𐴔𐴡𐴃𐴞 14 ਪੜ੍ਹੋ

𐴔𐴡𐴃𐴞14

𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴔𐴡𐴦𐴃𐴢

¹𐴇𐴠𐴥 𐴀𐴡𐴑𐴃𐴡𐴥𐴃𐴢 𐴒𐴝𐴓𐴞𐴓𐴢 𐴀𐴠𐴓𐴝𐴑𐴝𐴌 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴈𐴠𐴥𐴌𐴟𐴊𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴈𐴡𐴥𐴁𐴡𐴌 𐴉𐴟𐴥𐴙𐴕𐴧𐴠,²𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴀𐴟𐴎𐴞𐴌-𐴕𐴝𐴎𐴞𐴌 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝, 𐴀𐴞𐴥𐴁𐴝 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠; 𐴇𐴠𐴥𐴃𐴡𐴓𐴧𐴝 𐴃𐴡 𐴀𐴞𐴥𐴁𐴝𐴘𐴠 𐴑𐴠𐴌𐴝𐴔𐴡𐴃𐴞 𐴈𐴝𐴔 𐴇𐴞𐴥𐴀𐴕 𐴒𐴡𐴌𐴞𐴥 𐴉𐴝𐴌𐴠𐴌.“

³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴠𐴥𐴌𐴟𐴊𐴠 𐴕𐴞𐴎𐴡𐴌 𐴁𐴝𐴥𐴘 𐴉𐴞𐴓𐴞𐴥𐴂𐴡𐴌 𐴁𐴡𐴖𐴢 𐴈𐴠𐴥𐴌𐴟𐴊𐴞𐴀𐴝𐴏𐴡𐴌 𐴖𐴝𐴏𐴃𐴠𐴥 𐴇𐴠𐴥 𐴘𐴝𐴇𐴝𐴥𐴘𐴝𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥 𐴁𐴝𐴣𐴊𐴞𐴥𐴉𐴠𐴓𐴝𐴘 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴓𐴢.⁴𐴘𐴝𐴇𐴝𐴥𐴘𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴃𐴡𐴤 𐴊𐴠 𐴇𐴠𐴥𐴃𐴡𐴓𐴧𐴝, ”𐴃𐴟𐴣𐴀𐴝𐴥𐴣𐴃𐴧𐴟 𐴇𐴞𐴥𐴁𐴝𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥𐴁𐴝𐴌 𐴎𐴝𐴘𐴠𐴏𐴢 𐴕𐴝𐴥𐴘.“⁵𐴘𐴡𐴥𐴒𐴧𐴗𐴝𐴃𐴧𐴟 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴔𐴡𐴕𐴠𐴈𐴡𐴘𐴃𐴡𐴥, 𐴔𐴡𐴕𐴃𐴡𐴌 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴡𐴌𐴠 𐴋𐴡𐴦𐴌𐴝𐴘𐴃𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴘𐴝𐴇𐴝𐴥𐴘𐴝𐴌𐴠 𐴕𐴡𐴁𐴞 𐴔𐴝𐴕𐴞𐴃𐴡𐴥.

