Лекм27
1Акаций дене жертвенникым ыште. Тудо ныл лукан, кутышыжат, лопкытшат вич кынергут лийже, а кӱкшытшӧ – кум кынергут.2Жертвенникын кажне ныл лукыштыжо тӱкым ыште. Тӱкӧ-влак жертвенник дене ик тичмаш лийышт. Жертвенникым той дене комыжло.3Тыгак ломыж опташ атым, изи кольмо ден шаньыкым, кӱмыжым, тулшол атым ыште. Жертвенникын чыла тиде арверже той лийже.4Жертвенникланак сетке гай той решоткам ыште. Решоткан ныл лукешыже ныл той колчам ыште.5Решоткажым жертвенник кӧргысӧ ныл тӱреш келыштарен шынде – решотка жертвенникын пел кӱкшыт тураштыже лийже.6Жертвенниклан акаций дене кок варам ыште, нуным той дене комыжло.7Нумалме годым вара-влак жертвенник кок могырым лийышт манын, нуным колчалашке чыке.8Жертвенникым оҥа дене ыште, кӧргыжӧ яра лийже. Тек тудым тугайым ыштат, могайым тыланет курыкышто ончыктымо.9Скиний йыр кудывечым ыште. Тиде кудывечын кечывалвел могырыштыжо шӱдӧ кынергут кутышан чапле йытын пӱрдыш кечышаш.10Тудлан коло меҥгым, той дене коло негызым ыште. Меҥгысе кылдыш ден руалтыш-влак ший лийышт.11Тыгак кудывечын йӱдвелныжат шӱдӧ кынергут кутышан пӱрдышым, тудлан коло меҥгым да нуныштлан коло той негызым ыште. Меҥгысе кылдыш ден руалтыш-влак, [тыгак негыз-влак] ший дене комыжлымо лийышт.12Касвел могырышто пӱрдышын кутышыжо, кудывечын лопкытшо гаяк, витле кынергут лийшаш. Тыште лу меҥге, нуным шогалташ лу негыз лийшаш.13Ончыл, эрвел могырышто [пӱрдышын] кутышыжо, кудывечын лопкытшо гаяк, витле кынергут лийшаш. [Тыште лу меҥге да нуным шогалташ лу негыз лийшаш.]14Тушто пурымо верын ик велныже латвич кынергут [кутышан] пӱрдыш кечышаш, тудлан кум меҥге да нине меҥгылан кум негыз лийже.15Вес велныжат – латвич кынергут [кутышан] пӱрдыш, тудлан кум меҥге, нунылан кум негыз лийже.16Кудывечыш пурымо верым петырашлан коло кынергут [кутышан] пӱрдышым ыште. Тудым шемалге-канде, шемалге-йошкар, йошкар меж да чапле йытын шӱртӧ дене тӱрлен куымым ыште. Пӱрдышын ныл меҥгыже, нунылан ныл негыз лийже.17Кудывече йыр улшо чыла меҥгым ший кылдыш-влак ушен шогышаш улыт. Меҥгыште улшо руалтыш-влакым ший дене, а меҥгылан негызым той дене ыштыман.18Кудывечын кутышыжо шӱдӧ кынергут, а лопкытшо витле кынергут лийшаш. Кудывече йыр колтымо пӱрдыш вич кынергут кӱкшытан лийшаш. Пӱрдышым чапле йытын дене ыштыман, а меҥге-влакын негызыштым – той дене.19Скинийыште кучылтшаш чыла арверым, скинийым мландыш пеҥгыдемдыше чыла кошар пашкарым, тыгак кудывече пӱрдышлан кошар пашкар-влакымат той дене ыштыман.20Израиль калыклан каласе: тек волгалтараш тыланет кид дене темден лукмо яндар олив ӱйым кондат – светильникыште лампаде-влак эре йӱлышаш улыт.21Тек Аарон ден тудын эргыж-влак эскерен шогат: Юмо дене вашлийме омашыште ойпидыш шондык ончылно улшо пӱрдыш воктене тиде светильник Господь ончылно кас гыч эр марте эре йӱлен шогыжо. Тиде – Израиль калыклан курым-курымешлан тукым гыч тукымыш шуктен шогышаш закон.
Institute for Bible Translation, Finland