1 𐴉𐴞𐴃𐴡𐴌 4 ਪੜ੍ਹੋ

1 𐴉𐴞𐴃𐴡𐴌4

𐴀𐴝𐴓𐴧𐴝𐴓𐴧𐴝 𐴎𐴞𐴕𐴊𐴞𐴒𐴞 𐴈𐴝𐴍𐴡𐴕

¹𐴇𐴠𐴥𐴃𐴡𐴓𐴧𐴝, 𐴎𐴠𐴃𐴧𐴡𐴥𐴃𐴢 𐴔𐴡𐴀𐴏𐴞𐴤𐴘𐴠 𐴅𐴞𐴏𐴞𐴥𐴔𐴡𐴃𐴢 𐴊𐴟𐴑 𐴉𐴝𐴘𐴧𐴠𐴥, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌𐴠𐴥 𐴘𐴡𐴥 𐴀𐴠𐴑𐴞𐴤 𐴕𐴞𐴘𐴡𐴃𐴠 𐴔𐴡𐴎𐴁𐴟𐴃𐴢 𐴒𐴡𐴌𐴡𐴤; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴅𐴞𐴏𐴞𐴥𐴔𐴡𐴃𐴢 𐴊𐴟𐴑 𐴉𐴝𐴘𐴧𐴠𐴥 𐴘𐴡𐴥𐴒𐴧𐴗𐴝𐴘𐴠 𐴒𐴟𐴕𐴝𐴤𐴌 𐴀𐴝𐴊𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴠,²𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴁𐴝𐴑𐴞 𐴎𐴞𐴕𐴊𐴞𐴒𐴞 𐴀𐴞𐴕𐴏𐴝𐴥𐴕𐴞 𐴈𐴡𐴥𐴌𐴝𐴉𐴢 𐴔𐴡𐴕𐴐𐴝𐴥𐴘𐴠 𐴀𐴝𐴌 𐴕𐴡 𐴈𐴝𐴍𐴝, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥𐴘𐴠 𐴁𐴠 𐴈𐴝𐴍𐴝.³𐴒𐴞𐴦𐴘𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢 𐴃𐴟𐴣𐴀𐴝𐴥𐴌𐴝 𐴀𐴟𐴀𐴙𐴕 𐴒𐴡𐴌𐴝𐴥𐴃𐴢 𐴑𐴝𐴉𐴞𐴥 𐴄𐴝𐴙𐴔 𐴈𐴝𐴍𐴝𐴘𐴉𐴠𐴓𐴝𐴘𐴧𐴡 𐴎𐴞𐴀𐴕 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴒𐴡𐴙𐴃𐴧𐴠𐴤 𐴉𐴡𐴏𐴡𐴥𐴕 𐴒𐴡𐴌𐴠𐴥; 𐴃𐴟𐴣𐴀𐴝𐴥𐴌𐴝 𐴀𐴞𐴀𐴕𐴡𐴃𐴢 𐴁𐴠 𐴎𐴞𐴕𐴊𐴞𐴒𐴞 𐴈𐴝𐴍𐴝𐴀𐴘𐴓𐴝: 𐴁𐴡𐴊𐴔𐴝𐴐𐴞, 𐴑𐴟𐴑𐴞𐴥𐴘𐴝𐴓𐴢, 𐴕𐴞𐴐𐴝𐴥𐴁𐴝𐴎𐴞, 𐴀𐴝𐴋𐴧𐴝𐴁𐴝𐴎𐴞, 𐴕𐴞𐴐𐴝𐴥𐴌 𐴔𐴠𐴓𐴝-𐴐𐴡𐴥𐴁𐴝, 𐴀𐴠𐴊𐴧𐴠 𐴒𐴞𐴥𐴕𐴝𐴘𐴞 𐴔𐴟𐴃𐴧𐴞 𐴉𐴟𐴣𐴎𐴝.⁴𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴇𐴠𐴥 𐴁𐴞𐴐𐴞𐴤 𐴀𐴝𐴘𐴝𐴐𐴞-𐴑𐴟𐴥𐴐𐴞𐴃𐴢 𐴐𐴝𐴥𐴔𐴞𐴓𐴢 𐴕𐴝𐴥𐴘 𐴊𐴠 𐴊𐴠𐴑𐴞𐴥 𐴀𐴞𐴥𐴃𐴝𐴌𐴝 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴦𐴁𐴟𐴃𐴠 𐴁𐴟𐴌𐴝-𐴀𐴝𐴥𐴌𐴝 𐴈𐴡𐴀.⁵𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴃𐴧𐴟 𐴀𐴟𐴁𐴝𐴤𐴌 𐴇𐴝𐴣𐴏𐴠 𐴀𐴞𐴥𐴏𐴝𐴉𐴢 𐴊𐴞𐴥𐴘𐴝 𐴉𐴡𐴌𐴞𐴁𐴡𐴥 𐴎𐴞𐴁𐴝𐴤 𐴎𐴞𐴕𐴊𐴝𐴌 𐴀𐴠𐴊𐴧𐴠 𐴔𐴡𐴌𐴝𐴌 𐴁𐴞𐴏𐴝𐴌 𐴒𐴡𐴌𐴞𐴥 𐴁𐴡𐴓𐴧𐴝 𐴃𐴡𐴘𐴧𐴝𐴌.⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴟𐴥𐴊𐴧𐴗𐴝 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴀𐴠𐴃𐴡𐴓𐴧𐴝𐴤 𐴀𐴠𐴥𐴕𐴝 𐴒𐴡𐴌𐴝𐴥 𐴒𐴞𐴥𐴘𐴠, 𐴎𐴠𐴀𐴕𐴠 𐴅𐴞𐴏𐴞𐴥𐴔𐴞 𐴇𐴝𐴥𐴓𐴡𐴃𐴠 𐴀𐴞𐴥𐴃𐴝𐴌𐴝𐴌 𐴁𐴞𐴏𐴝𐴌 𐴀𐴞𐴕𐴏𐴝𐴥𐴕𐴡𐴌 𐴋𐴡𐴥𐴙𐴓𐴧𐴝 𐴒𐴡𐴌𐴝𐴥 𐴎𐴝, 𐴔𐴡𐴕𐴃𐴡𐴌 𐴌𐴟𐴀𐴌 𐴇𐴝𐴥𐴓𐴡𐴃𐴠 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴋𐴡𐴥𐴙𐴓𐴧𐴝 𐴎𐴞𐴕𐴊𐴝 𐴃𐴝𐴥𐴑𐴠.

