Read EZEQUIEL 1

EZEQUIEL1

¹Re' hin Ezequiel k'amal b'eeh aj tiij, hin rak'uun i Buzi, ar wilkiin chi kixilak i aj Israel xi k'amarik reje Babilonia. Eh ar wilkooj chi chii' i nim ha' Kebar. Eh ho'oob' rub'eeh i rukaaj poh reh i lajeeb' ru ka'winaq haab'. Xteh chik i chii' i taxaaj noq xwilow panusaq wiriik.²Eh pan ho'oob' rub'eeh i poh reh i roo' haab' ruk'amariik reje Babilonia i Joaquín kireey i aj Israel,³noq xiruq'o'reej i QaJaaw Dios i hin Ezequiel k'amal b'eeh aj tiij, hin rak'uun i Buzi. Eh ar wilkiin Babilonia chi chii' i nim ha' Kebar. Ar xuyeew chaq'ab' chi nunaah i QaJaaw noq xwik'raaj i rajaawriik.

⁴Re' hin xwilow panusaq wiriik chi jinaj i kowlaj teew xchalik pantz'eet reh i rookb'aal i q'iij k'ahchi' cho ruk'amam jinaj i nimlaj suutz', eh kotimaj riij chi xaq q'aaq'. Eh panyejaal i q'aaq' re' re' jinaj xan rob'rotik chik xa je' chik rukab' i q'an ch'ihch'.⁵Eh panyejaal i q'aaq' re' re' kijib' b'ila' chik i k'achaach je' b'ila' chik kiwii' winaq.⁶Eh chi kiju'junaal taqe re' kajkaj b'ila' i kiwach, eh kajkaj i kixiik'.⁷Eh re' wach kich'ehk korik wach, eh re' kixk'aq je' b'ila' rukab' i rixk'aq k'isa imas wakax, xan rob'rotik chik xa je' chik rukab' i ch'ub'ik wach q'an ch'ihch'.⁸Eh chi ri'sil kajchel i kixiik' wilik kijib' kiq'ab', je' q'ab' winaq, kajtarchel wilik wii' i kiwach, eh kajtarchel wo' wilik wii' i kixiik'⁹Eh pan kijib'al inkik'ulaa' wach ikixiik'k'ul inkib'ur kiib' ruuk'. Noq kib'ehik xa jinaj kiooj wii'.¹⁰Re' taqe k'achaach re' re' je' wili kika'yik chi ju'juntar: Re' juntar je' inka'yik winaq, re' juntar je' inka'yik kaq b'ahlam, re' juntar je' inka'yik imas wakax, re' juntar chik je' inka'yik xihk.¹¹Eh chi kiju'junaal kihe'em paam i kixiik', ki'ib' i kixiik' k'ul inkitz'aj reje kiib' ruuk', eh ki'ib' ikixiik' inkib'ur wii' i kiti'jolal.¹²Eh chi kiju'junaal xa jinaj kiooj wii'. Ar chi korik ojik inki a'n chikiwach, aha' kik'amarik ruum i uxlab'al, ma' kisutinik ta chik chikiij.¹³Eh chi kixilak i kijib' chi k'achaach wilik i je' aaq'ut qoplik ruq'aq'al, eh je' rukab' i q'aaq' qoplik ju' chee' k'ul inooj chi kixilak. Re' i q'aaq' re' re' xasaqum chik i rub'an, eh i rukut reje i ch'aab' je' ruch'aab' kahoq.¹⁴Re' taqe i kijib' chi k'achaach re' re' xa chi jumehq'iil kichalik kiooj xa je' chik kowiil i rub'an i ruch'aab' i kahoq.

¹⁵Eh xwilow panusaq wiriik chi re' taqe i kijib' chi k'achaach wilik wach ak'al pantaq kicheel i ju'jun i kotokaq.¹⁶Re' taqe i kijib' chi kotokaq eliik kiwach, eliik wach kiyejeb'jiik. Eh xan rob'rotik chik i kiwach xa je' chik rukab' i holohik ab'aj Crisolito. Eh chupaam taqe i ju'jun chi kotokaq wilik wo' chik i ju'jun chi kotokaq.¹⁷Re' taqe i kotokaq re' re' noq kib'ehik reje chikiwach je' chikiij, je' pantaq kicheel kiooj xa re' la' xama' kisutinik ta wo' hoq.¹⁸Eh re' taqe i kijib' chi kotokaq re' re' kichopom kiib' panyejaal, eh chi kijunsuut juninaq chi je' naq'wachiis xan saqumanik chik.¹⁹Noq kiooj reje i k'achaach kiooj wo' taqe kotokaq kuch'ihil reje. Eh noq kiwuktik reje i k'achaach kiwuktik b'ila' wo' reje i kijib' chi kotokaq.²⁰Re' taqe i kijib' chi k'achaach aha' ink'amarik reje kib'eeh ruum uxlab'al ar wo' kiooj. Eh re' taqe i kijib' chi kotokaq kiooj wo' haa' chikiij i taqe k'achaach, ruum re' wo' taqe haa' kuuk'.²¹Noq kib'ehik reje i kijib' chi k'achaach, kib'ehik wo' reje i kijib' chi kotokaq. Eh noq kipa'lojik i k'achaach kipa'lojik wo' hoq i kotokaq. Noq kiwuktik reje i k'achaach kiwuktik wo' reje i kotokaq, ruum re' wo' hoq i kijib' chi k'achaach inye'wik kik'achariik i kotokaq.

²²Eh re' taqe i kijib' chi k'achaach wilik i he'lik johtoq chikinaah xan reprotik chik je' rukab' i lemow.²³Eh chi ri'sil i he'lik chikinaah kihe'em b'ila' chik i kixiik' i kijib' chi k'achaach. Eh k'ul k'ahchi' kitz'a'am kiib' ruuk' kab'chel i kixiik', eh ruuk' i ki'ib' chik inkib'ur i kiti'jolal i keh.²⁴Re' hin imb'iraj b'ila' chik i choqik i rub'an i kixiik' noq b'ehik inki a'n xa je' chik rukab' i choqik i rub'an i elal ha', je' wo' kowiil inq'orik i QaJaaw nim rajaawriik. Eh je' wo' rukab' i choqik inki a'n i ruk'ihaal soldado, eh noq kipahik inkiqaasaj i kixiik'.²⁵Eh jinaj i kowlaj q'orik x-ib'irjik xb'aan cho chinaah i he'lik chikinaah i kijib' chi k'achaach.²⁶Chinaah i he'lik chikinaah re' re' xwilow chi wilik jinaj i loq'laj tzunaab', xa je' yej-amaj ruuk' i holohaq laj ab'aj zafiro. Eh chupaam i loq'laj ye'aab' re' re' jinaj i tzunlik ar je' ruwii' winaq.²⁷Xwilow wo' hoq i je' ruwii' winaq, chinaah rutuuq xtihk'ik johtoq, xponik ko wach naah xan reprotik chik xa je' chik rukab' i ch'ub'ik wach ch'ihch' xan reprotik chik wach kotimaj riij chi q'aaq'. Eh chi ri'sil i nah rutuuq xwilow wach i je' q'aaq', xan saqumanik chik i rub'an chi junsuut.²⁸Je' rukab' i raxkojl q'atb'al reh i suutz' noq i rub'an i jab'.
Je' aj wili noq xuk'uhtaaj cho weh i ruloq'il i Dios panusaq wiriik. Eh noq xwilow taqe re' xnupach'aa' qohoq wiib' korehtaal xnureq wach ak'al ruuk' i yejal nuwach. Re' Ezequiel xsik'arik wach ruum i Dios chi xkahnik chi jalal ruq'oral

¹Re' i QaJaaw Dios je' wili i xuq'or weh: Hat rak'uun winaq tipaa' johtoq, re' hin wilik i naa nuq'orom aweh, inki.²Noq k'ahchi' chi q'orik wuuk' xokik wuuk' i ruxlab'al chi manlik. Ruum i re' xinpahik johtoq. Re' reh ma' xukanaa' ta nuq'orob'jiik.³Je' wili i xuq'or weh: Hat rak'uun winaq, re' hin naa kaat nutaq'aam reje chi kixilak i aj Israel. Re' i tinamit ma' kinimanik taj ximahkunik chi nuwach, chi re' i kimaam kati't, chi re' keh xa ko xik'uloq wo' ayu' yu'naak.⁴Re' keh q'e' kow i kinaah, q'e' kow i kánima, re' hin nak'at nutaq'aam reje chi kixilak, eh naa aq'orom keh i nuk'uhb'aal.⁵Atoob' ta neenkinimaj, atoob' ta ma' neenkinimaj, ruum re' taqe re' ma' kinimanik taj. Xa re' la' neenkinab'eej chi xnutaq'aaj reje jinaj i jalal nuq'oral chi kixilak.⁶Re' hat rak'uun winaq mat yo'jik chikiwach, maayohb'isaj awiib' ruuk' i neenkiq'or aweh. Atoob' ta neenawik'raaj chi je' xilak k'iix wilkaat kuum, oon chi je' xilak josq'laj tzina'j, atoob' ta xa nee chik inkiyoj aweh i kiwach ruum kijosq'iil.⁷Re' hat naa aq'orom keh i nuq'oral atoob' ta neenkib'iraj, atoob' ta ma' neenkib'iraj, ruum re' keh ma' kinimanik taj.⁸Re' hat rak'uun winaq chab'iraj i k'ahchi' nuq'orom aweh, mo'-oq je' akab' taqe i tinamit ma' kinimanik taj. Cha teh aachii' chak'ux i nuyeew aweh, inki.

⁹Eh re' hin xwilow panusaq wiriik jinaj i q'ab'iis wilik i koq wuuk' ruchopom i junb'oht chi huuj.¹⁰Eh xuhe' chik wach chi nuwach, k'ul tz'ihb'amaj wach je' chi riij, je' chuwach. Ar tz'ihb'amaj i runimaal ti'kiil k'uxliis, eh i runimaal oq'ik naa ruchaliik chikinaah i aj Israel.

¹Eh je' wili i xuq'or weh i Dios: Re' hat rak'uun winaq chak'ux i huuj wili tz'ihb'amaj wach. Eh hiy cha q'or i nuq'oral keh i tinamit Israel, inki.²Re' hin xnuteh b'ila' chik i nuchii', eh xuyeew weh chi k'uxarik i huuj tz'ihb'amaj wach.³Eh je' wili xuq'or weh: Chab'iq' i huuj tz'ihb'amaj wach xnuyeew aweh, chanujisaj aapaam ruuk', inki. Re' hin xnub'iq wo' hoq, xa je' chik ki'iil riis kaab' noq xwik'raaj.

⁴Eh je' wo' chik wili i xuq'or weh i Dios: Hat rak'uun winaq, yu'naak hiy cha q'or keh i tinamit Israel i nuk'uhb'aal.⁵Re' hin ma' chi kixilak taj i tinamit k'axik wach i kiq'oral ma' tankan chi riij inkiq'or k'ahchi' kaat nutaq'aam reje, chi kixilak la' i awuch aj Israel tinutaq'aaj reje.⁶Eh ma' re' ta wo' chi kixilak i k'ih ch'uq chi tinamit k'ayeew wach kiq'orik, ma' ta neenkan chi riij inkiq'or k'ahchi' kaat nutaq'aam reje, eh kuuk' ta wo' taqe re' neetinutaq'aaj, re' keh nee naq inkinimaj i nuk'uhb'aal neenaq'or keh.⁷Eh re' taqe i aj Israel xama' naa ta wo' kaat kib'iram ruum xama' kinkaaj ta wo' kinkib'iram i hin. Ruum chu'nchel i tinamit Israel q'e' kow i kinaah, eh q'e' kow i kánima.⁸Xa re' la' re' hin naa wo' nuye'em rukowiil ak'ux i hat naa aq'atam wach i rukowiil kik'ux i keh.⁹Re' hin xiik' naah aakowiil naa nuye'em, ma' xata je' kowlaj ab'aj ma' xata je' holohik ab'aj diamante. Eh ma' naa tayo'jikkuum atoob' ta neenkiyoj awee kiwach ruum re' keh ma' kinimanik taj.

¹⁰Eh je' wili i xuq'or weh i Dios: Re' hat rak'uun winaq chab'iraj chu'nchel i nuk'uhb'aal naa nuq'orom aweh, eh chamol panawánima.¹¹Eh hiy chi kixilak aatinamiit Israel re' i xi k'amarik reje pan tokoom tinamit, ar cha q'or keh i nuk'uhb'aal atoob' ta neenkinimaj, atoob' ta ma' neenkinimaj, inki.

¹²Eh re' i ruxlab'al i Dios x-uksanik weh, eh chi wiij jinaj i kowlaj q'orik xb'aan chaloq, xa je' chik kowlaj yihk je' wili xuq'or: Xwuktik chaloq paruye'aab' i ruloq'il i QaJaaw, inki.¹³Eh re' i choqik re' re', re' b'ila' chik i kixiik' i kijib' chi k'achaach imb'anik re' noq k'ul i ruq'oj riib' i kixiik'. Eh re' i kijib' chi kotokaq b'ehik wo' rub'an haa' kuuk', eh yohb'aal wach i choqik xkian.¹⁴Xiruk'am b'ila' reje i Ruxlab'al i Dios, re' hin ti' ti' i nuk'ux noq xinooj, eh k'ahchi' i nuk'aah. Eh re' i QaJaaw xakow b'ila' chik xiruchop ruuk' q'ab'.¹⁵Eh re' hin ximponik wo' kuuk' i aj Israel k'amooj taqe reje pan tokoom tinamit patim taqe ar Tel-Abib chi chii' i nim ha' Kebar, wuquub' q'iij xintzuhnik chi kixilak chi sachlik nuk'ux. Re' i QaJaaw Dios xukoj i Ezequiel chi chajen keh i aj Israel (Ez 33.1-9)

¹⁶Eh paruwuuq q'iij xiruq'o'reej QaJaaw je' wili i xuq'or weh:¹⁷Re' hat rak'uun winaq re' hat xnusik' chawach chi naa acha'jeem i nutinamiit Israel. Noq naa ab'iram i nuk'uhb'aal, ruuk' i re' naa akojom kina'ojb'al.¹⁸Noq naa nuq'orom chi naa rukimiik i yiib' wach runa'ojb'al. Re' hat naa aq'orom reh chi nee rukanaa' rub'aan i yiib' wach na'ojb'al, chi je' re' neeruko'leej riij i ruk'achariik. Eh wila' re' hat ma' xaq'il chub'aan, korehtaal-oq xkimik chub'aan, re' hat naa kaat nuye'em chutojariik riij i ru mahk.¹⁹Eh raaj wila' re' hat xaq'or reh i yiib' wach runa'ojb'al chi chukanaa' rub'aan, eh wila' ma' xukanaa' rub'aan, xa chi rib'il riib' naa rukimiik ruum i ru mahk, eh re' hat naa ako'leem riij aak'achariik²⁰Eh wila' re' i korik wach ruk'ux nee wo' chik i rub'an i yiib' wach na'ojb'al, eh xnuyeew-oq q'ab' i hin chi neeruq'eb' riib' re' re' naa rukanteesjiik. Eh mo'-oq xaq'il chub'aan, korehtaal-oq xkimik parumahk, re' hin ma' naa ta nukojom paruman i holohik rub'anam chaloq. Eh re' hat naa kaat nuye'em chutojariik riij i rukimiik.²¹Eh wila' re' hat xaq'or reh i korik wach ruk'ux chi maa rub'an chik i mahk, wila' xunimaj i ruq'ilariik neena a'n ma' naa ta rukimiik. Eh re' hat nee inako'leej riij ak'achariik, inki weh i Dios. Re' Ezequiel jalal ruq'oral i Dios xkahnik chi meem

²²Eh chupaam i ye'aab' re' re' xuyeew i q'ab' chi nunaah i QaJaaw Dios, je' wili i xuq'or weh: Wukteen reje hiy wach k'ixkaab' ar neenuq'or aweh chib'ih i naa a'nam, inki.²³Re' hin xinooj wo' wach k'ixkaab', ar xwilow wach i runimaal i ruloq'il i Dios, je' rukab' i ruloq'il xwilow cho chi chii' i nim ha' Kebar. Re' hin xnupach'aa' wiib' korehtaal rutz'aj wach aak'al i yejal nuwach.²⁴Eh re' i rajaawriik i Dios xokik wuuk' xirupab'aa' johtoq. Chi riij i re' je' wili i xuq'or weh i Dios: Yu'naak hiy panapaat neenatz'ap awiib' ar.²⁵Re' hat rak'uun winaq je' naa kaat kib'ak'am ruuk' k'ahaam, ma' naa ta chik kiye'em q'ab' aweh chi naa awihiik chi kixilak i tinamit.²⁶Eh re' hin naa nuye'em q'ab' chi na naa ruchopom riib' aawaaq' pan ajahaay naa akahniik chi hat meem reh chi ma' naa ta chik a'nam kiq'ilariik i tinamit. Ruum re' keh xama' kinimanik ta wo' hoq.²⁷Xa re' la' noq naa kaat nuq'oreem i hin naa wo' chik nuye'em aq'oral. Eh naa aq'orom i nuk'uhb'aal keh i tinamit, awach i naa rajwaam rib'irjiik naa wo' rib'iram, awach i ma' naa ta rajwaam rib'irjiik xama' naa ta wo' rib'iram. Ruum re' i tinamit re' re' xama' kinimanik ta wo' hoq. Re' i Ezequiel xuk'uhtaaj nik' wach noq xchoparik naah i tinamit Jerusaleem

¹Re' i Dios je' wili i xuq'or weh: Re' hat rak'uun winaq, cha chop jino'q i nimlaj xaan neenatz'ihb'aaj chuwach i rehtalil i tinamit Jerusaleem.²Eh neenatz'ihb'aaj chi junsuut i kehtalil i soldado je' i q'aq'inik inki a'n Eh nee neenatz'ihb'aaj i rehtalil chi kotimaj riij chi tz'aq, neenatz'ihb'aaj rehtalil chi k'otooj jul je' rooq ha' chi junsuut, k'uhtb'al reh chi re' i tinamit kotimaj chik riij.³Eh neenaperaa' jumpehr-oq i ch'ihch' chawach reh chi je' jinaj koraal tz'aq i neenq'atwik chawach i xatz'ihb'aaj wii' rehtalil i tinamit Jerusaleem. Eh naa ayejaam awiib' chi je' cho naa awokiik chi q'aq'inik chinaah i tinamit. Re' re' i rehtalil chi je' re' i naakik'ulum i aj Israel.

⁴Yu'naak naa ayohkiik chinaah i tz'eet k'uhtb'al reh i kimahk i aj Israel. Eh jarub' q'iij naa ayohkiik chinaah aatz'eet ar naa ak'uhtaam chi je' re' najtiil i ti' k'axik naakik'ulum i aj Israel ruum i kimahk.⁵Eh lajeeb' chik ma' kijib' siento q'iij naa ayohkiik panatz'eet, eh re' ju'jun q'iij rehtalil i ju'jun haab' chi ti' k'axik naakik'ulum i aj Israel ruum i kimahk.⁶Eh chi riij i re', ka'winaq q'iij naa ayok'aam awiib' pana sak'aaj, re' ju'jun q'iij rehtalil i ju'jun haab' chi ti' k'axik naakik'ulum i aj Judá ruum i kimahk.⁷Eh nee ti' ilwik reje Jerusaleem rehtalil chi naa ruchopariik naah kuum i aj ixowaal neenatol i wach atileb', eh neenaq'or keh i ti' k'axik naakik'ulum.⁸Re' hin je' naa nanuub'ak'am awach chi k'ahaam reh chi ma' k'ul ta chik nee nasutej awiib' korehtaal inakohlaaj ruk'ulariik i ti' k'axik.

⁹Yu'naak i hat chamol k'isinoq atrigo, eebada, lentejas, mijo, eh avena, xa jinaj chayeew wii' pan jino'q xun. Ruuk' taqe re' naa ayejaam aakaxlanwi'k re' naa ak'uxum chuwach i lajeeb' chik ma' kijib' siento q'iij noq naa ayohkiik chinaah aatz'eet.¹⁰Re' hat xanaa apajam awa', xa waxiqiib' onse naa ak'uxum chuwach i ju'jun chi q'iij.¹¹Eh je' wo' hoq ahaa' xanaa wo' apajam xakiib' kulk i naa awuk'em chuwach i ju'jun chi q'iij.¹²Re' i naa ak'uxum jinaj chi kaxlanwi'k re' ruuk' i Eebada korjinaq wii', eh ruuk' ruq'aq'al rusaa' tinamit naa achaq'sam. Ar naa achaq'sam aha' naa kaat kilom wii' i tinamit.

¹³Je' aj wili i naa kik'uxum i aj Israel aha' naakik'amariik reje wii' pan tokoom tinamit. Ch'uwa' wach i naa rojiik kik'uxum, inki weh i Dios.

¹⁴Eh re' hin je' wili i xnuq'or reh: QaJaaw Dios, re' hin ma' jank'al ta nutz'aj cho weh i ch'uwa' wach. Eh ma' jank'al taj i nuk'ux weh i chikop xakikimik chi kutkeel, je' wo' taqe chikop xa kikanteesjik kuum i josq'laj chikop, ni xata re' taqe i ch'uwa' wach.

¹⁵Re' reh je' wili i xuq'or reh: Wila' ma' nawaaj akojom i rusaa' tinamit chi chaq'teesb'al reh aakaxlanwi'k, neenuyeew q'ab' aweh chi ruuk' i rusaa' wakax neenachaq'saj, inki.¹⁶Eh re' Dios je' wili i xuq'or weh: Hat rak'uun winaq re' hin naa nuye'em i wi'jaleel chikinaah i aj Jerusaleem. Xa naa chik rupajariik i kiwa', eh naa rutib'iik kik'ux. Re' i kihaa' xanaa wo' rupajariik, eh ma' k'isiin ta naa kiyo'jiik.¹⁷Eh noq ma' xta chik i kiwa' kihaa', xak'ul chik naakitz'ehtaam panaq'kiwach, naa kiyo'jiik. Xa re' la' xa ruum wo' i kimahk naa rusahchiik kiwach, inki.

¹Re' i QaJaaw Dios je' wili i xuq'or weh: Re' hat rak'uun winaq cha sik' jino'q i q'aslaj kuchilo, re' ruuk' i johyb'al, ruuk' i re' neenajoy i rismaal aanaah i awisinchii'. Eh oxb'ohr neenawisaj aawismaal noq neenapaj pan pexu.²Eh jumb'ohr aawismaal neenak'at panyejaal i tinamit noq neenkuxik i q'aq'inik, nee wo' chik nayok' jumb'ohr-oq aawismaal neenakut chi junsuut i tinamit. Eh re' chik i jumb'ohr chi aawismaal neenakut pan taxaaj xa aha' neenk'amarik reje ruum i teew, re' re' rehtalil chi xailook' chik i nuyeew nujosq'iil chikinaah je' rukab' i q'aslaj ch'ihch'.³Eh naa wo' achopom cho k'isinoq aawismaal reh chi nee natus chi rooq aso'.⁴Chi riij i re' naa wo' chik achopom cho kiib' ixib'-oq chi naq'awach aawismaal neenakut yejal q'aaq' re' re' naruk'atwiik keh chu'nchel i tinamit Israel.

⁵Re' i QaJaaw Dios je' wili xuq'or: Je' aj wili i naa ruk'ulum i tinamit Jerusaleem, ruum re' wo' naq i hin xin ye'wik kajaawriik, chikiwach i kok' tinamit i nimaq tinamit.⁶Eh re' keh ma' xkaaj ta chik kinimam taqe i nuk'uhb'aal, eh ma' xkaaj ta wo' kianam i xnuq'or keh. Xti ma' kinimanik ta wo' chik k'isinoq i keh xkiq'at wo' chik wach i wilkeeb' pankok' tinamit, eh i wilkeeb' pan nimaq tinamit wilik chi kijunsuut.

⁷Eh re' hin i Dios je' wili xnuq'or keh: Re' taq i hat xti q'e' wo' chik ma' xat nimanik ta taq ma' xata je' rukab' i xkian tinamit wilkeeb' taq cha junsuut. Ma' xanimaj ta taq i nuk'uhb'aal, eh ma' xanimaj ta wo' taq i k'uhb'aal inkinimaj i tinamit wilkeeb' taq cha junsuut.⁸Eh ruum i re', re' hin i Dios xchalik nujosq'iil cha naah taq i hat aj Jerusaleem. Naa taq kaat nuye'em chutojariik aamahk reh chi naakilom i wilkeeb' panimaq tinamit.⁹Ruum chi ma' nakanaa' ta taq rub'aan ach'uwa' wach na'ojb'al, re' hin naa nuye'em ti' k'axik taq cha naah, re' ruuk' i ma' jank'al ta nuyeew chaloq, eh ma' naa ta wo' chik nuye'em.¹⁰Eh chaxilak taq i hat wilik taqe i ajaab'ees naa kik'uxum i kak'uun, eh wilik taqe ak'uunb'ees naa kik'uxum i kajaaw. Naa taq kaat nuye'em chutojariik amahk, eh re' i konaakikahniik chi k'achalkeeb' naa nutukem reje kiwach xa aha' yuuq'.¹¹Re' hin i k'achlik Dios xti korik i nuq'or chi naa taq nusacham awach, ma' naa ta nuketelaam taq k'isinoq awach. Ruum xach'uwa'risaj taq paam i nuSantolaj paat ruuk' i kilooq'jiik i tiyoox, ruuk' taq i ayiib' wach ana'ojb'al.¹²Eh achk'isiin ma' yejaal taq aatinamiit naa kikimiik ruum yab'ilaal, ruum wi'jaleel, eh re' k'isiin chik ma' yejaal naa kikanteesjiik kuum i aj ixowaal. Eh re' chik i ruqox naa nutukem kiwach xa aha', re' i nujosq'iil naa nuye'em chikinaah, xa je' chik rukab' i q'aslaj ch'ihch'.

¹³Korehtaal inwik'saj i nujosq'iil chikinaah, ruuk' i re' naa ruch'iklojiik nuk'ux. Eh noq wik'sam chik i nujosq'iil chikinaah naa kinab'eem chi re' hin i Dios aha' wilik i nuq'or i nub'an wo' hoq.¹⁴Re' hin naa nusacham taq awach, naa taq nuk'uhtaam ak'ixb'ilaal chikiwach i tinamit wilkeeb' taq cha junsuut. Eh re' i naakik'iik ar naakilom taq i naa ak'ulum.¹⁵Eh noq naa nuye'em i nujosq'iil taq cha naah, tojb'al taq riij aamahk chu'nchel taq naa kikaqse'lanik aweh. Naa taq kaat kib'ajam i wilkeeb' taq cha junsuut, eh naa kiyo'jiik noq naakilom taq i naa ak'ulum. Re' wili re' hin kin q'orik, inki i Dios.¹⁶Re' hin naa nuye'em i runimaal wi'jaleel taq cha naah re' i naa rusachwiik taq awach. Korik wo' hoq chi naa nuye'em wi'jaleel taq cha naah, sachb'al ta awach, korehtaal i nukanaa' chi ma' xta chik k'uxumb'al taq aweh.¹⁷Re' hin naa nuye'em i wi'jaleel, i yab'ilaal taq cha naah. Naa nutaq'aam taqe chaloq i josq'laj chikop, chi sachb'al taq awach, eh naa ta kaat kikanaam chi ma' xta chik taq awak'uun awixq'uun. Eh wilik taq aweh i hat i naa kikimiik panq'aq'inik, inki i Dios. Re' Ezequiel xuq'or chi mahk i loq'inik xatz'aqoj tiyoox

¹Re' i QaJaaw Dios je' wili i xuq'or weh:²Re' hat rak'uun winaq ti tz'ehtanoq reje chikinaah i yuuq' wilkeeb' Israel, cha q'oreej taqe panub'ihnaal.³Je' wili i neenaq'or keh: Hat taq najt anaah yuuq', hat taq rub'ohl yuuq', hat taq nim ha', i hat taq k'ixkaab', je' wili i ruq'or taq aweh i QaJaaw Dios: Re' hin naa nuk'amam chee q'aq'inik taq cha naah naa nusacham taq awach i hat najt taq anaah yuuq' re' kiloq'jik wii' i tiyoox.⁴Re' hin naa nusacham kiwach ar taqe aa artaal, re' i nayeew taq wii' aamayiij i hat taq aj Israel, naa nupaxem i tiyoox rujalwaach i q'iij re' inakoj taq chi aadios, eh naa nukansam taqe i koq chuwach i kitiyoox.⁵Naa nukutum i kiti'jolal i aj Israel chuwach taq aatiyoox. Eh re' i kib'aqil ar naa nukutum chi junsuut taq aa artaal.⁶Xa aha' pa' i tinamit naa apatiniik taq wii' naa rusachariik wach. Eh re' taqe inajt kinaah yuuq' wilik taq wii' aa artaal, inaloq'ej taq wii' tiyoox naa wo' rusachariik kiwach. Re' taq aatiyoox rujalwaach i q'iij naakixerariik, re' taq aa artaal i naakituhb'jiik wach ak'al. Chu'nchel i ayejaam taq i hat naa rusachariik kiwach.⁷Noq naa taq awilom chi ma' k'isiin taqe i kamnaq naakikahnik chi kutlik taq chaxilak, naa taq anab'eem chi xa re' wo' hin i k'achlik Dios.⁸Xa re' la' re' hin ma' naa ta nuye'em q'ab' chi naa taq akimiik chawunchelaal i hat taq aj Israel i tukimaj taq awach pantaq tokoom tinamit.⁹Eh re' taqe i naa kikahniik chi kok'achalkeeb' taq panaxilak, naa ruk'uliik cho pankik'ux chupaam taqe i tokoom tinamit nik' wach noq xwik'saj taqe chi ti' k'axik, ruum ma' xinkinimaj taj. Eh ruum chi xinkiq'eb' chi riij kik'ux i hin, re' chik i tiyoox xkiloq'ej. Re' keh ma' k'isiin ta naa ruchaliik kik'ixiik, ruum i ch'uwa' wach na'ojb'al inki a'n¹⁰Eh naa kinab'eem chi re' hin i k'achlik Dios ma' kinchukwik ta q'orik noq xnuq'or chi naa nuye'em ti' k'axik chikinaah naa wo' nuye'em tiko'q keh, inki Dios.

¹¹Eh re' i QaJaaw Dios je' wili i xuq'or weh: Re' hat chapohq'aaj paam aq'ab' chatohyaaj aawooq wach ak'al, ti oq'oq, cha k'er aachii' chi riij i kiyiib' wach na'ojb'al i aj Israel. Ruum re' keh wilik i naa kikimiik ruum q'aq'inik, wilik i naa kikimiik ruum wi'jaleel, wilik i naa kikimiik ruum yab'ilaal.¹²Re' taqe i wilkeeb' poo chi najt, naa kikimiik ruum yab'ilaal, re' taqe i ma' najt ta wilkeeb' naa kikimiik ruum q'aq'inik. Eh re' taqe i naa kikahniik chi k'achalkeeb' naa kikimiik ruum wi'jaleel. Je' re' noq naa wik'sam i nujosq'iil, chikinaah.¹³Eh noq naakilom i kiti'jolal i kitinamiit chi kutlik chi kixilak taqe i tiyoox, chi kijunsuut taqe artaal, chupaam taqe i ye'aab' najt kinaah, chinaah taqe inajt kinaah yuuq', chi ki'sil taqe chee' tz'inuj, chupaam i ye'aab' inkiyeew wii' inkohnik laj mayiij chuwach i tiyoox, naa kinab'eem chi re' hin i k'achlik Dios.¹⁴Re' hin naa nukanaam i kiye'aab' chi xan tz'irik chik paam, chi xa je' chik chiq yuuq', ar naa rutohq'iik reje pantz'eet reh i rookb'aal q'iij naa ruponiik chupaam i ye'aab' Diblat. Ruuk' i re' naa kinab'eem i aj Israel chi re' hin i k'achlik Dios, inki. Ponik reh i q'iij chi naa rusahchiik wach i tinamit Israel

¹Re' i QaJaaw Dios je' wili i xuq'or weh:²Re' hat rak'uun winaq, cha q'or keh i aj Israel chi re' hin je' wili i nuq'or chikiij:
Ponik reh i q'iij chi naa rusahchiik wach i kitinamiit, je' wo' i kiye'aab'.³Eh yu'naak naa rusachariik awach taq i hat aj Israel, naa nuye'em nujosq'iil, naa nuq'atam i q'orik taq cha naah. Eh naa taq kaat nuye'em chi tojariik riij taq i yiib' wach na'ojb'al.⁴Re' hin ma' naa ta nuketelaam taq awach, naa taq kaat nuye'em chutojariik amahk. Korehtaal taq inatoj riij chu'nchel i a'nam chaloq. Ruuk' i re' naa taq anab'eem chi re' hin i k'achlik Dios.

⁵Re' hin i Dios je' wili i nuq'or taq aweh:
Re' i runimaal ti' k'axik naa nuye'em taq cha naah xa rutahqeem chik riib'.⁶Yu'naak xponik chik i ruq'ijil chi naa rusachariik taq awach. Eh xti korik chi naa rusachariik taq awach.⁷Eh xponik chik ruq'ijil chi naa rusachariik taq awach i chupaam i tinamit wili. Eh ma' naa ta chik rub'aan i ninq'iij chinaah taqe i yuuq', ruti'kiil la' taq chik ak'ux i naa ruwihiik.⁸Yu'naak xa chi jumehq'iil naa nusacham taq awach ruum i nujosq'iil. Naa nuq'atam i q'orik taq cha naah, ruuk' taq i xa a'n naa taq kaat nuye'em chutojariik riij ayiib' wach na'ojb'al.⁹Eh ma' naa ta nuketelaam taq awach. Naa la' taq kaat nuye'em chutojariik riij taq ayiib' wach na'ojb'al, naa taq atojom riij chu'nchel i taq i xa a'n. Ruuk' i re' naa taq anab'eem chi re' hin i k'achlik Dios xin ye'wik taq aweh chutojariik aamahk.

¹⁰Xponik chik i q'iij chi naa rusachariik taq awach, eh chi naa taq atojom wach i ayiib' wach na'ojb'al, ruum xooj chi nimaal eh xanimb'isaj taq awiib'.¹¹Re' i yiib' wach na'ojb'al xooj chi nimaal, eh ma' holohik taj i ruk'am chaloq. Eh re' kib'ehomal, re' runinqaal kiwach ma' xta naa rokiik wii'.¹²Eh xponik chik i q'iij, i ru orahiil, chi ma' naa ta rusuuqb'iik ruk'ux i loq'ool, ni xata re' i aj k'aay. Ruum re' hin naa nuye'em taqe chutojariik i kimahk i aj Israel.

¹³Ruum awach i xuk'ayej i rak'aal, xama' naa ta wo' chik rehchaam atoob' ta konee wo' naq ink'acharik. Eh ma' nee ta wo' chik i ruyoj wach i k'aay xub'an, eh ma' jino'q chik i yiib' wach runa'ojb'al naa rukahniik chi k'achlik.

¹⁴Eh naa wo' naq ruxuljiik i tuun reh ojik q'aq'ineel, chu'nchel naq i naa kiyejaam kiib' xa re' la' xama' awach ta wo' naa rojiik. Ruum re' nujosq'iil naa nuye'em chikinaah i aj Israel.¹⁵Chi riij i tinamit naa ruwihiik q'aq'inik, eh chupaam i tinamit naa ruwihiik wi'jaleel, eh kaq yab'ilaal. Re' naa kiwihiik panab'iix ruuk' q'aq'inik naa kikantesjiik, re' taqe i naa kiwihiik pan tinamit wi'jaleel, kaq yab'ilaal naa rukansanik keh.¹⁶Eh wilik taqe i naakimolom chi elik pantaq raxchee' je' rukab' noq inkimol chi elik i paloma ruum kiyo'jiik, ar naa koq'iim ruum i kiyiib' wach na'ojb'al.¹⁷Xa naa chik kisiksotiik ruum kiyo'jiik naa rukahniik chi ma' xta rukowiil i kooq kiq'ab'.¹⁸Eh naa kikojom i q'as wach itz'ihy chikiij. Naa rub'arb'otiik i kiti'jolal ruum kiyo'jiik naa kijoyom i rismaal kinaah, xanaa chik ruchaliik kik'ixiik.¹⁹Eh naakiq'eb'em i ki oro, i ki plata pantaq b'eeh. Ni xata re' i oro ni xata re' i plata naa ruko'liniik keh noq naa nuye'em nujosq'iil chikinaah. Eh ma' naa ta chik kiloq'om kiwa', kihaa' ruuk' ki oro i ki plata, ruum re' wo' taqe re' xq'eb'wik keh pamahk.²⁰Ruum q'e' xkiyeew ruloq'il i ki oro i ki plata xkinimb'isaj kiwach, eh ruuk' taqe re' xkiyejaa' kiyiib' wach tiyoox. Ruum aj re', re' hin naa nuye'em pankikapeb'aal chi xa je' chik sohk', i ki oro i ki plata.²¹Re' hin naa taqe nuye'em pan kiq'ab' i tokoom tinamit. Eh re' tinamit xiik' naah yib'kiil wach i kina'ojb'al naa ruk'uliik elq'anoq i kib'ehomal, naa kich'uwa'risam wach.²²Re' hin ma' naa ta chik nutob'eem taqe, naa nuye'em q'ab' chi naakokiik i aj ixowaal chupaam i nupaat re' naq i q'e' looq' chi weh, naakich'uwareem paam. Naa kichaliik i yiib' wach kina'ojb'al naa kelq'aam i chib'ih i wilik ar.

²³Re' hat cha yejaa' jino'q i karena rehtalil chi naa ruchopariik kinaah ruum re' tinamit wili xa re' kaansanik xa re' i yiib' wach inki a'n²⁴Re' hin naa nuye'em q'ab' chi naa kichaliik i yiib' wach kina'ojb'al, naa kichopom naah taqe paat pan tinamit. Eh naawisam i runimaal kiwach i wilik kajaawriik, re' i kiye'aab' q'e' naq looq' keh naa ruch'uwareesjiik paam.²⁵Naa rusachariik kiwach, naa naq chik kisik'im i rusuqkiil kik'ux, ma' naa ta chik kireqem.²⁶Xa rutahqeem chik riib' i ti' k'axik naa ruchaliik chikinaah, xa re' chik i re' naa kib'iram. Eh naa naq kipahqaam kuuk' i jalal nuq'oral, xama' xta wo' naa ruq'orariik keh. Ma' naa ta chik kitijiik ruum i k'amal kib'eeh aj tiij, ruum i wilik runa'ojb'al.²⁷Re' reey naa rukojom ruq'eq' so' chi riij, re' i k'amal b'eeh naa rutib'iik ruk'ux. Re' taqe i tinamit naakib'arb'otiik ruum kiyo'jiik. Eh naa nuye'em taqe chutojariik i kimahk, chi riij i yiib' wach na'ojb'al xkian. Ar naakinab'eem chi re' hin i k'achlik Dios, inki. Re' i Ezequiel xk'uhtjik reh parusaq wiriik i yiib' wach na'ojb'al xb'aan Jerusaleem

¹Hoob' q'iij-oq chik ruk'amam rub'eeh i ruwaaq' poh reh i ruwaaq' haab' qak'amariik reje Babilonia. Eh noq wilkiin panupaat wuch'ihil taqe i aj Judá nimaq wach kikamaj xwik'raaj noq xuyeew q'ab' i QaJaaw Dios chi nunaah.²Eh jinaj b'ila' chik xwilow wach je' ruwii' winaq, eh xwilow chinaah rutuuq xutik'aa' qohoq i xa je' chik xaq q'aaq'. Eh nah rutuuq xutik'aa' johtoq i xanrob'rotik chik xa je' chik rukab' i q'an ch'ihch' inreprotik wach.³Re' i je' ruwii' winaq re' re' xuyub' b'ila' chik chaloq i q'aaq' xuchop chi rismaal nunaah, eh xiruksaj johtoq i Dios ruuk' i rajaawriik, xiruk'am reje chi chii' i puerta Jerusaleem noq xwilow panusaq wiriik. Ximponik chik rupab'aa' chi chii' i puerta wilik reje panookb'al reh i tinamit pantz'eet reje reh i rookb'aal i q'iij. Re' wilik wii' i tiyoox i nuksanik wach i rujosq'iil i Dios.⁴Eh ar xwilow wo' chik wach i ruloq'il i QaJaaw i qaDios i hoj, hoj aj Israel. Je' rukab' i rujosq'iil xwilow wach panusaq wiriik wach k'ixkaab'.

⁵Re' i je' ruwii' winaq je' wili i xuq'or weh: Hat rak'uun winaq ti tz'ehtanoq reje pantz'eet reh i rookb'aal i q'iij, inki. Re' hin xintz'ehtanik wo' reje ar. Eh panookb'al i koq ma' najt ta ruuk' i puerta wilik wii' i artaal ar wilik i tiyoox i nuksanik wach i rujosq'iil i Dios.⁶Eh je' wo' chik wili i xuq'or weh i je' ruwii' winaq: Hat rak'uun winaq ¿Mi nawil i xiik' naah yib'kiil wach inki a'n ayu' i aj Israel? Ruum inki a'n re' re' k'ahchi' kiin kesam reje pan nuSantolaj paat. Re' hin i nuq'or aweh chi ko wilik i xiik' naah yib'kiil wach naa awilom, inki.

⁷Eh xiruk'am b'ila' chik i koq panookb'al chi chii' i rupaat i Dios, eh chuwach i tz'aq xwilow wach jinaj i hoop.⁸Eh je' wo' chik wili i xuq'or weh: Hat rak'uun winaq chanimb'isaj i hoop re' re', inki. Eh re' hin xnunimb'isaj wo' hoq i hoop, eh xnureq jinaj i ookb'al.⁹Je' wo' chik wili i xuq'or weh: Okeen i koq ar neenawilow i xiik' naah yib'kiil wach inki a'n inki.¹⁰Eh noq xinokik i koq xwilow chi chuwach tz'aq tz'ihb'amaj i kehtalil i chikop xa kijukem kiib' noq kib'ehik, i kehtalil i chikop xiik' naah yib'kiil kiwach. Eh je' wo' i kehtalil i tiyoox inkiloq'ej i aj Israel.¹¹Eh chikiwach taqe i ehtalil re' re' wilkeeb' i koq i lajeeb' ru kajwinaq chi winaq, re' taqe i k'amal kib'eeh i aj Israel, eh pankiyejaal wilik i Jaazanias rak'uun i Safán. Eh k'ahchi' keeb' i koq chi loq'inik chi kiju'junaal kiyohq'eem kisansario xaq'eq chik paam i rusib'eel i insensia injohtik taxaaj inki a'n¹²Re' i je' ruwii' winaq je' wili i xuq'or weh: ¿Mi nawil inki a'n taqe i k'amal kib'eeh i aj Israel, k'ahchi' kiloq'em i tiyoox chi q'eeqmaal? Re' keh inkikapaaj chi ma' k'ahchi' ta wilow taqe, chi ma' wilkiin ta chupaam i tinamit wili.¹³Re' i hat ma' xata re' re' naa awilom ko wilik la' i xiik' naah yib'kiil wach naa kia'nam, inki.

¹⁴Eh xiruk'am reje chi chii' i ru puertahiil i rupaat i QaJaaw Dios, re' i puerta wilik reje pantz'eet reh i rookb'aal q'iij. Eh wilik taqe i ixoq xwilow kiwach ar xasuq chik kioq'ik chi riij i tiyoox Tamuz rub'ihnaal.¹⁵Je' wo' chik wili i xuq'or weh: ¿Mi nawil inki a'n ixoq re' re'? Eh ma' xata re' re' naa awilom ko wilik i xiik' naah yib'kiil wach naa awilom, inki.

¹⁶Eh xiruk'am i koq chupaam i rupaat i QaJaaw Dios, eh ruuk' i koq i artaal xwilow chi ar wilkeeb' i ho'oob' ru ka'winaq chi winaq, re' i kiij kiye'em reje reh i wilik wii' i rupaat i QaJaaw Dios. Ar kika'yik reje parelb'aal i q'iij kipach'aam kiib' korehtaal inkireq wach ak'al ruuk' i yejal kiwach chi looq'jiik reje i q'iij.¹⁷Eh re' QaJaaw je' wo' chik wili i xuq'or weh: ¿Mi nawil taqe re'? Re' taqe i aj Judá ma' xata re' i panupaat inki a'n i yiib' wach na'ojb'al, inkinujisaj la' wo' paam i tinamit ruuk' i yiib' wach na'ojb'al. Re' keh k'ahchi' kijosam wach i nujosq'iil, imponik ruchuhkiil panuju' i loq'inik inki a'n¹⁸Re' hin yohb'aal wach i nujosq'iil naa nuye'em chikinaah, ma' naa ta nuketelaam kiwach. Atoob' ta kik'er kichii' chi tiij, re' hin xama' naa ta wo' b'iram taqe, inki weh panusaq wiriik. Re' i Ezequiel xk'uhtjik reh parusaq wiriik i ti' k'axik xkik'ul i aj Jerusaleem

¹Re' hin je' wili i xwilow panusaq wiriik, jinaj i kowlaj q'orik xb'aan chaloq, je' wili i xuq'or: Yu'naak xi k'ulik chik iloq kiyohq'eem kiq'aslaj ch'ihch' chi kiju'junaal naakiye'wiik chutojariik i kimahk i tinamit wili, inki.²Eh i waqiib' taqe i winaq kiyohq'eem kiq'aslaj ch'ihch', xi okik i koq chi chii' i puerta wilik taxaaj, pantz'eet reje reh i rookb'aal q'iij. Eh chi kixilak taqe re' wilik jinaj i winaq holohik itz'ihy lino i ruso' rukojom rub'ak'am nah rutuuq i jinaj lemeta chi rax ha' chi tz'ihb'al. Eh noq xi okik i koq xkipab'aa' kiib' chuwach i artaal q'an ch'ihch' ruyej-aal.

