𐴓𐴟𐴑𐴝𐴥𐴏𐴢 22 ကိုဖတ်ပါ

𐴓𐴟𐴑𐴝𐴥𐴏𐴢22

𐴀𐴞𐴏𐴝𐴤𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴏𐴡𐴥𐴓𐴧𐴝

¹𐴇𐴠𐴥𐴣𐴃𐴧𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴐𐴟𐴥𐴄𐴝𐴌-𐴏𐴝𐴥𐴌𐴝 𐴌𐴟𐴄𐴞𐴌-𐴀𐴞𐴊𐴡𐴌 𐴊𐴞𐴕 𐴋𐴝𐴥𐴑𐴠 𐴀𐴝𐴙𐴐𐴧𐴠𐴥, 𐴎𐴠 𐴀𐴞𐴊𐴡𐴌𐴠 𐴀𐴝𐴎𐴝𐴊𐴞𐴌-𐴀𐴞𐴊𐴢 𐴁𐴡𐴓𐴞 𐴈𐴡𐴀.²𐴀𐴝𐴦𐴌 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴑𐴞𐴦 𐴁𐴡𐴃𐴠 𐴔𐴝𐴌𐴞𐴉𐴠𐴥𐴓𐴝𐴘 𐴉𐴝𐴌𐴞𐴁𐴡𐴥 𐴇𐴞𐴥𐴘𐴝𐴕𐴡𐴌 𐴃𐴝𐴓𐴝𐴐𐴡𐴃𐴢 𐴀𐴝𐴐𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴔𐴝𐴙𐴕𐴐𐴡𐴥𐴌𐴠 𐴋𐴡𐴦𐴌𐴝𐴘𐴃𐴡𐴥.

𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴞 𐴁𐴡𐴓𐴧𐴝 𐴘𐴡𐴇𐴟𐴥𐴊𐴝 𐴌𐴝𐴎𐴞 𐴀𐴡𐴥𐴘𐴧𐴠

³𐴇𐴠𐴥𐴣𐴃𐴧𐴠 𐴘𐴡𐴇𐴟𐴥𐴊𐴝 𐴎𐴝𐴌𐴠𐴥 𐴀𐴞𐴏𐴑𐴝𐴥𐴌𐴞𐴘𐴠𐴃𐴢 𐴋𐴝𐴑𐴠, 𐴀𐴞𐴥𐴃𐴝𐴌 𐴁𐴟𐴥𐴃𐴡𐴌𐴠 𐴐𐴡𐴥𐴘𐴃𐴝𐴕 𐴒𐴡𐴥𐴙𐴓𐴧𐴠, 𐴎𐴠𐴦 𐴀𐴝𐴐𐴧𐴞𐴥𐴓𐴢 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴀𐴠𐴎𐴧𐴡𐴕.⁴𐴀𐴞𐴥𐴃𐴠 𐴎𐴝𐴘 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘, 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘, 𐴀𐴠𐴊𐴧𐴠 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴏𐴡𐴥𐴓𐴧𐴝 𐴒𐴡𐴙𐴅𐴧𐴠𐴥𐴒𐴡𐴘 𐴊𐴠, 𐴀𐴞𐴥𐴃𐴠 𐴑𐴞𐴦 𐴁𐴡𐴃𐴠 𐴀𐴞𐴏𐴝𐴤𐴌𐴠 𐴃𐴝𐴌𐴝𐴥𐴌 𐴀𐴝𐴥𐴃𐴡𐴃𐴢 𐴊𐴡𐴥𐴌𐴞𐴊𐴞 𐴉𐴝𐴌𐴞𐴁𐴡𐴥.⁵𐴇𐴞𐴥𐴘𐴝𐴕𐴡𐴃𐴢 𐴀𐴞𐴥𐴃𐴝𐴌𐴝 𐴑𐴟𐴥𐴐𐴞 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴠 𐴄𐴞𐴛𐴝 𐴊𐴞𐴦𐴁𐴡 𐴁𐴡𐴓𐴞 𐴈𐴡𐴘𐴧𐴠𐴥.⁶𐴀𐴞𐴥𐴃𐴠 𐴌𐴝𐴎𐴞 𐴀𐴡𐴥𐴘𐴧𐴠, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴢 𐴕𐴡 𐴃𐴝𐴥𐴑𐴠 𐴊𐴠 𐴀𐴡𐴑𐴃𐴡𐴥𐴃𐴢 𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴞 𐴁𐴡𐴓𐴧𐴝 𐴔𐴡𐴑𐴝𐴌 𐴃𐴝𐴓𐴝𐴐𐴡𐴃𐴢 𐴀𐴝𐴐𐴧𐴞𐴥𐴓𐴢.

𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝

⁷𐴃𐴝𐴌𐴉𐴡𐴌𐴠 𐴐𐴟𐴥𐴄𐴝𐴌-𐴏𐴝𐴥𐴌𐴝 𐴌𐴟𐴄𐴞𐴌-𐴀𐴞𐴊𐴡𐴌 𐴊𐴞𐴕 𐴀𐴝𐴙𐴐𐴧𐴠𐴥, 𐴎𐴠 𐴊𐴞𐴕𐴡𐴃𐴢 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝𐴓𐴧𐴝 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴏𐴡𐴥𐴀 𐴑𐴟𐴌𐴁𐴝𐴕𐴞 𐴒𐴡𐴌𐴝𐴥 𐴉𐴡𐴥𐴌𐴡𐴏𐴢.⁸𐴀𐴞𐴏𐴝𐴤𐴘𐴠 𐴉𐴞𐴃𐴡𐴌 𐴀𐴠𐴊𐴧𐴠 𐴘𐴡𐴇𐴝𐴥𐴕𐴧𐴝𐴌𐴠 𐴊𐴞𐴉𐴠𐴍𐴝𐴥𐴘 𐴈𐴡𐴀𐴌 𐴊𐴠, ”𐴎𐴡𐴦, 𐴀𐴝𐴣𐴀𐴌𐴝 𐴇𐴝𐴥𐴘 𐴉𐴝𐴌𐴞 𐴉𐴝𐴥𐴕 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝𐴌 𐴃𐴡𐴘𐴧𐴝𐴌𐴞 𐴒𐴡𐴌𐴡𐴤𐴒𐴡𐴘.“

⁹𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴃𐴧𐴟 𐴇𐴡𐴕𐴊𐴞𐴓𐴧𐴝 𐴔𐴡𐴕𐴠𐴈𐴡𐴀𐴌, 𐴀𐴝𐴣𐴀𐴌𐴝 𐴇𐴡𐴍𐴠𐴥 𐴃𐴡𐴘𐴧𐴝𐴌 𐴒𐴡𐴙𐴃𐴧𐴝𐴥𐴔؟“

