Alidihatiña11
Hefüté
1Hefüté, aban meha wuriburuguna ganigiti lóubawaguna Galaadü. Tiráü meha aban horu lau aban wügüri gíriti Galaadü,2keiti garahüñü tubéi lúmari Galaadü amu burí irahüñü lau, dan le haweinamudun irahüñü hagía, aba habuguni Hefüté hábiñegiñe, hariñaga lun malagantebei lan ni kata lúmagiñe háguchi ladüga amu tan lúguchu.3Aba lanurahan Hefüté hawéi lamulenu, aba lidin aganawa lóubawagu Tobu, aba lóundarun fiu gürigia wuribatiña ñein, ábaha háfuridun luma.4Átiri dan lárigiñe, aba hábürühan Amonna luagun Ísüraeli,5aba hóunahan ábutigu Galaadüna luagu Hefüté lóubawagugiñe Tobu,6hariñaga lun:—Keimoun, busentiwa lun buguya lan wábuti lidan wawuribuhan hama Amonna.7Lariñaga Hefüté houn:
—Ma meha iyereegutina hun, darí lun habugunina lúbiñegiñe núguchi? Kagia uagu hiabin áluahana guentó dan le lídanñadün lan lénrengunga?8Hariñaga lun:
—Ligía lébubei wayabin áluahabu, ladüga lídanñadiwa lan lénrengunga. Busentiwa lun biabin wama lun bageindagun hama Amonna, lun buguya lan wábuti sun wagía le aganóubei Galaadü.9Lariñaga Hefüté houn:
—Anhein busén hubéi lun nidin lun nageindagun hama Amonna, ánhana lagañeiragüda Wabureme, auba hábuti.10Hariñaga ábutigu lun:
—Gefenti Wabureme luagu wadügübei lan kei bariñaguni.11Ábati lidin Hefüté hama, aba híchuguni hábutime. Aba láguyuguagüdüni Hefüté le buga lariñagubei uburugu Misüpá, ligibugiñe Wabureme.12Lárigiñe aba lóunahan ariñaga lun harúeite Amonna:
—Ka uagu babusenra biabin ageindagua hama lílana nageira?13Lariñaga urúei houn lóunagülegu Hefüté:
—Dan le háfuridunbei huguya Ísüraelina Ehiptugiñe, aba hagidaruni wamúan wawéi, lúmagiñe duna Arünón, darí duna Haboku luma Hordán. Guentó lubeiti, águyugüda huméi nun lau buidu.14Ábaya lóunahan Hefüté amu óunagüleigu lumoun harúeite Amonna,15hariñaga lun:
—Anihán lóunabagüle Hefüté: Wagía Ísüraelina, magidatiwa múa hawéi Moábüna ni hawéi Amonna.16Dan le wáfuridunbei Ehiptugiñe, hiñugua wamuti fulasu mageirawati darí barana funati, aba wachülürün Kadesin.17Ábati wóunahan ariñaga lun lurúeite Edomu lun líchugun üma woun lun wásügürün lumúanrugugiñe, máhati, amuriaha wamuti giñe luma lurúeite Moabü, máhati giñe lígiruniwa lun wásügürün. Ligía lébubei werederun Kadesi.18Lárigiñe éibugeina wagía lidan fulasu mageirawati, aba wegeyedaguni lumúan Edomu luma Moabü darí wachülürün luagun oubaü le ñéingiñe lubéi laboucha weyu libiti Moabü, aba wemeraagun ñein, loubafurugu duna Arünón. Gama lumoun mánhiñuragun wamuti ladüga ñein lan lagumesera lumúan Moabü.19Ábati wóunahan ariñaga lun Sihón le urúei Amoruna uburugun Esübón lun líchugun üma woun lun wásügürün lumúanrugugiñe lun woudin wamúanrugun.20Gama lumoun mafinenti Sihón wawagu, mígirunti lun wásügürün lumuanrugugiñe; aba lóundaruniña lumutuniña, aba herederagun Haasü ageindagua wama.21Gama lumoun aba líchuguni Wabureme le Lubungiute Ísüraeli agañeiruni woun, aba wagañeiruni Sihón hau sun lumutuniña, aba