2 Corinthians5
1Kǝthlǝm sǝnmǝn wa maa chen fee kuwurtǝɗi kaɗ natˈmǝn huran hur heshiɗiya, wirsi tahsamǝn ndǝ Fartǝs ǝ hulafǝrta, wurɗiya ngga nef tahǝscha wa, wuran nan natsi kǝ kwekǝchi.2Ə nakan ya nggǝmǝn fǝfǝrta, nggǝmǝn kwechkwech kaan kǝ mbǝsmǝn faɗi naa fee pamǝn ndǝ ǝ hulafǝrta.3Paɗ maa kwasamǝnchǝ fee si, nǝ fee mbǝsamǝnchǝ tandǝrkwaˈ wa.4Fartǝɗi nat mǝn chok tǝ hur kuwurtǝɗi heshiɗiya, nggǝmǝn fǝfǝrta, kǝthlǝm ɓahchiɗi natˈmǝn sata. Nggǝmǝn fǝfǝrta ngga wa kǝthlǝm tǝ yahmǝn kǝ chakmǝn ha tǝ faɗi heshi ya wa, paɗ kǝthlǝm tǝ yahmǝnsi kǝ pamǝnchǝ fee yi hulafǝrta. Kǝthlǝm ǝn tǝ shishingnda thla kǝ kwekǝchi nan ɓeɗandǝ faɗi ha nech mǝrta nat.5Farta mǝthlan chich mǝnchi kǝthlǝm ɓeɗa faɗi ya, paɗ fǝramǝn kan Shemetˈyan kǝthlǝm kǝ wathlamǝnchǝ ǝnɗi ha natǝn chamǝn ndǝ kǝ pangnga.6Kǝthlǝm ndaˈan, wathlamǝnchi weenmǝta sǝn mǝn paɗ wa, maa tana nggǝmǝn hur faɗi heshi ya, chakmǝn ha tǝ Chinda.7Kǝthlǝm natˈyamǝn ha ɓǝra fǝr kit, ngga tǝmɗi ǝnɗi thlǝ natˈmǝn tǝ wenita wa.8Kittaˈan wathlamǝnchǝ ha hur wanɗǝkaɗechˈyamǝn, ndat wa, kǝmchansi kǝ chakmǝn ha tǝ faɗiya, kǝ chokmǝn ɓukwa tǝ Chinda ǝ hulafǝrta.9Kǝthlǝm ndaˈan, yahtiyamǝn, kǝ sǝk tǝ mbǝndiyamǝn fa, ndu nggǝmǝn ǝ heshi hur faɗiya, ndu nggǝmǝn sǝ hur faɗan wa.10Kǝthlǝm nwaat natˈmǝn kǝ thlarmǝn ha ǝ pangngǝn Kǝristi, kǝ chakamǝn tǝ mee. Kǝthlǝm chǝkawuni nan thlǝt kǝnau ǝnɗi chǝtǝn tǝ faɗi heshiɗiya, ndu kaɗan ndu sǝbtaˈan.11Nakanya sǝn mǝn ǝnɗi nech kǝ lekandǝ Chinda, ndaˈan chicha natˈmǝn kweˈtǝ ha kǝ kaɓmǝn nafcha. Natˈyamǝn ha paɗ ǝ sǝn Farta, paɗ ɗǝfinchǝ kǝfatsǝ wa ǝ sǝn wun thleya ǝ hur wanɗǝkaɗechˈyowun.12Ngga wa tǝ yah ǝn chǝm inchiyaˈan ǝ pangngǝn wun wa. Tǝnaˈan fǝrowun mban thlaˈ kirshi tǝ nggaˈan. Kun paɗ kǝ mbahan wun fǝran nggǝmndǝ fee nech thlaˈ kirshi kǝthlǝm maandiyanda, mǝni ǝnɗi nech hur wanɗǝkaɗechˈyanda.13Tǝ tǝraˈanchi hwaˈarcha wa, kǝɗ ǝnɗi mbuˈtǝ fowun wa? Chǝka tǝ tǝraˈanchi hwaˈarcha, nechaˈan chǝta kǝthlǝm maanandǝ Farta. Maa ngga tǝ tǝraˈanchǝ hwaˈarcha wa, thleya kǝthlǝm kun.14Yahraˈan i Kǝristi thlǝ nech parat har tǝ nggaˈan. Kǝthǝm ndaˈan sǝn ǝn hayan wa mǝr nef arta kǝthlǝm nafchǝ nat. Thleya pǝnchan wa nat mǝrchandǝ ɓukwa tǝ ndi.15Mǝrchan kǝthlǝm chǝkawun nat, kǝthlǝm fee nech tǝ shishindǝ fa kǝ nandǝ haa kǝthlǝm indǝyanda wa. Kǝ nandǝ haa kǝthlǝm mǝthlan tǝɗi mǝrchi kǝ tanda, thlaˈan fee paɗ kǝthlǝm tanda.16Kǝthlǝm ndaˈan, kǝ panˈnga naˈan nggǝr ɗǝpantǝ yowun kǝ ɓǝra sǝndi nefa wa. Chǝka mǝ nakan wa tam ǝn ɗǝpandǝ Kǝristi kǝ ɓǝra sǝndi nefa. Nakanya peˈwaˈan ɗǝpandǝ kǝɗu wa.17Kǝthlǝm ndaˈan, nat nafɗi nech hur Kǝristi, chok chan kǝ yuwa nefa. Mbǝr ɗohtǝ ichǝ ha, ɓi yuwechaˈan.18Nat ichiɗiya chǝti Farta, thla ɓech tahsandǝ pǝthlǝr mǝn kaɗ tǝ ndi tǝmɗi Kǝristi. Fǝramǝn kan tar tahsandǝ pǝthlǝr nafchǝ kaɗ tǝ ndi.19Ndiktiyaˈan ndaˈan nech kǝ, thlǝ nech Farta tahsandǝ pǝthlǝr pong nafchǝ kaɗ tǝ ndi tǝmɗi Kǝristi. Shengnga wa ɓǝɓifechˈyandǝ kǝ ɗar nanda wa. Fǝramǝn kǝ Fartǝ heˈtǝ tar tahsandǝ pǝthlǝr nafchǝ kaɗ tǝ ndi.20Kǝthlǝm ndaˈan nggǝmǝn nech kǝ fǝ thlǝnchi Kǝristi, kǝɗ Farta tǝ indiyan nech kaa nafcha tǝmɗi chǝt ter tǝ nggaˈan. Nggaˈan shiyowunda kǝ kwar Kǝristi, tahsaman pǝthlǝr wun kaɗ tǝ Farta. Kǝ chok wun kǝ atǝkrechiyan wa.21Methlan tǝɗi tamwakchǝ chǝt ɓǝbifata, paɗ kǝthlǝm nggǝmǝn nggǝrandǝ Fartǝ kaɗ kǝɗ thlǝ ɓǝɓifata. Kǝthlǝm tǝmɗiyan mbǝstǝmǝn kaakǝti Farta.
The Seed Company