LAMENTACIONES1
1Re' tinamit Jerusaleem q'e' ti' xukul ruum xk'ahnik chi rutkeel. Eh re' naq i reh xti nim wach, chikinaah i k'ihset chi tinamit, eh yu'naak xkahnik chi je' rukab' i ixoq kamnaq rub'ahiil, ruum xk'amarik reje pankowlaj kamanik i rutinamiit.2Xa suq chik inoq'ik rajlaal aq'ab', xantz'urik chik i riis inaq'wach. Eh re' taqe ink'axwik naq reh ma' jino'q chik i ye'wik rusuqkiil ruk'ux. Eh re' taqe i naah ramigo xjot'arik kuum, xi sutinik chi ixowan wach.3Re' taqe i aj Judá xi k'amarik reje pa ti' k'axik pankowlaj kamanik, pan tokoom tinamit, ar chik k'acharik inki a'n ponoq yu'naak, xa ma' kihilik ta chik. Eh ma' inki a'n ta chik eliik chikiwach inixowanik kiwach.4Eh xan tz'irik chik paam taqe i b'eeh inooj Sión ruum ma' awach ta chik ink'ulik chi ninq'ijinik. Eh re' taqe i ookb'al reh i tinamit xan tz'irik chik. Re' taqe i k'amal kib'eeh i aj tiij xasuq chik kioq'ik. Eh re' taqe i q'ahxoq, eh chu'nchel i aj Jerusaleem xati' chik kik'ux.5Re' inixowan wach xi elik korik re' chik i keh imb'anik i taaq'anik chinaah, ruum re' i QaJaaw Dios xtib'isanik ruk'ux ruum ma' k'isiin i mahk xub'an chuwach. Eh re' taqe i rak'uun rixq'uun xi k'amarik reje pan tokoom tinamit chikiwach inixowanik kiwach.6Eh xsahchik wach i ruholwochiil i tinamit Sión. Re' taqe i k'amal kib'eeh xak'ul chik kiooj xa je' chik kikab' i keej ma' nkireq ta kiwa'. Re' keh xama' xta chik kaansil noq xi elik naq chikiwach i aj ixowaal.7Re' taqe i aj Jerusaleem noq wilkeeb' panti' k'axik, kuum i aj ixowaal ma' awach ta xtoob'inik keh. Eh noq ti' wilkeeb' xk'ulik pankik'ux chi ma' xinimanik taj, xk'ulik pankik'ux kib'ehomal. Eh xk'ulik pankik'ux noq xchoparik kinaah kuum i aj ixowaal, eh xikaqse'ljiik kuum.8Re' taqe i aj Jerusaleem ma' k'isiin i mahk xkian, ruum i re' xi ehteesjik reje pan kiye'aab'. Eh re' naq taqe inye'wik kiloq'il, ma' x-ajawjik ta chik kiwach kuum, ruum pank'ixb'ilaal chik wilkeeb'. Eh xasuq chik kioq'ik, xan kikeb'aa' chik i kiwach.9Re' keh xruxlab'ej i kiso' i ruch'uwa'iil kiwach, eh ma' nkikapaaj taj chib'ih i naakik'ulum. Eh noq xkik'ul i ti' k'axik ma' awach ta xye'wik rusuqkiil kik'ux, je' naq chik wili i xkiq'or: QaJaaw Dios chawilow xkesaj i qajaawriik i aj ixowaal, inki taqe.10Re' taqe i aj ixowaal xkichop naah i kib'ehomal i aj Jerusaleem. Re' i tinamit xkilow noq yohb'aal wach i kijosq'iil i tokoom tinamit chupaam i santo laj ye'aab', re' i aq'orom i hat QaJaaw Dios chi ma' naa ta kokiik awuuk' ar.11Chu'nchel i rutinamiit xioq'ik, xak'ul chik kiooj chi rusik'ariik kiwa', reh chi ma' xikimik taj, xkiyeew i kib'ehomal chi riij, je' wili i xkiq'or: QaJaaw Dios chawilow i ti' k'axik inqak'ul, inki taqe.12Eh je' wili xkiq'or reh i kik'ik ar. ¿Mi ma' intib'ik taq ak'ux ruum i ti' k'axik k'ahchi' qak'ulum? ¿Mi wilik ink'ulwik reh i ti' wili? Re' hoj qeht'al noq re' i QaJaaw Dios