Read Nɔɔneŋ 119

Nɔɔneŋ119

Degbeŋgyoo mmaraa keŋ

¹Baŋ be gbɛɛneŋ tenɛɛ,te bee di Degbeŋgyoo mmaraase ŋan dɔɔ nɛ baŋna nyeebam.²Baŋ bɛɛ yɛɛ ɔ kegyaebii,te bɛɛ mo be konɔɔ pou kɛo e nɛ, baŋna nyeebam.³Bɔɔ ne yɛɛ kolokum ya,mɔna bɛɛ tɛɛ ɔ gbɛɛneŋ man.⁴Nyaŋ wolana n gbɛɛneŋ,ŋan dee di ŋe dɔɔ nideli.⁵Ao, me lookegyakaa yɛna nyi me gbɛɛneŋ dɛɛ tenee,lee n kawolase dɔɔ kedi man.⁶Akpaa ma gyene nyaŋ mmaraase pou nideli nɛ,nafɔ desɛŋ be gyae ke kyaŋ maŋ ya.⁷Maa mo konɔɔ kpaakpaa lese n yele,debaŋ keŋ mɛɛ kasee nyaŋ mmaraase ŋan tenɛɛ nɛ.⁸Maa di n kawolase dɔɔ,naa bɛɛ maŋ korakora ya.⁹Sena te tobaale waa tale kyaa fereŋkyeŋ man?Lee n nombia ŋan dɔɔ kedi man.¹⁰Me ta mo me konɔɔ pou mɛɛ kɛo neŋ,na yele maa yo gbɛɛ lee nyaŋ mmaraase ŋan wɔle ya.¹¹Me ta mo n nombia ŋan weese me konɔɔ man,na mɔɔ nyiŋ yɛɛ dukum tia neŋ ya.¹²Degbeŋgyoo, mɛɛ lese n yele,wola maŋ n kawolase ŋan.¹³Maa bese toro yako,mmaraase ŋan pou ba lee n nɔɔman nɛ.¹⁴Mɛɛ nyaŋee lee n kegyaebii keyɛɛ man,kela kenyaŋee lee wosekenyiŋ nideli man.¹⁵Mɛɛ gyoo n kawolase ŋan man,te me sia gyakaa n gbɛɛneŋ dɔɔ.¹⁶N kawolase na gyoo me sia,mɔɔ gyae maa wolee n nombia ŋan ya.¹⁷Yɛɛ deeli fa n tobaale ma kekyaabii man,na maa di n nombia dɔɔ.¹⁸Gyuusu me sia na maa naa,gyakoloŋ nombia ŋan doo nyaŋ mmaraa man.¹⁹Me yɛɛ ŋɔɔle e tɛɛle dɔɔ,na weese maŋ nyaŋ mmaraase ya.²⁰Ne gyɔ maŋ loo nideli me konɔɔ man,lee nyaŋ mmaraase dɔɔ debaŋ kamasɛ.²¹N ne kalena agaŋtaŋtena, baŋ n be falaa wɔ,baŋ yoona gbɛɛ lee nyaŋ mmaraase ŋan man.²²Lese tuubia na desɛŋ lee me dɔɔ,nawolo nyi mee di nya mmaraase ŋan dɔɔ.²³Doo nyi kegyiise ne yilaa bake ma nyeeman koraŋ nɛ,n tobaale waa gyoo n kebakesee man.²⁴Nya adansɛɛ nombia na gyoo me sia,ŋan ne kolosila fa maŋ.²⁵Be te tisina ma woo do tɛɛle man,yela maa nyiŋ nyeedoŋ lee n nombia ŋan dɔɔ.²⁶Ma toro ŋan pou mɔɔ yɛɛ nɛ yako, te n tiranɔɔ fa maŋ,wola maŋ n kawolase.²⁷Yela maa nyii n gbɛɛneŋ man,na maa gyoo n gyakoloŋ nombia man.