Läs 𐴔𐴡𐴃𐴞 21

𐴔𐴡𐴃𐴞21

𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴞𐴏𐴝𐴤 𐴁𐴝𐴀𐴣𐴐𐴧𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴒𐴡𐴥𐴙𐴓𐴧𐴠

¹𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴋𐴝𐴥𐴑𐴠 𐴎𐴝𐴘𐴃𐴟𐴕 𐴉𐴝𐴀𐴌𐴡𐴃𐴢 𐴀𐴝𐴏𐴠𐴤 𐴊𐴠 𐴁𐴠𐴃𐴉𐴠𐴥𐴒𐴞 𐴀𐴠𐴊𐴧𐴠 𐴁𐴠𐴃𐴝𐴥𐴕𐴞𐴘𐴝 𐴉𐴝𐴌𐴝𐴃𐴢 𐴉𐴡𐴀𐴣𐴙𐴐𐴧𐴠, 𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴊𐴟𐴘 𐴎𐴡𐴕 𐴐𐴝𐴥𐴌𐴞𐴃𐴡𐴌𐴠 𐴊𐴞𐴉𐴠𐴍𐴝𐴥𐴘𐴧𐴠,²𐴀𐴞𐴥𐴃𐴝𐴌𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢, ”𐴃𐴟𐴣𐴀𐴝𐴥𐴌𐴝 𐴔𐴟𐴀𐴔𐴡𐴌 𐴉𐴝𐴌𐴝 𐴒𐴝𐴥𐴕𐴡𐴃𐴢 𐴎𐴡𐴦, 𐴇𐴠𐴥𐴍𐴠 𐴎𐴝𐴘 𐴔𐴡𐴃𐴧𐴡𐴌 𐴀𐴠𐴒𐴧𐴗𐴝𐴤 𐴒𐴝𐴊𐴝𐴤 𐴁𐴝𐴙𐴕𐴊𐴝𐴤 𐴓𐴡𐴦𐴃𐴢 𐴉𐴝𐴘𐴁𐴝, 𐴘𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴠𐴒𐴧𐴗𐴝𐴤 𐴏𐴡𐴥𐴀 𐴘𐴡𐴥 𐴉𐴝𐴘𐴁𐴝. 𐴇𐴞𐴥𐴀𐴕𐴡𐴌𐴠 𐴑𐴟𐴥𐴓𐴞 𐴀𐴝𐴣𐴀𐴌 𐴇𐴠𐴥𐴍𐴠 𐴀𐴝𐴕𐴡𐴤𐴒𐴡𐴘.³𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴑𐴠𐴏𐴧𐴟𐴥 𐴈𐴡𐴀, 𐴃𐴟𐴣𐴀𐴝𐴥𐴌𐴝 𐴈𐴡𐴘𐴁𐴝𐴤 𐴊𐴠, ’𐴔𐴝𐴓𐴞𐴑𐴡𐴃𐴧𐴟 𐴀𐴞𐴀𐴕𐴡𐴌𐴠 𐴓𐴝𐴒𐴠𐴌.‘ 𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴀𐴕𐴡𐴌𐴠 𐴀𐴠𐴥𐴇𐴡𐴕 𐴊𐴞𐴉𐴠𐴍𐴝𐴥𐴘𐴊𐴞𐴁𐴡.“

⁴𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴕𐴡𐴁𐴞𐴌 𐴊𐴟𐴖𐴝𐴌𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥:⁵”𐴏𐴞𐴥𐴘𐴡𐴕𐴡𐴌 𐴎𐴠𐴥𐴌𐴉𐴟𐴖𐴝𐴌𐴠 𐴈𐴡𐴘𐴁𐴝𐴤 𐴊𐴠,’𐴏𐴡𐴀, 𐴃𐴟𐴣𐴀𐴝𐴥𐴣𐴌 𐴁𐴝𐴀𐴣𐴐𐴧𐴝 𐴃𐴟𐴣𐴀𐴝𐴥𐴣𐴌 𐴇𐴝𐴣𐴏𐴠 𐴀𐴝𐴘𐴧𐴠𐴤𐴌.𐴀𐴞𐴥𐴁𐴝 𐴐𐴞𐴥𐴊𐴝, 𐴀𐴞𐴥𐴁𐴝 𐴒𐴝𐴊𐴝𐴤𐴌 𐴖𐴡𐴌𐴠 𐴒𐴡𐴌𐴞,𐴒𐴝𐴊𐴝𐴤𐴌 𐴏𐴡𐴥𐴀𐴌 𐴖𐴡𐴌𐴠 𐴒𐴡𐴌𐴞 𐴀𐴝𐴘𐴧𐴠𐴤𐴌.‘ “