³Eh re' i ruloq'il i QaJaaw Dios i hoj, hoj aj Israel, xwilow chik chi xelik reje chikinaah i k'achaach je' kiwii' ánjel xooj panookb'al reh i rupaat i Dios. Re' i QaJaaw Dios xuyuq'eej reje i winaq holohik itz'ihy lino i ruso', re' i rub'ak'am nah rutuuq i rax ha' reh tz'ihb'al.⁴Je' wili i xuq'or reh: Yu'naak hiy chab'ehuj paam chu'nchel i tinamit Jerusaleem. Neenakoj rehtalil i yejal kiwach i tinamit ruuk' aatz'ihb'aal, chu'nchel i ti' inkik'raaj inkiyot' i kik'ux chi riij i xiik' naah yib'kiil wach na'ojb'al imb'aan chupaam i tinamit, inki.⁵Eh xb'iraj wo' hoq chi re' i QaJaaw Dios je' wili i xuq'or keh i waqiib' chi winaq: Re' taq i hat hiy taq pan tinamit chi xam b'eeh chi riij i winaq re' re'. Ma' naa ta taq i akuyum i kimahk, ma' naa ta aketelaam taq kiwach.⁶Naa la' taq rukuxiik akansam i ma' kojooj ta kehtalil chi rijib' winaq, chi rijib' ixoq, chi k'ijolaq, chi q'ahxoq, chi ha'lak'un. Xa re' la' ma' nee ta taq inatz'aj jino'q taqe i wilik kehtalil yejalkiwach, inki. Re' hin xwilow chi re' b'ila' chik taqe i k'amal kib'eeh i aj Israel peet xkikansaj, re' i wilkeeb' chuwach i rupaat i Dios.⁷Eh je' wili i xuq'or keh: Yu'naak hiy taq chach'uwa'risaj taq cho paam i nupaat cha nujisaj taq chi kamnaq, inki. Re' keh xiooj wo' chi kansanik chupaam i tinamit.

⁸Eh noq kaansanik inki a'n re' hin xin kahnik chi wutkeel, xnupach'aa' qohoq wiib' wach ak'al, q'e' xtib'ik nuk'ux. Xnuk'er nuchii' chi q'orariik chi je' wili: QaJaaw Dios ¿Mi naa rukuxiik asacham kiwach re' i kiqox i aj Israel noq naa aye'em aajosq'iil chikinaah i aj Jerusaleem? kinki.

⁹Eh je' wili xuq'or weh: Re' taqe i aj Israel, taqe i aj Judá yohb'aal wach i kimahk, re' i kitinamiit nujinaq chi aj kaansoom, eh nujinaq chi ma' korik ta laj na'ojb'al. Re' keh inkikapaaj chi ma' wilkiin ta chupaam i tinamit wili, eh chi ma' k'ahchi' ta chik wilom i kiyiib' wach na'ojb'al.¹⁰Je' re', noq re' hin ma' naa ta nuketelaam k'isinoq kiwach, naa taqe nuye'em chutojariik riij chu'nchel i kiyiib' wach na'ojb'al, inki.

¹¹Eh re' i winaq holohik itz'ihy lino i ruso' rukojom i ruk'amam cho naah rutuuq i rax ha' tz'ihb'al, xsutinik b'ila' wo' chik chaloq je' wili i xuq'or reh i QaJaaw Dios: Yu'naak xponik chik nub'an i xaq'or weh, inki. Re' i ruloq'il i Dios xelik chupaam i rupaat

¹Eh xwilow wo' hoq panusaq wiriik chi wilik i he'lik chikinaah i kijib' chi k'achaach, re' i xwilow kiwach paam peet, jinaj i tzunaab' yej-amaj ruuk' i holohaq ab'aj safiro.²Re' i QaJaaw Dios je' wili i xuq'or reh i winaq holohik itz'ihy lino i ruso': Okeen i koq chupaam i kotokaq wilik chi ki'sil i kijib' chi k'achaach. Neenachop jumohq'-oq i nah wach q'aaq' qoplik i ruq'aq'al wilik chi kixilak i k'achaach neenahilej chinaah i tinamit, inki reh. Re' i winaq re' re' xokik wo' i koq ar noq xwilow.

³Re' taqe i kijib' chi k'achaach ar wilkeeb' reje pansak'aaj reh i rookb'aal q'iij reh i rupaat i Dios noq xokik i koq i winaq. Eh re' i ookb'al wilik i koq ma' najt ta ruuk' i rupaat i Dios xnujik chi suutz'.⁴Eh re' i ruloq'il i QaJaaw Dios xelik reje chikinaah i kijib' chi k'achaach ar chik xooj panookb'al reh i rupaat i Dios. Re' i chii' paat xan saqumanik chik xub'an i ruloq'il i QaJaaw.⁵Eh re' choqik i rub'an i kixiik' taqe i k'achaach x-ib'irjik chaloq chupaam i ye'aab' wilik cho kochiriij i rupaat i Dios, xa je' chik rukab' noq i rub'an chee kowlaj q'orik i QaJaaw Dios nim rajaawriik.

⁶Eh re' i QaJaaw Dios xuq'or wo' chik reh i winaq holohik itz'ihy lino i ruso' chi naa ruchopom jumohq'-oq i nah wach q'aaq' wilik pankiyejaal i kijib' chi kotokaq, re' i wilkeeb' wii' i kijib' chi k'achaach. Eh re' i winaq xujil i koq riib' ruuk' i jinaj keh i kotokaq.⁷Xchalik i jinaj keh kijib' chi k'achaach, xiyub' b'ila' chik chaloq i q'ab' xuchop i jumohq' chinaah wach q'aaq' wilik pankiyejaal, eh xuyeew pan q'ab' i winaq holohik itz'ihy lino i ruso', re' reh xuk'ul wo' hoq xelik cho ar.⁸Eh re' hin xwilow chi jinaj i je' q'ab' winaq wilik cho ri'sil kixiik' i k'achaach re' re'.

⁹Xwilow wo' i kijib' chi kotokaq ju'jun i wilik pankicheel i ju'jun chi k'achaach. Eh re' taqe i kotokaq re' re' xan rob'rotik chik i kiwach, xa je' chik holohik laj ab'aj Crisolito.¹⁰Eh re' taqe i kijib' chi kotokaq eliik wach kininqaal, eh chupaam taqe i ju'jun chi kotokaq wilik ta b'ila' wo' chik taqe i ju'jun chi kotokaq.¹¹Re' taqe i kotokaq xa aha' kiooj xama' kisutinik ta wo' hoq. Re' taqe k'achaach ojik inki a'n panyejaal jinajkiooj wii'.¹²Re' taqe i k'achaach re' re', yohb'aal wach inaq' kiwach xan rob'rotik chik je' chikiwach, je' chikiij, je' wataq kiq'ab', je' wataq kixiik'. Je' wo' taqe i kijib' chi kotokaq imb'esanik keh ma' k'isiin wo' naq' kiwach.¹³Eh re' hin Ezequiel xb'iraj wo' hoq chi re' kijib' chi kotokaq re' re' kareta i rub'ihnaal inkiq'or.¹⁴Re' taqe i kijib' chi k'achaach re' re' kajtarchel wilik i kiwach chi kiju'junaal. Re' peet kiwach je' inka'yik imas wakax, re' rukab' kiwach je' inka'yik winaq, re' i roox kiwach je' inka'yik kaq b'ahlam, re' i rukaaj kiwach je' inka'yik xihk.

¹⁵Re' taqe i kijib' chi k'achaach xirupinik chik johtoq taxaaj noq xwil, re' wo' taqe i xwilow cho kiwach chi chii' i nim ha' Kebar.¹⁶Noq kiooj reje i k'achaach kiooj wo' haa' i kotokaq. Noq inkihe' paam i kixiik' reh i wuktik i k'achaach inkiyejaa' wo' kiib' i kotokaq keh.¹⁷Eh noq kipahik i k'achaach, kipahik wo' hoq i kotokaq. Noq kiwutik reje i k'achaach, kiwutik wo' haa' i kotokaq. Ruum re' taqe k'achaach inye'wik kik'achariik.

¹⁸Re' i ruloq'il i QaJaaw Dios xelik cho panookb'al reh i rupaat i Dios xooj ruyeew riib' chikinaah taqe i kijib' chi k'achaach.¹⁹Xwilow b'ila' chik noq xkihe' paam i kixiik' xiwutik reje chinaah i wach ak'al. Eh xi wuktik wo' reje haa' kijib' chi kotokaq wilik pankicheel, ar xiooj pa'lojoq chi chii' i ru puertahiil i rupaat i Dios, re' i puerta wilik reje parelb'aal q'ij. Eh re' i ruloq'il i qaDios i hoj, hoj aj Israel wilik chikinaah.

²⁰Re' hin xnunab'eej chi re' wo' taqe i kijib' chi k'achaach xwilow kiwach parutzunaab' i QaJaaw i qaDios i hoj, hoj aj Israel, ar chi chii' i nim ha' Kebar. Xnukoj rehtaal chi re' wo' taqe i kijib' chi k'achaach.²¹Eh xwilow wo' hoq chi kajkaj i kiwach wilik chi kiju'junaal, eh kajkaj kixiik'. Eh chi ri'sil i kixiik' xwilow chi wilik taqe i je' q'ab' winaq.²²Kajtarchel wo' wilik i kiwach, re' wo' kika'yik i xwilow kiwach chi chii' i nim ha' Kebar. Eh kikajcheel jinaj b'ila' chik ojik inki a'n wii'. Re' i yiib' wach na'ojb'al xkian i k'amal b'eeh

¹Re' hin xwilow panusaq wiriik chi xiruk'am reje i Ruxlab'al QaJaaw Dios chi chii' i puerta wilik reje panelb'aal reh i rupaat i Dios. Eh inwilow ar wilkeeb' i hoob' ru ka'winaq chi winaq, chi kixilak i re' xnunab'eej wach i Jaazanias rak'uun i Azur, je' wo' hoq i Pelatías rak'uun i Benaía, re' taqe i k'amal kib'eeh i tinamit.²Re' i QaJaaw Dios je' b'ila' wili i xuq'or weh: Re' aj taqe i winaq wili kib'anik i ti' k'axik, eh inkiyejaa' wach i yiib' wach na'ojb'al chupaam i tinamit wili.³Eh je' wili inkiq'or: Re' hoj neerub'an chi neenqayejaa' qatinamiit ar neenqako'leej qiib'. Re' qatinamiit je' rukab' jino'q i xun, eh re' hoj je' hoj tiwik chupaam, inki taqe.⁴Je' re' noq re' hat, cha q'or rib'iral keh panub'ihnaal i ti' k'axik naa ruchaliik chikinaah, inki.

⁵Re' i Ruxlab'al i QaJaaw xuyeew chi nunaah xuq'or weh chi naa nuq'orom chi je' wili: Je' wili i xuq'or taq cho chawiij i QaJaaw: Re' taqe i aj Israel xa reh reh inkiq'or eh xa reh reh inkiyejaa' wach, xa re' la' re' hin weht'al chib'ih i wilik pankik'ux.⁶Re' taq i hat ma' k'isiin ikaansanik taq xa a'n xanujisaj taq chi kamnaq paam i tinamit.⁷Ruum aj re', re' hin i Dios xti korik i nuq'or taq aweh i hat aj Jerusaleem chi naa taq kaat nuk'amam taqe reje pan tokoom tinamit, je' naa jinaj xun xa re' la' re' jilow i tiwik naa kiwihiik chupaam ma' re' ta chik i taq i hat, re' la' taq i xakansaj i hat.⁸Re' taq i hat ma' k'isiin taq tiyo'jik ruum i q'aq'inik, eh re' hin naa nuye'em i q'aq'inik taq cha naah.⁹Re' hin naa taq kaat wesam reje ayu' naa taq kaat nuq'asam pan kiq'ab' i tokoom tinamit, naa taq kaat nuye'em chutojariik i aamahk.¹⁰Ruuk' i q'aslaj ch'ihch' naa taq akanteesjiik, naa nuq'atam i q'orik taq cha naah. Eh pank'ula't reh i ye'aab' Israel naa nutoq'aam, reh chi naa taq anab'eem chi re' hin i k'achlik Dios.¹¹Re' taq aatinamiit ma' naa ta chik rukamaniik taq aweh chi je' xun, eh ma' naa ta wo' chik taq akamaniik i hat chi je' tiwik. Re' hin naa nuq'atam i q'orik taq cha naah, pank'ula't reh i Israel.¹²Ruuk' i re' naa taq anab'eem chi re' hin i k'achlik Dios. Re' taq i hat ma' xanimaj ta taqe i nuk'uhb'aal, eh ni xata xa a'n i xnuq'or taq aweh. Re' la' chik taq i xatijej i yiib' wach na'ojb'al inki a'n i tinamit wilik taq chi aajunsuut, inki i Dios, inki Ezequiel.

¹³Eh re' hin xtohq'ik chik nuq'orom rib'iral i ti' k'axik naa ruchaliik, eh xwilow xkimik chik i Peladias rak'uun i Benaía. Eh re' hin xnupachaa' wiib' wach ak'al, xnuk'er nuchii' chuq'orariik chi je' wilik: QaJaaw Dios ¿Mi naa rukuxiik akansam re' i kiqox i aj Israel? kinki. Re' i Dios xuq'or chi naa wo' chik resam taqe panti' k'axik i aj Israel

¹⁴Re' i QaJaaw Dios je' wili xuq'or weh:¹⁵Re' hat re' taqe tinamit wilkeeb' Jerusaleem, k'ahchi' keeb' chi q'orik chikiij i aj Israel re' taqe i xi k'amarik reje pan tokoom tinamit je' wili inkiq'or: Re' taqe aj Israel najt wilkeeb' ruuk' i QaJaaw ma' nee ta rub'aan chi neenkiloq'ej, xkahnik qeh i ye'aab' wili inki taqe.¹⁶Re' hat cha q'or keh i aj Israel, chi re' hin i Dios je' wili i nuq'or: Korik chi re' hin xintukinik reje kiwach noq xiooj pan tokoom tinamit, xa re' la' xama' najt ta wo' naa kianam cho ar. Eh re' wo' hin wilkiin kuuk' noq wilkeeb' cho chupaam taqe i tinamit re' re'.¹⁷Cha q'or wo' keh chi je' wili i nuq'or: Chi re' hin naa wo' chik wesam taqe cho chupaam i tinamit wilkeeb' ponoq wii'. Naa wo' chik numolom kiwach pan kitinamiit, naa wo' chik nuye'em keh i tinamit Israel.¹⁸Eh noq wilkeeb' chik pan kitinamiit naa rukuxiik kesam i kitiyoox, ma' naa ta chik kianam i ch'uwa' wach loq'inik inki a'n¹⁹Re' hin naa nujalam wach i kánima je' kowiil ab'aj ak' laj ánima, ak' laj uxlab'al chik i naa nuye'em keh.²⁰Reh chi naa kianam i nuq'or keh, eh naakinimam taqe i nuk'uhb'aal. Chi je' re' naa kikahniik chi nutinamiit taqe, eh re' chik i hin naa nukahniik chi ki Dios.²¹Re' taqe i inkiyeew kik'ux chub'anariik ch'uwa' wach na'ojb'al, i loq'inik tiyoox naa nuye'em taqe chutojariik riij i kiyiib' wach na'ojb'al, inki i QaJaaw Dios.

²²Re' taqe i kijib' chi k'achaach xkihe' ikixiik' xirupinik reje, eh re' taqe i kijib' chi kotokaq xiooj wo' haa' chikiij. Eh wilik chikinaah i ruloq'il i qaDios i hoj, hoj aj Israel.²³Eh re' i ruloq'il i QaJaaw Dios xelik b'ila' chik reje panyejaal i tinamit xooj ruyeew riib' chinaah i yuuq' wilik reje pareeb'aal q'iij reh i tinamit.²⁴Eh xiruk'am b'ila' wo' chik reje Ruxlab'al i QaJaaw Dios ar Babilonia, re' hoj k'amooj reje wii' kuuk' i wuch aj Israel. Re' taqe i wili panusaq wiriik xwilow, re' taqe i xuyeew chi k'uhtjik i QaJaaw Dios. Eh xnumay rilariik i xk'uhtjik weh panusaq wiriik.²⁵Eh re' hin xkuxik nuk'utjaam keh taqe i wuch'ihil ponoq pan tokoom tinamit, nik' nimaal i xuyeew weh chi naab'jik i QaJaaw Dios. Re' i Ezequiel xuk'uhtaaj nik' wach noq naa kik'amariik reje pan tokoom tinamit i aj Jerusaleem

¹Re' i QaJaaw Dios je' wili xuq'or weh:²Hat rak'uun winaq k'acharik i na a'n chi kixilak taqe ma' kinimanik taj. Wilik naq' kiwach xama' kilwiik ta wo' hoq, wilik kixikin xama' ki-ib'irinik ta wo' hoq, eh xama' kinimanik ta wo' hoq.³Re' hat rak'uun winaq cha yejaa' taqe i chib'ih aweh, je' ti chik ojik aweh pan tokoom tinamit. Eh pan q'iij nee ti elik reje, chikiwach chu'nchel, nee ti elik reje i hat patim wii' nee tiooj chupaam chik jino'q i ye'aab', chi je' re' nee oon naq inche kireq chi riij chi ma' kinimanik taj.⁴Eh pan q'iij chikiwach i keh neenawesaj taqe reje i chib'ih aweh, je' cho ojik i na a'n je' cho naa aweliik reje chupaam i tinamit wilkaat wii' neena a'n awiib'.⁵Chi riij i re' neenahop jino'q i hoop chuwach i tz'aq, eh chikiwach chu'nchel nee ti ik'ik reje ar awuch'ihil taqe i chib'ih aweh.⁶Eh parokiik i q'iij nee nayeew reje nah atileb' i chib'ih aweh, nee ti elik reje chikiwach chi kunchelaal, nee nab'ur aawach reh chi ma' nee ta nawil paam i tinamit. Ruuk' i re' naa aye'em rehtalil keh i aj Israel chib'ih i naakik'ulum, inki weh i Dios.

⁷Eh re' hin xnub'an wo' i xuq'or weh i QaJaaw. Xnuyejaa' i chib'ih weh, eh pan q'iij xwesaj chaloq je' rukab' noq imb'aan ojik pan tokoom tinamit. Eh xq'eq chik xnuhop wo' hoq i hoop wach tz'aq. Noq xokik i q'iij chikiwach chi kunchelaal xnuyeew cho nah nutileb' i chib'ih weh xinelik chaloq xnub'an wiib'.

⁸Eh chi junwaar chik je' wili i xuq'or weh i QaJaaw Dios:⁹Noq i nuq'or i hin chi re' taqe i tinamit Israel ma' kinimanik taj xkipahqaaj aweh chi chib'ih reet i xa a'n chi je' re'.¹⁰Wila' xkipahqaaj aweh chib'ih reet i xa a'n cha q'or keh chi re' hin kinq'orik chi re' i xa a'n re' re' rehtalil chuwach i reey wilik Jerusaleem, rehtalil chikiwach i aj Israel patim taqe ar.¹¹Chaq'or keh chi re' hat k'ahchi' aq'oriik rib'iral chib'ih i naakik'ulum ruum aha' wilik i xak'uhtaaj i hat je' re' i naa kia'nam i keh noq naa kik'amariik reje pan tokoom tinamit.¹²Re' i reey naa ruye'em cho nah tileb' i chib'ih reh, noq naa rokiik i q'equm naa relik cho chupaam i ruhopil i tz'aq naakihopom, naa rutz'apam i naq'wach reh chi ma' naa ta rilom paam i tinamit noq naa rumolom chi elik.¹³Xa re' la' re' hin naa nuchopom, eh naa nuk'amam reje pan tokoom tinamit Babilonia, re' i kiyuq'ul i aj Caldeo, eh ma' naa ta rilom paam i tinamit ar naa rukimiik.¹⁴Eh chu'nchel i ru soldado incha'jinik reh chi rujunsuut naa nutukem kiwach xa aha' yuuq'. Je' wo' re' i naa nub'anam keh i ruk'ihaal i ru soldado korehtaal inwik'saj i nujosq'iil chikinaah, je' naa nuyohq'eem nuq'as laj ch'ihch'.¹⁵Noq nutukem chik kiwach xa aha' pantaq tokoom tinamit ruuk' i re' naa kinab'eem chi re' hin i k'achlik Dios.¹⁶Re' hin wilik taqe inanuko'leem, reh chi ma' naa ta kikimiik ruum q'aq'inik, ruum i wi'jalel, ruum kaq yab'ilaal. Reh chi neenkiq'or rib'iral pantaq tinamit nee ki-ik'ik wii' i yiib' wach na'ojb'al inki a'n Ruuk' i re' neenkinab'eej chi re' hin i k'achlik Dios, inki. Re' ruq'orariik rib'iral tokoom chik ti' k'axik

¹⁷Re' i QaJaaw Dios je' wili i xuq'or weh:¹⁸Hat rak'uun winaq, re' hat cha k'uhtaaj chi ma' k'isiin ta tiyo'jik noq neena a'n awa', eh cha k'uhtaaj chi ti' ak'ux noq neena a'n ahaa'.¹⁹Eh cha q'or keh chu'nchel i aj Jerusaleem, je' wo' keh chu'nchel i aj Israel wilkeeb' ar chi je' wili: Re' i QaJaaw Dios je' wili i ruq'or: Re' keh ruuk' ruti'kiil k'uxliis naa kianam kiwa', eh panyo'jik naa kianam kihaa'. Re' i kitinamiit naa rusachariik wach, ruum i yiib' wach na'ojb'al inki a'n taqe i patineel wilkeeb' ar.²⁰Re' i kiye'aab' wilkeeb' patineel chupaam naa rusachariik kiwach. Re' i tinamit naa rukahniik chi xan tz'irik chik paam. Ruuk' i re' naa kinab'eem chi re' hin i k'achlik Dios, tiko'q keh, inki weh.

²¹Re' i QaJaaw Dios je' wili i xuq'or weh:²²Hat rak'uun winaq ¿Chib'ih reet noq inkiq'or i aj Israel chi re' i q'iij k'ahchi' rik'iik xama' k'ulariik ta wo' hoq ink'uhtjik keh pan kisaq wiriik i jalal ruq'oral i Dios? inki taqe.²³Re' i QaJaaw je' wili i xuq'or: Chaq'or keh chi re' hin ma' naa ta chik nuye'em q'ab' chi naa ruq'orariik taqe i q'orik re' re' ayu' Israel. Cha q'or keh chi xailook' chik inooj eloq wach ink'uhtjik keh pan kisaq wiriik taqe i jalal nuq'oral.²⁴Eh chi ma' naa ta chik ruk'uhtjiik keh pan kisaq wiriik ma' korik taj. Ma' naa ta chik i ruq'orariik rib'iral chi kixilak ma' korik taj.²⁵Ruum re' chik i hin i Dios naa nuq'oriik rib'iral chib'ih i naa ruk'ulariik, eh jumehq'iil naa rojiik eloq wach. Eh re' taqe i tinamit ma' kinimanik taj naakilom ruuk' naq' kiwach. Re' hin naa nuq'oriik rib'iral, eh naa wo' nub'anam, inki i QaJaaw Dios.

²⁶Re' i QaJaaw Dios je' wili i xuq'or weh:²⁷Re' taqe i aj Israel k'ahchi' kiq'orom chi re' i xaq'or rib'iral keh i nuk'uhtaaj aweh panasaq wiriik xti komajaa' ta yu'naak naa ruk'ulariik.²⁸Ruum aj re' cha q'or keh chi je' wili: Re' i QaJaaw Dios je' wili i xuq'or: Re' i nuq'oral naa rojiik eloq wach chi jumehq'iil, i nuq'orom rib'iral naa rojiik eloq wach, inki QaJaaw Dios. Re' i Dios xuq'or chi naa ruye'em taqe panti' k'axik inkikoj kiib' chi jalal ruq'oral

¹Re' i QaJaaw Dios je' wili i xuq'or weh:²Re' hat chaq'il taqe i panub'ihnaal i jalal nuq'oral inki a'n kiib' wilkeeb' Israel, ruum xa kiq'oral i keh inkiq'or, je' wili i cha q'or keh: Re' i QaJaaw Dios je' wili i ruq'or taq chawiij:³Q'e' ti' i naakik'ulum i jalal nuq'oral inki a'n kiib', ma' xta kina'ojb'al xa pankik'ux inchalik inkiq'or, ma' xta wo' hoq ink'uhtjik keh pan kisaq wiriik.⁴Re' taqe inkikoj kiib' chi jalal nuq'oral taq chaxilak taq i hat aj Israel, xa je' kikab' i pahar wilkeeb' panchiq yuuq'.⁵Ma' xtaj i k'ahchi' kiyejaam k'isinoq, ma' nkiyejaa' taj i tz'aq chi junsuut i tinamit, reh chi nee naq taq inako'leej awiib' i hat i aj Israel chuwach i q'aq'inik noq naa ruponiik i q'iij reh i nujosq'iil.⁶Aha' wilik inkilow pan kisaq wiriik ma' korik ta wo' hoq, re' inkiq'or rib'iral i ma' korik taj. Inkiq'or chi nuq'oral i hin, xanaah re' ma' re' ta wo' hin kintaaq'anik reje keh. Eh inkuy-eej chi naa nub'anam i hin inkiq'or rib'iral.⁷Re' ink'uhtjik keh pan kisaq wiriik inkiq'or ma' korik taj, re' inkiq'or rib'iral xachukuj q'orik. Eh inkiq'or chi nuk'uhb'aal i hin inkiq'or, re' hin xama' xta wo' nuq'orom keh.

⁸Re' QaJaaw Dios je' wili xuq'or: Ruum chi re' keh ma' re' tee korik inkiq'or, eh inkiq'or rib'iral i xama' korik ta wo' hoq ink'uhtjik keh pan kisaq wiriik. Re' hin naa nuye'em i nujosq'iil chikinaah, inki i QaJaaw Dios.⁹Re' hin naa nuye'em i ti' k'axik chikinaah i jalal nuq'oral inki a'n kiib', re' i ki-ilwik reh i ma' korik taj. Re' kiq'orik reh i xachukuj q'orik, ma' naa ta kisutiniik cho Israel. Eh ni xata re' i kib'ihnaal naa rokiik haa' panhuuj i tz'ihb'amaj wii' i kib'ihnaal i aj Israel. Ruuk' i re' naa kinab'eem chi re' hin k'achlik Dios.¹⁰Re' taqe i jalal nuq'oral inki a'n kiib', xkijot' i nutinamiit, noq inkiq'or chi naa ruwihiik i rusuqkiil k'uxliis ma' korik ta wo' hoq. Re' keh je' kikab' i kijosanik reh i ma' kow ta laj koraal tz'aq, xankichunej i koq wach.¹¹Re' hat cha q'or keh i xankichunej i koq wach i tz'aq re' re', chi re' i tz'aq naa ruq'ehb'iik wach ak'al noq naa nuye'em chee i runimaal jab', i nimaq taq saqb'och xa je' chik taq nimaq ab'aj, eh kaq suut teew paam.¹²Eh noq naa ruq'ehb'iik wach ak'al i tz'aq naa rupahqaljiik keh chi je' wili: ¿Chib'ih i xkamanik wii' i chuun xa chunej taq wii' wach i tz'aq? kiuchjoq.¹³Ruum aj re', re' hin i Dios je' wili i nuq'or: Ruum i nujosq'iil naa nuye'em i kaq suut teew. Eh ruum wo' i nujosq'iil naa nuye'em runimaal jab', je' wo' hoq i nimaq taq saqb'och je' taq nimaq ab'aj, reh chi naa nusacham wach i tz'aq xkiyejaa'.¹⁴Re' hin naa nusacham wach i tz'aq xachuneej taq wach, naa nukutum panak'al, naa rukahniik wach saqum i raa'. Xti korik wo' hoq chi naa ruq'ehb'iik i tz'aq, eh naa rub'uhriik kinaah ruum. Ruuk' i re' naa kinab'eem chi re' hin i k'achlik Dios.¹⁵Re' hin naa wik'sam i nujosq'iil chinaah i tz'aq, je' wo' chikinaah i xichuninik wach. Re' tinamit je' wili i naa kiq'orom: Xsahchik wach i tz'aq chi jumpech, je' wo' i xichuninik wach, inko'q taqe.¹⁶Re' taqe i jalal nuq'oral inki a'n kiib' wilkeeb' Israel inkiq'or chi xk'uhtjik keh pan kisaq wiriik, chi naa ruwihiik suq kiil k'uxliis Jerusaleem, xanaah re' ma' korik ta wo' hoq inkiq'or, inki QaJaaw Dios.

¹⁷Re' i Dios je' wili i xuq'or weh: Yu'naak i hat, cha q'oreej taqe ixoq i kiq'orik reh chi re' hin kinq'orik keh inkiq'or, eh xa pankik'ux wo' inchalik inkiq'or.¹⁸Je' wili i cha q'or keh: Re' i QaJaaw Dios je' wili i ruq'or taq chawiij: Q'e' ti' i naakik'ulum ixoq re' re' inkib'oj itz'ihy reh chi chu'nchel i tinamit inkikoj ralaq kiq'ab'. Eh inkib'oj i itz'ihy reh chi chu'nchel i tinamit inkib'ur wach i kinaah chi reh. ¿Mi ruuk' i re' neenkiq'or re' awach i neeruko'leej riij i ruk'achariik, eh awach i neenkimik?¹⁹Re' taqe ixoq re' re' xa ruuk' i juntzuhb' chi eebada, xa ruuk' i junch'uy chi kaxlanwi'k inkesaj i nuloq'il chikiwach i nutinamiit, inkiq'or chi naa ruk'achariik i ma' ruk'ul ta chi naa ruk'achariik. Eh inkiq'or chi naa rukimiik i ma' ruk'ul ta chi naa rukimiik. Je' re' kijot'ariik i nutinamiit inki a'n re' keh inkinimaj i chukuj q'orik.

²⁰Ruum aj re', re' hin i Dios ma' nwaaj ta wach itz'ihy re' re', re' inkiq'at wii' i tinamit, je' rukab' noq inchoparik pan xirob' i tz'ikin. Xa re' la' re' hin naa nuko'leem pan kiq'ab' i tinamit re' re' naa taqe nukanaam chi ma' xta naa ruq'atwiik pan kib'eeh.²¹Naa wesam i nutinamiit pan kiq'ab', ma' naa ta chik kikojom itz'ihy inkikoj wach kinaah, ma' naa ta chik kiq'ilim i nutinamiit. Ruuk' i re' naa kinab'eem chi re' hin i k'achlik Dios.²²Ruuk' i chukuj q'orik xkian ixoq re' re' xkiyoj ruk'ux i korik wach kik'ux, re' hin ma' inwaaj ta naq chi nk'ularik i re'. Eh xkiyeew rukowiil kik'ux taqe i yiib' wach kina'ojb'al chi naa kichopom kik'ux chub'aan i kiyiib' wach na'ojb'al.²³Re' taqe ixoq re' re' ma' naa ta chik kilom pan kisaq wiriik i xama' korik ta wo' hoq, eh ma' naa ta chik kianam i q'ijinik. Re' hin naa nuko'leem i nutinamiit pan kiq'ab', ruuk' i re' naa kinab'eem chi re' hin i k'achlik Dios, inki weh. Re' i Dios xuq'or chi ma' imponik ta chuwach i kilooq'inik reh taqe i tiyoox

¹Re' hin k'ih taqe i k'amal b'eeh i aj Israel xi chalik wuuk', reh chi wilik i naa nupahqaam reh i QaJaaw Dios.²Eh re' i QaJaaw Dios je' wili i xuq'or weh:³Re' taqe i winaq re' re' kiq'asam kiib', kiye'em kik'ux chi looq'jiik taqe i tiyoox, eh xa re' chik inki a'n inkutwik keh pamahk ¿Mi ruk'ul re' chi neenkipahqaaj weh chib'ih i naa kianam?⁴Re' hat je' wili cha q'or keh: Re' i QaJaaw Dios je' wili xuq'or: Re' i aj Israel ruq'asam riib' ruye'em ruk'ux chulooq'jiik i tiyoox, re' i rub'an inkutwik reh pamahk. Eh neenchalik chupahqaljiik runa'ojb'al ruuk' i jalal nuq'oral, re' hin naa nuye'wiik keh panti' k'axik je' rukab' i ruk'ul chi keh ruum xa re' chik i ruk'ihaal tiyoox inkiyeew ruloq'il, inki.⁵Re' hin je' re' i naa nub'anam keh chu'nchel i aj Israel xkikanaa' nunimjiik ruum i kilooq'jiik i tiyoox, ruuk' i re' naa nutz'a'am i kánima reh chi nee wo' chik kinkinimaj.

⁶Re' i QaJaaw Dios je' wili i xuq'or weh: Chaq'or keh i aj Israel chi kinki nimaj wo' chik, kikanaa' runimjiik taqe i tiyoox. Eh kikanaa' chu'nchel i yiib' wach na'ojb'al inki a'n inki.⁷Eh wila' wilik jino'q i aj Israel, oon jino'q i tokoom tinamit wilik Israel nee rukanaa' nunimjiik neeruq'asaj riib' chi kilooq'jiik taqe i tiyoox. Eh xa re' chik neerub'an inq'eb'wik reh panmahk neenchalik chi rupahqaljiik runa'ojb'al ruuk' jino'q i jalal nuq'oral re' hin naa nuye'wiik reh i ruk'ul chi reh.⁸Re' hin naa nuye'em i nujosq'iil chinaah awach naa rub'aniik reh i re', naa nuye'em panti' k'axik reh chi neenkiq'or chi ma' holohik ta imb'anik. Eh naa wesam chi kixilak i nutinamiit. Ruuk' i re' naa kinab'eem chi re' hin i k'achlik Dios.⁹Eh wila' re' jalal nuq'oral xujal wach i nuk'uhb'aal, re' wo' hin xin ye'wik q'ab' chi xuchuk i q'orik. Re' wo' hin naa nuye'wiik re' panti' k'axik, eh naa wesam chi kixilak i nutinamiit Israel.¹⁰Eh kikab'cheel naa kitojom wach i kimahk, naa rutojom wach i ru mahk i xponik rupahqaaj runa'ojb'al, eh naa wo' rutojom wach i ru mahk i jalal nuq'oral.¹¹Reh chi ma' nee ta nkikanaa' nunimjiik chi jumpech i aj Israel, reh chi ma' nee ta inkich'uwa'reej kiib' ruuk' i mahk. Reh chi nee kikahnik chi nutinamiit taqe, eh re' chik i hin naa nukahniik chi ki Dios, inki QaJaaw Dios. Re' Dios xuq'or chi ruk'ul chi naa kiye'ariik chutojariik i kimahk i aj Jerusaleem

¹²Re' i QaJaaw Dios je' wili i xuq'or weh:¹³Wila' re' i tinamit i xmahkunik chi nuwach, ma' korik ta wach ruk'ux wuuk'. Re' hin naa nuye'em i nuq'ab' chinaah reh i rub'anariik reh i ti' k'axik, naa wesam chuwach i ruwa' ruhaa' naa nuye'em wi'jalel chinaah. Eh naa kikimiik i tinamit, je' wo' taqe i chikop.¹⁴Eh chupaam i tinamit re' re' nee ta kiwihik i Noé, Daniel, Job, xa re' wo' naq ixib' chi winaq re' re' ma' nee ta kikimik ruum korik wach kik'ux, inki i QaJaaw Dios.¹⁵Eh wixnutaq'aaj reje taqe i josq'laj chikop chupaam i tinamit chi kikanteesjiik, reh chi ma' xta chik k'achareel neenkahnik ar. Eh ma' awach ta chik i neenkian ik'ik ar kuum i josq'laj chikop.¹⁶Eh wilkeeb' ta naa re' chi k'acharik ar ixib' chi winaq re' re' ma' nee ta naq inkiko'leej riij i kik'achariik i kak'uun kixq'uun, xa re' wo' naq i keh ma' nee ta kikimik. Re' i tinamit re' re' xa nee wo' naq inkahnik chi ma' xta k'achareel chupaam.¹⁷Eh nee ta nuyeew q'aq'inik chinaah i tinamit re' re', eh neenuq'or chi neekikanteesjik chu'nchel i tinamit, je' wo' taqe i chikop.¹⁸Eh wilkeeb' ta naq chi k'acharik ar i ixib' chi winaq re' re'. Re' hin i Dios xti korik i nuq'or chi ma' nee ta naq inkiko'leej riij i kik'achariik kak'uun kixq'uun. Xa re' wo' naq i keh ma' nee ta kikimik.¹⁹Neeta nuyeew kaq yab'ilaal chinaah i tinamit re' re', eh nee ta nutoq'aa' kaansanik ar ruum i nujosq'iil. Eh nee ta nuq'or chi nee kikimik i tinamit je' wo' taqe chikop.²⁰Wilkeeb' ta naa re' chi k'acharik ar i Noé, Daniel i Job. Re' hin i Dios xti korik i nuq'or chi ma' nee ta naq inkiko'leej riij i kik'achariik i kak'uun kixq'uun, xa re' wo' naq i keh ma' nee ta kikimik ruum korik wach kik'ux.

²¹Re' hin i Dios i nuq'or chi q'e' wo' chik ti' i naakik'ulum i aj Jerusaleem noq naa nuye'em chikinaah i kijib' wach chi ti' k'axik re' taqe i wili: Q'aq'inik, wi'jaleel, taqe i josq'laj chikop, i kaq yab'ilaal, kanteesb'al keh i tinamit, je' wo' taqe i chikop.²²Xa re' la' ko wilik wo' kiib' ixib'-oq i ma' naa ta kikimiik kuch'ihil taqe i kak'uun kixq'uun, noq naa kojiik k'oloq taq awuuk' ar. Re' taq i hat naa taq akojom rehtaal chi ma' holohik ta kib'anik, eh ma' holohik ta kiq'orik, naa rusuqb'iik taq ak'ux noq naa taq awilom i ti' k'axik naa nuye'em chikinaah i aj Jerusaleem.²³Eh noq naa taq awilom chib'ih inki a'n chib'ih inkiq'or, naa taq rusuuqb'iik ak'ux, ruum naa taq akojom rehtaal i chi wilik wo' kimahk noq nuyeew ti' k'axik chikinaah i aj Jerusaleem, inki i QaJaaw Dios. Re' i tinamit Jerusaleem xpajarik ruuk' i uuva ma' xta kamaj

¹Re' i QaJaaw Dios je' wili i xuq'or weh:

²Hat rak'uun winaq ¿Mi chihooj re' i ruche'el i uuva chuwach i chee' wilkeeb' pantaq ch'ahn?³¿Mi neerub'an re' chi neensik'arik i q'ab' uuva reh chi neen korjik i chib'ih jariik chi reh? oon ¿Chi t'uyaab' jino'q xa chib'ih jariik?⁴Xa sii' la' chik neenkahnik wii' noq k'ahtinaq chik taqe i ju', je' wo' taqe i panyejaal. ¿Mi ko wilik neen kamanik wii' re'?⁵Wila' ma' chih xkamanik wii' noq komanlik wach ruche'el, kora'j naa chik wilik neen kamanik wii' re' noq k'ahtinaq chik.

⁶Ruum aj re', re' hin i Dios i nuq'or chi je' wili:
Nik' wach noq ink'atarik pan q'aaq' i ruche'el i uuva. Je' wo' re' noq naa nukutum taqe pan q'aaq' i aj Jerusaleem i hin chi k'atb'al keh.⁷Re' hin naa nuye'em nujosq'iil chikinaah. Atoob' ta neenkiko'leej kiib' chuwach i q'aaq' pampeet, xa q'aaq' wo' i naa ruk'atwiik keh. Eh re' taq i hat naa taq anab'eem chi re' hin i k'achlik Dios.⁸Re' hin naa nukanaam i Jerusaleem chi xan tz'irik chik paam ruum xa re' i yiib' wach na'ojb'al inki a'n inki i QaJaaw Dios. Re' taqe i aj Jerusaleem ma' xkian taj i korik

¹Re' i QaJaaw Dios, je' wili i xuq'or weh:²Re' hat rak'uun winaq, cha q'or keh i aj Jerusaleem chixiik'naah yib'kiil wach i na'ojb'al inki a'n³Je' wili i cha q'or keh: Re' i QaJaaw Dios je' wili ruq'or taq chawiij: Re' taq i hat aj Jerusaleem. Hat naq taq cho aj Canaán chawaasb'al, re' taq chaloq i peet awajaaw aj amorreo, re' taq aatuut aj heteo.⁴Noq xatoq'aa' taq cho k'acharik je' naa ma' yok'arik ta taq awatz'uum, ma' imb'aan ta taq awitiin, ma' tib'uch'arik ta taq ruuk' aatz'aam, je' naa ma' b'ak'lik ta taq apaam.⁵Ma' awach ta naq inketeliin taq awach, ma' awach ta naq inkapeb'inik taq aweh chi xb'aan ta taq otob'il aweh. Eh noq xatoq'aa' taq cho k'acharik, xatkanab'jik taq cha wutkeel panch'ahn, ruum tikiyibuj naq taq.

⁶Eh noq xinik'ik ar xat wilow taq chi xakimik taq chik aweh je' naa xa tuk'uj taq chik riib' aawooq i chupaam taq akik'eel, re' hin xnuq'or chi ma' ruk'ul ta chi naa taq akimiik.⁷Re' hin xatnuk'isaj taq chi je' rukab' noq ink'ihik i tik panab'iix. Xat k'ihik taq korehtaal taq xat ponik chi q'e' taq hat holohik, je' jinaj nimlaj ixoq noq ink'ihik taqe i ruch'uuch' ink'ihik i rismaal. Xa re' la' ko je' naq taq hat t'usulkaat.

⁸Eh koq'uun chik xwilow chi je' chik taq akab' i q'ahxoq i ruk'ul chik chi naa ruwihiik rub'ahiil. Re' hin xnub'ur wach taq ak'ixb'ilaal, ruum je' naq taq hat t'usulkaat. Xnub'an kaxáro taq awuuk' xat kahnik taq chi weh, wilik i xqayejaa' wach taq awuuk', inki i Dios.⁹Re' hin je' naa xnub'an taq awitiin, xnutz'aj iloq taq akik'eel, xat nub'uch taq chupaam ink'ohnik laj iq'oom¹⁰Eh xoyimaj paam taq aso' xnukoj chawiij, xnukoj taq axijab' cha wooq, itz'ihy lino xnub'ak' taq wii' apaam, eh xnukoj taq axeela so' chawiij.¹¹Eh je' naa xatnuxoyej taq ruuk' i xa chib'ih jariik q'e' holohaq, xnukoj kotokaq ch'ihch' wataq atileb', eh xnukoj taq karena chawalaq.¹²Eh je' naa xnukoj holohaq kotkot laj ch'ihch' taq cha ju', xnukoj taq aaka'xikin, xnukoj holohaq corona taq wach anaah.¹³Eh je' naa xatnuxoyej taq ruuk' oro, ruuk' plata, xnukoj taq aholohaq so' xoyimaj paam re' ruuk' i lino, eh xela. Eh tinuk'uxlaaj wo' taq ruuk' i suq laj kaxlanwi'k, ruuk' riis kaab' ruuk' i aseite olivo. Eh xareq taq aholwochiil, xareq taq i runimaal awach.¹⁴Xa holohik chik taq awib'iral chupaam taqe i nimaq tinamit ruum taq aholwochiil, ruum q'e' taq hat holohaq xat nukanaa' ruuk' taq i xoyb'al aweh, inki Dios.

¹⁵Xa re' la' xach'ikaa' taq ak'ux ruuk' taq aholwochiil. Xa suq taq chik ak'ux noq xelik taq awib'iral, xatoq'aa' taq rub'aan i je' k'oyomal inaq'asaj taq awiib' reh xa awach taq inik'ik chawach.¹⁶Je' naa xayeew taq aso' chinaah taqe i yuuq' i xaloq'ej taq wii' i tiyoox, eh ruuk' i re' xach'uwarisaj taq wach i je' kaxáro xnub'an taq awuuk'. Eh re' re' ma' jank'al ta imb'aan, eh ma' naa ta wo' chik rub'aan chi jumpech.¹⁷Re' taq i hat xa chih taq chaloq i oro i plata xnusiij taq aweh i hin, ruuk' i re' xayejaa' taq i winaq tiyoox. Ruuk' i kilooq'jiik i re' xach'uwarisaj taq wach i je' kaxáro xnub'an taq awuuk'.¹⁸Eh ruuk' taq i holohaq so' xoyimaj paam xnuyeew taq aweh xa tiq'aa' taq aatiyoox, eh xayeew taq chi amayiij chikiwach i nu aseite, i nu insensia.¹⁹Re' i kaxlanwi'k chi hoj laj arina ruyej-aal, ruch'ihil aseite, ruch'ihil i riiskaab', nuye'em naq chi k'uxumb'al taq aweh xayeew taq chi ink'ohnik laj mayiij chikiwach taqe i tiyoox, inki i QaJaaw Dios.²⁰Eh xachop taq chaloq i awak'uun awixq'uun nuye'em taq aweh xayeew taq chi mayiij chikiwach i tiyoox k'uxumb'al keh noq xakapaaj taq. ¿Mi ma' manlik taq aweh re' i je' k'oyomal taq xa a'n?²¹¿Chib'ih reet noq xayok' taq kalaq i wak'uun wixq'uun, eh xayeew taq chi ak'atoj mayiij chikiwach taqe i tiyoox re' re'?²²Ruum i ruyib'kiil taq wach ana'ojb'al, ruum i je' k'oyomal taq xa a'n ma' nk'ulik ta chik taq panak'ux jank'al taq xat nureq chaloq chi je' taq atolem awiib' pan akik'eel xakimik naq taq chik aweh.

²³Re' hin i Dios je' wili xnuq'or: Re' taq i hat xti xiik' wo' chik naah ti'kiil taq i naa ak'ulum ruum xa a'n taq ayiib' wach na'ojb'al.²⁴Eh xayejaa' taq anajt naah ye'aab', xayejaa' taq artaal xa aha' chupaam taqe i ye'aab'. Ar taq i xaloq'ej i tiyoox.²⁵Eh xayejaa' taq inajt kinaah ye'aab' pantaq ju' b'eeh, ar taq xa a'n i yiib' wach na'ojb'al, ruum taq aholwochiil xaq'asaj taq awiib' keh nik' nimaal i ki-ik'ik taq ilwoq aweh, xa tiq taq naah i je' k'oyomal taq xa a'n²⁶Re' taq i hat xa a'n taq i je' k'oyomal ruuk' taq aka'jaah re' taqe i aj Egipto re' i kow kiib' chub'anariik i re'. Xa nayeew taq chik ak'ux chub'aan i je' k'oyomal, ruuk' i re' xajosaj taq wach i nujosq'iil.²⁷Eh re' hin i nuyeew taq i nuq'ab' cha naah reh i rub'anariik taq aweh i ti' k'axik, xwesaj taq chawach i chib'ih taq aweh. Eh xatnuq'asaj taq pan kiq'ab' i aj filisteo re' taqe i ki-ixowanik taq awach, ni xata re' taqe re' imponik chikiwach i k'ixb'ilaal laj na'ojb'al taq i na a'n.²⁸Re' taq i hat ma' xch'iklojik ta taq ak'ux ruuk' taq i xa a'n re' re' xa na a'n la' wo' taq i je' k'oyomal kuuk' i aj asirio, ni xata naq ruuk' i re' ch'iklojik taq ak'ux.²⁹Xiik' wo' chik naah yib'kiil wach i na'ojb'al taq xa a'n, re' i je' k'oyomal taq xa a'n kuuk' i aj Canaán, je' wo' kuuk' i aj Babilonia, eh xama' xch'iklojik ta wo' taq ak'ux.

