LUK16
1Yeso oyɛɛn hɛ̃ y'ayio a ndɛ bubu: «Ɔ̃pfel ngɔmɔ̃ áli y'ɔ̃sal wu áketal opfel o ndɛ. Baal ayefɛn ndɛ ndiri: “Ɔ̃sal a yɛ abɔɔ̃ yɛ opfel.”2Mfam bu ati ndɛ mbel, ofuul ndɛ bubu: “M'eyoo mɛ̃ me nkuũ a yɛ omɔ̃ ãmã? Sa mɛ̃ ɔ̃tsiɔ wu ɔ̃sal a yɛ ndyam wueel, ke ngwel wɛ yɛ ŋ'àmbal k'ɔ̃sal a mɛ̃.”3Ɔ̃sal wu bu abvi oyɛɛn ndyam-a-ndyam ndiri: “Mfam a mɛ̃ ŋ'ambaal mɛ̃ k'ɔ̃sal a ndɛ, mɛ̃ ngyii bwɛn-a-bwɛn èsa? Osal b'ãnguun, mɛ̃ mpɛn pyɛ. Olaa b'eluɔ, mɛ̃ ndi y'opfuru.4Ee, mɛ̃ ngyɛɛ emfa ki èsa mɛ̃, kwɛn baal ayɔɔ mɛ̃ ola bɔ ke mbee a ŋ'ambaal mɛ̃ k'ɔ̃sal.”5Ndɛ oti mbuul ngɔmɔ̃-ngɔmɔ̃ mbel b'áli y'ebiin e mfam a ndɛ. Ndɛ ofuul mbuul wu ɛ̃kwel bubu: “Yɛ li y'ebiin e mfam a mɛ̃ ki kwɛ?”6Ndɛ obveel ndiri: “Ebiin eli ki atɔn a mbaal m'olibve ɔ̃nkam (100).” Ɔ̃sal oyɛɛn bubu: “Wal ɔ̃nkaan wu tswa-tswa, swɛn wɛn ebiin eli ki atɔn ãku-ãtaan (50).”7Ke mbee oŋɔ̃, ndɛ ofuul wukyɛ ndiri: “Ke yɛ, ebiin ki yɛ kwɛ eli?” Mbuul ondɛ obveel ɔ̃sal ndiri: “Ebiin eli ki asak ɔ̃nkam (100) ba nsia yi bele.” Ɔ̃sal bvool olieel ndɛ ndiri: “Wal ɔ̃nkaan, swɛn wɛn bɔ ali ɛ̃kuun-mpuɔ̃ (80).”8Ŋ'eyoo mfam ãndɔɔ m'esi ɔ̃sal wu ɔ̃bi ondɛ, ndɛ okiool ndɛ m'ãyal m'ãbi m'esi ndɛ omɔ̃. Taa-taa bam, baal b'abii opfel b'ɔ̃kiri abesa ãndɔɔ y'ãyal onse bam-a-bam. Bɔ anduru b'adzii k'adzuu onse okal-a-kal ãyal.»9Yeso olweel bubu: «Mɛ̃ bvool eyɛɛn byɛ wɛn: Esa kwɛn m'opfel b'ãyal ãbi, byɛ ebɔɔ andoo. M'emfa okyɛ, ŋ'ekieel efa opfel obɔ, bɔ àyɔɔ byɛ k'ãmboo m'ɔ̃bu.10Mbuul wu oli dzu onse ãndɔɔ m'ãtsi-ãtsi, ndɛ hɛ̃ oli dzu onse ãndɔɔ m'ãnɛn. Wɛn k'ali dzu onse ãndɔɔ m'ãtsi-ãtsi wɛ, ndɛ k'ali dzu onse m'ãnɛn hɛ̃ wɛ.11Obobɔ, ŋɛn byɛ k'eli dzu m'ãndɔɔ ã nzi yi epfuru baal wɛ, wu àwa byɛ opfel bo taa-taa nã?12Obobɔ, byɛ ŋɛn k'eli dzu m'eluɔ bvi mbuul ɔ̃kyam wɛ, Nziã k'àwa byɛ opfel bo byam b'ekwee ndɛ byɛ wɛ.13Ɔ̃nkyal ngɔmɔ̃ k'akoo m'okal m'amfam buaal wɛ: Okɛɛn ndɛ abyal ngɔmɔ̃, adzii wukyɛ, okɛɛn ndɛ akuru nzuru me ngɔmɔ̃, afiɛɛn wukyɛ. Okɛɛn byɛ eli ankyal a nzi, byɛ k'ekoo k'esal me ndɔɔ a Nziã wɛ.»14Ke mbee a ŋ'eyoo Afalisaye ãndɔɔ omɔ̃, bɔ abvi Yeso osyob, me ndɔɔ yɛn bɔ b'áli ye pfuul o nzi.15Yeso bvool olieel bɔ bubu: «Byɛ ebesuo kwɛn byɛ eli dzu ke mviil ã baal, ŋ'esa kwɛn, Nziã oyɛɛ ɛ̃kwal ɛ̃ byɛ. Ke ngwel wɛ, ãndɔɔ m'elweel baal, Nziã asiaan mɔ̃.16Baal áli ke nsɛn