⁷𐴃𐴝𐴔𐴝𐴥𐴔 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴡𐴌 𐴇𐴡𐴥𐴃𐴡𐴔 𐴋𐴝𐴥𐴑𐴠 𐴀𐴝𐴀𐴘𐴒𐴞𐴘𐴡𐴘; 𐴇𐴠𐴥𐴃𐴡𐴓𐴧𐴝, 𐴊𐴟𐴖𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴑𐴡 𐴀𐴠𐴊𐴧𐴠 𐴀𐴟𐴥𐴣𐴐𐴡𐴃𐴢 𐴃𐴝𐴥𐴑𐴡.⁸𐴀𐴠𐴁𐴧𐴠 𐴎𐴡𐴌𐴟𐴌𐴞 𐴀𐴡𐴥𐴙𐴓𐴊𐴠, 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴅𐴡𐴏𐴁𐴝𐴌 𐴏𐴝𐴥𐴀𐴣𐴃𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴟𐴇𐴝𐴥𐴁𐴧𐴡𐴃𐴠 𐴁𐴡𐴀𐴗𐴃𐴢 𐴒𐴟𐴕𐴝𐴤 𐴀𐴡𐴥𐴑𐴧𐴡𐴓𐴢 𐴎𐴝𐴥𐴉𐴝𐴘 𐴌𐴝𐴑𐴠𐴥.⁹𐴕𐴡 𐴔𐴡𐴕𐴔𐴡𐴕𐴝𐴘 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴠𐴀𐴔𐴝𐴕𐴊𐴝𐴌𐴞 𐴒𐴡𐴌𐴡𐴤.¹⁰𐴎𐴠𐴦 𐴎𐴠𐴕𐴊𐴞𐴓𐴧𐴝 𐴕𐴞𐴘𐴝𐴔𐴡𐴃𐴢 𐴉𐴝𐴘𐴧𐴡𐴥, 𐴀𐴝𐴓𐴧𐴝𐴌 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴌𐴝𐴇𐴝𐴥𐴔𐴡𐴃𐴡𐴌 𐴁𐴝𐴥𐴓𐴝 𐴔𐴝𐴎𐴞𐴥 𐴀𐴞𐴥𐴏𐴝𐴉𐴠 𐴇𐴞𐴥𐴀𐴕 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴡𐴤.¹¹𐴎𐴠𐴦 𐴑𐴞𐴘𐴠𐴥 𐴃𐴡𐴁𐴡𐴓𐴞𐴑 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴠 𐴃𐴡𐴁𐴡𐴓𐴞𐴑 𐴒𐴡𐴌𐴡𐴥𐴗𐴑; 𐴎𐴠𐴦 𐴑𐴞𐴘𐴠𐴥 𐴇𐴠𐴥𐴊𐴔𐴡𐴃𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴓𐴧𐴝𐴘𐴠 𐴊𐴠𐴦 𐴊𐴠 𐴃𐴡𐴖𐴉𐴞𐴥𐴑𐴠 𐴁𐴠 𐴇𐴠𐴥𐴊𐴔𐴡𐴃𐴢 𐴒𐴡𐴌𐴡𐴥𐴗𐴑, 𐴎𐴠𐴀𐴕𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴀𐴡𐴥. 𐴃𐴝𐴦𐴌𐴞𐴉𐴢 𐴀𐴠𐴊𐴧𐴠 𐴌𐴝𐴦𐴏𐴃𐴌𐴞 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴇𐴝𐴥𐴔𐴞𐴐𐴝 𐴀𐴞𐴥𐴁𐴝𐴌. 𐴀𐴝𐴦𐴔𐴞𐴕.