³⁰Re' hin i Dios xnuq'or taq aweh: Chi yowaab' taq awánima chub'anariik i yiib' wach na'ojb'al re' re', je' rukab' i rub'aan i k'oyoom laj ixoq i ruk'ayej riib' ma' nk'ixik ta chub'anariik.³¹Re' taq i hat inayejaa' taq najt kinaah ye'aab' pantaq ju' b'eeh, inayejaa' taq i artaal inkimol wii' kiib' i tinamit inkiloq'ej wii' taqe i tiyoox, inki a'n wii' i je' k'oyomal. Re' taq i hat i na a'n taq i je' k'oyomal xa re' la' ma' ntojarik ta taq aweh.³²Re' taq i hat i je' taq akab' ixoq ma' korik ta wach ruk'ux i ruk'at rooq i rub'ahiil ruuk' i tokoom winaq.³³Chu'nchel i k'oyoom laj ixoq intojarik keh noq imb'aan i mahk kuuk', eh re' taq i hat, re' taq chik i hat ti sihinik chib'ih keh i na a'n taq wii' i je' k'oyomal. Eh inatoj taq keh i kichaliik xa aha' yuuq' chub'anariik i re' taq awuuk'.³⁴Re' i rujal k'isiin taq i na a'n i hat, re' chi ma' tisik'arik ta taq, re' la' taq i hat tiooj chi kisik'ariik, eh ma' inkitoj ta taq aweh, je' k'oyomal inki a'n taq awuuk'. Ma' je' ta rukab' inki a'n i k'oyoom laj ixoq noq imb'aan i k'oyomal kuuk' intojarik keh.

³⁵Re' taq i hat i je' taq hat k'oyoom laj ixoq, chab'iraj i naa nuq'orom taq aweh chi je' wili:³⁶Re' taq i hat xak'uhtaaj taq ak'ixb'ilaal, je' naa xat'usaa' taq awiib' noq xa a'n taq i je' k'oyomal kuuk' i tokoom. Xelik wach saqum taq i xa a'n. Ruuk' taqe i kilooqjiik i tiyoox xiik' naah yib'kiil kiwach. Eh ruuk' i kikanteesjiik taqe i aawak'uun xa a'n xayeew taq chi amayiij chikiwach taqe i tiyoox re' re'.³⁷Ruum aj re', re' hin naa numolom kiwach chu'nchel i xa a'n taq wii' i je' k'oyomal i xach'ikaa' taq wii' ak'ux. Naa wo' numolom kiwach chu'nchel taq i xak'ax taqe i xawixow taq kiwach, reh chi naakilom chi naa wesam taq aso' chawiij, je' nanaa akahniik taq chi t'usulkaat chi jumpech.³⁸Re' hin naa nuq'atam i q'orik taq cha naah ruum i je' k'oyomal taq i na a'n, eh ruum ikaansanik taq i na a'n. Eh ruum i nujosq'iil, ruum chi ti' inwik'raaj taq i na a'n naa taq kaat nuq'asam pankimik.³⁹Re' hin naa taq kaat nuq'asam pan kiq'ab' i tinamit re' re' reh chi naa ruyojiik taq aaye'aab' najt naah re' i xa a'n taq wii' i je' k'oyomal, je' naa naa rehtesjiik taq aso' chawiij, naa ruq'uchariik taq aweh chu'nchel inaxoyej naq taq wii' awiib', naa akahniik taq chi t'usulkaat.⁴⁰Eh naakimolom cho wach i tinamit chub'anariik taq aweh, naa taq akutariik chi ab'aj, eh naa taq akanteesjiik ruuk' q'aslaj ch'ihch'.⁴¹Eh naa ruk'atariik taq aapaat, ma' k'isiin taqe ixoq naa kilwiik reh noq naa taq aye'ariik chutojariik aamahk. Reh chi nee taq inakanaa' rub'aan i je' k'oyomal, ma' nee ta chik taq inatoj i tokoom i na a'n taq wii' i je' k'oyomal.⁴²Ruum taqe re' naa rukuxiik wik'sam i nujosq'iil taq cha naah. Naa rik'iik panuk'ux taq i naa a'nam, ruum naa rik'iik i nujosq'iil taq cha naah.⁴³Re' taq i hat ma' xk'ulik ta chik taq panak'ux i otob'il xnub'an taq chaaweh pan ak'isinal, xajosaj la' taq wach i nujosq'iil ruuk' i xiik' naah yib'kiil wach na'ojb'al taq xa a'n Ruum aj re', re' hin naa taq kaat nuye'em chutojariik taq amahk ruum i re', inki i Dios.

⁴⁴Re' hat Jerusaleem inooj eloq wach awuuk' i jalwaach q'orik inq'orarik chi je' wili: Nik' wach i runa'ojb'al i tuutb'ees je' wo' chik re' i runa'ojb'al i ixq'uunb'ees.⁴⁵Re' hat je' akab' i tuutb'ees i rixowaaj wach i rub'ahiil, je' wo' taqe i rak'uun rixq'uun. Eh re' taqe awanaab' noq inkixowaaj wach i kib'ahiil, je' wo' taqe i kak'uun qixq'uun. Eh re' aatuut aj heteo, eh re' awajaaw aj amorreo.⁴⁶Eh re' i aasb'ees awanaab' taq noq wilik pantz'eet reh i rookb'aal i q'iij wilik, re' i Samaria haa' taqe i kok' tinamit ruchopom naah. Eh re' i chaaq'b'ees awanaab' noq wilik ar wilik pansak'aaj reh i rookb'aal i q'iij, re' i Sodoma, haa' taqe i kok' tinamit ruchopom naah.⁴⁷Re' hat Jerusaleem xa a'n aweh i yiib' wach na'ojb'al inki a'n i tinamit re' re' Eh ma' ch'iklojik ta ak'ux ruuk' i re'. Xti xiik' wo' chik naah i yiib' wach i na'ojb'al i na a'n i hat chuwach i xkian tinamit re' re'.⁴⁸Re' hin i Dios i nuq'or chi ni xata re' i Sodoma awanaab' taq noq wilik, ruch'ihil i kok' tinamit ruchopom naah xb'anik reh i yiib' wach taq xa a'n i hat, i xkian i kok' tinamit achopom taq naah.⁴⁹Re' wili i mahk xkian awanaab' noq wilik, re' i Sodoma, haa' taqe kok' tinamit ruchopom naah. Re' chi q'e' inkinimb'isaj kiib' chi wilik k'uxumb'al keh, re' chi q'e' suq wilkeeb'. Xa re' la' xama' kitob'eej ta wo' i neb'aa', taqe i ti' wilkeeb'.⁵⁰Re' taqe i aj Sodoma inkinimb'isaj kiwach, xkian i yiib' wach na'ojb'al ma' imponik ta chi nuwach i hin. Ruum aj re' xnusach kiwach chi jumpech.⁵¹Eh re' taqe i aj Samaria ma' xkian ta yejaal-oq i mahk je' rukab' i xa a'n taq i hat. Re' taq i hat xti xiik' wo' chik naah yib'kiil wach i na'ojb'al taq xa a'n. Re' taqe i aj Samaria ma' q'e' taj i kimahk i keh chuwach amahk taq i hat.⁵²Re' taq i hat naa ruchaliik taq ak'ixiik ruum xiik' naah yib'kiil wach ana'ojb'al taq xa a'n chuwach i xkian i aj Samaria. Re' keh ma' q'e' taj i kimahk chuwach i xa a'n taq i hat, ruum ti xiik' wo' chik naah yib'kiil wach xa a'n taq i hat. Ruum i re' naa nuk'uhtaam taq ak'ixb'ilaal.

⁵³Re' hin naa wo' chik nuye'em q'ab' keh i aj Sodoma, i aj Samaria haa' taqe i kok' tinamit kichopom naah naakeliik korik. Eh je' wo' taq i hat naa wo' chik taq aweliik korik.⁵⁴Xa re' la' koruman chi naa taq akuyum i ti' k'axik, naa taq ruk'uhtjiik ak'ixb'ilaal, ruuk' taq i xa a'n, ruuk' i re' naa ruch'iklojiik kik'ux i keh. Eh awuum taq i hat naa rusuuqb'iik kik'ux i keh.⁵⁵Eh re' i Sodoma, i Samaria haa' i kok' tinamit kichopom naah xkireq wo' chik chi je' rukab' i pampeet, je' wo' taq i hat haa' i kok' tinamit achopom taq naah naa wo' chik taq areqem chi je' rukab' i pampeet.⁵⁶Re' taq i hat noq xiik' naq naah nimaal taq awach i na a'n awiib' xa naase'laaj naq taq i ti' k'axik inkik'ul i aj Sodoma awanaab' taq noq wilik.⁵⁷Je' naq re' taq i na a'n noq komajaa' naq inteh wach taq ayiib' wach na'ojb'al. Eh yu'naak taq i hat re' taqe i aj edomita, re' taqe i aj filisteo, eh re' taqe i tinamit wilik taq chaka'jaah kib'ajwik taq aweh, eh chu'nchel i tinamit ma' nkaaj ta taq awach.⁵⁸Re' taq i hat inchol taq akuyum ransil i ti' k'axik, ruum ma' holohik ta taq i na a'n xiik' naah yib'kiil wach, inki i Dios.

⁵⁹Re' hin i Dios i nuq'or chi naa taq kaat nuye'em chutojariik taq aamahk je' rukab' i ruk'ul taq cha weh. Ruum ma' xa a'n ta taq i xaq'or taq i korik chi naa naq a'nam, re' i xqayejaa' taq wach awuuk'.⁶⁰Xa re' la' re' hin xa ko wilik wo' panuk'ux chib'ih i xqayejaa' taq cho wach awuuk' pan ak'isinal. Xa re' la' wilik wo' chik i naa nuyejaam wach taq awuuk' chi naaqa'nam.⁶¹Eh naa ruk'uliik taq panak'ux i yiib' wach taq xa a'n naa ruchaliik taq ak'ixiik noq naa nuq'asam chi je' taq awixq'uun i Samaria, re' i aawas taq noq wilik. Eh noq naa nuq'asam taq chi awixq'uun i Sodoma, i achaaq' taq noq wilik, atoob' ta ma' nuyejaam wach taq awuuk'.⁶²Re' hin jinaj chik i naaqayejaam wach taq awuuk' chi naaqa'nam, ruuk' i re' naa taq anab'eem chi re' hin i k'achlik Dios.⁶³Re' hin naa taq nukuyum amahk xa re' la' naa ruk'uliik taq cho panak'ux i xiik' naah yib'kiil wach na'ojb'al taq xa a'n naa ruchaliik taq ak'ixiik, ruum ma' naa ta chik taq animb'isam awiib' ruuk' aq'oral, inki i Dios. Re' i jalwaach q'orik chi riij i xihk, eh chi riij i ruche'el i uuva

¹Re' i QaJaaw Dios je' wili i xuq'or weh:²Hat rak'uun winaq cha q'or i jalwaach q'orik wili keh i aj Israel.³Je' wili i cha q'or keh: Je' wili i xuq'or i QaJaaw Dios:
Jinaj i nimlaj xihk xa nimaq chik i ruxiik' xakow chik inrupinik, k'ih wach xoyb'al paam i riij xponik ar Líbano, eh xich'uq i rikuun i chakaltee'.⁴Eh xutoq wo' i nimlaj q'ab' i chee' re' re', xuk'am reje chupaam i kitinamiit i aj yakool, ar ponik rutik chupaam i tinamit wilik wii' i ma' k'isa yak.⁵Chi riij i re' xichop i rija'eel i uuva xutik chupaam i jinaj i holohik laj ye'aab' chi chii' i nim ha', reh chi naa naq ruk'ihiik korehtaal imponik chi nimlaj chee'.⁶Eh re' i ja' xpoq' korehtaal xponik chi nimlaj ruche'el uuva. Atoob' ta ma' q'e' ta najt naah xponik, re' q'ab' xuhel reje riib' chupaam i tinamit wilik wii' i nimlaj xihik. Re' uuva noq xuk'am raa' ma' k'isiin taj i q'ab', i xaq xelik.

⁷Eh jinaj wo' chik i mama' xihk xa nimaq chik i ruxiik' ma' k'isiin i riij xakow chik inrupinik. Eh re' i ruche'el i uuva xuk'am raa' xuhel reje riib' i q'ab' chupaam i ye'aab' wilik wii' i xihk re' re' reh chi re' naq i reh narut'aqsaniik cho reh i tikooj wii'.⁸Re' i uuva re' re' holohik ak'al wo' naq tikooj wii' chi chii' i nim ha' re' naq i naa ruk'ihaaxb'iik wii' i q'ab', naa naq ruwachiniik naa naq rusutiniik chi holohik laj uuva.

⁹Re' hat je' wili i cha q'or keh: Re' i QaJaaw Dios je' wili i ruq'or:
¿Mi naa reliik korik re' i ruche'el i uuva re' re'? ¿Mi ma' re' re' peet xihk naa ruchuqwiik reje reh, naa ruhilem wach ak'al i wach naa ruchiqsam i xaq? Re' re' xama' yohb'aal ta wo' wach kajaawriik, xama' k'ih ta wo' naa ruchuqwiik reh i raa'.¹⁰Atoob' ta nee wo' chik inkitik ruka'peech ¿Mi nee nelik korik re' i tik wili? ¿Mi ma' naa ruchiqiik re' ruum i tz'a'laj teew naa ruchaliik parelb'aal q'iij? Manlik naq xa rax chik wach noq naa ruchiqiik, inki weh i Dios.

¹¹Eh je' wo' chik wili i xuq'or weh:¹²Re' hat cha pahqaaj keh i aj Israel ma' kinimanik taj mix kireq chi riij i jalwaach q'orik xaq'or keh, je' wili iraaj ruq'orom. Re' chi re' i kireey i aj Babilonia naa ruchaliik Jerusaleem naa ruchopom i kireey i aj Judá, haa' taqe i nimaq wach kikamaj naa ruk'amam taqe reje chi riij Babilonia.¹³Eh naa rupab'aam jinaj i reey ma' tokoom ta ruuk' i kireey i aj Judá naa ruminim chupaam chi naa ruq'orom i xti korik chi naa ruq'orom reh chi naa ruk'amam taqe reje panti' k'axik i nimaq wach kikamaj.¹⁴Reh chi naa kikahniik i aj Judá chi ma' xta chik rukowiil. Eh ma' naa ta chik keliik korik, xa re' wo' noq neen kichop kik'ux chub'aan i xq'orarik keh nee kielik korik.¹⁵Eh re' i reey ma' naa ta runimam i kireey i aj Babilonia naa la' rutaq'aam reje i taqareel ruuk' i kireey i aj Egipto chupahqaljiik i ma' k'isa kawáyu, i ma' k'isa soldado ko'len reh. ¿Mi konee nelik korik i reey imb'anik reh i je' re'? ¿Mi neeruko'leej riij i ruk'achariik i ma' xub'an taj i ruq'orom chik i xti korik chi naa rub'anam?¹⁶Re' hin i Dios xti korik i nuq'or chi re' i kireey i aj Judá ar naa rojiik kimoq Babilonia, ruum ma' naa ta rub'anam i naa nuq'orom xti korik chi naa rub'anam. Eh ma' naa ta rub'anam i naa kiyejaam wach ruuk' i kireey i aj Babilonia naa rukojwiik reh chi reyil.¹⁷Eh noq re' i kireey i aj Babilonia naa ruchaliik rub'anam reh i tinamit Jerusaleem naa rukotem riij naa ruyejaam ruye'aab' chub'an reh, noq naa rukansam i ma' k'isa tinamit. Re' i kireey i aj Egipto xama' naa ta wo' rutaq'aam chaloq chuko'ljiik.¹⁸Ruum re' reh xama' naa ta wo' rub'anam i naa ruq'orom i xti korik chi naa rub'anam, xama' naa ta wo' rub'anam i naa rukorjiik wach, ruum chi je' re' i naa rub'anam ma' naa ta ruko'leem riij i ruk'achariik.¹⁹Re' hin i Dios xti korik i nuq'or chi ma' xub'an taj aha' naq wilik nuq'orom i xti korik chi naa rub'anam re' qayejaa' wach ruuk'. Ruum aj re' re' hin naa nuye'em chutojariik i ru mahk chi riij i xub'an.²⁰Re' hin k'ul naa nuq'atam chuwach noq naa nuchopom, panya'al wilik noq naa nuk'amam reje Babilonia ar naa nuq'atam i q'orik chinaah, ruum ma' xub'an taj i xnuq'or reh chi naa rub'anam.²¹Re' taqe i ru soldado xiik' naah kikowiil naa rukuxiik kikimiik panq'aq'inik, eh re' taqe i ma' naa ta kikimiik naa rutuukjiik reje kiwach xa aha' yuuq'. Chi je' re' naa kinab'eem i keh chi re' hin i Dios xinq'orik keh i wili.

²²Je' re' noq re' hin i Dios i nuq'or wo' hoq,
chi jinaj i naawuksam chinaah i yuuq' Israel je' naa naa nuch'uqum i rikuun i chee' chakaltee' re' hin je' naa naa nutikim chinaah inajt naah yuuq'.²³Eh chinaah inajt naah yuuq' wilik Israel naa ruk'ihaaxb'iik i q'ab', naa rub'anam wach korehtaal imponik chi je' jinaj nimlaj chee' chakaltee' q'e' holohik. Eh ruk'ihaal b'uhr wach i tz'ikin naa kiyejaam kisuuq' chinaah taqe i q'ab'.²⁴Chu'nchel i je' chee' panch'ahn naa kinab'eem chi re' hin Dios. Eh naa wesam i runimaal wach i je' chee' nim wach. Eh re' i je' chee' ma' nim ta wach naa nuye'em runimaal wach. Eh naa nuchiqsam i je' i rax chee', eh re' i je' chiq chee' naa nuraxb'isam wach, re' wili naa rojiik eloq wach inki i Dios. Awach i naa rub'aniik i mahk re' wo' reh naa rukanteesjiik

¹Re' i QaJaaw Dios je' wili i xuq'or weh:²¿Chib'ih reet noq ma' nakanaa' ta taq ruq'orariik i q'orik wili i hat taq aj Israel Noq re' taqe i tuutb'ees ajaab'ees inkik'ux i ch'amlaj uuva re' taqe i kak'uun kixq'uun i nelik chi q'aah i keeh, inki taqe?

³Re' hin i k'achlik Dios xti korik i nuq'or chi ma' jaruuj taq chik naa aq'orom i jalwaach q'orik re' re' ayu' Israel.⁴Chu'nchel i tinamit, weh hin taqe, chi je' taqe i tuutb'ees, ajaab'ees chi je' taqe ak'uunb'ees ixq'uunb'ees ruum aj re' awach imb'anik reh i mahk re' wo' re' naa rukanteesjiik.

⁵Re' winaq korik wach i ruk'ux, re' rub'ehel, re' korik i rub'an.⁶Ma' ruk'ux ta reh i k'uxb'al wi'k inye'arik chi mayiij naah taq yuuq', ma' ruyeew ta ruk'ux chikinaah i kitiyoox i aj Israel. Eh ma' ruq'uch taj i rehk'een i ras ruchaaq', eh ma' inwirik ta ruuk' i rehk'een noq k'ahchi' i ruyab'ilaal reh i rupooh.⁷Eh ma' awach taj i ruyeew chi ti' k'axik, noq inkanab'jik reh i xa chib'ih jariik chi riij i kemeel imb'aan ruuk', i ruq'asaj wo' chik reh i aj kemeel. Ma' awach taj i relq'aaj i chib'ih reh, eh i runej i ruwa' ruhaa' i ma' xta ruwa' ruhaa', i ruyeew ruso' i ma' xta ruso'.⁸Eh noq ruyeew chi kemeel i rutumiin ma' rupahqaaj ta tojb'al riij, ma' awach taj i rujot'. Eh parub'ehel i ruq'at i q'orik chikinaah i ki'ib' chi aj peleto.⁹Eh i rub'an taqe i ruq'or i nuk'uhb'aal, eh rub'an chi korik chu'nchel i nuq'or reh. Re' winaq re' re' xti korik wach ruk'ux ruum aj re' naa ruwihiik ruk'achariik. Re' wili korik ruum re' hin i Dios kinq'orik reh.

¹⁰Eh re' winaq re' re' korik wach ruk'ux. Wila' wilik jino'q rak'uun aj jileq', aj kaansoom, i rub'an taqe ma' holohik taj re' i ma' jank'al ta rub'an i rajaaw.¹¹Eh i ruk'ux reh i k'uxb'al wi'k mayijimaj chikiwach i tiyoox nah taq yuuq', eh i ruq'uch i rehk'een i ras ruchaaq'.¹²Eh rub'an i ti' k'axik keh i neb'aa', je' wo' taqe i ma' xta wilik keh, eh i rub'an i leq', ma' ruq'asaj ta chik i xa chib'ih jariik inkanab'jik reh chi riij i kemeel imb'aan ruuk'. Eh i ruloq'ej taqe i tiyoox, i rub'an taqe i ma' holohik taj.¹³Noq i ruyeew chi kemeel i rutumiin k'ih i kemelb'al riij i rupahqaaj. Re' ak'uunb'ees imb'anik reh i taqe re' ma' naa ta ruk'achariik. Naa la' rukanteesjiik ruum taqe i yiib' wach na'ojb'al xub'an, xa re' reh naa ruk'amwiik' chaloq i rukimiik chinaah.

¹⁴Eh re' winaq re' re' ma' holohik ta imb'anik, wila' wilik jino'q rak'uun nee rilow i mahk i rub'an i rajaaw, eh ma' xub'an ta ree reh.¹⁵Eh ma' ruk'ux ta reh i k'uxb'al wi'k mayijimaj nah taq yuuq', ma' ruyeew ta ruk'ux chikinaah i kitiyoox i aj Israel, eh ma' ruq'uch taj rehk'een i ras ruchaaq'.¹⁶Ma' awach taj i ruyeew chi ti' k'axik, ma' xtaj i rupahqaaj chinkanab'jik ruuk' chi riij i kemeel imb'aan ruuk'. Eh ma' awach taj i relq'aaj chib'ih reh i runej i ruwa' ruhaa' i ma' xta ruwa' ruhaa' i ruyeew ruso' i ma' xta ruso'.¹⁷Eh noq i ruyeew chi kemeel i rutumiin, ma' rupahqaaj ta tojb'al riij, i rub'an taqe i ruq'or i nuk'uhb'aal, eh rub'an chu'nchel i nuq'or reh. Re' ak'uunb'ees re' re' ma' naa ta rukanteesjiik ruum i ru mahk i rajaaw xti korik la' chi naa ruwihiik ruk'achariik.¹⁸Eh re' rajaaw naa rukanteesjiik ruum i ru mahk xub'an, ruum chi xub'an i ma' holohik taj, xub'an i leq', xub'an i yiib' wach na'ojb'al chi xilak i rutinamiit.

¹⁹Eh re' taq i hat neena taq inaq'or chi je' wili: Eh ¿Chib'ih reet noq re' ak'uunb'ees ma' nee ta rutoj riij i ru mahk i rajaaw? tiko'q taq. Ma' nee ta rutoj riij i ru mahk i rajaaw ruum xub'an i rub'ehel, i korik, xub'an taqe i ruq'or nuk'uhb'aal. Ruum aj re' xti korik noq naa ruk'achariik.²⁰Awach imb'anik reh mahk re' wo' re' naa rukanteesjiik, re' ak'uunb'ees ma' nee ta rutoj riij i ru mahk i rajaaw. Ni xata re' ajaab'ees neerutoj riij i ru mahk i rak'uun. Re' korik wach ruk'ux naa ruk'ulum i rukooch. Eh re' i yiib' wach runa'ojb'al re' wo' tojb'al ru mahk naa ruk'ulum. Re' i Dios parub'ehel i rub'an i q'ataj q'orik (Ez 33.10-20)

²¹Eh wila' re' yiib' wach runa'ojb'al xukanaa' chu'nchel i mahk, re' chik neerub'an chu'nchel i ruq'or i nuk'uhb'aal, je' wo' hoq i rub'ehel chi b'anarik, xti korik i nuq'or chi naa ruwihiik ruk'achariik ma' naa ta rukanteesjiik.²²Eh re' hin ma' naa ta chik ruk'uliik cho panuk'ux chu'nchel i yiib' wach na'ojb'al xub'an naa la' ruwihiik ruk'achariik ruum i rub'anariik i korik.²³Re' hin ma' inwaaj ta chi neenkimik parumahk i yiib' wach runa'ojb'al, inwaaj la' chi neerujal wach i runa'ojb'al, chi je' re' neen wihik ruk'achariik, inki i Dios.²⁴Eh wila' re' korik wach ruk'ux xukanaa' wo' chik rub'aan i korik, xutoq'aa' wo' chik rub'aan chu'nchel i ma' holohik taj, je' rukab' inki a'n i yiib' wach kina'ojb'al. Re' reh ma' naa ta ruwihiik ruk'achariik. Re' hin ma' naa ta chik ruk'uliik panuk'ux chu'nchel i holohik xub'an, naa la' rukanteesjiik ruum taqe i ru mahk xub'an wo' chik ruka'peech.

²⁵Re' taq i hat naq'or taq chi ma' re' ta rub'ehel i nub'an, xa re' la' chab'iraj taq i naa nuq'orom aweh taq i hat aj Israel, i hat inakapaaj taq chi re' hin ma' re' ta rub'ehel i nub'an. Xanaah re', re' taq i hat ma' rub'ehel ta taq i k'ahchi' kaat.²⁶Eh wila' re' i korik wach ruk'ux xukanaa' wo' chik rub'aan i holohik nee wo' chik i rub'aan i yiib' wach, re' reh naa rukanteesjiik ruum i ruyiib' wach na'ojb'al xub'an wo' chik ruka'peech.²⁷Eh wila' re' i yiib' wach runa'ojb'al xukanaa' rub'aan i yiib' wach chi b'anarik, eh re' chik i rub'ehel, re' chik i korik neerub'an. Re' reh naa ruko'leem riij i ruk'achariik.²⁸Wila' xukoj rehtaal chi korik, nee rukanaa' rub'an chu'nchel i yiib' wach na'ojb'al. Re' reh xti korik noq naa ruwihiik ruk'achariik ma' naa ta rukanteesjiik.²⁹Re' taq i hat aj Israel naa taq aq'orom chi ma' re' ta rub'ehel i k'ahchi' nub'anam xanaah re' ma' nakoj ta taq rehtaal chi re' taq i hat ma' rub'ehel ta taq i k'ahchi' kaat.

³⁰Re' hin inuq'at i q'orik cha naah taq i hat aj Israel re' q'oreel chib'ih taq i xa a'n chib'ih taq i xaq'or. Re' hin i Dios korik i nuq'or taq aweh chi chayot' taq ak'ux, eh cha kanaa' taq rub'aan ayiib' wach na'ojb'al, reh chi ma' nee ta taq insacharik awach ruum taq amahk.³¹Chakanaa' taq rub'aan chu'nchel i xat mahkunik taq wii' chi nuwach, chayeew taq q'ab' chi neen ak'b'ik taq awánima, je' wo' taq ak'achariik. Ruum wi ma' xa a'n taq i re' taq i hat aj Israel naa taq akanteesjiik.³²Re' hin ma' inwaaj taj chi awach i neenkimik parumahk, inwaaj la' chi neenayot' taq ak'ux chi riij taq amahk, reh chi neen wihik taq ak'achariik, inki i QaJaaw Dios. Re' ruti'kiil k'uxliis chikiij i kireey i aj Israel

¹Re' i QaJaaw Dios je' wili xuq'or weh: Hat rak'uun winaq cha tz'uyej i tz'uuy reh ruti'kiil k'uxliis keh i kireey i aj Israel,²je' wili i cha q'or keh:
Re' i Jerusaleem atuut noq wilik, je' ixoq kaq b'ahlam, eh chi kixilak i je' kaq b'ahlam xuk'isaj taqe i ki'ib' chi kok' rak'uun jinaj keh i re', re' i Joacaz.³Xuk'isaj chi korik korehtaal, xponik chi je' rukab' i nimlaj kaq b'ahlam i rub'an chik ruchopariik rutiib' i ruk'ux chik taqe i winaq.⁴Eh re' taqe i tokoom tinamit xkib'iraj rib'iral i rub'an k'ul xkiq'at chuwach, je' naa xkikoj ruxirob'aal noq kichop. Eh b'ak'lik wach chi karena noq xkik'am reje Egipto.⁵Noq xrilow i je' ixoq kaq b'ahlam chi ma' xelik ta korik ruuk' i xukapaaj naq rub'aan. Xusik' wo' chik jinaj i k'isa rak'uun, re' Joaquín, korehtaal xuk'isaj xureq wo' chik i runimaal.⁶Eh noq xponik chik chi je' nimlaj kaq b'ahlam, xak'ul chik inooj chi kixilak i je' kaq b'ahlam, xutijej chik ruchopariik i rutiib' i ruk'ux chik taqe i winaq.⁷Eh yohb'aal wach i leq' xub'an chupaam i paat imb'aan wii' i taaq'anik xkuxik rusacham wach i tinamit. Eh noq xuk'er chii' xiyo'jik i tinamit ruum.⁸Ruum i re' xchalik b'anroq reh kuum i tinamit wilkeeb' reje chi junsuut, xkiq'at chuwach je' naa xq'ehb'ik pan xirob' noq xkichop.⁹Eh b'ak'lik wach chi karena noq xkik'am reje chuwach i kireey i aj Babilonia, xkiyeew pantz'ilom reh chi ma' naa ta chik rib'irjiik chi k'erik chii' chinaah i yuuq' Israel.

¹⁰Re' i Jerusaleem i atuut taq noq wilik je' naq rukab' i juniwal chi uuva tikooj chii' rooq ha' ma' k'isiin i q'ab' i ruyeew, eh inwachinik chi korik ruum xa eliik wilik ruha'iil.¹¹Eh kow i q'ab' xi elik xkamanik chi kikarote i reey, yohb'aal wach najtiil naah xponik, yohb'aal wach i q'ab', je' wo' hoq i xaq. Eh chu'nchel i tinamit xi ilwik reh.¹²Xa re' la' re' i je' juniwal chi uuva re' re' xk'ulik chuqaroq xq'eb'arik wach ak'al ruum i je' kowlaj teew inchalik parelb'aal q'iij, xq'ehb'ik taqe wach, eh xchiqik taqe i kowlaj q'ab' i xk'atarik wach q'aaq'.¹³Eh yu'naak i je' juniwal chi uuva re' re' je' naa panchiq ak'al tikooj ma' xta ruha'iil.¹⁴Eh nah taq q'ab' i nelik reje i q'aaq' ink'atwik reh xaq, ruch'ihil i wach. Ma' jino'q chik i kowlaj q'ab' xkamanik chi kikarote i reey tiko'q keh, panatz'uuy, inki weh i Dios.
Re' i tz'uuy wili reh i ruti'kiil k'uxliis naa rukamaniik wii'. Re' i Dios korik wach ruk'ux, eh re' taqe i aj Israel ma' xinimanik taj

¹Eh lajeeb' chik q'iij ruk'amam rub'eeh i roo' poh ree i ruwuuq haab' qak'amariik reje Babilonia, wilik taqe i k'amal kib'eeh i aj Israel xiooj k'oloq chupahqaljiik kina'ojb'al reh i QaJaaw Dios xkitzunaa' i koq kiib' chi nuwach.²Eh re' i QaJaaw Dios je' wili i xuq'or weh:³Hat rak'uun winaq cha q'or keh i aj Israel re' re'. Re' i QaJaaw Dios je' wili i xuq'or: ¿Mi wilik re' i xchalik kipahqaaj weh? Re' hin i Dios ma' nee ta nuchaq'weej keh inaakipahqaam tiko'q keh, inki.⁴Je' wo' chik wili i xuq'or weh: Hat rak'uun winaq chaq'at i q'orik chikinaah i hat. Chaq'or keh nik' nimaal i yiib' wach na'ojb'al kianam chaloq i kimaam kati't.⁵Je' wili i cha q'or keh: Re' i QaJaaw Dios je' wili i ruq'or taq chawiij: Re' hin xnuq'or i korik noq xnusik' cho kiwach i kimaam kati't i aj Israel. Eh xnuk'uhtaaj i wajaawriik kuuk' noq wilkeeb' cho ar Egipto. Xnuq'or keh i xti korik chi xa re' wo' hin i Dios.⁶Eh chupaam i q'iij re' re' xnuq'or keh i xti korik chi naa taqe wesam chaloq Egipto. Eh chi ar chik taqe naa nuk'amam reje chupaam i ye'aab' nusik'im wach chi keh xiik' nah holwochiil chikiwach chu'nchel i ye'aab', re' i wilik wii' chu'nchel i suq atoob'.⁷Re' hin xnuq'or keh chi kiju'junaal chi naa kisacham wach i kitiyoox. Eh chi ma' naa ta chik kich'uwa' risam kiib' ruuk' i kilooq'jiik i kitiyoox, i aj Egipto. Xnuq'or wo' keh chi xa re' hin naa kiin kikojom chi ki Dios.

⁸Eh re' keh xkija'wachej kiib' chi nuwach, ma' xinkinimaj taj. Xa ma' xkisach ta wo' wach i kitiyoox q'e' yiib' kiwach. Eh xama' xkikanaa' ta wo' rulooq'jiik i kitiyoox i aj Egipto. Ruum taqe re' xnuq'or naq chi naa nuye'em ti' k'axik chikinaah ar Egipto korehtaal naq naa wik'sam i nujosq'iil chikinaah.⁹Xa re' la' re' hin xama' xnuyeew ta wo' taqe panti' k'axik, ruum ma' xwaaj taj chi xkesaj i wajaawriik i aj Egipto wilkeeb' naq cho wii', ruum xkib'iraj wo' keh noq xnuq'or cho keh i aj Israel chi naa wesam taqe chaloq Egipto.¹⁰Re' hin xwesaj wo' taqe chaloq i Egipto xnuk'am taqe chaloq panchiq yuuq'.¹¹Eh ar xnuyeew keh chi naab'jik i nuk'uhb'aal, eh chi awach naa rub'aniik reh i nuq'or naa ruwihiik ruk'achariik.¹²Xnuyeew wo' keh chi naab'jik chi naakiye'em ruloq'il taqe i hi'limb'al q'iij, rehtalil naq chi naa kianam i xnuyejaa' wach kuuk'. Eh reh naq chi naa ruk'uliik pankik'ux chi re' hin kinye'wik kisantohiil.¹³Eh re' taqe i aj Israel xkija'wachej kiib' chi nuwach chupaam i ye'aab' chiq yuuq' ma' xkinimaj taj i nuk'uhb'aal, ma' xkian taj i xnuq'or keh. Eh xnuq'or wo' keh chi wila' xkian i xnuq'or keh naa ruwihiik kik'achariik. Eh ma' xkiyeew ta ruloq'il taqe i hi'limb'al q'ij, ruum taqe re' xwaaj naq wik'sam i nujosq'iil, xwaaj naq nusacham kiwach chupaam i ye'aab' chiq yuuq'.¹⁴Xa re' la' re' hin xama' xnusach ta wo' kiwach, ruum ma' xwaaj taj chi xkesaj i wajaawriik i taqe i nimaq tinamit, re' taqe i x-ilwik reh chi xwesaj taqe chaloq i aj Israel ar Egipto.

¹⁵Eh chupaam i ye'aab' chiq yuuq' xnuq'or wo' keh chi ma' naa ta kokiik chupaam i ye'aab' nusik'im cho wach chi keh. Re' i ye'aab' xiik' naah holwochiil chikiwach chu'nchel i ye'aab', re' i wilik wii' chu'nchel i suq atoob'.¹⁶Je' re' i xnuq'or keh ruum ma' xponik ta chikiwach i nuk'uhb'aal, eh ma' xkinimaj taj i xnuq'or keh. Eh ma' xkiyeew ta ruloq'il taqe i hi'limb'al q'iij, ruuk' chik taqe i tiyoox xkiyeew i kánima.¹⁷Eh re' hin xnukuy wo' kimahk, eh xnuketelaaj kiwach xama' xnusach ta wo' kiwach chupaam i ye'aab' chiq yuuq'.¹⁸Noq wilkeeb' panchiq yuuq' xnuq'or keh i kak'uun kixq'uun chi ma' nkik'am naah i xq'orarik keh, eh chi ma' naa ta kianam i xq'orarik keh kuum i kituut kajaaw. Eh chi ma' naa ta kich'uwarisam kiib' ruuk' taqe i kitiyoox.¹⁹Xnuq'or wo' keh chi xa re' wo' hin naakiin kikojom chi ki Dios, chi naa kinimam i nuk'uhb'aal, chi naa kianam taqe i nuq'or keh.²⁰Eh chi naakiye'em ruloq'il taqe i hi'limb'al q'iij rehtalil naq chi naa kianam i xqayejaa' wach kuuk', reh naq chi naa kinab'eem chi re' hin i k'achlik Dios.

²¹Xa re' la' re' taqe i kak'uun kixq'uun xkija'wachej kiib' chi nuwach, xama' xkinimaj ta wo' taqe i nuk'uhb'aal inye'wik k'acharik, ma' xkian ta wo' taqe i xnuq'or keh, ma' xkiyeew ta ruloq'il taqe i hi'limb'al q'iij. Ruum aj re' xwaaj naq wik'sam i nujosq'iil chikinaah chupaam i ye'aab' chiq yuuq' xwaaj naq nusacham kiwach.²²Xa re' la' re' hin xama' nusach ta wo' kiwach ruum ma' xwaaj ta chi xkesaj i wajaawriik taqe i nimaq tinamit. Re' i xi ilwik reh chi xwesaj taqe chaloq i aj Israel Egipto.²³Eh chupaam i ye'aab' chiq yuuq' xnuq'or wo' keh i korik chi naa nutukem kiwach chupaam taqe nimaq tinamit wilkeeb' sut i wach ak'al.²⁴Ruum ma' xkinimaj taj i xnuq'or keh, eh ma' xponik ta panaq'kiwach i nuk'uhb'aal. Eh ma' xkiyeew ta ruloq'il taqe i hi'limb'al q'iij, xa re' chik i kilooqjiik taqe i tiyoox xkian, re' wo' xkiloq'ej chaloq i kituut kajaaw.²⁵Je' re' noq re' hin xnuyeew q'ab' chi xkinimaj i k'uhb'aal ma' holohik taj, chi xkian i yiib' wach na'ojb'al ma' inye'wik ta k'achariik.²⁶Eh xnuyeew wo' q'ab' chi xkich'uwa'risaj kiib' ruuk' i ruye'ariik i kimayiij chikiwach i tiyoox, eh chi xkik'at chi kimayiij i peet kak'uun, reh naq chixiyo'jik, eh chi xkinab'eej chi re' hin i k'achalkiin inki Dios.

²⁷Je' wili i xuq'or weh: Hat rak'uun winaq je' wili i cha q'or keh i aj Israel: Re' i QaJaaw Dios je' wili i ruq'or taq chawiij: Je' wo' hoq i kimaam kati't i keh xin kiq'eb' wo' chi riij kik'ux xama' xinkinimaj ta wo' chaloq.²⁸Noq xnuk'am naq taqe chupaam i holohik ye'aab' re' i nuq'orom i xti korik chi naa naq nuye'em keh noq inkilow wach inajt kinaah yuuq' oon noq inkilow wach jino'q i chee' nim rumuuj ar inkik'at i chikop chi kimayiij. Ruuk' i re' xkijosaj chee nujosq'iil, ar xkik'at chi kimayiij i insensia, xkichihkaaj ink'ohnik laj iq'oom²⁹Re' hin je' wili i xnuq'or keh: ¿Mi wilik kajaawriik inajt kinaah yuuq' i nak'at taq wii' aamayiij? Re' i ye'aab' re' re' loq'oomb'al tiyoox i rub'ihnaal, eh je' re' i rub'ihnaal xkahnik chi jumpech.

³⁰Eh cha q'or keh i aj Israel chi re' hin i Dios kinq'orik reh chi je' wili: ¿Chib'ih reet noq xakok'ahchi' wo' kich'uwa'risam kiib' i keh je' rukab' i xkian chee kimaam kati't xa re' kilooq'jiik taqe i tiyoox inki a'n?³¹Re' keh xkiyeew i kimayiij, eh xkik'at i kak'uun wach q'aaq' chi kimayiij. Eh xakok'ahchi' wo' kich'uwarisam kiib' ruuk' i kilooqjiik taqe i tiyoox. ¿Mi kox chalik kipaqaaj i kina'ojb'al weh re' taqe i aj Israel? Re' hin i k'achlik Dios ma' nee ta nuchaq'weej keh ineenkipaqaaj.

³²Re' keh xkimin pankinaah je' rukab' inki a'n i tokoom tinamit wilkeeb' wach ak'al kiloq'inik reh taqe i tiyoox chee' eh ab'aj korjinaq wii' ma' ruk'ul ta naq chi naa kianam i je' re'.

³³Re' hin i k'achlik Dios, ruuk' i wajaawriik, ruuk' i nujosq'iil naa nuye'em ti' k'axik chikinaah, eh naa nukahniik chi taaq'anik chikinaah.³⁴Re' hin ruuk' i wajaawriik ruuk' i nujosq'iil naa wesam taqe chaloq chupaam taqe i tinamit nutukem reje wii' kiwach, naa wo' chik numolom kiwach.³⁵Re' hin naa nuk'amam taqe reje chupaam i ye'aab' xa je' chik rukab' i chiq yuuq', ar naa nuq'atam i q'orik chikinaah.³⁶Nik' wach noq xnuq'at chee q'orik chikinaah i kimaam kati't panchiq yuuq' noq xwesaj taqe chaloq Egipto. Je' wo' chik re' noq naa nuq'atam i q'orik chikinaah i keh, inki i Dios.³⁷Re' hin naa taqe nuye'em chi ri'sil i wajaawriik kow taqe naa numinim chub'anariik xqayejaa' wach kuuk'.³⁸Re' hin naa wesam taqe chi kixilak i ma' kinimanik taj, re' taqe i ma' kinimanik ta weh. Naa wesam taqe chaloq chupaam i tinamit k'amooj taqe reje wii' xa re' la' ma' naa ta kokiik chupaam i kiye'aab' i aj Israel. Ruuk' i re' naa kinab'eem chi re' hin i k'achlik Dios.

³⁹Hat taq aj Israel je' wili i ruq'or i QaJaaw taq chawiij: Yu'naak konkiyeew kik'ux chi looq'jiik i kitiyoox. Xa re' la' naa ruponiik i q'iij chi re' chik i hin naakiin kinimam, ma' naa ta chik kich'uwa'risam wach i nuSantolaj b'ihnaal ruuk' i ruye'ariik i kimayiij chikiwach taqe i tiyoox.

⁴⁰Eh koq'uun chik chu'nchel i aj Israel naa kinkiloq'em chupaam i nuSantolaj ye'aab' ar chinaah inajt naah yuuq' Sinaí wilik ar Israel. Re' hin naa rusuuqb'iik nuk'ux kuuk', naa nuq'orom keh chi ar naa kik'amam chee kimayiij chi nuwach, i peet wach i kitik, eh chu'nchel chib'ih jariik i naa kiq'asam weh.⁴¹Re' hin naa taqe nuk'ulum chi je' ink'ohnik laj mayiij noq naa wesam taqe chaloq pan tokoom tinamit nutukem reje wii' kiwach. Re' hin naa nuk'uhtaam i santohiil chi kixilak reh chi naakilom i wilkeeb' panimaq tinamit.⁴²Re' keh naa kinab'eem chi re' hin i k'achlik Dios noq naa wo' chik nuk'amam taqe cho Israel. Re' i ye'aab' xnuq'or i xti korik chi naa naq nuye'em keh i kimaam kati't.⁴³Ar naa kikojom rehtaal i yiib' wach xkian, je' wo' chu'nchel i xkich'uwa'risaj wii' kiib'. Re' keh naa ruchaliik kik'ixiik chi kib'il kiib' ruum taqe i mahk xkian.⁴⁴Re' taqe i aj Israel naa kikojom rehtaal chi re' hin i Dios naa nub'aniik otob'il keh. Ma' ruum ta chi holohik ta kib'anik, naa nub'anam otob'il keh, xa ruum la' i nuk'axb'al naa nub'anam otob'il keh, eh chi naakiye'em runimaal nuwach, tiko'q keh inki Dios. Re' i ti' k'axik naa ruk'ulum i rax chee' wilik reje pansak'aaj reh i rookb'aal q'iij

⁴⁵Re' i QaJaaw Dios je' wili i xuq'or weh:⁴⁶Hat rak'uun winaq cha sutej reje awach pansak'aaj reh i rookb'aal i q'iij, cha q'or rib'iral i ti' k'axik naa ruchaliik chinaah i rax chee' wilik ar.⁴⁷Je' wili i cha q'or reje reh: Re' i QaJaaw Dios je' wili i ruq'or chawiij: Re' hin naa nuqopom ruq'aq'al naa rukuxiik nuk'atam i chee' wilik chuwach, chi rax chee' chi chiq chee'. Re' i q'aaq' re' re' ma' naa ta ruchuhpiik korehtaal taqe inkuxik ruk'atam, je' i wilkeeb' reje chuwach je' i wilkeeb' reje pansak'aaj pantz'eet reh i rookb'aal q'iij.⁴⁸Chu'nchel i tinamit naa kilwiik reh chi re' hin naa nuqopwiik reh, ma' awach ta naa ruchupwiik reh, tiko'q keh, inki i Dios.

