John3
1Canŏq en, gĕh du mvu sĭq maq tamun Pha-ri-si, cồ du mvu tamun iau vôq văl Yo-thai de, săq nĕh pành Ni-cô-đem.2Nĕh tât vlam Siđăch Yêsu sŭng dŭng măng, en nhai bây Siđăch: “Ơ Cô, khananh gưt pành Cô cồ Gru măq a Siđăch Trôq tât, mvăc đăng gĕh vu lây ôp lŭh gĕh khây păch chin'hâu heq, cồ khây păch Gru gĕh ôp, hê Siđăch Trôq đăng gŭq bây nĕh nŏq.”3Siđăch Yêsu âh camvŭm en nhai bây nĕh: “Nhâng, Ănh nhai nhâng bây cô, hê vu lây đăng gĕh dĕh sĭq vlâq, nĕh nŏq đăng sây gĕh daq Cô Voq de.”4Ni-cô-đem âh bây Siđăch: “Ôp bơh năm du mvu con tamun, lăm jêng du cô camvĭnh, gĕh dĕh lŭh di gĕh? Tamun nŏq lăp gĕh sŭng talaq mê nơm de dŏq di var en gĕh dĕh lŭh êq?”5Siđăch Yêsu âh: “Nhâng, Ănh nhai nhâng bây cô, hê vu lây đăng gĕh dĕh lŭh a daq bây a Siđăch Wênh, nĕh nŏq đăng lăp gĕh sŭng daq Cô Voq de.6Sinlơ lây gĕh dĕh lŭh a gŏng n'ham nŏq cồ gŏng n'ham, en sinlơ lây gĕh dĕh lŭh a Siđăch Wênh nŏq cồ gŭn.7Vâng chăng camhŏq lăm Ănh gĕh nhai bây cô: ‘Vrŭq măq dông lĕq an cô nŏq cồ gĕh dĕh sĭq vlâq.’8Chhal khlôm vi lây nĕh cơnh, en cô chăng sinlơ tayh chhal de, cồ canŏq cô đăng gưt chhal tât a vi lây ha chhal saq tât vi lây. En khoi canŏq an lĕq săq vu lây gĕh dĕh lŭh a Siđăch Wênh.”9Ni-cô-đem nhai wŏq bây lŭp Siđăch: “Ôp bơh năm vrŭq nŏq gĕh ôp lŭh di gĕh?”10Siđăch Yêsu âh sĭq vlâq en nhai bây nĕh: “Cô cồ gru măq văl I-sơ-ra-ên de, mà cô đăng dân gĕh khây sinlơ nŏq uy?11Nhâng, Ănh nhai nhâng bây cô pành khananh nhai sĭq sinlơ cồ khananh gĕh gưt, en khananh ôp candân sĭq sinlơ cồ khananh gĕh sây, hôm khây cô đăng wŏq camvŭm candân khananh de.12Hê Ănh gĕh nhai an khây cô sĭq khây vrŭq u ntĕh en khây cô hôm ndŏh tôq, nŏq năm khây cô tôq hê Ănh nhai an khây cô sĭq khây vrŭq vlơ trôq?13Đăng gĕh vu lây hao vlơ trôq, ayh Candranh cồ a vlơ trôq jưr vŏq — nŏq cồ Con Tamun.14Môi-se gĕh tănyông vĭh hao sŭng tamăn singot bơh năm, nŏq Con Tamun khoi gĕh tănyông hao dân canŏq,15chĕq lĕq săq tamun tôq u Nĕh wŏq gĕh sinlơ rĭh gơih nggơih.16Mvăc Siđăch Trôq sinđach dưnya tât daq Nĕh paq Con Muôi Nĕh de, chĕq lăm lĕq săq vu lây tôq u Con nŏq đăng phiêt chĕq, palâq sĭq vlâq wŏq gĕh sinlơ rĭh gơih nggơih.17Mvăc Siđăch Trôq đăng pađăr Con lăp sŭng dưnya chĕq ôp dôih dưnya, palâq sĭq vlâq chĕq yơt dưnya găn Con nŏq.18Vu lây tôq u Con nŏq đăng vlam sinlơ wŏq dôih, hôm vu lây đăng tôq nŏq vlam sinlơ wŏq dôih en, mvăc đăng tôq u săq Con Muôi Siđăch Trôq de.19En