2 Corinthians4
1Kǝthlǝm ndaˈan, nakan tǝmɗi haɗaanɗi haɗandǝmǝn Fartǝ fa naa tarɗiyamǝnsi ya, mbiɗwu wanɗǝkaɗechˈyamǝn kaɗ wa.2Ə paˈanwu ǝn tǝ wuɓandǝ ichiɗi nech kǝ ǝna hartǝ fata wa. Lǝm waˈan nafcha wa ndu kǝ tǝɓraˈǝn ndikti Fartǝ ha wa. Paɗ thlǝ nechaˈan mbuˈ kit hayang. Tǝ kǝɗu naa chǝka wuni mbuˈ ǝnɗi sǝndǝnsi kǝɗar kitˈyaˈan ǝ pangngǝn Farta hur wanɗǝkaɗatˈyan.3Chǝka mǝ kǝ ndǝ fee wa ɓasiyaˈan ǝ nggǝthla, nechan ǝ nggǝthla ǝ mǝɗi fee nech ǝ mban tǝktǝ ha ndak.4Fen fǝ kumi fǝr kit, kǝthlǝm kutur heshiɗiya ndat wa hweˈra, komantǝ tanda, thla nawak tǝndǝ mbahǝn naa ɗaˈkǝti ndikti Kǝrǝsti ha, mǝthlan tǝɗi nech kǝɗ Farta.5Kǝthlǝm ngga ɓas indiyaˈan nat ǝn chita wa, yi Yesu Kǝristi, ndat wa mǝthlan nech kǝ Chinda, nggaˈan paɗ kǝɗ mafechˈyowun nakaˈan kǝthlǝm kǝt Yesu.6Kǝthlǝm Fartǝɗi ndecha wa, “Malan ɗaˈkǝta kǝ ɓǝ kesh hur wuthla kǝ fǝr tǝ ɗaˈkǝta,” mǝthlan paɗ ɗǝfchǝ ɗaˈkǝtˈyansi kǝ fǝrtǝ ɗaˈkǝt hur wanɗǝkaɗech ˈyamǝn. Kǝthlǝm kǝ fǝraminchǝ ɗaˈkǝt sǝn mandi Farta thla pǝnchǝ fat ǝ chimaandi Kǝristi.7Kǝnauɗi nessiyamǝn ya nechan ǝ hur ɓutǝɗi tǝndǝ fee tǝ taɓta, ndat wa, fechˈyamǝn, kǝthlǝm kǝ pǝnfe ndiiɗ alkǝtɗiya thla pǝɗanchi tandǝ ha nat thlaˈtǝ mǝɗi Farta, ngga thlaˈtǝ mǝɗˈyamǝn wa.8Thlǝ nech fee fǝramǝn ɓahta chǝka tǝ yen mbenna, chǝka kǝɗu wulamǝn wu taran wa. Fartǝ yowun sǝnwamǝn ǝnɗi nat mǝn chǝta wa, chǝk tǝ kǝɗu kǝta wa mǝn wanɗǝkaɗat kesh wa.9Fǝraˈanchǝ fee pancha, chǝk tǝ kǝɗu malaˈǝnwu Farta wa. Fartǝ yowun thlǝ thlǝfchǝ fee nggaˈan ha kǝ haha, nat tǝ kǝɗu ɓǝlaˈanwu fee wa.10Weendi mǝta nggaˈan ǝ meˈi mǝrta kǝɗ ǝnɗi chaandǝ fee Yesu, kǝthlǝm kǝ pǝn fee nati Yesu ha fii fatˈyamǝn.11Ə natˈyamǝn ha hur heshi, nggǝmǝn meˈi mǝrta ween mǝta kǝthlǝm Kǝristi, kǝthlǝm kǝ nǝ fee nati Yesu ha fi faɗiyamǝn ya thla nech mǝrta.12Ndaˈan chicha thlǝ nat ǝn meˈi mǝrta, kǝthlǝm kun kǝ mbǝswun shishingnda.13Ndech Yara Ndikti Farta wa, “Fǝrinchi kit, kǝthlǝm ndaˈan chich ndikti.” Nakan Sheme fǝr kit ˈyamǝn weˈtaˈan arta, kǝɗu paɗ fǝr ǝn kitsi, ndaˈan chicha nat ǝn ndikta.14Kǝthlǝm sǝn mǝn paɗ wa mǝthlan tǝɗi thlaˈanchi Chinda Yesu ǝ mǝrta, nan thlaˈamǝn nda ɓukwa tǝ Kǝristi, tǝ paɗ kǝ fǝrtǝ nggaˈan kǝ pangngǝnan ɓukwa tǝ kun.15Nat ichiɗiya kǝthlǝm naafu ˈyowun, kǝthlǝm kaafaɗi Farta thlǝ saˈchǝ kǝmɗi nafchǝ terchan, maa chok kǝɗu nan ɗǝf nafchǝ terchan kǝ chekandǝ usoko kǝmɗi Farta, kǝthlǝm kǝ maanan fee.16Kǝthlǝm ndaˈan kǝta wa mǝn wanɗǝkaɗat kesh wa. Chǝka mǝ nakan wa tǝ heshi, faɗiyamǝn ya mǝthlan sǝɓtǝ kaɗi, paɗ tǝ huran, fee nggǝramǝn ndǝ ha weendi mǝta.17Kǝthlǝm wan ɓahtǝɗi nat mǝn sat ya nech nǝ tolla wa, nan nggǝtamǝn maandǝs kaan, thla nawaktǝ sǝrtaˈansi, paɗ kǝnsi kǝ kwekǝchi.18Kǝthlǝm ndaˈan ɗǝfwaˈan wenitǝyaˈan kǝ ɓǝra ichiɗi thlǝ naa fee wa, se kǝ ɓǝra ichiɗi thlǝ nawaktǝ fee. Nakan ichiɗi thlǝ naa fee, nandǝ mbǝrtǝ ha leɗ leɗ, paɗ ichiɗi thlǝ nawaktǝ fee nandǝ natˈsi kǝ kwekǝchi.
The Seed Company