⁴⁹Eh re' hin je' wili xnuq'or: QaJaaw Dios chu'nchel kiq'orik reh chi re' hin xa panjalwaach q'orik kinq'orik, eh chi ma' awach ta inreqwik chi riij, kinki reh. Re' i Dios xuq'or chi xkiyejaa' chik cho wach i kiq'aslaj ch'ihch' i aj Babilonia

¹Re' i QaJaaw Dios je' wili xuq'or weh:²Re' hat rak'uun winaq cha sutej reje awach i wilik wii' i Jerusaleem, cha q'or rib'iral keh panub'ihnaal i hin i ti' k'axik naa ruk'ulum i nupaat. Chaq'or wo' rib'iral i ti' k'axik naakik'ulum i aj Israel.³Je' wili i cha q'or keh: Re' i QaJaaw Dios je' wili i ruq'or taq chawiij: Re' i hin inwixow wach inki a'n ruum aj re' i nuq'or chi naakikanteesjiik ruuk' q'aslaj ch'ihch' chi je' korik wach kik'ux, chi je' taqe aj mahk.⁴Xti korik noq naa kikanteesjiik chi q'aslaj ch'ihch' chi korik wach kik'ux, chi je' taqe aj mahk, ar naa rutohq'iik chaloq pantz'eet reh ireelb'aali q'iij korehtaal imponik pansak'aaj reh i rookb'aal i q'iij.⁵Eh chu'nchel i tinamit naakinab'iniik reh chi re' hin i Dios naa nukansaniik keh ruuk' q'aslaj ch'ihch'.⁶Hat rak'uun winaq cha ch'ikaa' ak'ux chi oq'ik chikiwach i tinamit k'uhtb'al reh chi xiik' naah ti'kiil awánima.⁷Eh wila' xkipahqaaj aweh chib'ih reet noq suq tioq'ik cha q'or keh chi ruum chi xab'iraj rib'iral i ti' k'axik naa ruchaliik chikinaah i tinamit. Noq naa ruchaliik taq cha naah i re' ma' k'isiin taq naa ayo'jiik, xati b'arb'otik taq chik, xama' xta chik rukowiil taq ati'jolal taq naa awik'raam, ruum i xa chalik chik reh taq cha naah inki QaJaaw Dios.

⁸Re' i QaJaaw Dios je' wili i xuq'or weh:⁹Je' wili i cha q'or keh: Re' i QaJaaw je' wili xuq'or taq chawiij:
Re' q'aslaj ch'ihch' juk'uuj chik cho chi korik, juxuuj chik wach chi korik.¹⁰Eh naakiyok'om i ralaq i tinamit, ruuk' i q'aslaj ch'ihch' xan reprotik chik i rub'an.¹¹Re' i q'aslaj ch'ihch' juk'uuj chik chi korik, eh juk'uuj chik wach reh chi naa ruye'ariik pan q'ab' i aj kaansoom.¹²Hat rak'uun winaq cha k'er aachii' chi oq'ik ruum re' i nutinamiit naa kikimiik, re' taqe i k'amal kib'eeh i aj Israel naa kik'ulwiik reh, junkimiik taqe ruuk' i nutinamiit. Chayok' wach aati'jolal ruum i ruti'kiil ak'ux.¹³Re' hin xnunik'eej chik taqe i aj Israel. ¿Mi neenkikuy ransil re' i ti' k'axik? eeh i nuq'or chi naa rehtesjiik i kajaawriik.

¹⁴Eh cha q'or rib'iral i ti' k'axik chaq'oj paam aq'ab' reh chi re' aj kaansoom nee rutoq'aa' kaansanik. Eh cha q'or chi neerub'an ka'pech oon oxpech-oq i ti' k'axik wili. Re' i q'aslaj ch'ihch' wili naa rukansaniik keh i aj Israel.¹⁵Re' keh naa kiyo'jiik ruum ma' k'isiin ikaansanik naa rub'aan ruuk' q'aslaj ch'ihch'. Eh chupaam taqe i ookb'al naa kiwihiik taqe i naa kib'aniik ikaansanik ruuk' i q'aslaj ch'ihch' xan reprotik chik wach.¹⁶Eh ruuk' wo' q'aslaj ch'ihch' naakikanteesjiik i wilkeeb' reje pansak'aaj i pantz'eet, xa aha' pa' naa kiwihiik.¹⁷Re' hin naa nuye'wiik keh panti' k'axik korehtaal inwik'saj i nujosq'iil chikinaah, inki i QaJaaw Dios.

¹⁸Eh je' wo' chik wili xuq'or weh:¹⁹Hat rak'uun winaq chakoj rehtaal i kiib' chi b'eeh, reh chi neenik'ik i kireey i aj Babilonia ruch'ihil i ruq'aslaj ch'ihch'. Re' i kiib' chi b'eeh re' re' chupaam i jinaj chi tinamit naa relik chaloq. Eh re' hat i naa akojom rehtalil, reh chi neenk'utinik aha' i tinamit inooj i ju'jun chi b'eeh²⁰Jinaj i b'eeh naa rojiik chupaam i tinamit Rabá, re' i kiye'aab' i aj Amonita, eh re' chik i b'eeh jinaj ar naa rojiik chupaam i tinamit Jerusaleem re' i kow kiib' chi q'aq'inik, re' i kitinamiit i aj Judá.²¹Re' i kireey i aj Babilonia naa rupab'aam riib' aha' naa rutohq'iik reje i kiib' chi b'eeh, xama' naa ta chik rureqem chi riij aha' wilik b'eeh i naa ruk'amam. Eh naa ruq'ijem ruuk' i flecha, naa rupahqaam i koq reh taqe i rutiyoox, naa wo' ruq'ijem ruuk' i rutamaat i chikop.²²Eh pansak'aaj xtohq'ik reje ikaansanik xk'uhtjik reje i Jerusaleem. Reh chi naa rojiik rub'anam reh ruuk' taqe i rutz'a'amb'aal naa ruq'orom chi naa kitoq'aam kaansanik. Eh re' i reey naa ruk'erem chii' chuq'orariik chi naa kitoq'aam q'aq'inik taqe i ru soldado, naakik'otom kijuul chi junsuut i tinamit.²³Re' taqe i aj Jerusaleem ma' xkinimaj taj chi naa rub'aan keh i ruum i kireey i aj Babilonia ruum wilik i kiyejaam wach. Re' wili re' chi naa ruk'uliik cho pankik'ux i kimahk, rehtalil chi naa kichopariik reje.

²⁴Ruum aj re', re' hin i Dios i nuq'or chi je' wili: Re' kimahk, re' ikaansanik inki a'n i aj Israel xti nk'utinik wach. Eh chu'nchel i mahk xkian wilik wach saqum, ruum aj re' naakichopariik reje.²⁵Re' i kireey i aj Israel xuch'uwa'risaj chik riib' ruuk' i ruyiib' wach na'ojb'al. Ruum aj re' ponik reh i q'iij chi naa ruk'ulum i tz'apaab' wach i ti' k'axik.²⁶Re' hin i Dios kinq'orik chi naa rehtesjiik reh itz'ihy i rub'ur wach i naah, eh naa rehtesjiik i ru corona. Eh re' i ma' xta rajaawriik naa ruwihiik rajaawriik, eh re' i wilik rajaawriik naa rehtesjiik i rajaawriik.²⁷Eh chu'nchel naa nusacham wach, xti korik chi naa nusacham wach. Xa re' la' re' re' naa rub'aan noq naa ruk'uliik chaloq inupab'aam chee hin, chi i q'ataj q'orik, eh chu'nchel naa nuq'asam pan q'ab', inki. Re' ti k'axik xchalik chikinaah i aj amonita

²⁸Re' i QaJaaw Dios je' wili i xuq'or weh: Hat rak'uun winaq cha q'oreej taqe panub'ihnaal i aj amonita re' taqe i kib'ajwik keh i aj Israel, je' wili i cha q'or keh. Re' i q'aslaj ch'ihch' esamaj chik cho parupaat juk'uuj chik chi korik, eh juk'uuj chik wach, xan reprotik chik, xa re' chik taq akanteesjiik iraaj.²⁹Re' inkilow pan kisaq wiriik inkiq'or ma' korik taj, re' inkiq'ijej riij inkiq'or xachukuj q'orik inki a'n Yiib' wach i kina'ojb'al. Ruum aj re' ponik reh i q'iij chi naa kitojom wach i kimahk, naa ruyok'ariik i kalaq ruuk' q'aslaj ch'ihch'.³⁰Re' taqe i aj Amonita naa nuq'orom keh chi naa kimolom i kiq'aslaj ch'ihch' parupaat. Re' hin ar naa nuq'atam i q'orik chikinaah xi-aasjik wii'.³¹Re' hin xan qop chik i nujosq'iil naa nuye'em chikinaah, je' rukab' noq inqop i q'aaq' yohb'aal wach i k'atoj i rub'an. Eh naa taqe nuq'asam pan kiq'ab' i manlik aj kaansoom.³²Re' keh naakik'ahtiik, naa rusachariik kiwach, re' i kikik'eel naa ruchikiik chupaam i tinamit. Eh ma' jino'q naa ruko'liniik keh. Re' hin kinq'orik reh, inki weh i Dios. Re' taqe i mahk xkian i aj Jerusaleem

¹Re' i QaJaaw Dios je' wili i xuq'or weh:²Hat rak'uun winaq naa aq'atam i q'orik chikinaah i tinamit kib'anik reh i mahk. Eh neenaq'or keh chu'nchel i xiik' naah yib'kiil wach na'ojb'al inki a'n³Je' wili i neenaq'or keh. Re' i QaJaaw Dios je' wili i ruq'or taq chawiij: Re' taq i hat aj Jerusaleem i naakansaj taq aawas achaaq', eh inach'uwa'risaj taq awiib' ruuk' i kiyejeb'jiik i tiyoox, ponik reh i ruq'ijil chi naa taq atojom wach amahk.⁴Ruum ikaansanik taq xa a'n xakoj taq amahk, eh ruum chi xach'uwarisaj taq awiib' kuuk' taqe i tiyoox xayejaa' k'ulik iloq reh i ti' k'axik taq cha naah. Xponik i ruq'ijil chi naa rusachariik taq awach. Re' hin naa nuye'em q'ab' chi chu'nchel i tinamit ma' holohik ta naa kiq'oriik, eh chi naa ta taq kaat kikaqse'laam.⁵Re' taq i hat aj Jerusaleem yiib' taq wach ana'ojb'al, xa re' i loq'inik tiyoox taq i na a'n. Ruum i re' naa taq aakaqse'ljiik kuum i tinamit wilkeeb' chi najt chi ma' najt.

⁶Re' taqe i aj taaq'oom chinaah taq aatinamiit Israel, ruuk' i kajaawriik inkichop kik'ux chukanteesjiik i kas kichaaq'.⁷Eh ma' inkik'ax taj i kituut kajaaw, eh inki a'n ti k'axik keh i aj pan tokoom tinamit, inkelq'aaj i chib'ih reh taqe ixoq kamnaq kib'ahiil, je' wo' re' inki a'n reh i ma' xta kituut kajaaw.⁸Ma' inkiyeew ta k'isinoq ruloq'il i nuSantolaj ye'aab', je' wo' taqe i hi'limb'al q'iij.⁹Ruum taqe i chukuj q'orik inki a'n wilik taqe inkikansaj i kas kichaaq'. Eh inkik'ux keh i wi'k inye'arik chi mayiij chikiwach taqe i tiyoox. Inki a'n keh i yiib' wach chi b'anarik.¹⁰Wilik taqe inkixooqb'eej i rehk'een i kajaaw. Eh inkiq'oreej inkixooqb'eej ixoq noq k'ahchi' i ruyab'ilaal i rub'an reh rajlaal i poh.¹¹Wilik wo' taqe inkich'uwarisaj wach i kikaxarohiil ruuk' i rehk'een i kas kichaaq'. Wilik taqe i kixoqb'eej i kil-iib', wilik taqe inkixooqb'eej i rixq'uun i rukab' kajaaw.¹²Wilik inkik'ayej kiib' reh i rukanteesjiik i kas kichaaq'. Eh noq inkiyeew chi kemeel i kitumiin k'ih i tojb'al riij inkipahqaaj, eh inkelq'aaj, inki a'n ti' k'axik reh i kas kichaaq' xinsahchik pankik'ux i hin, inki i Dios.

¹³Re' keh inkijosaj wach i nujosq'iil ruum i leq', ruum i rukanteesjiik i kas kichaaq' inki a'n¹⁴¿Mi konaa ta wo' kikowb'isam i kik'ux, mi konaa ta wo' kikowb'isam kiib' noq naa nuye'em taqe chutojariik i kimahk? Re' wili korik chi naa nub'anam re' hin i Dios kinq'orik reh.¹⁵Re' hin naa nutukem kiwach chupaam chu'nchel i tinamit sut i wach ak'al. Ma' naa ta chik kianam i ch'uwa' wach na'ojb'al.¹⁶Eh ma' suq ta naakilariik kuum i tokoom tinamit. Ruuk' i re' naa kinab'eem chi re' hin i k'achalkiin, tiko'q keh, inki weh i Dios.

¹⁷Re' i QaJaaw Dios je' wo' chik wili i xuq'or weh:¹⁸Hat rak'uun winaq, re' taqe i aj Israel ma' xta chik k'isinoq kiokik wii' chi weh i hin, xa je' chik kikab' i ruxeer q'an ch'ihch' rax ch'ihch', oon plomo ch'ihch' je' plata noq inkihaab'isaj wach q'aaq'.¹⁹Je' re' noq re' hin i Dios i nuq'or chi je' wili: Ruum chi ma' xta chik kiokik wii' re' hin naa wo' chik numolom kiwach pan kitinamiit Jerusaleem.²⁰Je' rukab' imb'aan reh i plata, q'an ch'ihch', rax ch'ihch', plomo, noq jinaj ink'atarik wii' chupaam i horna k'atb'al reh noq inhaab'ik. Re' hin jinaj naa numolom wii' kiwach noq naa nuye'em nujosq'iil chikinaah reh i kiye'ariik panti' k'axik.²¹Re' hin ruum chi xan qop chik i nujosq'iil naa numolom kiwach naa nusacham kiwach chupaam i tinamit Jerusaleem.²²Eh nik' wach noq inhaab'ik ruum i q'aaq' i plata pan horna je' re' noq naa nusacham kiwach panyejaal i tinamit. Chi je' re' naa kinab'eem chi re' hin i k'achlik Dios xnuyeew chee nujosq'iil chikinaah, inki weh i Dios.

²³Eh je' wo' chik wili i xuq'or weh:²⁴Hat rak'uun winaq cha q'or keh i aj Israel chi re' hin naa nukanaam i kitinamiit chi je' rukab' i chiq ak'al ma' qajik taj i jab' chinaah.²⁵Ruum re' taqe i ajaab'ees chinaah i tinamit je' kikab' i josq'laj kaq b'ahlam i ruk'er chii' noq i ruchop i rutiib'. Je' re' inki a'n i keh noq inkisach wach i kitinamiit inkelq'aaj i chib'ih keh re' ruuk' taqe i k'ih tz'aaq, eh inkikansaj taqe kib'ahiil ixoq.²⁶Re' taqe i k'amal b'eeh aj tiij inkiyoj wach i nuk'uhb'aal, inkich'uwarisaj wach i wilik rusantohiil. Eh xa jinaj wach inkilow i wilik rusantohiil ruuk' i ma' xta rusantohiil. Ma' nkik'uhtaaj ta reh i tokoom aha' wilik i saq wach, aha' wilik i ch'uwa' wach ma' kiyeew ta ruloq'il taqe i hi'limb'al q'iij, ni xata re' hin inkiyeew nuloq'il.²⁷Re' taqe i ajaab'ees chinaah i tinamit re' re', je' kikab' i josq'laj xojb' i ruxereb'eej i rutiib'. Xa re' ikaansanik kas kichaaq' inkaaj, reh chi kib'ehomrik ruuk' inkelq'aaj.²⁸Re' taqe i jalal nuq'oral inki a'n kiib' xa je' kikab' i winaq i ruchunej wach i tz'aq b'urb'al wach i ch'uwa'. Re' keh inkiq'or chi wilik ink'uhtjik keh pan kisaq wiriik. Eh inkiq'or chi re' hin kinq'orik keh, eh ma' hin ta wo' kinq'orik keh.²⁹Re' i tinamit wilkeeb' ar xa re' i yiib' wach na'ojb'al inki a'n inkiq'uch i chib'ih keh i neb'aa', je' wo' taqe i ti' wilkeeb'. Eh inkiyeew panti' k'axik i aj tokoom tinamit.³⁰Re' hin xnusik' naq jino'q holohik runa'ojb'al chi kixilak i tinamit re' re' reh chi naa naq rukojom kina'ojb'al i tinamit. Reh naq chi xupahqaaj weh i hin chi ma' nee ta nusach kiwach xa re' la' ma' jino'q wo' hoq i xnureq.³¹Ruum aj re' naa nuye'em nujosq'iil chikinaah je' rukab' i xaq q'aaq'. Ruuk' i re' naa nusacham kiwach. Reh chi naa nuye'em taqe chutojariik i kimahk, chi riij i kiyiib' wach na'ojb'al xki a'n, inki i QaJaaw Dios. Re' i tinamit Samaria ruch'ihil i Jerusaleem xipajarik ruuk' i ki'ib' chi k'oyoom laj ixoq

¹Re' i QaJaaw Dios je' wili i xuq'or weh:²Hat rak'uun winaq, re' hin xnuq'or aweh chi ki'ib' ixoq xi wihik chaloq xa jinaj kituut.³Re' keh kok' q'ahxoq taqe noq kitoq'aa' cho k'oyomal ar Egipto xkikanaa' kiib' chi xyot'arik paam i kikok' ch'uuch', ar xkich'uwa'risaj wach i kiq'axoq'iil.⁴Re' aasb'ees Ahola rub'ihnaal rujalwaach i tinamit Samaria, eh re' chaaq'b'ees Aholiba rub'ihnaal rujalwaach i tinamit Jerusaleem. Re' hin xnuk'am taqe chi je' wehk'een xwihik wak'uun wixq'uun kuuk'.

⁵Re' i Ahola noq nuchopom naah i hin ma' xirunimaj taj, re' chik taqe i ki soldado i aj Asiria i ruka'jaah reje xuk'ax wach chi nujilow.⁶Eh kitiq'aam kiib' ruuk' xela itz'ihy, re' taqe i kib'anik taaq'anik, re' taqe i k'amal kib'eeh soldado, re' taqe i k'ijolaq xa holohaq chik taqe, eh riij kawáyu kiooj.⁷Re' Ahola ruyeew riib' pan k'oyomal kuuk' chu'nchel i aj Asiria, re' taqe i q'e' nimaq kajaawriik inki a'n kiib'. Re' i q'e' xuk'ax reje wach, eh xuch'uwa'reej riib' ruum xuloq'ej taqe i kitiyoox i tinamit re' re'.⁸Re' reh ma' xukanaa' ta chik i k'oyomal xutoq'aa' cho Egipto. Ko k'isa q'ahxoq noq xutoq'aa' chaloq, xuyeew cho chi yot'arik paam i kok' rich'uch' keh chu'nchel i winaq, xuch'uwa'reej wach i ruq'ahxoqiil.⁹Je' re' noq re' hin xnuq'asaj pan kiq'ab' i aj Asiria, re' i q'e' ruk'ax reje wach i xub'an wii' i k'oyomal.¹⁰Eh noq ximponik xkik'uhtaaj ruk'ixb'ilaal i Ahola xkiq'uch i rak'uun rixq'uun, eh re' reh xkanteesjik ruuk' i q'aslaj ch'ihch'. Eh aha' ta chik ma' x-ib'irjik rib'iral i xuk'ul ixoq re' re'.

¹¹Eh re' i ruchaaq' Aholiba rub'ihnaal xrilow xub'an i ras xuq'asaj wo' chik riib' i reh chub'anariik i yiib' wach. Q'e' chik yiib' wach i xub'an i reh chuwach i xub'an i ras, xub'an i k'oyomal.¹²Eh xti xuyeew riib' pan k'oyomal kuuk' taqe i aj Asiria re' i ruka'jaah reje, re' taqe i kib'anik taaq'anik, i k'amal kib'eeh soldado kitiq'aam kiib' chi korik. Wilik kitz'a'amb'aal reh q'aq'inik chi je' taqe k'ijolaq, eh riij kawáyu kiooj.¹³Re' hin xnukoj rehtaal chi re' Aholiba xuch'uwa'risaj wo' riib' ruuk' i k'oyomal, je' rukab' i xub'an i ras eliik wach i kina'ojb'al.¹⁴Eh xiik' wo' chik naah yib'kiil wach i xub'an, noq xrilow chi tz'ihb'amaj kehtalil taqe winaq kijalwaach i aj Babilonia iq'omamaj wach ruuk' i kaqiq'oom¹⁵B'ak'lik i kipaam chi sincho, b'ak'lik i kinaah chi itz'ihy k'ih wach inka'yik. Re' taqe i ehtalil re' re' je' kiwii' k'amal kib'eeh soldado, je' kiwii' taqe i aj Babilonia re' i kiye'aab' xi-aasjik cho wii'.¹⁶Eh noq xrilow i kehtalil i aj Babilonia i Aholiba ma' k'isiin ta xuk'ax kiwach xutaq'aaj raj taqareel chi kiyuq'ub'jiik i aj Babilonia.¹⁷Eh re' taqe i aj Babilonia xi chalik wo' hoq, xkian i k'oyomal ruuk' xuch'uwa'risaj taqe ruuk' i ruk'oyomal. Re' keh xti ma' k'isiin wo' chik xkich'uwa'risaj wach. Eh re' i Aholiba xtohq'ik wo' chik ruyib'um taqe¹⁸Ruum aj re' xuq'asaj riib' chub'aan i k'oyomal chuwach i tinamit xuk'uhtaaj taqe i ruti'jolal chi t'uslik wach. Eh re' hin ma' xwaaj ta chik wach ruum taqe i xub'an, je' rukab' noq ma' xwaaj ta chik wach i Ahola i ras.¹⁹Re' Aholiba xuq'asaj riib' pan k'oyomal chi jumpech ma' xsahchik ta paruk'ux i xub'an cho paruq'ahxoqiil noq xub'an chee k'oyomal paruyuq'ul i Egipto.²⁰Ma' k'isiin ta xuk'ax kiwach i xub'an wii' i k'oyomal xti xuq'asaj riib' keh i winaq xiik' naah kik'oyomal, je' kikab' taqe i winaq kawáyu, je' kikab' taqe i b'uurux.²¹Re' i Aholiba koraaj wo' k'acharik pan k'oyomal je' rukab' noq xuyeew chi yot'arik paam ruch'uuch' paruq'ahxoqiil keh taqe i aj Egipto.

²²Ruum aj re', re' hin i Dios i nuq'or chi re' taqe i xub'an wii' i k'oyomal re' i ruyib'uj chik taqe yu'naak naa nuye'em q'ab' chi naa kisutinik chi ixowan wach, chi xa aha' yuuq' naa kichaliik chinaah rub'anariik reh.²³Naa kichaliik i aj Babilonia, i aj Caldeo, i aj Pecaod, i aj Soa, i aj Coa, chu'nchel taqe i aj asirio. Eh je' wo' taqe i k'ijolaq, q'e' holohaq, taqe i aj taaq'oom, taqe i k'amal kib'eeh soldado, taqe i aj q'aq'ineel, riij kawáyu naa kik'uliik iloq.²⁴Eh ma' k'isa kareta, ma' k'isa soldado naa kichaliik chinaah chi q'aq'inik, naa kikotem riij kiyejaam cho kiib' wilik kich'ihch' puneet, wilik kipulato ch'ihch'. Re' hin naa nuye'em q'ab' keh chi naa kiq'atam i q'orik chinaah, je' rukab' i ruq'or i kik'uhb'aal i keh.²⁵Re' hin naa nuye'em i nujosq'iil chinaah. Re' keh naa kib'aniik reh, naakiyok'om i ju', je' wo' xikin, re' taqe i naakikahnik chi k'achaach ruuk' q'aslaj ch'ihch' naa kikanteesjiik, eh naa ruq'uchariik i kak'uun kixq'uun. Eh nik' chik nimaal i naa kikahniik ruuk' q'aaq' naa rusachariik kiwach.²⁶Naa kiq'uchum i ruso', naa kiq'uchum nik' naq nimaal i ruxoyej wii' riib'.²⁷Re' hin ma' naa ta chik nuye'em q'ab' reh i Aholiba chi naa rub'anam i k'oyomal, je' rukab' i xub'an cho Egipto. Eh ma' naa ta chik rilom kiwach i aj Egipto, ni xata naa chik ruk'uliik taqe paruk'ux.²⁸Re' hin i Dios i nuq'or chi naa nuye'em q'ab' chi naa ruchaliik b'anroq reh kuum i rixow kiwach, eh ruyib'uj taqe yu'naak.²⁹Re' keh ma' k'isiin ta naakixowaam wach naa kianam reh, naa kiq'uchum i chib'ih reh, taqe i rureqem tz'aaq ruuk' i rukamaj. Eh naakit'usaam chi jumpech, naa kikanaam chi ma' xta chik wilik reh i xuyeew riib' pan k'oyomal ruum i loq'inik tiyoox.³⁰Ruum taqe i re' k'ahchi'rik'iik chi ti' k'axik yu'naak, ruum chi xuq'asaj riib' pan k'oyomal kuuk' taqe i k'ih seht chi tinamit re' re' xkisaj i rajaawriik xokik chi loq'inik tiyoox kuuk'.³¹Xub'an wo' chik ree reh je' rukab' i xub'an i Ahola i ras, ruum aj re' naa wik'sam chi ti' k'axik i reh, re' i je' i k'ah laj ha' xnuyeew reh chi uuk'jik i ras.

³²Re' hin i Dios je' wili i nuq'or chi riij,
xiik' naah i ti' k'axik naa ruk'ulum je' rukab' i xuk'ul i ras, je' naa pan nimlaj kulk cham paam xnuyeew reh chi uuk'jik i k'ahlaj ha' naa rukahniik chi kaqse'lb'al ma' awach ta chik naa rajwaniik wach.³³Eh naa wo' rusachariik wach je' rukab' i ti' k'axik xuk'ul i ras, naa rukahniik chi je' xohk'reel ruum i je' k'ahlaj ha' ruum i ruti'kiil ruk'ux je' awanaab' Samaria.³⁴Eh je' na naa rukem chu'nchel naa rutz'irim paam i ye'aab' reh. Eh naa rutohq'iik ruloch'om riib' ruum ruti'kiil ruk'ux.
Re' wili korik ruum re' hin i Dios kinq'orik reh.

³⁵Ruum aj re' xnuq'or reh chi je' wili: Ruum chi xinsahchik paruk'ux i Aholiba ma' xiraaj ta chik kiin runimam naa ruk'ulum i tojb'al ru mahk chi riij i xuch'ikaa' cho wii' ruk'ux, eh chi riij taqe i k'oyomal xub'an, kinki.

³⁶Re' i QaJaaw Dios je' wili i xuq'or weh: Hat rak'uun winaq ¿Mi nawaaj aq'atam q'orik chinaah i Ahola, chinaah i Aholiba? Chaq'or keh panaq'kiwach i yiib' wach i xkian.³⁷Re' keh xa re' ikaansanik xa re' i je' k'oyomal inki a'n ruuk' i loq'inik tiyoox. Eh xkik'at chi kimayiij i kak'uun kixq'uun chuwach eh xkik'at wo' chi kimayiij i wak'uun wixq'uun i hin xwihik kuuk'.³⁸Eh ma' xata re' re' xkian xkich'uwa'risaj la' wo' paam i nuSantolaj paat, eh ma' xkiyeew ta ruloq'il taqe i hi'limb'al q'iij.³⁹Eh noq xkik'at chi kimayiij i kak'uun kixq'uun chuwach i kitiyoox, xi chalik wo' pan nuSantolaj paat xkich'uwa'risaj paam. Re' taqe yiib' wach na'ojb'al wilik xkian panupaat.⁴⁰Eh xkitaq'aaj i taqareel chupaam i tinamit najt wilkeeb' chaloq, xkian kitiin xkiq'omaaj inaq'kiwach, eh xkixoyej kiib' ruuk' karena noq xkik'ul taqe i winaq re' re'.⁴¹Eh kitzunaa' kiib' naah i mexa chupaam jinaj i ye'aab' ye'jamaj chi korik. Chinaah i mexa re' re' xkiyeew i insensia aseite xkiyeew naq weh i hin.⁴²Eh x-ib'irjik chi k'erik kichii' chi ninq'ijinik i ruk'ihaal tinamit. Re' taqe i winaq xi k'amarik cho chupaam i ye'aab' chiq yuuq' xi xoyjik kuum taqe i kiib' chi ixoq xkojarik ch'ihch' ralaq kiq'ab', eh kojarik holohaq corona wach kinaah.

⁴³Eh re' hin je' wili i xnuq'or chikiij i kiib' chi ixoq wilkeeb' pan k'oyomal: ¿Mi konaa ta wo' kianam i k'oyomal i winaq kuuk' ixoq wili ruum xti yiib' wach inki a'n? kinki.⁴⁴Re' taqe i winaq wili xi chalik ruuk' i Ahola, ruuk' i Aholiba re' taqe i xasuq keh i chopkalil pan kib'eeh, je' rukab' noq kiponik ruuk' i k'oyoom laj ixoq.⁴⁵Eh re' taqe i winaq korik wach kik'ux naa ruq'atwiik i q'orik chikinaah i ki-ib' chi ixoq re' re', je' rukab' noq inq'atarik i q'orik chinaah i ixoq i ruch'uwa'risaj wach i rukaxaro, eh chinaah imb'anik kaansanik.

⁴⁶Ruum i re', re' i QaJaaw Dios nim rajaawriik je' wili i ruq'or: Kimol cho kiib' i soldado neekichaliik chi yohb'eesjiik, eh neekieljik reje.⁴⁷Eh naa kikanteesjiik chi ab'aj, eh naakitoq'ariik chi q'aslaj ch'ihch'. Nee wo' kanteesjik i kak'uun kixq'uun, neenk'atarik i kipaat.⁴⁸Chi je' re' naa nusacham wach i yiib' wach na'ojb'al chupaam i tinamit. Reh chi chu'nchel ixoq neenkikoj rehtaal chi ma' holohik taj i re', eh chi ma' nee ta nkitijej keh.⁴⁹Re' taqe i kiib' chi ixoq re' re', naa kitojom wach i kiyiib' wach na'ojb'al. Naa kitojom i kimahk chi riij i loq'inik tiyoox xkian. Ruuk' i re' neenanab'eej taq i hat chi re' hin i k'achlik Dios, inki. Re' i jalwaach q'orik chi riij i xun inroqrotik i ha' chupaam

¹Eh noq lajeeb' rub'eeh i ru lajeeb' poh reh i rub'eleej haab' qak'amariik reje Babilonia je' wili i xuq'or weh i QaJaaw Dios:²Hat rak'uun winaq cha tz'ihb'aaj rehtalil i q'iij wili ruum chupaam i q'iij re' re' naa rojiik chi peleto i kireey i aj Babilonia naa kikotem riij i tinamit Jerusaleem.³Xa re' la' panjalwaach q'orik cha q'or keh taqe i ma' kinimanik taj, chi je' wili:
Re' i QaJaaw Dios je' wili xuq'or taq aweh: Chakoj taq jino'q i xun nah q'aaq' chakoj taq ha' chupaam.⁴Chakoj taq i wetz'oj ch'aak chupaam holohaq rutuuq chikop je' wo' i ruch'akil jurub', chakoj taq i holohaq b'aaq.⁵Eh cha sik' taq wach i kitib'kaal i tentzun chayeew taq pan xun, eh nee taq i naham i sii' chi ri'sil, nee nakanaa' chi neenroqrotik, korehtaal inchaq' chi korik i ch'aak je' wo' hoq i b'aaq.

⁶Re' i QaJaaw Dios je' wili i xuq'or weh:
Q'e' ti' i naakik'ulum i aj Jerusaleem, re' taqe i aj kaansoom. Je' kikab' i xun q'uux paam. Re' hat naa awesam chi ju'junaal i tiwik chupaam i xun, naa akanaam chi ma' xta paam.⁷Re' keh ma' k'isiin ikaansanik xkian chupaam i tinamit, eh re' i kikik'eel i xkikansaj xchihkik chinaah ab'aj ma' pan pooq ta xchihkik reh chi ma' xb'uhrik ta naah ruum i pooq.⁸Re' hin xnukanaa' i kikik'eel chinaah ab'aj t'uslik wach, re' ink'utinik wii', reh chi naa nuq'ajam wach keh i xkian noq naa taqe nuye'em chi tojariik i kimahk.⁹Re' hin i Dios i nuq'or rib'iral i ti' k'axik naa ruchaliik chikinaah i tinamit aj kaansoom, re' hin je' naa jinaj q'aaq' i naa nuluk'um.¹⁰Je' naa ma' k'isa sii' i naa nukojom chi ri'sil i xun korehtaal inchaq' chi korik i tiwik, eh naa ruchiqiik i riis korehtaal ink'ahtik i b'aaq.¹¹Chi riij i re' naa nutzunaam nah q'aaq' i xun ma' xta paam korehtaal inkaqb'ik wach q'aaq' korehtaal i nelik i ruch'uwa'iil wach, i ruq'uxil wach.

¹²Xa re' la' xti xiik' wo' chik naah q'uxil wach, ni xata naq ruuk' q'aaq' i nelik i ruq'uxil wach.¹³Re' taqe i aj Jerusaleem re' hin xwaaj naq nusaqb'isam kiwach. Xa re' la' re' keh xama' xkisaqb'isaj ta wo' kiib'. Korehtaal naa nuye'em i nujosq'iil chikinaah.¹⁴Re' hin i Dios kinq'orik reh chi korik chi naakik'ulum i ti' k'axik wili. Re' hin naa nub'aniik keh ma' naa tarik'iikwach, ma' naa ta nuketelaam kiwach, ma' naa ta nusutem chi riij i nuq'oral. Naa la' nuye'em taqe chi tojariik i kimahk, tiko'q keh inki Dios. Re' i rukimiik i rehk'een i Ezequiel

¹⁵Re' i QaJaaw Dios je' wili i xuq'or weh:¹⁶Hat rak'uun winaq, re' hin xa chi jumehq'iil naa wesam chawach i xti q'e' inawaaj wach. Xa re' la' i nuq'or aweh chi maa tib'isaj ak'ux chi riij, ma' toq'ik chi riij, maa q'eb' i riis naq'awach ruum.¹⁷Ma' naa ta k'uhtaam chi ti' naa awik'raam, ni xata naa awesam itz'ihy i nab'ur wii' wach anaah. Eh ma' naa ta awesam axijab' cha wooq ma' naa ta akojom aq'eq' so', ma' k'ux aweh i kaxlanwi'k re' ruuk' ink'uxarik noq imb'aan kimik, inki weh.

¹⁸Re' hin pan wahq'eq xnub'an nuk'utaaj kuuk' i tinamit, eh paruxq'eqiil xkimik i wehk'een. Eh wahq'eq chi junwaar xnub'an wo' hoq i xuq'or weh i QaJaaw Dios.¹⁹Eh noq xkilow chi je' re' i tinamit xkipahqaaj weh chi je' wili:
Chach'ob' rub'ehel qeh chib'ih iraaj i ruq'orom chi qeh hoj i k'ahchi' kaat, inki taqe.

²⁰Re' hin je' wili i xnuq'or keh:
Re' i QaJaaw Dios je' wili xuq'or weh.²¹Chaq'or keh i tinamit Israel: Re' i QaJaaw Dios je' wili i xuq'or: Re' hin naa nuye'em q'ab' chi naa nuch'uwarisam paam i nupaat re' i q'e' inkik'ax i keh, eh re' naq inkich'ikaa' wii' kik'ux, re' i q'e' imponik chikiwach. Eh re' taqe i kak'uun kixq'uun xi kahnik cho ar Jerusaleem naa rukuxiik kikanteesjiik panq'aq'inik, inki.²²Eh re' keh naa kianam je' rukab' i xnub'an i hin ma' naa ta kik'uhtaam chi ti' kik'ux ma' naa ta kib'urum i kiwach, ni xata naa kik'uxum keh i kaxlanwi'k ink'uxarik noq imb'aan kimik.²³Eh ma' naa ta kesam itz'ihy inkib'ak' wii' wach kinaah, ma' naa ta kesam kixijab'. Ma' naa ta koq'iim ruum i ruti'kiil kik'ux, xa re' la' naa kikahniik chi ma' xta chik kaansil ruum kiyiib' wach na'ojb'al inki a'n k'ul naa kiq'orom i ruti'kiil kik'ux chikiwach.²⁴Re' i xuk'ul i Ezequiel ink'uhtanik reh chi je' re' i naakik'ulum. Re' i xub'an i reh je' wo' chik re' i naa kianam i keh. Eh noq naa ruk'ulariik taqe i re', re' keh naa kinab'eem chi re' hin i k'achlik Dios inki.

²⁵Je' wili i xuq'or weh: Re' hin naa wesam chikiwach i aj Israel i nupaat re' naq inkich'ikaa' wii' kik'ux, ruum i ruholwochiil insuuqb'ik kik'ux, eh q'e' imponik chikiwach. Eh naa wo' wesam chikiwach i kak'uun kixq'uun.²⁶Eh noq naa ruk'ulariik taqe i re' wilik i naa ruko'leem cho riib' chuwach i kimik naa ruk'uliik ruq'orom aweh ayu' Babilonia chib'ih i xk'ularik.²⁷Chupaam i q'iij re' re' naa wo' chik acholiik q'orik ma' naa ta chik akahniik meem, naa chik aq'oreem naa ruk'uliik iloq chi taqarik. Re' hat naa ak'uhtaniik keh i tinamit i naakik'ulum. Ruuk' i re' naa kinab'eem chi re' hin i k'achlik Dios, inki. Re' ti' k'axik chalik chikinaah i aj Amonita

¹Re' QaJaaw Dios je' wili i xuq'or weh:²Hat rak'uun winaq ti tz'ehtanoq reje aha' wilkeeb' cho wii' i aj Amón, cha q'or reje keh i ti' k'axik chalik reh chikinaah.³Chaq'or keh chi je' wili: Re' Dios je' wili i ruq'or taq chawiij: Re' xkik'er kichii' ruum i rusuqkiil kik'ux noq xkilow chi xkich'uwa'risaj paam i nupaat. Eh chi xsacharik wach i tinamit Israel, eh chi xik'amarik reje pan tokoom tinamit i aj Judá.⁴Ruum i re' naa taqe nuye'em pan q'ab' i tinamit wilkeeb' reje parelb'aal q'iij, re' chik i keh naa kehchaniik reh i kiye'aab', eh naa kiyejaam kipaat ar, re' chik i keh naakik'uxwiik i wach i kitik, re' keh naak'uk'iniik reh i kilecha.⁵Re' hin naa nusutem kiye'aab' i aj Rabá chi kiye'aab' cameyo, eh re' i kiye'aab' i aj Amón naa nusutem chi kiye'aab' tentzun, chi je' re' naa kinab'eem chi re' hin i k'achlik Dios.⁶Re' hin i Dios, kinq'orik reh chi re' taqe i aj Amón xan kipohq'aaj chik paam kiq'ab', xakipisk'anik chik pankooq ruum i rusuqkiil kik'ux chi riij i ti' k'axik xkik'ul i aj Israel.⁷Ruum aj re', re' hin naa nuye'em i ti' k'axik chikinaah, naa nuq'asam taqe pan kiq'ab' i tinamit i nixowanik kiwach, naa ruq'uchariik i chib'ih keh. Eh naa wesam i kajaawriik, naa nusacham kiwach chi kixilak i nimaq tinamit. Ruum i re' naa kinab'eem chi re' hin i k'achlik Dios, inki. Re' ti k'axik xchalik chikinaah i aj Moab

⁸Re' i QaJaaw Dios je' wili i xuq'or: Re' taqe i aj Moab ruch'ihil i aj Seir inkiq'or chi re' taqe i aj Judá xa elik wo' kiwach kuuk' i tokoom tinamit.⁹Ruum aj re', re' hin naa nutehem i b'eeh parucheel i tinamit Moab reh chi naa rojiik b'anroq keh i tinamit wilkeeb' ar. Re' taqe i tinamit re' re' inkiyeew ruloq'il i aj Moab, je' wili kib'ihnaal Bet-jesimot, Baal-meón, Quiriataim.¹⁰Eh naa wo' nuye'em q'ab' chi re' i kok' tinamit wilkeeb' reje chi korkiil ireelb'aalq'iij naa ruchopwiik naah i kitinamiit i aj Amón, reh chi ma' naa ta chik ruq'orariik i kib'ihnaal chi jumpech chi kixilak i tinamit.¹¹Eh naa wo' nuye'em taqe chutojariik i kimahk i aj Moab. Ruuk' i re' naa kinab'eem chi re' hin i k'achlikiin, inki i Dios. Re' ti' k'axik xchalik chikinaah i aj Edom

¹²Re' i QaJaaw je' wili i xuq'or: Re' taqe i aj Edom xkiq'aj wach keh i aj Judá i xb'aan keh junriim. Ruuk' i re' xkikoj runimaal kimahk.¹³Ruum aj re', re' hin naa nuye'em i ti' k'axik chikinaah i aj Edom naa nusacham kiwach i kitinamiit, i chikop. Eh ruuk' q'aslaj ch'ihch' naa nusacham kiwach, ar naa nutoq'aam reje Temán, eh naa ruponiik ar Dedán.¹⁴Eh re' hin naa nuq'ajam wach keh i aj Edom i xkian reh i nutinamiit Israel. Eh re' taqe i aj Israel naa rub'aniik keh i aj Edom, ruuk' i nujosq'iil. Ruuk' i re' naa kinab'eem chi re' hin xinq'ajwik wach keh, inki i QaJaaw Dios. Re' ti' k'axik xchalik chikinaah i aj filisteo

¹⁵Re' i QaJaaw Dios je' wili i xuq'or: Re' taqe i aj filisteo xkian ti' k'axik keh i aj Judá, ma' kisiin ta xkixow wach, ruum i re' xkisach wach.¹⁶Ruum aj re', re' hin i Dios i naa nusacham kiwach i aj filisteo, je' wo' taqe i aj cereteos. Eh naa wo' rukuxiik nusacham kiwach i konaakikahniik chi k'achalkeeb' wilkeeb' reje chi chii' i palaw.¹⁷Re' hin naa nuq'ajam wach keh i xkian, yohb'aal wach i nujosq'iil naa nuye'em chikinaah. Noq naakik'ulum taqe re' naa kinab'eem chi re' hin i k'achlik Dios, inki. Re' i Dios xuq'or rib'iral chi naakik'ulum i ti' k'axik i aj Tiro

¹Eh pank'amb'al rub'eeh i peet poh reh i rujunlaaj haab' qak'amariik reje Babilonia re' i QaJaaw Dios je' wili i xuq'or weh:²Hat rak'uun winaq re' taqe i aj Tiro q'e' insuuqb'ik kik'ux inkik'er kichii' chuq'orariik chi je' wili:
Ma' xta reet chi xsahchik wach i Jerusaleem, re' naq i reh q'e' b'ehoom, chikiwach i tinamit. Xa re' la' yu'naak xsacharik chik wach re' chik i hoj q'e' naa ruwihiik qab'ehomal, inki taqe.

³Re' hin i Dios i nuq'or keh chi je' wili:
Re' taq i hat aj Tiro ma' imponik ta chi nuwach taq i na a'n. Ruum aj re' naa nuk'amam chaloq i k'ih seht chi tinamit taq cha naah, xa je' chik rukab' i rub'ohl i palaw noq naa kik'uliik iloq.

⁴Eh naa kikutum wach ak'al i tz'aq wilik chi riij taq aatinamiit, je' wo' hoq inajt kinaah tz'aq i ko'lb'al taq awiib'. Eh ma' xta chik naa nukanaam taq panaye'aab', xa je' chik mesooj wach ab'aj naa rukahniik.⁵Re' taq aatinamiit i hat aj Tiro naa rukahniik chi chahb'al wach kiya'l i aj karineel. Re' i nimaq tinamit naa ruchaliik elq'anoq taq i chib'ih aweh re' hin i Dios kinq'orik reh.⁶Re' taq aatinamiit wilkeeb' pantaq ab'iix naa kikanteesjiik ruuk' q'aslaj ch'ihch' ruuk' i re' naa taq anab'eem chi re' hin i k'achlik Dios.

⁷Re' hin i Dios i naa nuk'amam taqe chaloq chi q'aq'inik awuuk' taq i hat aj Tiro i Nabucodonosor re' i kireey i aj Babilonia, re' q'e' nim rajaawriik chikiwach chu'nchel i reey. Re' reh naa ruchaliik ruch'ihil taqe i ruk'ihaal soldado, riij kawáyu, pan kareta wilkeeb'.

⁸Eh ruuk' q'aslaj ch'ihch' naa rukansam taq aatinamiit wilkeeb' pantaq ab'iix. Naakikotem riij taq aatinamiit naa kiyejaam kiye'aab' ko'lemb'al kiib', ruuk' i q'aslaj ch'ihch' ruuk' i rupulato ch'ihch' naa kianam taq aweh ru soldado.⁹Eh naakipaxib'eem i koraal tz'aq chi riij taq aatinamiit, je' wo' inajt kinaah tz'aq inako'leej taq wii' awiib'.¹⁰Eh noq naa kokiik i ki soldado taqe i aj Babilonia chupaam taq aatinamiit, xaq'equm chik paam i pooq naa kuksam i kikawayu, i kikareta xama' naa ta chik taq ak'uhtaniik. Eh naa ruk'uyu'jiik paruye'aab' i tz'aq kotimaj wii' riij taq aatinamiit.¹¹Re' i kikawayu naakiyeq'eb'eem paam taq aatinamiit. Eh ruuk' q'aslaj ch'ihch' naa kianam kaansanik, eh naa kituhb'aam wach ak'al i rooq i paat.¹²Eh naa taq kiq'uchum ab'ehomal, je' wo' taq inayak, naa kituhb'aam wach ak'al i koraal tz'aq chi riij taq aatinamiit, je' wo' paat imb'aan wii' i q'ataj q'orik. Eh naa kikutum pan runimaal ha' taqe ab'aj, taqe i chee' korjinaq wii'.¹³Eh naa nukanaam chi ma' naa ta chik rub'aan i tz'uuy imb'aan naq pan tinamit, ma' naa ta chik rub'aan i q'ooj arpa.¹⁴Naa nukanaam taq aatinamiit chi je' rukab' i mesooj wach ab'aj, naa wo' nukanaam chi chahb'al wach kiya'l taqe i aj karineel, ma' jaruuj chik naa rukorjiik ruka'peech, inki i Dios.