xtaaq'anik cho reh i ti k'axik wili ruum xqop wach i rujosq'iil.13Eh je' q'aaq' xuqasaj cho pan taxaaj chi qanaah, xponik kochuwach taqe i qab'aqil. Je' xirob' i xuyeew panqab'eeh reh chi xesaj qajaawriik, eh xoj rukanaa' chi qutkeel chuk'ulariik i ti' k'axik rajlaal i q'iij.14Ruum chixiik'naah i qamahk, re' QaJaaw Dios xoj ruyeew panti' k'axik ahl laj ihq i xuyeew chi qanaah. Eh xama' xta chik qansil inqik'raaj xoj ruyeew pan kiq'ab' i ki-ixowanik qawach, xama' qakuy ta chik pan kiq'ab'.15Re' QaJaaw Dios xusach kiwach i qa soldado q'e' kow kiib'. Eh xuk'am taqe chaloq i tokoom tinamit chusachariik kiwach i qak'ijool. Eh xuyeew i ti' k'axik chikinaah i aj Judá je' rukab' noq inyeq'arik paam i uuva chupaam i yitz'b'al reh.16Re' i k'ahchi' qak'ulum wili qoh oq'ik ruum, ma' awach ta inye'wik rusuqkiil qak'ux, rukowiil qak'ux. Xsahchik kiwach i qak'uun qixq'uun, ruum re' taqe i ki-ixowanik qawach ma' xqakuy ta pan kiq'ab'.17Re' taqe i aj Sión xkisik' naq kitoob'jiik, xama' awach ta wo' xye'wik rusuqkiil kik'ux. Re' QaJaaw Dios xuyeew q'ab' chi re' taqe i riih rumaam i Jacob naa rixowjiik kiwach ruum i kika'jaah. Eh chi re' taqe i aj Jerusaleem naa rixowjiik kiwach.18Re' QaJaaw Dios rub'ehel i xub'an qeh, ruum re' hoj ma' xqanimaj taj i ruq'oral. Re' taq i hat tinamit chakoj taq rehtaal i ti' k'axik k'ahchi' qak'ulum, re' taqe i qak'ijolaaq, taqe i qaq'ahxoqaaq xi k'amarik reje pan tokoom tinamit.19Eh xqapahqaaj naq qatoob'jiik keh i kik'axwik qeh, ma' xkaaj taj. Re' taqe i k'amal b'eeh i aj tiij, taqe i nimaq wach kina'ojb'al xkuxik kikimiik panqatinamiit. Eh xak'ul naq chik kiooj chusik'ariik i kiwa' reh naq chi ma' naa ta kikimiik.20QaJaaw Dios chaketelaaj ti qawach ruuk' i ti' k'axik wili, xanaa chik ruk'eriik i chi' qak'ux noq inqik'raaj, eh xan yot'ik chik i qanima, noq ink'ulik cho pan qak'ux chi ma' xoj nimanik taj. Pantaq b'eeh q'aq'inik inkansanik keh i qak'uun qixq'uun, eh panqapaat yab'ilaal inkasanik keh.21Eh inkib'iraj wo' naq qoq'iim, xama' awach ta wo' xye'wik rusuqkiil qak'ux. Re' i ki-ixowanik qawach keht'al chi k'ahchi' qak'ulum i ti' k'axik insuuqb'ik kik'ux chi riij i xa a'n qeh. Chayeew chikinaah aaq'orom cho rib'iral, reh chi neen kik'ul kekeh i ti' k'axik wili.22Xponik chik awuuk' taqe i kiyiib' wach na'ojb'al, chayeew taqe chutojariik i kimahk je' rukab' i xa a'n quuk' i hoj ruum ma' xat qanimaj taj. Re' hoj ma' k'isiin taj oq'ik inqa a'n ruum, re' qanimaxiik'naah ti'kiil wilik, inki taqe. Re' rukab' runimaal ruti'kiil k'uxliis chikiij i aj Sión1Re' QaJaaw Dios xuqequmb'risaj paam i Jerusaleem, ruum i rujosq'iil xresaj i ruloq'il qatinamiit Israel, xuyeew panak'al. Eh ruum i rujosq'iil ma' xuketelaaj ta wach i rupaat ye'aab' reh.2Re' QaJaaw Dios xusach wach i kipaat i riih rumaam i Jacob, je' wo' inajt kinaah tz'aq inkiko'leej wii' kiib' i aj