2 TIMOTE3
Ãmpal m'ãkieel ãya m'ãtsoo ã ntɔ
1Yɛɛ wɛn ãlio mã fool ãkieel ãyeya m'ãtsoo ã ntɔ.2Ke ngwel wɛ, baal akieel akal y'okob, ye pfuul o nzi, y'obɛɛl o ntwel, y'ondɛɛl o nzuru. Bɔ akieel asiaan Nziã, kieel k'akal ye lweel li aburu wɛ, kieel k'akal ye tuɛɛn wɛ, kieel k'akal ye bvɛɛ li eluɔ e Nziã wɛ.3Bɔ akieel akal nyiĩ a baal pyɛ, akieel akal y'ɔ̃kwal mpɛn, akieel akal ye kwee. Bɔ akieel aywɛn a okuru b'ɔ̃kwal, akieel akal ye kyal, bvool akieel akal ataal b'obvɛ.4Bɔ akieel atiɔ bakyɛ, akieel aluul m'efua, akieel m'ondɛɛl o nzuru b'ofoo bɔ mviil, akieel adzii efua ke mboo a Nziã.5Bɔ akieel asa onge bɛn bɔ abekuru ãnzuru m'ãndɔɔ ã Nziã, kwɛn ŋɛn bɔ abebee mpɛn a mɔ̃. Kal lala ye baal obɔ.6Onse bɔ, eli ye b'abeyi m'ãnzɔ ã baal bvool abesa kwɛn akaal ba y'okwal abva m'abɛɛ a bɔ. Akaal obɔ b'aluul m'ãbi bvool bɛn kɛn awam onse okiool wɛ. Bɔ abeluɛɛn efua bvi ebei-ebi bvi emfa bwɛn emfa.7Bɔ abeyio kɛn oyio, kɛn a bɔ k'akoo m'oyɛɛ b'otaa-taa onkyam tsoo si ngelemɔ̃ wɛ.8Emfa ngemɔ̃ kyɛn Dzanes ye Dzambes áli onse otaal ye Moyize, emfa kiki baal obɔ hɛ̃ ali onse otaal y'otaa-taa. Bɔ ali baal b'émeeyi ãyal nkel, bvool bɛn okiool ómoosuul.9Bɔ k'abeyi nkwel wɛ, ke ngwel wɛ owool-a-wool o bɔ okieel omɔɔn ke nkwel a baal bueel onge b'éli Dzanes ye Dzambes.Kuru nzuru me m'eyio yɛ
10Me b'otal yɛ, yɛ mwɛn ngesɛ emfa ki ngyiool mɛ̃, ki nzuu mɛ̃, ki ngwɛɛ mɛ̃ k'asa ãndɔɔ, ki nkal mɛ̃ y'okiool, y'osɛ-mwiĩ, ye dzii, y'okuru b'ɔ̃kwal,11ye mpal yi átueel mɛ̃, ye fool li émwɛn mɛ̃ k'Antioswe, k'Ikonihum, ke lisitele. Ãmpal ãmã mɛn mɛ̃ ke mwɛn wɛ! Kɛn onse mɔ̃ mbueel, Mfam obvuul mɛ̃.12Ke yam, mbuul wueel wu odzii k'akuru nzuru me Yeso Mãsia, akieel atuaal ndɛ mpal.13Kɛn abi y'anga-pfuru akieel anɔɔn kɛn a k'asa obi. Bɔ akieel adzeel bakyɛ, bvool akieel adzeel ãnzuru ã bam.14Me b'otal yɛ, kuru nzuru me m'eyio yɛ, me m'ekiool yɛ mam. Yɛ yɛɛ wu eyio yɛ mɔ̃ ola ndɛ.15Fa obwee o yɛ, yɛ yɛɛ Ɛ̃nkaan mi ngel. Myɛ ɛ̃koo k'ɛ̃wa yɛ ãyal, kwɛn yɛ bɔɔ elaã me nkuul okiool me Yeso Mãsia.16Ɛ̃nkaan mi ngel mvieel ɛ̃́yi me nkuul a Ɔ̃fel a Nziã, bvool ɛ̃li y'otsɛn me ndɔɔ yi ayiool baal, me ndɔɔ yi aswɛɛl baal ãtsam, me ndɔɔ yi aseel baal nkuul, bvool me ndɔɔ yi atee baal ãndɔɔ mã dzu.17M'emfa okyɛ, mbuul a Nziã akal ɔ̃koo bvool akal wu okoo onse ɔ̃yɛɛl wu asa ndɔɔ yueel yi ngesɛ.Wycliffe Bible Translators, Inc.