¹⁰𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴐𐴡𐴥𐴀𐴌𐴡𐴃𐴢 𐴒𐴡𐴥𐴓𐴞𐴓𐴠 𐴔𐴡𐴃𐴧𐴡𐴌, 𐴎𐴡𐴑𐴡𐴃𐴢 𐴒𐴡𐴌𐴞 𐴉𐴝𐴕𐴞𐴥 𐴓𐴡𐴘𐴎𐴝𐴌 𐴊𐴠 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴃𐴟𐴣𐴀𐴝𐴥𐴌𐴝 𐴓𐴧𐴡𐴥𐴘 𐴔𐴞𐴓𐴞𐴁𐴡𐴥; 𐴀𐴞𐴥𐴁𐴝 𐴎𐴠 𐴒𐴡𐴥𐴌𐴡𐴃𐴢 𐴒𐴡𐴥𐴓𐴞𐴁𐴡 𐴇𐴠𐴥 𐴒𐴡𐴥𐴌𐴡𐴃𐴢 𐴀𐴞𐴥𐴁𐴝𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴎𐴝𐴘𐴧𐴡,¹¹𐴀𐴝𐴦𐴌 𐴒𐴡𐴥𐴌 𐴒𐴝𐴕𐴡𐴌 𐴒𐴞𐴌𐴡𐴥𐴏𐴡𐴌𐴠 𐴈𐴡𐴘𐴁𐴝𐴤 𐴊𐴠, ’𐴀𐴟𐴏𐴃𐴝𐴃𐴠 𐴃𐴟𐴣𐴀𐴝𐴥𐴣𐴌𐴠 𐴈𐴡𐴀𐴌 𐴊𐴠, ”𐴔𐴠𐴀𐴔𐴝𐴕-𐴈𐴝𐴥𐴕𐴝 𐴇𐴡𐴍𐴠𐴥, 𐴎𐴞𐴘𐴝𐴥𐴕𐴡𐴃𐴢 𐴀𐴝𐴀𐴛 𐴀𐴝𐴣𐴀𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝 𐴇𐴝𐴥𐴘 𐴉𐴝𐴙𐴅𐴧𐴟𐴔؟“ ‘¹²𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴣𐴎𐴝𐴘𐴧𐴝 𐴀𐴠𐴑𐴧𐴝𐴥𐴕 𐴖𐴡𐴌𐴡𐴌 𐴄𐴝𐴓𐴝𐴌 𐴋𐴡𐴣𐴀𐴌 𐴑𐴝𐴔𐴝𐴥𐴌𐴝 𐴊𐴝𐴈𐴝𐴤𐴘𐴁𐴡; 𐴇𐴠𐴥𐴍𐴠 𐴃𐴡𐴘𐴧𐴝𐴌 𐴒𐴡𐴙𐴅𐴧𐴡𐴥.“

¹³𐴃𐴡𐴥𐴘 𐴀𐴞𐴥𐴃𐴝𐴌𐴝 𐴎𐴝𐴘, 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥 𐴇𐴠𐴥𐴕𐴊𐴞𐴓𐴧𐴝 𐴉𐴝𐴘𐴧𐴠𐴥; 𐴁𐴝𐴦𐴊𐴠 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝𐴌 𐴃𐴡𐴘𐴧𐴝𐴌𐴞 𐴒𐴡𐴙𐴅𐴧𐴠𐴥.

𐴐𐴝𐴥𐴌𐴞𐴃𐴧𐴟𐴕𐴡𐴌 𐴉𐴟𐴥𐴖𐴝𐴣𐴃𐴞 𐴀𐴞𐴏𐴝𐴤𐴌 𐴀𐴝𐴇𐴠𐴥𐴌𐴞 𐴈𐴝𐴥𐴕𐴝

¹⁴𐴎𐴠𐴣𐴃𐴧𐴠𐴥 𐴀𐴡𐴑𐴃𐴡𐴥 𐴀𐴝𐴀𐴘𐴒𐴞𐴘𐴡𐴘, 𐴀𐴞𐴏𐴝𐴤 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥, 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴏𐴝𐴥𐴇𐴝𐴁𐴞 𐴒𐴟𐴥𐴕 𐴀𐴡𐴥 𐴁𐴡𐴙𐴐𐴧𐴠𐴥.¹⁵𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴊𐴟𐴑 𐴉𐴝𐴘𐴁𐴝𐴌 𐴀𐴝𐴒𐴠 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴠 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴁𐴞𐴐𐴞𐴤 𐴀𐴝𐴎𐴧𐴟 𐴒𐴡𐴙𐴅𐴧𐴞𐴥;¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴠𐴃𐴡𐴥𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴘𐴝𐴀𐴕 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴢 𐴉𐴟𐴌𐴝 𐴕𐴡, 𐴇𐴠𐴥𐴃𐴡𐴊𐴞𐴕 𐴀𐴞𐴀𐴕 𐴀𐴝𐴀𐴛 𐴀𐴝𐴁𐴝𐴌 𐴕𐴝 𐴈𐴝𐴥𐴘𐴧𐴟𐴔.“

¹⁷𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴉𐴞𐴘𐴝𐴓𐴝 𐴓𐴡𐴦𐴘𐴢 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴘𐴞𐴁𐴝𐴤 𐴓𐴡𐴦𐴘𐴢 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴁𐴡𐴌𐴝𐴃𐴢 𐴒𐴡𐴌𐴡𐴤.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴀𐴠𐴇𐴡𐴥𐴕𐴡𐴃𐴧𐴟 𐴓𐴡𐴥𐴃𐴞 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴕𐴟𐴥 𐴀𐴝𐴘𐴧𐴠𐴤 𐴉𐴡𐴙𐴅𐴧𐴡𐴕𐴃𐴡 𐴀𐴝𐴀𐴛 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴕𐴝 𐴈𐴝𐴥𐴘𐴧𐴟𐴔.“

¹⁹𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴌𐴟𐴄𐴞 𐴓𐴡𐴦𐴘𐴢 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴁𐴝𐴥𐴚𐴒𐴞 𐴀𐴞𐴥𐴃𐴝𐴌𐴝𐴌𐴠 𐴊𐴞𐴦 𐴈𐴡𐴀𐴌 𐴊𐴠, ”𐴘𐴝𐴀𐴕 𐴀𐴝𐴣𐴀𐴌 𐴒𐴝𐴦, 𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴌𐴝𐴓𐴧𐴝 𐴊𐴞𐴦𐴘𐴝 𐴎𐴝𐴘𐴁𐴡; 𐴀𐴝𐴣𐴀𐴌𐴠𐴥 𐴔𐴡𐴕𐴡𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴠𐴕𐴊𐴞𐴓𐴧𐴝 𐴒𐴡𐴙𐴅𐴧𐴡𐴥.“