Judá. Xresaj i rajaawriik i reey, je' wo' taqe i kitaaq'anik ruuk'.3Eh ruum i rujosq'iil xresaj i kajaawriik i aj Israel, ma' xojrutoob'eej ta chik ruuk' i rajaawriik noq xi k'uloq i aj ixowaal chi qanaah. Eh je' q'aaq' i xuqop cho chi kixilak i riih rumaam i Jacob, kuxik ruk'atam taqe.4Re' i QaJaaw Dios je' rukab' i aj ixowaal wilik ru flecha ruuk' ruum xusach wach chu'nchel i xiik' naq naah holwochiil. Eh chupaam i kiye'aab' taqe i aj Sión yohb'aal wach noq xuyeew rujosq'iil xa je' chik rukab' i xaq q'aaq' insachwik.5Re' i QaJaaw Dios xub'an je' rukab' i rub'an i aj ixowaal xusach kiwach i aj Israel, je' wo' i paat inki a'n wii' i taaq'anik i reey. Eh xusach wach i paat inkiko'leej wii' kiib', ma' k'isa ti' k'axik xuyeew chikinaah i aj Judá.6Ma' xuketelaaj ta wach noq xusach wach i rupaat, je' wo' ye'aab' i molarik wii' iib'. Ruuk' i re', re' QaJaaw xusach pankik'ux i tinamit taqe i ninq'ijinik, i rumolariik taqe i hi'limb'al q'iij, ar Sión. Eh ruum i rujosq'iil ma' xponik ta chik chuwach i reey, je' wo' taqe i k'amal b'eeh aj tiij.7Re' QaJaaw Dios ma' xponik ta chik chuwach ru artaal, i rusantolaj ye'aab', xuyeew pan kiq'ab' i aj ixowaal i koraal tz'aq ko'lb'al reh i tinamit, reh chi xkisacham wach i rupaat i reey. Eh xak'erik chik kichii' parupaat i Dios xa je' chik rukab' noq imb'aan ninq'iij ar.8Eh re' i QaJaaw Dios xuyejaa' cho wach chi naa rusachariik wach i tz'aq kotimaj wii' riij i holohik laj tinamit Sión, xub'an chi jumehq'iil. Xusach kiwach i tz'aq, je' wo' taqe paat najt naah xkuxik ruch'ahaam wach ak'al.9Re' taqe i ru puertahiil i tinamit xi q'ehb'ik wach ak'al, xitoqib'ik i lutz'b'al reh. Re' kireey, re' taqe i k'amal kib'eeh xi k'amarik reje pan tokoom tinamit aha' ma' xta wii' i k'uhb'aal, eh re' i Dios ma' xta chik i ruk'uhtaaj keh pan kisaq wiriik i jalal ruq'oral.10Eh re' taqe i mama' winaq aj Sión xkitzunaa' kiib' wach ak'al, xkitukej pooq wach kinaah, xkikoj i q'as wach itz'ihy chikiij ruum i ruti'kiil kik'ux. Eh re' taqe i q'ahxoq aj Jerusaleem i xkik'utzaa' qohoq i kinaah wach ak'al.11Re' hin ma' k'isiin ooq'ik, xati' chik inwik'raaj xan yot'ik chik i wánima xub'an noq xwilow chi xsacharik wach i nutinamiit. Eh ruum chi xwilow taqe i kok' ha'lak'un chi xikimik pantaq b'eeh ruum kiwa' kihaa'.12Eh je' wili inkiq'or reh i kituut: Inqaaj naq qawa' qahaa', inki taqe. Eh ruum i kinuhmiik kikimik wach kitileb' i kituut xa je' chik rukab' noq kikimik pamb'eeh i kikanteesjik panq'aq'inik.13¿Awach aj uuk' neetinupaj, neetinujalwachej i hat Jerusaleem? ¿Nik' wach noq neenuyeew rusuqkiil ak'ux i hat, hat holohik laj Sión? Ruum tiyohb'aal wach i ti' xak'ul ma' xata je' chamiil paam i palaw. ¿Mi wilik i neenesanik aweh chupaam noq inaq'or?14Re' xkilow pan kisaq wiriik i kijalwik ruq'oral i Dios re' xkiq'or xa jot'b'al taq aweh. Re' keh ma' xkiq'or ta taq aweh chi