Read 1 𐴉𐴞𐴃𐴡𐴌 3

1 𐴉𐴞𐴃𐴡𐴌3

𐴁𐴡𐴖𐴢 𐴀𐴠𐴊𐴧𐴠 𐴇𐴡𐴥𐴐𐴡𐴔

¹𐴁𐴡𐴖𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴕𐴞𐴎𐴡𐴌𐴠𐴥 𐴕𐴞𐴎𐴡𐴌-𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴡, 𐴎𐴠𐴀𐴕𐴠 𐴎𐴡𐴊𐴞 𐴀𐴞𐴥𐴃𐴝𐴌𐴝 𐴁𐴝𐴦𐴎𐴢 𐴑𐴞𐴘𐴠𐴥 𐴑𐴝𐴓𐴝𐴔 𐴕𐴡 𐴔𐴝𐴕𐴞𐴓𐴠𐴥 𐴘𐴡, 𐴀𐴞𐴥𐴃𐴝𐴌𐴝𐴌 𐴁𐴡𐴖𐴝𐴥𐴙𐴕 𐴊𐴠 𐴎𐴠𐴕 𐴇𐴡𐴕𐴡𐴤 𐴈𐴡𐴃𐴝𐴤 𐴏𐴝𐴥𐴌𐴝 𐴕𐴞𐴎𐴡𐴌 𐴏𐴡𐴓𐴝𐴏𐴡𐴓𐴠 𐴀𐴞𐴥𐴃𐴝𐴌𐴝𐴌𐴠 𐴁𐴡𐴍𐴝𐴘 𐴀𐴝𐴕𐴞𐴤 𐴉𐴝𐴌𐴠,²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴏𐴝𐴘𐴁𐴡𐴥 𐴊𐴠 𐴀𐴡𐴥𐴙𐴓𐴊𐴠, 𐴃𐴟𐴣𐴀𐴝𐴥𐴌𐴝𐴌 𐴂𐴝𐴑 𐴀𐴠𐴊𐴧𐴠 𐴀𐴞𐴎𐴧𐴡𐴙𐴃𐴧𐴝 𐴏𐴡𐴓𐴝𐴏𐴡𐴓𐴢.³𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌𐴠𐴥 𐴁𐴝𐴀𐴃𐴧𐴟 𐴇𐴝𐴥𐴣𐴎𐴝𐴌 𐴎𐴡𐴌𐴟𐴌 𐴕𐴝𐴥𐴘, 𐴏𐴟𐴓𐴡𐴌 𐴁𐴞𐴕𐴞𐴏𐴢 𐴁𐴝𐴥𐴚𐴒𐴞, 𐴐𐴟𐴥𐴕𐴝 𐴓𐴡𐴥𐴘 𐴘𐴝𐴥 𐴁𐴝𐴌𐴞𐴥𐴑 𐴇𐴡𐴦𐴌𐴏𐴟𐴖𐴡𐴌 𐴉𐴞𐴕𐴊𐴞𐴥;⁴𐴁𐴡𐴥𐴓𐴑𐴠 𐴎𐴞𐴘𐴝𐴥𐴕 𐴎𐴡𐴌𐴟𐴌 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴕𐴞𐴎𐴡𐴌 𐴊𐴞𐴓𐴡𐴌𐴠 𐴇𐴝𐴥𐴣𐴎𐴡𐴕, 𐴌𐴟𐴀𐴌 𐴉𐴝𐴥𐴕𐴝 𐴕𐴡 𐴀𐴡𐴥 𐴊𐴠 𐴕𐴡𐴌𐴡𐴔 𐴀𐴠𐴊𐴧𐴠 𐴐𐴞𐴥𐴊𐴝 𐴓𐴡𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴇𐴞𐴥𐴘𐴝𐴕 𐴁𐴠 𐴁𐴞𐴐𐴞𐴤 𐴑𐴞𐴔𐴡𐴃𐴞.