𐴀𐴞𐴏𐴝𐴤𐴘𐴞 𐴊𐴠 𐴇𐴠𐴥𐴃𐴡𐴓𐴧𐴝 𐴊𐴟𐴑 𐴉𐴡𐴦𐴕

¹²𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴎𐴠 𐴀𐴡𐴦𐴘𐴕𐴞 𐴊𐴟𐴑 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤 𐴎𐴞𐴀𐴕 𐴀𐴝𐴘𐴧𐴠𐴤 𐴊𐴠 𐴀𐴡𐴥𐴙𐴓𐴊𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴕𐴃𐴝𐴥𐴕 𐴒𐴡𐴌𐴞𐴥 𐴁𐴡𐴓𐴧𐴝, 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴡𐴏𐴞𐴕 𐴑𐴠𐴏𐴧𐴟𐴥 𐴀𐴡𐴥𐴌 𐴉𐴝𐴥𐴚𐴒𐴡𐴌𐴞 𐴃𐴝𐴦𐴅𐴟𐴂𐴢 𐴕𐴡 𐴀𐴡𐴥𐴘𐴧𐴡,¹³𐴁𐴡𐴥𐴓𐴑𐴠 𐴎𐴠𐴃𐴡𐴥 𐴃𐴟𐴣𐴀𐴝𐴥𐴌𐴝 𐴔𐴡𐴀𐴏𐴞𐴤𐴌 𐴊𐴟𐴑 𐴀𐴡𐴥𐴑𐴧𐴡𐴓𐴡𐴃𐴢 𐴁𐴝𐴥𐴒𐴞 𐴀𐴡𐴥𐴌 𐴇𐴠𐴥𐴃𐴡 𐴑𐴟𐴥𐴐𐴞 𐴀𐴡𐴥, 𐴎𐴠𐴀𐴕𐴠 𐴀𐴞𐴥𐴁𐴝𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡 𐴊𐴠 𐴀𐴡𐴑𐴃𐴡𐴥𐴃𐴢 𐴀𐴡𐴥 𐴃𐴟𐴣𐴀𐴝𐴥𐴌𐴝 𐴑𐴟𐴥𐴐𐴞𐴌 𐴖𐴡𐴌𐴠 𐴑𐴟𐴥𐴐𐴞 𐴀𐴡𐴥.¹⁴𐴎𐴡𐴊𐴞 𐴔𐴡𐴀𐴏𐴞𐴤𐴌 𐴕𐴝𐴔𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴁𐴠𐴀𐴞𐴎𐴧𐴡𐴃𐴞 𐴀𐴡𐴥, 𐴃𐴟𐴣𐴀𐴝𐴥𐴌𐴝 𐴔𐴟𐴁𐴝𐴌𐴠𐴑, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴈𐴞𐴥𐴔𐴝 𐴀𐴡𐴓𐴝 𐴌𐴟𐴀, 𐴘𐴝𐴥𐴕𐴞 𐴀𐴝𐴓𐴧𐴝𐴌 𐴌𐴟𐴀 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴏𐴠𐴤.¹⁵𐴊𐴟𐴑 𐴉𐴝𐴘𐴓𐴠 𐴘𐴡, 𐴏𐴝𐴘𐴧𐴡𐴥 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴠 𐴎𐴠𐴕 𐴑𐴟𐴥𐴕𐴞, 𐴏𐴟𐴌𐴞, 𐴁𐴟𐴌𐴝𐴘-𐴒𐴡𐴌𐴡𐴤𐴘𐴝 𐴀𐴞𐴥𐴏𐴝𐴉𐴠 𐴘𐴝𐴥 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴔𐴝𐴦𐴔𐴠𐴓𐴝𐴃𐴢 𐴕𐴝𐴑 𐴒𐴡𐴥𐴓𐴝𐴘𐴊𐴞 𐴊𐴟𐴑 