2 TIMOTE4
Tee Endɔɔ
1Ke nkwel a Nziã, ke nkwel a Yeso Mãsia, wu akieel atsiil ãndɔɔ ã b'amwiĩ-mwiĩ ye b'ákwi-ákwi, bvool wu akieel aya onge ɔ̃kwɛn, mɛ̃ ntam yɛ bam bubu:2Tee Endɔɔ, tee lɔ me lio lueel, ekal me lio li ngesɛ, ekal me lio li ebi-ebi. Seel ãndɔɔ mɛn k'ãli dzu wɛ, wa mbyel bvool wɛɛl baal. Yiool ãndɔɔ omɔ̃ y'osɛ-mwiĩ bueel.3Ke ngwel wɛ, lio ekieel eya lɛn baal bakyɛ kieel k'abedzii k'ayoo Endɔɔ li ɔ̃nsensal wɛ. Kɛn a bɔ akieel aluɛɛn ãtsam ã bam. Bɔ akieel ata atee bam bibi mbel, b'aliaal bɔ m'eli bɔ ye nzal a k'ayoo mɔ̃.4Bɔ kieel abee k'ayoo ãtee mã taa-taa bvool akieel adzii bam k'ayoo esesam bvi mfya.5Me b'otal yɛ, m'ãndɔɔ mbueel, bee enduul osa, kuru ɔ̃kwal onse ãmpal, tsal Nsia yi Ngesɛ, sa ɔ̃sal a yɛ ngesɛ.6Me b'otal mɛ̃, lio emeekoo li awa mɛ̃ elaã e mɛ̃ onge kab ola Nziã.7Mɛ̃ nzwaan mvel yi ngesɛ, mɛ̃ nsɛɛl ntiin a mɛ̃, mɛ̃ ke ngyɔɔl okiool wɛ.8Meba ŋã, ebva-kab ki awa mbuul wu obvel mpɛn me mvel ekiaal mɛ̃. Ebva-kab okyɛ, Mfam wu ntwel wa dzu, akieel awa mɛ̃ kyɛ me tsoo olɔ. Kɛn a wu ekieel ewa ndɛ kyɛ ke kɛn a mɛ̃, ndɛ hɛ̃ kieel awa kyɛ me baal bɛn ye dzii lueel, abekiaal lio li ekieel eya ndɛ.Ãyɛɛn ã Pool mã ntɔ
9Olɔ yɛɛ k'aya ola mɛ̃ bam tswa-tswa.10Ke ngwel wɛ, Demas oyiri mɛ̃ me ndɔɔ a nzal a eluɔ bvi ɔ̃kiri wu, bu ayɛn Tesalonik. Kelesense oyɛn Ngalati, Tite oyɛn Dalemati.11Wu oli ye mɛ̃ ŋã kɛn a Luk ndyam sii. Wal Maak, ya ye ndɛ, ke ngwel wɛ ndɛ oli y'ɔ̃bvɛn bibi ola mɛ̃ me ndɔɔ a ɔ̃sal.12Mɛ̃ ntam Titswik Efedze.13Ŋ'èya yɛ, biri mɛ̃ ekɔ ki abendɔɔl ke ywel a kikyɛ ki esiil mɛ̃ ke Telohas ola Kaapos. Wal ɛ̃nkaan hɛ̃, bvel-bvel mi abedzii m'odzii.14Alekesandele wu ɔ̃tswel dzuul osi mɛ̃ obi bibi. Mfam kieel abveel ndɛ m'ãbvaan me b'esi ndɛ.15Yɛ hɛ̃, kal y'onkyab ye ndɛ, ke ngwel wɛ ndɛ obee ãyɛɛn ã bee bam kiningi.16Ŋ'éketsuun mɛ̃ li ɛ̃kwel ke mbal, mbuul si ɔ̃mɔ̃ k'áli ye mɛ̃ wɛ, baal bueel áyiri mɛ̃. Yɔɔl kwɛn Nziã abee b'esi bɔ obɔ osiɔɔl.17Kɛn a Mfam wu owueel a mɛ̃ bvool wu osi kwɛn mɛ̃ nkal ye waan. M'emfa okyɛ, mɛ̃ nkoo k'etsal Nsia a ndɛ, bvool nsi kwɛn baal bueel bɛn k'ayɛɛ Nziã wɛ ayoo yɔ. Ndɛ hɛ̃ obvuul mɛ̃ m'ɔ̃nywã wu ebob.18Mfam kieel abvuul mɛ̃ m'obi bueel, ndɛ kieel abvuul mɛ̃ hɛ̃ me ndɔɔ Okwɛn o ndɛ bo ywel. Yɔɔl kwɛn alweel nkuũ a ndɛ ɔ̃bu nkal ɔ̃bu. Amɛn!Ɔ̃bio wa ntɔ
19Mɛ̃ mbio Pilisile y'Akilas, ye yam li Onesifɔɔl.20Elasite osiil ke Kolinte, mɛ̃ nsiil Tolefime y'ãluu ke Milet.21Olɔ yɛɛ k'aya ye k'ekoo lio e mfyɛ. Ehubulos, ye Pudens, ye Linus, ye Kelodia, y'andoo a dzii bueel abio byɛ.22Yɔɔl kwɛn Mfam akal y'ɔ̃fel a yɛ! Yɔɔl kwɛn Nziã asio byɛ nyiĩ.Wycliffe Bible Translators, Inc.