लेव्य26
1तुमू तुमरी केरता मुरती मा बाणावहो, एने एगदी गिड़ेल मुरती नाहते तुमरी केरता एगदो दिगोड़ मा उबराखाड़हो, एने तुमरा देसाम पुजा केरनेन केरता देगड़ान मुरती मा बाणावहो; काहाकाय मी तुमरो बोगवान यहोवा हे।2तुमू मारा विहेवणेन दिह्याह पालेन किरज्यो एने मारा चोखाला जागान आदार किरज्यो; मी यहोवा हे।3केदी तुमू मारा नेमा पोर चालहो एने मारा उकुमाह मानीन तान पालेन किरहो,4ताहार मी तुमरी केरता टेमा टेमा पोर पाणी पाडुह, खेत कामाय पाकाड़ी एने बुय ने जाड़े फोल्या केरती;5तुमरी कामाय निकालनेन काम ताह वोर चाली, जाह वोर अंगुर एकठा केरनेन टेम आवी एने अंगुर एकठा केरनेन ताह वोर चाली, जाह वोर पेरनेन टेम आवी, तेवी तुमरी फाय खाणेन केरता जुलूम रेय, एने तुमू तुमरा देसाम हाजे हुके रिहो।6मी तुमरा देसाम सान्ती आपुह, एने तुमू सान्ती से हुवहो एने कुण तुमूह बिवाड़ने नाय आवी; एने मी ता देसाम जीव लेण्या जेनवेराह रेणे नाय देव, एने तुमरा देसा माय तालवार नाय चाली।7एने तुमू तुमरा दुसमोनाह दितेन नाहाड़ देह, एने ता तुमरी तालवार केरीन माराय जाती।8तुमरे माय रेन पाच माणहे होव माणहाह एने होव माणहे दोह एजार माणहाह नाहाड़ती; एने तुमू तुमरा दुसमोनाह आरेवहो एने ताह तालवार केरीन मार टाकहो।9एने मी तुमरी उगे किव केरूह एने तुमूह होवटाला सोरावाला बाणावुह, एने तुमरी हिऱ्यो मार वायदाह मोजबुत केरूह।10एने तुमू मेलीन जुनाला दाणाह खाहो, एने नोवालो रेय तीबी जुनाला दाणाह जुगारने पोड़ी।11एने मी तुमरे विचीम मारो रेण्यो जागो बाणावीन मेलुह, एने मी तुमूह रेन आलेग नाय एव।12एने मी तुमरी विचीम चालुह एने तुमरो बोगवान रेह, एने तुमू मारा माणहे रिहो।13मी ते तुमरो बोगवान यहोवा हे, तुमू मिस्र देसाम गुलाम एता, पुण मी तुमूह मिस्र देसाम रेन निकाल लावो; पुण मी तुमरा खांदान जुवालाह तोड़ जुगार्यो, एने मी तुमूह पोशो गर्व से चालनारे बाणायो।14“केदी तुमू मारे नाय होमेलहो, एने ज्या आखा उकुमाह नाय मानहो,15एने मारी विदीह खाराब जाणहो, एने तुमरी आत्मा मार नेमाह नफरत किरे, एने तुमू मारा आखा उकुमान पालेन नाय किरहो, ताहार तुमू मारी वाचाह तोड़ दियेल हेते।16ताहार मी तुमरी हिऱ्यो ज्य केरूह; मतलब मी तुमूह गाबरावुह, एने जुलूम मोठो रोग एने हेऱ्या माय दुखाऱ्यो केरूह, एने न्यान वोजेसे तुमरा डोला जीन्वाल्लाह एय जाती, एने तुमरो मोन जुलूम नाराज एय। एने तुमरो बियारो पेरनो कामान नाय रेय काहाकाय तुमरा दुसमोन ती कामाय खाय जाती;17एने मी बी तुमरी विरूद एय जाह, एने तुमू तुमरा दुसमोनाह रेन आरवाय जाहो; एने तुमरा दुसमोन तुमरी उपेर आदिकार चालाड़ती, एने जेवी इखेह तुमूह दोवड़ावी बी नाय तीबी तुमू नाहहो।