Kolosiyayi3

1Asitɛɗɔkɔ a yulapatɛ a suru a Kirisini, ɔ pɔ̃wɔ sisɨn a vigbete a kolapa, a ɗɔgbete Kirisi ɔ̃ au laakpati a Ɗalapa ka nakɨn.2Ɔ pɔ̃ sisɨn a vigbete a lapa, ɓa vigbete a kotipim yɛ ɓa.3Aruviya ɔ vɔtɛttɔ, a dɔdɔrim ɔ suru a ɗɔɓusinɛ Kirisini a Ɗalapa ɗɔbii.4Ɔ suru gaanɛ pɛ Kirisi. Naa kɛ shɛnɛ, kɛɗɔn ɔkɔɔma ɔ yɛ shɛjo awuni ɔ kpau basinɛ jo!

Suru Gbaali a Suru Sɔɔ

5Ɔ̃rɔɔtɛ kaka jazɨng a kɔrɔ ɔ nyɔ vigbete ɔ ɔri a kotipimtɔ, roonɛ a so ko vɔshɔ gbete ɓa a ɓɛɛ ɓa, fãrã tosinɛ kɔ̃linɛ, kpãntang pɛlinɛ, vikɔ̃linɛ gbete shɔzɛ yɛti kasiyɛ, a nɔɔ taanɛ shɔvi (nɔɔ taanɛ ɔ̃tɛ naa vigbete i suru ɓa i basinɛ).6Aru vimiyikɔ Ɗalapa yɛti lɛsinɛ yɛ nɔɔ a shɔgbeteyi jo gɨu nyaɓayɛ i yuu.7A ɗawakɔ ɔ ɔ̃ si jo namkɔ a yɛti vigbete ɔ sisɨn kasiyɛ, si akɨnti ɔ ɔ̃nɛ si jo naayi ɓɛɛkɔ
8Ama dɔdɔrim ɔ̃rɔɔtɛ kaka jazɨng a kɔrɔɔ ɔ yaa vimtɔ kpai: sisɨn lɛsinɛ, sisɨn lanɛ, sisɨn shɔ bɛ̃ɛ̃nɛ. Zɔ dãnɛ ko zɔ nii lɛsinɛ ukɔ shɛnɛ toti awɔ nyani.9Ɔkɔɔ yeeli zɔnyanɛ a yuuni, aru ɔ yaa vi gbaali pɛlinɛtɛ gboti au vishonɛni10ɔ tosi dɔdɔrim kɛtɛ vi sɔɔ. N pɛ vi sɔɔ gbete Ɗalapa shɛshiyɛ, ko-pi lee piya u ɗɔ kɔsi au jasuru, aru u sɨuwɔɔrɛ ɔ zɛutɔ fɛ̃ɛm nɔgbete ɔ̃yɛ.11Aru nankɔ shɔvɔsi dɔɔɓa nɛ shompɛ Yahudawa ko ɓa Yahudawa ɓa, shɔgbete shɔ yeeriu shaatɛ ko shɔgbete shɔ ji yeeriu shaa ɓa, shɔ zati, ko shɔ jaalaayi ko foo, ko shɔgbete i ɓa foo ɓa, ama Kirisi ukɔ ɔ̃rɛ i piti kpai a ko iviya kpai.
12Ɔ pɛ Ɗalapa ɓɛshɔzɛyi; ukɔɔ ɔrɔɔrɛ a lɔɔrɛ nɛ ɔ ɔ̃ u ɓɛɛ. Aru nankɔ ɔ̃rɔɔtɛ kaka jazɨng a kɔrɔ ɔ ntazɔ raatɔ, ɔ rooriyuutɔ, ɔ pɛli shɔgbete i ɗɔɔraa ɓoonɛ vitɔ̃vɨng, ɔkɔɔ tuu yuunɛ ɔ mɛsisɨntɔ a zɔni.13Ɔkɔɔ sã zɔnɛ a sisɨnni, ɔ yaasi zɔ ruuvinitɔ, naa ɔkɛ kpaa yuu yɔrinɛnɛ a zɔni ko-pi ɗaviya, ɔ̃rɔɔtɛ kaka jazɨng a kɔrɔ ɔ yaasi zɔ ruuvinitɔ nagbete Uɓeyelapa yasɔɔ yɛ.14Vigbete au tɛɛ vimiyi kpai ukɔ ɔ̃rɛ zɔ ɔrinɛ, ukɔɔ ɓasi vimiyi yuurɛ ɗɔgbete kpai dangdang.15Ɔ̃nɛbiinyatɔ̃nɛ gbete Kirisi ãwɔyɛ pɛ aru u tasɔɔ nyaba vigbete ɔ pɛliyɛ; si jo aru ɔ̃nɛbiinyatɔ̃nɛmkɔ Ɗalapa ɓawɔɔ nya nɛ ɔ ɔ̃ gbete. Nɛ ɔ ɔ̃ shɔ dɔ̃rinɛ kopiɗaviya.16Ɔ̃rɔɔtɛ kaka jazɨng a kɔrɔ Kirisi nyaruubii u ɔ̃ awɔ sisɨn fɛ̃ɛm. Ɔ mati zɔ vitɔ, ɔ kosi zɔ nyatɔ a sẽrẽ gbete ɔ a wuniyɛ . Ɔ ntɔɔ soo Zaburatɔ a soo Ɗalapa nii bɛlinɛni a soo gbete Ɗasuru ãwɔyɛ; ɔ ntɔɔri Ɗalapa soo dɔ̃rinɛtɔ awɔ sisɨnni.17Vigbete ɔkɛ pɛlinɛ ko shanɛ kpai u ɔ̃ jo a Uɓeyelapa Yesɔ nii, nagbete ɔ ã dɔ̃rinɛ au kabii yɛnɛ u Ɓeye Ɗalapa bi.