¹⁵Re' hin i Dios je' wili i nuq'or keh i aj Tiro: Re' taqe i tinamit wilkeeb' chi chii' i palaw xanaa chik kib'arb'otiik ruum kiyo'jiik noq naa kib'iram i choqik, noq naakik'erem kichii' taqe i ti' naa kiwihiik noq naa kikanteesjiik taq aatinamiit.¹⁶Eh chu'nchel i kireey i tinamit wilkeeb' chi chii' i palaw naakeliik cho pan kiye'aab', naa kesam i kiso' chikiij xankitak'aa' chikiij, eh je' wo' hoq i kinimaq rooq so'. Eh naakitzunaam kiib' wach ak'al xakib'arb'otik chik ruum kiyo'jiik, xanaa chik kokiik meem noq naakilom taq i naa ak'ulum.¹⁷Eh naa taq kitz'uyem aweh i tz'uuy wili reh ruti'kiil k'uxliis:
Ruum chi xsacharik taq awach kuum i tinamit kichalik chi chii' i palaw re' aatinamiit xti wilik naq rib'iral chi nim kiwach, q'e' naq taq kow awiib' chi ik'ik chinaah i palaw, eh q'e' naq i naayohb'isaj taqe chu'nchel i tinamit.¹⁸Eh ruum chi xb'aan taq chik aweh xakib'arb'otik chik ruum kiyo'jiik i tinamit wilkeeb' chi chii' i palaw. Ruum chi xsacharik taq chik awachxiyo'jik taqe i tinamit wilik palaw chi kijunsuut, inko'q taqe.

¹⁹Re' hin i Dios je' wili i nuq'or keh i aj Tiro: Re' taq aatinamiit naa rukahniik chi ma' xta wilik chupaam, naa rukahniik chi je' rukab' i ye'aab' ma' b'anooj ta patinik chupaam. Re' taq aatinamiit je' na naakitz'apam naah chi palaw.²⁰Re' hin naa taq kaat numuq'aam chupaam i chaamlaj jul muqulkeeb' wii' taqe i aj najtir q'iij, naa taq kaat nukutum qohoq paruchamiil ak'al. Ar taq naa awihiik chupaam i kiye'aab' i kamnaq taqe chaloq. Eh ma' naa ta chik ruwihiik k'achareel chupaam taq aatinamiit, ma' naa ta chik rukorjiik chi jumpech chinaah i wach ak'al.²¹Xiik' naah ti' kiil taq naa kaat nuye'em wii' ma' naa ta chik rilariik taq awach. Naa naq chik rusik'ariik taq aatinamiit ma' aha' ta chik naa kireqem, tiko'q keh, inki weh i Dios. Re' tz'uuy reh ruti'kiil k'uxliis chi riij i tinamit Tiro

¹Re' i QaJaaw Dios je' wili i xuq'or weh:²Hat rak'uun winaq, cha tz'uyej i tz'uuy reh i ruti'kiil k'uxliis chi riij i tinamit Tiro.³Re' i tinamit Tiro wilik chi chii' i palaw, re' imb'anik reh i yak kuuk' i tokoom tinamit, kuuk' i k'ih seht chi tinamit wilkeeb' chi chii' i palaw je' wili i nuq'or keh: Re' i QaJaaw Dios je' wili i ruq'or taq chawiij:
Re' taqe i aj Tiro inkiq'or chi re' i kitinamiit xiik' naah holwochiil, eh chi korik wach kik'ux.⁴Re' tinamit re' re' xti wilik naq rajaawriik chikiwach taqe i kikamanik chinaah i palaw. Je' rukab' jino'q i barco q'e' holohik ruyejeb'jiik imb'aan.⁵Eh je' rukab' i barco korjinaq ruuk' rutz'ilomaal i chaj ink'amarik cho ar Senir. Eh re' chee' inchopwik reh i ritz'ihyaal ar xkesaj ruuk' i chakaltee' ink'amarik cho Líbano.⁶Eh re' perepik chee' inkib'esaj wii' re' ruuk' i tz'inuj inchalik ar Basán. Re' i b'urb'al naah re' ruuk' i sohchaj inchalik pan tz'a'laj yuuq' reh i Chipre kojooj xoyb'al wach ruuk' ab'aj Marfil.⁷Re' i nimlaj itz'ihy imb'esanik reh re' ruuk' i xoyimaj wach itz'ihy lino inkorjik cho Egipto. Eh re' itz'ihy rehtalil wilik kochinaah re' ruuk' itz'ihy raxmuqik inchalik pan tz'a'laj yuuq' Elisa.⁸Eh re' i winaq kitz'ainik reh i chee' imb'esanik reh i barco Sidón, eh ar Arvad kichalik. Re' taqe i winaq wilik kina'ojb'al aj Tiro kik'amwik b'eeh.⁹Eh re' taqe i nimaq kiwach aj Gebal, re' taqe inkiyeew kik'ux chi kamanik inkitik wach i barco noq i roq'taaj riib'. Re' taqe tokoom tinamit kik'uloq nah palaw chi yak taq panatinamiit.

¹⁰Eh re' naq taqe i aj Persia, aj Lud, aj Fut kikamanik taq chi a soldado reh i q'aq'inik. Eh inkit'uyaa' wach tz'aq i kich'ihch' puneet, i kipulato ch'ihch' ko'lenb'al kiib' ruuk' i re' inkiyeew taq aloq'il.

¹¹Re' taqe i aj Arvad kuch'ihil taqe a soldado wilkeeb' cho chinaah tz'aq, eh chi junsuut inajt kinaah tz'aq ko'lb'al naq taq wiib' wilkeeb' taqe i winaq aj Gamad. Re' i kipulato ch'ihch' ko'lb'al kiib' inkit'uyaa' wataq koraal tz'aq, re' naq i re' inye'wik ruholwochiil taq aatinamiit.

¹²Xti xiik' wo' naq naah b'ehomal taq aatinamiit Tiro. Eh taqe i aj Tarso kik'ulik yakool taq awuuk'. Noq i nayeew taq reje keh aak'aay i hat, plata, q'an ch'ihch', rax ch'ihch' i plomo ch'ihch' inkiyeew taq aweh chi jilow.¹³Eh ink'ulik wo' naq kian kiyak taq awuuk' i aj Grecia, aj Tubal taqe i aj Mesec, eh kulk re' ruuk' q'an ch'ihch' ink'ulik taq kiyeew aweh chi tojb'al riij i moso i nak'ayej taq reje keh.¹⁴Re' taqe i aj Togarma ruuk' kawáyu aj ihqoom inkojarik reh i q'aq'inik ruuk' kawáyu inkitoj taq riij aweh chib'ih jariik i nak'ayej naq taq reje keh.¹⁵Re' taqe i aj Dedán, eh chu'nchel i tinamit wilkeeb' chi chii' i palaw kik'ulik wo' naq yakool taq awuuk'. Eh chib'ih jariik i nayeew taq reje keh re' ruuk' i holohaq b'aaq, re' ruuk' i holohaq chee' Ebano inkik'am taq cha weh chi riij.¹⁶Eh re' taqe i aj Edom kik'ulik yakool taq awuuk' ruum yohb'aal wach i tik i nelik taq panaye'aab'. Eh perla ab'aj, itz'ihy rax muqik, kaq muqik, xela itz'ihy wilik ruch'ikojal wach, holohaq ch'ihch' re' ruuk' inokik chi karena holohaq ab'aj inkik'am taq cha weh chi jilow taqe re'.¹⁷Eh kichalik wo' naq taq yakool awuuk' i aj Judá, je' wo' taqe i aj Israel, eh trigo re' ruuk' i nelik cho pan kiye'aab' Minit, suq laj kaxlanwi'k, riiskaab', aseite, ink'ohnik laj iq'oom inkik'am taq cha weh.¹⁸Eh re' taqe i aj Damasco yohb'aal wach i xa chib'ih jariik ink'ulik kiloq' taq awuuk' re' i nelik taq panatinamiit, re' naq taq i tib'ehoomrik wii', eh vino inchalik Helbón, riij chikop inkik'am taq cha weh chi jilow.¹⁹Re' taqe i aj Dan, i aj Javán, kik'ulik wo' naq yakool taq awuuk' pantaq ninq'iij, kowlaj ch'ihch', ink'ohnik laj riij chee', ink'ohnik laj mirra inkik'am taq cha weh chi jilow chib'ih i nayeew taq reje keh.²⁰Re' taqe i aj Dedán kik'ulik wo' yakool taq awuuk' holohaq itz'ihy reh riij kawáyu inkik'am cho chi jilow i nayeew taq reje keh.²¹Re' taqe i aj Arabia re' taqe i nimaq kajaawriik ar Cedar kik'ulik wo' naq taq yakool awuuk'. Eh tentzun, imas tentzun, imas kaprax inkik'am cho chi jilow i nayeew taq reje keh.²²Re' taqe i yakool wilkeeb' ar Sabán, eh ar Raama kik'ulik wo' naq taq yakool awuuk'. Eh ink'ohnik laj iq'oom holohaq ab'aj, oro inkik'am taq chaaweh chi jilow i nayeew taq reje keh.²³Re' taqe i aj Harán, aj Cane, aj Edén, aj Sabán, aj Asiria, aj Quilmad, kik'ulik wo' naq yakool taq awuuk'.²⁴Re' keh ink'ulik wo' naq taq kik'ayej aweh i holohaq itz'ihy nimaq wach, itz'ihy raxmuqik inka'yik, eh ch'ikooj wach itz'ihy, nimaq itz'ihy k'ih b'uhr wach ink'ayjik, eh itz'ihy jitz'ooj wach, chee chakaltee'.

²⁵Re' taqe i barco kichalik Tarsis kichalik kiooj chuk'amariik chaloq i,
chib'ih ink'ulik taq kik'ayej aweh korehtaal i nujik taq aaye'aab' wilkeeb' chi chii' palaw yohb'aal wach i b'ehomal inkik'am chaloq.²⁶Xa re' la' re' taq i hat aj Tiro naa rusachariik taq awach kuum i aj ixowaal naakichaliik parelb'aal q'iij, je' rukab' noq ink'amarik qohoq i barco paruchamiil i palaw ruum i kowlaj teew.²⁷Eh re' taq ab'ehomal, re' i chib'ih jariik taq inayak, eh re' taqe i kib'esanik reh i barco, re' taqe i kik'amwik rub'eeh, re' taqe i kiq'olinik wach taq aa barco, re' taqe i yakool, re' taqe i awaj q'aq'ineel naa rusachariik kiwach naah palaw.²⁸Noq naakik'erem kichii' taqe i kib'esanik reh i barco naa ruk'uyu'jiik i palaw.²⁹Re' taqe i kib'esanik reh ruuk' i chee', re' taqe i kik'amwik rub'eeh, taqe i kijalwik rub'eeh i barco naakipisk'aniik cho chi chiq yuuq'.³⁰Eh naakik'erem cho kichii' chi oq'ik ruum taq i naa ak'ulum, naakipukem pooq wach kinaah, eh naakitolem kiib' pan chaaj.³¹Ruum i ruti'kiil kik'ux taq chawiij naa kijoyom i rismaal kinaah, eh naa kikojom i kiq'as wach so', xasuq chik naa koq'iim taq chawiij.³²Eh naa kitz'uyem i tz'uuy reh i ruti'kiil k'uxliis je' wili i naa kiq'orom: Xti xsahchik inche wach i kitinamiit i aj Tiro, xanaah re' xti ma' awach ta wo' naq chi je' rukab' i reh, re' i tinamit wilik chi chii' i palaw.³³Noq i nak'am taq reje pan barco aak'aay ma' k'isiin taqe i tinamit i nayeew taqe chi suq ruuk' taq ab'ehomal. Eh ruuk' taqe i re' kib'ehomrik taqe i reey wilkeeb' sut i wach ak'al.³⁴Eh noq naa ruk'amariik qohoq paruchamiil i palaw, chu'nchel taq inayak, eh re' taqe i kib'esanik taq reh aa barco hat taq junojiik qohoq kuuk' paruchamiil i palaw naa rub'anam.³⁵Chu'nchel i tinamit wilkeeb' chi chii' i palaw naa rusahchiik kik'ux ruuk' taq i naa ak'ulum. Eh re' taqe i kireey ma' k'isiin ta naa kiyo'jiik, naakiyojom i kiwach.³⁶Re' taqe i yakool aj pan tokoom tinamit i naa kiyo'jiik noq naakilom taq i naa ak'ulum, eh naa rusahchiik taq awach chi jumpech, inko'q taqe aweh, inki Dios.
Re' i Dios xuq'or chi naa ruchaliik i ti' k'axik chinaah i kireey i aj Tiro.

¹Re' i QaJaaw Dios je' wili i xuq'or weh:²Re' hat rak'uun winaq je' wili i cha q'or reh i kireey i aj Tiro: Re' i QaJaaw Dios je' wili i xuq'or chawiij:
Re' reh q'e' xunimb'isaj riib', noq tzunlik paruye'aab', xukoj riib' chi Dios, xa ruum chi kotimaj riij chi plata i rutinamiit. Xanaah re' xa winaq wo' hoq ma' re' ta Dios, xukapaaj chi je' rukab' i runa'ojb'al i Dios i runa'ojb'al.³¿Mi xiik' naah re' i runa'ojb'al i reh chuwach i Daniel? ¿Mi chu'nchel re' i na'ojb'al reht'al?⁴Ruum chi wilik runa'ojb'al, eh chi q'e' kow i rub'an riib' ma' k'isiin xb'ehomb'rik. Xunujisaj taqe i ru kaxa ruuk' i oro, ruuk' i plata.⁵Eh ruum chi wilik runa'ojb'al chi yak xumol wach i rub'ehomal, eh ruuk' i rub'ehomal ma' k'isiin ta xunimb'isaj riib'.

⁶Je' re' noq re' hin i Dios i nuq'or,
chi ruum chi xukoj riib' chi dios.⁷Re' hin naa nuk'amam taqe chaloq i tokoom tinamit chub'anariik reh. Re' taqe i q'e' kow kiib', eh ruuk' i q'aslaj ch'ihch' naa rub'aan keh atoob' ta naq q'e' holohik, naakiye'em wach ak'al i ruholwochiil.⁸Re' reh naa kikutum paruchamiil i palaw xiik' nah ti'kiil i kimik naa ruk'ulum.⁹¿Mi konaa ruq'orom re' chikiwach taqe i aj ixowaal chi re' reh i Dios? Re' reh ma' re' ta Dios xa winaq wo' hoq ma' nee ta ruko'leej riib' chikiwach i naa rukansaniik reh.¹⁰Re' reey re' re' naa rukanteesjiik kuum i tokoom tinamit, chi xa je' kikanteesjik ma' kinimanik ta weh, tiko'q reh, inki weh i Dios.

¹¹Re' i QaJaaw Dios, je' wili i xuq'or weh:¹²Re' hat rak'uun winaq cha tz'uyej i tz'uuy reh i ruti'kiil k'uxliis reh i kireey i aj Tiro, je' wili i cha q'or reh: Re' i QaJaaw Dios je' wili i xuq'or chawiij:
Re' reh korik naq wach ruk'ux, wilik naq runa'ojb'al, eh q'e' naq holohik.¹³Je' naa chupaam i ye'aab' ru Edén i Dios wilik. Re' reh xixoyej riib' ruuk' taqe ab'aj kirob' rotik, re' ruuk' taqe i crisolito, jade, topacio, kornalina, jaspe, zafiro granate, esmeralda, re' taqe i chib'ih i wilik reh, ka'xikin re' ruuk' i oro, xa re' wo' rukorjiik i rutz'uhk'riik chee reh.¹⁴Re' hin xnukoj chi rilariik i tinamit chi je' jinaj ánjel. Je' naa chinaah i nuSantolaj yuuq' xnuyeew, je' naa xilak ab'aj xan rob'rotik chik xnuyeew chi b'ehik.¹⁵Noq xokik chi taaq'anik xti manlik wo' naq wach i runa'ojb'al xub'an, xa re' la' korehtaal xutoq'aa' rub'aan i yiib' wach na'ojb'al.¹⁶Ruum chi yohb'aal wach i yak i xub'an xutoq'aa' rub'aan i yiib' wach na'ojb'al je' wo' taqe i mahk. Ruum i re' xwesaj wo' chik chinaah i nuSantolaj yuuq' xwesaj chi kixilak i ánjel incha'jinik naq reh, eh xwesaj wo' chi kixilak ab'aj xan rob'rotik chik.¹⁷Ruum i ruholwochiil q'e' xunimb'isaj riib', ruum chiyohb'aalchik wach i rub'an riib' xsahchik paruk'ux i runa'ojb'al. Re' hin naa nuye'em wach ak'al xa se'lb'al chik naa nukanaam wii' chikiwach taqe i reey.¹⁸Re' reh yohb'aal wach i mahk xub'an, i leq' ruuk' i yak xub'an, xich'uwarisa paam i ye'aab' kinlooq'jik wii'. Ruum aj re', re' hin naa nuye'em q'ab' chi naa ruqopiik ruq'aq'al i rutinamiit. Eh chu'nchel naa kilwiik reh chi xchajrik chik ruum i q'aaq'.¹⁹Eh chu'nchel i tinamit ineht'alinik wach naa ruchaliik kiyo'jiik ruum i naa ruk'ulum. Xa ma' xta chik kamaj naa rukahniik naa rusahchiik wach, tiko'q reh, inki i Dios. Re' i ruq'orariik chi xkik'ul i ti' k'axik i aj Sidón

²⁰Re' i QaJaaw Dios, je' wili i xuq'or weh:²¹Re' hat rak'uun winaq ti tz'ehtanoq reje i wilik wii' i tinamit Sidón cha q'or rib'iral reh i naa ruk'ulum, je' wili i cha q'or reh.²²Re' i QaJaaw Dios je' wili xuq'or chawiij:
Re' hin ma' k'isiin i nujosq'iil chikinaah i aj Sidón naa kiin kiloq'em noq naa nuq'atam i q'orik chikinaah, eh naakilom i nuSantohiil. Ruuk' i re' naa kinab'eem chi re' hin i k'achlik Dios.²³Re' hin naa nuye'em i kaq yab'ilaal chikinaah, naa rub'eeh kik' pan kitinamiit. Re' taqe i kamnaq xa aha' naa kikahniik chi tuch'ulkeeb', xa aha' naakikanteesjiik ruuk' q'aslaj ch'ihch'. Ruuk' i re' naa kinab'eem chi re' hin i k'achlik Dios.

²⁴Eh re' taqe i aj Israel keh ma' naa ta chik rub'aan ti' k'axik keh. Re' i je' rutoq' k'iix imb'aan keh kuum i tinamit wilik chi kijunsuut inixowanik kiwach. Ruuk' i re' naakinab'eem chi re' hin i k'achlik Dios, inki weh i Dios.

²⁵Re' hin i Dios i nuq'or chi naa wo' chik numolom kiwach i aj Israel pan kitinamiit naa wesam taqe chaloq chupaam i tinamit nutukem reje wii' kiwach. Naa nuk'uhtaam i nuSantohiil chikiwach i nimaq tinamit. Re' taqe i aj Israel naa wo' chik nuye'em taqe pan kitinamiit, re' wo' i tinamit nuye'em cho reh i Jacob re' waj kamanoom.²⁶Ar naa kik'achariik chi ma' xta chik ti' naa rub'aan keh. Eh ar naa kiyejaam kipaat, naa kitikim i ki uuva. Eh re' hin naa nuye'em taqe chutojariik i kimahk i tinamit chi kijunsuut, re' taqe i ixowinik i kiwach i aj Israel. Ruuk' i re' naa kinab'eem chi re' hin i k'achlik Dios inkinimaj i aj Israel, inki. Re' ruq'orariik i ti' k'axik xchalik chikinaah i aj Egipto

¹Eh chupaam kab'laj rub'eeh i ru lajeeb' poh reh i ru lajeeb' haab' qak'amariik reje Babilonia je' wili i xuq'or weh i QaJaaw Dios:²Re' hat rak'uun winaq chatz'ehtaaj reje i kireey i aj Egipto cha q'or reje ree reh, eh keh chu'nchel i tinamit Egipto, i ti' k'axik naakik'ulum, je' wili i cha q'or keh:³Re' i QaJaaw Dios je' wili i ruq'or chawiij:
Re' hin q'e' inwixow wach i kireey i aj Egipto. Re' reh je' rukab' i qamaan k'ap wilik pan nim ha' je' wili i ruq'or: Re' nim ha' Nilo weh hin, re' hin xinyej-anik reh, inki.⁴Re' hin naa wesam chi reyil ruch'ihil taqe i raj kamanoom. Naa nub'anam reh je' rukab' imb'aan reh i josq'laj chikop pan nim ha' inkojarik chee loklok laj ch'ihch' panchii' inqerjik chaloq inlechlojik taqe chaloq i kar chi riij.⁵Re' hin naa nuk'amam reje i panchiq yuuq' i reh, eh chu'nchel i rutinamiit naa kikahniik tuuch' chinaah i wach ak'al ma' naa ta rumolariik ni xata naa rumuhqiik, re' la' taqe i josq'laj chikop, re' taqe i k'uch naa ruk'uxwiik reh i ruti'jolal.

⁶Ruuk' i re' chu'nchel i tinamit Egipto naa kinab'eem chi re' hin i k'achlik Dios. Eh noq xkisik' kitoob'jiik i aj Israel ruuk' i kireey i aj Egipto re' reh xkahnik chi xa je' rukab' i ma' kow ta laj kaxlan aaj.⁷Noq xkisik' naq toob'al kiib' ruuk' ma' kow ta k'isinoq xuyok' taqe, je' rukab' i kaxlan aaj xa re' yu' intoq. Eh noq xkaaj naq kichopom kiib' ruuk' ma' kow ta k'isinoq, je' rukab' i kaxlan aaj xa re' yu' impaxik.

⁸Ruum aj re', re' hin i Dios i nuq'or chi naa nuk'amam taqe chaloq i aj ixowaal, ruuk' q'aslaj ch'ihch' naa taq kaat kikansam i hat, je' wo' taqe i aachikoop.⁹Re' i tinamit Egipto naa rukahniik chi xan tz'irik chik paam. Ruuk' i re' naa kinab'eem i chi re' hin i k'achlik Dios. Ruum re' i kireey i xuq'or chi je' wili: Re' nim ha' Nilo weh hin, re' hin xinyej-anik reh, inki.¹⁰Re' hin yohb'aal wach i nujosq'iil chikinaah, je' wo' chinaah i kinim haa'. Re' hin naa nukanaam i Egipto chi xan tz'irik chik paam, xa je' chik rukab' i ye'aab' chiq yuuq'. Ar naa rutohq'iik reje Migdo naa ruponiik Sevene, eh naa ruponiik Etiopía.¹¹Eh ma' jino'q chik i tinamit, ma' jino'q chik i chikop naa rik'iik chupaam i ye'aab' re' re' chuwach i ka'winaq haab'.¹²Re' hin naa nukanaam i Egipto chi xan tz'irik chik paam chuwach i ka'winaq haab'. Re' taqe i tinamit ruchopom naah naa nusacham kiwach ma' xata je' rukab' i naakik'ulum i tokoom tinamit. Eh naa wesam taqe reje pan tinamit, naa nutukem reje kiwach chupaam taqe i nimaq tinamit.

¹³Re' hin i Dios je' wili i nuq'or: Noq ik'inaq chik i ka'winaq haab' naa wo' chik wesam taqe chaloq i aj Egipto, chupaam i nimaq tinamit nutukem reje wii' kiwach.¹⁴Eh naa wo' chik wesam taqe chaloq ar naa wo' chik nuk'amam taqe reje chupaam i ye'aab' Patros re' i aasjinaq taqe wii'. Ar naa kiyejaam kitinamiit, xa re' la' naa rukahniik chi xama' xta kajaawriik.¹⁵Re' i kitinamiit xa k'isiin chik i rajaawriik naa ruwihiik chuwach i kajaawriik i tokoom tinamit, naa wesam i rajaawriik ma' awach ta chik i tinamit naa ruq'atam wach.¹⁶Re' taqe i aj Israel ma' naa ta chik kich'ikaam kik'ux kuuk' i aj Egipto. Ar naa kinab'eem i aj Israel chi sahcheel taqe noq xponik kipahqaaj chi toob'jiik ar. Ruuk' i re' naa kinab'eem chi re' hin i k'achalkiin, tiko'q inki i Dios.

¹⁷Eh pan k'amb'al rub'eeh i peet poh reh i wuquub' ru ka'winaq haab' qak'amariik reje Babilonia je' wili i xuq'or weh i Dios:¹⁸Re' hat rak'uun winaq i nuq'or aweh chi re' i Nabucodonosor kireey i aj Babilonia re' taqe i ru soldado xkian i kowlaj q'aq'inik chinaah i tinamit Tiro. Re' taqe i ru soldado xelik i rismaal kinaah xch'ol i kiij ruum i ihq, xa re' la' xama' xta wo' hoq i xkik'ax ruuk' i q'aq'inik xkian kuuk' i aj Tiro.¹⁹Ruum aj re', re' hin i Dios je' wili i nuq'or: Naa nuye'em q'ab' chi re' chik i Nabucodonosor naa ruchopwiik naah i tinamit Egipto. Eh naa ruq'uchum chu'nchel i kib'ehomal, je' wo' chu'nchel i chib'ih keh, ruuk' taqe i re' naa rutojom taqe i ru soldado.²⁰Naa nuye'em q'ab' chi re' i Nabucodonosor naa ruchopwiik naah i tinamit Egipto re' re' i rutojb'aal chi riij i q'aq'inik xub'an kuuk' i aj Tiro. Ruum re' wo' hin xinkojwik reh chi numoso noq xub'an i re', inki QaJaaw Dios.

²¹Eh chupaam ponoq i q'iij re' re' naa wo' chik nuye'em kajaawriik i aj Israel. Eh re' hat Ezequiel naa aq'orom wib'iral keh. Ruuk' i re' naa kinab'eem chi re' hin i k'achlik Dios, inki weh. Re' i ruq'orariik rib'iral i ti' k'axik xchalik chikinaah i aj Egipto

¹Re' i QaJaaw Dios je' wili i xuq'or weh:²Hat rak'uun winaq cha q'or rib'iral keh i aj Egipto i naakik'ulum je' wili i cha q'or keh:
Re' i QaJaaw Dios je' wili i ruq'or taq chawiij:³Kik'er kichii' ruum ruti'kiil kik'ux chi riij i q'iij k'ulik iloq reh noq naa nuye'em i runimaal ti' k'axik chikinaah i tinamit.⁴Naa ruchaliik i q'aq'inik chikinaah i aj Egipto, naa rusachariik kiwach chi jumpech, eh naa relq'jiik kib'ehomal, Eh re' taqe i aj Etiopía ma' k'isiin ta naa kiyo'jiik.⁵Eh chu'nchel i tinamit naa ruko'liniik keh i aj Egipto, naa wo' kikanteesjiik panq'aq'inik. Naa wo' rub'aan keh i aj Etiopía i aj Fut, i aj Lud, taqe i aj Arabia, i aj Lidia.⁶Je' wili i xuq'or i QaJaaw: chu'nchel i tinamit naakitowiik keh i aj Egipto naa kikanteesjiik panq'aq'inik. Re' i runimaal wach tinamit Egipto naakiye'em panak'al, ar naa rutohq'iik cho Migdol, eh naa ruponiik ko ar Sevene, inki.

⁷Eh re' i Egipto xa re' wo' reh naa rukahniik chi xan tz'irik chik paam. Re' taqe i tinamit ruchopom naah naa wo' rukahniik chi xan tz'irik chik kipaam.⁸Re' hin naa nukojom ruq'aq'a i tinamit Egipto, eh naa wo' nusacham kiwach chu'nchel i naa ruko'liniik reh. Ruuk' i re' naa kinab'eem chi re' hin i k'achlik Dios.

⁹Noq naa ruk'ulariik taqe re' naa nutaq'aam reje i taqareel pan barco, chi ruyohb'eesjiik i tinamit Etiopía, re' i ma' rukapaaj taj chi naa ruk'ulariik taqe re'. Noq naa rib'iram rib'iral ma' k'isiin ta naa ruyo'jiik. Re' taqe re' xailook' chik ink'ularik.

¹⁰Re' hin i Dios i nuq'or chi re' i Nabucodonosor i kireey i aj Babilonia naa nukojom chi rusachariik wach i rub'ehomal i tinamit Egipto.¹¹Re' i reey re' re' naa ruk'amam taqe reje chi riij i ru soldado xiik' nah kijosq'iil noq naa rojiik kisacham wach i tinamit Egipto. Eh naa kia'nam reh i tinamit re' re' naakinujisam paam chi kamnaq.¹²Eh re' hin naa nuchiqsam taqe i nim ha' ar Egipto. Eh naa nuq'asam i pan kiq'ab' i yiib' wach kina'ojb'al. Pan kiq'ab' i tokoom tinamit chi rusachariik kiwach i keh je' wo' i kiye'aab'. Re' wili re' hin i Dios kinq'orik reh.

¹³Re' hin naa nusacham wach i kitiyoox i aj Egipto,
je' wo' i kitiyoox i aj Menfis. Eh re' i tinamit Egipto ma' naa ta chik ruwihiik jino'q i aj taaq'oom chinaah, ma' k'isiin ta naa kiyo'jiik ruum i naa ruk'ulariik.¹⁴Eh naa nusacham kiwach i aj pansak'aaj reh i rookb'aal q'iij reh Egipto. Eh naa nuk'atam i tinamit Zoán, naa nuye'em taqe chutojariik i kimahk i aj Tebas.

¹⁵Re' hin naa wik'sam i nujosq'iil chikinaah i aj Sin, re' inye'wik rukowiil kik'ux i aj Egipto. Naa wo' rusacham wach i kib'ehomal i aj Tebas.¹⁶Naa nukojom ruq'aq'al i tinamit Egipto, eh ma' k'isiin i ti' naakik'ulum i aj Sin. Eh naa rusachariik kiwach aj Tebas, eh re' taqe i aj Menfis juneliik naa kiwihiik panti' k'axik.¹⁷Re' taqe i k'ijolaq aj Avén, taqe i aj Pibeset ar naa kikanteesjiik ruuk' q'aslaj ch'ihch'. Eh re' taqe i ixoq naa kik'amariik reje pan tokoom tinamit.¹⁸Eh noq naa wesam i kajaawriik i aj Egipto naa ruqequmriik wach i q'iij chi keh i aj Tefnes. Re' i tinamit Egipto ma' naa ta chik rub'anam i taaq'anik je' na naa rutz'apam naah chi suutz'. Re' taqe i tinamit kichopom naah naa kik'amariik reje pan tokoom tinamit.¹⁹Re' hin naa nuq'atam i q'orik chikinaah i aj Egipto reh i kiye'ariik panti' k'axik. Ruuk' i re' naa kinab'eem chi re' hin i k'achlik Dios.

²⁰Eh noq wuquub' q'iij chik ruk'amam rub'eeh i peet poh reh i ru lajeeb' haab' qak'amariik reje Babilonia, re' i QaJaaw Dio, je' wili i xuq'or weh:²¹Hat rak'uun winaq, re' hin xwesaj chik i rajaawriik kireey i aj Egipto je' naa xtoq i q'ab' ma' awach ta naa ruq'omaniik reh, ma' awach ta wo' chik imb'ak'wik wach reh, reh chi nee wo' chik inchol ruchopariik i ruq'aslaj ch'ihch' reh i q'aq'inik.²²Re' hin i Dios i nuq'or chi yohb'aal wach i nujosq'iil chinaah i kireey i aj Egipto. Naa wesam i rajaawriik chi jumpech je' naa nutoqom kab'chel i q'ab' reh chi ma' nee ta chik i rub'an ruchopariik i ruq'aslaj ch'ihch'.²³Re' hin xa aha' naa nutukem kiwach i aj Egipto chupaam taqe i tinamit wilkeeb' sut i wach ak'al.²⁴Re' chik i kireey i aj Babilonia naa nuye'em rajaawriik. Je' naa nuye'em q'aslaj ch'ihch' pan q'ab', reh chi naa rukansam i kireey i aj Egipto. Korehtaal i ruk'er chii' chikiwach i nixowanik wach.²⁵Re' hin korik i nuq'or chi re' chik i kireey i aj Babilonia naa nuye'em rajaawriik naa wesam i rajaawriik i kireey i aj Egipto. Eh noq naa nuye'em pan q'ab' i q'aslaj ch'ihch' ruuk' i re' naa rub'anam keh i aj Egipto. Ruuk' i re' naa kinab'eem chi re' hin i k'achlik Dios.²⁶Eh naa nutukem reje kiwach i aj Egipto, chi je' pankok' tinamit, chi je' pan nimaq tinamit. Ruuk' i re' naa kinab'eem chi re' hin i k'achlik Dios, inki.
Re' i kireey i aj Egipto xpajarik ruuk' i chee' chakaltee'.

¹Eh chupaam i peet q'iij reh i roox poh reh i rujunlaaj haab' qak'amariik reje Babilonia, je' wili i xuq'or weh i QaJaaw Dios:²Re' hat rak'uun winaq cha q'or reh i kireey i aj Egipto, je' wo' keh i rutinamiit chi je' wili: Re' i Dios je' wili i xuq'or:
¿Chib'ih aj uuk' naa nupajam i runimaal wach?³Re' i runimaal wach i kireey i aj Egipto je' rukab' i chakaltee' wilik Líbano xa holohik chik taqe i q'ab' i rumujej taqe cho naah i ch'ahn imponik kopan taxaaj i ju'.⁴Re' jab' inqajik chaloq xtowik reh chi xk'ihik, eh wilik taqe i rooq i ha' chi junsuut. Re' ha' re' re' int'aqsanik reh chu'nchel i chee' wilkeeb' chupaam i ye'aab' re' re'.⁵Ruum chi ma' k'isiin i ruha'iil wilik q'e' xk'ihik chikiwach i chee' wilkeeb' panch'ahn. Eh ma' k'isiin i q'ab' xwihik nimaq xi ponik.⁶Eh k'ih b'uhr wach i chikop inkiyejaa' i kisuuq' nah taq q'ab'. Eh k'ih b'uhr kiwach i josq'laj chikop inasjik i kak'uun chi ri'sil. Re' taqe i nimaq tinamit kihi'lik chi ri'sil i rumuuj.⁷Re' chee' re' re' rujalwaach i kireey i aj Egipto, xanajt chik naah, xa nimaq chik rooq taqe i q'ab', eh ha' taqe paam ak'al wilik wii' i raa'.⁸Eh re' i chakaltee' wilik chupaam i ye'aab' xuyeew wii' i peet winaq i Dios ma' xureq ta chi je' rukab' i chee' re' re'. Ma' jino'q i chee' xureq chi je' k'ihaal i q'ab', chi je' re' i xaq, wilik chupaam, i ye'aab' Edén xureq chi je' holwochiil i chee' re' re'.⁹Re' hin q'e' holohik xnukanaa', ma' k'isiin i q'ab', ruum chi q'e' naq holohik, re' taqe i chee' wilkeeb' panye'aab' Edén xtohq'ik kikaqwachem.

¹⁰Eh je' wo' chik wili i xuq'or i Dios re' chee' re' re' xiik' naah najtiil naah, xponik ko taxaaj i ju' ma' k'isiin ta xk'ihik ruum i re' q'e' xunimb'isaj riib'.¹¹Re' chee' re' re' rujalwaach i kireey i aj Egipto, ruum aj re' naa nukanaam pan q'ab' i k'amal b'eeh inchalik pan tokoom tinamit. Eh naa nuye'em panti' k'axik je' rukab' i ruk'ul chi reh.¹²Re' taqe i tokoom tinamit xiik' naah kijosq'iil naa kiyok'wiik reh, i naakiq'eb'em chi rutkeel. Noq naa ruq'ehb'iik naa rutoqib'iik chinaah taqe i rax chee', chinaah taqe i yuuq' pan rooq yuuq' wilkeeb' panruyuq'ul i tinamit. Eh chu'nchel i tinamit wilkeeb' chi ri'sil i rumuuj naakimolom chi elik, naa kikanaam chi rutkeel.¹³Noq q'eb'lik chik wach ak'al naa kichaliik wih-oq chinaah taqe i chikop kirupinik pan taxaaj, je' wo' chu'nchel i chikop wilkeeb' pantaq ch'ahn.¹⁴Eh yu'naak reje chi qawach ma' jino'q chik i chee' naa ruk'ihiik chi je' rukab' noq xk'ihik i chee' re' re' atoob' ta wilik ruha'il, atoob' ta kojooj ruha'iil chi korik, ma' jaruuj chik naa ruponiik ko taxaaj i ju'. Naa la' rusachariik kiwach naakik'ulum keh je' rukab' inkik'ul i winaq noq kikimik kimuhqik panjul, inooj kireq taqe i kamnaq.

¹⁵Re' hin i Dios i nuq'or noq re' chee' re' re' naa nutaq'aam reje pan kiye'aab' i kamnaq. Eh naa nuchiqsam i palaw, ruum ruti'kiil k'uxliis, eh naa wo' nupab'aam i nim ha', ma' naa ta chik rub'eeh rooq. Ruuk' taqe wili naa nuye'em ruti'kiil kik'ux i aj Líbano, eh chu'nchel i chee' naa rukuxiik kichiqiik.¹⁶Eh noq naa ruqehb'iik i nimlaj chee' wili naa kiyo'jiik i nimaq tinamit. Chu'nchel i chee' sik'ooj wach wilkeeb' chupaam i ye'aab' Edén naa rusuuqb'iik kik'ux noq naa rojiik pan kiye'aab' kamnaq. Eh naa wo' rusuuqb'iik kik'ux i chee' wilkeeb' Líbano re' taqe i kojooj kiha'iil chi korik.¹⁷Je' wo' taqe i keh naa wo' kimuhqik naa rojiik kireqem taqe i kamnaq panq'aq'inik. Re' taqe i tinamit wilkeeb' chi ri'sil i rajaawriik naa kitukem kiib' chupaam i ju'jun chi tinamit.

¹⁸Ma' jino'q i chee' xwihik panye'aab' Edén xureq i ruholwochiil, i rajaawriik i chee' re' re'. Xa re' la' naa wo' ruq'ehb'iik wach ak'al je' rukab' noq xq'ehb'ik wach ak'al i chee' xwihik panye'aab' Edén. Eh naa ruwihiik chi kixilak i ma' kinimanik ta ree Dios, chi kixilak i xikimik panq'aq'inik. Re' i chee' re' re' rujalwaach i kireey i aj Egipto, ruch'ihil i rutinamiit, inki i QaJaaw Dios. Re' i kireey i aj Egipto xpajarik ruuk' i josq'laj chikop

¹Eh pampeet q'iij reh i rukab'laaj poh reh i rukab'laaj haab' qak'amariik reje Babilonia je' wili i xuq'or weh i QaJaaw Dios:²Hat rak'uun winaq cha tz'uyej reh i kireey i aj Egipto i tz'uuy reh i ruti'kiil k'uxliis, je' wili i neenaq'or reh:
Re' hat je' akab' i kaq b'ahlam chi kixilak i nimaq tinamit, je' wo' akab' i josq'laj chikop wilik panim ha' i rut'axlom paam i ha' ruuk' i rooq, eh i ruch'uwa'risaj wach.

³Re' i QaJaaw Dios je' wili i xuq'or: Re' hin naa nutaq'aam reje i ma' k'isa tinamit naa ruchopariik kuum je' naa ruxirob' i naa kikojom.

⁴Re' hin naa nuye'em q'ab' chi naa kiqerem wach ak'al, naa rukahniik chi kutlik i ruti'jolal. Eh re' taqe i k'uch naa ruk'uxwiik i reh, korehtaal naakinujiik i josq'laj chikop noq naa kik'uxum keh.⁵Re' hin naa nuye'em q'ab' chi xa aha' naa rukahniik chi tuch'lik i ruti'jolal wataq yuuq' k'ixkaab'.⁶Re' i rukik'eel naa rut'aqsam wach aak'al, naa runujiik wataq yuuq', wataq k'ixkaab', pantaq rooq ha'.⁷Eh noq naa nusacham wach naa ruq'equumriik paam i taxaaj, ma' naa ta chik kisihq'iniik i ch'umiil, i q'iij, ruum i suutz'. Eh re' poh ma' naa ta chik rusihq'iniik.⁸Eh ruum i ru mahk i reh ma' naa ta chik kisihq'iniik i saqum wilkeeb' cho pan taxaaj, naa nuq'equm b'risam paam i taxaaj, inki i QaJaaw Dios.

⁹Eh ma' k'isiin i tinamit naa ruchaliik kiyo'jiik noq naa kib'iram chi naa ruk'amariik reje i reh, je' wo' taqe i rutinamiit pan tokoom tinamit, re' i ma' keht'al ta naq.¹⁰Ma' k'isiin i tinamit naa rusahchiik kik'ux noq naa kib'iram i naa ruk'ulum noq naa rukimiik, naa ruchaliik kiyo'jiik taqe i kireey. Eh noq naa nuye'em q'ab' chi naakesam chaloq i kiq'aslaj ch'ihch' taqe i aj ixowaal chikiwach naakib'arb'otiik ruum kiyo'jiik.¹¹Re' Dios je' wili i xuq'or:
Ruuk' i ruq'aslaj ch'ihch' i Nabucodonosor naa rukanteesjiik.¹²Re' taqe i ru soldado xiik' naakijosq'iil ruuk' i q'aslaj ch'ihch' naa kikansam i rutinamiit i kireey i aj Egipto atoob' ta xiik' wo' naq naah kik'ihaal.¹³Re' hin naa nukansam taqe i ruwaakaax i nuk'inik reh i ruhaa', eh ma' naa ta chik kiyeq'em chii' i ha', ni xata re' taqe i tinamit naakiyeq' wiik chii'.¹⁴Chi je' re' naa nusaaqb'isam wach i ha', xa je' chik saqiil wach aseite naa rukaniik, eh naa rub'eeh rooq i ha' chi korik.¹⁵Eh noq naa nusacham wach i tinamit Egipto, naa nukanaam chi xan tz'irik chik paam. Ruuk' i re' naa runab'eem chi re' hin i k'achlik Dios, tiko'q reh panatz'uuy, inki weh i Dios.

¹⁶Re' i tz'uuy wili reh i ruti'kiil k'uxliis, inaakitz'uyem chu'nchel ixoq wilkeeb' chupaam taqe i tinamit ruum i ruti'kiil kik'ux chi riij i tinamit Egipto, chikiij taqe i wilkeeb' ar, inki i QaJaaw Dios.

¹⁷Eh chupaam i ho'lajuuj rub'eeh i poh reh irukab'laaj haab' qak'amariik reje Babilonia, je' wili i xuq'or weh i QaJaaw Dios:¹⁸Hat rak'uun winaq cha tz'uyej i tz'uuy reh i ruti'kiil k'uxliis chikiij i rutinamiit i Egipto, je' wo' chikiij taqe ixoq wilkeeb' ar, chikiij taqe i k'amal kib'eeh, je' wili i cha q'or keh: Re' taqe i wilik kajaawriik xkuxik kikimiik xkik'ul keh je' rukab' i xkik'ul i kansamaj taqe chaloq.

¹⁹¿Mi xiik' taq naah aholwochiil re' chi ma' naa ta taq akanteesjiik? Xti korik la' chi naa taq akanteesjiik chi je' rukab' i ma' kinimanik ta reh i Dios, tiko'q keh.

²⁰Re' taqe i aj Egipto junkimiik taqe kuuk' naa kikanteesjiik panq'aq'inik ruuk' i q'aslaj ch'ihch', eh je' wo' taqe i ruk'ihaal tinamit.²¹Eh re' taqe i k'amal b'eeh q'e' kow kiib' wilkeeb' pan kiye'aab' i kamnaq, naa kik'ulwiik keh i aj Egipto, je' wo' intowik naq keh, je' wili i naa kiq'orom: Re' taqe i re' xi chalik kahnoq ayu' kuch'ihil taqe i xi kanteesjik panq'aq'inik re' i ma' kinimanik ta reh i Dios, inko'q taqe.

²²Re' kireey i aj Asiria ar wilkeeb' kuch'ihil taqe chu'nchel i ki soldado wilkeeb' pan kijuul chu'nchel i re' panq'aq'inik xikimik.²³Eh xiik' naah chamiil muqulkeeb' ruum i ki soldado, eh xkiyohb'isaj taqe i tinamit kok'achalkeeb' wo' naq, xa re' la' xa xkuxik wo' kikimiik panq'aq'inik. Eh yu'naak panyejaal i muqulkeeb' wii' i aj Asiria muqulkeeb'.

²⁴Re' kireey i aj Elam kuch'ihil taqe i ki soldado muqulkeeb' pan kijul. Eh chu'nchel i re' panq'aq'inik xikimik, re' taqe re' xkiyohb'isaj taqe i tinamit noq kok'achalkeeb', eh yu'naak ti' xkik'ul, ruum xi muhqik chik chupaam i ye'aab'.²⁵Eh yu'naak kamnaq chik i kireey i aj Elam muqlik chik chi kixilak taqe i ru soldado. Chu'nchel taqe i re' ma' nkinimaj taj i Dios, xkuxik kikimiik panq'aq'inik. Eh xkiyohb'isaj chee tinamit noq kok'achalkeeb'. Xa re' la' yu'naak q'e' ti' xkik'ul ruum xi muhqik chik, jinaj xi kahnik wii' chi kixilak taqe i kamnaq.

²⁶Re' taqe i kireey i aj Mesec, je' wo' hoq i kireey i aj Tubal, kuch'ihil taqe i ki soldado. Eh chu'nchel taqe i re' ma' xkinimaj taj i Dios. Eh panq'aq'inik xi kanteesjik ruum xkiyohb'isaj i tinamit noq kok'achalkeeb'.²⁷Eh re' keh ma' xi muhqik taj chi je' rukab' noq kimuhqik i aj q'aq'ineel najtir. Re' keh junqajiik taqe panjul ruuk' i kitz'a'amb'aal reh i q'aq'inik, inye'arik chikinaah i kiq'aslaj ch'ihch'. Je' re' noq xi muhqik atoob' ta ma' k'isiin wo' naq xkiyohb'isaj i tinamit noq kok'achalkeeb'.²⁸Re' taqe i aj Egipto je' re' i naakik'ulum naa rusahchiik kiwach chi kixilak i ma' kinimanik ta reh i Dios, jinaj naakimuhqiik wii' kuuk' i kamnaq taqe chaloq panq'aq'inik.

²⁹Re' taqe i kireey i aj Edom ruch'ihil taqe i k'amal kib'eeh, atoob' ta xwihik wo' cho kajaawriik xa xiooj wo' wih-oq chi kixilak i kansamaj taqe chaloq panq'aq'inik ar wilkeeb' wii' i kamnaq ma' xinimanik ta reh i Dios.

³⁰Ar wilkeeb' i ajaab'ees xi wihik cho pantz'eet reh i rookb'aal q'iij, je' wo' taqe i aj Sidón. Re' keh xti wilik wo' naq kajaawriik, xkiyohb'isaj wo' chaloq taqe i tinamit. Eh yu'naak jinaj chik wilkeeb' wii' kuuk' i kansamaj taqe chaloq panq'aq'inik. Q'e' ti' xkik'ul ruum jinaj xi muhqik wii' kuuk' i ma' xinimanik ta reh i Dios.