²⁸Ma woo ne mutii,do maŋ doŋ ŋgba mena keŋ n nombii keŋ doo nɛ.²⁹Lese maŋ lee akɛrɛɛ gbɛɛneŋ man,boele maŋ na n ka wola maŋ nyaŋ mmaraa.³⁰Me ta lese anokoare kedi gbɛɛ,me ta mo me konɔɔ gyakaa nyaŋ mmaraase dɔɔ.³¹Degbeŋgyoo, me dana nya mmaraase ŋan man keŋkeŋ,naa yele desɛŋ ke kyaŋ maŋ ya.³²Maa barasena nyaŋ mmaraase ŋan dɔɔ kedi man,nawolo nyi n te yele mee nyii nombia man nideli.³³Degbeŋgyoo, wola maŋ n kebakesee,na maa sila ŋa kelii ɔto.³⁴Fa maŋ nombia man kenyii, na maa di nyaŋ mmaraase dɔɔ.na maa mo me konɔɔ pou di ŋe dɔɔ.³⁵Mo maŋ ta nyaŋ mmaraase gbɛɛneŋ man,nawolo nyi ŋan na gyoona me sia.³⁶Yela nya mmaraase nombia ke gyɔ maŋ loo,mɔna na wose kenyiŋ ya.³⁷Lese me sia lee abɔɔ ŋan taŋ tɔnɔɔ ya nɛ dɔɔ,yela maa nyiŋ nyeedoŋ lee n nombii keŋ dɔɔ.³⁸Seŋ n keyakosee dɔɔ fa n tobaale,na baa nyiŋ yee neŋ.³⁹Lese desɛŋ keŋ mee yee nɛ,nawolo nyi nyaŋ mmaraase dei.⁴⁰N gbɛɛneŋ kesila ne gyɔ maŋ loo.N katenee dɔɔ gyee ma nyeedoŋ.⁴¹Degbeŋgyoo yela n kegyae keŋ taŋ ɔto ya nɛ ke kɔŋ me dɔɔ,n nyeekelɛɛ ŋgba mena keŋ n be yakosee nɛ.⁴²Kenaŋ na maa nyiŋ nombii yako baŋ bee kulu maŋ nɛ,nawolo nyi mɛɛ mo ma wose lɔ n nombii dɔɔ.⁴³Naa lese nya anokoare nombii keŋ lee me nɔɔman korakora ya,nawolo nyi me loo gyakaa nyaŋ mmaraase ŋan dɔɔ.⁴⁴Maa di nyaŋ mmaraase dɔɔ,kekpaakekpaa.⁴⁵Maa ta wosekelɛɛ man,nawolo nyi mee di n gbɛɛneŋ dɔɔ.⁴⁶Maa kolosi nya mmaraase ŋan gyooneŋ siaman,keŋ desɛŋ be kyaŋ maŋ ya.⁴⁷Nyaŋ mmaraase ŋan na gyoo me sia,nawolo nyi mɛɛ gyae ŋa.⁴⁸Mee bu nyaŋ mmaraase ŋan te mɛɛ gyae ŋa,na maa gyoo n kebakesee ŋan man.⁴⁹Tɔɔse n nombii keŋ n be yako n tobaale,ke man te n faa maŋ loo kegyakaa.⁵⁰Kei ne fɛɛna me wɔe me kaale man,n keyakosee ne gyee ma nyee.⁵¹Agaŋtaŋtena ne kulu maŋ nideli,mɔna me ta lee nyaŋ mmaraa wɔle ya.⁵²Degbeŋgyoo, me tɔɔse n beneŋ mmaraase ŋan na,me wɔe te fɛɛ maŋ.⁵³Me baŋ na koro nideli lee akpanyanyaŋtena,baŋ bɔɔ bɛɛ nyaŋ mmaraase ŋan dɔɔ.⁵⁴N kebakesee yɛna me nɔɔneŋ,me dasoe kamasɛ man.