⁶𐴇𐴠𐴥 𐴐𐴝𐴥𐴌𐴞𐴃𐴢 𐴀𐴞𐴥𐴃𐴝𐴌𐴝 𐴎𐴝𐴘, 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴠𐴕𐴊𐴞𐴓𐴧𐴝 𐴐𐴞𐴥𐴑𐴝𐴘𐴊𐴞𐴘𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴙𐴅𐴧𐴠𐴥.⁷𐴀𐴞𐴥𐴃𐴝𐴌𐴝 𐴒𐴝𐴊𐴝𐴤 𐴀𐴠𐴊𐴧𐴠 𐴒𐴝𐴊𐴝𐴤𐴌 𐴏𐴡𐴥𐴀 𐴖𐴝𐴌𐴠 𐴀𐴝𐴙𐴕𐴧𐴠𐴤, 𐴀𐴝𐴦𐴌 𐴇𐴞𐴥𐴀𐴕𐴡𐴌 𐴖𐴡𐴌𐴠 𐴕𐴞𐴎𐴡𐴌 𐴇𐴡𐴦𐴌 𐴀𐴡𐴥𐴑𐴧𐴡𐴓𐴢 𐴁𐴞𐴐𐴝𐴥𐴘𐴊𐴞𐴘𐴠, 𐴀𐴝𐴦𐴌 𐴀𐴞𐴏𐴝𐴤 𐴇𐴞𐴥𐴀𐴕𐴡𐴌 𐴖𐴡𐴌𐴠 𐴁𐴡𐴙𐴐𐴧𐴠𐴥.⁸𐴁𐴠𐴦𐴐𐴢 𐴁𐴝𐴥𐴑 𐴔𐴝𐴙𐴕𐴐𐴠𐴥 𐴕𐴞𐴎𐴡𐴌 𐴇𐴡𐴦𐴌 𐴀𐴡𐴥𐴑𐴧𐴡𐴓𐴢 𐴌𐴝𐴏𐴃𐴝𐴌 𐴖𐴡𐴌𐴠 𐴁𐴞𐴐𐴝𐴥𐴘𐴊𐴞𐴘𐴠; 𐴀𐴝𐴌𐴒𐴟𐴥𐴕𐴠 𐴒𐴝𐴏𐴡𐴌 𐴋𐴝𐴒𐴧𐴗𐴝 𐴀𐴡𐴥𐴑𐴧𐴡𐴓𐴢 𐴈𐴝𐴍𐴞 𐴌𐴝𐴏𐴃𐴝𐴃𐴢 𐴁𐴞𐴐𐴝𐴥𐴘𐴊𐴞𐴘𐴠.⁹𐴎𐴠𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴀𐴞𐴏𐴝𐴤𐴌 𐴀𐴝𐴒𐴠-𐴀𐴝𐴒𐴠 𐴀𐴠𐴊𐴧𐴠 𐴉𐴞𐴏𐴠𐴤-𐴉𐴞𐴏𐴠𐴤 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠,”𐴊𐴝𐴖𐴟𐴊𐴡𐴌 𐴉𐴟𐴖𐴝𐴌𐴠 𐴇𐴡𐴥𐴏𐴝𐴕𐴝! 𐴔𐴟𐴁𐴝𐴌𐴠𐴑 𐴀𐴟𐴁𐴝𐴤 𐴎𐴞𐴁𐴝𐴤 𐴔𐴝𐴁𐴟𐴊𐴡𐴌 𐴕𐴝𐴔𐴠 𐴀𐴝𐴘𐴧𐴠𐴤𐴌. 𐴀𐴠𐴁𐴧𐴠 𐴖𐴡𐴌𐴠 𐴀𐴝𐴏𐴔𐴝𐴕𐴡𐴃𐴢 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴀𐴡𐴥𐴗𐴑!“

¹⁰𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴒𐴡𐴥𐴙𐴓𐴧𐴠, 𐴒𐴟𐴣𐴍𐴝 𐴐𐴡𐴥𐴀𐴌 𐴀𐴟𐴥𐴌𐴟𐴏𐴧𐴟𐴓𐴡𐴃𐴢 𐴉𐴡𐴌𐴞𐴒𐴞𐴘𐴡𐴥𐴘; 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴇𐴡𐴕؟“

¹¹𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴞𐴏𐴝𐴤 𐴕𐴡𐴁𐴞, 𐴒𐴝𐴓𐴞𐴓𐴡𐴌 𐴕𐴝𐴏𐴝𐴥𐴌𐴝𐴃𐴢 𐴐𐴡𐴥𐴀𐴌𐴡𐴌.“

𐴀𐴞𐴏𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴂𐴝𐴑-𐴏𐴝𐴥𐴉𐴢 𐴒𐴡𐴙𐴅𐴧𐴠𐴥

¹²𐴉𐴡𐴌𐴠 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴒𐴡𐴥𐴙𐴓𐴧𐴠, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴇𐴠𐴥𐴍𐴠 𐴁𐴠𐴏𐴝 𐴑𐴞𐴕𐴝 𐴒𐴡𐴌𐴠𐴥𐴌 𐴀𐴞𐴥𐴃𐴝𐴌𐴝𐴌𐴠 𐴓𐴡𐴌𐴝𐴘𐴊𐴞𐴘𐴝𐴃𐴢 𐴊𐴡𐴙𐴅𐴧𐴠; 𐴀𐴝𐴦𐴌 𐴁𐴝𐴄𐴧𐴝 𐴁𐴝𐴥𐴚𐴒𐴡𐴘𐴝𐴌 𐴄𐴠𐴁𐴞𐴥𐴓𐴢 𐴀𐴠𐴊𐴧𐴠 𐴈𐴡𐴘𐴃𐴡𐴌 𐴁𐴠𐴏𐴡𐴘𐴝𐴌 𐴁𐴡𐴘𐴍𐴡𐴥𐴕𐴞 𐴀𐴡𐴥𐴑𐴧𐴡𐴓𐴢 𐴕𐴝𐴃𐴋𐴞𐴘𐴝𐴒𐴝𐴌𐴝𐴘 𐴊𐴞𐴘𐴠.¹³𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ’𐴀𐴝𐴣𐴀𐴌 𐴒𐴡𐴥𐴌𐴡𐴌𐴠 𐴔𐴟𐴕𐴝𐴎𐴝𐴃𐴡𐴌 𐴒𐴡𐴥𐴌 𐴈𐴡𐴖𐴝𐴤 𐴎𐴝𐴘𐴁𐴡,‘ 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴇𐴞𐴥𐴘𐴝𐴕𐴡𐴌𐴠 𐴋𐴝𐴈𐴝𐴣𐴙𐴄𐴡𐴌 𐴀𐴝𐴋𐴧𐴝-𐴈𐴝𐴥𐴕𐴝 𐴁𐴝𐴕𐴝𐴘𐴉𐴠𐴥𐴓𐴝𐴘𐴧𐴡.“

