Titus2
1Six mâyh, oix zuc nzaox năngx toix senz gâyf nyăngz jau.2Oix zuc nzaox wax đomc munh claof côx hayh cun tuz cănh, wăn stimz, naih tongb manyh, hayh zen gongx clăkx clunh, naih nyâuđ stăngz munh, yâuc naih noic tanyđ.3Lauf tinyh năngđ, oix zuc nzaox wax đomc munh bôf côx, ayx dlayc payh tuz munh zanyb, max coong wac huđ, yâuc max blaz tiu, stiz yâuc oix zuc nzaox gongx nyăngz jau,4phunz stiz hayh nzaox tuz wax đomc munh nzif gunx hayh stăngz langh, hayh hâuđ lênh sây,5hayh cun tuz cănh, yâuc đăngb zeengh, hayh lif gongx pyau, yâuc buc cănh nyăngz langh, phunz Zâu Tênb-Huungh nyăngz gâyf max zuc coong jămb.6Lauf tinyh năngđ, mâyh oix zuc nzaox munh gunx munh, oix zuc pâyz hayh cun tuz cănh,7mâyh oix zuc cănh ayx gongx nyăngz gao nongc phunz stiz âyz, naih đăngb zeengh stimz, yâuc nzuf stimz nzuf nyâuđ nzaox munh,8yâuc coong wac năngx toix gâyf phunz max naih tinc nzêmh, phunz wax đomc nzeengz cloon pănh nyăngz munh zuc nyayz, wâyc max naih jau nongc coong huđ ănz pănh.9Oix zuc nzaox wax đomc ayx nâuh nyăngz munh zuc buc cănh nyăngz zâu, yămz manf dlayc ayx phunz zâu numđ nyađ, năngx gâyf taux nzetx,10năngx gâyf ayx stac, plănc taih six oix zuc yămz ayx năngx manyh pec clăkx clunh nzuf, phunz stiz yămz manf dlayc yâuc hayh tanv Zâu Tênb-Huungh nyăngz gâyf, senz pănh nyăngz Njâuv Zâu.11Wâyc Zâu Tênb-Huungh nyăngz pôz tuz hinđ setb taih nongc njâuv muif lanh munh,12yâuc jinh đangh nzaox pănh, nongc quanyf nzuf max zen nyăngz jau cloon stimz yuc nây bamh canz nyăngz jau tauv laiv wax đomc, phunz pănh hayh cun tuz cănh, peengh stimz, yâuc joomz nyâuđ Zâu yămz nây stâyv sangc,13jinh đangh sâub sâuđ zu mungc oonz looc nyăngz pôz, cloon Zâu Tênb-Huungh nyăngz gwăngz eeng lub tuz hinđ setb taih, cloon pănh nyăngz Njâuv Zâu six Zâu Yê-su Jix-Tuz,14Nănh nyunc sađ cănh nyăngz mengc tayc wâyc pănh, nongc suc maif pănh, phunz pănh tuz gâyh đutb muif huungđ njanh okx nyăngz jau, yâuc stav đăngb nongc lanyc ayx Nănh nyăngz pec stingx, six senz joomz nyâuđ ayx gongx nyăngz pec stingx.15Oix zuc nongc nzuf lokc jangx, nzaox nâyx đomc jau, quinb munh yâuc mađ nzaox, năngx gâyf phunz mănv mangc stam mâyh.
FAR EAST BROADCASTING COMPANY