⁶𐴓𐴠𐴑𐴞𐴕 𐴎𐴠𐴣𐴃𐴧𐴠𐴥 𐴈𐴠𐴥𐴌𐴟𐴊𐴡𐴌 𐴎𐴡𐴌𐴔𐴡-𐴊𐴞𐴕 𐴀𐴝𐴙𐴐𐴧𐴠𐴥, 𐴈𐴠𐴥𐴌𐴟𐴊𐴞𐴀𐴝𐴏𐴡𐴌 𐴎𐴞𐴥𐴀𐴘𐴠 𐴔𐴝𐴀𐴉𐴞𐴓𐴡𐴃𐴢 𐴕𐴝𐴏𐴞 𐴈𐴠𐴥𐴌𐴟𐴊𐴡𐴌𐴠 𐴑𐴟𐴥𐴐𐴞 𐴒𐴡𐴙𐴅𐴧𐴠𐴥.⁷𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴈𐴡𐴏𐴡𐴥𐴔 𐴇𐴝𐴥𐴘 𐴖𐴝𐴦𐴊𐴝 𐴒𐴡𐴙𐴅𐴧𐴠𐴥 𐴊𐴠, 𐴇𐴞𐴥𐴁𐴝𐴘𐴠 𐴎𐴞𐴀𐴕 𐴔𐴝𐴒𐴠 𐴇𐴞𐴥𐴀𐴕 𐴊𐴞𐴦𐴁𐴡 𐴈𐴡𐴀𐴘𐴢.⁸𐴕𐴞𐴎𐴡𐴌 𐴔𐴝𐴦𐴘𐴠 𐴐𐴞𐴥𐴑𐴝𐴘𐴊𐴞𐴘𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴈𐴡𐴓𐴧𐴝 𐴖𐴝𐴌𐴠 𐴀𐴠𐴑𐴧𐴝𐴥𐴕 𐴃𐴝𐴥𐴓𐴞𐴃𐴢 𐴒𐴡𐴥𐴌𐴞 𐴀𐴠𐴍𐴠𐴥 𐴀𐴝𐴣𐴀𐴌𐴠𐴥 𐴊𐴡𐴦.“⁹𐴇𐴞𐴥𐴘𐴝𐴕 𐴉𐴟𐴥𐴕𐴞 𐴁𐴝𐴀𐴣𐴐𐴧𐴝𐴃𐴧𐴟 𐴁𐴞𐴐𐴞𐴤 𐴀𐴝𐴉𐴏𐴟𐴥𐴏𐴢 𐴓𐴝𐴙𐴒𐴧𐴠𐴥, 𐴔𐴡𐴕𐴃𐴡𐴌 𐴃𐴡𐴀 𐴕𐴞𐴎𐴡𐴌 𐴈𐴡𐴏𐴡𐴥𐴔 𐴀𐴠𐴊𐴧𐴠 𐴔𐴠𐴀𐴔𐴝𐴕 𐴀𐴡𐴥𐴑𐴧𐴡𐴓𐴡𐴌 𐴎𐴡𐴌𐴞𐴘𐴝 𐴘𐴡𐴥𐴒𐴧𐴗𐴝𐴘𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴇𐴞𐴥𐴁𐴝𐴌 𐴀𐴝𐴌𐴡𐴏𐴢 𐴏𐴝𐴥𐴕 𐴉𐴟𐴌𐴝 𐴒𐴡𐴌𐴝𐴥 𐴎𐴝𐴥𐴘 𐴁𐴡𐴓𐴧𐴝.¹⁰𐴃𐴝𐴌𐴉𐴡𐴌𐴠 𐴘𐴡𐴥𐴒𐴧𐴗𐴝𐴘𐴠 𐴔𐴝𐴕𐴟𐴥𐴙𐴐𐴢 𐴊𐴞𐴉𐴠𐴍𐴝𐴥𐴘, 𐴎𐴞𐴘𐴡𐴥𐴓𐴡𐴃𐴢 𐴘𐴝𐴇𐴝𐴥𐴘𐴝𐴌 𐴈𐴡𐴓𐴧𐴝 𐴈𐴝𐴍𐴞𐴉𐴠𐴥𐴓𐴝 𐴁𐴝𐴘𐴠𐴤.¹¹𐴁𐴝𐴦𐴊𐴠 𐴀𐴞𐴥𐴁𐴝𐴌 𐴈𐴡𐴓𐴧𐴝 𐴖𐴝 𐴀𐴠𐴑𐴧𐴝𐴥𐴕 𐴃𐴝𐴥𐴓𐴞𐴃𐴢 𐴒𐴡𐴥𐴌𐴞 𐴀𐴝𐴕𐴞𐴤 𐴎𐴠𐴥𐴌𐴉𐴟𐴖𐴝 𐴖𐴝𐴌𐴠 𐴊𐴞𐴦𐴘𐴝 𐴒𐴞𐴘𐴠𐴥, 𐴀𐴝𐴦𐴌 𐴎𐴠𐴥𐴌𐴉𐴟𐴖𐴝 𐴖𐴝𐴘𐴠 𐴕𐴞𐴎𐴡𐴌 𐴔𐴝𐴦𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤.¹²𐴘𐴝𐴥𐴌𐴁𐴝𐴦𐴊𐴠 𐴘𐴝𐴇𐴝𐴥𐴘𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴀𐴝𐴀𐴘𐴧𐴡𐴌𐴠 𐴀𐴞𐴥𐴁𐴝𐴌 𐴓𐴝𐴐𐴧𐴗𐴝 𐴓𐴡𐴘𐴎𐴝𐴘 𐴊𐴡𐴇𐴡𐴥𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠; 𐴁𐴝𐴦𐴊𐴠 𐴎𐴝𐴘 𐴀𐴞𐴏𐴝𐴤𐴌𐴠 𐴇𐴞𐴥𐴘𐴝𐴕 𐴎𐴝𐴕𐴝𐴘𐴧𐴠𐴥.