³¹Eh noq naa rilom i kireey i aj Egipto wilkeeb' pan kiye'aab' i kamnaq taqe i rutinamiit taqe i ru soldado xikimik panq'aq'inik naa ruch'iklojiik ruk'ux.³²Re' i kireey i aj Egipto i ruyohb'isaj taqe i tinamit. Xa re' la' re' hin naa nuye'em q'ab' chi naa rojiik muhqoq chi kixilak taqe i kamnaq ma' kinimanik ta reh i Dios, re' taqe i xi kanteesjik panq'aq'inik, inki i QaJaaw Dios. Re' i rukamaj naa rub'anam i aj cha'joom (Ez 3.16-21)

¹Re' i QaJaaw Dios je' wili i xuq'or weh:²Re' hat rak'uun winaq je' wili i cha q'or keh aatinamiit: Re' i QaJaaw Dios je' wili i ruq'or: Noq naa nuye'em i q'aq'inik chinaah jino'q i tinamit, re' keh naa k'isik'im wach jino'q i winaq chi kixilak, eh naa kikojom chi kaj cha'joom.³Eh re' reh noq nee rilow chi xiooj chik k'oloq aj q'aq'ineel ma' najt ta ruuk' i tinamit jumehq'iil neeruxulej i tuun, reh chi neenkinab'eej i tinamit.⁴Eh awach i xrib'iraj chi xuuljik i tuun, eh ma' xta raaj reh, eh wila' xiooj k'oloq i aj ixowaal, eh xkanteesjik xa re' reh naa ruye'em riib' chi kimik.⁵Ruum xrib'iraj wo' naq noq xuuljik i tuun, eh ma' xta xraaj reh. Eh awach i xrib'iraj noq neenxuuljik i tuun, neerusik' ko'lemb'al riib' neeruko'leej riij i ruk'achariik.⁶Eh wila' re' i aj cha'joom xrilow wo' naq chi xiooj k'oloq i aj q'aq'ineel chinaah i tinamit, eh ma' xuxulej taj i rutuun reh chi neenkeht'aliij, eh wila' wilik jino'q i xkimik ru mahk i reh. Eh re' hin wach naah i aj cha'joom re' re' naa nuye'em i rukimiik, re' reh naa rutojwiik riij.

⁷Re' hat rak'uun winaq hat wo' nukojom chi cha'jen keh i tinamit Israel, je' wo' re' noq naa animam taqe i nuk'uhb'aal naa nuq'orom aweh, ruuk' i re' naa akojom kina'ojb'al.⁸Eh noq neenuq'or i hin chi naa rukimiik i yiib' wach runa'ojb'al, wila' re' hat ma' xaq'or reh chi naa rukanaam i ruyiib' wach na'ojb'al re' reh ruum i ru mahk naa rukimiik. Xa re' la' re' hin wach anaah i hat naa nuye'em i rukimiik, eh re' hat naa atojwiik riij.⁹Eh raaj wila' re' hat xaq'or reh i yiib' wach runa'ojb'al chi chukanaa' rub'aan i ma' holohik taj. Eh wila' re' reh ma' xraaj taj re' reh ruum i ru mahk naa rukimiik, eh re' hat naa ako'leem riij ak'achariik, inki. Re' i rub'eeh i Dios korik (Ez 18.21-32)

¹⁰Eh re' hat rak'uun winaq je' wili i cha q'or keh i aj Israel: Re' taq i hat je' wili taq inaq'or: Re' hoj xiik' naah i qamahk yohb'aal wach i ma' holohik taj inqa a'n ruum i re' naa rusachariik qawach, ¿nik' chik wach noq neeqohk'achariik? tiki taq.¹¹Re' hin i k'achlik Dios ma' nwaaj ta chi neenkimik parumahk i yiib' wach runa'ojb'al, inwaaj la' chi nee rukanaa' reh chi neen wihik ruk'achariik. Re' taqe i aj Israel inchol kianaam i yiib' wach na'ojb'al. ¿Chib'ih reet noq naa kikimiik pankimahk?¹²Hat rak'uun winaq cha q'or keh i aatinamiit: Re' i korik wach ruk'ux wila' xmahkunik wo' chik ma' naa ta ruko'leem riij i ruk'achariik, eh wila' re' i yiib' wach na'ojb'al xukanaa' i mahk naa ruko'ljiik. Eh raaj wila' re' korik wach ruk'ux i xmahkunik wo' chik ma' nee ta ruko'leej riij i ruk'achariik, ni xata ruum i holohik rub'anam chaloq.¹³Eh noq neenuq'or i hin chi naa ruwihiik ruk'achariik i korik wach ruk'ux, eh xuch'ikaa'-oq ruk'ux ruuk' i rukorkiil wach ruk'ux xooj-oq wo' chik chub'anariik i mahk, re' hin ma' naa ta nukojom paruman i holohik xub'an. Naa la' rukanteesjiik ruum taqe i ru mahk xub'an wo' chik ruka'peech.¹⁴Eh wila' xnuq'or reh i yiib' wach runa'ojb'al chi naa rukimiik nee wo' inkimik. Eh wila' xukanaa' i mahk, re' chik taqe i holohik xub'an xti korik chi ma' naa ta rukanteesjiik.¹⁵Eh nee wo' chik i rusutej i kanamaj ruuk' chi riij i kemeel tumiin, oon taqe i relq'aam. Eh wila' xub'an i ruq'or i k'uhb'aal inye'wik k'acharik, eh wila' xukanaa' rub'aan chu'nchel i yiib' wach, xti korik i chi ma' naa ta rukanteesjiik, naa la' ruwihiik ruk'achariik.¹⁶Eh ruum chi holohik chik imb'anik, re' chik taqe i rub'ehel i rub'aan naa ruwihiik ruk'achariik. Ma' jino'q chik i ru mahk rub'anam naa ruk'uliik panuk'ux.

¹⁷Re' taqe i aatinamiit naa kiq'orom chi ma' re' ta rub'ehel i k'ahchi' kiin. Xanaah re', re' keh ma' re' ta rub'ehel i k'ahchi' keeb'.¹⁸Eh wila' re' korik wach ruk'ux xukanaa' wo' chik rub'aan i korik, xutoq'aa' wo' chik rub'aan i ma' i holohik taj, ruum i re' naa rukanteesjiik.¹⁹Eh wila' re' i yiib' wach runa'ojb'al re' chik i korik, re' chik i rub'ehel i rub'an naa wo' ruwihiik ruk'achariik ruum i re'.²⁰Re' taqe i aj Israel naa kiq'orom chi ma' re' ta rub'ehel i k'achi' kiin. Xa re' la' re' hin naa nuq'atam i q'orik chikinaah, re' q'oreel chib'ih i xkian, chib'ih i xkiq'or, inki i Dios. Re' noq xchoparik naah ruka'peech i tinamit Jerusaleem

²¹Eh pan ho'oob' rub'eeh i ru lajeeb' poh reh irukab'laaj haab' qak'amariik reje Babilonia, Jinaj i winaq xub'an reje elik Jerusaleem xooj k'oloq wuuk' ar xuq'or weh chi re' i tinamit Jerusaleem xkichop wo' chik naah i aj ixowaal.²²Re' i QaJaaw Dios xuyeew chee q'ab' chi nunaah paruxq'eqiil noq komajaa' inooj k'oloq i winaq xub'an chee elik Jerusaleem, xuteh i nuchii'. Eh noq xponik i winaq re' re' wahq'eq ma' xin kahnik ta chik meem xnub'an chik ruq'orob'jiik.

²³Eh je' wili i xuq'or weh QaJaaw Dios:²⁴Hat rak'uun winaq, re' taqe i aj Israel wilkeeb' chupaam i ye'aab' k'ahchi' wii' ti' k'axik, je' wili inkiq'or: Re' i Abraham xa jinaj wo' chi riib' noq wihik chaloq rehchaaj i ye'aab' wili. Re' aj naa chik re' hoj ma' neenqehchaaj ruum xiik' naah qak'ihaal, inki taqe.²⁵Eh re' i hat je' wili i cha q'or keh: Re' i QaJaaw Dios je' wili i ruq'or taq chawiij: Re' keh inkik'ux i tiwik chi kik' paam, inkiloq'ej i tiyoox, eh inkikansaj kas kichaaq', ruum taqe re' ma' ruk'ul taj neenkehchaaj i ye'aab' re' re'.²⁶Re' keh inki a'n ikaansanik ruuk' i q'aslaj ch'ihch' inki a'n i yiib' wach na'ojb'al inkich'uwarisaj wach i kikaxaro, ruum taqe i re' ma' ruk'ul ta chi neenkehchaaj ye'aab' re' re'.²⁷Eh cha q'or keh chi re' hin i k'achlik Dios kinq'orik reh i chi re' taqe i wilkeeb' chupaam i ye'aab' k'ahchi' wii' i ti' k'axik naa kikanteesjiik ruuk' q'aslaj ch'ihch'. Eh re' taqe i inkikeb'aa' kiib' chupaam taqe i paat ko'lb'al iib' eh pantaq ruhopil ab'aj, naa kikimiik ruum yab'ilaal, re' taqe i aj panab'iix re' i josq'laj chikop naa rukansaniik keh.²⁸Re' hin naa nusacham wach i kitinamiit, naa nukanaam chi xan tz'irik chik paam. Naa nusacham wach i runimaal kiwach, i kajaawriik. Re' taqe i ye'aab' Israel ma' jino'q chik i naa rik'iik chupaam.²⁹Eh noq naa nusacham wach i kitinamiit noq naa nukanaam chi ma' xta chik i wilik chupaam ruum chu'nchel i ch'uwa' wach na'ojb'al xkian. Ruuk' i re' naa kinab'eem chi re' hin i k'achlik Dios, tiko'q keh inki.

³⁰Eh je' wo' chik wilik i xuq'or weh: Hat rak'uun winaq, re' taqe i tinamit inkipab'aa' kiib' wataq tz'aq, wataq ru puertahiil i kipaat, eh k'ul inkiq'or chikiwach chi je' wili chawiij: Kim taq qib'iraj i holohik laj ruk'uhb'aal i Dios i ruq'or, inki taqe.³¹Re' taqe nutinamiit kiooj wo' naq chi rib'irjiik i nuk'uhb'aal inaq'or inkitzunaa' kiib' chawach je' rukab' i okrinaq taqe wii'. Xa re' la' xama' nkian ta wo' hoq xa chi kichii' kinkiloq'ej, eh re' kánima najt wilik wuuk', ruum chinaah i b'ehomal inkiyeew kik'ux.³²Eh chi kekeh aha' wilik inaq'or xa je' rukab' jino'q i tz'uuy reh k'axaj iib', je' rukab' inkitz'uyej i xa holohik chik paam i kalaq q'e' kichol tz'uuy. Inkib'iraj wo' naq taqe inaq'or xa re' la' xama' inki a'n ta wo' rub'aan.³³Xa re' la' chu'nchel inaq'or keh naakik'ulum, eh noq chi k'achi' chik kik'ulum kora'j naakinimam re' chi re' hat, hat jalal nuq'oral tiko'q keh, inki i Dios. Re' i ruq'orariik chi naakik'ulum i ti' k'axik i cha'jen keh i aj Israel

¹Re' i QaJaaw Dios je' wili i xuq'or weh:²Hat rak'uun winaq cha q'or keh i cha'jen keh i aj Israel chi je' wili: Re' i QaJaaw Dios, je' wili i ruq'or taq chawiij: Re' taqe i aj cha'jen keh i aj Israel q'e' ti' i naakik'ulum ruum xa re' keh inkicha'jeej kiib'. Xanaah re', re' naq i nutinamiit i naakicha'jeem re' taqe i nutentzuun noq wilkeeb'.³Re' keh inkuk'ej keh i kilecha i je' tentzun, eh inkiyejaa' chi kiso' i kiij, eh inkik'ux keh i q'e' q'ina', xa re' la' xama' inkicha'jeej ta wo' hoq.⁴Re' keh ma' nkiyeew ta rukowiil kik'ux i je' taqe nutentzuun ma' kow ta kik'ux. Eh ma' kiq'omaaj ta taqe i wilik kiyab'ilaal, ma' nkib'ak ta wach i kiti'kiil inkitoq kiib', ma' nkiq'unej ta wach taqe i sahchinaq, ni xata nooj kisik' inkiq'eb' kiib'. Kow la' chik inche kiq'oreej, inki a'n ti' k'axik reh.⁵Re' taqe i je' nutentzuun xi kahnik chi ma' xta cha'jen keh, xkitukej kiib' xa aha' yuuq'. Re' taqe i josq'laj chikop k'uxwik keh.⁶Eh re' taqe nutentzuun noq wilkeeb', xisahchik chupaam taqe i yuuq' k'ixkaab', je' wo' hoq chikinaah taqe inajt kinaah yuuq' wilkeeb' sut i wach ak'al. Korik noq xkitukej kiib' ma' awach ta xsik'wik i xkapeb'inik keh.

⁷Ruum aj re', re' taqe i aj cha'jen naq keh kib'iraj i naa nuq'orom keh.⁸Re' hin i Dios xti korik i nuq'or chi josq'laj chikop chi re' taqe i chikop wilkeeb' pantaq ch'ahn xi k'amwik, xik'uxwik keh taqe i nutentzuun noq wilkeeb', ruum ma' xta cha'jen keh. Re' taqe i nukojom naq chi cha'jen keh xama' kiooj ta wo' chi rusik'ariik, ma' re' ta wo' chik inkicha'jeej, re' la' chik i keh inkichajeej kiib'.⁹Ruum aj re', re' taqe i aj cha'joom kib'iraj i naa nuq'orom keh.¹⁰Re' i nuq'or i hin, hin Dios re' i wili: Re' chi yohb'aal wach i nujosq'iil chikinaah, naa nupahqaam keh aha' xiooj taqe i je' nutentzuun noq wilkeeb'. Eh naa wesam taqe chi kicha'jaljiik ruum xa re' wo' keh inkicha'jeej kiib'. Naa wo' chik nuko'leem kiij i nutinamiit, reh chi ma' nee tan kuxik kisacham wach, tiko'q keh, inki Dios.

¹¹Eh je' wo' chik wili i xuq'or i QaJaaw Dios: Re' hin i nuq'or chi re' chik i hin naa nucha'jiniik keh i nutentzuun noq wilkeeb'.¹²Re' hin naa nub'anam keh je' rukab' i rub'an i cha'jen tentzun ti' rik'raaj taqe i rumol kiwach noq inkitukej kiib'. Je' wo' re' i naa nub'anam i hin kuuk' i nutinamiit naa numolom kiwach, naa wesam taqe chaloq panti' k'axik chupaam i q'iij noq wilkeeb' panq'equm paam ye'aab' kitukem wii' kiib'.¹³Re' hin naa wesam taqe chaloq pan i tokoom tinamit, naa wo' chik numolom kiwach pan kitinamiit. Eh naa nuye'em taqe chupaam i ye'aab' aha' naa ruwihiik k'uxumb'al keh, re' wilik wii' taqe i rooq naakipatiniik wii'.¹⁴Naa nub'anam kuuk' je' rukab' noq kik'amarik reje taqe tentzun chinaah taqe inajt kinaah yuuq' wilkeeb' Israel, re' i wilik wii' k'im inkik'ux. Ar naakihi'liik chi suq, naa kianam rusuqkiil i kiwa' i kihaa'.¹⁵Re' chik i hin naa nucha'jiniik keh i nutentzuun noq wilkeeb'. Re' hin naa nuye'wiik keh chi hi'lik, inki QaJaaw Dios.¹⁶Re' hin naa nusik'im i nutentzuun i sahchinaq taqe naa numolom cho kiwach i q'ehb'inaq. Naa nu b'ak'am wach i kitoqeel, naa nutob'eem taqe i ma' kow ta kik'ux. Re' taqe i q'ina' ruch'ihil taqe i kow kiib' naa nucha'jeem taqe je' rukab' i ruk'ul chi keh.

¹⁷Re' hin taq awajaaw je' wili i nuq'or: Chab'iraj taq i hat, hat taq nutentzuun noq wilkaat, naa wesam taqe reje i je' imas tentzun chi kixilak i je' taqe kaprax.¹⁸Re' taq i hat k'amal b'eeh ma' manlojik ta taq aweh i suq atoob' taq inak'ux, inayeq' la' taq panawooq aha' wilik taq inakanaa'. Eh re' i saq wach ha' taq inawuk'ej, inach'uwa'risaj taq wach ruuk' aawooq.¹⁹Eh re' taqe i k'uxumb'al inayeq' taq panawooq, re' tii taqe i nutentzuun noq wilkeeb' kik'uxwik reh. Eh re' wo' keh kiuk'inik reh i ha' inach'uwa'risaj taq wach.

²⁰Re' hin naa nuq'atam i q'orik chikinaah taqe nutentzuun noq wilkeeb', naa wesam i q'ina' chi kixilak taqe i xab'aaq taqe.²¹Re' taqe nutentzuun noq wilkeeb' ma' kow ta kik'ux, re' taq i hat i kow awiib' je' xamihnaj taq reje, je' naa ruuk' uk'aa' xa kuhraaj taq reje wii', korehtaal taq xatukej reje kiwach.²²Re' hin naa nuko'leem taqe i nutentzuun noq wilkeeb', ma' naa ta chik kelq'jiik. Re' hin naa nuq'atam i q'orik chinaah naa wesam i q'ina' chi kixilak i xab'aaq taqe.²³Re' hin naawuksam chaloq jinaj i riih rumaam i David re' i waj kamanoom. Re' chik i reh naa nukojom chi cha'jen keh chi k'amal kib'eeh i taqe nutentzuun noq wilkeeb'.²⁴Eh re' hin naa nukahniik chi ki Dios, re' riih rumaam i David i waj kamanoom naa rukahniik chi k'amal kib'eeh, inki i Dios.

²⁵Re' hin wilik i naa nuyejaam wach kuuk' i nutentzuun noq wilkeeb', reh chi nee kikahnik pansuqkiil k'uxliis. Eh naa wesam taqe reje i josq'laj chikop reh chi suq nee kiwihik, chupaam i ye'aab' chinaah taqe yuuq'.²⁶Re' hin naa nuye'em taqe i nutentzuun noq wilkeeb' chi junsuut i nuSantolaj ye'aab', naa nukuxisam taqe xiik' naah wotob'il naa nuye'em chikinaah noq naa rureqem i ruq'ijil.²⁷Eh re' chee' naa chik kiwachiniik, je' wo' taqe i tik chuwach aak'al. Re' taqe i nutentzuun noq wilkeeb' suq chik naa kik'achariik pan kitinamiit. Eh noq naa wesam taqe chaloq i pan kiq'ab' inchopwik kinaah, ruuk' i re' naa kinab'eem chi re' hin i k'achlik Dios.²⁸Eh ma' naa ta chik ruchopariik kinaah kuum i tokoom tinamit, ni xata naa chik kik'uxarik kuum i josq'laj chikop. Suq la' chik naa kik'achariik ma' awach ta chik naa ruyohb'isaniik keh.²⁹Re' hin naa nuye'em keh i holohik laj ak'al reh chi naa ruwachiniik chi korik i kitik. Re' ma' naa ta wo' chik kikaqse'ljiik kuum i tokoom tinamit.³⁰Ruuk' i re' naa kikojom rehtaal i aj Israel chi re' hin i k'achlik Dios chi re' hin naa nuwihiik kuuk'. Re' keh nutinamiit taqe, inki i QaJaaw Dios.³¹Re' taq i hat aj Israel hat taq nutentzuun noq wilkaat. Re' taq i hat, hat taq nutinamiit, eh re' hin, hin taq aaDios, inki. Re' ruq'orariik rib'iral i ti' k'axik xchalik chikinaah i wilkeeb' ar Seir

¹Re' i QaJaaw Dios je' wili i xuq'or weh:²Hat rak'uun winaq, ti tz'ehtanoq reje i wilik wii' i tinamit Seir, cha q'or reje keh i ti' k'axik naa ruchaliik chikinaah.³Je' wili i cha q'or keh: Re' i QaJaaw Dios je' wili i ruq'or taq chawiij:
Re' hin ma' k'isiin i nuk'aah chikinaah i wilkeeb' Seir, naa nuye'em taqe panti' k'axik, naa nusacham wach i kitinamiit.⁴Eh re' tinamiit Seir ruch'ihil taqe i tinamit ruchopom naah naa nukanaam chi xan tz'irik chik paam. Ruuk' i re' naa kinab'eem chi re' hin i k'achlik Dios.

⁵Re' keh ma' k'isiin ta xkixowaaj wach i tinamit Israel. Eh xkiyeew chi kimik ruuk' q'aslaj ch'ihch' noq wilkeeb' pa runimaal ti' k'axik ruum i mahk xkian.⁶Eh re' hin i k'achlik Dios korik i nuq'or chi re' taqe i aj Seir naa nuye'em q'ab' chi naakikanteesjiik, korehtaal imb'aan keh kuum i aj kaansoom. Ruum chi xkian ikaansanik i keh naa wo' chik kikanteesjiik i keh.⁷Re' i kitinamiit i aj Seir naa nukanaam chi ma' xta chik i wilik chupaam naa nusacham wach ma' naa ta chik nuye'em q'ab' chi awach i naa rokiik i naa reliik ar.⁸Re' hin naa taqe nukansam, chi je' chinaah taqe inajt kinaah yuuq', taqe i rub'ol yuuq', wataq k'ixkaab', pantaq rooq ha' naa rukahniik chi tuch'lik i kiti'jolal i naa kikanteesjiik panq'aq'inik.⁹Re' i kitinamiit naa nukanaam chi ma' xta chik i naa ruwihiik chupaam. Eh ma' jino'q chik patineel naa ruwihiik chupaam taqe i tinamit ruchopom naah.

¹⁰Re' taqe i aj Seir je' wili i xkiq'or: Re' taqe i ki'ib' chi tinamit re' i Israel re' i Judá naa rukahniik chi qeh atoob' ta wilik ar i Dios inki taqe.¹¹Eh re' hin i Dios i nuq'or i korik chi naa nuye'em i nujosq'iil je' rukab' i kijosq'iil, je' rukab' ixowaal, je' rukab' i kaqwachiil xkian i keh reh taqe i aj Israel. Eh noq naa nuye'em taqe chutojariik i kimahk i keh naa kinab'eem chi re' hin i k'achlik Dios.¹²Eh naa wo' kinab'eem chi re' hin xb'iraj chu'nchel i rub'ajariik i ye'aab' Israel xkian. Eh je' wili i xkiq'or chi riij: Yu'naak xama' xta chik i wilik chupaam neerub'an chi neenkuxik qasacham wach, inki taqe.¹³Ma' holohik ta wo' xiq'orik chi wiij i hin, ma' k'isiin i yiib' wach q'orik xkiq'or chi wiij. Eh re' hin ti xb'iraj.¹⁴Re' hin i Dios je' wili i xnuq'or chikiij: Chu'nchel i tinamit naa rusuuqb'iik kik'ux noq naa kib'iram chi naa nusacham wach i tinamit Seir.¹⁵Ruum re' keh xsuuqb'ik kik'ux noq xsahchik wach i tinamit Israel. Re' i tinamit Seir je' wo' re' i naa ruk'ulum, naa wo' rukahniik chi ma' xta chik i naa ruwihiik chupaam. Ruuk' i re' naa kinab'eem taqe i aj Edom chi re' hin i k'achlik Dios, tiko'q keh, inki i Dios. Re' i ruq'orariik chi naa wo' chik kehteesjiik panti' k'axik i aj Israel

¹Re' i QaJaaw Dios je' wili i xuq'or weh: Hat rak'uun winaq cha q'oreej taqe inajt kinaah yuuq' je' wili i cha q'or keh: Re' taq i hat najt taq aanaah yuuq' wilkaat taq Israel chab'iraj taq i ruq'oral i QaJaaw Dios:²Re' reh je' wili i xuq'or taq chawiij: Ruum chi re' i nixowanik taq awach je' wili inkiq'or: Atoob' tiih naa qaq'uchum keh inajt kinaah yuuq' korjinaq cho najtir, inki taqe.³Eh cha q'or keh i aj Israel chi je' wili: Re' i QaJaaw Dios je' wili i ruq'or taq chawiij: Xak'ul chik kichalik imb'anik ti' k'axik keh, k'ahchi' rusachariik kiwach, eh re' taqe tokoom tinamit inchopwik kinaah inq'uchwik i chib'ih keh. Eh ma' najawjik ta kiwach kikojariik chi se'lb'al kuum i tinamit.⁴Re' taqe najt kinaah yuuq' wilik Israel cha q'or keh chi kib'iraj i naa nuq'orom i hin, hin Dios chikiij taqe i rax chee', taqe i rooq yuuq', taqe i wataq k'ixkaab', taqe i rooq ha', taqe i ye'aab' xi kahnik chi ma' xta chik wilik chupaam, re' taqe tinamit xi kahnik chi ma' xta chik i wilik chupaam. Re' taqe i xeljik chib'ih keh kuum i tokoom tinamit wilkeeb' chi kijunsuut, eh xa kikaqse'ljik kuum.⁵Je' wili cha q'or keh, re' i QaJaaw Dios je' wili i ruq'or: Ruum aj re', re' hin xiik' naah i nujosq'iil noq kinq'orik chikiij i aj Edom, je' wo' noq kinq'orik chikiij i tinamit junch'uq ruum xasuq chik kik'ux noq xkichop naah i nutinamiit, ruuk' ixowaal xkichop naah, inki.⁶Chaq'oreej taqe chu'nchel i wilkeeb' chupaam i ye'aab' Israel je' wili i cha q'or keh: Re' i QaJaaw Dios je' wili i ruq'or: Re' hin ma' k'isiin i nujosq'iil chikinaah i tokoom tinamit ruum xkik'uhtaaj ruk'ixb'ilaal i nutinamiit noq xq'ucharik keh inajt kinaah yuuq' ruch'ihil taqe i rooq taq yuuq', i rooq ha'.⁷Ruum aj re', re' hin xti korik i nuq'or chi re' taqe i tokoom tinamit wilik chi kijunsuut ma' k'isiin ta naa nuk'uhtaam kik'ixb'ilaal.

⁸Eh re' taqe inajt kinaah yuuq' wilkeeb' Israel naa wo' chik ruk'ihiik taqe chee' chuwach. Eh ma' k'isiin ta naa kiwachiniik, i naa kik'uxum taqe i nutinamiit Israel, re' taqe i ilook' wo' chik kisutinik cho pan kitinamiit.⁹Eh re' wo' hin naa nuko'liniik reh i kiye'aab' naa nuye'em q'ab' chi naa kab'ixem wach, eh chi naa kitikim paam.¹⁰Eh naa wo' chik nuk'ihaaxb'isam taqe i aj Israel chupaam taqe i ye'aab' re' re', eh ar naakipatiniik. Re' taqe i tinamit ruchopom naah naa wo' chik runujiik tinamit chupaam aha' wilik taqe i xyojarik wach naa wo' chik kikorjiik ruka'peech.¹¹Eh chupaam taqe i ye'aab' re' re' naa wo' chik nuk'ihaaxb'isam taqe i aj Israel, je' wo' taqe i chikop. Eh ma' k'isiin i patineel naa kiwihik ar. Re' keh xiik' chik naah suq kiil naa kiwihiik chuwach i pampeet. Ruuk' i re' naa kinab'eem chi re' hin i k'achlik Dios.¹²Naa wo' chik nuye'em q'ab' chi naa kichaliik i nutinamiit Israel chupaam i kitinamiit. Re' wo' chik i keh naa kehchaniik reh taqe rax chee' ma' awach ta chik i naa rukimiik ruum i ruwa' ruhaa'.¹³Re' taqe i tokoom tinamit inkib'aj taqe i aj Israel, je' wili inkiq'or: Re' i kiye'aab' i ruk'ux i rutinamiit i rukanaa' chi ma' xta chik tinamit chupaam, inki taqe.¹⁴Re' hin i nuq'or chi re' kiye'aab' ma' naa ta chik rukansam i rutinamiit ma' naa ta wo' chik rukanaam chi ma' xta chik patineel chupaam i rutinamiit, inki i Dios.¹⁵Ma' naa ta chik nuye'em q'ab' chi naa taq ab'ajariik, chi naa kiq'orom i ma' holohik ta laj q'orik chawiij i tokoom tinamit. Ruum re' taq aa ye'aab' ma' naa ta rukanaam i rutinamiit chi ma' xta patineel chupaam, tiko'q keh, inki i Dios.

¹⁶Re' i QaJaaw Dios je' wili i xuq'or weh:¹⁷Eh noq re' taqe i aj Israel xi k'acharik pan kitinamiit xkich'uwa'risaj paam ruum i yiib' wach na'ojb'al. Re' i yiib' wach k'acharik xkian re' re' xiik' naah ch'uwa'iil wach, ma' xponik ta chi nuwach.¹⁸Ruum aj re' xti xnuyeew i nujosq'iil chikinaah, ruum wo' hoq ikaansanik xkian pan kitinamiit. Eh ruum wo' hoq chi xkich'uwa'risaj paam ruum i kilooq'jiik taqe i tiyoox xkian.¹⁹Ruum i kiyiib' wach na'ojb'al re' re' xnuyeew taqe chutojariik i kimahk, xnutukej reje kiwach chupaam taqe i tokoom tinamit.²⁰Xa re' la' noq xi ponik chupaam taqe i ju'jun chi tinamit imb'ajarik i nuSantolaj b'ihnaal kuum, je' wili inkiq'or i tinamit: Re' wili rutinamiit i Dios wo' naq taqe xa re' la' xi ehteesjik wo' cho pan kitinamiit, inki taqe.²¹Xa re' la' re' hin q'e' ti' inwik'raaj chi kuum i aj Israel imb'ajarik i nuSantolaj b'ihnaal kuum i tinamit aha' kiwihik wii'.

²²Eh re' hat cha q'or keh i aj Israel chi je' wili: Re' i QaJaaw Dios je' wili i ruq'or taq chawiij: Ma' ruum taj i ti' k'axik k'ahchi' taq ak'ulum naa nub'anam otob'il taq aweh, ye'b'al la' ruloq'il i nuSantolaj b'ihnaal ruum re' taq i hat i nayeew taq chi b'ajarik i nub'ihnaal chupaam taqe i tinamit.²³Ruuk' i re' naa nuk'uhtaam chikiwach i k'ih seht chi tinamit i rusantohiil i nub'ihnaal, re' i xayeew taq chi b'ajarik i hat chupaam taqe i tinamit. Eh noq naa nuk'uhtaam i nuSantohiil naa kinab'eem chi re' hin i k'achlik Dios, inki.²⁴Re' hin naa taq kaat wesam chaloq chupaam taqe i tokoom tinamit i hat taq k'amooj reje wii' naa wo' chik numolom taq awach panatinamiit.²⁵Re' hin je' naa ruuk' saq wach ha' naa rutz'ajam taq wach awánima, ruuk' i re' naa wesam iloq i ch'uwa' wilik taq panawánima ruum i kilooq'jiik i tiyoox taq ina' a'n.²⁶Re' hin naa nujalam taq wach awánima je' kowiil ab'aj, eh naa nuye'em taq aweh jinaj i ma' kow ta laj ánima. Eh naa wo' nuye'em taq panawánima i jinaj ak' laj uxlab'al.²⁷Ruum re' i wuxlab'al naa rutoob'iniik taq aweh chi naa taq a'nam panak'achariik aha' wilik i nuq'or taq aweh, eh chi naa taq animam i taqe i ruq'or nuk'uhb'aal.²⁸Eh naa wo' chik taq aak'achariik chupaam taq aatinamiit nuye'em cho keh taq aamaam awati't. Eh naa taq akahniik chi hat taq chik nutinamiit, eh re' i hin naa nukahniik taq chi aaDios.²⁹Re' hin naa taq kaat wesam chuwach inch'uwa'risanik wach taq ak'achariik, eh naa ruwachiniik taq atrigo reh chi ma' naa ta chik ruchaliik i wi'jaleel taq cha naah.³⁰Eh naa wo' nuye'em q'ab' chi naa kiwachiniik taqe i tik chee', je' wo' chu'nchel i tik mu'uun reh chi ma' nee ta chik inchalik i wi'jaleel taq cha naah. Eh ma' nee ta chik inak'uhtaaj taq ak'ixb'ilaal chikiwach taqe i nimaq tinamit.³¹Eh noq naa ruk'uliik taq cho panak'ux i yiib' wach na'ojb'al, i ma' holohik ta taq i na a'n, je' wo' chu'nchel i mahk taq i na a'n ma' k'isiin ta naa ruchaliik taq ak'ixiik cha wib'il awiib'.³²Re' taq i hat inchol taq anab'eem chi re' taqe i otob'il naa nub'anam taq aweh wili ma' ruum ta chi ruk'ul ta taq cha weh, inchol la' ruchaliik taq ak'ixiik ruum taq ayiib' wach na'ojb'al.

³³Re' hin i Dios je' wili i nuq'or: Noq nutz'ajam chik iloq i ch'uwa' taq panawánima naa nuye'em q'ab' chi naa wo' chik taq aak'achariik chupaam taq aatinamiit, naa wo' chik kiyejaam aha' wilik i xyojarik.³⁴Re' i ye'aab' xkanab'jik chi ma' xta chik wilik chupaam naa wo' chik rab'ixjik wach, eh naakilom chu'nchel i naakik'iik ar.³⁵Eh k'ul naa kiq'orom chikiwach chi je' wili: Re' i ye'aab' wili ma' xta naq chik i wilik chupaam, yu'naak je' chik rukab' i ye'aab' Edén. Eh re' taqe i tinamit xiyojib'ik, yu'naak korjinaq wo' chik taqe, wilkeeb' chik patineel chupaam, inko'q taqe.³⁶Eh chu'nchel i tinamit naakikahnik chi k'achalkeeb' re' i wilkeeb' taq cha junsuut ruuk' i re' naa kinab'eem chi re' hin i k'achlik Dios i nuyejaa' aha' wilik taqe i yojinaq, eh i nuyeew q'ab' chi neentikarik paam aha' wilik i ma' tikooj ta chik paam, inki i Dios.

³⁷Re' hin ma' xata re' re' naa nub'anam kuuk' i aj Israel, wila' xkipahqaaj kak'uun kixq'uun weh naa wo' nuye'em keh, korehtaal kik'ihaaxb'iik je' rukab' noq kik'ihaaxb'iik taqe i tentzun.³⁸Re' taqe i kitinamiit xsacharik wach ma' k'isiin chik i patineel naa kiwihiik chupaam, xa je' chik k'ihaal i tentzun kik'amarik reje Jerusaleem chi mayiij paninq'iij. Eh ruuk' i re' naa kinab'eem i aj Israel chi re' hin i k'achlik Dios, tiko'q keh inki weh. Re' taqe i chiq b'aaq xk'uhtjik reh parusaq wiriik i Ezequiel

¹Re' hin xwilow parusaq wiriik chi xuyeew chee q'ab' chi nunaah i QaJaaw Dios xiruk'am reje ruuk' i Ruxlab'al ximponik b'ila' rupab'aa' wach jinaj k'ixkaab' nujinaq chi b'aaq.²Xiruk'am reje xponik b'ila' chik nusutej riij i juntuhb' chi b'aaq, eh re' hin xwilow chi yohb'aal wach k'ihaal i b'aaq tub'lik wach k'ixkaab', eh xiik' naah kichiqkaal.³Re' i QaJaaw Dios je' wili i xuq'or weh:
Hat rak'uun winaq ¿Mi konee inwihik kik'achariik i chiqb'aaq wili noq inaq'or i hat? inki.
Eh re' hin je' wili xnuq'or:
Xa re' hat aweht'al Jaaw, kinki.

⁴Eh je' wili i xuq'or weh:
Yu'naak cha q'oreej taqe panub'ihnaal i chiq b'aaq wili je' wili i cha q'or keh: Chab'iraj taq i ruk'uhb'aal i QaJaaw i hat taq chiq b'aaq.⁵Re' reh je' wili i xuq'or taq chawiij: Re' taqe i chiq b'aaq naa wo' chik nuye'em kuxlab'al reh chi nee wo' chik inwihik kik'achariik.⁶Naa wo' chik nukojom kib'otzaal, rutib'kaal, rutz'uhmal wach taqe i b'aaq re' re'. Eh naa wo' chik nuye'em kuxlab'al reh chi naa wo' chik ruwihiik kik'achariik. Ruuk' i re' naa kinab'eem chi re' hin i k'achlik Dios, inki.

⁷Eh re' hin xnuq'or b'ila' keh i chiq b'aaq i xuq'or weh i QaJaaw. Noq k'ahchi' nuq'orom i re' jinaj i choqik xb'aan, xan yulujinik chik, eh re' taqe i chiq b'aaq xtohq'ik chik kik'ulaam kiwach ruuk' i kik'uliil.⁸Eh xwilow b'ila' chik noq xtohq'ik cho ruwihiik rib'otz'aal, rutib'kaal, rutz'uhumal kiwach taqe i chiq b'aaq, xa re' la' xama' xta wo' kuxlab'al inye'wik kik'achariik.⁹Re' i QaJaaw Dios je' wili i xuq'or weh: Hat rak'uun winaq je' wili i cha q'or reh i uxlab'al inye'wik k'achariik: Hat uxlab'al ti ye'wik k'acharik ti chaloq chi junsuut i wach ak'al, i k'oq ahupej naah taqe b'aaq wili reh chi nee wo' chik inwihik kik'achariik, inki weh.¹⁰Eh re' hin xnuq'or wila' reh i uxlab'al i xuq'or weh i QaJaaw xokik i uxlab'al kuuk' i chiq b'aaq xi k'acharik wo' taqe i kamnaq xipa'lojik ruuk' kooq. Eh yohb'aal chik wach kik'ihaal xa je' chik taqe ruk'ihaal soldado.

¹¹Re' QaJaaw Dios je' b'ila' wili i xuq'or weh: Re' taqe i aj Israel je' kikab' taqe i chiq b'aaq re' re', ruum je' wili inkiq'or: Re' hoj chiqik chik i qab'aqil q'e' ti' qak'ux xama' naa chik qakuyum inqik'raaj, inki taqe.¹²Eh cha q'or keh i aj Israel chi je' wili: Re' i QaJaaw Dios je' wili i ruq'or taq chawiij: Re' keh je' naa parujuleel kamnaq naa wesam taqe chaloq noq naa wesam taqe cho Babilonia. Eh naa wo' chik nuk'amam taqe pan kitinamiit.¹³Re' noq naa wesam taqe cho ar je' naa pankijuleel naa wesam taqe chaloq, ruuk' i re' naa kinab'eem i nutinamiit chi re' hin i k'achlik Dios.¹⁴Re' hin naa nuye'em keh i Wuxlab'al, reh chi naa wo' chik ruwihiik kik'achariik, naa wo' chik nuye'em taqe pan kitinamiit. Ruuk' i re' naakinab'eem chi re' hin i k'achlik Dios, eh re' i nuq'or i nub'an wo' hoq, inki Dios. Re' i ruq'orariik chi xkian jinaj kiwach i aj Israel kuuk' i aj Judá

¹⁵Re' i QaJaaw Dios je' wili i xuq'or weh:¹⁶Hat rak'uun winaq neenatz'ihb'aaj chuwach jino'q i chee' taqe i q'orik wili: Re' i Judá, reh taqe i rutinamiit, inko'q. Eh nee wo' chik natz'ihb'aaj chuwach jino'q chik i chee' taqe q'orik wili: Reh i José, re' Efraín, re' taqe i rutinamiit Israel, inko'q.¹⁷Chi riij i re' neenalaaq'aa' wach i chee' kab'chel, xa je' chik jinaj chi chee' noq neenkahnik panaq'ab'.¹⁸Eh wila' xkiq'or aweh taqe i aatinamiit chi je' wili: Chach'ob' rub'ehel qeh chib'ih iraaj ruq'orom i ki'ib' chi chee' re' re', inko'q taqe.¹⁹Je' wili i neenaq'or keh: Re' i QaJaaw Dios xq'orik weh chi naa nuchopom jino'q i chee' reh i José re' ruchopom naah i Efraín. Re' chee' re' re' rehtalil chu'nchel i tinamit ruchopom naah. Re' i chee' jinaj rehtalil i rutinamiit ruchopom naah i Judá. Eh kab'chel xnulaaq'aa' awach reh chi xkahnik chi xa jinaj chik chi chee'.²⁰Eh re' chee' xatz'ihb'aaj wach xa jinaj aq'ab' naa alaq'aam wii' wach chuwach i tinamit.²¹Chaq'or wo' keh i aj Israel chi naa wo' chik wesam taqe chaloq pan tokoom tinamit k'amooj taqe reje wii' naa numolom kiwach, naa wo' chik nuk'amam cho pan kitinamiit.²²Re' hin naa nuk'ulaam kiwach i kiib' chi tinamit xa jinaj chik naa kikahniik chinaah taqe i yuuq' Israel, je' rukab' noq xak'ulaa' kiwach i ki'ib' chi chee'. Eh xa jinaj wo' chik chi reey i naa rukahniik chikinaah, ma' ka'seht ta chik chi tinamit naakeliik.²³Eh ma' naa ta chik kich'uwa'risam kiib' ruuk' i kilooqjiik taqe i tiyoox, ruuk' i ch'uwa' wach na'ojb'al, je' wo' ruuk' i nuja'waachjiik i hin. Re' hin naa wesaniik reh taqe i kimahk naa nutz'ajam wach i kánima. Re' keh naa kikahniik chi nutinamiit taqe, eh re' hin naa nukahniik chi ki Dios.

²⁴Re' i riih rumaam David i waj kamanoom naa nukojom chi reyil chikinaah, eh chi kunchelaal i aj Israel xa jinaj chik i cha'jen keh naa ruwihiik. Eh naa chik kianam i ruq'or i nuk'uhb'aal, eh naa kik'amam naah i nuq'or keh.²⁵Eh naa wo' chik nuye'em taqe chi k'acharik pan kitinamiit, nuye'em cho reh Jacob i waj kamanoom. Re' xpatinik cho wii' kimaam kati't, eh ar naa kik'achariik i keh chi juneliik je' wo' kiih kimaam. Re' chik i riih rumaam i David i waj kamanoom naa ruk'amwiik kib'eeh.²⁶Re' hin jinaj i na'ojb'al naa nuyejaam wach kuuk' re' i wihik pansuqkiil. Re' i naa nuyejaam wach kuuk' reh juneliik, eh naa nuk'ihaaxb'isam taqe. Eh naa nukojom i nupaat chi juneliik chupaam i kitinamiit.²⁷Eh re' chik i hin naa nuk'achariik kuuk', re' chik i hin naa nukahniik chi ki Dios, eh re' keh naa kikahniik chi nutinamiit taqe.²⁸Re' taqe i nimaq tinamit naa kinab'eem chi re' hin i nuyeew kisantohiil i nutinamiit Israel, eh chi re' i nuSantolaj paat juneliik naa ruwihiik chi kixilak tiko'q keh, inki i Dios. Re' i ruq'orariik chib'ih i xuk'ul i reey Gog rub'ihnaal

¹Re' i QaJaaw Dios je' wili i xuq'or weh:²Hat rak'uun winaq, chatz'ehtaaj reje i tinamit Magog cha q'or reje reh i ti' k'axik naa ruchaliik chinaah i reey Gog, re' i kow chi taaq'anik chinaah i tinamit Magog, i Mesec, i Tubal.³Je' wili i cha q'or reje reh, re' i QaJaaw Dios je' wili i ruq'or chawiij: Re' hin inwixow wach i rub'an i Gog re' kow chi taaq'anik chinaah i tinamit Mesec, Tubal.⁴Re' hin naa kaat nusutem chawiij, je' naa nanukojom i loklok laj ch'ihch' panchii'. Eh naa wesam chawach i ruk'ihaal a soldado, je' chi kooq kiooj, je' riij kawáyu kiooj, ye'ooj kikowiil chi korik wilik kiq'aslaj ch'ihch' kuuk' reh q'aq'inik, wilik wo' kipulato ch'ihch', xa reh reh chik wach i kitz'a'amb'aal wilik kuuk'.⁵Naa wo' rojiik haa' chawiij i ki soldado aj Persia, i aj Cus, i aj Fut, wilik kipulato ch'ihch' kuuk', eh wilik kich'ihch' puneet.⁶Eh naa wo' rojiik haa' chawiij i ki soldado i aj Gomer, chu'nchel i ruk'ihaal i tinamit kichalik pantz'eet reh i rookb'aal i q'iij re' taqe i wilkeeb' chawiij.

⁷Re' hat Gog chakowb'isaj awiib', chayeew wo' kikowiil taqe i asoldaldo i naa kojiik chawiij, eh re' hat naa akahniik chi taaq'anik chikinaah.⁸Eh ik'inaq-oq chik jarub'-oq haab' re' hat naa ataq'ab'jiik reje chi q'aq'inik chinaah i tinamit ruko'leem cho riib' panq'aq'inik. Re' taqe i naa rumolariik cho kiwach chupaam taqe i tinamit. Re' taqe i tukimaj reje kiwach chupaam i tinamit, chu'nchel i re' chinaah taqe i yuuq' wilkeeb' Israel, suq chik i k'acharik nakianam ar.⁹Eh re' hat xa je' chik pan kaq suut teew, xa je' chik q'equm paam suutz' naa aye'em chikinaah i tinamit noq naa rojiik achopom naah awuch'ihil taqe a soldado, awuch'ihil taqe i ruk'ihaal tinamit.

¹⁰Je' wili i ruq'or i QaJaaw Dios chawiij i hat Gog chupaam taqe q'iij re' re', naa ruk'uliik cho panak'ux taqe i yiib' wach na'ojb'al.¹¹Je' wili i naa aq'orom: Re' hin naa wojiik chi q'aq'inik chinaah i tinamit ma' nee ta rub'an ruko'ljiik riib'. Re' i tinamit suq wilik ch'iklik ruk'ux, ma' kotimaj ta riij chi tz'aq, ma' xta ru puerta, ma' xta lutz'b'al reh.¹²Re' hin naa nuchopom naah naawelq'aam i chib'ih reh. Eh naa nusacham kiwach i tinamit korjinaq chik taqe ruka'peech, re' taqe i tinamit xmolarik cho kiwach chupaam taqe tinamit. Re' taqe wilik kiwakax, i wilik chib'ih keh, eh k'acharik chik inki a'n panyejaal i ye'aab', tiko'q.¹³Eh re' taqe i aj Sabá, aj Dan, re' taqe aj yakool wilkeeb' Tarsis, re' taqe i Demas, re' taqe i tinamit naa kipahqaam aweh chi je' wili: ¿Mi xamol cho kiwach re' taqe i aa soldado chi q'uchariik i chib'ih qeh, re' i qa oro, i qa plata, i qawakax, taqe i xa chib'ih jariik i wilik qeh, reh chi naa ak'amam reje ab'ehomal ayu'? inko'q taqe.