⁵𐴀𐴝𐴒𐴡𐴌 𐴎𐴡𐴁𐴝𐴕𐴝𐴃𐴢 𐴀𐴝𐴓𐴧𐴝𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴌𐴝𐴑𐴞𐴥𐴃𐴡 𐴊𐴠 𐴂𐴝𐴑 𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴕𐴞𐴎𐴡𐴌𐴠𐴥 𐴇𐴠𐴥𐴕𐴊𐴞𐴓𐴧𐴝 𐴇𐴝𐴥𐴣𐴎𐴝𐴘𐴃𐴡 𐴊𐴠, 𐴕𐴞𐴎𐴡𐴌𐴠𐴥 𐴕𐴞𐴎𐴡𐴌-𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞.⁶𐴎𐴠𐴕𐴊𐴞𐴓𐴧𐴝 𐴕𐴞𐴑𐴞 𐴏𐴝𐴥𐴌𐴝, 𐴇𐴞𐴥𐴁𐴝𐴘𐴠 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴔𐴝𐴓𐴞𐴑 𐴋𐴝𐴑𐴞 𐴘𐴡𐴥𐴒𐴧𐴗𐴝𐴌 𐴇𐴡𐴥𐴑𐴟𐴔𐴡𐴌 𐴃𐴡𐴓𐴠 𐴃𐴝𐴥𐴑𐴞𐴃𐴡; 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴏𐴡𐴥𐴘𐴧𐴞 𐴒𐴝𐴥𐴕 𐴒𐴡𐴌𐴡𐴤 𐴀𐴝𐴦𐴌 𐴇𐴡𐴕𐴡𐴤 𐴋𐴡𐴦𐴌𐴡𐴌𐴠 𐴉𐴝𐴄𐴧𐴝 𐴕𐴡 𐴊𐴡, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴃𐴡 𐴇𐴞𐴥𐴁𐴝𐴌 𐴎𐴞𐴥𐴘𐴝𐴙𐴕 𐴀𐴡𐴥𐴘𐴧𐴡.

⁷𐴇𐴡𐴥𐴐𐴡𐴔 𐴀𐴡𐴥𐴑𐴧𐴡𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴁𐴡𐴖𐴝𐴥𐴙𐴕 𐴊𐴡𐴌 𐴉𐴟𐴥𐴖𐴝𐴣𐴃𐴞 𐴁𐴟𐴊𐴧𐴞𐴥𐴌 𐴏𐴝𐴥𐴀𐴣𐴃𐴠 𐴎𐴞𐴕𐴊𐴞𐴒𐴞 𐴈𐴝𐴍𐴡, 𐴀𐴞𐴥𐴃𐴝𐴌𐴝𐴌𐴠 𐴑𐴡𐴔𐴎𐴟𐴌 𐴏𐴝𐴥𐴀𐴣𐴃𐴞 𐴊𐴠 𐴎𐴝𐴕𐴞 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴋𐴡𐴥𐴙𐴓𐴧𐴝 𐴌𐴝𐴇𐴝𐴥𐴔𐴡𐴃𐴞 𐴎𐴞𐴕𐴊𐴞𐴒𐴞𐴌 𐴔𐴞𐴌𐴝𐴏𐴊𐴝𐴥𐴌 𐴊𐴠 𐴁𐴟𐴎𐴞𐴥 𐴀𐴞𐴥𐴃𐴝𐴌𐴝𐴌𐴠 𐴀𐴞𐴎𐴧𐴡𐴃𐴢 𐴊𐴞𐴘𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴊𐴟𐴖𐴝𐴃𐴢 𐴁𐴝𐴎𐴝𐴥 𐴉𐴡𐴘𐴊𐴝 𐴕𐴡.