naa taq ayot'om ak'ux chi riij taq amahk, xachukuj q'orik taq i xkian aweh.15Eh noq inik'ik kilow i xuk'ul taq aatinamiit Jerusaleem, xan kikaqse'laaj, xan kipohq'aaj chik paam i kiq'ab', inkik'uyu'saj i kinaah inkixub'ej i koq je' wili inkiq'or: ¿Mi ma' re' naq re' i tinamit wili xiik' naah holwochiil suq naq wilik chikiwach i tinamit wach ak'al? inki taqe.16Eh chu'nchel i ki-ixowanik awach ma' holohik ta kiq'orik taq chawiij, tikikaqse'laaj tikixub'eej taq, je' wili inkiq'or: Qasach chik wach i kitinamiit, re' i q'iij wili xanqaaj naq chik chi naa ruponiik, eh yu'naak xqasach chik wach, inki taqe.17Xa re' la' re' i QaJaaw Dios xub'an taq wuuk' i ruyejaam cho wach, i ruq'orom cho pampeet. Xusach wach taq aatinamiit ma' xuketelaaj ta kiwach. Eh xuyeew kajaawriik i aj ixowaal reh chi xkian taq aweh.18Re' taq i hat i holohik laj aj Sión cha pahqaaj taq atoob'jiik reh i QaJaaw, maa kanaa' taq chik oq'ik chi q'iij chi aq'ab' maa hi'lisaj taq i naq'awach reh oq'ik maakanaa' taq ruchihkiljiik i riis naq'awach.19Chak'er taq aachii' chi oq'ik chi q'iij chi aq'ab', chuwach i QaJaaw, b'eh-oq taq i riis naq'awach chi je' rooq ha'. Eh cha pahqaaj taq reh i Dios chu'nchel ak'ux chajosaj taq aq'ab' chuwach chupahqaljiik reh i kik'achariik taq awak'uun awixq'uun ruum re' keh k'achi' kikimiik ruum kiwa' kihaa' chi tz'uk taq b'eeh.20QaJaaw Dios, noq inqaq'or i hoj ma' jino'q i a'nam reh chi je' re'. ¿Mi naa aye'em q'ab' reh chi re' taqe i tuutb'ees naa kik'uxum i kiha'lak'uun? ¿chi re' taqe i k'amal b'eeh aj tiij chi re' taqe i kijalwik aq'oral naa kikanteesjiik chupaam i santo laj ye'aab'?21Yu'naak xa aha' tuch'lik i kiti'jolal i kamnaq chi nimaq chi kok' taq, chi je' taqe i k'ijolaq, chi je' taqe q'ahxoq xikimik ruum q'aq'inik. Xakansaj taqe ruum aajosq'iil, ma' xaketelaaj ta kiwach.22Aha' ta chik ma' xak'am chaloq taqe i aj ixowaal, xa je' chik kik'uloq aj ninq'iijineel. QaJaaw Dios noq xayeew aajosq'iil ma' awach taj i xkiko'leej kiib', re' taqe i xnuk'isaj, ixnutijej xkuxik kikanteesjiik kuum i aj ixowaal. Re' roox runimaal ti'kiil k'uxliis1Re' i hin i winaq xnuk'ul i runimaal ti' k'axik xuyeew chi nunaah i Dios ruum i rujosq'iil.2Xiruk'am panq'equm, eh ma' kiruk'am ta chik pansaqum.3Chi q'iij chi aq'ab' i ruyeew q'ab' chi nunaah reh i ruye'ariik chee ti' k'axik chi nunaah.4Eh xirurijb'isaj, xutoqib'eej i nub'aqil noq i xwik'raaj.5Eh xukotej wiij chi ti' k'axik, eh chi ruti'kiil k'uxliis.6Eh xiruyeew panq'equm, je' rukab' i q'equm wilkeeb' wii' i kamnaq najtir kikimik.7Xukotej wiij ma' xnub'an ta chik elik chupaam, xub'ak' nuwach chi karena.8Eh xnuk'er nuchii' chupahqaljiik i nutoob'jiik reh i QaJaaw xama' xrib'iraj ta wo' cho weh i nutiij.9Re' reh tusuj ab'aj i xukoj panub'eeh, reh chi ma' xinelik ta korik ruuk' i k'ahchi' nukapaam.10Re' reh xa je' chik rukab' i kaq b'ahlam, xa