Hibulu8
1Sulu nini lagi solu ewenemo, sulu kiwi olaibomo eweguba. Yesu E nine Soba Melone Guni Inolo nafulu labe. E hebene lagi, Kini Olaibone asefalu ailaiya inaloafealo ami yoba sabe.2Aufia, E hebene lagi, Godene Molo Noekene usu, dabalu molofe. Molo amo, Godene Gulugululo Seele Molo seale labe. Inolohe molo amo duluale. Aubale. Saminilo Ene dulu.3Soba melone guni inolo suniahe, Godefea ulu kegeleda soba meyone dia ano. Aulugulu, Soba Melone Guni Inolo Yesu Eda, ulu meyone kegele sefia mulu. Ehe ene meleba ulu melu.4Yesu E hebene lagi, Soba Melone Guni Inolo labe. E helefealu iwi ligiabiaga, amo E soba melo alebaiyale. Mau enebamo, soba melo inolo ili ama iwi alebaibu. Aufia, Yudane muguli saaba ufuluguba, ilihe ulu kegele nonoba Godefea melo.5Gulugululo molo ilida helefealu iwi soba melo dabalu moloba alebaibu amo, gulugululo molo seale hebene lagi labe, amone mimisililu dedeba moloba labe. Mosesehe gulugululo molomo seele diyo molosi, Godehe efea eweguba solu. “Ga galea labimo, Nahe gafea guluguluyone molo dimesi mimisililu walelu. Ga koleba molo disia, kegele sunia amogubasu molomale.”6Aulune, agamo, Yesuhe soba melo dabalu molofe amohe, soba melo dabalu ili noolo mololo amo wasolu. Mau enebamo, E olea inolo ligia, idele inolomo Godedai helegeba melesine eno hili sogolu. Eno hili amohe, eno amakelelu anomo wasolu dobu. Enebamo, eno hagaea amone aiba abiamo, nini Godene oloba huliale saaba ufuluiya ami goayobafe. Oloba huliale saaba ufulu amohe, samini saaba ufulu amo sunialu. Godefea guluguluyone seele molo7Enebamo, oloba huliale dabalu maugaba mololu ewe, nafulu koleba alolubiaga, amo oloba huliale dabalu hili no, Gode moloyone eno isaba alebaiyale.8Auluso, Godehe idele inolo heleba mololu amo baafia, ilidai oloba huliale dabalu hili mololu. Godene bugo amo iminisia, eweguba selelu dobu.
“Saminilo selesia,
‘Doma! Na alefasia, hilia uleno iminiba ufulumo holobagaeyobafe. Hilia amo, Nahe Isolaele mosomuda, Yuda mosomuda, ilidai oloba huliale dabalu hili moloyo.9Oloba huliale dabalu Na moloyobasu ewemo, oloba huliale dabalu samini ine enauwadali ilidai mololu amoguluale. Nahe ilifea oloba huliale dabalu samini molosiamo, Nahe ine sone gasiba disiamo, ili Isibi hele gadefia luba dibia holobagafia daalu. Auluso, Isolaele idele inolo ilihe Ne oloba huliale dabalu mololumo, fedoba sefia kuliba aasale. Ausi, Nahe ili golaba abulu.’
Saminilo auba solu.10Aufia, Saminilo saabia selesia,
‘Dufia, Nahe oloba huliale dabalu hili Isolaele idele inolodai moloyobasu. Amo eweguba. Nahe Ne sulu muguli ufulumo sunia ine asigifea diba ofelesia, Nahe Ne sulumo ine libofeada seleba ufiyo. Aufia, Na-mo ine Gode adesia, ilimo Ne mosomu idele inolo koleba miliyobafe.11Ausi, fogo amoyamo, idele inolo suniahe Na asigiba samodoyobafe. Aulune, inolohe ene damenedalifeada, ene elewodalifeada, haiba saabia no eweguba saabale miliyobafe. “Gili Saminilo asigima.” Mau enebamo, idele inolo wedinofia, abia buleda, ili sunia Na asigiba samodoyobafe.12Ausi, Nahe ili kanulusia, ine libo nugumalumo heesia galiyo. Aufia, Nahe ine wolumo saabia hiliseba obegeyale.’ ”13Sulu ewemo, Godehe oloba huliale dabalu hili mololu amone selefe. Sulu amo walesiamo, oloba huliale dabalu samini mololumo, ama amakelelu alolu dobu. Hili amohe amakelelumone fogo disi, ene dabalu saabia no moloyo male. Kegele uleno amakelelu adesia, ene dabalu malene, alebale asigilelo. Aulugulu, oloba huliale dabalu samini mololumo, amoda asigileyobafe.
“Saminilo selesia,
‘Doma! Na alefasia, hilia uleno iminiba ufulumo holobagaeyobafe. Hilia amo, Nahe Isolaele mosomuda, Yuda mosomuda, ilidai oloba huliale dabalu hili moloyo.9Oloba huliale dabalu Na moloyobasu ewemo, oloba huliale dabalu samini ine enauwadali ilidai mololu amoguluale. Nahe ilifea oloba huliale dabalu samini molosiamo, Nahe ine sone gasiba disiamo, ili Isibi hele gadefia luba dibia holobagafia daalu. Auluso, Isolaele idele inolo ilihe Ne oloba huliale dabalu mololumo, fedoba sefia kuliba aasale. Ausi, Nahe ili golaba abulu.’
Saminilo auba solu.10Aufia, Saminilo saabia selesia,
‘Dufia, Nahe oloba huliale dabalu hili Isolaele idele inolodai moloyobasu. Amo eweguba. Nahe Ne sulu muguli ufulumo sunia ine asigifea diba ofelesia, Nahe Ne sulumo ine libofeada seleba ufiyo. Aufia, Na-mo ine Gode adesia, ilimo Ne mosomu idele inolo koleba miliyobafe.11Ausi, fogo amoyamo, idele inolo suniahe Na asigiba samodoyobafe. Aulune, inolohe ene damenedalifeada, ene elewodalifeada, haiba saabia no eweguba saabale miliyobafe. “Gili Saminilo asigima.” Mau enebamo, idele inolo wedinofia, abia buleda, ili sunia Na asigiba samodoyobafe.12Ausi, Nahe ili kanulusia, ine libo nugumalumo heesia galiyo. Aufia, Nahe ine wolumo saabia hiliseba obegeyale.’ ”13Sulu ewemo, Godehe oloba huliale dabalu hili mololu amone selefe. Sulu amo walesiamo, oloba huliale dabalu samini mololumo, ama amakelelu alolu dobu. Hili amohe amakelelumone fogo disi, ene dabalu saabia no moloyo male. Kegele uleno amakelelu adesia, ene dabalu malene, alebale asigilelo. Aulugulu, oloba huliale dabalu samini mololumo, amoda asigileyobafe.
Wycliffe Bible Translators, Inc.