𐴉𐴡𐴌𐴇𐴠𐴥𐴏𐴒𐴝𐴌𐴞𐴓𐴧𐴝 𐴊𐴟𐴑 𐴉𐴡𐴦𐴕

⁸𐴈𐴡𐴘𐴃𐴡𐴤 𐴏𐴝𐴙𐴌 𐴊𐴠, 𐴁𐴠𐴒𐴧𐴟𐴥𐴕 𐴀𐴠𐴑 𐴔𐴡𐴕 𐴀𐴡𐴓𐴝 𐴀𐴡𐴥, 𐴉𐴠𐴄𐴉𐴟𐴌𐴝𐴕𐴞 𐴌𐴝𐴑𐴡𐴥, 𐴁𐴝𐴥𐴘𐴡𐴌 𐴋𐴡𐴥𐴙𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤, 𐴌𐴝𐴇𐴝𐴥𐴔 𐴀𐴡𐴓𐴝 𐴀𐴡𐴥, 𐴕𐴡𐴌𐴡𐴔 𐴀𐴡𐴥;⁹𐴁𐴟𐴌𐴝𐴙𐴌 𐴁𐴡𐴊𐴡𐴓𐴢 𐴁𐴟𐴌𐴝𐴘 𐴕𐴡 𐴒𐴡𐴙𐴅𐴧𐴡𐴥, 𐴀𐴝𐴦𐴌 𐴒𐴝𐴙𐴓𐴡𐴌 𐴁𐴡𐴊𐴡𐴓𐴢 𐴒𐴝𐴙𐴓𐴢 𐴕𐴡 𐴊𐴞𐴘𐴡𐴥; 𐴘𐴝𐴥𐴌𐴁𐴡𐴊𐴡𐴓𐴢 𐴀𐴞𐴥𐴃𐴝𐴌𐴝𐴓𐴧𐴝 𐴁𐴡𐴌𐴈𐴡𐴃𐴢 𐴔𐴝𐴙𐴒𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴇𐴠𐴥 𐴔𐴡𐴑𐴏𐴡𐴥𐴃𐴠 𐴀𐴠𐴥𐴕𐴝 𐴋𐴝𐴈𐴝 𐴒𐴞𐴘𐴠𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴁𐴡𐴌𐴈𐴡𐴃𐴢 𐴔𐴞𐴌𐴝𐴏𐴢 𐴉𐴡𐴦.¹⁰𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,”𐴎𐴝𐴃𐴧𐴟 𐴎𐴞𐴕𐴊𐴞𐴒𐴞𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴓𐴝𐴒𐴠,𐴀𐴠𐴊𐴧𐴠 𐴔𐴡𐴕𐴠𐴈𐴡𐴀 𐴁𐴝𐴥𐴓𐴝 𐴊𐴞𐴕 𐴀𐴡𐴥𐴑𐴧𐴡𐴓𐴢 𐴊𐴠𐴑𐴞𐴥𐴃𐴠,𐴘𐴡𐴥𐴒𐴧𐴗𐴝𐴃𐴧𐴟 𐴕𐴞𐴎𐴡𐴌 𐴎𐴞𐴌𐴡𐴌𐴠 𐴈𐴡𐴥𐴌𐴝𐴉𐴞 𐴃𐴧𐴟𐴀𐴝𐴦𐴌 𐴕𐴞𐴎𐴡𐴌 𐴀𐴟𐴣𐴄𐴡𐴌𐴠 𐴔𐴞𐴏𐴝𐴥 𐴈𐴡𐴃𐴝𐴤 𐴈𐴡𐴖𐴝𐴤𐴃𐴧𐴟 𐴏𐴡𐴥𐴣𐴓𐴝𐴌 𐴎𐴡𐴌𐴟𐴌.¹¹𐴘𐴡𐴥𐴒𐴧𐴗𐴝𐴃𐴧𐴟 𐴁𐴟𐴌𐴝𐴙𐴃𐴧𐴟 𐴉𐴞𐴥𐴌𐴞 𐴀𐴝𐴀𐴘𐴢 𐴒𐴡𐴔 𐴔𐴟𐴥𐴕 𐴒𐴡𐴌𐴝𐴥𐴌 𐴎𐴡𐴌𐴟𐴌;𐴘𐴡𐴥𐴒𐴧𐴗𐴝𐴃𐴧𐴟 𐴐𐴝𐴥𐴕𐴃𐴞𐴌 𐴑𐴟𐴐𐴞𐴥𐴐𐴢 𐴀𐴠𐴊𐴧𐴠 𐴉𐴞𐴏𐴝𐴥 𐴊𐴡𐴥𐴌𐴝𐴌 𐴎𐴡𐴌𐴟𐴌.¹²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴁𐴟𐴊𐴡𐴌 𐴏𐴟𐴑 𐴃𐴡 𐴉𐴡𐴌𐴇𐴠𐴥𐴏𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠,𐴀𐴝𐴦𐴌 𐴀𐴞𐴥𐴁𐴝𐴌 𐴈𐴝𐴕𐴠 𐴀𐴞𐴥𐴃𐴝𐴌𐴝𐴌 𐴊𐴟𐴖𐴝 𐴉𐴟𐴥𐴕𐴠;𐴔𐴡𐴕𐴃𐴡𐴌 𐴔𐴝𐴁𐴟𐴊𐴢 𐴁𐴟𐴌𐴝𐴘-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴓𐴝𐴉𐴢.“

