Revelation8

1Xók Trưưu Akóón plók kanal let kiêr đu tapól, ve rau parngau bha-ip dhiq pleng kalóóng mơ m'pơng tangêi.2Hayơq aku lêi tapól chanak dhơn pleng, đu piđó dyương toom mat Yaang Pleng, lơq tapól beq karyóól bâân pađơơp đóng piđó.
3Mưi dhơn pleng lââng tơk, kadhâng manoh dhaak palơq vaang, dyương dhiq baang bhanuôih, lơq bơk dhaak bâân đóng leq dhơn pleng achêk đóng ve chóóm tapôông mandrươh palơq nôôq paraaq gavơh nhan ưng dyóp ngaai manưih huuiq dhiq baang bhanuôih palơq vaang dhiq toom tanơơt.4Gayươk dhaak, kung palơq paraaq gavơh nhan ưng nôôq manưih đu huuiq, tââq têi chanak dhơn pleng yuur par toom mat Yaang Pleng.5Dhơn pleng pei manoh dhaak, lơq buur bing ađó palơq óih ưng baang bhanuôih, hayơq m'peq leq katiêk, nek ve nôôq dhariêng grơm dha-ơr, dhariêng grưng grưng, kamlaaq xablach, palơq dha-ơr katiêk.
6Hayơq tapól dhơn pleng ve tapól beq karyóól ravang paróóng chênh ađêi đóng piđó ve chóóm plong.
7Dhơn pleng đu tarnââp plong karyóól, nek ve bó dhơl lơq óih taluk palơq ahaam n'toh leq katiêk, hayơq mưi phơn pe katiêk bâân róh sek, mưi phơn pe n'lóóng póóih bâân róh lưch, lơq tabhơt bhơơi taviêng bâân róh lưch.
8Dhơn pleng đu bơơr plong karyóól, nek rauriq ađek thê kơi libêêq kakóóng gamak róh garưq kalóóng óih bâân m'peq leq taxiiq, hayơq mưi phơn pe ưng taxiiq vaaih xar ahaam,9mưi phơn pe akóón adhah ve parmông kalóóng taxiiq maar chêt, lơq mưi phơn pe bhuông galaai bâân geh pahư.
10Hayơq dhơn pleng đu pe plong karyóól, nek mưi beq chatur gamak bhlơng, róh garưq kơi par-aang dharương, n'tôq tââq têêh pleng, lơq ađó n'tôq leq dhiq mưi phơn pe karuung bhaxiing lơq dhiq tóm đơơk.11Achak ưng m'beq chatur ađek bâân đóók nek Janươu Atang. Mưi phơn pe nôôq parloong đơơk vaaih xar janươu atang, lơq bơk manưih chêt taai tââq đơơk ađô taai piđó ơi vaaih xar atang.
12Hayơq dhơn pleng đu puôn plong karyóól, hơq mưi phơn pe mat tangêi bâân tam bhiiq, kung palơq mưi phơn pe mat bharương lơq mưi phơn pe sôôq chatur xamenh, buôn đóng mưi phơn pe ưng piđó bâân kanam kajeem, hơq m'pơng tangêi palơq mưi phơn pe ưng ađó kah ve taklaaq brương, lơq m'pơng hayum kung kơi achêk.
13Hayơq aku lêi, lơq aku xâng mưi panong achim kalaang adhuuk dyơq par dhiq m'pơng pleng yuur xuul karơ dhariêng: “Ayô xarngaat, ayô xarngaat, ayô xarngaat đóng nôôq đu mamông n'raal katiêk, xók biêh dyơq nôôq dhariêng karyóól ưng pe chanak dhơn pleng ravang yuur plong.”

FAR EAST BROADCASTING COMPANY

https://app.library.bible/content/15a813fef7fefb05