²⁰𐴇𐴠𐴥𐴕𐴊𐴞𐴓𐴧𐴝 𐴌𐴟𐴄𐴞 𐴇𐴝𐴥𐴘 𐴁𐴝𐴦𐴊𐴠 𐴉𐴞𐴘𐴝𐴓𐴝 𐴖𐴝 𐴓𐴡𐴦𐴘𐴢 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴓𐴡𐴖𐴢 𐴓𐴡𐴘 𐴀𐴡𐴥𐴘𐴁𐴡 𐴊𐴠 𐴕𐴡𐴘𐴝 𐴌𐴝𐴎𐴞𐴕𐴝𐴔𐴝𐴌 𐴕𐴞𐴐𐴝𐴥𐴕 𐴀𐴡𐴥𐴙𐴓𐴊𐴠 𐴀𐴠 𐴉𐴞𐴘𐴝𐴓𐴝, 𐴎𐴠 𐴓𐴡𐴖𐴢 𐴃𐴟𐴣𐴀𐴝𐴥𐴌𐴝𐴓𐴧𐴝 𐴋𐴝𐴥𐴓𐴞𐴊𐴞𐴘𐴟𐴔.

²¹”𐴔𐴡𐴕𐴃𐴡𐴌 𐴏𐴡𐴀, 𐴎𐴠𐴦 𐴀𐴝𐴣𐴀𐴌𐴠𐴥 𐴊𐴡𐴥𐴌𐴞𐴊𐴞𐴁𐴡 𐴀𐴞𐴥𐴃𐴠 𐴀𐴠𐴇𐴡𐴥𐴕 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴔𐴠𐴏𐴡𐴃𐴢 𐴈𐴝𐴥𐴕𐴝 𐴈𐴝𐴥𐴀𐴌.²²𐴁𐴠𐴐𐴡𐴥𐴑, 𐴀𐴝𐴓𐴧𐴝𐴘𐴠 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴠𐴥 𐴊𐴠 𐴔𐴡𐴎𐴞𐴕 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴔𐴡𐴌𐴞𐴁𐴡𐴥, 𐴔𐴡𐴕𐴃𐴡𐴌 𐴀𐴝𐴉𐴏𐴟𐴥𐴏𐴢 𐴀𐴟𐴘𐴃𐴝𐴌 𐴖𐴡𐴌𐴠, 𐴎𐴠𐴦 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴊𐴠.“²³𐴇𐴞𐴥𐴘𐴝𐴕 𐴉𐴟𐴥𐴕𐴞, 𐴃𐴝𐴌𐴝𐴥𐴌 𐴁𐴟𐴥𐴃𐴡𐴃𐴧𐴟 𐴇𐴠𐴥 𐴈𐴝𐴔 𐴔𐴝𐴥𐴕 𐴇𐴡𐴕𐴠 𐴒𐴡𐴌𐴞𐴥𐴁𐴡 𐴈𐴡𐴀𐴘𐴢 𐴀𐴠𐴎𐴧𐴡𐴕𐴡𐴃𐴧𐴟 𐴀𐴠𐴎𐴧𐴡𐴕𐴠 𐴉𐴟𐴏𐴝𐴥𐴌 𐴒𐴡𐴙𐴅𐴧𐴞𐴥𐴓𐴢.

𐴋𐴡𐴣𐴀𐴌𐴡𐴌 𐴁𐴝𐴦𐴁𐴟𐴃𐴠 𐴁𐴝𐴌𐴝𐴤𐴁𐴝𐴌𐴞

²⁴𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴃𐴧𐴟 𐴇𐴝𐴌𐴠𐴤 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴔𐴝𐴕𐴝 𐴎𐴝𐴘𐴁𐴡 𐴈𐴡𐴀𐴘𐴢 𐴘𐴡𐴥 𐴀𐴠𐴑𐴧𐴝𐴥𐴕 𐴁𐴝𐴌𐴝𐴤𐴁𐴝𐴌𐴞 𐴀𐴟𐴙𐴄𐴧𐴞𐴥𐴓𐴢.²⁵𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴠 𐴃𐴝𐴌𐴝𐴥𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴠𐴥, 𐴀𐴝𐴦𐴌 𐴃𐴝𐴌𐴝𐴥𐴌 𐴖𐴡𐴌𐴠 𐴎𐴝𐴌𐴝𐴤 𐴀𐴝𐴊𐴞𐴥𐴑𐴝𐴌 𐴏𐴡𐴓𐴝, 𐴀𐴞𐴥𐴃𐴝𐴌𐴝 ’𐴔𐴝𐴕𐴟𐴥𐴙𐴐𐴡𐴌 𐴊𐴟𐴏𐴃𐴡𐴥‘ 𐴁𐴡𐴥𐴓𐴞 𐴊𐴝𐴁𐴞 𐴒𐴡𐴌𐴠𐴥.²⁶𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴇𐴠𐴥𐴕𐴊𐴞𐴓𐴧𐴝 𐴕𐴡 𐴀𐴡𐴥𐴘𐴧𐴡, 𐴁𐴡𐴥𐴓𐴑𐴠 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴁𐴧𐴠 𐴋𐴡𐴣𐴀𐴌 𐴀𐴝𐴏𐴠𐴤, 𐴃𐴠𐴦 𐴀𐴠𐴁𐴧𐴠 𐴐𐴡𐴥𐴣𐴍𐴡 𐴖𐴝𐴌 𐴋𐴡𐴥𐴙𐴓𐴧𐴝 𐴀𐴡𐴥𐴑; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴏𐴡𐴥𐴊𐴧𐴝𐴌 𐴀𐴝𐴏𐴠𐴤, 𐴃𐴠𐴦 𐴒𐴟𐴓𐴝𐴔𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴑.²⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴡𐴕𐴧𐴗𐴝𐴤 𐴋𐴡𐴣𐴀𐴌, 𐴑𐴞 𐴔𐴠𐴏𐴡𐴃𐴢 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴁𐴡𐴘𐴧𐴠𐴥 𐴊𐴠 𐴀𐴞𐴥𐴁𐴝, 𐴀𐴝𐴦𐴌 𐴕𐴝𐴥𐴑𐴞 𐴇𐴠𐴥𐴊𐴔𐴡𐴃𐴢 𐴒𐴡𐴌𐴠𐴥 𐴊𐴠 𐴀𐴞𐴥𐴁𐴝؟ 𐴔𐴠𐴏𐴡𐴃𐴢 𐴈𐴝𐴥𐴘𐴃𐴡 𐴁𐴡𐴘𐴧𐴠𐴥 𐴊𐴠 𐴀𐴞𐴥𐴁𐴝 𐴕𐴡 𐴕𐴠𐴥؟ 𐴓𐴠𐴑𐴞𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴇𐴠𐴥𐴊𐴔𐴡𐴃𐴢-𐴒𐴡𐴌𐴡𐴤𐴘𐴝𐴌 𐴋𐴡𐴥𐴙𐴓𐴧𐴝.

