Matthew17
1Drơu hngơy atêq, Lôôk Jê-xu jarooy tyauq Phi-e-rơ, kung Ja-kơ ji Jăng, ma oh kơy, yôôch Kadraq jarooy đêh oot kung mamuuyq tok truh muuyq ngok đoot yơơt.2Kaveeh pi gôk ku Kadraq jah tađôôy kangưưr oot, ji mot Kadraq xaraar tađnah đaji mot hngơy, măn aau Kadraq vlôh tađnah ploat đaji xaraar tađnah.3Ji 'yo hơq, Môi-se kung Ê-li rama vlôh kangưưr oot, athêêk tajauq dii Kadraq.4Tuôôy nưq, tuôôy tơơl apok, Phi-e-rơ tơơl dii Lôôk Jê-xu: “Kuh Lôôk, dik laa tolh ka haay xôq măn aduq neq. Atoh thơy trôôch, gô hnoq panưk aduq neq pe poop rap — muuyq ka thơy, muuyq ka Môi-se ji muuyq ka Ê-li.”5Đom tuôôy kơy đong măn đnooy, yôôych 'yo hơq, muuyq đum kluk tađnah klưng đơ klum oot, ji 'yo nee, muuyq apok xanoh xing aduq đum kluk, đaneq: “Neq laa Koot xung xiaq ku Gô, đơu Gô thier hlah xuum aduq Koot. Dayh tameng tyauq Koot nưq.”6Tuôôy tameng yôôch, khơl xatyauq kul kanăp mot ji thier raa yôq varaal.7Yôôch Lôôk Jê-xu, atêq tuôôy hlê jeq ji vêq muut oot, heq đnooy: “Dayh dưk tok ji te yôq varaal.”8Bơh tuôôy 'ngơơk mot oot tok, oot leh hloq kơyq đêh vlôh muuyq dro Lôôk Jê-xu.9Đong tuôôy oot xing tol đoot hooy pôôt, Lôôk Jê-xu patăk dăt oot, đaneq: “Te taboon hlê varơuq heq hloq dii kơyq dong truh tuôôy Koot Manih heq xing aduq kaxêêt riirh hlê.”10Khơl xatyauq nưq vôôch Kadraq, đaneq: “Anưq vii aleq khơl thơy pato ganuun đnooy laa Ê-li duh pheq truh adroyq?”11Tuôôy nưq, tuôôy tơơl apok, Kadraq đnooy: “Tabơh Ê-li pheq truh ji hnoq ta'meq hlê tôôy varơuq.12Bơh thơy đnooy dii oh ay đaneq Ê-li heq truh yôôch, ji oot heq be 'yo vlôh kơy. Tađôôy muut đnư, oot dơơp đuh dêq tôôy kajoq oot trôôch dii kơy. Kung muuyq đanưq, Koot Manih jeq pheq chiuq pơl xing oot.”13Tuôôy nưq, khơl xatyauq hlolh đaneq Kadraq đnooy dii oot truh Jăng Bap-tit.14Tuôôy heq truh kung bing manih karôp, muuyq dro khơl kanau heq truh jeq Kadraq, kul takuul pôôt kangưưr Kadraq15ji tơơl: “Lôôk lơơy, biit angơuq rơy koot kanau gô, vii ni tavơh bingq adruôy ji biq pơl paq ik, vii ni 'ngưng gưlh muut ôôlh, ji 'ngưng gưlh pôôt daak.16Gô heq jarooy ni truh ka khơl xatyauq ku Kadraq, bơh oot leh e paraat payơh ik ka ni.”17Tuôôy nưq, tuôôy tơơl hlê, Lôôk Jê-xu đnooy: “Rong nooy be tuôq ji xơk tauq hơq, gô hnoq măn dii êêp dong truh tuôôy leq? Gô hnoq tachiuq êêp dong truh dong leq? Dayh xagook ôn nưq truh đnen ka gô.”18Lôôk Jê-xu xanoh toah ni, yôôych kamuuych hooy vlôh klơlh ôn nưq, ji ôn jah payơh xing wat nưq.19Atêq nưq, atêq tuôôy tavơh đêh dii Lôôk Jê-xu, khơl xatyauq tơơl: “Vii kakơq kajoq 'wot leh ik druyh ni vlôh ik?”20Yôôch Kadraq đnooy dii oot: “Kơq xuum tuôq ravoch ku oh ay. Vii dong dik, thơy đnooy dii oh ay, atoh oh ay e xuum tuôq đaji muuyq kalook kaxeq avơy, yôôych oh ay hnoq dăt ka ngok đoot neq: ‘Dayh katơơk tok xing aduq neq vlôh aduq hơq,’ yôôych ni hnoq katơơk hooy, ji hnoq be e kajoq laa be ik đôôyq dii oh ay.”21[Bơh kaluh kamuuych neq be biq druyh vlôh atoh leh bơơn varơuq apôôy ji deek xa.]22Tuôôy nưq, đom tuôôy oot anguk mamuuyq hlê aduq Ga-li-lê, Lôôk Jê-xu đnooy dii oot: “Koot Manih jeq biq atăq muut ti khơl drơy,23ji oot hnoq păk kaxêêt Kadraq hlơơp, yôôch muut hngơy thưq pe, Kadraq hnoq jah khienq riirh hlê.” Khơl xatyauq vlôh thier raa hlu rơu.24Tuôôy nưq, tuôôy oot heq hooy truh theng Ka-bê-na-um, khơl dro xok xơu hnhư hơu truh kung Phi-e-rơ ji vôôch: “Thơy ku ay leh noop xơu hnhư hơu ih?”25Kơy tơơl: “E.” Ji tuôôy muut đom hnhư yôôch, Lôôk Jê-xu heq tok apok dii kơy adroyq, đaneq: “Si-môn, ay biit kajoq nưq? Khơl vuua tol vari xok phiq long xơu xing kơyq? Xing koot xau oot long xing dro kadrơy?”26Atêq tuôôy tơơl: “Xing adro kadrơy”, Lôôk Jê-xu đnooy dii kơy: “Anưq koot xau yôôych jah leh huq.27Bơh xôq haay leh dơơp gưlh lôp ka oot, yôôych tuôôy hooy vlôh tahli, ay dayh qwel ahlaay ji duuy poop ka tok adroyq dik. Atêq tuôôy pahah huuy ni vlôh, ay hnoq hloq muuyq xiêk-lơ. Xok jah jêêt nưq yôôch, dayh noop ka oot tyauq dii phon ku thơy ji ay.”
FAR EAST BROADCASTING COMPANY