¹⁴𐴃𐴝𐴌𐴉𐴡𐴌𐴠 𐴀𐴝𐴣𐴊𐴝𐴤 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴓𐴠𐴚 𐴀𐴡𐴥𐴑𐴧𐴡𐴓𐴢 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥.¹⁵𐴓𐴠𐴑𐴞𐴕 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴘𐴠 𐴒𐴡𐴙𐴅𐴧𐴠𐴥 𐴊𐴠 𐴃𐴝𐴦𐴅𐴟𐴙𐴂𐴧𐴝 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴊𐴠𐴙𐴑𐴧𐴠𐴥, 𐴀𐴠𐴊𐴧𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴁𐴟𐴥𐴃𐴡𐴌𐴠 𐴉𐴟𐴀𐴝𐴙𐴕 𐴊𐴠 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞, ”𐴊𐴝𐴖𐴟𐴊𐴡𐴌 𐴉𐴟𐴖𐴝𐴌𐴠 𐴇𐴡𐴥𐴏𐴝𐴕𐴝!“ 𐴈𐴡𐴀𐴌 𐴊𐴠 𐴉𐴟𐴥𐴙𐴕𐴧𐴠, 𐴀𐴞𐴥𐴃𐴝𐴌𐴝𐴃𐴧𐴟 𐴁𐴞𐴐𐴞𐴤 𐴒𐴟𐴐𐴧𐴝𐴤 𐴀𐴟𐴍𐴞𐴤𐴒𐴞𐴘𐴡𐴘.

¹⁶𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴉𐴟𐴥𐴕𐴡𐴌 𐴕𐴠𐴥 𐴉𐴟𐴀𐴝𐴙𐴕 𐴀𐴞𐴀𐴕𐴠 𐴑𐴞𐴦 𐴈𐴡𐴀𐴌؟“
𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴉𐴟𐴥𐴕𐴞𐴌, 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴘𐴝𐴀𐴕 𐴇𐴡𐴕𐴡𐴤𐴊𐴞𐴕 𐴕𐴡𐴥 𐴉𐴡𐴌𐴡𐴥,’𐴒𐴟𐴌𐴝 𐴉𐴟𐴀𐴝𐴙𐴕 𐴊𐴡𐴌 𐴀𐴠𐴊𐴧𐴠 𐴊𐴟𐴊𐴡𐴌 𐴉𐴟𐴀𐴝𐴙𐴕 𐴊𐴡𐴌 𐴔𐴟𐴑 𐴀𐴡𐴃𐴧𐴟𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴃𐴝𐴦𐴌𐴞𐴉𐴢 𐴀𐴡𐴥𐴘𐴁𐴝𐴌 𐴀𐴠𐴕𐴃𐴠𐴎𐴝𐴔 𐴒𐴡𐴙𐴅𐴧𐴡𐴥؟‘ “

¹⁷𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴌𐴞 𐴐𐴡𐴥𐴀𐴌𐴡𐴌 𐴁𐴝𐴀𐴌𐴠 𐴁𐴠𐴃𐴝𐴥𐴕𐴞𐴘𐴝 𐴉𐴝𐴌𐴝𐴃𐴢 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴇𐴠𐴥𐴍𐴠 𐴌𐴝𐴙𐴃𐴢 𐴈𐴝𐴍𐴝𐴀𐴙𐴓𐴢.

𐴋𐴟𐴣𐴙𐴌-𐴒𐴝𐴏𐴡𐴌𐴠 𐴁𐴡𐴊𐴧𐴟𐴖𐴝

¹⁸𐴁𐴞𐴀𐴕𐴧𐴝 𐴏𐴡𐴥𐴀𐴌𐴠, 𐴀𐴞𐴏𐴝𐴤 𐴐𐴡𐴥𐴀𐴌𐴡𐴃𐴢 𐴖𐴝𐴦𐴉𐴠𐴏𐴢 𐴎𐴝𐴘𐴁𐴝𐴐𐴧𐴡𐴥𐴃𐴢, 𐴀𐴞𐴥𐴁𐴝𐴃𐴧𐴟 𐴁𐴟𐴥𐴑 𐴓𐴝𐴙𐴒𐴧𐴠𐴥.¹⁹𐴀𐴞𐴥𐴁𐴝𐴘𐴠 𐴉𐴡𐴣𐴃𐴡𐴃𐴢 𐴀𐴠𐴒𐴧𐴗𐴝𐴤 𐴋𐴟𐴣𐴙𐴌-𐴒𐴝𐴏𐴢 𐴊𐴠𐴑𐴞𐴥, 𐴘𐴞𐴥𐴁𐴝𐴌 𐴀𐴞𐴥𐴣𐴘𐴡𐴃𐴢 𐴒𐴞𐴦𐴘𐴠𐴥, 𐴔𐴡𐴕𐴃𐴡𐴌 𐴘𐴞𐴥𐴁𐴝𐴃𐴢 𐴉𐴝𐴃𐴝 𐴁𐴝𐴊𐴠 𐴀𐴝𐴌 𐴑𐴠𐴏𐴧𐴟𐴥 𐴓𐴡𐴦𐴃𐴢 𐴕𐴡𐴥 𐴉𐴝𐴦. 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴒𐴝𐴏𐴢 𐴏𐴗𐴝𐴥𐴌𐴠 𐴈𐴡𐴀𐴌 𐴊𐴠, ”𐴀𐴝𐴌 𐴇𐴡𐴕𐴡𐴤𐴊𐴞𐴕 𐴃𐴡𐴌𐴃𐴧𐴟 𐴒𐴟𐴓𐴝 𐴕𐴡 𐴊𐴡𐴥𐴌𐴡𐴗𐴑.“𐴃𐴡𐴥𐴘 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴋𐴟𐴣𐴙𐴌-𐴒𐴝𐴏𐴢 𐴏𐴗𐴝𐴥 𐴉𐴟𐴥𐴖𐴝𐴘𐴒𐴞𐴘𐴡𐴘.