𐴉𐴝𐴣𐴏𐴢 𐴀𐴝𐴥𐴎𐴝𐴌 𐴔𐴝𐴙𐴕𐴐𐴡𐴥𐴌𐴠 𐴈𐴝𐴥𐴕𐴝 𐴈𐴝𐴥𐴁𐴝𐴘𐴧𐴠

¹³𐴀𐴞𐴏𐴝𐴤𐴘𐴠 𐴘𐴝𐴇𐴝𐴥𐴘𐴝𐴌 𐴁𐴝𐴦𐴁𐴟𐴃𐴠 𐴉𐴟𐴥𐴙𐴕𐴧𐴠 𐴌𐴝𐴥𐴌, 𐴈𐴠𐴥𐴕𐴃𐴟 𐴏𐴞𐴥𐴌𐴝 𐴀𐴡𐴥𐴘 𐴕𐴡𐴦𐴃𐴢 𐴒𐴡𐴌𐴞 𐴀𐴠𐴑𐴧𐴝𐴥𐴕 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴎𐴝𐴒𐴝𐴃𐴢 𐴒𐴞𐴦𐴘𐴡𐴥𐴘. 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕 𐴉𐴟𐴥𐴕𐴞, 𐴐𐴡𐴥𐴀𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴕𐴠𐴦𐴓𐴞 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴠.¹⁴𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴕𐴡𐴦𐴃𐴧𐴟 𐴓𐴝𐴙𐴔𐴧𐴠𐴥, 𐴀𐴞𐴥𐴁𐴝𐴘𐴠 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴊𐴠𐴙𐴑𐴧𐴠𐴥; 𐴀𐴝𐴦𐴌 𐴀𐴞𐴥𐴃𐴝𐴌𐴝𐴓𐴧𐴝 𐴉𐴠𐴄𐴉𐴟𐴌𐴞 𐴀𐴞𐴥𐴃𐴝𐴌𐴝𐴌 𐴁𐴞𐴘𐴝𐴌𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴔 𐴒𐴡𐴙𐴅𐴧𐴠𐴥.

¹⁵𐴎𐴠𐴣𐴃𐴧𐴠𐴥 𐴇𐴝𐴥𐴣𐴎𐴢 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴘𐴝𐴀𐴕 𐴃𐴡 𐴀𐴠𐴑𐴧𐴝𐴥𐴕 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴎𐴝𐴒𐴝, 𐴀𐴝𐴦𐴌 𐴁𐴠𐴙𐴓𐴢 𐴀𐴡𐴥 𐴒𐴞𐴘𐴡𐴥𐴘. 𐴇𐴠𐴥𐴃𐴡𐴓𐴧𐴝 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴊𐴟𐴣𐴌𐴝𐴘𐴊𐴡, 𐴎𐴠𐴀𐴕𐴠 𐴃𐴝𐴌𐴝𐴥 𐴉𐴝𐴌𐴝 𐴀𐴡𐴥𐴑𐴧𐴡𐴓𐴡𐴃𐴢 𐴎𐴝𐴘 𐴕𐴞𐴎𐴡𐴌 𐴓𐴧𐴝 𐴈𐴝𐴥𐴕𐴝 𐴑𐴞𐴕𐴞𐴒𐴡𐴥𐴘 𐴉𐴝𐴌𐴠.“

