Liíkat Yuxanna la salfayit4

1Fituyaam, kil rox iitímano, attamtuxunu indeíko min Rabbi min ta igil tifargo ajil nabyaat xassat bizxaam asikka iddinya abardagaw.2Wa la Rox min Rabbi min gé, ib kiínna tfarrugu: kil rox la Yasoq Al Massex ib sifat aadami kim matsá min laqatarif, min Rabbi tu.3Minnaata ayi rox la ib Yasoq iilaqatarif, min Rabbi iiko. Illi rox illi minna didda Masex tu la matstsí halla samqakum wa aze ma diibba iddinya halla.
4Fituyaam wilaajje, intim naay Rabbi intim wa itta nabyaatta xassat qawatekum jalliib la Rox la halla diibkum minna rox la iddinya walaqal gabá.5Hitom minna iddinya tom. Sababu ib fikir iddinya lithaagaw wa la iddinya taáttansiyom.6Laakiin xina naay Rabbi xina wa Rabbi la laámmir laáttansenna wa min Rabbi la iigabá, iilaáttansenna. Wa kiínna Rox la amaan minna rox la xassat infaarig.
7Fituyaam, ayxid nifte sabab fitti min Rabbi saddir. Wa la fatteka, wilud Rabbi tu wa Rabbi laámmir.8Wa la iifatte, Rabbi iilaámmir jalliib Rabbi fitti tu.
9Rabbi fittihu kiínna arénna ta: la orotaay Waldu asikka iddinya laáka ib gabayu igil nimbar.10Illa fitti amaan ta: xina Rabbi fatena indeíge, hitu fatenna wa Waldu laáka kim karaamat kaffarot zinubna igil lishankik.
11Fituyaam, ajil Rabbi marra fatenna, xina ma xid igil nifte bina.12Rabbi la raá bataatan yahalla laakiin min nitfaate, Rabbi diibna nabbir wa fitihu diibna tammim.
13Wa ib kiínna tu la kim saabtaam diibu xina wa hitu diibna naámmir: min Roxu kaflenna.14Wa bardu reéna wa ibba reénaahu inshihid, la Ab Waldu kim laáka Mangifaayya iddinya igil ligbá.
15Yasoq kim Wad Rabbi tu la laqtarif, Rabbi sabbit diibu wa hitu diib Rabbi sabbit.16Wa xad fittihu igilna naámmir wa diiba naqtamid. Rabbi fitti tu wa diib fitti la sabbit diib Rabbi sabbit wa Rabbi diibu.17Wa diib Rabbi ib sibtatna, fittina tkammil ka it amqil xikim yinfarrih, sighat tahalle inna indeíko ajil diib illa iddinya kimsal Yasoq innabbir.18Misil fitti, farhat yahallet. Bidaalu fitti kaamlat farhat tiddaagan sabab farhat qighaab laámatstsá wa la farrih ib fitti iikamla.
19Xina infatte sabab it salif Rabbi fatenna.20Fitti Rabbi la laqaddaqe wa xuhu la laábbe, manaay tu. Kafo xuhu la ilu liré iifatte wa Rabbi la ilu iiraá fatte?21Wa illa wasiyat wassenna: Rabbi la fatte, xuhu igil lifte wajjibbu.

Summer Institute of Linguistics Ethiopia

https://app.library.bible/content/9497b5e348514f38