⁵⁵Degbeŋgyoo, mɛɛ tɔɔse n yele nelim,nyi maa di nyaŋ mmaraa dɔɔ.⁵⁶Ke ta bese kpene keŋ mɛɛ yɛɛ,nyi maa di n gbɛɛneŋ dɔɔ.⁵⁷Degbeŋgyoo, nyaŋ yɛna me wui dedii,ma te yakosee nyi maa di n nombia dɔɔ.⁵⁸Me ta mo me konɔɔ pou mɛɛ kɛɛ n siaman,boele maŋ ŋgba mena keŋ n be yakosee nɛ.⁵⁹Ma te kɛɛ ma keta man,te me kyɛɛkee ma naawɔ kekulu man nyi maa di nya mmaraase dɔɔ.⁶⁰Maa yɛɛ ɔsaa te mɔɔ dɔɔ wɔle ya,nyi maa di nyaŋ mmaraase dɔɔ.⁶¹Nyi akpanyanyaŋtena da mo ŋmeeseŋ bake maŋ koraŋ nɛ,mɔɔ gyae maa wolee nyaŋ mmaraa ya.⁶²Tɛɛ nsana maa koro fa neŋ karaŋ,lee nyaŋ mmaraase ŋan tenɛɛ nɛ dɔɔ.⁶³Me gyoona yɛna baŋ pou bee yee neŋ,baŋ pou bɛɛ tɛɛ n gbɛɛneŋ man nɛ.⁶⁴Degbeŋgyoo, n kegyae te lɛɛ tɛɛle pou,wola maŋ n kebakesee ŋan.⁶⁵Degbeŋgyoo, yɛɛ deeli fa n tobaale,ŋgba mena keŋ n nombii doo nɛ.⁶⁶Wola maŋ nombia kagyeŋ na nombia kedi kpaakpaa,nawolo nyi me ta mo ma wose lɔ nyaŋ mmaraase dɔɔ.⁶⁷Pɛ n ke wɔŋ ma deŋele na me kpase gbɛɛ,mɔna nɛnɛɛ dɔɔ mee di n nombii keŋ dɔɔ.⁶⁸N dei, te ŋan n ne yɛɛ mɔ dei,wola maŋ n kebakesee ŋan.⁶⁹Doo nyi agaŋtaŋtena ne ta mo akɛrɛɛ sɔ maŋ,mɔna maa mo me konɔɔ pou di n gbɛɛneŋ dɔɔ.⁷⁰Be konɔɔ dana yuŋ te bɔɔ ne wii walaŋ ya,mɔna maŋ dɔɔ nyaŋ mmaraa na gyoo me sia.⁷¹Dei fa maŋ ŋgba n be wɔŋ ma deŋele nɛ,na maa nyiŋ kasee n kebakesee ŋan.⁷²Mmaraa keŋ ba lee n nɔɔman na lee koya fa maŋ,kela kɔba wolom na kɔba yayam bia kakpoŋse.⁷³N nyiŋmaase yɛɛna maŋ te n desina maŋ,fa maŋ nombia man kenyii na maa kasee nyaŋ mmaraase,⁷⁴Baŋ bee yee neŋ baa naa maŋ na baa nyaŋee,nawolo nyi me ta mo me loo gyakaa n nombii keŋ dɔɔ.⁷⁵Degbeŋgyoo, ma gyeŋ nyi nyaŋ mmaraase tenɛɛ,te n moo anokoare kedi wɔŋ ma deŋele.⁷⁶Yela n kegyae keŋ taŋ ɔto ya nɛ ke yako do maŋ,ŋgba mena keŋ n be yakosee fa n tobaale nɛ.⁷⁷Yela n kewii kekɔŋ me dɔɔ na maa nyiŋ nyeedoŋ,nawolo nyi nyaŋ mmaraa na gyoo me sia.⁷⁸Yela desɛŋ ke kyaŋ agaŋtaŋtena nawolo nyi ba te kɛrɛɛ me nɔɔse keŋ ma te yɛɛ kolo ya,mɔna maŋ maa gyoo n gbɛɛneŋ man.