Ofilimo1

1Okpa mani bwabo hin Obulus, ni ayun shetu ikweyi ko Okristi Oyesu ni kpo oyene ka ko Otimoti.
Gebe ko oyene ka ko Ofilimo ni woya koko kaha ni,
2kpase ko Owuso ni ba gbayi ole wo ni, kpo oyene kaha ka Afiya, kpa Arkipus ni wa adakare dudu kpaha ni:
3Nyya beshi ko Owuso Ada kaha kpa Adole Oyesu Okristi na yala oneshi na ki dala omene.
4Oyene hin ko Ofilimo, ishi kpiri ni nyya tinarigwu, nyya tikwu kiye wo kweyi ya shotunehe do Owuso hin.5Ikweyi koni npwo oshu kimu ni ogbo dase ko Owuso kpiri kpo otuse wo ipu ka Adole Oyesu.6Nyya tinarigwu shini ema kotuse kaha na dawo ogyogye ko oza neshi kpiri ni agbo ipu ko Okristi ni.7Oyene hin moshi, imu wo yotu hin sha kotata kweyi tumotugbagba nwashika! Oyo otu kase ko Owuso kpiri sha.
8Omani damoshu ko koza ni oshu ko ya ni dawo, koni nwwo oyene wo ipu ko Okristi ni.9Nke ya bo boba ikweyi koni nyya yimu wo ni. Koni ami wo Obulus, ni hagye okwunu ko Okristi Oyesu kweyi anani ayun shetu ikweyi nu ni, kwikyikyeni nyya bo boba.10Nyya bo ikweyi ko Onesimus, ni woyi hin ipu ko Okristi ni; ishini ayun shetu ni nwwa wa adanu ipu ko omaku.11Ishi oye ni shigbo ni ogboko kojije ebe wo lo, anani ke ogboko ebe kaha, kami kawo.
12Anani ntoleho ya webe wo oma, otu hin yo kpanu.13Nbi ya yimu shona yebe ni kpami, ni nyyo oruduru ikweyi ko oshu neshi mani, shini ona tumabo okwunu wo.14Nke ya yimu ko byo koshu sho tumabo lo; nke ya yimu shini oyo neshi bwipu kotu wo la. Mani oni nyya yojije lo owoni okyogwu lalo.
15Oye lo Onesimus kabo kpawo kishi gbayayi shini ona wa yagye kpawo kpiri-kpiri la.16Kweyi anani owoshe ke lo, oke sho oshe: owo oyene moshi ipu ko Okristi. Oshumotu goga! Kweyi oki ya shotu mamani, byo oshe kpo oyene ipu ka Adole!17Mani oni owoni omun woya koko wo, yo omaba byoni oya yumo omaba ni.18Owoni oyozalabi kwe omyore wo koje, yikpo sumi ikweyi.19Ami Obulus pini ya ta anani kpabo hin ma: Nyya sore. (Nshu ko rawo kelo, ogye kamo awo abiyo myore hin kiyo.)20Ni olemani oni oyene, nyya bo mo yumo oneshi mani eshi ka Adole, yotu hin na sha ipu ko Okristi!21Nggye kamo oza ni nyya ta mani, oya ya, nki gye kamo oyaya shoza ni nka ni.22Oje ki yoma, kyo oda oye tu dami, ikweyi koni nyyi iyitagye mo bwebe kinarigwu kala kpiri Owuso ya kwikye ami ya dala.
23Epafuras ni ayo shetu kpami ikweyi ko Okristi Oyesu ni ya tala ogbogba,24mamani Omarkus kpa Aristakus kpo Odemas kpo Oluka, ni wawoya ko oko hin ni ba tala ogbogba.25Nyya beshi ka Adole Oyesu Okristi na yo kpa ala kpiri.

The Word for the World International

https://app.library.bible/content/5762b83c586abca6