¹⁴Je' re' noq re' hat rak'uun winaq cha q'oreej i Gog panub'ihnaal je' wili i cha q'or reh: Re' i QaJaaw Dios je' wili ruq'or chawiij: Noq re' i nutinamiit Israel suq chik wilkeeb' re' reh naa ruk'amam taqe reje.¹⁵Re' hat naa achaliik chupaam i ye'aab' wilkaat cho wii' pantz'eet reh i rookb'aal q'iij. Eh naa ruchaliik chawiij i ma' k'isa soldado, je' wo' ma' k'isa tinamit xiik' naah kowiil kiib' riij kawáyu naa kichaliik.¹⁶Re' hat Gog je' akab' i q'equm paam suutz' noq naa awojiik k'oloq chinaah i nutinamiit Israel. Re' hin naa kaat nutaq'aam reje chi q'aq'inik chinaah i nutinamiit Israel. Reh chi ruuk' i naa a'nam re' re' naa kinab'eem i nimaq tinamit chi re' hin i k'achlik Dios, re' noq naa nuk'uhtaam i nuSantohiil chikiwach.

¹⁷Re' QaJaaw Dios je' wili i xuq'or reh i Gog: Re' hin, re' hat i nuq'or chawib'iral ruuk' kichii' taqe i jalal nuq'oral xi wihik Israel noq xub'an re' hin nuq'orom cho rib'iral chi re' hat naa achaliik chi q'aq'inik chinaah i nutinamiit Israel.¹⁸Re' hin nuq'orom chi noq naa ruchopom naah i nutinamiit Israel i Gog ma' k'isiin ta naa ruchaliik i nujosq'iil.¹⁹Eh ruum chi ma' k'isiin i nujosq'iil naa ruchaliik xti korik i nuq'or chi jinaj i runimaal yihk naa nuye'em Israel.²⁰Ruum i re' ma' k'isiin ta naa kiyo'jiik taqe i kar pantaq palaw, je' wo' taqe i chikop kirupinik pan taxaaj, je' wo' taqe i chikop wilkeeb' pantaq ch'ahn, je' wo' taqe i aaq'. Eh chu'nchel i tinamit wach ak'al naa kiyo'jiik chi nuwach, eh naakib'oqib'ik taqe i yuuq' k'ixkaab', naa kiq'ehb'iik wach ak'al taqe i koraal tz'aq.²¹Eh naa nuye'em cho chinaah i Gog i k'ih b'uhr wach chi ti' k'axik, xa re' reh naa rupletoheem riib' panq'aq'inik naa rukimiik, eh xa chi kib'il kiib' naa kikansam kiib' i ru soldado.²²Re' hin naa nuye'em i nujosq'iil chinaah i reh, i chinaah rutinamiit, i ru soldado ruuk' q'aslaj ch'ihch' naa rukanteesjiik naa nuye'em runimaal yab'ilaal chinaah, je' naa nimaq taq saqb'och, je' naa teew jab', je' naa q'aaq', je' naa asufre i naa nuye'em cho chinaah.²³Ruuk' taqe re' naa nuk'uhtaam chikiwach taqe i k'ih seht chi tinamit chi wilik wajaawriik, chi wilik nuSantohiil. Ruuk' i re' naa kinab'eem chi re' hin i k'achlik Dios, tiko'q reh, inki weh. Re' ruq'orariik chi naa rub'aan reh i reey Gog rub'ihnaal

¹Re' hat rak'uun winaq cha q'or reh i Gog i naa ruk'ulum, je' wili i cha q'or reh: Re' i QaJaaw Dios je' wili i ruq'or chawiij: Re' hin inwixow wach i rub'an i Gog re' intaaq'anik chinaah i tinamit Mesec, i Tubal.²Re' hin naa wesam cho chupaam inajt laj ye'aab' wilik reje pantz'eet reh i rookb'aal i q'iij, ar chik naa nuk'amam chaloq chupaam i rax chee' wilkeeb' Israel.³Chi riij i re' naa nutoqom i flecha wilik parutz'eet q'ab', eh naa wo' nuq'uchum i q'aslaj ch'ihch' wilik parusak'aaj q'ab'.⁴Eh chinaah i yuuq' wilkeeb' Israel naa rukanteesjiik, ruch'ihil taqe i ru soldado, ruch'ihil taqe i tinamit naa kokiik haa' chi ko'ljiik. Ar naa ruk'uxariik i ruti'jolal kuum taqe i k'uch, kuum taqe i josq'laj chikop wilkeeb' pantaq ch'ahn.⁵Xti korik wo' hoq chi chupaam i ye'aab' re' re' naa rukanteesjiik ruum re' hin i k'achlik Dios kinq'orik reh.⁶Re' hin naa nutaq'aam i q'aaq' chinaah i tinamit Magog, je' wo' chikinaah i tinamit xasuq i k'acharik inki a'n wilkeeb' pan tz'a'laj yuuq' chi chii' i palaw. Ruuk' i re' naa kinab'eem chi re' hin i k'achlik Dios.

⁷Re' hin naa nuk'uhtaam i nuSantohiil pan kixilak i nutinamiit Israel. Ma' naa ta chik nuye'em q'ab' chi naa ki ch'uwa'reem wach i nub'ihnaal. Ruuk' i re' naa kinab'eem i nimaq tinamit chi re' hin i kisantolaj Dios i aj Israel.⁸Xti korik i nuq'or chi xailook' chik imponik i q'iij chi naa ruk'ulariik taqe re'. Re' wili re' hin i Dios kinq'orik reh.

⁹Re' taqe i aj Israel noq naakeliik chi b'ehik, naa kik'atam i kitz'a'amb'aal reh i q'aq'inik inkamanik reh i Gog. Re' taqe nimlaj pulato ch'ihch', taqe kiflecha, taqe i xa chib'ih chik jariik manlik kisii' chuwach i wuquub' haab'.¹⁰Eh chuwach i haab' re' re' ma' kota chik ruman naa rojiik kisik'im kisii' pantaq ch'ahn, ruum chu'nchel i kamamb'al re' re' naa kikojom chi kisii'. Naa ruq'uchariik keh kuum i aj Israel aha' naq wilik taqe i xkiq'uch i keh pampeet. Re' wili re' hin i Dios kinq'orik reh.

¹¹Eh chupaam i q'iij re' re' naa nuye'em chi muq'umb'al reh i Gog jinaj i ye'aab' wilik Israel wach k'ixkaab', re' i ki-ik'ik wii' i aj b'iyajo chii' palaw. Eh ar ma' naa ta chik rub'aan ik'ik ruum ar naa rumuhqiik i Gog ruch'ihil taqe i ru soldado. Re' i ye'aab' re' re' wach k'ixkaab' Hamón, eh Gog i rub'ihnaal naa kikojom.¹²Re' taqe i aj Israel wuquub' poh naakimuq'aam wii' taqe i naa kikanteesjiik re' re' ruuk' i re' naakisaqb'isam paam i tinamit.¹³Eh chu'nchel i tinamit Israel naa rumuq'aniik keh i kamnaq re' re'. Re' q'iij re' re' naakininq'ijeem noq naakiye'em nuloq'il i hin, inki i QaJaaw Dios.¹⁴Chi riij i wuquub' poh re' re' naakipa'ab'jiik i juntzuhb' chi winaq naa kojiik chupaam i tinamit chi kisik'ariik taqe i kamnaq i ma' naa ta kimuq'ub'jiik re' chik i keh naakimuq'aniik, reh chi naa kisaqb'isam paam i tinamit.¹⁵Eh noq naakib'ehum paam i tinamit wixkireq jino'q b'aaq ar naa kikojom rehtalil chi chee' korehtaal inkimuq'aa' i aj muuq'oom ar wach k'ixkaab' Hamón, eh Gog.¹⁶Je' wo' re' i nakianam chupaam i tinamit Hamona chi je' re' naa rukahniik chi saq kiwach chu'nchel i tinamit, inki.

¹⁷Re' i QaJaaw Dios je' wili i xuq'or weh: Re' hat rak'uun winaq cha q'or keh taqe i chikop kirupinik pan taxaaj, keh chu'nchel i josq'laj chikop, wilkeeb' pantaq ch'ahn, kichaloq chinaah taqe i yuuq' wilkeeb' Israel. Reh chi naakilom ikaansanik naa nub'anam ar, reh chi neen k'ulik kik'ux keh i kitib'kal i kamnaq, eh neen k'ulik kuk'ej i kikik'eel.¹⁸Naa wo' kik'uxum i kitib'kaal i soldado, eh naa kuk'em i kikik'eel taqe i k'amal b'eeh. Nen k'ulik kik'ux keh je' rukab' noq ink'uxarik i kitib'kal imas tentzun, i kok' tentzun, i kaprax, i q'ina' laj rak'uun wakax ink'ihteesjik ar Basán.¹⁹Re' taqe i chikop re' re' korehtaal kinujik noq naa kik'uxum i kiq'ina'iil taqe i kamnaq re' re'. Eh korehtaal inchalik kimemriik ruum i kinujiik noq naa kuk'em i kikik'eel.²⁰Re' keh naa kik'uxum i rutib'kaal i kawáyu, i kitib'kaal i iqilkeeb' chi riij, re' taqe i kow kiib', i kitib'kaal chu'nchel i aj q'aq'ineel korehtaal naakinujiik chi korik taqe i chikop, inki i QaJaaw Dios.

²¹Chi je' re' naa nuk'uhtaam i nujosq'iil chikiwach taqe i k'ihseht chi tokoom tinamit. Eh chu'nchel i tinamit naakilom chi parub'ehel xnuq'at i q'orik chikinaah.²²Eh chupaam taqe i q'iij re' re' naa rutohq'iik kikojom rehtaal taqe i aj Israel chi re' hin kaJaaw i ki Dios.²³Re' taqe i k'ih seht chi tinamit naa kinab'eem chi re' taqe i aj Israel xi k'amarik reje pan tokoom tinamit ruum i kimahk ruum chi ma' xinkinimaj taj. Ruum i re' xnuq'eb' taqe chi riij nuk'ux, xnuq'asaj taqe pan kiq'ab' i nixowanik kiwach, ruum i re' ma' k'isiin i xikimik panq'aq'inik.²⁴Re' hin xnub'an kuuk' je' rukab' i ruk'ul chi keh ruum i kich'uwa' wach na'ojb'al. Eh ruum chi ma' xinkinimaj taj xnuq'eb' taqe chi riij nuk'ux.

²⁵Ruum aj re', re' hin i Dios je' wili i nuq'or: Re' hin naa wo' chik nuketelaam kiwach i tinamit Israel, re' taqe i riih rumaam Jacob. Naa wo' chik wesam taqe panti' k'axik, naa nuq'orom keh chi kiyeew wo' chik ruloq'il i nuSantolaj b'ihnaal.²⁶Eh noq wilkeeb' chik pan kitinamiit ma' awach ta chik naa rujot'wiik keh, naa ruk'uliik cho pankik'ux i ma' holohik taj inki a'n Eh naa ruchaliik kik'ixiik noq naa ruk'uliik cho pankik'ux chi ma' xinkinimaj taj.²⁷Eh noq naa wesam taqe chaloq i nutinamiit chupaam i kiye'aab' i nixowanik kiwach, naa wo' chik numolom kiwach pan kitinamiit. Ruuk' i re' naa nuk'uhtaam i nuSantohiil chikiwach i k'ih seht chi tinamit.²⁸Re' wo' hin xinye'wik q'ab' chi xik'amarik reje pan tokoom tinamit. Eh re' wo' chik hin naa numolwiik kiwach pan kitinamiit, ma' jino'q chik keh i naa nukanaam cho ar. Ruuk' i re' naakinab'eem chi re' hin i k'achlik Dios.²⁹Eh ma' naa ta chik nuq'eb'em taqe chi riij nuk'ux. Ruum naa nuye'em i Wuxlab'al chikinaah chu'nchel i tinamit Israel, inki i QaJaaw Dios, Re' i Ezequiel xk'uhtjik reh parusaq wiriik i rupaat i Dios korjik koq'uun

¹Pan lajeeb' rub'eeh i peet poh noq xuk'am rub'eeh i ho'oob' ru ka'winaq haab' qak'amariik reje Babilonia. Re' noq kajlaj haab' chik kichopom naah i tinamit Jerusaleem taqe i aj ixowaal, xchalik i rajaawriik i Dios chi nunaah xiruk'am reje ar.²Eh xwilow panusaq wiriik chi xiruk'am reje Israel xinooj rupab'aa' chinaah jinaj i yuuq' xiik' nah najtiil naah. Eh ar wilik jinaj i paat je' nimaal i nimlaj tinamit, ar wilik reje pansak'aaj reh i rookb'aal q'iij.³Noq wilkiin chik ar jinaj chik i winaq xwilow wach xanrob'rotik chik, xa je' chik rukab' i q'an ch'ihch'. Eh jinaj chik i pajb'al k'ahaam ruyohq'eem re' ruuk' i lino, eh jinaj chee' re' ruuk' pajb'al ruyohq'eem, ar pa'lik i koq chii' puerta.⁴Eh re' i winaq re' re' je' b'ila' wili i xuq'or weh: Hat rak'uun winaq xti chawilow ruuk' naq'awach, chab'iraj ruuk' axikin, xti chakoj rehtaal chib'ih taqe i naa nuk'uhtaam aweh. Re' hat xat k'amarik chaayu' reh chi wilik naa nuk'uhtaam aweh, chu'nchel i nee nawil nee wo' chik inooj ak'utjaaj keh i aj Israel.

⁵Eh xwilow wach i tz'aq kotimaj wii' riij i rupaat i Dios. Re' i winaq re' re' ruuk' i chee' pajb'al ruyohq'eem ixib' b'ara rooq, ruuk' i re' xupaj i tz'aq jinaj rooq i chee' re' re' i runimaal rooq, je' wo' hoq i runajtiil naah xelik chuwach.⁶Chi riij i re' xchalik chi chii' i puerta inilwik reje parelb'aal q'iij, xjohtik chuwach i ixkaleria tz'aq, xupaj i wach i puerta jinaj rooq chee' reh i pajb'al xelik chuwach, xelik reje ruuk' i chee' ch'ilik wii' xponik ruuk' i chee' chi juntar re' i ch'ilik wii'⁷Eh chucheel i puerta k'ul wilkeeb' i kok' ye'aab' tasooj kipaam ixib' b'ara kooq, je' wo' re' i runimaal kiwach. Re' i runajtiil kixilak taqe i ju'jun chi ye'aab' wilik roox b'ara. Eh re' i kiib' chi chee' choplik wii' i puerta jinaj rooq chee' pajb'al runimaal kiwach.⁸Eh xupaj wo' hoq i puerta wilik i koq panookb'al, i jinaj rooq chee' pajb'al xelik chuwach.⁹Eh xupaj wo' hoq i puerta reh i ookb'al wilik reje chi muuj i paat kijib' b'ara xelik chuwach, eh ki'ib' i rooq paat wilik ar ju'jun b'ara runimaal paam.¹⁰Eh k'ultar reh i ru puerta re' re' wilkeeb' i kok' paat eliik wach kininqaal, jinaj wo' wach kininqaal i rooq i paat re' taqe i wilkeeb' k'ultar chel.¹¹Eh re' i winaq xupaj wo' hoq i wach i puerta wilik panookb'al ho'oob' b'ara xelik chuwach, eh re' ookb'al waqiib' b'ara ruuk' yejal xelik chuwach.¹²Eh chuwach taqe i ju'jun chi kok' paat wilik taqe i ju'jun chi koraal tz'aq yejaal i b'ara runimaal kiwach k'ultar chel. Re' taqe i ju'jun chi kok' paat ixib' b'ara i runimaal kooq, je' wo' hoq i runimaal kiwach.¹³Chi riij i re' xupaj nik' najtiil kixilak i ki'ib' chi puerta xutoq'aa' cho ruuk' i ru puertahiil i k'isa paat jinaj, eh xponik ruuk' i ru puertahiil i k'isa paat jinaj, eh kab'laj b'ara ruuk' yejaal xelik chuwach.¹⁴Eh xupaj wo' hoq i rooq i paat wilkeeb' chi muuj, eh lajeeb' ru ka'winaq b'ara xelik chuwach i ju'jun. Eh re' i chee' q'e'lik chinaah i puerta imponik rureq i rooq i paat chi juntar.¹⁵Eh re' i winaq re' re' xutoq'aa' i koq pajooj ruuk' i puerta wilik chuwach xponik ruuk' i puerta wilik i koq chupaam, ho'oob' ru ka'winaq b'ara xelik chuwach.¹⁶Re' taqe i ju'jun chi kok' paat wilik ki ventana re' ruuk' i kok' taq wach, wilik i wilkeeb' chi muuj i paat. Wilik taqe i ventana ki-ik'ik wii' chupaam i paat noq kiooj chi muuj. Eh chuwach taqe i rooq i paat och'imaj wach kojooj rehtalil i xaq ipak' chikiwach noq xwilow.

¹⁷Eh re' i winaq re' re' xiruk'am b'ila' reje pantehlik chi riij i paat. Eh inwilow tusulkeeb' wach tz'aq i lajeeb' ru ka'winaq chi kok' paat, tasooj paam, eh tusuuj i xan chupaam chi ju' junaal, xan worwotik chik paam.¹⁸Eh re' xaan tusuj panookb'al i koq reh i rumuuj i paat panqajik wilik chuwach i wilkeeb' wii' i kok' paat, xooj reje chi junsuut i paat. Re' i runimaal rooq eliik wach ruuk' i runimaal wach.¹⁹Eh re' i winaq xutoq'aa' chee pajooj chi chii' i puerta inilwik reje parelb'aal q'iij, xponik ko ruuk' i puerta wilik reje chi muuj chi juntar lajeeb' roxk'ahl b'ara xelik chuwach.

²⁰Re' i winaq xupaj wo' hoq i puerta wilik reje pansak'aaj reh i rookb'aal q'iij re' i wilik chi muuj i paat. Eh xupaj i rooq je' wo' i wach noq xwilow.²¹Eh chupaam taqe i ookb'al k'ultar chel wilkeeb' i ox ox chi ye'aab'. Re' taqe i rooq i paat, re' taqe i kotlik chinaah eliik wach runimaal ruuk' i puerta inilwik reje parelb'aal q'iij xi elik chuwach i ho'oob' ru ka'winaq b'ara runimaal rooq, eh kab'laj b'ara ruuk' yejaal i runimaal wach.²²Re' taqe i ru ventana hiil i paat, elik wach kinimaal. Re' i och'imaj wii' wach taqe i rooq i paat eliik wach kininqaal, ruuk' i puerta inilwik reje chi muuj i rupaat i Dios je' wo' hoq i chee' ruq'e'liik, wilik i wuquub' chi ixkaleria tz'aq imb'aan wii' johtik.²³Re' i winaq xupaj wo' xilak i puerta inilwik reje pantz'eet reh i rookb'aal i q'iij ruuk' i ru puertahiil i rumuuj i paat i wilik i koq ko chupaam, eh lajeeb' roxk'ahl b'ara rooq xelik chuwach.

²⁴Eh xiruk'am b'ila' reje i winaq i pansak'aaj reh i rookb'aal i q'iij, eh ar wilik jinaj i puerta, xupaj wo' hoq i puerta, je' wo' taqe i rooq paat wilkeeb' chi muuj. Eh eliik wach kinimqal ruuk' taqe i ruk'uliil xelik chuwach.²⁵Re' i wilik wii' i puerta re' re' wilik wo' taqe i ventana je' rukab' i wilkeeb' chi chii' i puerta wilkeeb' chi juntar. Re' i runimaal i ye'aab' i wilik wii' i puerta ho'oob' ru ka'winaq b'ara rooq, xelik chuwach, re' i wach kab'laj b'ara ruuk' yejaal i wach.²⁶Eh wuquub' wo' hoq i ixkaleria tz'aq johtb'al wilik chi chii' i puerta re' re'. Eh re' taqe i och'imaj wii' wach taqe i rooq i paat k'ultar wilkeeb' rehtalil i xaq ipak'.²⁷Eh re' i winaq xupaj wo' xilak i puerta inilwik reje pansak'aaj reh i rookb'aal i q'iij, ruuk' i puerta wilik i koq ko chupaam. Eh lajeeb' roxk'ahl b'ara xilak xelik chuwach i koq ko chupaam.

²⁸Re' i winaq xiruk'am b'ila' i koq ko chupaam i paat, re' i wilik wii' i puerta inilwik reje pansak'aaj reh i rookb'aal q'iij. Xupaj eliik wach kininqaal ruuk' taqe i ruk'uliil xelik chuwach.²⁹Re' taqe i kok' paat, re' taqe i rooq i paat, re' taqe i ventana, eliik wach ruuk' taqe i kik'uliil. Re' i runimaal rooq xelik chu'nchel taqe re' ho'oob' ru ka'winaq b'ara xelik, eh re' wach kab'laj b'ara ruuk' yejaal xelik chuwach.³⁰Re' i ye'aab' wilik wii' i puerta re' re' ho'oob' ru ka'winaq b'ara i runimaal rooq, eh kab'laj b'ara ruuk' yejaal i runimaal wach xelik chuwach i winaq.³¹Re' i ye'aab' re' re' ar inilwik reje chupaam i tehlik wilik reje chi riij i paat. Re' taqe i rooq i paat och'imaj wach ruuk' i xaq ipak'. Re' i puerta re' re' waxiqiib' ixkaleria tz'aq johtb'al wilik chi chii'.

³²Eh xiruk'am wila' reje i winaq chupaam i ye'aab' wilik i koq ko chupaam i paat wilik reje parelb'aal q'iij. Eh xupaj i puerta eliik wach ruuk' iruk'uliil xelik chuwach.³³Re' taqe i kok' paat, ruch'ihil taqe i ventana, re' taqe i rooq i paat eliik wach kininqaal ruuk' taqe i ruk'uliil xelik chuwach. Re' i ye'aab' wilik chii' ookb'al ruch'ihil i chii' paat reje ruch'ihil taqe i ru ventana xupaj taqe ho'oob' ru ka'winaq b'ara rooq xelik chuwach, eh re' wach kab'laj b'ara ruuk' yejaal.³⁴Re' i ye'aab' re' re' ar inilwik reje kochiriij i paat tehlik reje wii', re' taqe i rooq i paat och'imaj kiwach ruuk' xaq ipak'. Re' i puerta re' re' waxiqiib' i ixkaleria tz'aq johtb'al wilik chi chii'.

³⁵Eh xiruk'am b'ila' reje i wilik wii' i puerta inilwik reje pantz'eet reh i rookb'aal q'iij. Eh noq xupaj, eliik wach kininqaal ruuk' taqe i ruk'uliik xelik chuwach.³⁶Wilik wo' taqe i kok' paat ar wilik ru ventana, wilik kooq. Re' i ye'aab' re' re' ruuk' taqe i ru ventana, ruuk' chu'nchel i wilik reh ho'oob' ru ka'winaq b'ara rooq, eh re' wach kab'laj b'ara ruuk' yejaal i xelik chuwach noq xupaj.³⁷Re' i ye'aab' re' re' ar inilwik reje chi riij i paat, re' i tehlik reje. Eh chi chii' i puerta re' re' wilik waxiqib' i ixkaleria tz'aq johtb'al. Eh och'imaj wach ruuk' xaq ipak' i ju'jun chi rooq i paat wilkeeb' k'ultar chel reh i ookb'al.

³⁸Eh wilik wo' jinaj i k'isa paat ar re' i ru puertahiil, re' inooj ruuk' i puerta wilik ko chupaam. Eh ar inkitz'aj wach i tiwik inkiyeew chi mayiij.³⁹Re' i wilik wii' i puerta re' re' k'ul tar chel wilkeeb' i ka'kab' chi mexa. Chinaah taqe i mexa re' re' inkiyok' ralaq taqe chikop inkiyeew chi kimayiij chi riij taqe i kimahk.⁴⁰Eh chi riij i ye'aab' re' re' ma' najt ta ruuk' i ixkaleria tz'aq ki'ib' wo' chik i mexa wilkeeb' ju'jun chi ju'juntar.⁴¹Eh kijib' i mexa wilkeeb' chupaam i puerta inilwik reje pansak'aj reh i rookb'aal q'iij, eh kijib' i wilik reje chi chii' i paat waxiqiib' chu'nchel i mexa. Eh ar inkiyok' ralaq taqe chikop inkiyeew chi kimayiij.⁴²Re' i kijib' chi mexa inkiyok' wii' ralaq i chikop ab'aj i ruyej-aal k'isiin ma' jinaj b'ara runimaal kooq, je' wo' hoq i runimaal kiwach eh yejaal i b'ara i runajtiil kinaah. Eh chinaah taqe i mexa re' re' wilkeeb' i ch'ihch' inkamanik keh chi yok'b'al kalaq i chikop inkik'at chi kimayiij.⁴³Eh chi junsuut i tz'aq re' re' wilkeeb' i loklok laj ch'ihch' ju'jun k'itub' kooq, ar inkich'ilaa' i tiwik, eh chuwach taqe i mexa inkiyeew i tiwik inkiyeew chi kimayiij.

⁴⁴Eh chi riij i puerta wilik chupaam, eh ki'ib' b'ila' i kok' paat wilkeeb' ar, jinaj i wilik chucheel i puerta wilik i koq ko chupaam wilik reje pantz'eet reh i rookb'aal q'iij, ar inilwik reje pansak'aaj reh i rookb'aal i q'iij. Eh re' i k'isa paat jinaj ar wilik chucheel i puerta wilik i koq ko chupaam, ar inilwik reje pansak'aaj reh i rookb'aal q'ij.⁴⁵Re' i winaq je' b'ila' wili i xuq'or weh: re' i k'isa paat inawil wach wilik reje pansak'aaj reh i rookb'aal q'iij kiye'aab' taqe i k'amal b'eeh aj tiij kikamanik chupaam i rupaat i Dios.⁴⁶Eh re' i k'isa paat inawil wach wilik reje pansak'aaj reh i rookb'aal i q'iij kiye'aab' taqe i kajaaw aj tiij kik'atwik i mayiij wach artaal re' taqe i ruuk' chaloq i riih rumaam i Sadoc xa re' wo' chik taqe i keh i aj Levíta inki a'n i rukamaj i Dios, inki.⁴⁷Chi riij i re', re' i winaq xupaj wo' hoq i chii' paat wilik i koq ko chupaam, re' re' i kajtz'u'k noq wilik lajeeb' roxk'ahl b'ara chi ju'juntar xelik chuwach. Re' i artaal ar wilik reje chuwach i rupaat i Dios.

⁴⁸Re' i winaq xiruk'am reje chupaam i ye'aab' wilik wii' i ru puertahiil i rupaat i Dios, eh xupaj i rooq i paat ar, eh ki'ib' b'ara ruuk' yejaal runinqaal paam xelik chuwach, re' i puerta wuquub' b'ara wach. Re' taqe i chee' ch'ilik wii' i ru puertahiil i rupaat i Dios jinaj b'ara ruuk' yejaal runimaal wach i ju'jun.⁴⁹Eh re' i ye'aab' wilik wii i puerta xupaj wo' hoq i winaq lajeeb' b'ara wach, eh waqiib' b'ara rooq xelik chuwach. Eh lajeeb' chi ixkaleria tz'aq johtb'al wilik chi chii' i puerta, eh ju'jun i rooq i paat wilik chi ju'juntar.

¹Chi riij i re', re' i winaq xiruk'am i koq chupaam i rupaat Dios xupaj wo' taqe i rooq i paat ox ox b'ara paam i ju'jun, je' nimaal santo laj itz'ihy naah paat.²Re' i puerta xupaj wo' hoq i k'isiin ma' ho'oob' b'ara xelik chuwach. Re' taqe i chee' ch'ilik wii' i puerta ki'ib' b'ara ruuk' yejaal runimaal wach chi ju'jun tar xupaj wo' ye'aab' wilik panyejaal juninaq b'ara rooq, lajeeb' b'ara wach xelik chuwach.³Re' i winaq xiruk'am i koq ko chupaam i ye'aab' xupaj taqe rooq i paat wilkeeb' ar suut chi ju'jun b'ara i runinqaal paam i ju'jun. Re' i runimaal wach i puerta ixib' b'ara, re' ookb'al ixib' b'ara ruuk' yejaal runimaal wach.⁴Eh re' i winaq xupaj wo' hoq i ye'aab' wilik i koq ko chupaam, eh suut chi lajeeb' b'ara xelik chuwach. Je' b'ila' chik wili i xuq'or weh: Re' i ye'aab' wili xti wilik rusantohiil, inki.

⁵Eh re' winaq xupaj wo' hoq i tz'aq wilik chi junsuut i rupaat i Dios, ixib' b'ara rupimiil. Eh chuwach i tz'aq re' re' yej-amaj taqe i kok' paat tasooj paam. Ki'ib' b'ara runimaal paam i ju'jun xelik chuwach.⁶Re' taqe kok' paat re' re' oxch'iht chik noq wilkeeb' i ju'jun. Re' i peet ch'iht lajeeb' ru ka'winaq chi kok' paat i wilkeeb' chupaam i ju'jun ch'iht. Re' i koraal tz'aq wilik chi riij i rupaat i Dios xti najt naah ar ch'ikilkeeb' i rib'ojal kok' paat, ma' re' ta wach tz'aq reh i rupaat i Dios ch'ililkeeb'.⁷Eh chuwach taqe i kok' paat wilkeeb' chi junsuut i rupaat i Dios wilik i johtb'al reh reh runimb'iik wach intohq'ik johtoq ruuk' i peet ch'iht korehtaal xponik paroxch'iht.⁸Re' hin xwilow panusaq wiriik chi junsuut i rupaat i Dios wilik taqe i tz'aq korjinaq ixib' b'ara runajtiil naah, chinaah i re' ch'iklik taqe kok' paat.⁹Re' i tz'aq wilik chikiij i kok' paat ki'ib' b'ara ruuk' yejaal runimaal wach, je' wo' re' nimaal i tehlik inkahnik ruuk' i paat.¹⁰Re' xilak i tz'aq ruuk' i kok' paat re' re' lajeeb' b'ara i tehlik chikiij i kok' paat, eh je' wo' chi junsuut i rupaat i Dios ruuk' i paat jinaj chik.¹¹Re' i ookb'al reh taqe i kok' paat re' re' ar wilik reje i tehlik wii' ki'ib' b'ara ruuk' yejal i runimaal wach. Re' taqe i kok' paat ka'kab' i ru puertahiil jinaj i wilik reje pantz'eet reh i rookb'aal i q'iij, eh jinaj i wilik reje pansak'aaj reh i rookb'aal q'iij.

¹²Eh chi' paat reje wilik wo' chik jinaj i paat ho'lajuuj ru ka'winaq b'ara runimaal wach, ki'ib' b'ara ruuk' yejaal rupimiil i tz'aq, ka'winaq ruuk' ho'oob' b'ara rooq.

¹³Eh xupaj b'ila' i rupaat i Dios lajeeb' roxk'ahl b'ara runimaal rooq xelik chuwach. Re' i wach haa' i paat, haa' reje i chi' paat re' i tz'aq lajeeb' roxk'ahl b'ara xelik chuwach.¹⁴Re' i runimaal wach i rupaat i Dios haa' reje i chii' paat wilik reje parelb'aal q'iij lajeeb' roxk'ahl b'ara wo' xelik chuwach.

¹⁵Eh xupaj wo' hoq i paat wilik reje chi riij i rupaat i Dios, haa' reje i chii' paat, haa' taqe i tz'aq, lajeeb' roxk'ahl b'ara rooq xelik chuwach.¹⁶Re' i tz'aq wilik i koq ko chupaam, haa' taqe i ventana, haa' taqe i kok' paat ixib' ch'iht noq wilkeeb' kojooj taqe tz'ilom chuwach. Ar xtohq'ik johtoq ko wach ak'al koxponik i wilik taqe i wii' i ventana, je' wo' taqe i ventana kojooj wo' tz'ilom chikiwach.¹⁷Re' i winaq xupaj wo' hoq i naah i puerta, je' wo' hoq i chupaam i chi riij i paat, eh je' wo' hoq chu'nchel i tz'aq wilik chi junsuut, chi je' chi riij chi je' chupaam xupaj.¹⁸Eh och'imaj kiwach ruuk' i je' ruwii' ánjel, eh pankiyejaal wilik rehtalil i ju'jun chi xaq ipak'. Eh re' i je' kiwii' ánjel k'ultar wilik kiwach.¹⁹Re' i kiwach juntar je' inka'yik winaq, k'ahchi' rilom reje i xaq ipak', eh re' i kiwach juntar je' inka'yik kaq b'ahlam, k'achi' rilom reje i rehtalil i xaq ipak'. Je' re' i och'imaj wii' wach i rupaat i Dios.²⁰Eh chu'nchel i tz'aq reh i rupaat i Dios och'imaj wach ruuk' i je' kiwii' ánjel, je' wo' ruuk' i xaq ipak'. Ar xtohq'ik johtoq wach ak'al koxponik kochinaah i puerta.

²¹Re' i ju'jun chi rooq i rupaat i Dios kajtz'u'k noq wilik. Eh chuwach i ookb'al reh i santo laj ye'aab' kajtz'u'k wo' noq wilik, ar wilik jinaj i artaal.²²Eh re' i artaal tz'ilom korjinaq wii' ki'ib' b'ara ruuk' yejaal runajtiil naah, eh jinaj b'ara runimaal rooq je' wo' hoq i runimaal wach. Re' i rutz'u'kaal re' wach, re' rooq tz'ilom wo' ruyej-aal. Re' i winaq je' wili i xuq'or weh: Re' i mexa wili i wilik i koq chuwach i QaJaaw Dios, inki.²³Re' i rupaat i Dios ruch'ihil i santo laj ye'aab', ju'jun i ru puertahiil.²⁴Re' taqe i puerta ka'kab' pehr noq wilkeeb' k'ul kiteh reje wataq tz'aq.²⁵Eh re' i puerta wilik panyejaal och'imaj wach ruuk' i je' kiwii' ánjel, eh ruuk' xaq ipak'. Je' wo' rukab' i och'imaj wii' wach i koraal tz'aq. Eh re' i rumuuj i paat tz'aplik ruuk' tz'ilom.²⁶Eh k'ul tar i rumuuj i paat wilkeeb' i kok' ventana, eh och'imaj kiwach ruuk' xaq ipak'.

¹Eh re' winaq re' re' xiresaj b'ila' chaloq parupaat i Dios, xiruk'am reje i wilkeeb' wii' i kok' paat tasooj kipaam wilkeeb' reje pantz'eet reh i rookb'aal q'iij chuwach reje i paat re' i tehlik wii'.²Eh re' i paat wilik reje chuwach i puerta inilwik reje pantz'eet reh i rookb'aal q'iij lajeeb' roxk'ahl b'ara rooq, eh ho'oob' ru ka'winaq b'ara runimaal wach.³Eh chi juntar reje i kok' paat ki ilwik reje chi chii' i paat re' i ye'aab' re' re' lajeeb' b'ara runimaal wach, chi juntar reje ar wilik i ye'aab' tusuj xaan paam, oxch'iht noq wilik i ju'jun.⁴Eh chuwach taqe i kok' paat re' re' wilik jinaj i tehlik ho'oob' b'ara runimaal wach, eh lajeeb' roxk'ahl b'ara runimaal rooq, re' inokik i koq chupaam. Eh re' i kipuertahiil i kok' paat ar ki-ilwik reje pantz'eet reh i rookb'aal q'iij.⁵Eh re' taqe i kok' paat wilkeeb' paroxch'iht k'isiin chik kipaam ruum re' i johtb'al xq'uchwik reh i runimaal, ruum aj re' k'isiin kipaam chuwach i wilkeeb' paruka'ch'iht, eh je' wo' chikiwach i wilkeeb' pampeet.⁶Ruum re' taqe i wilkeeb' paroxch'iht ma' xta kooq' kojooj, ma' je' ta rukab' i wilkeeb' pampeet ch'iht. Ruum aj re' kok' taq kiwach chuwach i wilkeeb' panyejaal, je' wo' chikiwach i wilkeeb' pampeet ch'iht.⁷Eh re' tz'aq wilik chikiwach taqe i kok' paat re' re' eh imponik reje ko chi chii' i paat ho'oob' ru ka'winaq b'ara runimaal rooq.⁸Ruum re' i runimaal wach i wilkeeb' wii' i kok' paat ho'oob' ru ka'winaq b'ara runimaal rooq. Eh re' runimaal wach i rupaat i Dios lajeeb' roxk'ahl b'ara.⁹Re' taqe i kok' paat wilkeeb' pampeet ch'iht ar wilik kipuertahiil parelb'aal reje i q'iij.

¹⁰Eh chu'nchel i runimaal wach i ye'aab' chuwach reje i paat wilik reje parelb'aal q'ij, wilik wo' taqe i kok' paat wilkeeb' ar chuwach i tz'aq wilik reje chikiij.¹¹Eh chuwach taqe i kok' paat wilik i rumuuj i paat, je' wo' rukab' taqe kok' paat wilkeeb' reje pantz'eet reh i rookb'aal q'iij, eliik wach runimaal kooq, i runimaal kiwach, je' wo' hoq i runajtiil kinaah. Eh eliik wo' wach i kipuertahiil.¹²Re' taqe i kok' paat re' re' eliik wach kipuertahiil ruuk' i kok' paat wilkeeb' reje pansak'aaj reh i rookb'aal q'iij. Eh wilik jinaj i puerta wilik chuwach i tz'aq wilik reje parelb'aal q'iij, re' imb'aan wii' okik chi' paat wilik chi riij.

¹³Eh re' winaq je' b'ila' wili i xuq'or weh: Re' taqe i kok' ye'aab' wilkeeb' reje pantz'eet reh i rookb'aal q'ij, i wilkeeb' pansak'aaj reh i rookb'aal q'iij, i wilkeeb' reje chi' paat santo laj ye'aab' taqe. Re' taqe i k'amal kib'eeh aj tiij raj kamanoom i Dios ar naa kik'uxum i santo laj mayiij. Eh ar naakiye'em i santo laj mayiij, taqe i lemóxna, taqe i chikop naakiye'em chi mayiij chi riij taqe i kimahk. Ruum re' i ye'aab' wilik rusantohiil.¹⁴Eh re' taqe i k'amal kib'eeh aj tiij noq naa kokiik i koq ar, ma' nee ta kielik reje chi' paat wila' majaa' inkesaj i kiso' reh i rukamaj i Dios chupaam i santo laj ye'aab'. Ar naa kikanaam chee kiso' ruum re' i kiso' wilik rusantohiil. Noq naa kichaliik i wilkeeb' wii' i tinamit tokoom chik i kiso' naa kikojom chaloq, inki.

¹⁵Eh noq re' i winaq xukohlaaj rupajariik i ye'aab' chupaam i wilik wii' i rupaat i Dios xiresaj cho chi chii' i puerta wilik reje parelb'aal q'iij. Eh xupaj wo' hoq i ye'aab' wilik chi junsuut i rupaat i Dios.¹⁶Xupaj wo' reje i chii' paat ruuk' i ruchee' rupajb'aal, eh kiib' siento ruuk' lajeeb' roxk'ahl b'ara xelik chuwach.¹⁷Eh xupaj wo' reje i chii' paat wilik reje pantz'eet reh i rookb'aal q'iij kiib' siento ruuk' lajeeb' roxk'ahl b'ara wo' chik xelik chuwach.¹⁸Xupaj wo' reje ruuk' i ruchee' i paat wilik reje pantz'eet reh i rookb'aal q'iij, eh kiib' siento wo' ruuk' lajeeb' roxk'ahl b'ara xelik chuwach.¹⁹Eh noq xooj kuxoq xupaj reje i chii' i ye'aab' wilik reje parookb'aal q'iij kiib' siento wo' ruuk' lajeeb' roxk'ahl b'ara xelik chuwach.²⁰Re' i winaq xupaj i chii' i ye'aab' kajtarchel re' i wilik wii' i rupaat i Dios kiib' siento ruuk' lajeeb' roxk'ahl b'ara xelik chuwach chi ju'juntar. Eh re' i rupaat i Dios sutimaj riij chi tz'aq q'atb'al paam ruuk' i ye'aab' ma' xta rusantohiil. Re' i ruloq'il i QaJaaw Dios xinujisaj paam i rupaat

¹Re' i winaq xiruk'am b'ila' wo' chik reje chi chii' i puerta wilik reje pareelb'aal q'iij.²Eh xwilow i ruloq'il i qaDios i hoj, i hoj aj Israel chalik i rub'an parelb'aal i q'iij. Xan choqik chik, xa je' chik rukab' i choqik i rub'an i ma' k'isa ha', eh xan saquminik chik wach aak'al i rub'an i ruloq'il.³Re' xwilow panusaq wiriik wili je' rukab' xwilow panusaq wiriik noq xwilow chi re' i QaJaaw xchalik chi rusachariik wach i Jerusaleem. Eh je' wo' rukab' xwilow wach panusaq wiriik chi chii' i nim ha' Kebar, re' i hin xnupach'aa' qohoq wiib' wach ak'al.⁴Eh re' i ruloq'il i QaJaaw Dios chi chii' i puerta inilwik reje parelb'aal q'iij xokik, noq xokik chupaam i rupaat i QaJaaw Dios.⁵Re' i Dios xiruk'am reje i Ruxlab'al ko chupaam i ye'aab' wilik i koq ar, ruuk' i ruloq'il xunujisaj paam chu'nchel i rupaat noq xwil.

⁶Eh re' i winaq xpa'lojik b'ila' chik chi nucheel, eh xb'iraj chi xiruq'o'reej chee QaJaaw Dios ko parupaat.⁷Je' b'ila' wili i xuq'or weh: Hat rak'uun winaq re' wili naa rukahniik chi nuye'aab', noq naa nuwihiik chi kixilak i aj Israel, chi juneliik. Re' keh ma' naa ta chik kich'uwa'risam wach i nuSantolaj b'ihnaal ayu' ruuk' i kilooq'jiik taqe i tiyoox, ni xata re' taqe i kireey naakib'aniik taqe i yiib' wach na'ojb'al re' re'. Eh ma' naa ta chikruchaliik kimuq'aam i ruti'jolal i kireey chinaah taqe yuuq' wilkeeb' ma' najt ta ayu'.⁸Ma' naa ta kiyejaam i rupaat i reey chuk'ulwaach i nupaat i hin, ma' naa ta rukahniik chuk'ulwaach i nupuerta i hin i ru puertahiil i paat re' re'. Ma' nee ta rub'an chi xa jumpehr chi tz'aq i neenq'atwik paam i paat re' re' ruuk' i wee hin. Re' keh i xkich'uwa'risaj wach i nuSantolaj b'ihnaal ruuk' kiyiib' wach na'ojb'al. Ruum i re' xnusach kiwach ruum i nujosq'iil.⁹Yu'naak i ruk'ul chi naa kiq'eb'em reje wulu' i kiyiib' wach na'ojb'al, eh chi najt chik naa rojiik kimuq'aam i kiti'jolal i kireey. Eh re' chik i hin naa nuwihiik pankiyejaal pan kixilak chi jumpech.¹⁰Re' hat rak'uun winaq hiy cha k'uhtaaj keh i aj Israel i ruwii' i rehtalil i runimaal i nupaat xawilow wach panasaq wiriik, reh chi neenchalik kik'ixiik ruum i yiib' wach na'ojb'al inki a'n¹¹Wila' xik'ixiik ruum i yiib' wach na'ojb'al. Neenach'ob' rub'ehel i rehtalil i nupaat, eh chib'ih jariik i wilkeeb' chupaam nik' wach noq wilkeeb' i ookb'al, i elb'aal. Eh neena ch'ob'om rub'ehel i k'uhb'aal naa runimjiik ayu', eh neenatz'ihb'aaj rehtalil keh reh chi neenkireq chi riij, eh neenkian rub'aan. Eh chatz'ihb'aaj keh taqe i ruq'or i k'uhb'aal reh chi neenkinimaj.¹²Re' i wili i k'uhb'aal chi riij i nupaat, chu'nchel i ye'aab' wilik chinaah inajt naah yuuq', chu'nchel i wilik chi junsuut xti wilik rusantohiil, eh xiik' naah loq'il, inki Dios.

¹³Aha' wilik i xpajarik wii' i rupaat i Dios re' wo' chik i re' xpajarik wii' i artaal, eh chi junsuut i artaal wilik jinaj i jul paam tz'aq, yejal i b'ara runimaal wach, yejal wo' b'ara ruchamiil paam. Eh chi chii' i jul re' re' wilik jinaj i q'atb'al jinaj nimlaj k'itub' runajtiil naah.¹⁴Re' i rehtalil i artaal ixib' ch'iht noq wilik: Re' peet ch'iht jinaj b'ara runatiil naah, yejaal i b'ara i rumeetz' elinaq chaloq. Eh re' i rukab' ch'iht jinaj b'ara wo' runajtiil naah yejaal i b'ara wo' elinaq chaloq i rumeetz'. Eh re' i roxch'iht kiib' b'ara runajtiil naah yejaal b'ara elinaq chaloq i rumeetz'.¹⁵Eh paroox ch'iht i artaal kiib' b'ara runajtiil naah, eh pantaq rutz'u'kaal i artaal pa'alkeeb' johtoq i ju'jun chi ruk'aa'.¹⁶Re' i runimaal i roxch'iiht i artaal kajtz'u'k noq wilik waqiib' b'ara wilik reh i chi ju'juntar.¹⁷Re' i ch'ilik wii' i raa' kajtz'u'k wo' noq wilik wuquub' b'ara i wilik reh chi ju'juntar, re' i jul wilik chi rujunsuut yejaal i b'ara i runimaal wach, re' i q'atb'al jinaj mama' k'itub' i runajtiil naah. Eh re' i ixkaleria johtb'al ar wilik reje parelb'aal q'iij.