je' chik rukab' i oso xaraaj chi rukutum riib' chi nunaah11Eh xiresaj chupaam i nub'eeh, xiruxereb'eej, eh xirukanaa' chi wutkeel.12Re' xub'an weh re' re', je' naa xu yub' i kutb'al reh i ru flecha.13Je' naa xik'saj chupaam i nuti'jolal i ru flecha.14Eh re' i nutinamiit xa kinkikaqse'laaj chik, xa hin chik tz'ajb'al paam kichii' rajlaal i q'iij.15Xa re' chik i ruti'kiil nuk'ux xuyeew, je' naa xi ruxohk'risaj ruuk' i k'ah laj ha'.16Eh je' naa xirukut wach ak'al, je' naa xutoqib'eej wach i weeh, xirutolej pan pooq.17Eh xama' suq ta chik i wihik xnub'an, xama' xnureq ta chik rusuqkiil nuk'ux.18Eh xnukapaaj chi xsahchik chik wach i xnuch'ikaam naq reje wii' nuk'ux ruuk' i QaJaaw Dios.19Re' hin ink'ulik panuk'ux i ruti'kiil nuk'ux, i rutz'irkiil nuwach, i ti' k'axik xnuk'ul.20Noq i nutoq'aa' nukapaam riij chu'nchel i re' rub'an kiib' nuk'ux ruum.21Xa re' la' jinaj inwaaj chi ma' nee ta nsahchik panuk'ux, reh chi ar nee nuch'ikaa' nuk'ux.22Re' chi re' i QaJaaw Dios ma' jaruuj i rukanaa' ruketeljiik qawach, eh ma' sahchinaq ta wach i rotob'il.23Iqal i iqal la' kirutob'eej ruum xiik' naah i rotob'il ruyeew chi nunaah.24Re' hin xnuq'or, re' i QaJaaw Dios neentoob'inik weh ruuk' i reh i nuyeew nuk'ux.25Re' i QaJaaw Dios q'e' atoob' kuuk' taqe inkiyeew kik'ux ruuk', kisik'wik reh.26Q'e' chihooj chi neenquy-eej ruuk' q'unil chi qoh ruko'leej i QaJaaw Dios.27Re' i winaq q'e' chihooj chi noq neeruq'asaj riib' chi ri'sil i rajaawriik i Dios parak'uniil.28Q'e' chihooj chi ma' xta neeruq'or, chi nee rukuy ruuk' q'unil i ti' k'axik, ruum re' wo' Dios xye'wik chinaah.29Nee la' ruloch' riib' chi nee rutz'ub' aak'al, eh koneeruy-eej i rotob'il i Dios.30Eh nee ruyeew chi sak'arik i pan wach keh i nixowanik wach, neerukuy ransil i b'ajarik.31Ruum re' i QaJaaw Dios ma' jaruuj nee qoh rukanaa' chi jumpech.32Atoob' ta neerutib'isaj qak'ux, nee wo' chik i ruketelaaj qawach, ruum ma' kisiin i k'axooj ruuk'.33Re' reh ma' awach taj i neerutib'isaj ruk'ux, i nee ruyeew panti' k'axik chi ma' xta rub'ehel.34Eh ma' imponik ta chuwach chi neenyeq'arik panak'al i wilkeeb' chi ri'sil i kajaawriik i tokoom tinamit.35Eh ma' imponik ta chuwach chi neenq'ucharik i chib'ih reh i tokoom.36Ma' imponik ta chuwach i QaJaaw noq ma' parub'ehel ta inq'atarik i q'orik.37¿Mi nee ruyeew riib' chi neen q'orarik chi re' taqe ink'ularik ma' reht'al taj i QaJaaw Dios?38¿Mi ma' re' wo' re' i QaJaaw Dios inyej-anik wach taqe i holohik, taqe i ma' holohik taj ink'ularik?39Mi ma' ruum wo' re' i ru mahk i winaq inchalik i ti' k'axik chinaah ¿Chib'ih reet noq intib'ik ruk'ux?40Re' hoj qakapaam riij i qana'ojb'al neerub'an chi nee wo' chik inqanimaj i QaJaaw Dios.41Eh qajosaj johtoq i qaq'ab' i qanima chuwach i QaJaaw Dios wilik cho pan taxaaj, je' wili i neenqaq'or:42QaJaaw Dios re' hoj xoj mahkunik chawach ma' xat qanimaj taj, eh