Лев21
1Господь Моисейлан каласен: «Иерей-влаклан, Ааронын эргыж-влаклан, ойло: шке тукым гыч колышо еҥ деке тӱкнен, иерей шкенжым ынже амырте.2Лач колышо эн лишыл родо-тукымжо деке тӱкнен, иерейлан шкенжым амырташ лиеш: тиде шке аваже, ачаже, эргыже, ӱдыржӧ, изаже але шольыжо, тыгак пеленже илыше марлан кайыдыме шочмо акаже але шӱжарже лийын кертеш.4Амыргаш огыл манын, шке калыкше гыч моло колышо еҥ деке иерей тӱкнышаш огыл. Тӱкна гын, тудо шкенжым амырта.5Иерей-влаклан ӱпыштым нӱжаш, пондаш мучашыштым тӱредаш да капыштым коркалаш ок лий.6Иерей-влак шке Юмыштын святой еҥышт лийшаш улыт да шке Юмыштын лӱмжым шӱктарышаш огытыл. Вет нуно Господьлан надырым, шке Юмыштлан киндым кондат, садлан нуно святой лийшаш улыт.7Иерей-влак яжар ӱдырамашым, намыслыме ӱдырым, тыгак ойырен колтымым марлан налшаш огытыл. Вет нуно шке [Господь] Юмыштын святой еҥышт лийшаш улыт.8Иерейым Юмылан ойырымо еҥлан шотло: тудо тыйын [Господь] Юметлан киндым конда. Тек тудо тыланет святой лиеш, вет Мый, тендам святитлыше Господь, святой улам.9Иерейын ӱдыржӧ шкенжым яжарланыме дене шӱктара гын, тудо шке ачажым шӱктара. Тыгай ӱдырым тулеш йӱлалтыман.10А иза-шольыж-влак кокла гыч эн кугу иерей – тудын вуйышкыжо елейым велыме, святой вургемым чиен кошташ святитлыме – шала ӱпан коштшаш огыл, вургемжым кушкедшаш огыл.11Шкенжым амырташ огыл манын, тудо нимогай колышо еҥ деке лишемшаш огыл, кеч тиде шке ачаже але аваже лийже.12Эн кугу иерей святой вер деч кораҥшаш огыл, шке Юмыжын святой вержым шӱктарышаш огыл, вет тудым Юмын елейже дене святитлен шогалтыме. Мый Господь улам.13Эн кугу иерей шкаланже пӧръеҥ тӱкыдымӧ ӱдырым [шке калыкше кокла гыч] марлан налшаш.14Тулык ватым, ойырен колтымым, намыслымым але яжарым тудо налшаш огыл. Эн кугу иерей шке калыкше гыч ӱдыръеҥым марлан налшаш:15калыкше коклаште тудо шке ончыкылык тукымжым шӱктарышаш огыл, вет Мый тудым святитлыше Господь [Юмо] улам».16Господь Моисейлан каласен:17«Ааронлан ойло: тудын тукымжо гыч нигӧ, кӧн капыштыже экшык лиеш гын, шке Юмыжлан киндым пуаш жертвенник деке нигунам лишемшаш огыл.18Нигӧат, кӧн капыштыже экшык уло, лишемшаш огыл: тиде – сокыр, окшак, важык чуриян, тӱрлӧ кужыт кидан але йолан,19тодылалтше кидан але йолан,20пӱгыр, чыки капан, чора шинчан, котыран, йоран, эмгатыме мунан.21Иерей Ааронын тукымжо гыч экшыкан ик еҥат Господьлан надырым кондышаш огыл. Тудын экшыкше уло, сандене тудо шке Юмыжлан киндым пуаш жертвенник деке лишемшаш огыл.22Тудо шке Юмыжын киндыжым – святой да поснак святой надыр-влакым – кочкын кертеш,23но экшыкшылан кӧра пӱрдыш декат, жертвенник декат ынже лишем, Мыйын святой верем ынже шакшыле. Мый нуным святитлыше Господь улам».24Моисей тидым Ааронлан, тудын эргыж-влаклан да уло Израиль калыклан увертарен.
Institute for Bible Translation, Finland