²⁰𐴇𐴞𐴥𐴘𐴝𐴕 𐴊𐴠𐴑𐴞𐴥 𐴐𐴝𐴥𐴌𐴞𐴃𐴧𐴟𐴕 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴋𐴟𐴣𐴙𐴌-𐴒𐴝𐴏𐴢 𐴏𐴗𐴝𐴥 𐴀𐴠𐴀𐴕 𐴃𐴡𐴌𐴝𐴃𐴡𐴌𐴞 𐴑𐴠𐴀𐴕 𐴉𐴟𐴥𐴖𐴝𐴘𐴒𐴞𐴘𐴡𐴘؟“

²¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴞𐴔𐴝𐴕 𐴃𐴝𐴥𐴑𐴠 𐴀𐴝𐴦𐴌 𐴐𐴡𐴥𐴑 𐴕𐴡 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴏𐴞𐴌𐴞𐴥𐴉𐴢 𐴋𐴟𐴣𐴙𐴌-𐴒𐴝𐴏𐴢 𐴏𐴗𐴝𐴥𐴌 𐴖𐴡𐴌𐴠 𐴎𐴞𐴘𐴝𐴥𐴕 𐴀𐴡𐴥𐴘𐴧𐴠 𐴇𐴞𐴥𐴘𐴝𐴕 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴎𐴡𐴊𐴞 𐴀𐴠 𐴉𐴝𐴀𐴌𐴒𐴗𐴝𐴥𐴌𐴠 𐴘𐴡𐴥 𐴈𐴡𐴀, ’𐴀𐴟𐴍𐴞𐴤 𐴊𐴡𐴙𐴅𐴧𐴝𐴃𐴢 𐴉𐴡𐴌𐴒𐴡𐴥𐴘‘ 𐴇𐴞𐴥𐴘𐴝𐴕 𐴀𐴡𐴥𐴘𐴁𐴡.²²𐴃𐴟𐴣𐴀𐴝𐴥𐴌𐴝 𐴊𐴟𐴖𐴝𐴃𐴢 𐴔𐴝𐴎𐴠𐴥 𐴀𐴞𐴔𐴝𐴕𐴡𐴌 𐴏𐴝𐴥𐴀𐴣𐴃𐴠 𐴎𐴞𐴀𐴕 𐴔𐴝𐴒𐴞𐴁𐴝𐴥 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴝𐴘𐴁𐴝.“

𐴀𐴞𐴏𐴝𐴤𐴌 𐴀𐴝𐴊𐴞𐴥𐴑𐴝𐴌𐴡𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢

²³𐴀𐴞𐴏𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕𐴡𐴃𐴢 𐴒𐴡𐴥𐴓𐴞 𐴁𐴝𐴦𐴊𐴠 𐴃𐴝𐴦𐴓𐴞𐴔 𐴊𐴠𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴘𐴡𐴇𐴟𐴥𐴊𐴞𐴌 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴃𐴟𐴀𐴛 𐴈𐴝𐴔 𐴀𐴞𐴀𐴕 𐴑𐴞𐴦 𐴀𐴝𐴊𐴞𐴥𐴑𐴝𐴌𐴠 𐴒𐴡𐴌𐴡𐴤𐴌؟ 𐴃𐴟𐴣𐴀𐴝𐴥𐴣𐴌𐴠 𐴀𐴠 𐴀𐴝𐴊𐴞𐴥𐴑𐴝𐴌 𐴇𐴡𐴕𐴠 𐴊𐴞𐴦𐴘𐴠𐴥؟“

²⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴘𐴡𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴠𐴑𐴧𐴝𐴥𐴕 𐴏𐴟𐴥𐴖𐴝𐴓𐴢 𐴉𐴟𐴏𐴝𐴥𐴌 𐴒𐴡𐴌𐴞𐴥𐴘𐴟𐴔. 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴇𐴞𐴥𐴘𐴝𐴕𐴡𐴌 𐴎𐴟𐴖𐴝𐴁𐴢 𐴊𐴞𐴓𐴠𐴥 𐴀𐴝𐴀𐴛 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴧𐴟𐴥𐴔 𐴀𐴝𐴀𐴛 𐴀𐴞𐴀𐴕 𐴑𐴞𐴦 𐴀𐴝𐴊𐴞𐴥𐴑𐴝𐴌𐴠 𐴒𐴡𐴌𐴞𐴥𐴌 𐴊𐴠.²⁵𐴘𐴝𐴇𐴝𐴥𐴘𐴝𐴘𐴠 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴁𐴝𐴌 𐴀𐴝𐴊𐴞𐴥𐴑𐴝𐴌 𐴇𐴡𐴕𐴃𐴟𐴤 𐴉𐴝𐴀𐴙𐴓؟ 𐴀𐴝𐴏𐴔𐴝𐴕𐴡𐴃𐴧𐴟 𐴕𐴠𐴥 𐴕𐴝𐴥𐴑𐴞 𐴀𐴞𐴕𐴏𐴝𐴥𐴕 𐴀𐴡𐴃𐴧𐴟؟“
𐴀𐴞𐴥𐴃𐴝𐴌𐴝 𐴀𐴝𐴉𐴡𐴤𐴏𐴡𐴃𐴢 𐴁𐴞𐴘𐴝𐴏𐴝𐴕𐴝 𐴒𐴡𐴌𐴠𐴥𐴌 𐴊𐴠, ”𐴎𐴡𐴊𐴞 𐴀𐴝𐴣𐴀𐴌𐴝 𐴈𐴡𐴀𐴘𐴢 ’𐴀𐴝𐴏𐴔𐴝𐴕 𐴀𐴡𐴃𐴧𐴟,‘ 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴈𐴡𐴘𐴁𐴡𐴤 𐴊𐴠, ’𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴁𐴞𐴐𐴧𐴝𐴥𐴐𐴢 𐴑𐴞𐴘𐴝𐴥 𐴕𐴡𐴥 𐴒𐴡𐴌𐴡𐴤؟‘²⁶𐴔𐴡𐴕𐴃𐴡𐴌 𐴎𐴡𐴊𐴞 𐴈𐴡𐴀𐴘𐴢, ’𐴀𐴞𐴕𐴏𐴝𐴥𐴕 𐴀𐴡𐴃𐴧𐴟,‘ 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝 𐴊𐴠 𐴔𐴝𐴙𐴕𐴐𐴡𐴥𐴌𐴠 𐴋𐴡𐴦𐴌𐴝𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴒𐴧𐴟𐴥𐴕𐴠 𐴃𐴡 𐴘𐴝𐴇𐴝𐴥𐴘𐴝𐴌𐴠 𐴕𐴡𐴁𐴞 𐴔𐴝𐴕𐴠.“

²⁷𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴕𐴡 𐴎𐴝𐴕𐴞.“
𐴀𐴞𐴥𐴁𐴝𐴘𐴠 𐴘𐴡𐴥 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴀𐴝𐴀𐴛 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴕𐴡 𐴈𐴡𐴘𐴧𐴟𐴥𐴔 𐴀𐴝𐴀𐴛 𐴀𐴞𐴀𐴕 𐴑𐴞𐴦 𐴀𐴝𐴊𐴞𐴥𐴑𐴝𐴌𐴠 𐴒𐴡𐴌𐴞𐴥𐴌.“

𐴊𐴟𐴘 𐴉𐴟𐴖𐴝𐴌 𐴔𐴠𐴀𐴏𐴝𐴓𐴢

