Amos3
1RAMPAUBE nnuide rang mmau kebam sam aide kingnei gailo, Israelme, Ih Egypt deu gade ngngwa kempet pelane de mmau eh:2“Ih ncu rünne kedetlu kideu ga heleuh pelane dade. Cine Ih ncu saja peu zie n kemaudung pelane ziemne.”3Hangna kesuizwa mene penai ngngwa tet ncüt zieni?4Hingho hegung gade keda makaune de tuilu mecai hingho mrung zie ni? Hinghona peki gade pa magede tuilu mecai nra zie ni?5Kideu ga hetak gede teupwa bam mene daidau nruine ge hetak ga mie keu zie no? Hetak ge cide magede tui mene hangdeu gade cuh nkap zieni?6Magade namdi ga telui kwa gai cai, minadung ngngi lak ni? Magade namdi ga keherei gwang liecai cide RAMPAUBE ne langgai meni?7RAMPAUBE Tinggwang pe kilame caihakecime dage pe kecet ranglia mene magede tei lama. 8Hingho nrung gai; cau hing melai no? RAMPAUBE Tinggwang marang gai de; cauge caihakeci sam rang melu lai no?9Ashdod kengking reketbamdung gage, nah Egypt deu kengking reketbamdung gage aide ranggai beulo; “Samaria lamlwatudung ga nnui gwang ngkwa lu nah peda daipai cikehebwak kedi bambi pie lo, nah peda daipai keherei bam bi kecu.10Penui dainzwa petaube teilu zie bi cikemak ziemne, RAMPAUBE ne aide ndugai, Penui zaisiet nah mide tei ngkap kelu le kengking reketbamdung kai puilu.”11Cine RAMPAUBE Tinggwang ainzwa rangla: “Ngauraume ne kideu twagwalu zie, nah nnui kengkingbam teu nghung dizie nah nnui kengkingbam tei msia dizie.”12RAMPAUBE ainzwa rangla: “Meurün kekwabe hingho mui gade pe pi kena rünne, mede pe kwen ge keu keli lula kecu nzwa; cinzwa Israelme Samaria ga kelungme de de kelilu zie; penuide bamtie ge gutu nage mede zeulie ge gu sau nage rünne gi gai beuzie.”13Kingnei lwe zierang teilu Jacob leuhme dage ranglia lo, RAMPAUBE Tinggwang ne aide ndugai, reugwame reu Tinggwang:14“Ih Israelme maudung ziemne saja kepeu benai, Ih Bethel recabamdung de ngkap dizie. Recabam kiidung de ngkap dizie nah hangdeu ga kaumie dizie.15Ih tingtiak ki penai tinglum ki ngkap dizie. Hepwa ngeu le tei kelu kidung sia dizie, nah ki kedidung gah dizie, RAMPAUBE ne aide ndugai.”
Bridge Connectivity Solutions Pvt. Ltd.