¹⁶𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴝𐴌𐴝𐴥𐴃𐴧𐴟 𐴎𐴝𐴦𐴒𐴡𐴥𐴘 𐴕𐴡 𐴉𐴡𐴌𐴞𐴁𐴡𐴥; 𐴇𐴝𐴥𐴘 𐴁𐴡𐴓𐴧𐴝 𐴑𐴠𐴏𐴧𐴟𐴥 𐴃𐴝𐴌𐴝𐴥𐴌𐴠 𐴃𐴟𐴣𐴀𐴝𐴥𐴌𐴝 𐴊𐴡𐴦.“

¹⁷𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴀𐴠𐴍𐴠𐴥 𐴉𐴝𐴣𐴏𐴢 𐴏𐴗𐴝𐴥 𐴌𐴟𐴄𐴞 𐴀𐴠𐴊𐴧𐴠 𐴊𐴟𐴖𐴝𐴥 𐴔𐴝𐴏𐴢 𐴁𐴝𐴊𐴠 𐴀𐴝𐴌 𐴑𐴠𐴏𐴧𐴟𐴥 𐴕𐴝𐴥𐴘.“

¹⁸𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴇𐴞𐴥𐴀𐴕 𐴀𐴠𐴍𐴠𐴥 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴕𐴡𐴤𐴒𐴡𐴘.“¹⁹𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴑𐴠𐴥𐴌𐴡𐴌 𐴖𐴡𐴌𐴠 𐴁𐴡𐴘𐴃𐴡𐴥 𐴇𐴡𐴥𐴑𐴟𐴔 𐴊𐴞𐴥𐴘𐴠, 𐴀𐴝𐴦𐴌 𐴇𐴠𐴥 𐴉𐴝𐴣𐴏𐴢 𐴏𐴗𐴝𐴥 𐴌𐴟𐴄𐴞 𐴀𐴠𐴊𐴧𐴠 𐴊𐴟𐴖𐴝𐴥 𐴔𐴝𐴏𐴢 𐴏𐴟𐴥𐴕 𐴓𐴡𐴦𐴘𐴢 𐴀𐴝𐴏𐴔𐴝𐴕𐴡𐴌 𐴀𐴟𐴎𐴟 𐴏𐴝𐴀𐴘𐴢 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴠𐴥. 𐴃𐴝𐴌𐴉𐴡𐴌𐴠 𐴌𐴟𐴄𐴞 𐴒𐴟𐴥𐴕 𐴁𐴝𐴥𐴚𐴒𐴞-𐴁𐴝𐴥𐴚𐴒𐴞 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴞𐴦𐴘𐴠𐴥, 𐴀𐴝𐴦𐴌 𐴐𐴝𐴥𐴌𐴞𐴃𐴧𐴟𐴕𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴁𐴝𐴍𐴞𐴊𐴞𐴘𐴠𐴥.²⁰𐴃𐴝𐴌𐴝𐴥 𐴁𐴠𐴒𐴧𐴟𐴥𐴕𐴠 𐴉𐴠𐴄𐴢 𐴁𐴡𐴥𐴌𐴞 𐴈𐴝𐴥𐴘𐴧𐴠. 𐴁𐴝𐴦𐴊𐴠 𐴎𐴠 𐴃𐴟𐴑𐴟𐴍𐴝 𐴀𐴡𐴥𐴑𐴧𐴡𐴓𐴢 𐴁𐴝𐴏𐴞𐴒𐴞𐴘𐴡𐴥𐴘, 𐴐𐴝𐴥𐴌𐴞𐴃𐴧𐴟𐴕𐴠 𐴇𐴞𐴥𐴀𐴕 𐴉𐴠𐴣𐴍𐴝𐴘 𐴓𐴡𐴦𐴘𐴢 𐴉𐴟𐴌𐴝 𐴁𐴝𐴌𐴡𐴥 𐴁𐴝𐴥𐴙𐴌 𐴁𐴡𐴥𐴙𐴅𐴧𐴠.²¹𐴈𐴝𐴥𐴘𐴧𐴠 𐴊𐴠 𐴀𐴞𐴥𐴃𐴝𐴌𐴝 𐴁𐴠𐴍𐴞𐴘𐴝𐴥𐴙𐴕 𐴀𐴠𐴊𐴧𐴠 𐴉𐴟𐴀𐴝𐴙𐴕 𐴁𐴝𐴊𐴢 𐴊𐴞 𐴃𐴡𐴑𐴡𐴌𐴞𐴁𐴝𐴕 𐴉𐴝𐴣𐴏𐴢 𐴀𐴝𐴥𐴎𐴝𐴌 𐴁𐴠𐴍𐴝𐴀𐴙𐴕.

