Revelation7

1Lơh tarnêêng ađek, aku lêi puôn dhơn pleng dyương dhiq puôn n'tól katiêk, jư tamưng puôn paloong adhiiq ưng katiêk đóng adhiiq óóq pruung dhiq katiêk, hamôôiq dhiq taxiiq, môôiq dhiq dhađó n'lóóng ng'kuông.2Hayơq aku lêi mưi dhơn pleng lââng yuur bhral tââq charhóóng mat tangêi blo, dyơq kadhâng kanal ưng Yaang Pleng taluôn mamông. Ađó karơ dhariêng dhaloong puôn chanak dhơn pleng, nek nôôq chanak đu mataai raman ơi bâân đóng leq piđó đóng têêng pahư katiêk lơq taxiiq,3kơi ađô: “Óóq têêng pahư katiêk, môôiq taxiiq, hamôôiq n'lóóng ng'kuông, patơk xók nôôq he ơi ve chóóm tabóq kanal nôôq dhơn ratơơq ưng Yaang Pleng nôôq he bóq dhiq maang ưng piđó.”4Aku xâng sôôq manưih bâân tabóq kanal nek mưi hariêng puôn jêt puôn ngaan, nek nôôq manưih bâân tabóq kanal tư tââq dyóp kabhuh akóón anaaq I-sơ-ra-êên:5tââq kabhuh Ju-đa, majêt bơơr ngaan manưih ơi bâân tabóq kanal; tââq kabhuh Ru-bêên, majêt bơơr ngaan; tââq kabhuh Gaat, majêt bơơr ngaan;6tââq kabhuh A-se, majêt bơơr ngaan; tââq kabhuh Neep-ta-li, majêt bơơr ngaan; tââq kabhuh Ma-na-se, majêt bơơr ngaan;7tââq kabhuh Si-mê-ôôn, majêt bơơr ngaan; tââq kabhuh Lê-vi, majêt bơơr ngaan; tââq kabhuh I-sa-ka, majêt bơơr ngaan;8tââq kabhuh Sa-bu-lôôn, majêt bơơr ngaan; tââq kabhuh Jô-seep, majêt bơơr ngaan tââq kabhuh Bêên-ja-miin, majêt bơơr ngaan manưih ơi bâân tabóq kanal.
9Lơh nôôq tarnêêng ađek, aku chalaang lêi, lơq tôôh, mưi tanóói manưih ganơr bơk bơơi kah ngaai ve chóóm yaap đuôh tanóói ganơr achêk, bhral tââq dyóp katiêk, nôôq dhong nooi, nôôq dhanuôr, lơq dhariêng paraaq, dyơq dyương toom tanơơt lơq toom Trưưu Akóón, xók bâân xơp aau yaal bhóók, lơq nôôq đóóng tââm chalón kalóóng têi piđó,10hayơq piđó lalơu karơ dhariêng, kơi ađô:
“Rau paq jóói mađó lơq Yaang Pleng nôôq he, Yaang dyơq jaq dhiq tanơơt, lơq mađó lơq Trưưu Akóón!”
11Kơi ađek nek tabhơt dhơn pleng dyơq dyương praang tanơơt palơq nôôq takóh bhươl lơq puôn panong akóón adhah maar chip mat ađêi leq toom tanơơt hơq bhuôih kakoh Yaang Pleng,12ââi:
“A-meen! Rau babóóch haanh, cha-iil tabah, tabech galang, ma-ơơn, bhi chap mataai karơ, palơq praan karơ maar chô leq Yaang Pleng nôôq he patơk nh'chró taluôn luôn A-meen.”
13Hayơq mưi kalóóng nôôq takóh bhươl pơơh paraaq palơq aku, kơi ađô: “Nôôq manưih bâân xơp aau yaal bhóók tôôh piđó nek ngaai, lơq piđó n'tââq bhral?”14Aku móón palơq ađó: “Chuôq aku ơơi, Amei n'nal aq.” Hayơq, ađó achêk praaq palơq aku: “Ađôk nek nôôq manưih ơi bhral tââq Ganơt Bơk Jarnah, piđó ơi pươh aau yaal ađêi, lơq têêng piđó xar bhóók kalóóng ahaam Trưưu Akóón.15Ơi taai rau ađôk, piđó bâân tơơt toom tanơơt Yaang Pleng,tangêi hayum bhuôih haanh Yaang Pleng kalóóng đong Ađó.Lơq Yaang tơơt dhiq tanơơt e têêng pơơq dhiq m'piing piđó.16Piđó e kah xâng ha-ul dyơq, kung e kah xâng rahaal dyơq,mat tangêi hamôôiq dhơ ganah huôl puih dhađó,e kah mơ chóóm boh róh piđó,17taai Trưưu Akóón, Yaang tơơt pa-ô m'pơng tanơơt, e ban jư piđó;Ađó e chơơng đââng piđó tơk tóm đơơk parmông,lơq Yaang Pleng e dyuut góh bhơt dyóp đơơk mat tââq mat piđó.”

FAR EAST BROADCASTING COMPANY

https://app.library.bible/content/15a813fef7fefb05