²⁸”𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴀𐴟𐴘𐴃𐴝𐴌𐴝𐴤 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌 𐴊𐴟𐴑𐴧𐴡𐴥𐴌 𐴀𐴡𐴑𐴃𐴡𐴥𐴃𐴢 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴝.²⁹𐴀𐴝𐴣𐴀𐴌 𐴁𐴝𐴉𐴠 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴠𐴥 𐴀𐴠𐴑𐴧𐴝𐴥𐴕 𐴌𐴝𐴙𐴅𐴧𐴡 𐴊𐴞𐴦𐴘𐴠𐴥, 𐴇𐴠𐴥𐴕𐴊𐴞𐴓𐴧𐴝 𐴀𐴝𐴀𐴛 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴑𐴧𐴝𐴥𐴕 𐴌𐴝𐴙𐴅𐴧𐴡 𐴊𐴞𐴦𐴌,³⁰𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴌𐴝𐴙𐴅𐴧𐴡𐴃𐴢 𐴔𐴝𐴎𐴠𐴥 𐴀𐴝𐴣𐴀𐴌 𐴔𐴠𐴏𐴡𐴃𐴢 𐴈𐴝𐴥𐴀𐴉𐴞𐴘𐴝 𐴒𐴡𐴌𐴡𐴤, 𐴀𐴠𐴊𐴧𐴠 𐴃𐴡𐴑𐴃𐴡𐴥𐴃𐴢 𐴁𐴡𐴀𐴘𐴢 𐴀𐴞𐴏𐴌𐴝𐴥𐴙𐴓𐴡𐴌 𐴁𐴝𐴌𐴡𐴥 𐴒𐴟𐴙𐴐𐴧𐴞𐴥𐴌 𐴁𐴞𐴏𐴝𐴌 𐴒𐴡𐴌𐴡𐴤.“

𐴉𐴞𐴃𐴡𐴌𐴠 𐴀𐴞𐴕𐴑𐴝𐴌 𐴒𐴡𐴌𐴝𐴥𐴌 𐴁𐴝𐴦𐴁𐴟𐴃𐴠 𐴀𐴞𐴏𐴝𐴤𐴌 𐴀𐴝𐴒𐴟𐴕 𐴈𐴡𐴃𐴝𐴤

³¹”𐴏𐴝𐴥𐴘𐴔𐴡𐴕, 𐴏𐴝𐴥𐴘𐴔𐴡𐴕, 𐴉𐴟𐴥𐴕, 𐴐𐴡𐴥𐴘𐴃𐴝𐴕𐴠 𐴃𐴟𐴣𐴀𐴝𐴥𐴌𐴝𐴌𐴠 𐴒𐴞𐴣𐴘𐴟𐴌 𐴋𐴡𐴥𐴙𐴓𐴧𐴝 𐴏𐴝𐴓𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴀𐴠𐴎𐴝𐴎𐴡𐴃𐴢 𐴔𐴝𐴙𐴒𐴧𐴠𐴥.³²𐴔𐴡𐴕𐴃𐴡𐴌 𐴃𐴡𐴌 𐴀𐴞𐴔𐴝𐴕 𐴑𐴡𐴔𐴎𐴟𐴌 𐴕𐴡 𐴉𐴝𐴥𐴕 𐴀𐴝𐴀𐴛 𐴃𐴡𐴌 𐴓𐴧𐴝 𐴊𐴟𐴖𐴝 𐴒𐴡𐴙𐴅𐴧𐴞𐴥, 𐴀𐴝𐴦𐴌 𐴎𐴠𐴣𐴃𐴧𐴠𐴥 𐴃𐴟𐴘 𐴀𐴝𐴣𐴀𐴌 𐴇𐴠𐴥𐴍𐴠 𐴖𐴝𐴦𐴉𐴠𐴏𐴢 𐴀𐴝𐴘𐴁𐴞𐴤, 𐴃𐴡𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴔𐴡𐴎𐴁𐴟𐴃𐴢 𐴒𐴡𐴌𐴞𐴥𐴐𐴢.“

³³𐴉𐴞𐴃𐴡𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴎𐴞𐴘𐴡𐴥𐴓𐴡𐴃𐴢 𐴎𐴝𐴘𐴃𐴡 𐴀𐴠𐴊𐴧𐴠 𐴔𐴡𐴙𐴃𐴧𐴡 𐴃𐴡𐴘𐴧𐴝𐴌 𐴀𐴝𐴏𐴞𐴤.“

³⁴𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴉𐴞𐴃𐴡𐴌, 𐴀𐴝𐴀𐴛 𐴃𐴡𐴌𐴠𐴥 𐴈𐴡𐴀𐴙𐴌, 𐴀𐴝𐴙𐴅𐴧𐴝 𐴌𐴝𐴃𐴝𐴑𐴟𐴌𐴝𐴤 𐴁𐴝𐴑 𐴊𐴞𐴁𐴝𐴌 𐴀𐴝𐴒𐴠 𐴃𐴟𐴘 𐴀𐴝𐴣𐴀𐴌𐴠𐴥 𐴕𐴡 𐴏𐴞𐴕𐴡𐴥𐴏𐴢 𐴈𐴡𐴀𐴘𐴢 𐴃𐴞𐴕 𐴁𐴝𐴌 𐴀𐴞𐴕𐴑𐴝𐴌 𐴒𐴡𐴌𐴞𐴥𐴁𐴞.“

𐴄𐴞𐴛𐴝𐴌 𐴁𐴠𐴑, 𐴇𐴡𐴥𐴙𐴓𐴧𐴝, 𐴀𐴠𐴊𐴧𐴠 𐴏𐴟𐴥𐴌𐴞

³⁵𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴠𐴣𐴃𐴧𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴄𐴞𐴛𐴝𐴌 𐴎𐴝𐴓𐴞, 𐴐𐴠𐴕𐴄𐴝𐴥𐴌 𐴀𐴠𐴊𐴧𐴠 𐴇𐴡𐴥𐴙𐴓𐴧𐴝 𐴏𐴝𐴥𐴌𐴝 𐴊𐴞𐴉𐴠𐴍𐴝𐴥𐴘𐴓𐴝𐴔, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴑𐴠𐴏𐴧𐴟𐴥𐴌 𐴈𐴡𐴔𐴞 𐴀𐴝𐴙𐴐𐴧𐴞𐴤𐴓𐴢 𐴕𐴠𐴥؟“
𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴑𐴠𐴏𐴧𐴟𐴥𐴌 𐴈𐴡𐴔𐴞 𐴕𐴟 𐴀𐴝𐴐𐴧𐴞𐴥𐴓𐴢.“