a ngel a Moyize y'ɛ̃nkaan mi aliaal-ɛ̃kiɛɛn a Nziã tiil lio li Dzaã Batis. Bɛɛn me lio olɔ, abeliaal Nsia yi Ngesɛ yi Okwɛn o Nziã. Mbuul bwɛn a mbuul abesa mpɛn me ndɔɔ yi asam onse bɔ.17Onkyam ŋɛn baal bvool k'abekal ke nsɛn a ngel wɛ, ywel ye nsie ekoo m'obwel bam ɔ̃kwɛɛl pyɛ. Etɔ m'ɔ̃nkaan wa ngel, si ekal mpɛɛl a ndɛ k'ekoo m'ombal bam wɛ.18Mbuul abee ɔ̃kal a ndɛ, oyebaal ɔ̃kaal ɔ̃kyam, ndɛ ŋ'afel ngel a bal. Bvool mbuul wu obaal ɔ̃kaal wu ebee ɔ̃lam, ŋ'afel ngel a bal hɛ̃.»19Yeso bvool oti mboo yi: «Éli y'ɔ̃pfel ngɔmɔ̃ wu ákelaal ekɔ bvi ebvɛ-ebvɛ bvool bvi ɔ̃bvɛn. Tsoo bwɛn a tsoo li omwiĩ o ndɛ, ndɛ áli onse obɛɛl o pfuun y'esɛ.20Éli hɛ̃ y'ɔ̃ywal ngɔmɔ̃ wɛn nkuũ Ladzaal wu áli bɔ k'ɔ̃nywã a nzɔ a opfel ondɛ. Nzuru a ndɛ éli yam m'ãbwɔɔ.21Ndɛ kwɛn k'áli y'efua ki adza ãmpɛɛl m'eluɔ m'ãfa ywel a misa wu ɔ̃pfel, amva aya ndɛ ãbwɔɔ m'ãnɛn olie.22Ɔ̃ywal okwi, ãnzwel ãbiri ndɛ ke mboo yi eli Abalayam. Ɔ̃pfel hɛ̃ okwi, adziool ndɛ.23K'ola o b'ákwi-ákwi, ndɛ oyii amwɛn fool li bibi. Ndɛ aseel mviil, ndɛ otaal Abalayam, ye Ladzaal tsotsoo ye ndɛ.24Ndɛ obvi obiool bubu: “Taal wu Abalayam, sio mɛ̃ nyiĩ! Tam Ladzaal, kwɛn ndɛ atob nswɛɛ a ɔ̃liɛɛn a ndɛ onse ãdza, me ndɔɔ yi awa mɛ̃ elam efyɛ, ke ngwel wɛ mɛ̃ emwɛn fool bibi onse mbaa yi.”»25«Abalayam obveel ndɛ ndiri: “Muaan a mɛ̃, ebvaan yɛ ayɛɛ wɛn yɛ ábɔɔ obvɛ bibi m'omwiĩ o yɛ, kɛn a Ladzaal áli onse fool. Meba ŋã, fool li ndɛ efi, kɛn a yɛ boomwɛn mpal.26Yɛɛ bvool kwɛn, ywɛn li ela eli mpɛ̃-a-mpɛ̃ a byɛ ye bee. Obobɔ, b'adzii k'afa kwɛn ayi okɔ, k'akoo m'otsiil lɔ wɛ, b'okɔ hɛ̃ k'akoo m'otsiil lɔ aya ola bee wɛ.”27Ɔ̃pfel olweel bubu: “Okɛɛn obobɔ taal, mɛ̃ buɛɛn yɛ, oŋɔ̃ tam kɛn a ndɛ ayi onse nzɔ a tal a mɛ̃!28Ke ngwel wɛ, mɛ̃ ndi ye baan-ngoo ataan. Yɔɔl kwɛn ndɛ ayewa bɔ ãnkunkwa, kwɛn bɔ hɛ̃ abee ke mboo yi fool yi oya!”»29«Abalayam obveel ndɛ bubu: “Baan-ngoo a yɛ ali y'ɔ̃nkaan a Moyize bvool y'aliaal-ɛ̃kiɛɛn a Nziã, me ndɔɔ yi awa bɔ ãnkunkwa, ayoo bɔ!”30Ɔ̃pfel obveel bubu: “Taal wu Abalayam, k'obobɔ wɛ, ŋɛn mbuul ofi ola b'ákwi-ákwi okɔɔl oyeyɛɛn ye bɔ, bɔ ol'akaal ɛ̃kwal.”31Abalayam obveel ndɛ ndiri: “Bɔ okɛɛn k'ayoo Moyize y'aliaal-ɛ̃kiɛɛn a Nziã wɛ, bɔ hɛ̃ olɔ k'akaal ɛ̃kwal wɛ, onkyam ŋɛn mbuul wu osiool oyewa bɔ ãnkunkwa.”»
Wycliffe Bible Translators, Inc.