𐴕𐴡 𐴉𐴝𐴦,¹⁶𐴓𐴠𐴑𐴞𐴕 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴞𐴏𐴝𐴤𐴘𐴞 𐴊𐴠 𐴇𐴠𐴥𐴃𐴡𐴓𐴧𐴝 𐴊𐴟𐴑 𐴉𐴝𐴦, 𐴘𐴡𐴥𐴒𐴧𐴗𐴝𐴘𐴠 𐴕𐴡 𐴐𐴡𐴥𐴌𐴔𐴡𐴑, 𐴁𐴡𐴥𐴓𐴑𐴠 𐴇𐴠𐴥 𐴉𐴡𐴌𐴞𐴏𐴡𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴡𐴥𐴗𐴑.¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴞𐴏𐴝𐴌𐴡𐴌 𐴀𐴡𐴑𐴃𐴡𐴥 𐴃𐴡 𐴀𐴝𐴀𐴘𐴒𐴞𐴘𐴡𐴘, 𐴀𐴝𐴦𐴌 𐴇𐴠𐴥 𐴁𐴞𐴏𐴝𐴌 𐴀𐴝𐴓𐴧𐴝𐴌 𐴉𐴡𐴌𐴞𐴁𐴝𐴌𐴡𐴃𐴧𐴟 𐴓𐴡𐴥𐴃𐴞 𐴁𐴠 𐴐𐴟𐴥𐴌𐴟 𐴀𐴡𐴥𐴌. 𐴀𐴝𐴣𐴀𐴌𐴝𐴃𐴧𐴟 𐴓𐴡𐴥𐴃𐴞 𐴐𐴟𐴥𐴌𐴟 𐴀𐴡𐴥𐴌 𐴊𐴠 𐴀𐴡𐴥𐴘𐴓𐴠, 𐴀𐴟𐴘𐴃𐴝𐴌𐴝𐴤𐴌 𐴇𐴝𐴥𐴓𐴡𐴃𐴢 𐴑𐴠𐴀𐴕 𐴀𐴡𐴥𐴘𐴁𐴡 𐴉𐴝𐴥𐴣𐴓𐴧𐴝𐴌 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴑𐴟𐴥𐴐𐴈𐴡𐴥𐴁𐴡𐴌𐴡𐴌𐴠 𐴀𐴝𐴔𐴡𐴥𐴓𐴢 𐴕𐴡 𐴒𐴡𐴌𐴠𐴥؟¹⁸𐴀𐴝𐴦𐴌,”𐴉𐴡𐴌𐴇𐴠𐴥𐴏𐴒𐴝𐴌𐴡𐴃𐴧𐴟 𐴀𐴟𐴥𐴊𐴧𐴗𐴝 𐴕𐴠𐴅𐴝𐴃𐴢 𐴉𐴝𐴘𐴃𐴠 𐴔𐴡𐴐𐴑𐴞𐴓𐴢 𐴊𐴠 𐴀𐴡𐴥𐴘𐴓𐴠,𐴁𐴠𐴊𐴞𐴕𐴞𐴌 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌𐴡𐴌 𐴇𐴝𐴥𐴓𐴡𐴃𐴢 𐴑𐴠𐴀𐴕 𐴀𐴡𐴥𐴘𐴁𐴡 𐴉𐴝𐴥𐴣𐴓𐴧𐴝𐴌؟“

¹⁹𐴇𐴠𐴥𐴃𐴡𐴓𐴧𐴝, 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴊𐴟𐴑 𐴉𐴝𐴦𐴌 𐴊𐴠 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝 𐴒𐴡𐴔 𐴈𐴝𐴔 𐴒𐴡𐴌𐴞𐴥-𐴒𐴡𐴌𐴞𐴥 𐴕𐴞𐴎𐴡𐴌 𐴎𐴝𐴕𐴡𐴌𐴠 𐴁𐴞𐴐𐴧𐴝𐴥𐴐𐴊𐴝𐴌 𐴉𐴡𐴘𐴊𐴝𐴒𐴡𐴌𐴡𐴤𐴘𐴝𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴡𐴗𐴑.

The Word for the World International

https://app.library.bible/content/87faca8b51c22590