18“केदी तुमू ज्यु वातुन बाद बी मारो उकुम पालेन नाह केरतेह, ताहार मी तुमरा पापान केरता सात गुणा वोदार देन्ड आपुह।19एने मी तुमरी ताकेतीन गोमेंड तोड़ देह, एने तुमरी केरता जुगाह लोड़ान गेत एने बुयीह पितलान गेत बाणाव देह एने पाणी नाय पोड़ी।20तुमू केठीण मेहनेत किरहो, पुण ज्य केरीन काय बी फायदो नाय एय, तुमरो खेत कामाय नाय उगाड़ी एने बुय ने जाड़ा पोर फोल नाय लागती।”21केदी तुमू मारे विरूद चालतेस रिहो, एने मारो केणो नाय मानो, ताहार मी तुमरा पापान गेत तुमरी पोर उंजु सात गुणा तेकलीत टाकुह।22एने मी तुमरी विचीम जेंगली जेनवाराह मोकलुह, ता तुमरा सोराह तुमरी फाय रेन सांडाड़ ली जाती, एने तुमरा पालन्या जेनवाराह खेतेम केर देती, एने तुमरी गेणती गेटाड़ती, जाकेरीन तुमरी सेड़क्यु हुनाल्यु पोड़ जाती।23ओवता केदी तुमू न्यु वातु पोर बी मारी हिकवोणी केरीन नाय हुदेरहो, एने मार विरूद चालतेस रिहो,24ताहार मी तुमरी विरूद चालुह, एने मी यहोवा, तुमरा पापान केरता तुमूह सात गुणा देन्ड आपुह।25तुमू मारी वाचाह तुड़ेल हेते, केरीन मी तुमूह देन्ड आपुह, मी तुमरी विरूद सेना मोकलुह; तुमू वोचणेन केरता तुमरा गावाम जाहो, पुण मी ओहलो केरूह काय तुमरे माय बेमारी पोसरी, तेवी तुमरा दुसमोन तुमूह आरेवती।26जेवी मी तुमरी केरता एनान आदाराह सेटो केर देह, तेवी दोह बायकु तुमरा रोटा एकुस चुलाम रांदीन तोल तोलीन वाट देती; एने तुमू खाएन बी आफेरहो नाय।27“ओवता केदी तुमू ज्यान बाद बी मारे नाय होमेलहो, एने मारे विरूद चालतेस रिहो,28ताहार मी मारा नियावा माय तुमरे विरूद चालुह, एने तुमरा पापान केरता सात गुणा देन्ड आपुह।29एने तुमूह तुमरा बेटा एने बेटीख ने माह खाणे पोड़ी।30एने मी तुमरा पुजान उचाला जागाह खेतेम केर देह, एने मी तुमरी हाजाली गेंदिन आक्ठान वेदीह तोड़ देह, एने तुमरा देड़ाह तुमरी तुड़ेल मुरती पोर टाक देह; एने तुमू माहु जुलूम खाराब लागहो।31एने मी तुमरा गावाह उजाड़ देह, एने तुमरा चोखाला जागाह उजाड़ देह, एने तुमरी बेटीन हाजाली गेंदिह स्वीकार नाय केरू।32एने मी तुमरा देसाह हुनालो केर देह, एने तुमरा दुसमोन जा ताम रेतेह ता ज्यु वातुन वोजेसे बोंगलाती।33एने मी तुमूह बात बातीन देसाम वेरासेर केर देह, मी मारी तालवार खेचुह एने तुमूह खेतेम केरूह, एने तुमरो देस हुनालो एय जाय, एने तुमरा गाव उजाड़ एय जाती।