Ɔ̃nɛ tɔ̃vɨn a Tete Suru Sɔɔ

18Suwɛrɛyi, ɔ ãyuu a mɛvɔyi bi, aru shɔm ɓɛɛ ji vigbete ɔyɛ pɛli naa Kirisayiyɛ.
19Shɔ yuwɛrɛyi ɔ ɔri mɛsoyitɔ ɔkɔɔ lasisɨnnɛ ayini.
20Jaayi kopiɗaviya ɔ gɨn meyeyi nyatɔ ukɔ ɔ̃rɛ ɔ vishonɛ kirisita, n pɛ vigbete u Ɗalapa kasiyɛ.
21Ɔ ɓeye a ɓini ɔkɔɔ ɓɔ̃ɔ mɛjaayinɛ, aruviya iyɛ zɔ̃ sisɨnrɛ awɔ biini.
22Fooyi ɔ gɨn ɔ shɔwɛrɛyi kotipi nyatɔ a yuu vi piti kpai, ɓanɛ aru gbete i awɔ ɗɔɔ zɛnɛkɔ sheeli ɓa, ɔkɔɔ pɛlinɛ aru ɔ kasi nɛi nta tɔ̃vɨn a ɔkɔɔni sheeli ɓa; ɔ pɛli a sisɨn gbete aru Uɓeyelapa nyaba seti ntanɛ.23Vigbete ɔkɛ pɛlinɛ kpai ɔ pɛlitɔ a sisɨn gbete, nagbete ɔ pɛli Uɓeyelapayɛ ɓa shɔzɛ ɓa.24Ɔ kpaa sisɨntɔ nɛ Uɓeyelapa yɛ ãwɔ viɗɔnwanɛtɔ gbete au pɔ̃si ɓɛshɔzɛyiyɛtɔ. Aruviya Kirisi ukɔ pɛ ɔ shɔwɛrɛ gaanɛ gbete ɔ shoshiu viyɛ.25Shɔgbeteyi pɛli vikɔ̃linɛ yɛ kpai shɔyɛ shoriyi vidɔnwanɛ jo a vikɔ̃linɛ ai pɛliyɛkɔ, aruviya Ɗalapa yeeri kopiya ruu jo naa gbete kpai.

The Word for the World International

https://app.library.bible/content/6fec21b499f7e625