Alidihatiña12
Hefüté luma lani Éfürain türibu
1Aba hánhiñuraguni wügüriña ha lídangiñebaña lani Éfürain türibu Hordán lun houdin Safón, hariñaga lun Hefüté:—Ka uagu bídinbei ageindagua hama Amonna mawisarungabawa lun hamuga woudin buma? Wágudaaru buban bau guentó!2Lariñaga Hefüté houn:
—Ñeinñein aban nuwuribun hama Amonna au hau numutuniña, aba nagúarun hun, gama lumoun miábintün ageindagua wámagiñe.3Keiti miabin hubéi íderaguawa, aba níchuguni nibagari lidoun denchaü, aba nageindagun hama Amonna, aba lagañeiragüdünina Wabureme. Kagia uagu hiabin guentó lun hageindagun numa?4Ábati lóundaruniña Hefüté sun wügüriña Galaadüna, aba lageindagun hama lánigu Éfürain, aba lagañeiruniña. Hariñaga lánigu Éfürain hawagu Galaadüna ha aganóubaña Éfürain luma Manasési, luagu anuraharügü hamá Éfüraingiñe.5Lúntiha mánhiñuragun hamá lánigu Éfürain, aba hárügüdüni Galaadüna fulasu le hañalibei lidan duna Hordán, le burí ñéingiñe lubéi gayara lan lánhiñuraguniwa. Dántiha le liabin aban hádangiñe lánigu Éfürain anuraheina lun lamuriahan üma hama lun lásügürün, ábaha hálügüdüni anhein lánigu lubéi Éfürain. Anhein ariñaga uá,6aba hariñagun lun lun lariñagun: «Chibolétü», ánheinti ariñaga «Sibolétü», ladüga lásiñaruni ariñaga kei lubudubu, aba hárügüdüni, aba háfaruni hilagubei ñein guánarügü. Biánñanu wein-bián-milu wügüriña lánigu Éfürain óunwegutiña ítara.7Sísiñein irumu lau Hefüté kei ábuti houn Ísüraelina. Dan lóunwenbei, aba hábununi uburugu Galaadü, le lageira.
Ibüsán, Elón luma Abüdón
8Lárigiñe Hefüté, aba liabin Ibüsán le Belenna lun hábutime Ísüraelina,9darandiñanu lirahüñü wügüriña, darandi würiña, sun hagía maríeigüda lumutiña hama gürigia bóugudina. Sédüñein irumu lau Ibüsán kei hábuti Ísüraelina,10aba lounwen, aba hábununi Belén.11Lárigiñe Ibüsán, aba liabin Elón hádangiñe lani Sabulón türibu, rédeiti hábutime Ísüraelina luagu diisi irumu,12aba lounwen, aba hábununi Ayalón, hamúanrugu lani türibu.13Lárigiñe Elón, aba liabin Abüdón le liráü Ileli, Piratónna,14Bián-wéinñanu lirahüñü Abüdón, darandi libañan, kada aban hádangiñe luagu burigü léibuga. Rédeiti widü irumu kei hábuti Ísüraelina.15Aba lounwen Abüdón, aba hábununi Piratón, lumúanrugu Éfürain, luagu luwübüri Amalékü.Bible Society of Honduras