34तेवी जोला दिह तो देस हुनालो पुड़ेल रेय एने तुमू तुमरा दुसमोनान देसाम रिहो, तोलाक दिह तो तान विहेवणेन टेमाह मानते रेय, तेवीस तो देस विहवी, मतलब विहेवणेन टेम मानते रेय।35जोला दिह तो हुनालो पोड़ रेय, तोलास दिह तो आराम केरी, मतलब जो आराम ताह तुमू ता रेणेन बुखेत तुमरे विहेवणेन टेमाम निह जुड़नो एय, तो ताह तेवी जुड़ी।”36एने तुमरे माय जा माणहे वोचेल रेती, ता तान दुसमोनान देसाम तान ईमोत गोवाड़ देती, ता आखी चिजी से बिती, ता वाराम उड़ताला पानटान गेत कावदेन नाहती, ता ओहला नाहती जीहे इखेह तालवार लेन तान पासाण पोड़ रेनोह।37जेवी एखेह तान पासाण केरनार निह एय तीबी सोमजो तालवारीह बिन ता एका दिहरा हेऱ्या रेन ठोकेर खाएन पोड़ते जाती, एने तुमूह तुमरा दुसमोनान सामने उब रेणेन कायच ताकेत नाय रेय।38तेवी तुमू देस देसान विचीम पोचीन खेतेम एय जाहो, एने तुमू दुसमोनान देसाम आरताय जाहो।39इह केरीन तुमरा सोरा तुमरा दुसमोनान देसाम तान पापाम सेड़ती, एने तान डायडायान गुनान वोजेसे ता तिहेच केरीन सेड़ती जिह केरीन तान डायडाया सेड़ेल।40“पुण केदी ता तान एने तान डायडायान गुनाह मान लेती, एने माने काय ता मारे विरूद इयेल एता, एने ता ज्य बी माने काय आमु यहोवान विरूद पाप किरेल हेते,41तानकेरता ता माने काय मी तान विरूद ईनो एने ताह तान दुसमोनान देसाम लावो, केदी ता माणहे तान काठो मोन नम्र एय जाय एने तान पापान केरता देन्ड स्वीकार केरती;42तेवी जी वाचा मी याकुबा हिऱ्यो बांदेल इतो, तीह मी एर केरूह एने जी वाचा मी इसाहाक हिऱ्यो एने जी वाचा मी अब्राहाम हिऱ्यो बांदेल इतो, तीह बी एर केरूह।43देस हुनालो रेय, देस विहेवणेन टेमान खुसी मोणावी, तेवी तुमरा वोचेल माणहे तान पापान केरता देन्ड स्वीकार केरती, ता हिकती काय ताह ज्यानकेरता देन्ड जुड़नो काय ता मारा नेमाह नाह मान्या, एने मारा उकुमान पालेन नाह किरेल एता, एने तान जीवाह मारी विदी से नफरत एती।44ओलो एणेन बाद बी, जेवी ता तान दुसमोनान देसाम बी रेती; मी ताह इह केरीन नाय सोडु, एने मी ता हिऱ्यो मारी ओहली नफरत नाय केरू काय ताह खेतेम केर देव, एने मारी ती वाचाह तोड देव; जी मी ता हिऱ्यो बांदिल इतो, काहाकाय मी तान बोगवान यहोवा हे!45पुण मी तान हाजान केरता तान डायडाया हेऱ्यी बादेल वाचाह एर केरूह; जाह मी दिहरी जातीन डोलान सामने मिस्र देसाम रेन निकालीन लावो काय मी तान बोगवान ठेराव; मी यहोवा हे।”46ज्यु विद्यु एने नेम एने कायदो यहोवा तान उगे रेन इस्राएल ने माणहान केरता सीने बोयड़ा पोर मुसान द्वारा ठेरायेल इतो, ता ज्यास हेते।
The Word for the World International