bii'ĩgən: “A tussí ogo a beessé ar ugu ləŵnú jaa wa be! Gəl ug fiŋəssú kor əənə wa. Gəl bii mirəng nee ẽ walda dä uulg.”²³Ega belǎn Yusif ɲel kor iyəni wa, é kora Yusif kurə̌nǐ ĩgən é kor é Məsiriig, jen man pədə̌ní kor ĩgən‑i.²⁴Yusifə e wəjjǐ tui diiŋgə e ada oné. E mərə e kurí èg dege taan. E curund Samoon awl iyəni tad dë muug.

²⁵Yusif e kor ẽ pərdə̂nə pareega é awleegen é jerg, pareega nee kay e kor man ẽ nagdân kurus diilg, ẽ gəwdə̂n ĩgən namees é mada ẽ nəəmdiigə teed‑eelg. Gəl e jisí ĩgən.²⁶Eg tif jerga cooleeg‑uulg dëg maade e waj.²⁷É wag ná rəgsíigǐ ẽ nəgdíigǐ‑i jen man taman e god pare iini iigə ẽ gawda namees cool iini, e tur kurus iini pare‑uug dë maade.²⁸E bee awleegan: “Kurus əən pədə́nə. E nii pare‑eelg dä maad.” Eg gəmərs e àd dinəs diiŋg iiŋgə eg pərd taw, e bèe: “Ɲiinə Tel jissí ə̃gən ta aneen‑e?”

²⁹É gara lijjíigǐ é faa iyəni Yagob iiŋ é Kanaan‑e, e 'birsíigi ĩnə jisig nà assé e bii'íigə ĩnə:³⁰“Jen ná faan gon é Firuun ë aaɲ‑e é Məsir‑i kurǐ daga jam, beěn aga jag nà den wag feg‑iilg ag lii'ǎ a pərə alda‑ool.³¹Gəl ag biissĩn, ag korǎn é see, aga jag den wag feg‑iilg wa.³²Ag taân əsəgdi è nà dhaag é baaw taman. Ä awl man dhussu taman. Ná ɲaan‑e ag bii'i aa teyag èg dä baawne é Kanaan.³³Aneenda jen ná faan gon é Firuun ë aaɲ é Məsir‑i e bii'ə̃gən, ‘U ɲəm a turuugu é see kor uyun taa tuu‑i biidə ö awl man tad ə̃nə te, u wərdə namees jag uyugun nà naamê kuniig‑i ug wəidə.³⁴Gəl bəgdú ə̃nə ö awl ná ɲaan‑e de â turuugu é see kor uyun e taa tuu‑i, og taa jag den wag feg‑iilg wa‑e. Aneenda de â pədə ũgun ö awlo, ug lizzu ug məərə namees é gaam nii dö kore.’ ”

³⁵É gara ada məŋə̌níigǐ pareeg iilg tad‑e, eg kay man e gə̀msəgə wilər iini ná pare‑eelg‑e eelga e taa kurus. É gara ega èg baaw iyəni tursíigǐ wilərg é kursug‑i, eg gəmərs.³⁶Baaw iyəni Yagob e bii'ĩgən: “Ug 'əwsə aan bara jaalge ənəg. Yusifə dhussu, Samoon ceên, bare ug ɲəm ũ bəgdə Benyamin di. Jisig kay walda dä ool!”³⁷Aneenda Rawbin e bee faa iinin: “Gəfə̃ni de â təəgə̂nũn deena. A təənî deena wa‑e û tirdə jaalge ənəgə è dhaage.”³⁸Gəl Yagob e bee: “Jaa əən ê way èg doge wa, ë awle tirsə, een jo farsé. Jeem e lawsê é teed ná û wəjú ná nee, aan a məissə ugu bii aan ã tir é ungə dä idig.”

Pioneer Bible Translators

https://app.library.bible/content/a230cccfbf4362be