𐴀𐴞𐴏𐴝𐴤 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴙𐴄𐴧𐴠

²²𐴁𐴝𐴦𐴊𐴠 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴔𐴡𐴅𐴁𐴟𐴌 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴁𐴞𐴊𐴝𐴘 𐴒𐴡𐴌𐴞𐴥 𐴊𐴞𐴃𐴠-𐴊𐴞𐴃𐴠 𐴀𐴞𐴥𐴃𐴝𐴌𐴝 𐴎𐴠𐴀𐴕𐴠 𐴕𐴡𐴦𐴃𐴢 𐴀𐴟𐴍𐴞𐴤 𐴀𐴞𐴥𐴁𐴝𐴌 𐴀𐴝𐴒𐴠 𐴋𐴞𐴀𐴌 𐴀𐴡𐴑𐴟𐴓𐴠 𐴎𐴝𐴦𐴒𐴡𐴥𐴘.²³𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴁𐴞𐴊𐴝𐴘 𐴒𐴡𐴌𐴞𐴥𐴊𐴞 𐴁𐴝𐴦𐴊𐴠, 𐴀𐴞𐴥𐴁𐴝 𐴀𐴠𐴑𐴠𐴥𐴓𐴝 𐴉𐴝𐴀𐴌𐴡𐴌 𐴖𐴡𐴌𐴠 𐴊𐴟𐴖𐴝 𐴒𐴡𐴙𐴃𐴧𐴡𐴥 𐴀𐴟𐴙𐴄𐴧𐴡𐴥𐴘. 𐴀𐴝𐴦𐴌 𐴇𐴝𐴥𐴣𐴎𐴢 𐴀𐴡𐴥𐴘𐴧𐴠 𐴊𐴠 𐴇𐴠𐴥𐴣𐴃𐴧𐴠, 𐴀𐴞𐴥𐴁𐴝 𐴇𐴠𐴥𐴍𐴠 𐴇𐴝𐴥𐴓𐴞𐴒𐴝,²⁴𐴔𐴡𐴕𐴃𐴡𐴌 𐴕𐴡𐴦 𐴒𐴝𐴥𐴕 𐴑𐴟𐴓𐴡𐴃𐴧𐴟 𐴁𐴡𐴀𐴗𐴃𐴢 𐴊𐴟𐴌𐴠𐴥, 𐴀𐴝𐴦𐴌 𐴁𐴡𐴘𐴧𐴝𐴌 𐴀𐴟𐴎𐴝𐴕 𐴁𐴝𐴀𐴃𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴏𐴝𐴉𐴠 𐴇𐴞𐴥𐴘𐴝𐴕 𐴓𐴠𐴥𐴙𐴚𐴧𐴠 𐴀𐴠𐴥𐴣𐴏𐴑𐴝𐴌.