ma' xakuy taj i qamahk.43Eh ruum aajosq'iil xayeew i ti' k'axik chi qanaah xakansaj taqe i qatinamiit ma' xta qamahk.44Je' naa jinaj suutz' q'atwik reh i qatiij ruum i re' ma' xoj ab'iraj taj.45Eh xoj akanaa' chi hoj manlik kise'lb'aal, chu'nchel i tinamit.46Chu'nchel i ki-ixowanik qawach ma' holohik ta kiq'orik chiqiij.47Q'e' ti' i xqak'ul xsacharik wach i qatinamiit, runimaal yo'jikwilkooj wii'.48Xa je' chik raasb'al ha' i riis naq'nuwach ruum oq'ik i nub'an ruum xsacharik wach i nutinamiit.49Re' hin ma' kinhi'lik ta chi oq'ik ruum ma' qoh elik ta chupaam i ti' k'axik.50Xa kore' wo' neenumay wila' xaketelaaj cho qawach i QaJaaw kopan taxaaj.51Xanyot'ik chik i wánima i rub'an i xkik'ul taqe ixoq wilkeeb' panutinamiit.52Re' i ki-ixowanik nuwach xinkichop chi ma' xta numahk, je' rukab' noq inchoparik pan xirob' i k'isa tz'ikin.53Eh k'achlik nuwach noq xinkikut pan chaamlaj jul, xkitz'ap naah chi ab'aj.54Ar xutz'ap nunaah i ha', eh je' wili i xnuq'or: Ayu' xkuxik wach i nuk'achariik kinki.55QaJaaw Dios re' hin xnupahqaaj nutoob'jiik aweh noq wilkiin cho paruchamiil i jul.56Eh xab'iraj wo' i nutiij, noq xnuq'or aweh chi naa kiin ako'leem xina ko'leej wo' hoq.57Noq xnupahqaaj aweh chi naakiin atoob'eem je' wili i xaq'or: Matyo'jik wilkiin awuuk', ti kiweh.58QaJaaw Dios kinako'leej ti chupaam i ti' k'axik chako'leej riij i nuk'achariik.59Re' hat inawilow i ma' holohik taj inki a'n weh kinako'leej tii weh.60Re' hat i naa wilow chi k'ahchi' kisik'im chi riij, nik' wach noq naa kianam weh i ki-ixowanik nuwach.61QaJaaw Dios re' hat inab'iraj i nub'ajariik inki a'n je' wo' hoq i k'ahchi' kiyejaam wach chi wiij.62Re' i ki-ixowanik nuwach ma' holohik ta kiq'orik chi wiij chu'nchel i q'iij, xa re' chik i hin kinkiq'or.63Eh inawilow wo' chu'nchel inki a'n xa hin chik kise'lb'aal chi jumpech.64QaJaaw Dios chayeew taqe chutojariik i kimahk, je' rukab' i ruk'ul chi keh.65Chakowb'isaj i kánima reh chi ma' nee ta nkireq chi riij i korik, chayeew i ti' k'axik chikinaah.66QaJaaw Dios chayeew aajosq'iil chikinaah, chasach kiwach chinaah i wach ak'al wili. Re' rukaaj runimaal ti'kiil k'uxliis1Re' i qa oro xq'eeqb'ik chik wach, eh re' i xti manlik oro ma' rob'rotik ta chik kiwach. Eh re' holohaq ab'aj wilik chupaam i santo laj ye'aab' xa aha' chik t'analkeeb' pantaq b'eeh.2Re' taqe i aj Sión i xiik' naq naah k'ihaal kitz'aaq chuwach i oro, yu'naak xi kahnik chi ma' xta chik k'isinoq kitz'aaq xa je' chik kikab' ak'al xun ruyej-aniik winaq.3Re' ixoq xojb' i ruyeew naa re' ruch'uuch' i kok' rak'uun. Raaj i nutinamiit reh ma' je' ta re' inki a'n xiik' la' naah kijosq'iil, je' kijosq'iil i nimaq chikop wilik ruxiik' wilkeeb' panchiq yuuq'.4Re' i kok' ha'lak'uun ko kich'uch'ik i ruchop riib' i kaaq' pan kijahaay ruum kihaa'. Eh re' taqe ha'lak'uun noq inkipahqaaj kikaxlanwi'k ma' awach ta nye'wik