2 Peter1
1Si-môôn Phi-e-rơ, dhơn ratơơq lơq sưưq-đô ưng Jê-su Chuôq Paq Manưih, pagơơi nôôq manưih ơi pei đơơp palơq mưi lóóm huuiq kiiq bhlơng kơi nôôq yi kalóóng rau bhơt liêm ưng Yaang Pleng lơq Chuôq Paq nôôq he, nek Jê-su Chuôq Paq Manưih:2Rââm nhan ơơn phươk liêm lơq rau yươq rauha tahayuur grơơt lơh đóng adhi anó kalóóng rau đơơp n'nal Yaang Pleng lơq Chuôq Jê-su, Chuôq nôôq he.3Taai ơi đóng leq nôôq he dyóp rau malóóm tơk rau mamông lơq rau bhi huuiq ting Yaang mataai ưng Ađó, tââq rau đơơp n'nal Yaang ơi dhaloong kayua nôôq he tââq cha-iil tabah lơq rau mataai chrih ưng Ađó,4hơq tââq cha-iil mataai chrih ađek, Ađó ơi đóng leq nôôq he nôôq paraaq hươq akiiq bhlơng lơq gamak liêm, đóng đươi ađek adhi anó bâân val kơi nôôq manưih pâng phơn lóóm karnóq Yaang Pleng, loh tââq lum rau preh jir dhiq hóng katiêk tââq lóóm malóóch rau môôp lơt,5hayơq tââq taai ađek, xong xók pei đươi tabhơt rau tarang jêi bhơt lóóm, adhi anó phaai trul đóng lóóm huuiq ađêi liêm; tatrul đóng lóóm liêm kanóq tabech;6tatrul đóng kanóq tabech lóóm têêng kala; tatrul đóng lóóm têêng kala đuôh đơơp jruôn; tatrul đóng lóóm đuôh đơơp jruôn rau bhi huuiq;7tatrul đóng rau bhi huuiq lóóm kiêng nh'nhơr adhi anó; tatrul đóng lóóm kiêng nh'nhơr adhi anó lóóm tanhơr;8Taai xók nôôq rau ađek ve mat, lơq ve xưa raai kalóóng adhi anó, hơq tarnêêng vaaih tơk dhiq adhi anó kah chóóm nek talum kơi óóch xaraam môôiq kah machak kalóóng rau đơơp n'nal Chuôq nôôq he nek Jê-su Chuôq Paq Manưih.9Tââq nôôq rau ađek kah ve mat kalóóng manak manâ, hơq manưih achêk chênh nek ơi kabaang, bhơơm aroq, pâng tarlum buôn havil rau kajut pasek nôôq matu lơt ưng ađêi n'loom hei.10Kơi ađek nek, nhan móón adhi anó, phaai bhơt lóóm lơh dyơq đóng têêng tamưng dhariêng dhaloong lơq rau pei chââih ưng ađêi, taai xók pei têêng nôôq rau achêk, adhi anó dhakơi e kah mơ đuôh prơp kalơm.11Đươi ađek, tarnêêng jađaang mót kalóóng katiêk Yaang Pleng taluôn nh'chró ưng Chuôq lơq Chuôq paq nôôq he, nek Jê-su Chuôq Paq Manưih, e bâân pađơơp đóng kơi xưa raai đóng adhi anó.12Taai kơi ađek, aku e taluôn ravang pahei pató adhi anó leq nôôq rau ađek dhơ adhi anó ơi n'nal lơq bâân klôôq paliêm kalóóng paraaq dhalam xók ve mat dhiq adhi anó.13Bơơi la mơ đươnh aku bhiêk dyơq tơơt kalóóng pơơq tarpương ađôk, aku kanóq maar pâng dhalam kiêng têêng nek chut kayua adhi anó dhiq tarnêêng pató pahei.14Taai n'nal kơi tarnêêng rôôq pơơq tapương ưng aku nek rau ravang yuur vaaih, dhalam kơi Chuôq nôôq he, Jê-su Chuôq Paq Manưih kung ơi pakah đóng aku.15Dhơ kơi ađek, aku kung e tabhơt praan dhiq dyóp bhêêl, đóng têêng leq adhi anó pei katiêu nôôq rau ađôk lơh hóng yuur vôôiq ưng aku.16Taai nôôq yi ơi kah pakah đóng adhi anó tââq ting tađuui nôôq chiên kơi ngóq chóóm chik tavaaih tơk mataai raman lơq rau tabhral ưng Chuôq nôôq he, nek Jê-su Chuôq Paq Manưih, bơơi taai ơi val kơi nôôq manưih lêi dhiq mat ting lêi liêm ma-um ưng chênh Ađó.17Taai Ađó ơi đơơp pei rau bhi chap lơq cha-iil tabah tââq Yaang Pleng, nek Ama, xók dhariêng praaq tatun ađôk ơi bâân truuih đuui leq Ađó tââq Yaang Bhơt Bhi Cha-iil Tabah: “Ađôk nek Akóón Aku, Akóón nh'nhơr bơk ưng Aku, Aku lóng iêm lóóm leq Akóón achêk.”18Chênh nôôq yi kung ơi xâng dhariêng praaq ađek bâân truuih đuui tââq pleng, dyơq xók tơơt palơq Ađó dhiq bôôl liêm.19Đóng hayơq, nôôq yi ve paraaq manưih đââng taruuih lóng lalua mưng, nek rau hơq adhi anó dyơq têêng dhalam xók chamet tơk, dhiêp kơi chamet par-aang dhơu klaaq dyóól dhiq kalóóng kanam kanheet, đóng tơk xók brương tangêi dhahô brương lơq charo yuur ploh kalóóng lóóm adhi anó,20tââq n'nal rau ađôk laloom tââm, kơi dyóp rau paraaq manưih đââng taruuih kalóóng Paraaq Yaang Pleng kah bhral tââq rau kluôh lók n'tua ưng ngaai ađek.21Taai kah mơ ve paraaq manưih đââng taruuih lââng bâân đââng pagluh tââq karnóq kiêng ưng akóón manưih, bơơi xók bâân chơơng kađââng tââq Chuôq Yaang liêm, palââng ơi praaq gluh tââq Yaang Pleng.
FAR EAST BROADCASTING COMPANY