³⁶𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴠𐴇𐴡𐴥𐴕 𐴎𐴝𐴃𐴧𐴟 𐴄𐴞𐴛𐴝𐴌 𐴎𐴝𐴓𐴞 𐴀𐴝𐴏𐴠𐴤 𐴃𐴠𐴦 𐴉𐴟𐴥𐴖𐴝𐴣𐴃𐴞 𐴓𐴡𐴦, 𐴇𐴠𐴥𐴕𐴊𐴞𐴓𐴧𐴝 𐴇𐴡𐴥𐴙𐴓𐴧𐴝 𐴘𐴡𐴥 𐴓𐴡𐴦, 𐴀𐴝𐴦𐴌 𐴎𐴝𐴃𐴧𐴟 𐴏𐴟𐴥𐴌𐴞 𐴕𐴝𐴥𐴘, 𐴃𐴠𐴦 𐴕𐴞𐴎𐴡𐴌 𐴏𐴝𐴊𐴧𐴡𐴌 𐴁𐴠𐴏𐴞 𐴀𐴠𐴑𐴧𐴝𐴥𐴕 𐴑𐴞𐴕𐴞𐴓𐴡.³⁷𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ’𐴀𐴞𐴥𐴁𐴝𐴌𐴠 𐴒𐴟𐴕𐴝𐴤𐴒𐴝𐴌 𐴀𐴡𐴌 𐴉𐴟𐴥𐴖𐴝𐴣𐴃𐴞 𐴒𐴡𐴕𐴝 𐴒𐴞𐴘𐴠𐴥,‘ 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴇𐴠𐴥 𐴈𐴡𐴃𐴝𐴤 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴉𐴟𐴌𐴝 𐴀𐴡𐴥𐴖𐴝 𐴎𐴡𐴌𐴟𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴎𐴞𐴀𐴕 𐴓𐴠𐴙𐴑𐴧𐴠𐴥 𐴇𐴞𐴥𐴀𐴕 𐴉𐴟𐴌𐴝 𐴀𐴡𐴥𐴌.“

³⁸𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴏𐴡𐴀, 𐴀𐴠𐴍𐴠𐴥 𐴊𐴟𐴘𐴧𐴝𐴥𐴕 𐴏𐴟𐴥𐴌𐴞 𐴀𐴝𐴏𐴠𐴤.“
𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴞𐴀𐴕 𐴀𐴡𐴥𐴘𐴓𐴠 𐴑𐴝𐴉𐴞𐴥.“

𐴒𐴠𐴃𐴏𐴝𐴥𐴔𐴝𐴕𐴞 𐴁𐴝𐴒𐴝𐴕𐴡𐴃𐴢 𐴀𐴞𐴏𐴝𐴤𐴌 𐴊𐴟𐴖𐴝

³⁹𐴀𐴞𐴏𐴝𐴤 𐴕𐴠𐴦𐴓𐴞 𐴕𐴞𐴎𐴡𐴌 𐴕𐴞𐴘𐴡𐴔 𐴔𐴡𐴎𐴞𐴕 𐴎𐴝𐴘𐴃𐴟𐴕 𐴉𐴝𐴀𐴌𐴡𐴃𐴢 𐴒𐴞𐴦𐴘𐴠𐴥; 𐴐𐴝𐴥𐴌𐴞𐴃𐴧𐴟𐴕 𐴀𐴡𐴥 𐴀𐴞𐴥𐴁𐴝𐴌 𐴉𐴞𐴏𐴠𐴤-𐴉𐴞𐴏𐴠𐴤 𐴒𐴞𐴦𐴘𐴠𐴥.⁴⁰𐴇𐴠𐴥 𐴎𐴝𐴒𐴝𐴃𐴢 𐴉𐴡𐴀𐴣𐴏𐴞 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴊𐴟𐴖𐴝 𐴒𐴡𐴌𐴡𐴤, 𐴎𐴠𐴀𐴕𐴠 𐴀𐴠𐴕𐴃𐴝𐴥𐴕𐴡𐴃𐴢 𐴕𐴡 𐴉𐴡𐴌𐴡.“⁴¹𐴀𐴞𐴥𐴁𐴝 𐴀𐴞𐴥𐴃𐴝𐴌𐴝𐴌 𐴇𐴞𐴥𐴘𐴝𐴕𐴃𐴟 𐴀𐴠𐴒𐴧𐴗𐴝𐴤 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴠𐴓𐴝𐴤 𐴔𐴝𐴥𐴙𐴓𐴧𐴠 𐴎𐴠𐴊𐴧𐴟𐴥𐴌 𐴎𐴝𐴦, 𐴇𐴠𐴥𐴊𐴧𐴟𐴌 𐴀𐴝𐴥𐴕𐴞𐴑 𐴊𐴟𐴌𐴠𐴥 𐴎𐴝𐴘 𐴀𐴝𐴣𐴍𐴟𐴥𐴌 𐴃𐴡𐴥𐴑𐴊𐴞 𐴊𐴟𐴖𐴝 𐴒𐴡𐴌𐴠𐴥𐴌 𐴊𐴠,⁴²”𐴀𐴡𐴥 𐴁𐴝𐴉𐴢, 𐴎𐴡𐴊𐴞 𐴃𐴟𐴀𐴛 𐴏𐴡𐴀, 𐴀𐴠 𐴊𐴟𐴑-𐴔𐴡𐴏𐴞𐴁𐴡𐴃𐴡𐴌 𐴉𐴞𐴘𐴝𐴓𐴝 𐴘𐴞𐴁𐴝𐴤 𐴀𐴝𐴣𐴀𐴃𐴧𐴟 𐴊𐴟𐴌 𐴒𐴡𐴌𐴞𐴥𐴉𐴠𐴓𐴡, 𐴔𐴡𐴕𐴃𐴡𐴌 𐴃𐴡𐴀 𐴀𐴝𐴣𐴀𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴕𐴡, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴣𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴀𐴡𐴥𐴑.“⁴³𐴇𐴠𐴥𐴃𐴟𐴕𐴡𐴃𐴢 𐴀𐴝𐴏𐴔𐴝𐴕𐴡𐴃𐴧𐴟 𐴀𐴠𐴒𐴧𐴗𐴝𐴤 𐴉𐴞𐴥𐴌𐴞𐴏𐴃𐴝 𐴊𐴝𐴈𐴝𐴤 𐴊𐴞𐴥 𐴀𐴞𐴥𐴁𐴝𐴌𐴠 𐴁𐴡𐴓𐴢 𐴊𐴞𐴦𐴘𐴠𐴥.⁴⁴𐴀𐴞𐴥𐴁𐴝 𐴀𐴡𐴐𐴝𐴥𐴕𐴃𐴞 𐴀𐴡𐴥𐴘 𐴊𐴞𐴓𐴔𐴡𐴕 𐴊𐴞 𐴀𐴝𐴌𐴡𐴤 𐴁𐴞𐴐𐴞𐴤 𐴊𐴟𐴖𐴝 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴥𐴁𐴝𐴌 𐴒𐴝𐴥𐴔 𐴓𐴡𐴖𐴢 𐴖𐴡𐴥𐴌 𐴉𐴟𐴥𐴍𐴝𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘 𐴔𐴠𐴍𐴞𐴃𐴢 𐴉𐴡𐴙𐴅𐴧𐴞𐴥𐴓𐴢.