¹³𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴒𐴡𐴔 𐴔𐴟𐴥𐴕 𐴒𐴡𐴙𐴃𐴧𐴡𐴥 𐴅𐴡𐴏𐴁𐴝 𐴃𐴝𐴥𐴑𐴠, 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴥𐴃𐴞-𐴒𐴡𐴌𐴡𐴤𐴘𐴝 𐴇𐴡𐴕؟¹⁴𐴔𐴡𐴕𐴃𐴡𐴌 𐴎𐴡𐴊𐴞 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴖𐴝𐴏𐴃𐴠𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴊𐴟𐴑 𐴉𐴝𐴦 𐴉𐴡𐴌𐴠 𐴘𐴡𐴥, 𐴃𐴟𐴣𐴀𐴝𐴥𐴌𐴝 𐴔𐴟𐴁𐴝𐴌𐴠𐴑. 𐴀𐴞𐴥𐴃𐴝𐴌𐴝𐴌 𐴊𐴡𐴥𐴔𐴑𐴞𐴌𐴠 𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴀𐴝𐴦𐴌 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥,¹⁵𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴔𐴡𐴀𐴏𐴞𐴤𐴌𐴠 𐴔𐴝𐴓𐴞𐴑 𐴀𐴞𐴥𐴏𐴝𐴉𐴠 𐴂𐴝𐴑 𐴔𐴝𐴕𐴞𐴘𐴡𐴥. 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴝𐴏𐴠𐴤 𐴊𐴠 𐴀𐴝𐴐𐴝𐴤𐴌 𐴖𐴝𐴅𐴝𐴤 𐴃𐴝𐴊𐴝𐴌𐴡𐴃𐴢 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴢 𐴊𐴞 𐴁𐴡𐴓𐴧𐴝 𐴇𐴝𐴥𐴔𐴞𐴐𐴝 𐴃𐴡𐴘𐴧𐴝𐴌 𐴃𐴝𐴥𐴙𐴑𐴧𐴡, 𐴔𐴡𐴕𐴃𐴡𐴌 𐴊𐴞𐴃𐴠 𐴕𐴡𐴌𐴡𐴔𐴡𐴌 𐴏𐴝𐴥𐴀𐴣𐴃𐴠 𐴀𐴠𐴊𐴧𐴠 𐴀𐴞𐴎𐴧𐴡𐴃𐴠 𐴊𐴞𐴘𐴡,¹⁶𐴀𐴝𐴦𐴌 𐴊𐴞𐴓𐴢 𐴀𐴡𐴥 𐴏𐴝𐴥𐴉𐴢 𐴌𐴝𐴙𐴑𐴧𐴡, 𐴎𐴠𐴀𐴕𐴠 𐴎𐴠 