²⁸”𐴃𐴟𐴣𐴀𐴝𐴥𐴌𐴝𐴌 𐴁𐴟𐴎𐴝𐴥 𐴑𐴞𐴦؟ 𐴊𐴡𐴥𐴌𐴡, 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴃𐴧𐴟 𐴊𐴟𐴖𐴝𐴥 𐴉𐴟𐴖𐴝 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴖𐴝 𐴋𐴡𐴣𐴀𐴌 𐴒𐴗𐴝𐴌 𐴇𐴝𐴣𐴏𐴠 𐴎𐴝𐴘 𐴈𐴡𐴀𐴌 𐴊𐴠, ’𐴀𐴡𐴥 𐴉𐴟𐴃𐴢, 𐴀𐴝𐴙𐴅𐴧𐴝 𐴀𐴝𐴚𐴒𐴟𐴌-𐴁𐴝𐴌𐴞𐴎𐴝𐴃𐴢 𐴎𐴝𐴘 𐴈𐴝𐴔 𐴒𐴡𐴌𐴒𐴡𐴥𐴘.‘²⁹𐴉𐴟𐴖𐴝𐴘𐴠 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠, ’𐴀𐴝𐴀𐴛 𐴕𐴡 𐴎𐴝𐴘𐴧𐴟𐴔,‘ 𐴔𐴡𐴕𐴃𐴡𐴌 𐴀𐴞𐴥𐴃𐴠 𐴉𐴞𐴏𐴡𐴥𐴃𐴧𐴟 𐴔𐴡𐴕 𐴉𐴞𐴥𐴌𐴝𐴘𐴧𐴡𐴌𐴠 𐴒𐴞𐴦𐴘𐴠𐴥.³⁰𐴘𐴡𐴥𐴒𐴧𐴗𐴝𐴘𐴠 𐴉𐴟𐴖𐴝 𐴐𐴡𐴥𐴣𐴍𐴡 𐴖𐴝𐴌 𐴇𐴝𐴣𐴏𐴠 𐴘𐴡𐴥 𐴎𐴝𐴘 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴈𐴡𐴘𐴧𐴠𐴥. 𐴀𐴞𐴥𐴃𐴠 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠, ’𐴅𐴞𐴦, 𐴎𐴝𐴘𐴧𐴟𐴔,‘ 𐴔𐴡𐴕𐴃𐴡𐴌 𐴀𐴞𐴥𐴃𐴠 𐴕𐴡𐴥 𐴎𐴝𐴦.³¹𐴉𐴟𐴖𐴝 𐴊𐴟𐴕𐴞𐴥 𐴖𐴝𐴃𐴧𐴟 𐴇𐴡𐴕𐴠 𐴁𐴝𐴉𐴡𐴌 𐴔𐴡𐴕𐴐𐴝𐴥 𐴉𐴟𐴌𐴝 𐴒𐴡𐴙𐴅𐴧𐴠𐴥؟“
𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴋𐴡𐴣𐴀𐴌𐴒𐴗𐴝𐴥 𐴘𐴠.“
𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴔𐴝𐴒𐴞 𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴢 𐴃𐴟𐴣𐴀𐴝𐴥𐴌𐴝𐴌 𐴀𐴝𐴒𐴠 𐴒𐴡𐴥𐴓𐴠𐴌.³²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴝𐴇𐴝𐴥𐴘𐴝 𐴃𐴡 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴃𐴡𐴌𐴞𐴑𐴝 𐴊𐴝𐴈𐴝𐴤𐴘 𐴁𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴙𐴐𐴧𐴞𐴤𐴓𐴢, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴀𐴠𐴑𐴞𐴕 𐴕𐴡𐴥 𐴒𐴡𐴌𐴡𐴤; 𐴔𐴡𐴕𐴃𐴡𐴌 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴔𐴝𐴒𐴞 𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴀𐴠𐴑𐴞𐴕 𐴒𐴡𐴙𐴅𐴧𐴠𐴥; 𐴃𐴟𐴣𐴀𐴝𐴥𐴌𐴝 𐴇𐴞𐴥𐴘𐴝𐴕 𐴊𐴠𐴑𐴞𐴥 𐴁𐴝𐴦𐴊𐴠 𐴘𐴡 𐴔𐴡𐴕 𐴕𐴡𐴥 𐴉𐴞𐴥𐴌𐴡 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴀𐴠𐴑𐴞𐴕 𐴕𐴡𐴥 𐴒𐴡𐴌𐴡𐴤.“

