Nunei Reantenangfo8
1Wape Allai aro Noki tuti andowa mano enayai na wa fiabaifoi rorong fosa, ampefe Niari wanangfoi siayai na nunei, wedaya merehafoi arahi de siru.2Mereha urengfoi kiai na kahofa rorongfo tiapasa sabi toyaifoi, tuti rahutu wedua mereha ureng na rorafaisi tiapasa sabi to nunei, nani Allai kifeia kiai. Tuti metangno fiabai miungna yubatai nani fiotourai,3ainanaya merehafoi siru kuteai. Ampefe na rahida piaring piarua sura (150) fo kai nanai, merehafoi siru aha.4Na embai bo itufoi na rahida suraya itufoi, wa fiabaifoi sayari na uai Ararati.5Paria embai bo surafoi, na rahida reantenangfoi mani merehafoi siru aha, ampefe uai daidai nuwowongfo kawaraifa.6Rahida piaru (40) fo kai mani, Noki fiai suwirei bei na wa fiabaifoi,7tuti sawingno romu rawei manei sifoa, wape romufoi wiro daraberahi to wa fiabaifoi kaha, mae sifo towana toninai paria merehafoi sirua kiai.8Mayeai Noki sawing nari romu muntung manei sifo aha, we deitawang kariri merehafoi siruane ete bererie.9Manamo romu muntungfoi wiro sobu katai feai we minohi naya kaha, weo merehafoi siru weru nunei kaharai, ampefe daraberahi to wa fiabaifoi aha ma, ainanaya Noki si warangfoa yu romufoi tuti kiari to wa fiabaifoi rorongfo afui.10Noki demang rahida itu aha mani, sawing nari romu muntungfoi sifo aha.11Rerai we diru mani, romu muntungfoi daraberahi to wa fiabaifoi we Noki aha ma, tuti kiritawang ai saituni reraung weworu bei na borongfo. Na tonanafo Noki deitawanai we merehafoi rerai we sirua kiai to.12Mayeai Noki demang rahida itu aha mani, sawing nari romu muntungfoi aha, wape romufoi wiro daraberahi wei aha ma kaha.13Na kutu Noki ne fuina piaring we wonang boyari (601) foi, na rahida bo reantenang na embai bo reantenangfoi mani, merehafoi sirua kiai weru nuneia. Mayeai Noki fiai wa fiabaifoi nuwowongfo weai tuti deti wari boriaifo, amani detio kahofa nuwowongfo rerai we sarahiai.14Na rahida bo piareia itu (27) foi, na embai bo borufoi nanai, nunei sirahiai sentenangna.15Ainanaya Allai medu we Noki deyo,16“Bariai to boriei weru wa fiabaiwai, wau, nemu wiwingwai, nemu arikang mantoruwa tuti itone wiwingwa sitoru.17Andowa fubao enayai na wa fiabaiwai ria wau nanisa, tuti fidarangwai kiai, amani romuwasa tuti andowao enayai na rei reisa, era kiai to boriei ria wau, ambori etawing separai bitoya tuti esefa nunei.”18Ainanaya Noki dariai to boriei weru wa fiabaifoi, i tuti ne wiwingfoi, ne arikang mantorufo tuti itone wiwingfo sitoru.19Romufosa kiai, andowa rei reisi kiai, tuti fi darangno enayai na wa fiabaifoi ria Noki fo, era kiai to boriei kariri euremifo.20Ainanaya Noki niari mesba bei we Yahwei. Na andowa tuti romu mano wiro ewerarika kahafo, kia mansiawarai kariri euremifo, miungsa we korbani nunumi na mesbafoi we Yahwei.Mesba21Na kutuo Yahwei niuna korbanifo nunsai mampori tonanafo, Medu na enerorong deyo, “Yau wiro yeikanggani nunei ahang kahai, masino inontarainesa, enemitituai ne karirafo pampang na kutu etarangfo. Tuti Yau wiro imung fidarangnei kiai wioru kaha, kariri neo arahi Inari ararafangnai nina.22Na nunei niayai pampang tonina mani, rahida we tanang fi tuti rahida we eting fi, rahida we danunanang tuti rahida we maninggapoi, rahida we munudang tuti rahida we metang, diru tuti rahidafo, fi nini kiai nayai pampang wiro fiotoura kaha.”
The Seed Company