²⁵𐴉𐴟𐴀𐴝𐴥𐴣𐴙𐴃𐴧𐴝, 𐴀𐴞𐴏𐴝𐴤 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥.²⁶𐴀𐴞𐴥𐴁𐴝 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴍𐴠𐴌 𐴊𐴠 𐴇𐴞𐴥𐴘𐴝𐴕 𐴐𐴝𐴥𐴌𐴞𐴃𐴧𐴟𐴕𐴠 𐴊𐴠𐴑𐴞𐴥 𐴁𐴞𐴐𐴞𐴤 𐴋𐴡𐴦𐴌𐴝𐴘𐴒𐴞𐴘𐴡𐴥𐴘, 𐴀𐴝𐴦𐴌 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴁𐴟𐴥𐴃𐴢!“ 𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢, 𐴀𐴞𐴥𐴃𐴝𐴌𐴝 𐴋𐴡𐴦𐴌𐴠 𐴒𐴟𐴎𐴡𐴌𐴝𐴕 𐴔𐴝𐴙𐴅𐴧𐴞𐴥𐴓𐴢.

²⁷𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴇𐴞𐴥𐴔𐴧𐴡𐴃𐴢 𐴒𐴡𐴌𐴡𐴤! 𐴀𐴞𐴁𐴝𐴤 𐴀𐴝𐴀𐴛; 𐴕𐴡 𐴋𐴡𐴦𐴌𐴝𐴘𐴧𐴡𐴥.“

²⁸𐴎𐴟𐴖𐴝𐴁𐴠 𐴉𐴞𐴃𐴡𐴌𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴎𐴡𐴊𐴞 𐴃𐴟𐴀𐴛 𐴊𐴠 𐴀𐴡𐴥𐴘𐴓𐴠, 𐴀𐴝𐴣𐴀𐴌𐴠𐴥 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴃𐴟𐴣𐴀𐴝𐴥𐴣𐴌 𐴇𐴠𐴥𐴍𐴠 𐴀𐴝𐴘𐴃𐴡𐴤 𐴇𐴡𐴥𐴑𐴟𐴔 𐴊𐴡𐴥.“

²⁹𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴝𐴘.“𐴇𐴠𐴥𐴃𐴟𐴕𐴡𐴃𐴢 𐴉𐴞𐴃𐴡𐴌 𐴕𐴡𐴦𐴃𐴧𐴟 𐴓𐴝𐴔𐴞, 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴀𐴞𐴏𐴝𐴤𐴌 𐴇𐴞𐴥𐴑𐴧𐴝 𐴎𐴝𐴦𐴃𐴢 𐴊𐴡𐴙𐴅𐴧𐴠.³⁰𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴃𐴠𐴎𐴢 𐴁𐴡𐴘𐴧𐴝𐴌 𐴊𐴠𐴙𐴑𐴧𐴠𐴥 𐴀𐴞𐴥𐴁𐴝 𐴋𐴡𐴦𐴌𐴝𐴘𐴒𐴞𐴘𐴡𐴥𐴘, 𐴀𐴝𐴦𐴌 𐴋𐴟𐴉𐴞𐴥𐴎𐴝𐴌𐴒𐴡𐴘 𐴌𐴝𐴥𐴌 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴣𐴀𐴌𐴠𐴥 𐴁𐴝𐴏𐴡!“

³¹𐴀𐴞𐴏𐴝𐴤𐴘𐴠 𐴃𐴡𐴌𐴝𐴃𐴡𐴌𐴞 𐴕𐴞𐴎𐴡𐴌 𐴀𐴝𐴥𐴃𐴢 𐴁𐴝𐴌𐴝𐴤𐴘 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴉𐴠𐴓𐴝𐴘 𐴈𐴡𐴀𐴌 𐴊𐴠, ”𐴀𐴡𐴥 𐴈𐴡𐴔 𐴁𐴞𐴐𐴧𐴝𐴥𐴐𐴢 𐴀𐴡𐴓𐴝, 𐴐𐴡𐴥𐴀𐴑 𐴑𐴞𐴘𐴝𐴥 𐴒𐴡𐴙𐴅𐴧𐴡𐴥𐴏؟“