⁴⁵𐴀𐴞𐴥𐴁𐴝 𐴎𐴠𐴣𐴃𐴧𐴠𐴥 𐴊𐴟𐴖𐴝𐴃𐴧𐴟 𐴀𐴟𐴍𐴞𐴤 𐴐𐴝𐴥𐴌𐴞𐴃𐴧𐴟𐴕𐴡𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥, 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴉𐴠𐴌𐴠𐴐𐴝𐴕𐴠 𐴀𐴡𐴥𐴌𐴝𐴕 𐴀𐴡𐴥𐴘 𐴒𐴟𐴥𐴔 𐴒𐴞𐴥𐴘𐴠 𐴊𐴠 𐴓𐴡𐴦𐴃𐴢 𐴉𐴝𐴘𐴧𐴠𐴥.⁴⁶𐴀𐴞𐴥𐴁𐴝𐴘𐴠 𐴃𐴝𐴌𐴝𐴥𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴒𐴟𐴥𐴔 𐴎𐴡𐴀𐴌 𐴑𐴞𐴘𐴝𐴥؟ 𐴀𐴟𐴍𐴡𐴥 𐴀𐴝𐴦𐴌 𐴊𐴟𐴖𐴝 𐴒𐴡𐴌𐴡𐴤, 𐴎𐴠𐴀𐴕𐴠 𐴀𐴠𐴕𐴃𐴝𐴥𐴕𐴡𐴃𐴢 𐴕𐴡 𐴉𐴡𐴌𐴡.“

𐴀𐴞𐴏𐴝𐴤𐴌 𐴒𐴠𐴌𐴠𐴉𐴃𐴝𐴌𐴞

⁴⁷𐴀𐴞𐴥𐴁𐴝𐴘𐴠 𐴇𐴞𐴥𐴀𐴕 𐴈𐴡𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴃𐴧𐴟 𐴘𐴡𐴇𐴟𐴥𐴊𐴝 𐴈𐴡𐴀 𐴊𐴠 𐴀𐴞𐴥𐴃𐴠 𐴃𐴝𐴌𐴝𐴥𐴌 𐴀𐴝𐴒𐴠-𐴀𐴝𐴒𐴠 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴃𐴠 𐴀𐴞𐴏𐴝𐴤𐴌𐴠 𐴀𐴝𐴂𐴧𐴝𐴤 𐴊𐴞𐴥 𐴁𐴡𐴓𐴧𐴝 𐴀𐴞𐴥𐴁𐴝𐴌 𐴋𐴝𐴥𐴑𐴠 𐴒𐴞𐴦𐴘𐴠𐴥.⁴⁸𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ”𐴘𐴡𐴇𐴟𐴥𐴊𐴝, 𐴃𐴟𐴘 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌𐴠 𐴀𐴝𐴂𐴧𐴝𐴤 𐴊𐴞𐴥 𐴊𐴡𐴥𐴌𐴞 𐴊𐴡𐴥𐴌 𐴊𐴠𐴥؟“

⁴⁹𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴠 𐴑𐴞𐴦 𐴀𐴡𐴥𐴘𐴁𐴡 𐴊𐴠 𐴀𐴡𐴥𐴃𐴢 𐴉𐴝𐴘𐴧𐴠𐴥, 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴣𐴀𐴌𐴝 𐴃𐴡𐴓𐴟𐴖𐴝𐴌 𐴏𐴡𐴓𐴝𐴘𐴧𐴟𐴥𐴔 𐴕𐴠𐴥؟“⁵⁰𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴠 𐴃𐴡𐴓𐴟𐴖𐴝𐴌 𐴏𐴡𐴓𐴝𐴘 𐴁𐴡𐴌𐴡 𐴀𐴞𐴔𐴝𐴔𐴡𐴌 𐴒𐴟𐴓𐴝𐴔𐴡𐴌 𐴊𐴠𐴕 𐴋𐴝𐴥𐴑𐴡𐴌 𐴈𐴝𐴕 𐴈𐴝𐴍𐴞𐴉𐴠𐴥𐴓𐴝𐴘𐴧𐴠.

⁵¹𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴁𐴡𐴕 𐴒𐴡𐴌, 𐴀𐴠𐴕𐴊𐴞𐴓𐴧𐴝 𐴀𐴝𐴦𐴌 𐴕𐴡 𐴒𐴡𐴌𐴞𐴥𐴐𐴢.“𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴃𐴝𐴌 𐴈𐴝𐴕 𐴊𐴡𐴥𐴌𐴞 𐴒𐴡𐴔 𐴒𐴡𐴌𐴞𐴥𐴊𐴞𐴘𐴠.

⁵²𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢, 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴢, 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴢, 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌𐴠 𐴊𐴡𐴥𐴙𐴃𐴧𐴡 𐴀𐴝𐴙𐴐𐴧𐴠𐴥, 𐴃𐴝𐴌𐴝𐴥𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴋𐴝𐴈𐴝𐴣𐴙𐴄𐴢 𐴊𐴡𐴥𐴙𐴃𐴧𐴡 𐴀𐴝𐴙𐴐𐴧𐴡𐴥 𐴉𐴝𐴥𐴚𐴒𐴡𐴌𐴞 𐴃𐴡𐴓𐴟𐴖𐴝𐴌 𐴀𐴠𐴊𐴧𐴠 𐴓𐴝𐴍𐴞𐴥-𐴐𐴟𐴥𐴍𐴝 𐴓𐴡𐴘 𐴀𐴝𐴙𐴐𐴧𐴡𐴥 𐴊𐴠𐴥؟⁵³𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴉𐴡𐴃𐴧𐴞𐴥 𐴊𐴞𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴃𐴝𐴥𐴑𐴞𐴃𐴠 𐴃𐴡 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴖𐴡𐴌𐴠 𐴀𐴝𐴥𐴃𐴢 𐴕𐴡𐴥 𐴓𐴝𐴒𐴡; 𐴓𐴠𐴑𐴞𐴕 𐴀𐴠𐴇𐴡𐴥𐴕 𐴃𐴟𐴣𐴀𐴝𐴥𐴌𐴝𐴌 𐴀𐴡𐴑𐴃𐴡𐴥, 𐴎𐴠 𐴀𐴡𐴑𐴃𐴡𐴥𐴃𐴢 𐴀𐴝𐴣𐴊𐴝𐴤𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴠𐴥𐴌.“

