1 Peter5
1Taai kơi ađek, aku kung nek takóh bhươl lơq nek manưih truuih leq nôôq jarnah jarkaal ưng Chuôq Paq Manưih, kung nek manưih ting tapâng phơn cha-iil tabah đan bâân tapakah, bhơơl pahei nôôq takóh bhươl dhiq m'pơng adhi anó:2Phaai jư ban bha-nan katưưiq ưng Yaang Pleng tơơt m'pơng adhi anó, yuur têêng tarnêêng gamang ban paar, kah têêng kơi kajuq têêng, hơq sam lóóm kiêng têêng ting kơi Yaang Pleng, kung kah têêng palơq lóóm kanóq n'thaam kiêng malơơi malaai bơơi têêng kơi bhơt lóóm bhuui marhaal;3Lơq kung kah têêng pakơi nek nôôq kala jư lêi nôôq manưih đu Yaang Pleng ơi pajaau, klóóih dhiq ađek, nek xar kơi m'beq xamil đóng bha-nan katưưiq.4Hayơq lơh xók Yaang Jư Trưưu Bhơt Yaal bâân pakah, adhi anó e đơơp pei dhanưưk charnap cha-iil tabah kah alaq gluui.5Makơi ađek, nôôq parjơơk n'dhóm ơơi, phaai huuiq bhi nôôq takóh bhươl. Tabhơt phaai pei xơp rau pakatưưiq lóóm palơq xóng ađêi, taai Yaang Pleng jaklâk jơl manưih praaq laach, bơơi đóng ơơn phươk liêm leq manưih pakatưưiq lóóm.6Taai kơi ađek, phaai pa-êêp ađêi leq n'raal têi mataai raman ưng Yaang Pleng đóng Ađó hayuur adhi anó yuur kalóóng ganah targlap,7xók ơi pađơơp dyóp rau gamang karaang ưng ađêi đóng Ađó, taai Ađó gamang lêi adhi anó.8Phaai bhriêl n'taach, phaai hêch lêi. Manưih brau ưng adhi anó, nek abhưi, thê kơi sư tư gahuum ganheem, dyơq dhiêr praang, tabâân ngaai ađek đóng kóóp đah.9Phaai jaklâk jơl ađó, dyương tamưng kalóóng lóóm huuiq, n'nal kơi nôôq ganơr manưih huuiq ưng ađêi dhiq plok hóng katiêk phaai đơơp marau nôôq jarnah jakaal kơi achêk.10Bơơi xók ơi đơơp jarnah mưi ganah, Yaang Pleng ưng dyóp ơơn phươk liêm, Yaang ơi dhaloong adhi anó tơk palơq cha-iil tabah nh'chró ưng Ađó kalóóng Chuôq Paq Manưih, chênh Ađó e payuur, klôôq tamưng, têêng đóng karơ gamak lơq mưng grâ.11Nhan kataai kadhâng akoq chô leq Ađó đóng patơk nh'chró. A-meen.12Ve Siin-ven, mưi chanak adhi anó kah tadhơ ting kơi aku đơơp lêi, aku ơi xaraq kơi pagađóq đóng adhi anó, bhơơl pahêêl lơq lêi lua ađôk nek ơơn phươk liêm pâng dhalam ưng Yaang Pleng. Phaai dyương tamưng kalóóng ơơn phươk liêm ađek.13Akóón dhơn Chuôq dhiq Ba-bi-lôôn, piđó bâân chââih kơi adhi anó, tamóh tham adhi anó. Maak, akóón padruuih aku, kung kơi ađek.14Phaai tamóh tham xóng ađêi palơq chanum tanhơr.
Rââm nhan kơi yươq rauha tơơt palơq tabhơt adhi anó nek nôôq manưih kalóóng Chuôq Paq Manưih.
Rââm nhan kơi yươq rauha tơơt palơq tabhơt adhi anó nek nôôq manưih kalóóng Chuôq Paq Manưih.
FAR EAST BROADCASTING COMPANY