⁷⁹Yela baŋ bee yee neŋ ka bese kɔŋ me gyaŋ,baŋ bee nyii nya mmaraase nɛ.⁸⁰Yela me konɔɔ pou ke sila n kebakesee ŋan,na desɛŋ be nyiŋ kyaŋ maŋ ya.⁸¹N nyeekelɛɛ ne gyɔ ma woo loo nideli,me ta mo me loo gyakaa n nombii dɔɔ.⁸²Me sia te kɛɛ n keyakosee gbɛɛ kina,Me kpa, <<Woromɔ te nyaŋ ke yakodo maŋ?>>⁸³Me yɛɛ ŋgba wonembu tɔne ogele keŋ doo nyɔɔse man,mɔna mɔɔ gyae maa wolee n kebakesee ya.⁸⁴N tobaale waa daa kelii woromɔ?Woromɔ yaa n ke di baŋ bɛɛ naase maŋ diyem nɛ nombia?⁸⁵Agaŋtaŋtena te wula dowokom fa maŋ,keŋ bɛɛ kyaana nyaŋ mmaraase ya.⁸⁶Nyaŋ mmaraase pou doona ŋe gbɛɛ,kyɔ maŋ, nawolo nyi bɛɛ naase maŋ diyem yakaa.⁸⁷Kaa kyomii nafɔ be ta lese maŋ lee tɛɛle dɔɔ,mɔna ma te bɛɛ n gbɛɛneŋ ya.⁸⁸Lee n kegyae keŋ taŋ ɔto ya dɔɔ yela maa nyiŋ nyeedoŋ,na maa di n nɔɔman adansɛɛ nombia dɔɔ.⁸⁹Degbeŋgyoo, n nombii keŋ doo kekpaakekpaa,ka seŋɛɛ adido keŋkeŋ.⁹⁰Nya anokoare kedi doo kelii kalola kegyakaarese pou man,nyaŋ seena tɛɛle mokɔɔ te ka seŋɛɛ nideli.⁹¹Nyaŋ mmaraase seŋɛɛ kaalii gyɛŋ,nawolo nyi abɔɔ pou na som neŋ.⁹²Nyi nyaŋ mmaraase deŋ ta gyoo me sia ya nɛ,nafɔ meŋ wɔlɛɛwɔ ma diyem kena man.⁹³Mɔɔ gyae maa wolee n gbɛɛneŋ korakora ya,nawolo nyi ŋe dɔɔ te n tɛɛwɔ yela me nyiŋa nyeedoŋ.⁹⁴Lɛɛ ma nyee, nawolo nyi me yɛɛ n wui,me te di n gbɛɛneŋ dɔɔ.⁹⁵Akpanyanyaŋtena na deke maŋ baa wɔlɛɛ,mɔna maŋ maa gyoo nya mmaraase man.⁹⁶Ma te naa nyi abɔɔ kpaakpaa pou dana ɔto,mɔna nyaŋ mmaraase be dana ɔto ya.⁹⁷Ao, mena keŋ mɛɛ gyae nyaŋ mmaraa keŋ,mɛɛ gyoo ke man wee dibiliŋ pou.⁹⁸Nyaŋ mmaraase doo me gyaŋ debaŋ kamasɛ,ŋa te yele me ta gyeŋ nombia kela me kɔlara.⁹⁹Ma gyeŋ nombia kela ma wolara pou,nawolo nyi mɛɛ gyoo nya mmaraase man,¹⁰⁰Mee nyii nombia man nideli kela kegyiise,nawolo nyi mee di n gbɛɛneŋ dɔɔ.¹⁰¹Ma te wɔŋ ma wose lee dukum kamasɛ keyɛɛ man,na maa di n nombia dɔɔ.¹⁰²Me ta lee nyaŋ mmaraase ŋan wɔle ya,nawolo nyi nyaŋ wolana maŋ.