werederun lau sun hamúan Amoruna ha lóubawaguna fulasu ligía.22Ragǘ wamuti sun hamúan Amoruna lúmagiñe duna Arünón darí Haboku luma lúmagiñe fulasu mageirawati darí duna Hordán.23Guentoti busentibuti bagidaruni le lagidarubei Wabureme hawéi Amoruna lun líchuguni woun?24Anhein íchiga Kemosu le bubungiute aban katei bun lun bánime, ma banügübei kei bani? Barǘ wamuti giñeti katei le líchugun Wabureme woun lun wánime kei wani.25Haritaguatibu funagia luagu buidu ban luéi Balakü le liráü Siporu le lurúeite Moabü? Ligía miábinti ageindagua wama.26Ǘrüwa-san irumu wau aganawa Esübón, Aroerü luma lidan burí lirahüñü aüdü le yarafabei lun, luma lidan sun burí uburugu laru Arünón; kagia uagu málugun hubéi hanügüni fulasu burí le lidan sun dan le?27Madügüntina ni murusun wuribati bun, buguya adügübei wuribati lau biabin ageindagua wama. Gama lumoun Wabureme Aguseragüdübei ligíaba aguseragüda hadan Ísüraelina hama Amonna uguñe.28Lau sun lira, madügünti harúeite Amonna gasu lau uganu le lóunahabei Hefüté lun.
Füramase lan Hefüté lun Wabureme
29Ábati liabin lani Wabureme sífiri luagun Hefüté, aba léibuguni Hefüté Galaadü luma Manasési sügüina Misüpágiñe le lani Galaadü, lun lebelurun lau erei hamúanrugun Amonna.30Aba ladügüni Hefüté füramasei le lun Wabureme:—Anhein bagañeiragüda wuribu nun hawagu Amonna,31furumiñeti o furumiñetu gürigia áfuridutu núbiñegiñe eresibirana danme nagiribudun wuriburugugiñe, níchuguboun bun kei adagaragüdüni gudawarügüti.32Aba lebelurun Hefüté hamúanrugun Amonna aba lábürühan hawagun, aba lagañeiragüdüni Wabureme.33Áfarati Hefüté saragu áganiñu gañei ligía wein uburugu labadinagua Aroerü, Minitü luma Aweli-keramímü. Ítara liña hagumadiruniña Ísüraelina Amonna.34Dan le lagiribudunbei Hefüté lúbiñoun uburugu Misüpá, aba táfuridun liráü to ábanrügüboun eresibirei abinaheina, áfareina panderu. Marahüñüti amu tuéidigia,35dan lubeiti larihinbarun, aba laheiridagunu ladaüragun, lariñaga tun:
—Lanarime san igarigu bíchugun nun, niráü! Ani buguya guánarügü lébunabei nilamiserun, lugundun adügaadina aban füramasei lun Wabureme, ani guentó gasu nagunfuliruni!36Tariñaga lun:
—Núguchi, adügabéi le bariñagubei lun Wabureme nau, kei gúnfuli laali lubéi lufanran lau lagañeiragüdünibu hawagu Amonna ha báganiñu.37Gama lumoun amuriahatina buma, lun bíchugun biama hati nun lun néibuguni áraabu hama numadagu hiñaruñu ayahuaheina ladüga nounwe lan mamarieidunga nuguya.38Aba líchuguni Hefüté bián hati ligía tun, aba téibuguni áraabu sun dan ligía hama tumadagu würiña, ayahuaheina luagu tounwe lan mamarieidunga.39Lárigiñe bián hati ligía, aba tagiribudun le ñeinhin lubéi túguchi, aba lagunfuliruni füramasei le buga ladügübei lun Wabureme. Aba tounwen liráü Hefüté, masubudirungaloun ni aban wügüri kei würi.40Ligía aban lubéi échuni Ísüraeli lun sagü lan irumu houdin würiña irahüñü ayahuahoun liráü Hefüté, luagu gádürü weyu.
Bible Society of Honduras