Лев22
1Господь Моисейлан каласен:2«Аарон ден эргыж-влаклан ойло: тек нуно Израиль калыкын Мылам кондымо святой надыр деке тӱткӧ лийыт, Мыйын святой лӱмем огыт шӱктаре. Мый Господь улам.3Нунылан каласе: кызыт да ончыкыжымат тендан тукымда гыч кӧ ару огыл улмыж годым Израиль калыкын Господьлан пуымо святой надырже деке лишемеш, тудо Мыйын чурием ончыч пытарыме лийшаш. Мый Господь, [тендан Юмыда,] улам.4Аарон тукым гыч кӧ проказе чер але йоген лекмаш дене орлана – эрналтмешкыже святой надырым кочшаш огыл. Кӧ колышо еҥ деч ару огыл лийше иктаж-могай арвер деке тӱкна, кӧн нӧшмыжӧ йоген кая,5кӧ ару огыл тыгыде чонан деке тӱкна да тидлан кӧра ару огыл лиеш, кӧ иктаж-мо шотышто ару огыл улшо еҥ деке тӱкна да ару огыл лиеш –6тыгай деке тӱкнышӧ еҥ кас марте ару огыл лиеш. Вӱд дене мушкылтмешкыже, тудо нимогай святой надырым кочшаш огыл.7Кече шичмеке тудо ару лиеш, тунам тудо святой надырым кочкын кертеш: вет тиде – тудын кочкышыжо.8Шкенжым амырташ огыл манын, иерей колышо вольыкым, янлык кушкед пуштмо вольыкым кочшаш огыл. Мый Господь улам.9Святой надырым шакшылымылан кӧра титакыш пураш да колаш огыл манын, тек иерей-влак Мыйын каласыме йӱлам-влакым шуктен шогат. Мый нуным святитлыше Господь [Юмо] улам.10Ик йотъеҥат святой надырым кочшаш огыл. Иерей дене илыше йот еҥат, тарлыме еҥат тудым кочшаш огытыл.11Но иерейын тӱлен налме кулжо тудым кочкын кертеш. Тыгак иерейын суртыштыжо шочын-кушшо-влак тиде надырым кочкын кертыт.12Иерейын ӱдыржӧ иерей огыл тукым еҥлан марлан лектеш гын, тудлан надырым кочкаш ок лий.13Иерейын ӱдыржӧ тулык вате але ойырен колтымо да эше йочадыме гын, шке ачажын суртышкыжо самырык годсо семынак илаш пӧртылмекше, ачажын киндыжым кочкын кертеш. Ик ӧрдыж еҥат тиде киндым кочшаш огыл.14Кӧ святой надыр гыч йоҥылыш иктаж-мом кочкеш, иерейлан тыгаяк святой надырым пуышаш да тушко эше ик визымше ужашым ешарышаш.15Иерей-влак израиль эрге-шамычын Господьлан кондымо святой надырыштым шакшылышаш огытыл.16Святой надырым моло израиль эргылан кочкаш эрыкым пуымышт дене иерей-влак нуным титакыш ынышт пурто. Мый нуным святитлыше Господь улам».17Господь Моисейлан каласен:18«Ааронлан, тудын эргыж-влаклан, уло Израиль калыклан ойло: израиль эрге-шамыч але нунын коклаште илыше йотъеҥ-влак кокла гыч иктаж-кӧ йӱлалтен пуымо надырым Господьлан сӧрымӧ почеш але шке кумылын конда19да тидын дене Юмо деч поро кумылым сулен налнеже гын, тек надырже экшыкдыме узо вольык – ӱшкыж, тага, казатага – лиеш.20[Господьлан] экшыкан нимогай вольыкым ида кондо. Тыгай надыр Тудын поро кумылжым сулен ок нал.21Кӧ сӧрымӧ почеш але шке кумылын, [але пайремда годым] Господьлан татулык надыр шотеш шолдыра але тыгыде вольыкым конда гын, тудыжо экшыкдыме, Юмылан келшыше лийже. Вольыкын нимогай экшыкше лийшаш огыл.22Сокыр, эмгатыме, иктаж-могай ситыдымашан, мугылян, котыран, йоран вольыкым Господьлан ида кондо. Тыгайым Господьын жертвенникышкыже надыр шотеш ида пу.23Утыждене кужу але кӱчык йолан ӱшкыжым але тагам шке кумылын кондымо надырлан пуаш лиеш, но сӧрымӧ надырлан тыгай вольык келшен ок тол.24Вольыкын муныжо лаптыртыме, сусыртымо, кӱрлын налме але пӱчкын лукмо гын, тудым Господьлан ида кондо. Шке мландыштыда тыгайым ида ыште.25Шке Юмыланда пуаш манын, тыгай вольыкым йот калык деч ида нал, вет нуно эмгатыме але экшыкан улыт. Тидын дене те Юмын поро кумылжым сулен огыда нал».26Господь Моисейлан каласен:27«Презе, пача але казапача, шочмекше, аваж дене пырля шым кече лийшаш, а кандашымше кече деч вара тудым Господьлан надыр шотеш кондаш келшен толеш.28Но ушкал ден тудын презыжым, шорык ден пачажым ик кечынак ида шӱшкыл.29Господьлан тауштымо надырым пуынеда гын, надырда Юмын поро кумылжым сулен налже манын, тудым кӱлеш семын кондыза.30Надырым тудо кечынак кочса, эр марте тиде шыл кодшаш огыл. Мый Господь улам.31Мыйын кӱштымаш-влакем шуктен шогыза. Мый Господь улам.32Израиль калык коклаште Мыйын святой улмем пагалышт манын, Мыйын святой лӱмем ида шӱктаре. Мый тендам святитлыше Господь улам.33Тендан Юмыда улмем ончыкташ манын, Мый тендам Египет мланде гыч луктынам. Мый Господь улам».
Institute for Bible Translation, Finland