Matthew16
1Atêq tuôôy truh jeq, khơl manih Pha-ri-si ji Sa-đu-sê — atoh 'yo Kadraq — heq vôôch Kadraq kahnoq ka oot muuyq dơuq akêh xing plêêk.2Bơh tuôôy tơơl hlê, Kadraq đnooy dii oot: [“Tuôôy truh rayôôp klôôy, êêp kơy đnooy: ‘hngơy plêêk kaxay, vii plêêk dôôp.’3Xaroq meel hngơy neng yôôych đnooy: ‘hngơy plêêk khiel jit, vii plêêk dôôp, u jaluk.’ Tabơh êêp kơy xet kahra ik phôôm plêêk, bơh leh e paraat xet truh kaluh dơuq hlêêl ku đơơy xanưm.”]4“Muuyq rong nooy xơk tauq ji apuq atrăp akhiim axek dơuq akêh, bơh dơuq akêh hnoq be jah kahniq ka ni, đêh vlôh dơuq akêh ku Jô-na.” Ji tuôôy ka'lăk oot hlê yôôch, yôôych Kadraq hooy klơlh.5Măn khơl xatyauq yôôych heq tawol adrơk tyauq tôôp, atêq tuôôy hooy truh gah pi hơq.6Tuôôy nưq, Lôôk Jê-xu đnooy dii oot: “Dayh rơơt rol ji văch 'yo truh tape ku khơl manih Pha-ri-si ji Sa-đu-sê.”7Anưq bơh, oot kưq tayaat tagêh dii mamuuyq đaneq: “Nưq laa vii haay heq leh adrơk tyauq tôôp.”8Bơh tuôôy xet varơuq neq, Lôôk Jê-xu đnooy: “Khơl dro axit xuum tuôq hơq, aleq oh ay tayaat tagêh dii mamuuyq đaneq nưq laa kơq haay leh e tôôp?9Oh ay kung koq lưp hlolh ji kung leh văch dăp poop tôôp ka dăp ravơu dro yôôch oh ay heq tôôch anguk jah taleq vuk atar ih?10Long pơh poop tôôp ka poot ravơu dro, yôôch oh ay heq tôôch anguk jah taleq vuk atar ih?11Dơơp đaleq đơu oh ay leh hlolh ik đaneq thơy heq be đnooy dii oh ay truh tôôp? Bơh dayh văch 'yo truh tape ku khơl manih Pha-ri-si ji Sa-đu-sê.”12Tuôôy nưq oot hlolh xet đaneq Kadraq leh dăt oot văch 'yo truh tape ku tôôp, bơh laa truh trôôk pato ganuun ku khơl manih Pha-ri-si ji Sa-đu-sê.13Tuôôy nưq, atêq tuôôy hooy truh dih dêh theng Sê-sa-rê Phi-lip, Lôôk Jê-xu heq vôôch khơl xatyauq kadraq, đaneq: “Khơl drơy đnooy Koot Manih laa kơyq?”14Yôôch oot tơơl: “Muuyq sôôq dro đnooy laa Jăng Bap-tit; măn muuyq sôôq đnooy laa Ê-li; đơu sôôq kadrơy yôôych đnooy laa Jê-rê-mi long muuyq đom khơl hnhư hlit.”15Kadraq đnooy kung oot: “Măn oh ay đnooy thơy laa kơyq?”16Anưq laa, tuôôy tơơl hlê, Si-môn Phi-e-rơ tơơl: “Thơy laa Lôôk Wơơt Dêh, Koot Kơy Plêêk hloay riirh.”17Tuôôy nưq, tuôôy tơơl hlê, Lôôk Jê-xu đnooy dii kơy: “Si-môn, koot Jô-na, ay e vanong dik, vii be aalq xăk ji vahaap heq kahnoq ka ay, bơh laa Vaq ku thơy tol daak plêêk.18Măn thơy kung đnooy dii ay đaneq ay laa Phi-e-rơ, ji tol talaat phơu neq, thơy hnoq xơy panưk tayuup vah ku thơy, ji kaluh 'mok ku âm phuh hnoq be tachơơl hlê ik tayuup nưq.19Thơy hnoq pahnăp ka ay kaluh gay kal ku daak dêh daak plêêk, long varơuq kajoq ay vek 'laarq vari yôôych hnoq jah vek tol daak plêêk, ji long varơuq kajoq ay luh 'laarq vari yôôych hnoq jah luh tol daak plêêk.”20Atêq nưq, Kadraq leh ăm pheep khơl xatyauq xôq oot leh đnooy dii kơyq đaneq Kadraq laa Lôôk Wơơt Dêh.21Xing kawat nưq, Lôôk Wơơt Dêh Jê-xu xarôp ăm khơl xatyauq ku kadraq xet đaneq Kadraq duh pheq hooy truh Jê-ru-sa-lem, ji chiuq 'ngưng pơl dal xing aduq khơl draq, khơl thơy tơơk tưp kôt kung khơl thơy pato ganuun, yôôch biq păk kaxêêt ji jah khienq riirh hlê muut hngơy thưq pe.22Ji atêq tuôôy jarooy Kadraq vlôh muuyq panưh, Phi-e-rơ xarôp trek Kadraq, đaneq: “Lôôk lơơy, Kơy Plêêk kahnoq xuum biit angơuq dii thơy. Varơuq nưq hnoq be e leq xalih truh ka thơy.”23Bơh wih katoor hlê, Kadraq đnooy dii Phi-e-rơ: “Sa-tan hơq, dayh chuh klơlh pi têq Gô! Ay laa kuk phơu dơơp xatôôlh jôôk ka thơy, vii ay leh xôq xuum truh kaluh varơuq ku Kơy Plêêk, bơh laa kaluh varơuq ku khơl drơy.”24Atêq nưq, Lôôk Jê-xu đnooy dii khơl xatyauq ku Kadraq: “Atoh kơyq trôôch hooy tyauq atêq thơy, yôôych dro nưq pheq chôôyq ka'lăk kadih xăk, kung hlôôy gay charăk ku xăk ji tyauq thơy.25Vii long kơyq trôôch wơơt xăk riirh ni yôôych hnoq hlơơp ni, măn dro leq hlơơp xăk riirh ni vii kơq thơy yôôych hnoq axek jah ni.26Vii muuyq dro hnoq jah ka ik kajoq atoh deng jah dêq dêh araak, bơh biq hlơơp varơuq riirh ni? Long muuyq dro hnoq ăm varơuq kajoq đom varơuq tađôôy hlê varơuq riirh ni?27Vii Koot Manih jeq truh đom tađnah tađnaak ku Vaq Kadraq kung dii yaak plêêk Kadraq. Ji muut tuôôy nưq, Kadraq hnoq bla ka tôôy dro 'yo tyauq varơuq dơơp ku oot.28Dong dik, thơy đnooy dii oh ay đaneq e taleq dro đong dưk neq, laa khơl dro kajưk dik hnoq leh dalơh hlê varơuq kaxêêt dong truh tuôôy dong leq oot hloq Koot Manih truh đom daak dêh Kadraq.”
FAR EAST BROADCASTING COMPANY