Kolosiyayi2

1N kasirɛ ɔ zɛ nɔgbete n pɛli vishonɛ awɔ yuu a shɔ tipi Lawudikiyani a gãsiyi shɔgbete i jo zɛn ɓayɛni kpai.2N pɛli vim aru gbete i mabii i ɓasiyuu ɗɔɔzɔ a yɛti ɔrinɛ, i kpaa bilakinɛ ai sisɨn, i kpaa wɔsɔ̃n ruu tɔ̃vɨn zɛnɛ waanɛ. A nyabankɔ i yɛ zɛ Ɗalapa viɓusinɛtɔ, ukɔ ɔ̃rɛ Kirisi au yuu.3Kirisi ukɔ ɔ̃rɛ saa nyejaa gbete shɔ ɓeli nyejaa a Ɗalapa ɓusi sẽrẽ a vizɛnɛni aɗɔnyɛ piti kpai.
4N gelɔɔtɛ, ɔkɔɔ yaa shɔwɔnɛ u ɗakɔɔrɛ a ruu nyamasinɛ kɔ̃linɛ wɔɔni, ko i ruu kɔri naa iviya.5Ko a jazɛbii n ɓa ɔkɔɔni ɓa, ama n a ɔkɔɔni a suru, n ntabiinyatɔ̃nɛtɛ fɛ̃ɛm aru gbete ɔ shiɗɔɔkaziti atette sisɨn ãnɛ a Kirisi biini.

Ɔ̃nɛ Sɔɔ a Kirisi

6Nɔgbete ɔ tɛ Kirisi Yesɔtɛ gboti nɛu pɛ Uɓeyelapa, ɔ ɔ̃ atette yuɓasinɛ awuni.7Ɔ yɛ ɗekɨn a sisɨn ãnɛni fɛ̃ɛm a Kirisi yuuni, vigbete ɓasɔɔ a Kirisini u kaka u ɔ̃ ɗɔn fɛ̃ɛm, ɔ kaka u lakitɔ awɔ sisɨn ãnɛni fɛ̃ɛm nagbete shɔ matɔyɛ. Kopiɗaviya ɔ ɔ̃ shɔ Ɗalapa dɔ̃rinɛ.
8Ɔ kobiitɔ, shɔwɔkɔ shɔlɔɔnɛ a shɔzɛ sẽrẽ kotipimni, gbete i vimatinɛ shɛ a shɔzɛ naa a suru kotipimyi i kaka, ɓa gbete shɛ a Kirisi naa ɓa.9Aruviya Kirisi ɓɛɛ ɔ̃nɛ bishɔzɛ, u si ɓɛɛ jo Ɗalapa,10Ɗalapa ãwɔ ɔ̃nɛtɛ ɓasɔɔtɛ a Kirisini. Ukɔ ɔ̃rɛ kpati au sã suru gãsiyiyɛ piti kpai a shɔ kakayini.
11Aka yuɓasinɛ a Kirisini shɔ yeerɔɔ shaarɛ, ɓa shaa gbete shɔzɛ yeeyɛ ɓa, ama pɛ shaa gbete Kirisi yeeri shɔyɛ, a nyaba gbete shɔ raawɔ a ruuviniyɛ.12Aruviya shɔkɛ pɛlɔɔ batizima nɛ si shɔ gbãwɔɔtɛ a Kirisini nyazɔ, aka batizima kɔ shɔ yusɔɔ laparɛ a Kirisini a nyaba sisɨn ãnɛ a Ɗalapa kaka vishonɛ, shɔgbete yusiu a saa yɛ.13Si ɔ vɔtɛttɔ a suru aru ɔ ruuviniyi wɔsɔ̃n aru gbete ɔ siɓa shɔ Yahudawayi ɓa, si ɔ ji zɛ Musa nya ãsinɛ ɓa. Ama dɔdɔrim Ɗalapa shɛshɔtɛ a suruni a Kirisi kabii. Ɗalapa yaasiu ruuvinitɛ kpai;14ukɔ sɔ̃riu vikɔ̃linɛ gbete shɔ bee au yuu a ruu gbete sãuyɛni kpai, ɓasitɛ ɓaatɛ a laa dangdang.15Ji laa wakɔ Kirisi rau yuurɛ a kpati suru kɔ̃linɛyi kaka a kaka gbete i sã shɔyɛni; a tasi kopiya nɛn tɛɛyi kakatɛ a nyaba gbete Kirisi vɔ a yulaayɛ.
16Aru nankɔ ɔkɔɔ yaa shɔwɔnɛ u yeeruu aru vigbete ɔ shaayɛ ko vigbete ɔ ɓooyɛ ko ayuu dii wɔsɔ-wɔsɔ ko ayuu lee yumusinɛ a shɛlɛ sɔɔ ko lee susunɛ.17Vim kpai pɛ jasuru vigbete a ɗekɨn yɛ; Kirisikɔ ɔ̃rɛ vinizɛ.18Ɔkɔɔ yaa shɔwɔyinɛ i tasiyi yuu nɛyi pɛ̃niba i nyowɔ ruurɛ nɛ ɔ rooriyuu ɔ bassi ɗajashonɛyi, shɔmiyi i shanɛli nɛyi zɛvi ɗekɨntɔ i yeeli shɔ nya nɛyi shɔ yuuroorinɛ i kã bɛlinɛ a shɔzɛ ɗekɨn. I bassi yuu ji weze, shɔmiyi kpai i tuu ɓɛɛ jo lɛrinɛ shɔzɛ kotipiyi19i yaa sisɨn ãnɛtɛ a Kirisi biini, shɔgbete ukɔ ɔ̃rɛ yuu a bi. Pɛ Kirisikɔ pɔ̃u birɛ kpai i barɛ a suru, ji nagbete yuu pɔ̃ bi bayɛ, ukɔ ɓasi bi aka gboki a rɨti i bakɛkɨn nagbete Ɗalapa kasi nɛu bayɛ.

Vɔnɛ a Ɔ̃nɛ a Kirisini

20Ɔ vɔtɛ a Kirisini, aru nankɔ ɔ kpaa naraanɛtɛ a suru gbete roo kpati a tipimyɛni. A ɔ̃ kɛpikovi naa shɔzɛ kotipi viya? Ɔ gɨn nya ãsinɛ kotipim piruuviya21<<Ɔkɔɔ sã vimnɛ,>> << Ɔkɔɔ mati viwaanɛ,>> <<Ɔkɔɔ ɗii viwɔnɛ>>?22Vim piti kpai tasikɛ vigbete ɔ̃tɛ vishonɛ ɓa naa shɔkɛ shovinɛ a wuniyɛ; i pɛ shɔzɛ nya ãsinɛ sheeli a vimatinɛni.23Pɛ nizɛ, nya ãsinɛm shɛ ɓɛɛjo a sẽrẽ gbete pɔ̃ shɔu ɔri Ɗalapa fɛ̃ɛm, u pɔ̃ shɔ i rooriyuu, shɔ sã yuu ɗɔɔtɔ. ama pɛnizɛ i vishonɛ kaka gbete yɛ zãri shɔ vi jazɛbii ɓa.

The Word for the World International

https://app.library.bible/content/6fec21b499f7e625