𐴀𐴝𐴚𐴒𐴟𐴌-𐴁𐴝𐴌𐴞𐴎𐴝 𐴀𐴠𐴊𐴧𐴠 𐴐𐴝𐴐𐴝𐴤 𐴀𐴡𐴥𐴑𐴧𐴡𐴓𐴡𐴌 𐴔𐴠𐴀𐴏𐴝𐴓𐴢

³³”𐴀𐴝𐴌𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴉𐴟𐴥𐴕𐴡: 𐴀𐴠𐴑𐴒𐴗𐴝𐴥 𐴎𐴡𐴔𐴞𐴊𐴝𐴌 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴘𐴠 𐴀𐴠𐴑𐴧𐴝𐴥𐴕 𐴀𐴝𐴚𐴒𐴟𐴌-𐴁𐴝𐴌𐴞𐴎𐴝 𐴓𐴝𐴒𐴝𐴘𐴧𐴠𐴥. 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕𐴡𐴌 𐴏𐴝𐴘𐴌𐴡𐴥 𐴋𐴝𐴥𐴑𐴡𐴃𐴧𐴟 𐴒𐴞𐴥𐴌𐴝 𐴊𐴞𐴥𐴘𐴠, 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴕𐴠𐴦𐴓𐴝𐴘 𐴁𐴡𐴓𐴧𐴝 𐴇𐴠𐴥𐴍𐴠 𐴁𐴟𐴥𐴃𐴡𐴌𐴠 𐴀𐴠𐴒𐴧𐴗𐴝𐴤 𐴒𐴝𐴣𐴌𐴝𐴥 𐴑𐴟𐴙𐴅𐴧𐴠𐴥, 𐴀𐴝𐴦𐴌 𐴀𐴠𐴑𐴧𐴝𐴥𐴕 𐴄𐴡𐴚𐴑𐴞 𐴁𐴝𐴙𐴕𐴊𐴠𐴤. 𐴁𐴝𐴦𐴊𐴠 𐴁𐴝𐴌𐴞𐴎𐴝 𐴒𐴝𐴥𐴕 𐴐𐴝𐴐𐴝𐴤 𐴀𐴡𐴥𐴑𐴧𐴡𐴓𐴡𐴌𐴠 𐴄𐴠𐴥𐴑𐴝 𐴊𐴞𐴥 𐴘𐴡𐴥𐴒𐴧𐴗𐴝 𐴀𐴡𐴙𐴕𐴧𐴡 𐴔𐴟𐴓𐴧𐴟𐴑𐴡𐴃𐴢 𐴒𐴞𐴦𐴘𐴡𐴥𐴘.³⁴𐴎𐴠𐴣𐴃𐴧𐴠𐴥 𐴀𐴝𐴚𐴒𐴟𐴌𐴡𐴌 𐴀𐴝𐴙𐴕𐴊𐴝 𐴀𐴝𐴙𐴐𐴧𐴠𐴥, 𐴘𐴡𐴥𐴒𐴧𐴗𐴝𐴌 𐴒𐴟𐴓𐴝 𐴘𐴡𐴥𐴒𐴧𐴗𐴝𐴘𐴠 𐴉𐴝𐴘 𐴁𐴡𐴓𐴧𐴝 𐴕𐴞𐴎𐴡𐴌 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴡𐴌𐴠 𐴐𐴝𐴐𐴝𐴤 𐴒𐴟𐴥𐴕𐴡𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴧𐴠.³⁵𐴔𐴡𐴕𐴃𐴡𐴌 𐴐𐴝𐴐𐴝𐴤 𐴒𐴟𐴥𐴕𐴠 𐴘𐴡𐴥𐴒𐴧𐴗𐴝𐴌 𐴒𐴡𐴗𐴀𐴌 𐴇𐴞𐴥𐴀𐴕𐴡𐴌𐴠 𐴊𐴡𐴥𐴌𐴞, 𐴀𐴠𐴒𐴧𐴗𐴝𐴤𐴌𐴠 𐴔𐴝𐴌𐴝-𐴊𐴡𐴥𐴌𐴝 𐴒𐴡𐴙𐴅𐴧𐴠𐴥, 𐴀𐴝𐴌 𐴀𐴠𐴒𐴧𐴗𐴝𐴤𐴌𐴠 𐴎𐴝𐴕𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴠, 𐴀𐴝𐴌 𐴀𐴠𐴒𐴧𐴗𐴝𐴤𐴌𐴠 𐴉𐴝𐴃𐴧𐴡𐴥𐴌 𐴔𐴝𐴙𐴅𐴧𐴠𐴥.³⁶𐴀𐴝𐴁𐴝𐴌 𐴘𐴡𐴥𐴒𐴧𐴗𐴝𐴘𐴠 𐴀𐴝𐴒𐴡𐴌 𐴒𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴠𐴦𐴐𐴒𐴡𐴌𐴞 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴢 𐴊𐴞𐴉𐴠𐴍𐴝𐴥𐴘𐴧𐴠; 𐴐𐴝𐴐𐴝𐴤 𐴒𐴟𐴥𐴕𐴠 𐴀𐴞𐴥𐴃𐴝𐴌𐴝𐴌𐴠 𐴘𐴡𐴥 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴒𐴡𐴙𐴅𐴧𐴠𐴥.³⁷𐴀𐴠𐴁𐴧𐴠 𐴀𐴝𐴇𐴠𐴥𐴌𐴞𐴃𐴢, 𐴘𐴡𐴥𐴒𐴧𐴗𐴝𐴘𐴠 𐴀𐴠𐴀𐴕 𐴁𐴝𐴥𐴉𐴞 𐴕𐴞𐴎𐴡𐴌 𐴉𐴟𐴖𐴝𐴌𐴠 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥𐴘𐴧𐴠, ’𐴀𐴞𐴥𐴃𐴝𐴌𐴝 𐴀𐴝𐴣𐴀𐴌 𐴉𐴟𐴖𐴝𐴌𐴠 𐴀𐴞𐴎𐴧𐴡𐴃𐴢 𐴒𐴡𐴌𐴞𐴥𐴁𐴡.‘³⁸𐴔𐴡𐴕𐴃𐴡𐴌 𐴐𐴝𐴐𐴝𐴤 𐴒𐴟𐴥𐴕𐴠 𐴉𐴟𐴖𐴝 𐴖𐴝𐴌𐴠 𐴊𐴠𐴑𐴞𐴥 𐴀𐴝𐴉𐴡𐴤𐴏𐴡𐴃𐴢 𐴈𐴡𐴀𐴌 𐴊𐴠, ’𐴀𐴞𐴃𐴠 𐴃𐴡 𐴔𐴞𐴌𐴝𐴏𐴊𐴝𐴥𐴌; 𐴀𐴝𐴘𐴧𐴡𐴤 𐴀𐴞𐴃𐴝𐴌𐴠𐴤 𐴔𐴝𐴌𐴞𐴉𐴠𐴥𐴓𐴝𐴘 𐴀𐴞𐴃𐴝𐴌 𐴔𐴞𐴌𐴝𐴏𐴢 𐴓𐴡𐴘𐴉𐴠𐴥𐴓𐴝𐴘.‘³⁹𐴃𐴡𐴥𐴘 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞 𐴁𐴝𐴌𐴞𐴎𐴝𐴌 𐴁𐴝𐴀𐴌𐴠 𐴓𐴡𐴘𐴎𐴝𐴘 𐴔𐴝𐴌𐴞𐴉𐴠𐴥𐴓𐴝𐴘𐴧𐴠.“

