Ibru1
1Nekye-nekye Owuso kela kpa awosokwu ka bwebe kawo bane ishi gogo-gogo, owe gogo-gogo,2anani ke okela kpaha bwebe ko Oyi nu ni oshu wino rogwu ko ojoji nu ni kweyi bwebe nu Owuso yese.3Anu pini wo oyoyu ki igyashi ko Owuso oki le byo Owuso ko okwokwoshi. Oyo gyogye kpo Owuso, oki le byo ojoji bwebe kela nu ni gbo oshu ni. Itikpi koni oyaha ngma shozalabi ka, kweyi oga yagye abore ko Owuso Ine ko Oshu kpiri.4Bwebe koni Owuso yo Oyi nu sha ayoleho kpiri byoni iye ni orogwu ni sha kakawa ni.5Koni oyoleho wonya ni Owuso kadanu mo,<<Owo oyi hin;ikyeni nwa Ada wo.>>Kwe oyoleho wonya ni oka ikweyi nu mo,<<Nyya wa Ada nu,kweyi anu ya wo Oyi hin.>>6Ishini Owuso ke ya to oyi kikyikyo nu oleho wese ni, okamo,<<Ayoleho ko Owuso kpiri na geyagye danu.>>7Ikweyi ka ayoleho, Owuso kamo,<<Owuso ya ayoleho nu wo owu,kweyi oya ayole nu wi igbenu ko ola.>>8Ikweyi ko Oyi nu Owuso kamo,<<Owuso, obula wo wa ko gbogbo-gbogbo!Kweyi oza neshi ya wo okposhi kose wo.9Oya yimu ko oza neshi kweyi ya tela ko ozabibi;mani oni, Owuso, Owuso wo, shokweyi odawo otunehe ka abokpa ni shoshi sholamu nioda awoya wo ni.>>10Oki kamo,<<Bwikyikyo, Adole, awo yese,kweyi oyi iso kpa abo wo.11Kpiri wa ba gebi, awo ke ya yaba;kpiri wa ba gekwinyi byo oshiye ni.12Oya yuwa kye bya ayikyi,oya shawa byaba sho oshiye ni.Awo ke le byoni ole ni,olayi wo ke gbokweyi lo.>>13Anoho ipu ka ayoleho ko Owuso ni oka danu mo,<<Yagye abore hingbishini nyya yawo omonyekwotu woba wo oka ko yi ikpo wo so.>>14Ayoleho woji? Awo awomaku ni ba yoko do Owuso ni kweyi otuwoleho ko tawase ni oya ngmawa ni abo.
The Word for the World International