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌 𐴁𐴡𐴊𐴕𐴝𐴔 𐴒𐴡𐴌𐴠𐴥 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴔𐴡𐴀𐴏𐴞𐴤𐴌 𐴀𐴟𐴔𐴧𐴡𐴃𐴢 𐴀𐴞𐴥𐴏𐴝𐴉𐴠 𐴀𐴝𐴏𐴠𐴤 𐴊𐴠 𐴁𐴝𐴥𐴓𐴝 𐴏𐴡𐴓𐴝𐴏𐴡𐴓𐴡𐴌𐴠 𐴒𐴝𐴙𐴓𐴢 𐴊𐴠, 𐴀𐴞𐴥𐴃𐴝𐴌𐴝 𐴐𐴡𐴥𐴌𐴔𐴞𐴕𐴊𐴝 𐴀𐴡𐴥.¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴡𐴥𐴌𐴝𐴉𐴢 𐴈𐴝𐴔 𐴒𐴡𐴌𐴞𐴥 𐴊𐴟𐴑 𐴉𐴝𐴦𐴌 𐴃𐴟𐴥𐴖𐴝𐴌𐴡, 𐴎𐴡𐴊𐴞 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴀𐴡𐴥𐴘𐴓𐴠 𐴒𐴡𐴔 𐴈𐴝𐴔 𐴒𐴡𐴌𐴞𐴥 𐴊𐴟𐴑 𐴉𐴝𐴦 𐴃𐴡 𐴁𐴠𐴀𐴃𐴡𐴌.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤 𐴘𐴡𐴥 𐴊𐴠 𐴒𐴟𐴕𐴝𐴤 𐴓𐴧𐴝 𐴀𐴠𐴑𐴁𐴝𐴌 𐴊𐴟𐴑 𐴉𐴝𐴀𐴙𐴓𐴢 𐴊𐴠 𐴀𐴝𐴏𐴠𐴤, 𐴘𐴝𐴥𐴕𐴞 𐴉𐴡𐴌𐴇𐴠𐴥𐴏𐴒𐴝𐴌𐴒𐴗𐴝𐴥𐴘𐴠 𐴈𐴡𐴥𐴌𐴝𐴉𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴡𐴓𐴧𐴝, 𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴓𐴡𐴘𐴎𐴝𐴘 𐴉𐴝𐴌𐴠. 𐴀𐴞𐴥𐴁𐴝𐴌𐴠 𐴅𐴞𐴏𐴞𐴥𐴔𐴠 𐴔𐴝𐴌𐴞𐴉𐴠𐴥𐴓𐴝 𐴒𐴞𐴥𐴘𐴠, 𐴔𐴡𐴕𐴃𐴡𐴌 𐴌𐴟𐴀𐴌 𐴇𐴝𐴥𐴓𐴡𐴃𐴡𐴃𐴢 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠,¹⁹𐴀𐴝𐴦𐴌 𐴇𐴠𐴥 𐴇𐴝𐴥𐴓𐴡𐴃𐴠 𐴀𐴞𐴥𐴁𐴝 𐴎𐴝𐴘 𐴁𐴡𐴕𐴊𐴞𐴃𐴢 𐴀𐴝𐴏𐴠𐴤 𐴊𐴠 𐴌𐴟𐴀 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴠𐴥,²⁰𐴎𐴠𐴃𐴝𐴌𐴝𐴤 𐴁𐴡𐴀𐴗𐴃𐴢 𐴀𐴝𐴒𐴠 𐴕𐴟𐴌 𐴎𐴡𐴁𐴝𐴕𐴝𐴃𐴢 𐴎𐴠𐴣𐴃𐴧𐴠𐴥 𐴑𐴞𐴐𐴄𐴞 𐴃𐴡𐴘𐴧𐴝𐴌 𐴀𐴡𐴥𐴌 𐴀𐴝𐴦𐴌 𐴀𐴝𐴓𐴧𐴝𐴘𐴠 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴀𐴠𐴕𐴃𐴠𐴎𐴝𐴌 𐴒𐴡𐴌𐴞𐴥 𐴃𐴝𐴥𐴙𐴑𐴧𐴞𐴓𐴢, 𐴇𐴠𐴥𐴣𐴃𐴧𐴠 𐴕𐴝𐴉𐴡𐴥𐴌𐴔𐴝𐴕 𐴀𐴝𐴐𐴧𐴞𐴥𐴓𐴢. 