nŏq, heq cồ dôih, nŏq cồ: sinlơ silang gĕh lăp tât sŭng dưnya, sŭng lăm vu sinđach sinlơ jingo vlơ sinlơ silang, mvăc khây vrŭq ôp khây nĕh de cồ viêm chin'hâc.20Mvăc ăp ndu tamun ôp bưn bap ncom bây sinlơ silang, en đăng tât bây sinlơ silang, chĕq khây vrŭq ôp nơm de đăng gĕh parang lŭh.21Palâq sĭq vlâq, tamun ôp sinlơ dip bây nhâng tât bây sinlơ silang, chĕq khây vrŭq nơm de gĕh parang lŭh chĕq an vu sây pành vrŭq gĕh ôp sŭng Siđăch Trôq.”22Alưr khây vrŭq nŏq, Siđăch Yêsu bây khây con tuyh Nĕh de saq lăp sŭng ntĕh Yu-đê. Siđăch gŭq sĭq vlâq u nŏq bây khây nĕh en ŭm vôq.23Lăm nŏq Yăng khoi ŭm vôq u At-nôn, mơch Sa-lim, mvăc u nŏq gĕh gŏq daq, văl ganơ tăm iau tât en wŏq sinlơ ŭm vôq —24lăm nŏq Yăng ndŏh bị vu nhŭp lăp sŭng nhi jingo.25En nŏq, du dŏq tăm cammlăh văt tât gĕh lŭh a khây con tuyh Yăng de bây du mvu tamun Yo-thai sĭq ravwŏq rao jrŏh.26En nŏq khây nĕh tât bây Yăng en nhai bây nĕh: “Ơ Gru, tamun cồ gĕh dŏq gŭq bây gru u maq tŏq phong Yô-đanh, cồ gru gĕh nhai can dân sĭq nĕh, sên tĭq, nĕh vrêq ŭm vôq an vu iưn, en lĕq săq văl ganơ tăm iau ganai saq tât bây nĕh.”27Yăng âh sĭq vlâq bây nhai: “Vu đăng wŏq gĕh păch lây lĕq, du sinlơ ngăn khoi đăng, hê đăng gal nŏq cồ sinlơ gĕh paq an nĕh a vlơ trôq.28Nhâng pôp ŏh ôp candân an ănh pành ănh gĕh nhai: ‘Ănh đăng gal cồ Siđăch Yơt Dưnya,’ palâq sĭq vlâq, nŏq là ‘ănh cồ tamun gĕh pađăr tât lor a Candranh nŏq.’29Vu lây sai ur nĕh nŏq cồ sau klô. Hôm ganai sau klô de, cồ tamun tao yăq bây câp iêt nĕh, wŏq gĕh sinlơ vui payh ơ chăng camvŭm nĕh de. Canŏq sinlơ vui nŏq ănh de gĕh jôm.30Sinlơ căh ôp an Candranh nŏq cồ tapơ bây iơq hao prĭh, hôm ănh heq phải tăn jưr dêh.31Candranh cồ tât a vlơ prĭh nŏq gŭq vlơ lĕq săq. Tamun cồ lŭh a ntĕh sĭq maq ntĕh bây nhai khây vrŭh sĭq maq ntĕh. Candranh tât a vlơ trôq nŏq gŭq vlơ lĕq săq.32Siđăch nhai candân sĭq sinlơ cồ Nĕh gĕh sây bây chăng, cồ canŏq đăng gĕh vu lây wŏq camvŭm candân Nĕh de.33Tamun gĕh wŏq camvŭm candân Siđăch de tôq pành Siđăch Trôq cồ nhâng bâng.34Canŏq Candranh cồ Siđăch Trôq gĕh pađăr tât nhai camvŭm Siđăch Trôq de. Mvăc Siđăch Trôq paq an Nĕh Siđăch Wênh vênh rămvi.35Vap sinđach Con bây gĕh dơp ăp sinlơ lăp sŭng ti Con.36Vu lây tôq u Con, nŏq gĕh sinlơ rĭh gơih nggơih, hôm vu lây đăng ôp bây Con đăng sây gĕh sinlơ rĭh, palâq sĭq vlâq sinlơ măq nuih Siđăch Trôq de hôm gŭq vlơ nĕh nŏq.”
FAR EAST BROADCASTING COMPANY