¹⁰³N nombia dana maŋ gyoŋ nideli,gyoŋ kela teebɔɔ doola me nɔɔman.¹⁰⁴N gbɛɛneŋ yelela mee nyii nombia man,mena dɔɔ mɛɛ kɔla gbɛɛkum kamasɛ.¹⁰⁵N nombii yɛɛ kanea fa me nawɔɔ,na keŋmaŋee me gbɛɛnaa man.¹⁰⁶Ma te kaŋ ntam te me lɛɛ ke do,nyi maa di nyaŋ mmaraase ŋan tenɛɛ nɛ dɔɔ.¹⁰⁷Ma te naa diyem nideli,Degbeŋgyoo, fa maŋ nyeedoŋ lee n nombii keŋ dɔɔ.¹⁰⁸Degbeŋgyoo, lɛɛ me nɔɔman yele kalese kedeesa,na n ka wola maŋ nyaŋ mmaraase.¹⁰⁹Doo nyi ma nyeedoŋ doo me nyiŋmaa man debaŋ kamasɛ,mɔɔ gyae maa wolee nyaŋ mmaraase ya.¹¹⁰Akpanyanyaŋtena te nyɔɔ maŋ kɔta,mɔna ma te kpase lee n gbɛɛneŋ man ya.¹¹¹Nyaŋ mmaraase yɛna me dedii kekpaakekpaa,ŋan yɛna kenyaŋee me konɔɔ man.¹¹²Ma te yɛɛ ma nyeempɔ nyi maa di n kebakesee dɔɔ,kelii ɔto.¹¹³Mɛɛ kɔla baŋ ba nyeempɔse yɛɛ ala ala nɛ,mɔna mɛɛ gyae nyaŋ mmaraa.¹¹⁴Nyaŋ yɛna ma keyeu kagyoo na ma yoo nyeele pampasaŋ,me loo gyakaa n nombii dɔɔ.¹¹⁵Ɛmɛɛ nombiakumɛɛ yɛɛra, ɛ lee me gyaŋna maa nyiŋ di me Wurubuarɛ mmaraase dɔɔ.¹¹⁶Tela maŋ ŋgba mena keŋ n be yakosee nɛ, na maa nyiŋ nyeedoŋ,naa yele me loo kegyakaa ke yɛɛ yakaa ya.¹¹⁷Kyaŋ maŋ na maa nyiŋ kelɛɛ,maa mo obuo fa n kebakesee debaŋ kamasɛ.¹¹⁸N te bɛɛ baŋ pou bɔɔ kpase lee n kebakesee ŋan wɔle nɛ,nawolo nyi ba adao gbɛɛneŋ pou te yɛɛ yakaa.¹¹⁹N te bɛɛ tɛɛle kei dɔɔ akpanyanyaŋtena pou ŋgba woŋsila nɛ,mena dɔɔ mɛɛ gyae nya mmaraase.¹²⁰N keyee te yele ma wose ne seree maŋ,mee yee nyaŋ mmaraase.¹²¹Ma te yɛɛ keŋ tenɛɛ na keŋ doona ke gbɛɛ,naa tina maŋ yela fa baŋ bɛɛ ŋere maŋ do nɛ ya.¹²²Kɛɛ nyi n tobaale te nyiŋ ɔ wose,na yele agaŋtaŋtena ka ŋere maŋ do ya.¹²³Me sia te kɛɛ n nyeekelɛɛ,na n keyakosee keŋ tenɛɛ nɛ gbɛɛ kina.¹²⁴Yɛɛ deeli fa n tobaale lee n kegyae man,na n ka wola maŋ n kebakesee.¹²⁵Me yɛɛ n tobaale e, fa maŋ nombia man kenyii,na maa gyeŋ nya mmaraase¹²⁶Degbeŋgyoo, debaŋ te lii keŋ nya yɛɛ kolo,nawolo nyi ba te yala nyaŋ mmaraa keŋ dɔɔ.¹²⁷Nawolo nyi mɛɛ gyae nyaŋ mmaraase,kela kɔba yayam, kela kɔba yayam kpaakpaate,¹²⁸te keŋ mɛɛ kɛɛ n gbɛɛneŋ pou nyi ŋe dei dɔɔ,mɛɛ kɔla gbɛɛkum kamasɛ.