Amos2
1RAMPAUBE ainzwa rangla: “Moabme gu kemau kecum de ziemne, mdai de si eh, Ih penuide saja peu bizie, kedanemene pa Edom hegwangpei radung ru mimüt tei kedine.2Ih Moab deu gage mi langgai zie, nah cide Kerioth namdi kengking reketbam ru nggah dizie, Moabme mra eh tsai zie, sahbak kegai gade nah telui kwa gade.3Ih pe tutiakme de ngkap dizie, nah Ih pe hegwangnapei de teitset dizie,” RAMPAUBE rangla.4RAMPAUBE ainzwa rangla, “Judahme gu kemau kecum de ziemne, mdai de si eh, Ih penuide saja peu bizie, kedanemene penui RAMPAUBE zai be mlai kedine, nah pe hezaidung mzailu kemakne. Penui kenret ziemne penui petau kemak gage tet di, penui paume ndaa tet kedi caiga tetla dida.5Ih Judah reu gage mi langgai zie, nah cide Jerusalem kengking reketbam ru nggah dizie.”6RAMPAUBE ainzwa rangla, “Israelme gu kemau kecum de ziemne, mdai de si eh, Ih penuide saja peu bizie, kedanemene penui rangkanggeu ziemne keyime de zwa dida nah picum ge ziemne kegame de zwa di.7Mina hangdeu ga rebui tangdei caiciem kela nzwa penui makegame peu caiciem; penui kemneime de nia gidi. Mige nah pe pei mipui hangge de ngngwa nauhepei zai tei dida nah iciu eh a zi kemci de tei hera di.8Kereca ni leune ga kegame dade penui pau bamdo kelu paidung teu, nah hepau pung kelame ne su kebeu de teu penui Tinggwang ki gade zau sakla.9Dede Ih Ammoritme de penui dwa gade ngkapdi, penui ra au cedar ra hu ge nzwa; pa au mhubangdung nzwa ngking. Dede pe peureu petsi kebam de nah pekangle pemah de Ih ngkap di.10Cipaureu de, Ih nnuide Egypt deu gade ngngwa mpet beu nah mmi riakdai ge hetaideu gade nnui lampui saubeu Ammoritme deu de luulu kerane.11Ih nnui namedung kakgade caihakecime de teu cuhgai nah nnui rehang kangge de Nazaritme tei kera Ciciu meni, Israelmedung?, RAMPAUBE ne aide ndugai. 12Dede nnui Nazaritme de peu zau sak nah caihakecime de peu caiha keci sam rang lak lie aja kai.13Pielo, Ih nnuide rüt takcai dizie tsiu puiting eh pung kela bagi migede rüt takcailu kebui nzwa.14Pak kecime mbai gai lak; kengkingme pe kengking gage kaisi gailak; mede pekatei pe kengking le pecu keli gailak.15Lakpi kepwame sapgai lak dizie; pak nzetsüt kecume mbai gai lak; hekwen keteume penui katei penui teilung keli gailak.16Cipau nai reugwame kuutumedung kecangde penui paula eh pak dizie, RAMPAUBE ne aide ndugai.”
Bridge Connectivity Solutions Pvt. Ltd.