𐴇𐴠𐴥 𐴑𐴞𐴐𐴄𐴞 𐴒𐴝𐴥𐴕𐴡𐴃𐴢 𐴁𐴞𐴐𐴞𐴤 𐴈𐴡𐴔, 𐴘𐴝𐴥𐴕𐴞 𐴀𐴝𐴣𐴐𐴄𐴡 𐴎𐴡𐴕 𐴔𐴝𐴕𐴟𐴥𐴙𐴐𐴢 𐴁𐴠 𐴉𐴝𐴕𐴞𐴥𐴃𐴧𐴟 𐴁𐴝𐴙𐴐𐴧𐴞𐴥𐴓𐴢.²¹𐴇𐴠𐴥 𐴉𐴝𐴕𐴞𐴥 𐴀𐴡𐴥𐴙𐴓𐴊𐴠 𐴁𐴝𐴥𐴂𐴄𐴞𐴏𐴔𐴝𐴌 𐴀𐴠𐴑𐴧𐴝𐴥𐴕 𐴕𐴞𐴐𐴝𐴥𐴕, 𐴎𐴞𐴘𐴝𐴥𐴕𐴠 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝𐴌𐴠 𐴕𐴠𐴅𐴝𐴃𐴢 𐴉𐴝𐴁𐴝. 𐴁𐴝𐴥𐴂𐴄𐴞𐴏𐴔𐴝 𐴓𐴡𐴕 𐴒𐴝𐴦𐴌 𐴇𐴡𐴣𐴏𐴝𐴌𐴝 𐴊𐴟𐴌 𐴒𐴡𐴌𐴡𐴤𐴕 𐴕𐴡, 𐴁𐴡𐴥𐴓𐴑𐴠 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴏𐴝𐴥𐴉𐴢 𐴊𐴞𐴓𐴡𐴓𐴧𐴝 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴠𐴑𐴧𐴝𐴥𐴕 𐴀𐴝𐴌𐴡𐴏𐴢. 𐴇𐴞𐴥𐴘𐴝𐴕𐴠 𐴕𐴠𐴅𐴝𐴃𐴢 𐴉𐴝𐴁𐴝 𐴊𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴊𐴟𐴖𐴝𐴌𐴝,²²𐴎𐴞𐴁𐴝𐴤 𐴀𐴝𐴏𐴔𐴝𐴕𐴡𐴃𐴢 𐴎𐴝𐴘𐴒𐴡𐴥𐴘 𐴀𐴝𐴓𐴧𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴀𐴝𐴏𐴠𐴤, 𐴀𐴝𐴦𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠, 𐴑𐴠𐴥𐴔𐴡𐴃𐴝 𐴀𐴡𐴓𐴝 𐴀𐴡𐴥𐴑𐴧𐴡𐴓𐴠, 𐴀𐴠𐴊𐴧𐴠 𐴑𐴟𐴊𐴟𐴌𐴟𐴃𐴞 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴇𐴡𐴥𐴑𐴟𐴔𐴡𐴃𐴢 𐴔𐴝𐴕𐴠.

The Word for the World International

https://app.library.bible/content/87faca8b51c22590