¹²⁹Nyaŋ mmaraase dana gyakoloŋ,mena dɔɔ mee di ŋe dɔɔ.¹³⁰N nombia man kalese wola ne fa keŋmaŋee,ne yele ŋon ɔ ba gyeŋ kolo ya na gyeŋ nombia.¹³¹Ma te wola me nɔɔ mee lilii nɔɔloŋ,nawolo nyi nyaŋ mmaraase ne gyɔ maŋ loo.¹³²Besena kɛɛ maŋ na n ke wii me waraŋase,ŋgba mena keŋ debaŋ kamasɛ n ne yɛɛ fa baŋ bɛɛ gyae n yele nɛ.¹³³Gyee me nawɔɔ kekulu ŋgba mena keŋ n nombii doo nɛ,naa yele dukum kamasɛ ke di me dɔɔ ya.¹³⁴Lɛɛ maŋ lee denibalaŋ kaŋeredo man,na maa nyiŋ ta n gbɛɛneŋ dɔɔ.¹³⁵Booli n sia fa n tobaale,na n ka wola maŋ n kebakesee.¹³⁶Siasaraŋ ne laŋ me sia ŋgba boo nɛ,nawolo nyi bɔɔ ne di nyaŋ mmaraase dɔɔ ya.¹³⁷Degbeŋgyoo, n tenɛɛ,te nyaŋ mmaraase doona ŋe gbɛɛ.¹³⁸Nyaŋ mmaraa keŋ n be yako see nɛ tenɛɛ,baa tale mo wose lɔ ŋe dɔɔ nideli.¹³⁹Ne yɛɛ maŋ baŋ nideli,nawolo nyi me kɔlara te bɛɛ n nombia.¹⁴⁰Me ta gyoo n keyakosee ŋan man nideli,te n tobaale ne gyae ŋa.¹⁴¹Doo nyi mɔɔ doo daale man ya te bee kulu maŋ koraŋ nɛ,mɔɔ ne wolee n gbɛɛneŋ ŋan ya.¹⁴²N gbɛɛneŋ katenee doo kekpaakekpaa,te nyaŋ mmaraa yɛɛ anokoare.¹⁴³Kayeyɛɛ na kaale te yala maŋ,mɔna nyaŋ mmaraase ne yele mɛɛ nyaŋee.¹⁴⁴Nyaŋ mmaraase tenɛɛ debaŋ kamasɛ,fa maŋ nombia man kenyii na maa nyiŋ nyeedoŋ.¹⁴⁵Mɛɛ baake neŋ lee me konɔɔ pou man, kpa maŋ Degbeŋgyoo,na maa di n kebakesee dɔɔ.¹⁴⁶Mee wii baake neŋ, lɛɛ maŋna maa di nya mmaraase dɔɔ.¹⁴⁷Mɛɛ karatɛɛ wii baake neŋ nyi nya kyɔ maŋ,me ta mo me loo gyakaa n nombii dɔɔ.¹⁴⁸Me sia bee wuu nelim pou ya,na maa nyiŋ gyoo n keyakosee ŋan man.¹⁴⁹Nyii ma woya lee n kegyae keŋ taŋ ɔto ya nɛ dɔɔ,gyee ma nyee, Degbeŋgyoo, lee nyaŋ mmaraase dɔɔ.¹⁵⁰Baŋ bɛɛ yɛɛ akpanyanyaŋ nombia ta benaa,mɔna baŋ na nyaŋ mmaraase nsana dana lem.¹⁵¹Mɔna Degbeŋgyoo, nyaŋ benaa,te nyaŋ mmaraase pou yɛɛ anokoare.¹⁵²Lee gyaŋgba gyaŋgba te ma gyeŋa nya mmaraase,nyi nyaŋ seena ŋa mokɔɔ nyi ŋe dee doo kekpaakekpaa.