keh.5Re' naq taqe i suq atoob' inkik'ux, yu'naak k'ahchi' kikimiik ruum wi'jaleel, pantaq b'eeh. Eh re' taqe i xik'ihik pan b'ehomal, yu'naak pan sohk' inki yok'aa' kiib'.6Re' yiib' wach na'ojb'al inki a'n i nutinamiit, ma' xata je' rukab' i mahk xkian i aj Sodoma. Re' i xa chi jumehq'iil xsacharik wach chi ma' kota xb'aan i peleto kuuk'.7Re' taqe xi k'amwik cho qab'eeh saq wo' naq wach i kánima je' saq laj suutz'. Eh xti kow naq kiib' q'e' naq taqe holohaq je' kikab' i holohaq ab'aj koral, eh zafiro rub'ihnaal.8Eh yu'naak xa je' chik rukab' aaq'ut i kiq'eqiil xama' naab'jik ta chik kiwach pantaq b'eeh. Xa riplik chik i kitz'uhmal chuwach i kib'aqil xa chiqij chik taqe xa je' chik taqe chiq sii'l.9Ma' xta reet i xkik'ul i xikimik panq'aq'inik, chuwach i kikimik ruum wi'jaleel. Ruum re' i xikimik ruum wi'jaleel q'uun i kimik xkian korehtaal ma' xelik ta chik i tik wach ak'al.10Eh wilik taqe i tuutb'ees atoob' wo' naq taqe, ruuk' kiq'ab' xkichaq'saj i kiha'lak'uun, eh inkik'ux chi jilow kiwa'. Je' re' i xkian chupaam i q'iij noq sacharik wach i nutinamiit Jerusaleem.11Re' i QaJaaw Dios xuyeew i rujosq'iil chinaah i tinamit Jerusaleem. Eh xusachib'eej wach ma' xta chik i rehtalil xukanaa', je' jinaj q'aaq' noq xuqasaj chee rujosq'iil.12Re' taqe i kireey chu'nchel i tokoom tinamit ma' nkikapaaj ta naq chi re' taqe i aj ixowaal naa kianam okik chupaam i tinamit Jerusaleem.13Re' taqe i xk'ularik re' re' kimahk i jalal naq ruq'oral i Dios. Eh ruum i kiyiib' wach na'ojb'al i k'amal kib'eeh aj tiij. Ruum xkikansaj taqe i korik wach kik'ux ar Jerusaleem.14Re' taqe re' xa je' taqe moywach noq xib'ehik pantaq b'eeh. Xkisach i kiso' chi kik' ruuk' ikaansanik xkian, ma' awach ta chik i rujil i koq riib' kuuk'.15Eh je' wili inq'orarik keh: Eleen taq chi qawach, ch'uwa' taq awach, ma' nee ta nqajil koq qiib' taq awuuk', ma' ruk'ul taj chi nee taq ti k'acharik quuk' ki uchjik kuum i tinamit. Eh xkimol chi elik pantaq tokoom tinamit.16Re' i QaJaaw Dios xtukinik reje kiwach ruum i rujosq'iil. Eh ma' xuyeew ta chik kiloq'il i k'amal kib'eeh aj tiij. Eh ma' xuketelaaj ta wo' kiwach i mama' winaq.17Re' hoj ti' naq wilkooj xqasik' naq qatoob'jiik tokoom, xama' awach ta wo' xtoob'inik qeh. Eh xqayeew naq qak'ux chinaah jinaj i tinamit chi naakooj ruko'leem, xama' xoj ruko'leej ta wo' hoq.18Re' hoj xama' ruyeew ta chik riib' chi qoh elik pamb'eeh, ruum xak'ahchi' chik kikojom qehtaal aha' qohooj ruum qohkaaj kikansam, xponik chik i q'iij chi naa rusachariik qawach.19Re' taqe i ki-ixowanik qawach kow kib'ehik, ma' xata je' kowiil i rub'an i xihk inrupinik pan taxaaj. Xa aha' inkiq'at chi qawach pantaq chiq yuuq'.20Eh xkichop i qareey i rusik'im cho wach i QaJaaw re' naq inqayeew wii' qak'ux. Re' i qareey je' wili inqaq'or chi riij: Re' reh chi ri'sil i rumuuj i rajaawriik naa qawihiik chupaam