Nunei Reantenangfo7
1Ainanaya Yahwei medu we Noki deyo, “Wuayai to wa fiabai nani afui, wau tuti nemu munurorongwasa, weo na inontarai rabuang bonini sa, meiri wauno Iwati nari ne wetaraife ne.2Na andowa kiaio wiro ewerarika kaha wasa tuti mewekorbanisa wasa mani, ka wiwing itu tuti mang itu, wape na andowa ewerarika wasa mani, ka wiwing manei tuti mang manei. 3Romufosa kontai, amani mang itu tuti wiwing itu. Ambori wiro eworua ehai kaha, mae manea etarang we etawing separai na nunei aha.4Weo rahida itu aha mani, ambori Yohong metang para bia to nunei mingno rahida piaru (40) tuti diru piaru (40), mingna fiotoura kaha, ambori inontaraifosa tuti fidarang kiaio Inarisa enayai na nunei emararehara eworu.”5Ainanaya Noki niari kariri fianai aino Yahwei demi wei tonanafo.6Rabuang bo foa fiabaifoi sufoi nuneifo mani, Noki ne fuina piaring we wonang (600).7Noki suai to wa fiabaifoi rorongfo afui, i tuti ne wiwingfoi, ne arikang mantorufo tuti itone wiwingfo sitoru, ambori ekaharai weru foa fiabaio sufoi nufoi nani.8Na andowa urengfoi kiai, ne ewerarika fosa tuti ne ewerarika kaha fosa, romufosa tuti andowa kiaio niayai na rei reisi,9mang manei tuti wiwing manei fuba nani kiai esuayai ria Noki to wa fiabaifoi rorongfo afui. Noki niari kariri fianai aino Allai demi weifo nanai.10Rahida itufo kai mani, foa fiabaifoi dautai sufoi nunei.11Rabuang bonani mani, Noki ne fuina piaring we wonang (600), na embai bo borufoi tuti na rahida bo suraya itufoi. Na rahida bonani dino, mereha urengfoi kiai na kahofa rorongfo tiapasa sabi toyai, rahutu wedua mereha ureng na rorafaisi kontai tiapasa sabi to nunei.12Metang parafoi miungna yubatai, fiotourai na ea kaha, miung rahida piaru (40), diru rahida.13Wape na rahida bonani kontai Noki suai kawurua to wa fiabaifoi rorongfo afui, i tuti ne wiwingfoi, ne arikangno Semi, Yafeti, Hami tuti itone wiwingfo sitoru, ea kiai esuayai to wa fiabaifoi.14Na ea kontai mani, romu urengfoi kiai, andowa teriraifoi, ahumifoi tuti ne fiafa na arongfoi.15Na fidarang nani kiai, era we mandurirutiai, mang manei tuti wiwing manei. Esuayai ria Noki to wa fiabaifoi rorongfo afui,16kariri fianai aino Allai demi weafo, ainanaya Yahwei kife rahutu wa fiabaifoia.17Rahida piaru (40) mani foa fiabaifoi sufoi nunei, tuti merehafoi dautai sufata wa fiabaifoi dewohi.18Merehafoi dautai pampangna dedai, sufata wa fiabaifoia dewohi soiyairi na mereha nuwowongfo.19Tuti merehafoi dautai pampang awao dedai paria, donio sufoi tawang uai daidai pariafo na nunei.20Na uai daidai nuwowongfo merehafoi dautai aha meteri itu.21Ainanaya fidarangfoi kiai na nunei mirehara wioru, amani romufosa, andowafosa tuti inontaraifosa kiai.22Fi kiaio darang senseng na ubongfoi mano niayai na rei sarahiafo, mirarehara wioru kiai.23Ampefe Allai niari fi darangfoi kiaia wioru tonanai, inontaraifosa, andowa eawemi boa fosa, ne efafa na earomi fosa tuti romufosa kiai Allai miungsa. Mae titou Noki tuti mano enayai kontai riati na wa fiabaifoi ansaino etarang terane.24Tuti mereha foa fiabaifoi wiro siru ahera kahai paria rahida piaring piarua sura (150).
The Seed Company