¹⁵³Kɛɛ me kaale na n ka lese maŋ,nawolo nyi ma te wolee nyaŋ mmaraa ya.¹⁵⁴Di me nombia fa maŋ na n ke yoo lɛɛ maŋ,yela maa nyiŋ nyeedoŋ lee n keyakosee keŋ dɔɔ.¹⁵⁵Nyeekelɛɛ na akpanyanyaŋtena nsana dana lem,nawolo nyi bɔɔ ne kɛo n kebakesee ya.¹⁵⁶Degbeŋgyoo, n waraŋase kewii boe,gyee ma nyee lee nyaŋ mmaraase ŋan dɔɔ.¹⁵⁷Me kɔlara baŋ bɛɛ naase maŋ diyem nɛ boe,mɔna me ta lee nya mmaraa wɔle ya.¹⁵⁸Me naa baŋ bɔɔ ne di anokoare ya na, be dana maŋ ahiŋ,nawolo nyi bɔɔ ne di n nombii dɔɔ ya.¹⁵⁹Kɛɛ mena keŋ mɛɛ gyae n gbɛɛneŋ ŋan,gyee ma nyee, Degbeŋgyoo, lee n kegyae keŋ taŋ ɔto ya dɔɔ.¹⁶⁰N nombia pou yɛɛ anokoare,nyaŋ mmaraase ŋan tenɛɛ nɛ taŋ ɔto ya.¹⁶¹Kegyiise ne naase maŋ diyem yakaa,mɔna n nombii te mɛɛ mo obuo fa.¹⁶²Mɛɛ nyaŋee lee n keyakosee dɔɔ,ŋgba ŋon ɔ be nyiŋ yooman abɔɔ burum nɛ.¹⁶³Mɛɛ kɔla dekara te ke dana maŋ duwaare,mɔna mɛɛ gyae nyaŋ mmaraa.¹⁶⁴Mɛɛ lese n yele betabo nyetooro wee dokoloŋ,lee nyaŋ mmaraase ŋan tenɛɛ nɛ dɔɔ.¹⁶⁵Wosefɛɛreŋ gbagba doo fa baŋ bɛɛ gyae nyaŋ mmaraa keŋ,te kolo be tale yela baa gyɔ be nae ya.¹⁶⁶Mɛɛ daa n nyeekelɛɛ, Degbeŋgyoo,te mee di nyaŋ mmaraase dɔɔ.¹⁶⁷Mee di n gbɛɛneŋ na nya adansɛɛ nombia dɔɔ,nawolo nyi mɛɛ gyae ŋa nideli.¹⁶⁸Mee di n gbɛɛneŋ na nya adansɛɛ nombia dɔɔ,nawolo nyi n gyeŋ me gbɛɛneŋ pou.¹⁶⁹Degbeŋgyoo, yela me kewii kelii n gyaŋ,fa maŋ nombia man kenyii lee n nombii keŋ dɔɔ.¹⁷⁰Yela me kasola kelii n gyaŋ,lɛɛ maŋ lee n keyakosee keŋ dɔɔ.¹⁷¹Maa gyuusu me nɔɔ lese n yele,nawolo nyi n wola maŋ n kebakesee.¹⁷²Me laakem gyae ka mo n nombii kpee nɔɔneŋ,nawolo nyi nyaŋ mmaraase pou tenɛɛ.¹⁷³Yela n nyiŋmaa kaa kyɔ maŋ,nawolo nyi mɛɛ tɛɛ n gbɛɛneŋ dɔɔ.¹⁷⁴Degbeŋgyoo, n nyeekelɛɛ ne gyɔ maŋ loo,te nyaŋ mmaraa ne yele mɛɛ nyaŋee.¹⁷⁵Yela maa nyiŋ nyeedoŋ na maa lese n yele,na n ke yela nyaŋ mmaraase ke kyɔ maŋ.¹⁷⁶Ma te kpase ŋgba nam ŋon ɔ ba yoo nɛ,kɛo n tobaale,nawolo nyi ma te wolee nyaŋ mmaraase ya.

The Seed Company

https://app.library.bible/content/78c171300a42ca75