⁴⁰”𐴇𐴠𐴥 𐴀𐴞𐴥𐴏𐴝𐴉𐴠, 𐴁𐴝𐴌𐴞𐴎𐴝𐴌 𐴒𐴞𐴌𐴡𐴥𐴏𐴢 𐴀𐴝𐴘𐴓𐴠𐴤, 𐴇𐴠𐴥 𐴐𐴝𐴐𐴝𐴤 𐴒𐴟𐴥𐴕𐴡𐴌𐴠 𐴑𐴞𐴦 𐴒𐴡𐴌𐴞𐴥𐴁𐴡 𐴉𐴝𐴥𐴣𐴓𐴧𐴝𐴌؟“

⁴¹𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴘𐴡𐴥𐴒𐴧𐴗𐴝𐴘𐴠 𐴈𐴡𐴥𐴌𐴝𐴉𐴢 𐴔𐴝𐴕𐴟𐴥𐴙𐴐𐴢 𐴇𐴞𐴥𐴀𐴕𐴡𐴌𐴠 𐴏𐴝𐴥𐴀𐴁𐴒𐴡𐴌𐴞 𐴇𐴡𐴥𐴃𐴡𐴔 𐴒𐴡𐴌𐴞𐴥𐴉𐴠𐴓𐴝𐴘𐴁𐴡, 𐴀𐴝𐴦𐴌 𐴁𐴝𐴌𐴞𐴎𐴝 𐴒𐴝𐴥𐴕 𐴀𐴟𐴕𐴊𐴞𐴓𐴧𐴝 𐴐𐴝𐴐𐴝𐴤 𐴀𐴡𐴥𐴑𐴧𐴡𐴓𐴡𐴌𐴠 𐴄𐴠𐴥𐴑𐴝 𐴊𐴞𐴥𐴉𐴠𐴓𐴝𐴘𐴁𐴡 𐴎𐴠𐴃𐴝𐴌𐴝𐴤 𐴀𐴝𐴙𐴕𐴊𐴝 𐴀𐴝𐴘𐴓𐴠𐴤 𐴘𐴡𐴥𐴒𐴧𐴗𐴝𐴌𐴠 𐴒𐴟𐴓𐴝𐴌 𐴁𐴝𐴥𐴑 𐴊𐴞𐴦𐴁𐴡.“

⁴²𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴘𐴝𐴀𐴕 𐴁𐴞𐴓𐴑𐴟𐴥𐴓𐴢 𐴕𐴡𐴥 𐴉𐴡𐴌𐴡𐴥 𐴕𐴞𐴥𐴑𐴞,’𐴎𐴠 𐴉𐴝𐴃𐴧𐴡𐴥𐴌 𐴔𐴞𐴏𐴃𐴞𐴥𐴌𐴞𐴘𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴠,𐴘𐴞𐴥𐴁𐴝 𐴉𐴝𐴃𐴧𐴡𐴥𐴌 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴎𐴡𐴌𐴟𐴌𐴞 𐴖𐴝 𐴀𐴡𐴥𐴘𐴒𐴞𐴘𐴡𐴘.𐴇𐴞𐴥𐴘𐴝𐴕 𐴔𐴝𐴁𐴟𐴊𐴡𐴌 𐴃𐴡𐴌𐴉𐴡𐴥𐴃𐴧𐴟 𐴀𐴡𐴥𐴘𐴀𐴝𐴙𐴐𐴧𐴠,𐴀𐴝𐴦𐴌 𐴇𐴞𐴥𐴘𐴝𐴕 𐴀𐴝𐴣𐴀𐴌𐴝𐴌 𐴏𐴟𐴑𐴡𐴃𐴢 𐴃𐴝𐴦𐴅𐴟𐴙𐴂𐴧𐴝؟‘

⁴³”𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴃𐴟𐴣𐴀𐴝𐴥𐴌𐴝𐴃𐴧𐴟 𐴓𐴡𐴘𐴉𐴠𐴥𐴓𐴝𐴘 𐴀𐴟𐴕𐴊𐴞𐴓𐴧𐴝 𐴀𐴠𐴒𐴧𐴗𐴝𐴤 𐴑𐴡𐴗𐴔𐴡𐴌𐴠 𐴊𐴞𐴦𐴉𐴠𐴥𐴓𐴝 𐴎𐴝𐴘𐴁𐴡, 𐴎𐴞𐴁𐴝𐴤𐴘𐴠 𐴕𐴞𐴑𐴞 𐴇𐴞𐴥𐴘𐴝𐴕 𐴀𐴡𐴌 𐴒𐴟𐴓𐴝𐴒𐴝𐴓𐴝 𐴊𐴡𐴥𐴌𐴝𐴘𐴁𐴡.⁴⁴𐴎𐴠𐴦𐴕𐴞𐴑𐴞 𐴇𐴠𐴥 𐴉𐴝𐴃𐴧𐴡𐴥𐴌𐴡𐴌 𐴖𐴡𐴌𐴠 𐴉𐴡𐴌𐴞𐴁𐴡𐴥, 𐴀𐴞𐴥𐴃𐴠 𐴁𐴝𐴥𐴚𐴒𐴞 𐴇𐴝𐴥𐴕-𐴇𐴝𐴥𐴕 𐴀𐴡𐴥𐴘𐴎𐴝𐴘𐴁𐴡𐴘; 𐴔𐴡𐴕𐴃𐴡𐴌 𐴎𐴝𐴌 𐴖𐴡𐴌𐴠 𐴕𐴞𐴑𐴞 𐴇𐴠𐴥 𐴉𐴝𐴃𐴧𐴡𐴥𐴌 𐴉𐴡𐴌𐴞𐴁𐴡𐴥, 𐴀𐴞𐴥𐴃𐴠 𐴉𐴞𐴐𐴞𐴥 𐴎𐴝𐴥𐴘𐴁𐴡𐴘.“

⁴⁵𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴔𐴠𐴀𐴏𐴝𐴓𐴢 𐴓𐴟𐴕 𐴉𐴟𐴥𐴕𐴞 𐴁𐴟𐴎𐴞𐴥𐴒𐴞𐴘𐴡𐴘 𐴊𐴠 𐴑𐴞 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴁𐴝𐴦𐴁𐴟𐴃𐴠 𐴈𐴡𐴀𐴌 𐴊𐴠.⁴⁶𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴉𐴠𐴓𐴝𐴘 𐴁𐴡𐴓𐴧𐴝 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴡𐴌𐴠 𐴋𐴡𐴦𐴌𐴝𐴘𐴃𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴕𐴡𐴁𐴞 𐴔𐴝𐴙𐴕𐴃𐴡.

The Word for the World International

https://app.library.bible/content/87faca8b51c22590