Nɔɔneŋ118
Kefane fa karaŋ lee keyoodi man
1Ɛ fa Degbeŋgyoo karaŋ, nawolo nyi ɔ dei,ɔ kegyae doo kekpaakekpaa.2Ɛ yela Iserae ke yako nyi,<<Ɔ kegyae doo kekpaakekpaa.>>3Ɛ yela Aarɔn dekpaŋalaŋmantena ke yako nyi,<<Ɔ kegyae doo kekpaakekpaa.>>4Ɛ yela baŋ bee yee Degbeŋgyoo nɛ ke yako nyi,<<Ɔ kegyae doo kekpaakekpaa.>>5Ma wose kyaŋa maŋ na, me baake Degbeŋgyoo,te ɔ lese maŋ lee ma wose kekyaŋ man.6Degbeŋgyoo kpuɛna maŋ, mɔɔ ne yee ya,woŋ te deniwalaŋ waa tale yɛɛ maŋ?7Degbeŋgyoo kpuɛna maŋ, ŋon yɛna me kyɔɔre.waa yoodi me kɔlara dɔɔ, na maa mo me sibii naa.8Dei nyi dee yeu kagyoo Degbeŋgyoo,kela keŋ dɛɛ mo da wose lɔ denibalaŋ dɔɔ.9Dei nyi dee yeu kagyoo Degbeŋgyoo,kela keŋ dɛɛ mo da wose lɔ kyaarabia dɔɔ.10Tɛɛlese pou te kilisi maŋ,mɔna lee Degbeŋgyoo yele man dɔɔ me wɔlɛɛ wɔ pou.11Ba te tɔ maŋ do gyaŋee,mɔna lee Degbeŋgyoo yele man dɔɔ me wɔlɛɛ be popou.12Be te wuu me dɔɔ ŋgba teebɔɔbiise nɛ,mɔna boalaŋ kpaa wɔ ŋgba sɔɔse nɛ,Degbeŋgyoo yele man te me wɔlɛɛ wɔ pou.13Be tɛɛse maŋ wɔlewɔle nafɔ maa yala,mɔna Degbeŋgyoo kyɔɔ maŋ.14Degbeŋgyoo yɛna me doŋ na me gyeere,ŋon yɛna ma nyeekelɛɛ.15De nyii kenyaŋee na keyoodi yeesa,baŋ ba tenɛɛ nɛ kanyaŋ denɛɛ man.<<Degbeŋgyoo dunoluŋ nyiŋmaa ne yɛɛ nombia dinaana.16Degbeŋgyoo te gyina ɔ dunoluŋ nyiŋmaa adido,Degbeŋgyoo dunoluŋ nyiŋmaa ne yɛɛ nombia dinaana.>>17Mɔɔ gyae maa yeŋ ya, mɔna maa kyaa nyeedoŋ man,na maa gyɔ ŋan Degbeŋgyoo be yɛɛ nɛ dekpeŋkpeŋ.18Degbeŋgyoo wɔŋa ma deŋele nideli,mɔna ɔ ta mo maŋ fa yeŋ ya.19Ɛ toro nombia ŋan doona ŋe gbɛɛ nɛ anaanɔɔse fa maŋ,na maa gyoo na maa fa Degbeŋgyoo karaŋ.20Kei yɛna Degbeŋgyoo denaanɔɔ,baŋ ba tenɛɛ nɛ baa mo ke man gyoo.21Maa fa neŋ karaŋ nawolo nyi n nyii maŋ,n ta bese ma nyeekelɛɛ.22Boe keŋ deni maara be bɛɛ ke nɛ,kaa bese mokɔɔ kasee boe kpaakpaate.23Degbeŋgyoo yɛɛna kei,te ke dana gyakoloŋ de siaman.24Gyɛŋ wee kei te Degbeŋgyoo yɛɛ ke,ɛ yela dɛɛ nyaŋee gyɛŋ na ke yɛɛ daa gyoŋ.25Ao Degbeŋgyoo lɛɛ da nyee,Ao Degbeŋgyoo yela ke gyu nideli fa daa.26Walaŋ ŋon ɔ ne kɔŋ Degbeŋgyoo yele man nɛ, ŋonna nyeebam,Dee hiraa ŋon lee Degbeŋgyoo ɔsom deni dinaa keŋ man.27Degbeŋgyoo yɛna Wurubuarɛ,ɔ te yele ɔ keŋmaŋee te ŋmaŋee fa daa,ɛ mo tombia tela, na ɛ ke ta lɔ baameŋ nɔɔkedi keŋ man,ɛ ta kekyaŋkyaŋ dɔɔ kilisi kedeesaboe keŋ.28Nyaŋ yɛna me Wurubuarɛ, maa lese n yele,nyaŋ yɛna me Wurubuarɛ, maa gyina neŋ adido,29Ɛ fa Degbeŋgyoo karaŋ nawolo nyi ɔ dei,ɔ kegyae doo kekpaakekpaa.The Seed Company