taqe i tinamit, qohki.21Tise'lanoq, suuqb'oq taq ak'ux i hat aj Edom, i hat taq aj Uz. Xa re' la' ponik wo' reh i ti' k'axik taq cha naah i hat, je' naa k'ah laj ha' i naa taq awuk'em, naa taq akahniik chi je' taq hat xohk'reel, chi hat taq sonolkaat.22Re' taq i hat aj Sión xat hi'lik taq chik ruuk' ti' k'axik, ma' naa ta chik taq kaat ruk'amam reje pan tokoom tinamit. Eh re' taq i hat aj Edom naa taq kaat ruye'em chutojariik amahk, ar naa reliik wach saqum taq amahk. Re' tiij xkian i aj Jerusaleem ruum i ruti'kiil kik'ux1QaJaaw Dios k'oloq tii cho panak'ux i ti' k'axik xqak'ul, ruum q'e' xkik'uhtaaj qak'ixb'ilaal.2Eh re' taqe chib'ih qeh xkiq'uch i tokoom tinamit, eh xkiq'uch i qapaat.3Xoj kahnik chi ma' xta ilil qeh, xa je' ma' xta qajaaw, re' taqe i qatuut xi kahnik chi je' kamnaq kib'ahiil.4Re' i qahaa' inquk'ej xan qaloq' chik, eh re' i qasii' inqak'at xan qaloq' wo' chik.5Re' taqe i ki-ixowanik qawach jinaj ahl laj ihq i xkiyeew chi qanaah, ma' qohi'lik ta chik kuum.6Eh koxqapahqaaj chik chib'ih qeh kuuk' i aj Egipto, kuuk' i aj Asiria, xa je' chik re' noq xqa a'n qawa' qahaa'.7Re' taqe i qamaam qati't ximahkunik chaloq. Eh re' chik i hoj k'ahchi' qatojwik wach i kimahk.8Re' taqe i kimoso xkikoj chi taaq'anik chi qanaah. Eh ma' awach ta chik ineesanik qeh pan kiq'ab'.9Re' taqe i kansan qeh xa aha' wilkeeb'. Xa yo'jik inqa a'n noq qohooj chusik'ariik i qawa'.10Re' i qati'jolal xan qop chik inqik'raaj ruum i qanuhmiik, xa je' chik rukab' i rutz'a'iil i horna.11Re' taqe i aj ixowaal ar Sión, ar Judá xkichop taqe ixoq, je' wo' taqe kok' xq'un.12Eh xkit'uyaa' chi kiq'ab' taqe i k'amal qab'eeh. Eh ma' xkiyeew ta rajaawriik taqe i mama' winaq.13Eh re' taqe k'ijool wilik chik kaansil xkikoj chi ruke'jiik i trigo. Eh re' taqe i kok' ak'un xakiq'ehb'ik chik chi ri'sil i ahl laj sii' inye'arik chikiij.14Ma' nilarik ta chik kiwach i mama' winaq panookb'al reh i tinamit. Eh re' taqe i k'ijolaq ma' kitz'uyinik ta chik.15Eh re' hoj ma' qoh soninik ta chik. Re' i rusuqkiil qak'ux xsutinik chi ruti'kiil qak'ux.16Xkesaj i qaloq'il, q'e' wo' chik ti' i k'ahchi' qak'ulum ruum ma' k'isiin i mahk qa'nam chaloq.17Ruum taqe i ti' k'axik re' re' xan yot'ik chik i qanima, eh ma' q'e' ta chik saqum qoh ilwik.18Eh re' taqe i wilik naq chinaah i yuuq' Sión xsacharik kiwach xa re' chik i yaak k'uul kiooj chinaah.19Eh re' hat QaJaaw Dios chi juneliik naa awihiik chi reyil, eh chi juneliik naa awihiik chi taaq'anik chupaam aaye'aab'.20QaJaaw Dios ¿Mi xoj sahchik panak'ux re'? ¿Chib'ih reet noq naakooj akanaam chi qutkeel nik'-oq najtiil?21Chakuy qoh ak'ul awuuk', nee wo' chik qoh sutinik awuuk'. Eh nee ta tii i nayeew qeh i suq laj k'acharik je' rukab' i pampeet.22QaJaaw Dios ¿Mi xoj akanaa' chi qutkeel chi jumpech re'? ¿Mi juneliik naa aye'em aajosq'iil chi qanaah re'?
Bible Society in Guatemala