Titus1
1Yaz, Phao-lô, ayx Zâu Tênb-Huungh nyăngz pâuz yâuc ayx Zâu Yê-su Jix-Tuz nyăngz cumh pâuz munh, wâyc nongc phunz Zâu Tênb-Huungh sên taih wax đomc munh naih zen stimz, cloon hayh pâyz tuz senz gâyf yâuc lêpc gongx Zâu,2yâuc naih njih mungc tuz stâyv quâyx nyăngz mengc, senz Zâu Tênb-Huungh, max coong puv maoh wax Tauh, nyunc nyăngz wac tăng cah đangc sax stâyv sax đaic quaix taih.3Six beengc tingc taih nyăngz săngx huđ, Zâu Tênb-Huungh songđ hinđ manyf Nănh nyăngz gâyf setb taih songđ tuz lănv nzônh, yaz yâuc tuz jaoz phunz âyz Zâu Tênb-Huungh nyăngz lanyf, six pănh nyăngz njâuv Zâu.4Pungx phunz Ti-tatc, yaz nyăngz senz toonz yămz nây zen stimz nyăngz jau. Cloo Zâu Tênb-Huungh, six Pha cloon Zâu Yê-su Jix-Tuz, six pănh nyăngz Njâuv Zâu, sađ pôz sađ peengh oonz phunz mâyh.5Yaz queengx mâyh ănz wa Cê-lit six nongc phunz mâyh bênc ayx max zeengx soongb wax đomc cumh pâuz, yâuc njăpc jiux pangx nyăngz munh côx yămz wax đomc muif nomz dlanyh âyz năngđ yaz bux mâyh nâyx —6Jiux pangx nyăngz munh côx six zuc max naih tinc nzêmh, cungb nongc ah tauh au cuungv, sây yâuc zuc neetb stimz zen Zâu, yâuc max naih zuc cooux coong yămz ayx bah camx bah caiz.7Wâyc zuc ayx jiux pangx nyăngz munh côx six jămđ Zâu Tênb-Huungh nyăngz pyau njaf munh, six oix zuc max naih tinc nzêmh, max ayx lub, max siv totc căn, max blaz tiu, max ayx huđ, yâuc max mauh puv quâyx,8plănc taih six oix zuc naih nyâuđ stipx zeb, numđ nyađ gongx nyăngz dlayc, dlênc stimz, peengh stimz, đăngb zeengh, hayh cun tuz cănh,9nzauf senz gâyf năngx tăngđ cayx năngđ tuz numđ nzaox nâyx, nongc phunz hayh quinb munh yâuc hayh nzaox tuz gongx, yâuc hayh caix tuz wax đomc nhlengc senz gâyf nyăngz munh.10Wâyc naih munh đuungx max buc, tah yetx six wax đomc ayx quaix catz nyăngz munh, stiz coong nây coong wa jaf munh.11Nongc sen six oix zuc ayx phunz stiz zuc stinyb njâuh. Stiz max pâyz nyayz cungb cayx tuz gâyc bix nzaox max hoopđ zuc nzaox nyăngz wac, songđ ayx phunz munh tinyh đoih nyăngz pyau lunc nzuf.12Yămz stiz wax đomc naih ah phanx, six cănh stiz wax đomc tâuc wac munh, yâuc cănh coong: “Cê-lit munh six cungb hayh coong puv maoh, stiz six jămx staov yez, mauh nhlinc bix lâyc manc.”13Nây zanyx manyf nyăngz wac six senz nyăngz. Wâyc nây, oix zuc coong mađ stiz năngx niđ, phunz stiz hayh zen tuz gongx,14năngx gâyf mungv tauv Yu-tai munh wax đomc max naih luungđ stuyh nyăngz câu, cloon max lêpc senz gâyf wax đomc munh nzaox nyăngz wac.15Muif huungđ six đăngb zeengh phunz wax đomc đăngb zeengh nyăngz munh. Six năngx naih wax đomc munh huđ munh stiz six max zen songđ max naih laiv huungđ đăngb zeengh, wâyc njinh stiz nyăngz pyây lâyc nyâyh cloon stimz nyâuđ yetx stong zuc huđ ninyh nzuf.16Stiz coong stiz pâyz Zâu Tênb-Huungh, six yămz stiz ayx nyăngz cumh pâuz, stiz yâuc pyenv Nănh, senz cuyb hănđ nzongf, max mungv wac, yâuc max hayh ayx tuz laiv huungđ cumh pâuz gongx.
FAR EAST BROADCASTING COMPANY