𐴀𐴞𐴏𐴝𐴤𐴌𐴠 𐴉𐴞𐴃𐴡𐴌𐴡𐴌 𐴀𐴞𐴕𐴑𐴝𐴌

⁵⁴𐴃𐴝𐴌𐴉𐴡𐴌𐴠 𐴃𐴝𐴌𐴝𐴥 𐴀𐴞𐴥𐴁𐴝𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥𐴉𐴠𐴓𐴝𐴘 𐴁𐴡𐴌𐴡 𐴀𐴞𐴔𐴝𐴔𐴡𐴌 𐴒𐴡𐴥𐴌𐴡𐴃𐴢 𐴓𐴡𐴘𐴒𐴞𐴘𐴡𐴥𐴘. 𐴉𐴞𐴃𐴡𐴌 𐴊𐴟𐴌𐴠𐴥-𐴊𐴟𐴌𐴠𐴥 𐴃𐴝𐴥𐴘 𐴉𐴞𐴏𐴠𐴤-𐴉𐴞𐴏𐴠𐴤 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢.⁵⁵𐴃𐴝𐴌𐴝𐴥 𐴎𐴠𐴣𐴃𐴧𐴠𐴥 𐴀𐴟𐴍𐴝𐴥𐴕𐴡𐴌 𐴔𐴝𐴎𐴠𐴥 𐴀𐴡𐴦𐴙𐴕 𐴎𐴝𐴓𐴞 𐴉𐴟𐴥𐴖𐴝𐴣𐴃𐴞 𐴒𐴟𐴓𐴢 𐴒𐴡𐴌𐴞𐴥 𐴁𐴡𐴙𐴐𐴧𐴠𐴥, 𐴉𐴞𐴃𐴡𐴌 𐴀𐴡𐴥 𐴃𐴝𐴌𐴝𐴥𐴌 𐴉𐴟𐴥𐴖𐴝𐴣𐴃𐴞 𐴁𐴡𐴙𐴐𐴧𐴠𐴥.⁵⁶𐴀𐴠𐴑𐴒𐴗𐴝𐴥 𐴁𐴝𐴣𐴊𐴞 𐴔𐴝𐴘𐴝𐴉𐴟𐴖𐴝𐴘𐴠 𐴉𐴞𐴃𐴡𐴌𐴡𐴌𐴠 𐴀𐴡𐴦𐴙𐴕𐴡𐴌 𐴄𐴝𐴓𐴡𐴃𐴢 𐴁𐴡𐴘𐴍𐴝𐴤 𐴊𐴠𐴑𐴞𐴥, 𐴒𐴟𐴥𐴖𐴝𐴣𐴌𐴝𐴘 𐴏𐴝𐴀𐴘𐴢 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴘𐴡𐴥 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢.“

⁵⁷𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴕𐴑𐴝𐴌 𐴒𐴡𐴌𐴞𐴥𐴊𐴞𐴘𐴠, ”𐴇𐴠𐴥𐴘 𐴔𐴝𐴘𐴝𐴉𐴟𐴖𐴝, 𐴀𐴝𐴀𐴛 𐴀𐴞𐴥𐴁𐴝𐴌𐴠 𐴕𐴡 𐴏𐴞𐴕𐴞𐴥.“

⁵⁸𐴇𐴡𐴃𐴟𐴥𐴕 𐴁𐴝𐴦𐴊𐴠 𐴀𐴞𐴥𐴁𐴝𐴌𐴠 𐴀𐴝𐴌 𐴀𐴠𐴎𐴧𐴡𐴕𐴠 𐴊𐴠𐴑𐴞𐴥 𐴈𐴡𐴀𐴌 𐴊𐴠, ”𐴃𐴟𐴀𐴛 𐴘𐴡𐴥 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴃𐴧𐴟 𐴀𐴠𐴑𐴎𐴡𐴕.“
𐴔𐴡𐴕𐴃𐴡𐴌 𐴉𐴞𐴃𐴡𐴌𐴠 𐴈𐴡𐴀𐴌 𐴊𐴠, ”𐴕𐴡 𐴁𐴝𐴥𐴘, 𐴀𐴝𐴀𐴛 𐴕𐴡.“

⁵⁹𐴀𐴝𐴌𐴀𐴠𐴑 𐴒𐴡𐴥𐴕𐴋𐴝 𐴀𐴝𐴥𐴕𐴞𐴑 𐴁𐴝𐴦𐴊𐴠 𐴀𐴝𐴌 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴠 𐴘𐴡𐴥 𐴀𐴠𐴑𐴞𐴕𐴡𐴌 𐴏𐴝𐴥𐴀𐴣𐴃𐴠 𐴈𐴡𐴀𐴌 𐴊𐴠, ”𐴏𐴡𐴥𐴘𐴧𐴞, 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴘𐴡𐴥 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴁𐴝𐴤 𐴘𐴡𐴥 𐴒𐴝𐴓𐴞𐴓𐴡𐴌 𐴔𐴝𐴕𐴟𐴥𐴙𐴐𐴢.“

⁶⁰𐴔𐴡𐴕𐴃𐴡𐴌 𐴉𐴞𐴃𐴡𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴁𐴝𐴥𐴘, 𐴃𐴟𐴀𐴛 𐴀𐴞𐴀𐴕 𐴑𐴞𐴘𐴡𐴥𐴌 𐴁𐴝𐴦𐴁𐴟𐴃𐴠 𐴈𐴡𐴀𐴌 𐴀𐴝𐴀𐴛 𐴕𐴡 𐴎𐴝𐴕𐴞.“ 𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕 𐴈𐴡𐴀𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴌𐴝𐴃𐴝𐴑𐴟𐴌𐴝𐴤 𐴁𐴝𐴑 𐴊𐴞𐴘𐴠𐴥.⁶¹𐴇𐴠𐴥𐴃𐴟𐴕𐴡𐴃𐴢 𐴔𐴝𐴓𐴞𐴑𐴠 𐴉𐴞𐴥𐴌𐴞 𐴉𐴞𐴃𐴡𐴌𐴡𐴌 𐴀𐴟𐴎𐴟 𐴏𐴝𐴘𐴧𐴠𐴥. 𐴀𐴝𐴦𐴌 𐴉𐴞𐴃𐴡𐴌𐴡𐴃𐴧𐴟 𐴔𐴝𐴓𐴞𐴑𐴡𐴌 𐴈𐴡𐴃𐴝𐴤 𐴖𐴝𐴀𐴕 𐴔𐴡𐴕𐴡𐴃𐴢 𐴀𐴟𐴙𐴄𐴧𐴠𐴥, 𐴑𐴞 𐴈𐴡𐴘𐴓𐴠𐴥, ”𐴀𐴝𐴙𐴅𐴧𐴝 𐴌𐴝𐴃𐴝𐴑𐴟𐴌𐴝𐴤 𐴁𐴝𐴑 𐴊𐴞𐴁𐴝𐴌 𐴀𐴝𐴒𐴠 𐴃𐴟𐴘 𐴀𐴝𐴣𐴀𐴌𐴠𐴥 𐴃𐴞𐴕 𐴁𐴝𐴌 𐴀𐴞𐴕𐴑𐴝𐴌 𐴒𐴡𐴌𐴞𐴥𐴁𐴞.“⁶²𐴁𐴝𐴦𐴊𐴠 𐴀𐴞𐴥𐴁𐴝 𐴁𐴝𐴀𐴌𐴠 𐴕𐴠𐴦𐴓𐴞𐴒𐴡𐴥𐴘 𐴑𐴟𐴥𐴁𐴢 𐴈𐴝𐴣𐴊𐴝𐴃𐴢 𐴊𐴡𐴙𐴅𐴧𐴠.