³²𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴕𐴡𐴦𐴃𐴢 𐴀𐴟𐴙𐴄𐴧𐴠𐴥𐴒𐴝𐴘, 𐴁𐴡𐴘𐴧𐴝𐴌 𐴃𐴝𐴥𐴔𐴝𐴘𐴒𐴞𐴘𐴡𐴘.³³𐴀𐴝𐴦𐴌 𐴎𐴠𐴃𐴝𐴌𐴝𐴤 𐴕𐴡𐴦𐴌 𐴖𐴡𐴌𐴠 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴠𐴀𐴕 𐴈𐴡𐴀𐴘𐴢 𐴏𐴡𐴥𐴘𐴊𐴝 𐴒𐴡𐴙𐴅𐴧𐴠𐴥, ”𐴁𐴠𐴐𐴡𐴥𐴑, 𐴃𐴟𐴀𐴛 𐴀𐴡𐴥𐴘𐴓𐴝𐴊𐴠 𐴀𐴝𐴓𐴧𐴝𐴌 𐴉𐴟𐴖𐴝.“

𐴒𐴠𐴕𐴠𐴏𐴝𐴥𐴌𐴠𐴃𐴡𐴃𐴢 𐴁𐴞𐴘𐴝𐴌𐴝𐴙𐴔𐴧𐴝 𐴒𐴡𐴔 𐴒𐴡𐴙𐴅𐴧𐴠𐴥

³⁴𐴀𐴞𐴥𐴃𐴝𐴌𐴝 𐴋𐴞𐴀 𐴉𐴝𐴌𐴝𐴤𐴘, 𐴒𐴠𐴕𐴠𐴏𐴝𐴥𐴌𐴠𐴃𐴢 𐴀𐴠𐴓𐴝𐴑𐴝𐴃𐴢 𐴉𐴡𐴀𐴣𐴙𐴐𐴧𐴠.³⁵𐴀𐴝𐴦𐴌 𐴇𐴠𐴥 𐴎𐴝𐴒𐴝𐴌 𐴔𐴝𐴙𐴕𐴐𐴠𐴥 𐴀𐴞𐴏𐴝𐴤𐴌𐴠 𐴏𐴞𐴕𐴧𐴠𐴥 𐴌𐴝𐴥𐴌, 𐴀𐴞𐴥𐴃𐴝𐴌𐴝 𐴏𐴝𐴘𐴌𐴡𐴥 𐴋𐴝𐴑𐴡𐴌 𐴀𐴠𐴓𐴝𐴑𐴝𐴌 𐴀𐴝𐴒𐴝𐴒𐴟𐴌𐴝𐴃𐴢 𐴈𐴡𐴥𐴁𐴡𐴌 𐴉𐴡𐴀𐴣𐴏𐴝𐴘, 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴢 𐴁𐴠𐴒𐴧𐴟𐴥𐴕𐴡𐴌𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤;³⁶𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠 𐴊𐴠, 𐴁𐴞𐴘𐴝𐴌𐴝𐴙𐴔𐴧𐴝 𐴒𐴟𐴥𐴕𐴡𐴌𐴠 𐴏𐴞𐴌𐴞𐴥𐴉𐴢 𐴀𐴞𐴥𐴁𐴝𐴌 𐴉𐴟𐴐𐴝𐴥𐴑𐴡𐴌 𐴇𐴝𐴣𐴌𐴝 𐴀𐴡𐴥𐴘𐴓𐴠 𐴏𐴟𐴥𐴘𐴃𐴡 𐴊𐴞𐴥 𐴁𐴡𐴓𐴧𐴝; 𐴀𐴝𐴦𐴌 𐴎𐴠𐴃𐴡𐴥 𐴎𐴡𐴕𐴠 𐴏𐴟𐴥𐴘𐴧𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘.

The Word for the World International

https://app.library.bible/content/87faca8b51c22590