¹⁸Eh re' i winaq je' wili i xuq'or weh: Re' i QaJaaw Dios je' wili i xuq'or: Noq naa rukuxiik rukorb'eesjiik i artaal, naa rusulariik, naa kik'atam i chikop chi kimayiij chinaah, eh naa kikihraam i kik' chinaah.¹⁹Eh naakiye'em jinaj i komanlik laj imas wakax chi kimayiij chinaah i artaal pahqb'al kuyb'al kimahk. Re' naa kib'aniik reh i nukamaj re' re', re' taqe i k'amal kib'eeh i aj tiij re' ruuk' taqe i aj Levíta, re' ruuk' taqe i riih rumaam i Sadoc, inki i QaJaaw Dios.²⁰Eh re' hat naa akihraam i kik' chinaah i kijib' chi ruk'aa' i artaal, je' wo' pantaq rutz'u'kaal, eh naa wo' akihraam i kik', chinaah i q'atb'al johtinaq naah i sutimaj wii' riij. Chi je' re' naa kikanaam chi saq wach i artaal.²¹Chi riij i re' neenawesaj chaloq imas wakax xye'arik chi mayiij chi riij i mahk neenooj ak'at chi riij i rupaat i Dios. Re' wo' hoq i ye'aab' korjinaq chi k'atb'al reh.²²Eh chi junwar jinaj imas kaprax manlik wach i ruti'jolal naa aye'em chi mayiij reh i chi riij mahk. Re' taqe i k'amal kib'eeh aj tiij ruuk' i re' naakisaqb'isam wach i artaal, je' wo' rukab' i naa kianam ruuk' i k'isa imas wakax.²³Eh noq naa akohlaam i ye'ej mayiij saqb'eesb'al wach i artaal, neenachop jino'q i k'isa imas wakax. Eh nee wo' nachop jino'q imas tentzun re' ruuk' i manlik wach i kiti'jolal.²⁴Neenayeew chi mayiij, eh re' taqe i k'amal kib'eeh aj tiij neenkitileej aatz'aam chinaah neenkik'at chi kimayiij chi ye'b'al nuloq'il.²⁵Eh eqal eqal chuwach i wuquub' q'iij naa aq'asam chi mayiij jinaj imas kaprax pahqb'al kuyb'al mahk. Jinaj imas wakax, jinaj i imas tentzun chi mayiij, re' ruuk' taqe i manlik wach kiti'jolal.²⁶Eh re' taqe i k'amal kib'eeh aj tiij i iqal i iqal chuwach i wuquub' q'iij naakiye'em i mayiij chinaah i artaal ruuk' i re' naa rukahniik chi saq wach, eh naa kikuxisam.²⁷Eh noq ik'inaq chik i wuquub' q'iij re' re', eh chupaam i ruwahxaaq q'iij, re' taqe i k'amal kib'eeh aj tiij naa rutohq'iik kiye'em i mayiij chinaah i artaal, je' wo' taqe i k'atoj chikop chi mayiij. K'amb'al taq awiib' panotob'il wuuk' Eh re' hin nee taq ti nuk'ul wuuk' chi suq nuk'ux, inki i QaJaaw Dios. Re' i xq'orarik chi riij i puerta inilwik reje parelb'aal q'iij

¹Re' i winaq xiruk'am b'ila' reje chi chii' i puerta inilwik reje parelb'aal i q'iij wilik reje chi riij i rupaat i Dios. Re' i puerta re' re' tz'aplik.²Eh je' wili i xuq'or weh i QaJaaw Dios: Re' i puerta wili naa rukahniik chi tz'aplik chi jumpech ma' naa ta rutehiik. Ma' awach taj i naa rokiik i koq ar ruum re' i hin i ki Dios i aj Israel xi nokik ar.³Xa re' wo' i reey naa rokiik ar naa rojiik rutzunaam riib' chi nuwach, eh naa ruk'uxum i kaxlanwi'k kuxisamaj, xa re' la' xa pan jinaj ookb'al wilik chucheel i puerta naa rokiik, ar wo' chik naa reliik chaloq, inki.

⁴Re' i winaq xiruk'am b'ila' reje chi chii' i puerta inilwik reje pantz'eet reh i rookb'aal q'iij wilik chuwach i rupaat i Dios. Re' hin xwilow chi xnujik i rupaat i Dios ruuk' i ruloq'il, eh xnupach'aa' qohoq wiib' wach ak'al.⁵Eh re' i QaJaaw Dios je' wili i xuq'or weh: Hat rak'uun winaq chawil chi korik i naa nuk'uhtaam chawach. Chab'iraj chi korik i naa nuq'orom aweh, re' taqe i k'uhb'aal naa ruk'amariik naah panupaat. Xti naa akojom rehtaal awach taqe i nee ruyeew riib' chi naa kiokik, chi nee kielik panupaat.⁶Re' i hat je' wili i naa aq'orom keh i aj Israel ma' kinimanik taj: Re' i QaJaaw Dios je' wili i xuq'or taq chawiij: Manlik chik i yiib' wach na'ojb'al taq xa a'n.⁷Re' keh inkich'uwa' risaj paam i nupaat ruum inkikoj i koq ar taqe i tokoom tinamit ma' poch'ooj ta naah i kik'achab', ma' kik'ulum taj i rehtalil i nuk'uhb'aal pankanima. Eh inkiyeew chi kimayiij i kaxlanwi'k i kixeb'ohiil, kikik'eel taqe i chikop, ruum taqe i yiib' wach inki a'n re' re' ma' kinimaj taj i nuk'uhb'aal.⁸Re' taq i hat aj Israel ma' na a'n ta taq chi korik i looq' chi b'anarik panupaat i nayeew la' taq q'ab' chi re' taqe i tokoom tinamit kib'anik.

⁹Ruum aj re', re' hin i Dios i nuq'or chi ma' jino'q chik i tokoom tinamit naa rokiik panupaat wila' ma' poch'ooj naah i ruk'achab', eh wila' ma' chih rehtalil paránima i nuk'uhb'aal nuyejaam wach. Eh ni xata re' jino'q i tokoom tinamit k'acharik i rub'an chi kixilak i aj Israel naa rokiik ar.¹⁰Re' taqe i aj Levíta ruch'ihil taqe i aj Israel kuch tinamit kiib' xin kiq'eb' chi riij kik'ux i xiooj chi kilooq'jiik i tiyoox naa nuye'em taqe chutojariik riij i kimahk.¹¹Re' keh xa aj cha'joom chik reh i ru puertahiil i nupaat naa kikahniik wii', xa aj kamanoom chik naa kikahniik wii'. Re' chik i keh naakikansaniik taqe i chikop naakiye'em chi kimayiij i tinamit, naa wo' kikahniik chi kimoso.¹²Re' keh xi kamanik chi k'amal kib'eeh i aj Israel reh i kilooq'jiik taqe i tiyoox. Ruuk' inki a'n re' re' xkikoj kimahk. Ruum aj re', re' hin xti korik i nuq'or chi naa kitojoom riij i kimahk, re' hin i Dios kinq'orik reh¹³Eh ma' nee ta kikamanik chi k'amal b'eeh aj tiij. Ni xata neenkijil i koq kiib' ruuk' i chib'ih weh wilik kiloq'il. Eh ni xata neerub'an chi neenkijil i koq kiib' ruuk' taqe i xti wilik kisantohiil, juneliik la' pank'ixb'ilaal naa kiwihiik ruum i yiib' wach na'ojb'al inki a'n¹⁴Je' re' noq re' hin naa nukojwiik keh panupaat chi xa aj cha'joom chik taqe, reh chi naa kianam chu'nchel i kamanik iraaj b'anarik ar.

¹⁵Eh re' taqe i k'amal b'eeh aj tiij aj Levíta re' ruuk' taqe i riih rumaam i Sadoc. Re' taqe i ma' xkikanaa' ta rub'aan i nukamaj panupaat noq re' taqe i aj Israel xin kiq'eb' chi riij kik'ux, re' keh ra'j neerub'an re' chi naa kianam i nukamaj. Eh neen kiyeew i kixeb'ohiil i kikik'eel chikop chi mayiij chi nuwach, inki i QaJaaw Dios.¹⁶Xa re' wo' keh i ruk'ul chi naakokiik panupaat, eh neenkijil i koq kiib' ruuk' i numexa chub'anariik i nukamaj. Eh naa kianam i naa nuq'orom keh.¹⁷Eh noq naa kokiik i koq chi chii' i puerta wilik i koq ko chupaam i nupaat re' ruuk' itz'ihy lino i kiso' naa kikojom. Eh noq naa kianam i nukamaj chupaam i koq i nuye'aab', ma' naa ta kikojom i kiso' re' ruuk' i rismaal riij chikop ruyej-aal.¹⁸Re' i b'ak'b'al kinaah naa kikojom re' ruuk' itz'ihy lino, je' wo' hoq i paam i kiso' naa kikojom re' wo' ruuk' i lino, ma' naa ta kikojom chikiij i kiso' re' ruuk' i kielik chi ha' ruum.¹⁹Eh noq komajaa' kielik cho chupaam i ye'aab' wilik i koq ko chupaam i nupaat, noq komajaa' kichalik i wilkeeb' wii' i tinamit naa kesam chee kiso' ar, reh i nukamaj, naa kikanaam cho chupaam taqe i kok' ye'aab' wilkeeb' ar. Tokoom chik i kiso' naa kikojom chaloq reh chi ma' nee ta runej taqe i tinamit i rusantohiil i kiso'.²⁰Eh ma' naa ta wo' kijoyom i rismaal kinaah, ma' naa ta wo' kik'isam i kinaah xanaa la' kianam chii'.²¹Eh ma' jino'q keh i k'amal b'eeh aj tiij naa ruk'em reh i vino noq naa kokiik i koq ko chupaam i ye'aab' wilik i koq ko chupaam.²²Ma' naa ta kianam kaxáro ruuk' ixoq kamnaq rub'ahiil, ni xata ruuk' ixoq kanamaj ruum i rub'ahiil, komajaa' la' reht'al wach q'orinik winaq i naa kik'amam chi kehk'een, re' ruuk' taqe i aj Israel oon rukanab' wo' kahnoq jino'q i k'amal b'eeh aj tiij xkimik reje.²³Re' taqe i k'amal b'eeh aj tiij naakik'uhtaam reh i nutinamiit i wilik rusantohiil, eh i ma' xta rusantohiil, eh aha' wilik i saq wach, aha' wili i ch'uwa' wach.²⁴Noq naa ruchaliik i peleto re' taqe i k'amal b'eeh aj tiij naakiq'atwiik i q'orik chikinaah parub'ehel, je' rukab' i ruq'or i nuk'uhb'aal, eh naa kianam i ruq'or i nuk'uhb'aal, naa wo' kik'uhtaam chi naa rub'aan taqe i nuninq'iij. Eh naakiye'em ruloq'il i hi'limb'al q'iij.²⁵Eh maa naa ta kich'uwa' risam kiib' ruuk' i kitz'a'jik i kamnaq. Neerub'an chi neenkitz'a'j wila' re' i kituut kajaaw xkimik, oon kak'uun kixq'uun, oon kas kichaaq' winaq, oon ixoq ma' xta kib'ahiil.²⁶Xa re' la' koruman chi naa rusaqb'isam riib' eh ko wuquub' chik q'iij naa ruye'em.²⁷Eh noq naa rokiik i koq chupaam i nuSantolaj ye'aab' wilik i koq ko chupaam koruman chi naa ruye'em i numayiij pahqb'al kuyb'al ru mahk, inki i QaJaaw Dios.

²⁸Re' taqe i k'amal kib'eeh aj tiij re' re' ma' naa ta ruye'ariik kak'aal ar Israel, re' la' hin jilow kak'aal. Eh ma' naa ta ruye'ariik chi kikooch, re' la' hin i jilow kikooch.²⁹Re' i kimayiij naakiye'em chi naq'wach, re' taqe i chikop naakiye'em chi kimayiij, re' i mayiij naakiye'em chi pahqb'al kuyb'al kimahk i aj Israel naa kik'uxlaam wii' kiib'.³⁰Re' taqe i k'amal kib'eeh aj tiij naa wo' kehchaam i peet wach tik mu'uun, je' wo' i holohaq mayiij naa ruk'amariik cho chi nuwach i hin. Eh noq re' taqe i aj Israel naa kiyejaam i kaxlanwi'k, re' xti holohik naa ruye'ariik keh. Eh re' hin naa nuye'em i wotob'il chikinaah i chib'ih keh awach i naakiye'em i kimayiij.³¹Re' taqe i k'amal b'eeh aj tiij re' re' ma' naa ta kik'uxum i chikop wilik kixiik' oon xa chib'ih chik jariik chopkaal xanaa kikimiik chi kib'il kiib', oon neenkanteesjik ruum i josq'laj chikop, inki Dios. Re' ruch'aqariik i ye'aab' kuxisamaj chi reh i QaJaaw Dios (Ez 48.9-20)

¹Eh noq sik'ooj chik chi riij, naa ach'aqam aak'al keh i ju'jun ch'uq chi Israel naa akanaam reh i Dios junseht-oq aak'al q'e' looq kab'laj miil ruuk' waqiib' siento b'ara runimaal rooq, eh lajeeb' miil b'ara runimaal wach. Eh re' i runimaal i ye'aab' re' re' naa rukahniik chi wilik rusantohiil.²Ar naa reliik i ye'aab' reh i rupaat i Dios kiib' siento ruuk' lajeeb' rok'ahl b'ara i runimaal chi ju'juntar. Eh chi junsuut i ye'aab' re' re' naa ruwihiik i k'im, hoob' ru ka'winaq b'ara wach.³Naa wo' apajam i ye'aab' kab'laj miil ruuk' hoob' siento b'ara rooq, hoob' miil b'ara runimaal wach. Ar naa ruwihiik i rupaat i Dios, je' wo' i ye'aab' xti naa ruwihiik rusantohiil.⁴Re' i ye'aab' re' re' naa rukahniik chi kiye'aab' i k'amal kib'eeh aj tiij raj kamanoom i Dios parupaat. Re' taqe i naa kokiik i ruuk' chub'aan i rukamaj jinaj i ye'aab' naa rukahniik chi keh wilik i rusantohiil, ma' najt ta ruuk' i rupaat i Dios.⁵Eh naa awesam pareh aak'al kab'laj miil ruuk' hoob' siento b'ara runimaal rooq, eh hoob' miil b'ara runimaal wach. Ar naa rutz'aqarik i kitinamiit i aj Levíta, re' taqe i k'amal kib'eeh aj tiij naakikamaniik parukamaj i QaJaaw Dios.

⁶Eh naa awesam pareh i ye'aab' i tinamit re' naakehchaam chu'nchel i aj Israel, kab'laj miil ruuk' hoob' siento b'ara runimaal rooq, eh kiib' miil ruuk' hoob' Siento runimaal wach. Ar naa ruwihiik reje chuwach i ye'aab' naa ruwihiik rusantohiil.

⁷Eh naa awesam pareh i rak'aal i reey, chucheel i ruye'aab' i rupaat i Dios. Ar naa reliik reje chi korkiil ireelb'aali q'iij naa ruponiik chi korkiil i rookb'aal q'iij. Eh ar naa rukahniik chucheel i ruye'aab' i tinamit Jerusaleem ar naa reliik reje chi korkiil i reelb'aal i q'iij konaa ruponiik chi korkiil i rookb'aal q'iij re' i runimaal eliik wach ruuk' i naakik'ulum i ju'jun ch'uq chi aj Israel.⁸Re' aak'al re' re' naa rukahniik chi reh i naa rokiik chi ajaab'esil chikinaah i aj Israel, eh re' taqe i naakokiik chi ajaab'esil ma' nee ta chik inkiq'uch i kak'aal i nutinamiit. Naa la' kikanaam i ye'aab' keh i aj Israel re' q'oreel jar ch'uq chi kiib'.

⁹Re' i QaJaaw Dios je' wili i xuq'or: Hat taq ajaab'ees chinaah i nutinamiit Israel manlik i ti' k'axik i leq' taq xa a'n keh i nutinamiit. Re' taq chik i rub'ehel, i korik taq cha a'n kuuk', maawelq'aaj taq chik i kak'aal i nutinamiit, inki i QaJaaw Dios.

¹⁰Eh manlik taq tipajwoq ruuk' chib'ih taq i naa apajam, manlik taq tipajwoq ruuk' taq apexú.¹¹Re' i pajb'al bato inapaj taq wii' i ha', re' i pajb'al efa inapaj taq wii' chi naq'wach taq atik eliik wach kipajwik. Re' i pajb'al re' re' imponik parulajeeb' i pajb'al homer, ruuk' taq i pajb'al re' re' naa taq apajwiik.¹²Re' i juninaq Gera rahliil re' re' jinaj siklo, eh re' i junlaj gramo oxk'ahl siklo, re' re' imponik jinaj mina.

¹³Eh re' taq i hat je' wili taq amayiij naa aye'em naa taq ach'aqam i wach i trigo, je' wo' hoq i wach taq asebada, oxk'ahl tzuhb' taq i naa awesam, eh juntzuhb' keh i re' naa taq aye'em chi amayiij.¹⁴Eh je' wo' re' i naa taq a'nam ruuk' taq aawaseite naa wo' taq ach'aqam jinaj siento tuhq taq naa awesam, eh juntuhq keh i re' naa taq aye'em chi amayiij.¹⁵Re' i kiib' siento chi tentzun jinaj chi tentzun i naa taq aye'em chi amayiij chi riij. Re' i xti q'ina' taq naa aye'em chi ak'atoj mayiij re' taq i xak'isaj Israel. K'amb'al taq aweh panotob'il ruuk' i Dios. Eh reh wo' pahqb'al kuyb'al taq amahk, inki i QaJaaw Dios.¹⁶Eh chu'nchel i aj Israel ye'ooj chikinaah chi naa kiye'em i mayiij re' re' reh i naa ruwihiik chi ajaab'esil chikinaah.¹⁷Eh re' reh naa ruq'asaniik reh taqe chikop chi k'atoj mayiij, taqe i mayiij naa ruye'ariik chi naq'wach naa wo' ruye'em i riis uuva chi mayiij. Re' taqe inye'arik chupaam i runinq'ijiik i ak' poh, i hi'limb'al q'iij, eh chupaam chu'nchel i ninq'iij naakik'sam i aj Israel. Eh naa ruye'em i chikop naa ruq'ahteesjiik chi k'atoj mayiij k'amb'al kiib' panotob'il i aj Israel ruuk' i Dios, reh chi naa rukuyariik i kimahk inki. Re' i runinq'ijiik i elik chaloq Egipto

¹⁸Re' i QaJaaw Dios je' wili i xuq'or: Re' hin i nuq'or chi pank'amb'al rub'eeh i peet poh, naa taq aye'em chi amayiij jinaj imas wakax manlik wach i ruti'jolal, reh chi naa rukahniik chi saq paam i nupaat.¹⁹Eh re' i k'amal kib'eeh aj tiij, re' i rukik'eel imas wakax naa ruye'ariik chi mayiij chi riij i mahk naa ruch'ulem chuwach i rooq i paat, chuwach taqe i ruche'el i ru puertahiil, chupaam i kajtz'u'k reh i artaal, je' wo' chuwach taqe i ruche'el i ru puertahiil i ye'aab' wilik i koq ko chupaam.²⁰Eh paruwuuq q'iij reh i peet poh naa aye'em taq amayiij pahqb'al kuyb'al reh i ru mahk awach i xmahkunik chi ma' reht'al, oon xaxraaj chi xmahkunik. Ruuk' i re' naa taq asaqb'isam paam i nupaat.

²¹Eh chupaam i kajlaj rub'eeh i peet poh naa taq atoq'aam ninq'iij taq i na a'n ruum taq aweliik chaloq Egipto. Wuquub' q'iij taq naa ak'uxum i kaxlanwi'k ma' kojooj ta ch'amb'esb'al reh.²²Eh chupaam i q'iij re' re', re' ajaab'ees naa ruq'asam chi mayiij jinaj imas wakax chi pahqb'al kuyb'al ru mahk i reh, eh pahqb'al kuyb'al kimahk chu'nchel i tinamit Israel.²³Eh chuwach i wuquub' q'iij chi ninq'iij, re' ajaab'ees ju'jun imas wakax naa ruye'em chi k'atoj mayiij rajlaal q'iij, eh ju'jun i tentzun naa ruq'asam chi k'atoj mayiij chi nuwach i hin, eh ju'jun kaprax naa ruq'asam chi mayiij chuwach i wuquub' q'iij re' ruuk' manlik wach i kiti'jolal pahqb'al kuyb'al kimahk.²⁴Eh re' ju'jun chi chikop naa ruye'em chi mayiij naa ruye'em haa' juninaq nimaq lemeta chi naq wach trigo, eh naa ruye'em haa' i k'isiin ma' kijib' nimaq lemeta chi aseite.²⁵Eh noq naa rub'aan i wuquub' q'iij chi ninq'iij chi riij i rukorjiik i kok' paat, i naa rutohq'iik chupaam i ho'lajuuj rub'eeh i ruwuuq poh. Re' i ajaab'ees je' wo' re' k'ihaal i chikop naa ruye'em chi mayiij pahqb'al kuyb'al kimahk, je' wo' re' k'ihaal i mayiij chi naq'wach, je' wo' re' k'ihaal aseite naa ruye'em chi mayiij, inki.

¹Re' i QaJaaw Dios je' wili i xuq'or: Re' i puerta wilik i koq chupaam inilwik reje parelb'aal q'iij naa rutz'ahpiik chuwach i waqiib' q'iij paruq'ijil kamanik. Xa re' wo' naa rutehiik chupaam i hi'limb'al q'iij, eh noq naa runinq'ijiik i ak' poh.²Re' ajaab'ees naa rokiik i koq chi chii' puerta wilik reje chi' paat. Ar naa rupab'aam riib' wach i ruche'el i puerta noq re' taqe i k'amal kib'eeh aj tiij naa kiq'asam i k'atoj mayiij, eh i mayiij k'amb'al keh panotob'il wuuk' i hin, hin Dios. Eh chii' puerta naa kinkiloq'em pankomonil, eh naa wo' chik keliik cho ar xa re' la' koxq'eq naakitz'apam i puerta.³Eh chu'nchel i tinamit naa kinkiloq'em chi chii' i puerta re' re' chupaam i hi'limb'al q'iij, eh noq naakininq'ijeem i ak' poh.⁴Eh panhi'limb'al q'iij i ajaab'ees waqiib' rak'uun tentzun naa ruk'atam chi rumayiij, eh jinaj imas tentzun re' ruuk' taqe i manlik wach kiti'jolal.⁵Eh chi ruk'uliil i ju'jun chi imas tentzun juninaq nimaq lemeta chi naq'wach i tik naa ruye'em. Eh chi k'uliil i rak'uun tentzun xanik' pa' nimaal i neenchalik paruk'ux. Eh chi k'uliil i juninaq chi nimaq lemeta i wach i tik naa ruye'em i k'isiin ma' kijib' nimaq lemeta chi aseite.⁶Noq naa taq aninq'ijeem i ak' poh re' ajaab'ees naa ruq'asam chi mayiij i k'isa imas wakax, waqiib' i kok' tentzun, jinaj imas tentzun, manlik wach i kiti'jolal.⁷Eh noq naa ruye'em chi rumayiij i k'isa imas wakax, naa ruye'em haa' i juninaq lemeta chi naq wach i tik, je' wo' re' k'ihaal i naa ruye'em haa' ruuk' taqe i ju'jun chi imas tentzun. Eh re' i naa ruye'em haa' ruuk' taqe i kok' tentzun nik' pa' k'ihaal i neenb'aan ruye'ariik, naa ruye'em haa' i k'isiin ma' kijib' nimaq lemeta chi aseite.⁸Eh re' i ajab'ees ar naa rokiik i koq chupaam i b'eeh wilik chucheel i puerta, eh ar wo' chik nareliik chaloq.

⁹Eh noq naa rub'aan i ninq'iij, re' i tinamit naa kokiik chi chii' i puerta inilwik reje pantz'eet reh i rookb'aal q'iij, ar chik naakeliik reje chi chii' i puerta inilwik reje pansak'aaj reh i rookb'aal i q'iij. Re' taqe i naa kokiik i koq chi chii' i puerta inilwik reje pansak'aaj reh i rookb'aal i q'iij, ar chik naakeliik reje chi chii' i puerta inilwik reje pantz'eet reh i rookb'aal i q'iij. Ma' ar ta chik naakeliik chaloq aha' naa kokiik i koq.¹⁰Eh re' i ajaab'ees ar wo' naa rokiik i naa kokiik wii' tinamit, ar wo' naa reliik naakeliik wii' i tinamit.

¹¹Chupaam taqe i chi ninq'iij naa ruye'ariik chi mayiij i juninaq nimaq lemeta chi naq'wach i tik, chi kik'uliil i ju'jun chi imas wakax, eh je' wo' re' k'ihaal i naa ruye'ariik chi ruk'uliil i ju'jun chi imas tentzun. Eh re' i ju'jun chi kok' tentzun xanik' pa' k'ihaal i neenb'aan ruye'ariik. Eh re' i juninaq nimaq lemeta chi naq'wach i tik, naa ruye'ariik chi ruk'uliil i k'isiin ma' kijib' nimaq lemeta i aseite.¹²Eh noq re' ajaab'ees xanaa ruchaliik paruk'ux chi naa ruye'em jino'q i k'atoj chikop chi mayiij, oon jino'q i mayiij k'amb'al taq aweh panotob'il wuuk' i hin, hin Dios, neenteh i puerta inilwik reje parelb'aal q'iij, neeruq'asaj i rumayiij chi je' rukab' i rub'an pan hi'limb'al q'iij. Eh noq elinaq chik ar naa wo' chik rutz'ahpiik i puerta.

¹³Re' ajaab'ees re' re' rajlaal q'iij naa ruq'asam chi rumayiij i ju'jun chi kok' tentzun ju'jun haab' i wilik keh manlik wach i kiti'jolal, reh chi neenk'atarik chi mayiij chi nuwach i hin.¹⁴Raaj laal wahq'eq wuquub' nimaq lemeta chi naq'wach tik naa taq aye'em chi amayiij chi nuwach i hin. Eh jinaj lemeta chi aseite taq i naa ajalk'iim chinaah i ke'emaj trigo, re' taqe i mayiij re' re' xti koruman chi naa rub'aan.¹⁵Noq naa taq aq'asam chi k'atoj mayiij i tentzun komanaan, je' wo' taq i amayiij chi naq'wach taq atik, ruch'ihil i aseite pantaq wahq'eq taq naa aq'asam.

¹⁶Eh wila' re' i ajaab'ees xusiij rak'aal i rak'uun, eh re' i rak'uun, reh wo' chik taqe i rak'uun rixq'uun nee rukanaa' i reh.¹⁷Eh wila' re' ajaab'ees xuyeew rak'aal jino'q i rumoso, xa re' wo' reh noq k'ahchi' chi kamanik ruuk', eh noq naa wo' chik rumayam i kamanik ruuk' naa wo' chik ruq'asam reh i ajaab'ees. Xa re' wo' ak'al naa ruye'em keh i rak'uun rixq'uun naa rukahniik chi keh chi jumpech.¹⁸Re' reey i ruk'ul chi naa ruye'em kak'aal i rak'uun rixq'uun, xa re' la' re' ruuk' i rak'aal i reh naa ruye'em keh ma' naa ta ruq'uchum i kak'aal i nutinamiit. Reh chi ma' naa ta chik kielik reje pan kiye'aab' i nutinamiit, inki. Re' taqe i paat inch'aq wii' i mayiij wilik i koq ruuk' i rupaat i Dios

¹⁹Re' winaq xwil wach xiruk'am b'ila' reje chupaam i ookb'al wilik chucheel i puerta, eh xiruk'am i koq chupaam i kok' paat wilkeeb' reje pantz'eet reh i rookb'aal i q'iij re' i kuxisamaj chik i kiye'aab' i k'amal kib'eeh aj tiij. Eh xuk'uhtaaj weh jinaj i ye'aab' wilik reje parookb'aal i q'iij chi riij i paat.²⁰Je' wili i xuq'or weh: Re' taqe i k'amal kib'eeh aj tiij chupaam i paat wili naakichaq'sam i chikop naa kiq'asam chi mayiij, pahqb'al kuyb'al mahk. Ayu' wo' naakik'ilem inaq'wach i tik reh chi ma' nee ta nelik cho riij paat taqe i mayiij re' re'. Eh ma' naa ta kitz'a'am i tinamit ruum wilik rusantohiil, inki.

²¹Eh xiresaj wo' chik reje riij paat, eh xiruk'am reje chupaam i kajtz'u'k reh i tehlik chii' paat. Eh chupaam taqe i ju'jun chi rutz'ukaal wilik i ju'jun chi tehlik, je' rukab' i chi' paat.²²Eh re' taqe i tehlik reje chii' paat eliik wach kininqaal kikajcheel i juninaq b'ara runimaal kooq ho'lajuuj b'ara runimaal kiwach.²³Eh kotimaj kiij chi tz'aq chi kiju'junaal, eh paraa' taqe i ju'jun chi tz'aq wilik taqe i luk'b'al q'aaq'.²⁴Eh re' winaq je' wili i xuq'or weh: Re' taqe i k'amal b'eeh aj tiij chupaam taqe i ye'aab' wili naa kiq'asam i naa kik'amam cho chi kimayiij i tinamit, inki. Re' ha' inaasjik cho parupaat i Dios

¹Re' winaq xiruk'am b'ila' wo' chik reje chi chii' i rupaat i Dios. Eh xwilow chi jinaj i ha' inaasjik chaloq chi ri'sil i puerta xb'ehik chik reje rooq chi korkiil ireelb'aalq'iij, re' inilwik reje wii' i rupaat i Dios. Ar xqajik reje pansak'aaj reh i rupaat i Dios, pansak'aaj reje reh i artaal.²Eh xiresaj chaloq i wilik wii' i rupaat i Dios, ar xiresaj cho chi chii' i puerta inilwik reje pansak'aaj reh i rookb'aal i q'iij. Ko ar xponik qakotej imb'aan wii' okik chi riij wilik reje parelb'aal q'iij. Eh inwilow jinaj wo' chik i k'isa ha' inaasjik chaloq pantz'eet reh i rookb'aal i q'iij.

³Re' i winaq xooj b'ila' chik reje chi korkiil ireelb'aali q'iij jinaj i pajb'al k'ahaam ruyohq'eem, xupaj reje i hoob' siento b'ara, eh xirik'saj reje chupaam i rooq ha', xa ralaq wooq xponik i ruchamiil.⁴Eh xupaj wo' chik reje i hoob' siento b'ara, eh xirik'saj reje chupaam i rooq ha' nah nuch'ehk xponik i ruchamiil. Eh xupaj wo' chik reje i hoob' siento b'ara, eh xirik'saj reje chupaam i rooq ha', konah nutuuq xponik i ruchamiil.⁵Eh xupaj wo' chik reje i hoob' siento b'ara. Eh inwilow i rooq ha' xsutinik chi qaman nim ha' xiik' naah chamiil, ma' xnub'an ta chik ik'ik chupaam, xa pamux chik neemb'aan ik'ik chupaam.⁶Eh re' winaq je' b'ila' wili i xuq'or weh: Chakoj rehtaal chi korik aha' wilik taqe i xawilow, inki. Eh xirusutej wo' chik chaloq chi chii' i rooq ha'.⁷Eh xwilow wo' hoq chi k'ultar chi chii' i rooq ha' re' re' ma' k'isiin taqe i chee' wilkeeb' ar.⁸Re' winaq je' b'ila' wili i xuq'or weh: Re' rooq ha' wili ar ojik i rub'an parelb'aal q'iij inik'ik taqe ponoq paruyuq'ul Arabá, imponik chupaam i kamnaq palaw. Eh noq re' ha' wili inokik ar inkahnik chi holohik xasaq chik wach i ruha'iil.⁹Chu'nchel i chikop naa kiwihiik chupaam i nim ha' wili naa ruwihiik kik'achariik, eh ma' k'isiin i kar naa kiwihiik chupaam i palaw naa rokiik wii' i rooq ha' wili. Naa ruwihiik kik'achariik chu'nchel i chikop naa kiwihiik chupaam i nim ha' wili.¹⁰Eh chi chii' i palaw re' re' naa kiwihiik i aj karineel ar naa kitoq'aam reje En-gadi naakiponiik En-eglaim, ar naakichiqsam wach i kiya'l chopb'al kar. Eh ma' k'isiin i kar naa kiwihiik ar xata wo' jar b'uhr kiwach je' rukab' i wilkeeb' chupaam i palaw Mediterráneo.¹¹Re' taqe i tuhqel ha', eh re' taqe i ch'uwa' paam ye'aab' ma' naa ta rusaqb'iik kiwach naa la' kikahnik chi ehteesb'al aatz'aam.¹²K'ul chi chii' chi ju'juntar i nim ha' wili naakik'iik taqe i chee' ink'uxarik i wach, ma' naa ta ruq'ehb'iik i kixaq, ma' naa ta kimayam wachinik chi jumpech rajlaal poh naa kiwachiniik. Ruum re' i naa rut'aqsanik keh re' i rooq ha' naa resjiik cho parupaat i Dios. Eh re' i naakiwachum naa rukamaniik chi k'uxumb'al, eh re' i kixaq naa rukahniik chi iq'oom, inki. Re' taqe i k'ula't reh i kiye'aab' i tinamit Israel

¹³Re' i QaJaaw Dios je' wili i xuq'or: Re' taqe i wili i k'ula't reh i tinamit naakik'ulum chi kikooch i kab'laj chuq chi aj Israel. Re' taqe i riih rumaam i José ka'seht i naakik'ulum.¹⁴Re' hin xnuq'or chee xti korik keh taq aamaam awati't chi naa nuye'em keh i ye'aab' wili. Je' re' noq naa ach'aqam keh eliik wach ninqaal i naa aye'em keh i ju'jun ch'uq. Re' wili naa rukahniik chi kikooch.

¹⁵Je' wili nimaal rooq pantz'eet reh i rookb'aal i q'iij ar naa rutoq'aam reje chi chii' i palaw Mediterráneo, naa rik'iik ponoq chi chii' i tinamit Hetlón, je' wo' chi chii' taqe i tinamit Sedad.¹⁶Naa rik'iik reje chi chii' i Hamat, eh chi chii' i Berota, chi chii' Sibraim, re' taqe i ye'aab' wilkeeb' pank'ula't ruuk' Damasco, re' i Hamat, je' wo' hoq i Hazar-haticon, wilkeeb' pank'ula't ruuk' i Haurán.¹⁷Je' re' nimaal rooq pantz'eet reh i rookb'aal i q'iij ar naa rutohq'iik reje chi chii' i palaw Mediterráneo, eh naa ruponiik kopan k'ula't ruuk' Hazar-enán. Ar naa rukahniik pantz'eet reh i rookb'aal q'iij reh i tinamit Damasco, i tinamit Hamat.

¹⁸Eh re' ye'aab' parelb'aal i q'iij naa rutohq'iik reje pank'ula't ruuk' i ye'aab' Haurán, ruuk' i Damasco, konaa ruponiik chi chii' i tinamit Tamar chi chii' i kamnaq palaw, i runimaal rooq i nim ha' Jordán. Eh naa rukahniik chi k'ula't ruuk' i tinamiit Galaad, ruuk' i tinamit Israel.

¹⁹Eh re' i runimaal rooq i ye'aab' pantz'eet reh i rookb'aal q'iij, naa rutohq'iik reje chi chii' i ye'aab' Tamar, naa rik'iik ponoq chi chii' i nim ha' Meriba-cades, inchalik Egipto, naa ruponiik chi chii' i palaw Mediterráneo. Je' re' nimaal i naa rub'anam reje pantz'eet reh i rookb'aal q'iij.

²⁰Eh re' i runimaal i ye'aab' parookb'aal reje i q'iij ar nareliik chaloq chi chii' i nimlaj palaw Mediterráneo, naa ruponiik pank'ula't reh i Egipto, eh panookb'al reh i Hamat i runimaal.

²¹Re' aj re' i ye'aab' wili naakich'aqam chikiwach i kab'laj ch'uq chi aj Israel.²²Re' i ye'aab' wili naa rukahniik taq chi akooch, eh noq naa taq ach'aqam chawach i ye'aab' re' re' naa wo' aye'em taq keh i tokoom tinamit wilkeeb' taq chaxilak i wilik chik kak'uun kixq'uun. Naa taq akojom chi je' cho panatinamiit Israel xi-aasjik, eh naa wo' kikahnik chi awuch aj Israel taqe.²³Eh aha' pa' taq naa awihiik i hat chach'uhqal, wila' wilik taqe i tokoom tinamit taq chaxilak ar wo' naa taq aye'em kiye'aab', inki i QaJaaw Dios.

¹Re' wili i kib'ihnaal i ju'jun ch'uq chi aj Israel naa kiwihiik pansak'aaj reh i rookb'aal q'iij, naa reliik reje Hetlón, naa ruponiik Hamat, je' wo' ar Hazar-enán, eh ar i Damasco. Eh pansak'aaj reh i rookb'aal i q'iij ar Hamat naakik'ulum i kiye'aab' i riih rumaam i Dan.²Eh chucheel i riih rumaam i Dan naa kikahniik i riih rumaam i Aser.³Eh chucheel i riih rumaam Aser i naa kikahniik i riih rumaam i Neftalí.⁴Eh chucheel i riih rumaam Neftalí naa kikahniik i riih rumaam Manasés.⁵Eh chucheel i riih rumaam Manasés naa kikahniik i riih rumaam Efraín.⁶Eh chucheel i riih rumaam Efraín, naa kikahniik i riih rumaam Rubén.⁷Eh chucheel i riih rumaam Rubén naa kikahniik i riih rumaam i Judá. Eh re' i kiye'aab' i ju'jun ch'uq re' re' naa rutohq'iik reje chi korkiil ireelb'aalq'iij, naa ruponiik chi chii' palaw.

⁸Eh chucheel chi kiye'aab' i riih rumaam Judá naa rukahniik i chi ye'aab' reh i rupaat i Dios, naa rutohq'iik reje chi korkiil ireelb'aalq'iij, naa ruponiik chi chii' i palaw. Eh kab'laj miil ruuk' hoob' siento b'ara runimaal wach, re' i runimaal rooq eliik wach ruuk' i naakik'ulum i ju'jun ch'uq chi aj Israel. Eh re' i rupaat i Dios panyejaal i ye'aab' re' re' naa rukahniik, inki.⁹Eh je' wo' chik wili i xuq'or weh: Re' i ye'aab' naa rukahniik chi reh i QaJaaw Dios kab'laj miil ruuk' hoob' siento b'ara runimaal rooq, eh lajeeb' miil b'ara runimaal wach.¹⁰Eh chupaam i ye'aab' re' re' wilik naa rukahniik chi kiye'aab' i k'amal kib'eeh aj tiij. Pantz'eet reh i rookb'aal q'iij ruch'ihil i pansak'aaj reh i rookb'aal i q'iij naa apajam kab'laj miil ruuk' hoob' siento b'ara runimaal. Eh pareelb'aal q'iij ruch'ihil i rookb'aal q'iij naa apajam i hoob' miil b'ara, eh panyejaal i ye'aab' re' re' naa ruwihiik i rupaat i Dios.¹¹Eh naa akanaam chi keh i k'amal kib'eeh aj tiij, re' ruuk' taqe i riih rumaam i Sadoc. Re' taqe i xib'anik reh i nukamaj noq xin kiq'eb' i aj Israel, eh ma' xkiq'eb' ta kiib' i keh je' rukab' i xkian i k'amal kib'eeh aj tiij re' ruuk' taqe i riih rumaam i Leví.¹²Eh re' taqe i k'amal kib'eeh aj tiij ar naa kiwihiik chupaam i ye'aab' wilik rusantohiil, kanamaj chi keh, chucheel reje i kiye'aab' riih rumaam Leví.¹³Re' i kiye'aab' i aj Levíta naa rukahniik chucheel i kiye'aab' i k'amal kib'eeh aj tiij junch'uq, kab'laj miil ruuk' hoob' siento b'ara rooq, eh hoob' miil b'ara runimaal wach. Eh re' i naa rukahniik chi ruye'aab' i Dios, kab'laj miil ruuk' hoob' siento b'ara runimaal rooq, eh lajeeb' miil b'ara runimaal wach.¹⁴Re' ye'aab' re' re' q'e' holohik, ma' naa ta rub'anam chi naa kik'ayem k'isinoq, oon chi neenkijal wach. Eh ni xata neenkikanaa' reh i awach keh, ruum naa ruq'ahteesjiik reh i QaJaaw Dios.

¹⁵Eh re' i ruqox i ye'aab' kab'laj miil ruuk' hoob' siento b'ara runimaal rooq, eh kiib' miil ruuk' hoob' siento b'ara runimaal wach, ma' naa ta ruwihiik rusantohiil, ar neekik'acharik i tinamit, naa wo' ruwihiik i k'im ar, kiwa' i chikop, eh panyejaal i naa ruwihiik i tinamit.¹⁶Re' i naa rokiik wii' i tinamit kiib' miil ruuk' kiib' siento b'ara ruuk' lajeeb' roxk'ahl b'ara chi ju'juntar, eliik wach i runimaal rooq ruuk' i runimaal wach.¹⁷Eh chi junsuut i tinamit re' re' naa ruwihiik i k'im kiwa' taqe i chikop jinaj siento ruuk' hoob' ru ka'winaq b'ara runimaal wach chi ju'juntar.¹⁸Eh chi junsuut i tinamit naa ruwihiik jinaj i ye'aab', chucheel i ye'aab' naa ruwihiik rusantohiil hoob' miil b'ara runimaal rooq chi korkiil reje i reelb'aal i q'iij, je' wo' re' nimaal chi korkiil reje i rookb'aal i q'iij. Re' i ye'aab' naa rutikariik paam ruuk' i re' naa kik'uxlaam kiib' taqe i naakikamaniik pan tinamit.¹⁹Re' i naakikamaniik pan tinamit, ar naa kichaliik chupaam i ju'jun ch'uq chi tinamit Israel. Re' keh naakitikwiik paam i ye'aab' re' re'.²⁰Eh re' runimaal chu'nchel i ye'aab' naa ruwihiik rusantohiil naa ruye'ariik reh i QaJaaw Dios ruch'ihil i naa ruye'ariik chi ye'aab' tinamit kab'laj miil ruuk' hoob' siento b'ara wilik reh chi ju'juntar.

²¹Chu'nchel i ye'aab' naa ruwihiik rusantohiil naa ruye'ariik chi reh i QaJaaw Dios ruch'ihil i ye'aab' naa ruwihiik wii' i tinamit naa ruye'ariik reh i reey, ar naa reliik chaloq chi korkiil i reelb'aal i q'iij, naa rumponiik chi korkiil i rookb'aal q'iij, naa wo' ruponiik ko chi chii' i palaw. Kab'laj miil ruuk' hoob' siento b'ara runimaal wach, eh je' wo' re' i runimaal i rooq. Eh panyejaal i ye'aab' re' re' naa ruwihiik i rupaat i Dios.²²Re' i ye'aab' naa ruwihiik chucheel i kiye'aab' i riih rumaam i Leví, ruch'ihil i naa ruwihiik wii' i tinamit naa rukahniik chi reh i aajaab'ees. Eh re' i ye'aab' re' re' chucheel i kiye'aab' i riih rumaam i Judá, eh chucheel wo' i kiye'aab' i riih rumaam Benjamín.

²³Eh re' chik taqe i ju'jun ch'uq chi aj Israel pansak'aaj reh i rookb'aal i q'iij naakik'ulum i kiye'aab'. Ar wo' naakik'ulum i kiye'aab' taqe i riih rumaam Benjamín.²⁴Eh chucheel i riih rumaam i Benjamín, naa kikahniik riih rumaam i Simeón.²⁵Eh chucheel i riih rumaam i Simeón naa kikahniik i riih rumaam i Isacar.²⁶Eh chucheel i riih rumaam i Isacar, naa kikahniik i riih rumaam Zabulón.²⁷Eh chucheel i riih rumaam Zabulón naa kikahniik i riih rumaam i Gad. Re' kiye'aab' ju'jun ch'uq re' re' naa rutohq'iik reje chi korkiil i reelb'aal q'iij, naa ruponiik ko chi chii' i palaw.²⁸Eh pansak'aaj reh i rookb'aal i q'iij naakik'ulum wii' i kiye'aab' i riih rumaam i Gad ar naa rutohq'iik reje Tamar, naa rik'iik chi chii' i nim ha' Cades, chi chii' i nim ha' i inchalik Egipto, naa ruponiik chi chii' i palaw Mediterráneo.²⁹Re' taqe i ye'aab' re' re' naa taq ach'aqam keh i kab'laj ch'uq chi aj Israel, Nik' wach i xnuq'or taq aweh je' re' i rub'aan taq naa a'nam, inki i QaJaaw Dios. Re' taqe i ru puertahiil i tinamit Jerusaleem

³⁰Re' i tinamit naa rukootjiik riij chi tz'aq. Re' i runimaal wach pantz'eet reh i rookb'aal q'iij kiib' miil ruuk' kiib' siento b'ara ruuk' lajeeb' roxk'ahl b'ara naa ruye'ariik reh.³¹Eh pantz'eet reh i rookb'aal q'iij ixib' i ru puertahiil naa rokiik. Re' i ju'jun chi puerta re' i rub'ihnaal i ju'jun ch'uq chi aj Israel naa ruk'amam. Re' peet puerta Rubén i rub'ihnaal, re' i rukab' puerta Judá, re' i roox puerta Leví.³²Eh chi korkiil ireelb'aalq'iij kiib' miil ruuk' kiib' siento b'ara ruuk' lajeeb' roxk'ahl b'ara i naa ruye'ariik reh. Eh ixib' wo' i ru puertahiil naa rokiik. Re' i peet puerta José i rub'ihnaal, re' i rukab' puerta Benjamín, re' i roox puerta Dan.³³Eh pansak'aaj reh i rookb'aal i q'iij kiib' miil ruuk' kiib' siento b'ara ruuk' lajeeb' roxk'ahl b'ara i naa ruye'ariik reh. Eh ixib' wo' ru puertahiil naa rokiik re' peet puerta Simeón i rub'ihnaal, re' i rukab' puerta Isacar, re' roox puerta Zabulón.³⁴Eh chi korkiil i rookb'aal q'iij kiib' miil ruuk' kiib' siento b'ara ruuk' lajeeb' roxk'ahl b'ara naa ruye'ariik reh i tz'aq. Eh ixib' wo' ru puertahiil naa rokiik. Re' i peet puerta Gad i rub'ihnaal, re' i rukab' puerta Aser, re' roox puerta Neftalí.³⁵Re' i tz'aq naa rukootjiik wii' riij i tinamit b'elejeeb' miil b'ara i runimaal chu'nchel. Eh chupaam taqe i q'iij re' re' je' wili i naa rubíhnaam i tinamit re' re': Re' i QaJaaw Dios wilik ayu', tiko'q keh, inki weh.

Bible Society in Guatemala

https://app.library.bible/content/695aa4b9f902778f