𐴀𐴞𐴏𐴝𐴤𐴌𐴠 𐴀𐴞𐴥𐴕𐴐𐴝 𐴀𐴠𐴊𐴧𐴠 𐴔𐴝𐴌𐴝-𐴊𐴡𐴥𐴌𐴝 𐴒𐴡𐴙𐴅𐴧𐴠𐴥

⁶³𐴎𐴠𐴃𐴝𐴌𐴝𐴤 𐴀𐴞𐴏𐴝𐴤𐴌𐴠 𐴉𐴝𐴀𐴌𐴝𐴊𐴞 𐴀𐴝𐴐𐴧𐴞𐴥𐴓𐴢, 𐴃𐴝𐴌𐴝𐴥 𐴀𐴞𐴥𐴁𐴝𐴌𐴠 𐴀𐴞𐴥𐴕𐴐𐴝 𐴒𐴡𐴌𐴝𐴥𐴃𐴢 𐴀𐴠𐴊𐴧𐴠 𐴔𐴝𐴌𐴝𐴃𐴢 𐴊𐴡𐴙𐴅𐴧𐴠.⁶⁴𐴃𐴝𐴌𐴝𐴥 𐴀𐴞𐴥𐴁𐴝𐴌 𐴏𐴟𐴑 𐴁𐴝𐴣𐴊𐴞𐴥 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴡𐴌𐴠𐴥 𐴇𐴡𐴕𐴠 𐴔𐴝𐴙𐴅𐴧𐴠𐴥 𐴀𐴝𐴕𐴃𐴝𐴏𐴢 𐴒𐴡𐴌 𐴏𐴝𐴥𐴘؟“⁶⁵𐴇𐴠𐴥𐴕𐴊𐴞𐴓𐴧𐴝 𐴃𐴝𐴌𐴝𐴥 𐴀𐴞𐴥𐴁𐴝𐴌 𐴇𐴠𐴥𐴓𐴝𐴉𐴢 𐴁𐴞𐴐𐴞𐴤 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴈𐴡𐴀𐴘𐴢 𐴀𐴞𐴥𐴁𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴞𐴥𐴓𐴢.

𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴌 𐴔𐴟𐴀𐴕𐴃𐴟 𐴀𐴞𐴏𐴝𐴤

⁶⁶𐴁𐴞𐴀𐴕𐴧𐴝 𐴉𐴡𐴀𐴌 𐴉𐴝𐴥𐴙𐴄𐴧𐴠 𐴌𐴝𐴥𐴌, 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢 𐴀𐴡𐴌, 𐴘𐴝𐴥𐴕𐴞 𐴘𐴡𐴇𐴟𐴥𐴊𐴞𐴌 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴡𐴌 𐴔𐴟𐴅𐴞𐴓𐴞𐴥𐴐𐴢 𐴀𐴡𐴥𐴘𐴧𐴠; 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴉𐴡𐴥𐴃𐴟𐴖𐴝𐴘𐴞-𐴔𐴟𐴅𐴞𐴓𐴞𐴥𐴐𐴡𐴃𐴢 𐴀𐴝𐴕𐴞𐴤 𐴈𐴡𐴀𐴌 𐴊𐴠,⁶⁷”𐴃𐴟𐴀𐴛 𐴎𐴡𐴊𐴞 𐴔𐴡𐴀𐴏𐴞𐴤 𐴊𐴠 𐴀𐴡𐴥𐴘𐴓𐴠, 𐴀𐴝𐴣𐴀𐴌𐴝𐴌𐴠 𐴈𐴡𐴀.“
𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴘𐴢, 𐴃𐴟𐴣𐴀𐴝𐴥𐴌𐴝 𐴀𐴠𐴑𐴞𐴕 𐴕𐴡 𐴒𐴡𐴌𐴞𐴥𐴁𐴝,⁶⁸𐴀𐴝𐴦𐴌 𐴎𐴡𐴊𐴞 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴠𐴑𐴧𐴝𐴥𐴕 𐴏𐴟𐴥𐴖𐴝𐴓𐴢 𐴉𐴟𐴏𐴝𐴥𐴌 𐴒𐴡𐴌𐴞𐴥, 𐴃𐴟𐴣𐴀𐴝𐴥𐴌𐴝 𐴎𐴟𐴖𐴝𐴁𐴢 𐴕𐴡 𐴊𐴞𐴁𐴝𐴤.⁶⁹𐴓𐴠𐴑𐴞𐴕 𐴘𐴝𐴓𐴝 𐴓𐴡𐴥𐴃𐴞 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴓𐴧𐴝 𐴃𐴝𐴥𐴓𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴀𐴘𐴢 𐴃𐴝𐴥𐴑𐴞𐴁𐴡.“

⁷⁰𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴡𐴥𐴀𐴘𐴓𐴠 𐴃𐴟𐴀𐴛 𐴀𐴝𐴓𐴧𐴝𐴌 𐴉𐴟𐴖𐴝 𐴕𐴞𐴥𐴑𐴞؟“
𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴏𐴡𐴥𐴘𐴧𐴞 𐴈𐴡𐴀𐴌, 𐴀𐴡𐴥𐴘 𐴀𐴝𐴀𐴛.“

⁷¹𐴇𐴞𐴥𐴘𐴝𐴕𐴠 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴀𐴝𐴌 𐴑𐴞𐴦 𐴒𐴡𐴁𐴝𐴤 𐴓𐴝𐴒𐴠𐴌 𐴊𐴠𐴥؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴃𐴡 𐴇𐴞𐴥𐴘𐴝𐴕 𐴀𐴞𐴁𐴝𐴤𐴌 𐴕𐴞𐴎𐴡𐴌 𐴔𐴟𐴑𐴡𐴃𐴧𐴟 𐴉𐴟𐴥𐴙𐴕𐴧𐴞.“

The Word for the World International

https://app.library.bible/content/87faca8b51c22590